Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 19 Bible Online

Ko̍lo̍ni̍kō Di̍i̍ŋ Ndɔ̄ɔ̍ 19 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 19

¹O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Chɛ̄hōsi̍a̍fa̍tī, māsāa̍ le̍ Chu̍dā, o̍ mi̍i̍ŋgū yɛ̍lɛ̍kɛ̍lɛ̍ɛ̍ o̍ chīɛ̄ī ndɔ̍ lēmāsāa̍ Chūlu̍sɛ̄lɛ̄m.

²O̍ ko̍ŋ, mi̍ wāna̍ su̍a̍ā le̍ Mɛ̄lɛ̄ka̍ wo̍ Chɛ̍hū, po̍ Ha̍na̍nī wo̍, ō kūā nāa̍ Māsāa̍ Chɛ̄hōsi̍a̍fa̍tī chu̍a̍. Mbo̍ kɔ̍ di̍mūl ndu̍ āā, “Le̍ yɛ̄ɛ̄nɛ̍ ŋ̄ kɔ̍ mālā yɛ̄ wānāā kɔ̄l vēsɛ̍i̍ya̍ ha̍ā sɔ̍ŋgɔ̄ɔ̍, ma̍ kāālā wānāa̍ tu̍l ha̍ā Mɛ̄lɛ̄ka̍ Ya̍a̍wɛ̄ɛ̍ yɛ̄le̍ŋ nda̍? Le̍ nyɛ̄ ŋ̄ tōsa̍ ko̍ŋ ndo̍, Mɛ̄lɛ̄ka̍ Ya̍a̍wɛ̄ɛ̄ ō dɔ̍u̍nu᷄ŋ tu̍mbe̍ a̍ nūm.

³Mi̍ chē bɛ̍ɛ̍, mi̍ Mɛ̄lɛ̄ka̍ dūāūnu᷄ŋ tu̍mbe̍ a̍ nūm ni̍, kɛ̍ ndu̍yɛ̍ a̍ to̍sā sɔ̄ɔ̍ŋ ŋ̄ ti᷄ŋ mi̍ ŋ̄ bɛ̄ndā. Mu̍ŋ yɔ̍nūŋ ni̍, māā tɛ̄ɛ̄mbūū ŋ̄ tɛ̄ɛ̄mbu̍u̍ nyɛ̄lā wāŋnda̍ sīmi̍ māā māsūŋgbu̍ le̍ Mɛ̄lɛ̄ka̍ A̍si̍ɛ̍lūā sōōlūūwo̍ o̍ lɛ̄ŋnde̍ lēŋ ni᷄ŋ, ndu̍yɛ̍ ma̍ dūāū kɔ̄l nūmndo̍ o̍ hɛ̄na᷄ŋ Mɛ̄lɛ̄ka̍a̍ tōsāa̍ ndo̍.”

⁴Chɛ̄hōsi̍a̍fa̍tī wa̍ īchāli̍ Chūlu̍sɛ̄lɛ̄m. Kɛ̍ mbo̍ bālū wāŋnda̍ chōo̍, chɔ̍ŋ a̍ Bīɛ̄ɛ̄si̍ɛ̍bā chi̍e̍e̍ mbo̍ kūā le̍nde̍ a̍ lɛ̄ŋndē īpēmbūle̍ŋ E̍fi̍lūēm. Mbo̍ dɛ̄ɛ̄nīāā nda̍ le̍ mā mīīŋgu̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍ sōōlūūwo̍.

⁵O̍ ko̍ŋ kɔ̍ɔ̍lī, mbo̍ hɛ̄lī chɔ̍ɔ̍chi̍a̍a̍ mbo̍ hāndū nda̍ o̍ chi̍e̍e̍ŋ wa̍ ŋ̄ bɛ̄ɛ̄ndīāā ŋ̄ ka̍lā ka̍la̍ŋ o̍ lɛ̄ŋndē Chu̍dāle̍ŋ ni᷄ŋ ndo̍ŋ, o̍ chi̍e̍e̍ bɛ̍ndū o̍ chi̍e̍e̍ bɛ̍ndū ni᷄ŋ,

⁶mbo̍ dīmūl chɔ̍ɔ̍chi̍a̍a̍ o̍ hɛ̍li̍ ka̍ŋ nda̍ āā, “Lā mānda̍ŋ a̍ mɛ̄ɛ̍ nya̍ chō wā wāŋnda̍ sɔ̄ɔ̍ŋ dīmīo̍o̍ tɛ̄ɛ̄ŋ yɛ̍. Lā di̍mi̍ īsɔ̄ɔ̍ o̍ īsɔ̄ɔ̍ o̍ kpāāya̍ īwāna̍ chi̍e̍e̍ya̍a̍ ni᷄ŋ te̍, kɛ̍ lā dīmi̍ mu̍ŋ o̍ kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ. Mɛ̄lɛ̄ka̍ chō wā lātūlu̍ a̍ nya̍ mbō chɔ᷄m nya̍ mɛ̄ɛ̍ nya̍ kīālū ya᷅ma̍ŋ yɛ̍.

⁷Le̍la̍ŋ, lā nɔ̍ si̍o̍o̍ŋīī Mɛ̄lɛ̄ka̍ Ya̍a̍wɛ̄ɛ̄ ve̍. Lā mānda̍ŋ a̍ nyɛ̄ nya̍ nɔ̄ le̍ tōsāa̍ wo̍. Kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, ō chɛ᷅l ka̍fāla̍ŋ, sīm kɔ̄ɔ̄līo̍o̍, a̍ lūɛ̄īyɔ̄ɔ̄ ni᷄ŋ ndo̍ le̍.”

⁸O̍ ko̍ŋ kɔ̍ɔ̍lī, Chūlu̍sɛ̄lɛ̄m bɛ̍ɛ̍, mi̍ Chɛ̄hōsi̍a̍fa̍tī hɛ̍lī vɛ̄lɛ̄ Li̍va̍īya̍, a̍ wānāā sōlīāā lāsa̍lāa̍ ā ti᷄ŋ, a̍ bōlīī lāyu̍ŋgu̍e̍i̍ I̍sɔ̄lūɛ̄ī, mbo̍ yūlū nda̍ le̍ mā wa̍ kɔ̍ɔ̍sɔ̍ɔ̍ a̍ wānāa̍ tɛ̍ɛ̍mbūū sa̍wāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ nda̍, ndu̍yɛ̍ vɛ̍lɛ̄, le̍ mā wa̍ sɔ̄ɔ̍ŋ dīmīo̍o̍ wānāa̍ cho̍ īchāli̍ Chūlu̍sɛ̄lɛ̄m nda̍ tɛ̄ɛ̄ŋ.

⁹O̍ ko̍ŋ, mbo̍ kē nda̍ di̍o̍o̍ mbo̍ dīmūl nda̍ āā, “Lā tōsa̍ wa̍li̍ nya̍ nɔ̄ le̍ tōsāa̍ wo̍ a̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍, mī lā tōsa̍ ndu̍ o̍ tōnya̍a̍ chōo̍. Ndu̍yɛ̍ mī lā tōsa̍ ndu̍ a̍ kɔ̄ltā nyāla̍ŋ kpo̍u̍.

¹⁰Te̍le̍ŋ o̍ te̍le̍ŋ, tē chāa̍ŋāā nyāa̍ pi̍la̍ chi̍e̍e̍ya̍, a̍ cho̍ īchāli̍ o̍ chi̍e̍e̍ŋ bɛ̍ndo᷄ŋ ni᷄ŋ nda̍ ā chūu̍ nya̍ sūɛ̍i̍ di̍yāā wāna̍ chi̍e̍e̍ pɛ̍, kɛ̄lɛ̄ŋgāā le̍ mbō wa̍ sūɛ̍i̍ tɛ̍ɛ̍mbāā sāwa̍ Mɛ̄lɛ̄ka̍a̍ pɛ̍, tē lā wa̍ kɔ̍ɔ̍sɔ̍ɔ̍ a̍ wānāā kāŋ pɛ̍, lā wa̍ sa̍kpō o̍ kɔ̍ɔ̍sɔ̍ ko̍ŋ ni᷄ŋ. Tē ō cho̍ ko̍ŋ te̍, mɛ̄ɛ̍ nya̍ bɛ̍ɛ̍ lā tɛ̄ɛ̄mbu̍u̍, mi̍ lā tōsā yɔ̄ŋ wɔ̄ɔ̍ŋndo̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Tē lā dīmi̍ to᷅nya̍a̍ nda̍ tɛ̄ɛ̄ŋ te̍, nya̍ ni̍, a̍ chāa̍ŋāā nyāā pi̍la̍ chi̍e̍e̍ ka̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ cho̍ tu̍mbe̍ dɔ̍u̍nɔ᷄ŋ a̍ nya̍. Kɛ̍ tē lā tōsa̍ nyɛ̄ o̍ di̍mu̍l nya̍ le̍ tōsāa̍ wo̍ pɛ̍, o̍ te̍mbū kɔ̍l a̍ nya̍ le̍.

¹¹Ndu̍yɛ̍, īsɔ̄ɔ̍ o̍ īsɔ̄ɔ̍ cho̍ a̍ Mɛ̄lɛ̄ka̍ Ya̍a̍wɛ̄ɛ̄ o̍kɔ̄ɔ̄, Āmālu̍i̍yā, māsa̍ wānāā sōlīāā lāsa̍lāa̍, ndu̍ nɔ̍ dīōm mɛ̄ɛ̄lāa̍ le̍ dīmīo̍o̍ a̍ mu̍ŋ o̍kɔ̄ɔ̄ ni̍. I̍sɔ̄ɔ̍ o̍ īsɔ̄ɔ̍ cho̍ sūɛ̍i̍ lēlɛ̄ŋ, Sɛ̄bāda̍yā, po̍ I̍si̍mɛ̄ɛ̄l wo̍, o̍ cho̍ māsa̍ ībūŋgāa̍ le̍ yu̍ŋgo̍o̍ Chu̍dā wo̍, ndu̍ nɔ̍ dīōm mɛ̄ɛ̄lāa̍ le̍ dīmīo̍o̍ a̍ mu̍ŋ o̍kɔ̄ɔ̄ ni̍. Ndu̍yɛ̍, Li̍va̍īya̍, nda̍ cho̍ wā wa̍llo̍ a̍ nya̍ la̍tu̍lu̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ ni̍, ndu̍yɛ̍ mā chē māā nyɛ̍ o̍ nyɛ̍ nɔ̍ le̍ tōsa᷄ŋ ndo̍ ō tōsa̍ŋ. Lā nɔ̍ kɔ᷅l sīmūlāa̍ o̍ sɔ̄ɔ̍ŋ mu̍ŋ tōsāa̍ ni᷄ŋ, ndu̍yɛ̍ mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ wa̍ a̍ wānāa̍ cho̍ wā sa̍kpō o̍ sɔ̄ɔ̍ŋ mu᷅ŋ tōsāa̍ ni᷄ŋ nda̍ lātūlu̍ fɔ̍.”