Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 18 Bible Online

Ko̍lo̍ni̍kō Di̍i̍ŋ Ndɔ̄ɔ̍ 18 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 18

¹Mi̍ Māsā Bɛ̍ndōo̍ Chɛ̄hōsi̍a̍fa̍tī o̍ su᷅l sūllo̍ pīla̍, ndu̍yɛ̍ mbo̍ sɔ̄lā bɛ̄ɛ̄le̍ŋ ta̍u̍. Ndu̍yɛ̍ mbo̍ kɛ̄ɛ̄sīāā le̍ mī wānāa̍ fu̍la̍ o̍ yu̍ŋgu̍ ndɔ̄ɔ̍ chōo̍ wa̍, a̍ wānāa̍ fu̍la̍ o̍ yu̍ŋgu̍ E̍ha̍bī, māsāa̍ le̍ I̍sɔ̄lūɛ̄ī wo̍ chōo̍ wa̍ mā kēna᷅ŋ la̍a̍ndūa̍a̍ vēllāa̍ vēllē.

²Mɛ̄ɛ̍ wɔ̄sīlā ti᷄ŋ lā hīōū, mi̍ Chɛ̄hōsi̍a̍fa̍tī o̍ ku̍ā Sāme̍e̍līāā Māsāa̍ E̍ha̍bī yīlɔ̄ɔ̍. O̍ ko̍ŋ, mi̍ E̍ha̍bī o̍ di̍ū sāa̍ a̍ nāūwa̍ cha᷅po̍, le̍ Chɛ̄hōsi̍a̍fa̍tī nda̍ wānāa̍ o̍ ku̍ɛ̄ kɔ̄ɔ̄lī. Ndu̍yɛ̍, mi̍ E̍ha̍bī, māsāa̍ le̍ I̍sɔ̄lūɛ̄ī o̍ dɛ̍ɛ̍nīāā Chɛ̄hōsi̍a̍fa̍tī le̍ mbō kɔ̍ ma̍lā ndu̍ sɔ̍ŋgɔ̄ɔ̍ Lu̍a̍mɔ̍tī chi̍e̍e̍, o̍ būŋgɛ̄ī Ki̍li̍a̍a̍dīve̍ ni᷄ŋ.

³Mi̍ E̍ha̍bī lo᷅ o̍ ko̍ŋ mbo̍ dīmūl Chɛ̄hōsi̍a̍fa̍tī āā, “I̍ ye̍e̍ma̍ mā kɔ̍ ma̍lā ya̍ sɔ̍ŋgɔ̄ɔ̍ Lu̍a̍mɔ̍tī.” Mi̍ Chɛ̄hōsi̍a̍fa̍tī di̍mūl ndu̍ āā, “Te̍le̍ŋ o̍ te̍le̍ŋ ŋ̄ bɛ̄ɛ̄ndi̍a̍ŋ pɛ̍, ya̍ bɛ̍ɛ̍ I̍ cho̍ ō bɛ̄ɛ̄ndīa̍ŋ, a̍ pūa̍a̍ nīa̍a̍ chɔ̄ūwa̍ lātūlu̍, le̍ mī kɔ̍ ma̍lā nu̍m sɔ̍ŋgɔ̄ɔ̍.”

⁴Kɛ̍ mi̍ Chɛ̄hōsi̍a̍fa̍tī o̍ di̍mūl E̍ha̍bī āā, “Ŋ̄ nyūna̍ wɔ̍ fɛ̍lɛ̍ŋ Mɛ̄lɛ̄ka̍ Ya̍a̍wɛ̄ɛ̄ dīōm a̍ ndi̍ o̍kɔ̄ɔ̄.”

⁵O̍ ko̍ŋ kɔ̍ɔ̍lī, mi̍ Māsāa̍ E̍ha̍bī ve̍e̍lū wānāa̍ su̍a̍ā le̍ Mɛ̄lɛ̄ka̍ wa̍ nāa̍ pi᷅lɛ̍, ā wa̍ kpo̍u̍ kpo̍u̍ kɛ̄mɔ̄ɔ̍ le̍ hīɔ̍ɔ̍lu̍, mbo̍ dīmūl nda̍ āā, “I̍ ye̍e̍ma̍ le̍ kɔ̄la̍ŋ sɔ̍ŋgɔ̄ɔ̍ Lu̍a̍mɔ̍tī, kɛ̍ I̍ ye̍e̍ma̍ mī sīna̍ tē I̍ kɔ̍, ɔ̄ɔ̄ tē I̍ ku̍ā le̍.” Mi̍ wānāa̍ su̍a̍ā le̍ Mɛ̄lɛ̄ka̍ wa̍ ā dīmūl ndu̍ āā, “Mɛ̄lɛ̄ka̍ dīmi̍ māā nūm kɔ̍ chi᷅ŋa̍la᷅ŋ nda̍, ō chō nu̍m kpāāyāa̍ kē mā yēm nda̍.”

⁶Kɛ̍ mi̍ Chɛ̄hōsi̍a̍fa̍tī nyu̍nā Māsāa̍ E̍ha̍bī āā, “Wāna̍ su̍a̍ā le̍ Mɛ̄lɛ̄ka̍ ō chēle̍ŋ cho̍ lɛ̍ na̍nu᷄ŋ, mbō nyūna̍l na̍a̍ Mɛ̄lɛ̄ka̍ Ya̍a̍wɛ̄ɛ̍ dīōm te̍?”

⁷Mi̍ Māsāa̍ E̍ha̍bī di̍mūl ndu̍ āā, “Po̍ pi᷅lɛ̍ chō mā vēēlū ndu̍ āā Māīka̍yā, po̍ I̍mi̍lāā wo̍, ndu̍ bɛ̍ɛ̍ wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍. Kɛ̍ ndu̍ ndu̍ I̍ tu̍l ndu̍ bɔ̄ɔ̍ le̍yɛ̍, fo̍ndōle̍ ō di̍mī sɔ̍ɔ̍ŋ wa̍ā lāchīŋ kɛ̄ndɛ̄ a̍ ya̍ o̍kɔ̄ɔ̄ le̍. Te̍le̍ŋ o̍ te̍le̍ŋ sɔ̄ɔ̍ŋ dɛ̍nɛ̍ pa̍la᷄ŋ ko̍ni̍ o̍ di̍mī a̍ ya̍ o̍kɔ̄ɔ̄ ni̍.” Mi̍ Māsāa̍ Chɛ̄hōsi̍a̍fa̍tī di̍mūl ndu̍ āā, “Di̍mī wɔ̄ le̍nde̍ le̍ Māsāa̍.”

⁸O̍ ko̍ŋ, mi̍ Māsāa̍ E̍ha̍bī o̍ ve̍e̍lū wānāā ndūāā bɛ̍ndūa̍a̍ ō pīlɛ̍, mbo̍ vīām ndu̍ le̍ mbō kɔ̍ ve̍e̍lū Māīka̍yā, po̍ I̍mi̍lāā wo̍ chɔ̍ chɔ̍.

⁹Ndu̍yɛ̍, māsāā ŋi̍ɔ̍ɔ̍ŋ nda̍ ha̍ā, a̍ wa̍ ā dōvīa̍ŋ o̍ nyɛ̄lā ndāla̍ lēmāsāla̍ŋ ni᷄ŋ, ma̍ wa̍ īchāli̍ nāa̍ nda̍ lūāā tɔ̍lɔ̄ɔ̍ o̍ dīō sāāsāa̍ Sāme̍e̍līāā i̍kɛ̍i̍ ya̍ o̍ bɛ̍ɛ̄. Ndu̍yɛ̍ ā wa̍ īchāli̍ o̍ kpe̍ŋgbe̍i̍la̍ ndāla̍ lēmāsāla̍ŋ chōo̍, mi̍ wānāa̍ su̍a̍ā le̍ Mɛ̄lɛ̄ka̍ wa̍, mā dīmūl nda̍ yōōŋgūla̍ Mɛ̄lɛ̄ka̍ la̍ŋ.

¹⁰Ndu̍yɛ̍ Sɛ̄dīka̍yā, po̍ Chēna̍a̍nāā wo̍, mbo̍ tūūlā lēēla̍ŋ a̍ chīli̍ŋnde̍. Mbo̍ dīmūl Māsāa̍ E̍ha̍bī āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, ‘A̍ lēēla̍ŋ nda᷅ŋ nya̍ chō Si̍i̍lūīāŋnda̍ chīŋa̍la᷅ŋ ni̍, mī lā yēm nda̍, ha̍a̍a̍ mī lā tɛ̄ɛ̄mbu̍u̍ nda̍ kpo̍u̍.’ ”

¹¹Ndu̍yɛ̍ wānāa̍ su̍a̍ā le̍ Mɛ̄lɛ̄ka̍ wa̍ ā tūa̍a̍ bɛ̍ɛ̍ kpo̍u̍, nyɛ̄ pīlɛ̍ kōŋ kpe̍ nda̍ wa̍ dīmīo̍o̍ ni̍. Nda̍ kpo̍u̍ ma̍ dīmūl Māsāa̍ E̍ha̍bī āā, “Chu̍a̍ pu̍a̍a̍ nu̍m a̍ chɔ̄ūwa̍ mī lā kɔ̍ chi᷅ŋa̍la᷅ŋ wa᷅ŋnda̍ Lu̍a̍mɔ̍tī. Mɛ̄lɛ̄ka̍ Ya̍a̍wɛ̄ɛ̄ chō nu̍m kpāāyāa̍ kē mā yēm nda̍.”

¹²Mi̍ wāna̍ nda̍ vēm Māīka̍yā kɔ̄ɔ̄lī wo̍ ō kɔ̍ di̍mūl Māīka̍yā āā, “Māīka̍yā, wānāa̍ su̍a̍ā le̍ Mɛ̄lɛ̄ka̍ wa̍ ā pīli̍a̍a̍ kpo̍u̍ ā dīmi̍ māā Māsāa̍ E̍ha̍bī o̍ cho̍ lākɔ̄ yōmɔ̄ɔ̄. Le̍la̍ŋ nu̍m bɛ̍ɛ̍ tē ā kūɛ̄ pɛ̍, le̍nde̍ ko̍ni̍ ŋ̄ dīmī ni̍.”

¹³Kɛ̍ mi̍ Māīka̍yā di̍mūl ndu̍ āā, “I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, nyɛ̄ o̍ nyɛ̄ Mɛ̄lɛ̄ka̍ di̍mu̍l la̍ pɛ̍, ndu̍ ya̍ I̍ di̍mī ni̍.”

¹⁴Mi̍ Māīka̍yā o̍ cha̍ŋ mbo̍ kūā o̍ māsāa̍ lo̍. Mɛ̄ɛ̍ o̍ fu̍u̍lu̍u̍ lo̍ŋ, mi̍ Māsāa̍ E̍ha̍bī di̍mūl ndu̍ āā, “Māīka̍yā, nyu̍na̍l na̍a̍ Mɛ̄lɛ̄ka̍ dīōm, ya̍ ni̍, Māsāa̍ Chɛ̄hōsi̍a̍fa̍tī ni̍, tē ŋ̄ kɔ̍ sɔ̍ŋgā a̍ wāŋnda̍ Lu̍a̍mɔ̍tī, ɔ̄ɔ̄ tē ŋ̄ ku̍ā lē.” Mi̍ Māīka̍yā di̍mūl ndu̍ āā, “Lā kɔ̍ mī lā kɔ̍ chi᷅ŋa̍la᷅ŋ nda̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ kpāāyāa̍ kē mī lā kɔ̍ yo᷅m nda̍.”

¹⁵Mi̍ Māsāa̍ E̍ha̍bī di̍mūl ndu̍ āā, “Māīka̍yā, le̍ te̍le̍ŋ o̍ te̍le̍ŋ I̍ cho̍ nu̍m sūɛ̍i̍ he̍ī dīmūllo̍, tē a̍ wa̍ ya̍ yōōŋgu̍ Mɛ̄lɛ̄ka̍a̍ dīmūllo̍ pɛ̍, nyɛ̄ Mɛ̄lɛ̄ka̍ dūāū nu̍m o̍ so̍ndō le̍ ya̍ wo̍, ndu̍ ŋ̄ dīmūl la̍ ni̍. I̍ ye̍e̍ma̍ mā di̍mu̍l la̍ chōōla̍ŋ te̍.”

¹⁶Mi̍ Māīka̍yā di̍mūl ndu̍ āā, “Nyɛ̄ ya̍ I̍ che᷅ o̍ yi̍lāŋndo̍ ni᷄ŋ ndo̍ cho̍ ho̍ō ni̍. I̍ che᷅ mi̍ pūa̍a̍ chɔ̄ūwa̍ I̍sɔ̄lūɛ̄ī a̍ sɛ̍ŋi᷄ŋ o̍ pēmbo᷄ŋ chōo̍, ma̍ wā bālɔ̄ɔ̍ mɛ̄ɛ̍ sāa̍ ā sɛ̄ŋīŋ nu̍a̍ā mā wa̍ bālɔ̄ɔ̍ ā nɔ᷅ wa̍nā ma̍ndāā le̍ yɛ̍. Mi̍ tu̍ɛ̍ī mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, ‘Pūa̍a̍ ha̍ā ā nɔ̍ wa̍nā o̍ wānā la̍chi̍ mbō kūɛ̄ a̍ nda̍ le̍. Le̍la̍ŋ ā sɔ̍ŋgā le̍, wānā o̍ wānā mi̍i̍ŋgu̍ chi̍e̍e̍.’ ”

¹⁷Mi̍ Māsāa̍ E̍ha̍bī o̍ di̍mūl Māsāa̍ Chɛ̄hōsi̍a̍fa̍tī āā, “I̍ di̍mu̍l nu̍m te̍, pōo̍ ho̍ō ō di̍mūl la̍ yōōŋgūla̍ Mɛ̄lɛ̄ka̍ kɛ̄ndɛ̄ le̍. Le̍ te̍le̍ŋ o̍ te̍le̍ŋ, sɔ̄ɔ̍ŋ kpūndɔ̍ŋ ko̍ni̍ o̍ di̍mī a̍ ya̍ o̍kɔ̄ɔ̄ ni̍.”

¹⁸Mi̍ Māīka̍yā di̍mūl ndu̍ āā, “Ya̍ŋ ndɔ̍ ni᷅la̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Mi̍ cha᷅ Mɛ̄lɛ̄ka̍ Ya̍a̍wɛ̄ɛ̍ īchāli̍ o̍ fo̍ndā ndɔ̍ lēmāsāa̍ chōo̍ cho̍o̍, o̍ kpe̍ŋgbe̍i̍ ndɔ̍ lēmāsāa̍ chōo̍. Nyɛ̄ o̍ nyɛ̄ yōōmāa̍ cho̍ chōo̍ cho̍o̍, ā wa̍ ndu̍ īsīsi̍ i̍kɛ̍i̍, ha̍ā wa̍ ndu̍ o̍ bā ndɔ̄ kɛ̍ndɔ̄ɔ̍ chōo̍, ha̍ā wa̍ ndu̍ o̍ bā ndɔ̄ mi̍āllo̍ chōo̍.

¹⁹Mi̍ tu̍ɛ̍ī mi̍ Mɛ̄lɛ̄ka̍ Ya̍a̍wɛ̄ɛ̄ o̍ nyu̍nā āā, ‘Ō nɛ̄ɛ̍nɛ̍ nɔ̍lā yɛ̍ mbō kɔ̍ hu̍ī Māsāa̍ E̍ha̍bī mbō kūɛ̄ a̍ chɔ̄ūwo̍ Lu̍a̍mɔ̍tī, le̍ mbō kɔ̍ sɔ̍lā pīɔ̍mndo̍ lo̍ŋ?’ Mi̍ nyāā yōōmāa̍ ha̍ā ā wā sūūki̍āŋndo̍ a̍ sūɛ̍i̍ he̍ī o̍kɔ̄ɔ̄, ha̍ā dīmi̍ pɛ̍ he̍ī, ha̍ā dīmi̍ ī chēle̍ŋ te̍ŋge̍ŋ.

²⁰O̍ ko̍ŋ, mi̍ cha᷅ mi̍ nyi̍na̍ pūm ō fūlā mbo̍ kɔ̍ si᷅m Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Mbo̍ dīmūl ndu̍ āā, ‘Ya̍ I̍ nɔ̍lā mī kɔ̍ hu̍ī ndu̍’. Mi̍ Mɛ̄lɛ̄ka̍ Ya̍a̍wɛ̄ɛ̄ nyu̍nā ndu̍ āā, ‘Vɛ̄ɛ̍nɛ̍ ŋ̄ chō yɛ̄ ndu̍ lōōkū lākɔ̄ hūī?’

²¹Mbo̍ dīmūl Mɛ̄lɛ̄ka̍ āā, ‘I̍ cho̍ tōsā mī wānāā ndūa̍a̍ su̍a̍ā le̍ Mɛ̄lɛ̄ka̍ wa̍ ā hūi̍ ndu̍, mā dīmu̍l ndu̍ chōōla̍ŋ.’ Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, ‘Kɔ̍ to̍sā mɛ̄ɛ̍ ŋ̄ dīmi̍ nu̍a̍ā yɛ̍, ā chō lākɔ̄ bā tīū.’ ”

²²Mi̍ Māīka̍yā o̍ hi̍a̍ū lāchī a̍ sūɛ̍i̍ nāa̍ Māsāa̍ E̍ha̍bī chu̍a̍, mbo̍ dīmūl E̍ha̍bī āā, “Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ o̍ to̍sa̍ ni̍ mi̍ wānāā nūm a̍ su̍a̍ā ha̍ā le̍ Mɛ̄lɛ̄ka̍ wa̍ ā dīmūl nu̍m chōōla̍ŋ, fo̍ndōle̍, ō chīi̍ chɛ̄lɔ̄ɔ̄ māā kpūndɔ̍ɔ̍ chō nu̍m kōmāl.”

²³O̍ ko̍ŋ, mi̍ Sɛ̄dīka̍ya̍ po̍ Chēna̍a̍nā wo̍, ō kūa̍ mbo̍ kɔ̍ lɔ̍ɔ̄ Māīka̍yā kpa᷅ŋnde̍, mbo̍ nyūnā ndu̍ āā, “Lɔ̍ɔ̍ kūɛ̍ɛ̍nɛ̍ nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō fāŋa̍ŋ yɛ̍ ya̍ dɔ̍ɔ̍ kɔ̄ɔ̄lī mbo̍ tūāl nu̍m kɔ̄ɔ̄lī, māā nūm ko̍ni̍ Mɛ̄lɛ̄ka̍ ō su̍a̍ā ni᷅ŋ o̍ nūmndo̍ ni̍?”

²⁴Mi̍ Māīka̍yā di̍mūl ndu̍ āā, “Pāa̍le̍ ŋ̄ chō nyāānɔ᷄ŋ mā kɔ̍ vi̍o̍ŋnu᷄ŋ o̍ lu̍mūi̍ mākɔ̄ɔ̍ ni᷄ŋ nde̍ŋ, pāa̍le̍ le̍ŋ ŋ̄ chō sīnā ni̍ māā, nyɛ̄ ya̍ I̍ di̍mi̍ wo̍ tōnya̍a̍ o̍ cho̍ ni̍.”

²⁵Mi̍ Māsāa̍ E̍ha̍bī di̍mūl pūa̍a̍ ndūa̍a̍ chɔ̄ūwa̍ ō pīlɛ̍ āā, “Bi̍i̍ Māīka̍yā mā kūɛ̄ a̍ ndu̍ nāa̍ A̍mɔ᷅ŋ chu̍a̍, o̍ cho̍ māsa̍ chi̍o̍o̍ wo̍, nda̍ Cho̍wa̍sī po̍ nī.

²⁶Kɔ̍ di̍mūl nda̍ māā ya̍ Māsāa̍ E̍ha̍bī di̍mi̍ māā ā dɔ̄u̍ po̍o̍ ho̍ō o̍ chīɛ̄ī mānyūmndo̍ ni᷄ŋ mbō lo̍ lo̍ŋ ha̍a̍a̍, mbō lo̍ o̍ ko̍ŋ, mī kɔ̍ chi̍ī sɔ̍ŋgɔ̄ɔ̍ mī mi̍i̍ŋgu̍ na̍ŋ yɛ̍lɛ̍kɛ̍lɛ̍ɛ̍. Ndu̍yɛ̍ mā di̍mu̍l nda̍ māā ō fūla̍ o̍ bēe̍dīi̍yo̍ kɔ̄ɔ̄lī, a̍ mɛ̄ŋnda̍ŋ, māā ā ke᷅ ndu̍ nyɛ̄ o̍ nyɛ̄ dīāā chēle̍ŋ te̍.”

²⁷Mi̍ Māīka̍yā di̍mūl ndu̍ āā, “Māsāa̍ E̍ha̍bī, tē ā kūɛ̄ o̍ sɔ̍ŋgɔ̄ kōŋ pɛ̍, mā mi̍i̍ŋgu̍ na̍nu᷄ŋ yo̍o̍mū, mɛ̄ɛ̍ nyɛ̄ ya̍ I̍ di̍mu̍l nu̍mndo̍ ō cho̍ Mɛ̍lɛ̄ka̍ Ya̍a̍wɛ̄ɛ̄ le̍ dɔ̍ū ya̍ ndu̍ o̍ sōndō le̍, mɛ̄ɛ̍ ya̍ pi̍la̍ kɛ̍ɛ̍si̍a̍a̍ ndu̍ ni̍.” Mi̍ Māīka̍yā lo᷅ o̍ ko̍ŋ mbo̍ dīmūl wāŋnda̍ āā, “Lā kɛ̄si̍ŋ su̍ɛ̍i̍ ya̍ I̍ di̍mi̍ he̍ī ve̍ o̍ lākɔ̄l.”

²⁸O̍ ko̍ŋ kɔ̍ɔ̍lī, mi̍ māsāā ŋi̍ɔ̍ɔ̍ŋnda̍ ha̍ā, E̍ha̍bī, māsāa̍ le̍ I̍sɔ̄lūɛ̄ī, a̍ Chɛ̄hōsi̍a̍fa̍tī, māsāa̍ le̍ Chu̍dā, mā chūā pūa̍a̍ ndāa̍ chɔ̄ūwa̍ ma̍ kūā Lu̍a̍mɔ̍tī chi̍e̍e̍, le̍ ndu̍ kɔ̄la̍ŋ chīŋa̍la᷅ŋndo̍.

²⁹Mi̍ Māsāa̍ E̍ha̍bī o̍ lo᷅ o̍ ko̍ŋ mbo̍ dīmūl Māsāa̍ Chɛ̄hōsi̍a̍fa̍tī āā, “Mɛ̄ɛ̍ na̍a̍ ŋ̄ chō tōsā yɛ̍ cho̍ ho̍ō ni̍, tē ŋ̄ wa̍ sɔ̍ŋgɔ̄ɔ̍ pɛ̍, ya̍ I̍ cho̍ nyɛ̄lā chēle̍ŋ wōōnɔ᷄ŋ, mī nūm nūm wa̍ a̍ nyɛ̄lā nūmnda̍ lēmāsāla̍ŋ lēkɔ̄ɔ̍, ko̍ŋ to̍sā ni̍ wāŋnda̍ Si̍i̍līāā a̍ bi̍ī lɛ̍ na̍a̍ bīlā le̍.” O̍ ko̍ŋ, mi̍ Māsāa̍ E̍ha̍bī o̍ so̍lī nyɛ̄lā ndɔ̄la̍ lēmāsāla̍ŋ mbo̍ wōōnu᷄ŋ nyɛ̍lā chēle̍ŋ, ma̍ kūā le̍ sɔ̍ŋgɔ̄ɔ̍.

³⁰Ndu̍yɛ̍ mi̍ Māsāa̍ Si̍i̍līāā o̍ si̍lā pūa̍a̍ chɔ̄ūwāa̍ wa̍ nyɛ̄lā nyāāna᷄ŋnda̍ su̍a̍ā ā nāŋ nda̍ŋ bōlle̍ wa̍, māā tē ā wa̍ sɔ̍ŋgɔ̄ɔ̍ ho̍ō pɛ̍, nda̍ to̍fā wānā o̍ wānā che̍le̍ŋ te̍, māā māsā bɛ̍ndōo̍ I̍sɔ̄lūɛ̄ī ndu̍ pīlɛ̍ kpe̍ nda̍ wa̍ hɔ᷅lte̍ŋ kɔ̄ɔ̄lī ni̍.

³¹Mɛ̄ɛ̍ pūa̍a̍ ha̍ā ā chē Māsāa̍ Chɛ̄hōsi̍a̍fa̍tī, ā chē ndu̍ ko̍ bɛ̍ɛ̍ āā Māsāa̍ E̍ha̍bī, māsāa̍ I̍sɔ̄lūɛ̄ī ni̍, ma̍ kɔ̍ chi᷅ŋa̍la᷅ŋ ndu̍. O̍ ko̍ŋ, mi̍ Māsāa̍ Chɛ̄hōsi̍a̍fa̍tī o̍ ma᷅l yi̍o̍o̍ chōo̍ cho̍o̍ kpe̍le̍ŋ. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍lā ndu̍, mbo̍ tōsā mī pūa̍a̍ Si̍i̍līāā a̍ fāŋa᷄ŋ ndu̍ kɔ̄ɔ̄lī.

³²Mɛ̄ɛ̍ nda̍ sīna̍ māā ō cho̍ Māsāa̍ E̍ha̍bī le̍, ma̍ fāŋa᷄ŋ ndu̍ kīlta̍ŋ kɔ̄ɔ̄lī.

³³Kɛ̍ mi̍ ī yɔ̄nu᷄ŋ mɛ̄ɛ̍ so̍vɛ̄i̍ya̍ Si̍i̍līāā ō pīlɛ̍ wūu̍ chīŋɔ̍le̍ŋ o̍ hūēīye̍ ni᷄ŋ, mi̍ chīŋɔ̍le̍ŋ lē kɔ̍ vi̍ɔ̄ Māsāa̍ E̍ha̍bī, mi̍ lē kēēkū nāa̍ dōma̍ chɔ̄u̍ wa̍ ndu̍ lēkɔ̄ɔ̍ wo̍ ō bɔ̄ŋa̍ wa̍, mi̍ lē lūɛ̄ī ndu̍ o̍ ŋ̄dīāl. Mi̍ Māsāa̍ E̍ha̍bī ma᷅l yi̍o̍o̍ mbo̍ dīmūl wāna̍ wa̍ kɔ̄la̍ŋ a̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋ ndo̍ wo̍ āā, “Mu̍li̍ŋ mā mi̍i̍ŋgu̍ a̍ ya̍, ā yɔ̄ŋu̍l la̍ bɔ̄ɔ̍.”

³⁴Kɛ̍ sɔ̍ŋgɔ̄ɔ̍ wa̍ hīōūwɔ̄ɔ̍ lāchī a̍ tūūlo̍o̍ kpe̍e̍kpe̍i̍ pa̍a̍le̍ le̍ŋ. Māsāa̍ E̍ha̍bī o̍ wa̍ īchāli̍ o̍ nyɛ̄ su̍a̍a̍ ā nāŋ ndo̍ ni᷄ŋ, mbo̍ mūlī hɔ̄lla̍ kūmbū so̍vɛ̄i̍ya̍ Si̍i̍līāā, mbō tōfā mɛ̄ɛ̍ chɔ̄ūwo̍ wa̍ kɔ̄la̍ŋ yɛ̍. A̍ pɛ̍ŋgu̍ fīti̍līo̍o̍ ki̍nɛ̍i̍, mi̍ Māsā Bɛ̍ndōo̍ E̍ha̍bī o̍ mālnu᷄ŋ kɔ᷅l.