Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 21 Bible Online

Ko̍lo̍ni̍kō Di̍i̍ŋ Ndɔ̄ɔ̍ 21 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 21

¹Mi̍ Chɛ̄hōsi̍a̍fa̍tī wu᷅, ma̍ chɔ̄ ndu̍ o̍ chi̍e̍e̍ bɛ̍ndu̍ Dēēve̍ wo̍, nāa̍ nda̍ chɔ᷅ fi̍nyāā ndūāā ma̍māa̍ wa̍. O̍ ko̍ŋ, mi̍ Chɛ̄ho̍lūām po̍ ndɔ̄ o̍ mi̍i̍ŋgū māsā o̍ fōōfo̍ ndɔ̄ɔ̍.

²Chɛ̄ho̍lūām, o̍ mi̍i̍ŋgu̍ māsāa̍ o̍ fōōfo̍ Chɛ̄hōsi̍a̍fa̍tī fi̍nyā ndɔ̄ wo̍ wo̍, ndu̍ o̍o̍ nɔ̍ pɔ̄mbūa̍a̍ ā ŋɔ᷄mpu᷅m, nda̍ yɔ̍nūŋ ni̍ māā, Āsālu̍i̍yā, a̍ Chɛ̍yɛ̄ɛ̄, a̍ Sɛ̄kāla̍yā, a̍ Āsālu̍a̍hū, a̍ Ma̍i̍kɛ̄l, a̍ Sīɛ̄fāta̍yā.

³Ndu̍yɛ̍ mi̍ Chɛ̄hōsi̍a̍fa̍tī fi̍nyā ndā, o̍ ke᷅ nda̍ nyɔ̄ɔ̍ŋ ta̍u̍ ta̍u̍, mu̍ŋ yɔ̍nūŋ ni̍ māā ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ, a̍ nyɛ̄m ba̍ā kālāŋ yɛ̍ yɔ̍ŋ. Ndu̍yɛ̍ ō kɛ᷅ kɛ̍, mbo̍ kɛ̄sī ndu̍ chi̍e̍e̍ŋ nda̍ bɛ̄ɛ̄ndi̍a̍a̍ Chu̍dā ŋ̄ kālā ka̍lā wo̍ŋ ō pīlɛ̍ lāchī. Kɛ̍ mbo̍ yūlū Chɛ̄ho̍lūām po̍ ndɔ̄ le̍ mbō hu᷄ŋ mi̍i̍ŋgū o̍ fōōfo̍ ndɔ̄ɔ̍, kāni̍ fu̍u̍le̍ ndu̍ wa̍ po̍ ndɔ̍ tāso̍o̍ ni̍.

⁴Mɛ̄ɛ̍ Chɛ̄ho̍lūām o̍ mi̍i̍ŋgu̍ o̍ māsāle̍ fi̍nyā ndɔ̄le̍ŋ chōo̍, ndu̍yɛ̍ mbo̍ chāl ni̍ko̍ nyɛ᷅ kɛ̄ndɛ̄ kɛ̍ndɛ̄ o̍ lēmāsa̍, mbo̍ dīū pɔ̄mbūāā ndūa̍a̍ kpo̍u̍, o̍ ko̍ŋ kɔ̍ɔ̍lī, mbo̍ dīū vɛ̄lɛ̄ wānāā bɛ̄ndūa̍a̍ I̍sɔ̄lūɛ̄ī ā ti᷄ŋ.

⁵Chɛ̄ho̍lūām o̍ wa̍ wɔ̄sīla̍ŋ be̍le̍-ya̍a̍ a̍ lā tīɔ̍ɔ̍ŋ, mbo̍ sīmnu᷄ŋ ma̍sā bɛ̍ndōo̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m, chi̍e̍e̍ le̍bo᷅llo̍ le̍ Chu̍dā, le̍ wɔ̄sīla̍ŋ lā ŋɔ̄ma̍a̍.

⁶Ndu̍yɛ̍ ka̍ālā wɔ̄ɔ̍ŋndā māsāā bɛ̍ndūa̍a̍ I̍sɔ̄lūɛ̄ī a̍ wa̍ chōo̍ la̍ŋ, ndu̍ bɛ̍ɛ̍ mbo̍ tūāl ka̍ālā lāŋ kɔ̄ɔ̄lī, mɛ̄ɛ̍ Māsā Bɛ̍ndōo̍ E̍ha̍bī nda̍ yu̍ŋgu̍ ndɔ̄ɔ̍ ā tōsa̍ yɛ̍. Chɛ̄ho̍lūām ko̍ŋ yɛ̄, chūa̍ Māsāa̍ E̍ha̍bī wo̍, ndu̍ wa̍ ndu̍ o̍ bā o̍ nɔ̄ɔ̍ ni᷄ŋ ni̍. Mi̍ Chɛ̄ho̍lūām o̍ to̍sā yɔ̄ŋ wɔ̄ɔ̍ŋndo̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.

⁷Kɛ̍ le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ o̍ yi̍i̍ sīndɛ̄ nda̍ bu̍ɛ̍ī ndɔ̄ɔ̍ Dēēve̍ wo̍, o̍ chɛ᷄l mbo̍ tɛ̄ɛ̄mbu̍u̍ māsāle̍ ndɔ̄le̍ŋ te̍. Fo̍ndōle̍, mbo̍ chūe̍l Dēēve̍ bu̍ɛ̍ī ndɔ̍ būŋgɛ̄i̍ māā le̍ fɛ̍ɛ̍ŋ a̍ fɛ̍ɛ̍ŋ, o̍ yu̍ŋgu̍ ndɔ̄ɔ̍ chōo̍ māsāle̍ŋ Chu̍dā le̍ wa᷅ ni̍ŋ ni̍.

⁸Bōōndi̍i̍ Chɛ̄ho̍lūām o̍ wa̍ māsā lɛ̄ŋndē Chu̍dāle̍ŋ chōo̍ ve̍, mi̍ wāŋnda̍ I̍dɔ̄m a̍ si̍mūl wāŋnda̍ Chu̍dā, ma̍ fūlā wāŋnda̍ Chu̍dā o̍ bā bɛ̄ŋgu̍, ma̍ kīālū māsāle̍ŋ a̍ bā ndā.

⁹Ō wa̍ a̍ pāa̍le̍ pi᷅lɛ̍, mi̍ Māsā Bɛ̍ndōo̍ Chɛ̄ho̍lūām o̍ chu̍ā wānāa̍ wa̍ pūa̍a̍ ndūa̍a̍ chɔ̄ūwa̍ bōlle̍ wa̍, a̍ nyɛ̄lā ndāla̍ nya̍a̍na᷄ŋnda̍ su̍a̍a̍ ā nāŋ nda̍ŋ kpo̍u̍, ma̍ kūā le̍ wāŋnda̍ I̍dɔ̄m chīŋa̍la᷅ŋndo̍ a̍ sɔ̍ŋgɔ̄ɔ̍. Kɛ̍ mi̍ wāŋnda̍ I̍dɔ̄m a̍ kɔ̍ ba̍lū ndu̍ nda̍ bōlīī pūa̍a̍ ndūa̍a̍ chɔ̄ūwa̍. Mɛ̄ɛ̍ nyūmnda̍ŋ mā tōl īchɔ̄llo̍, mi̍ Māsāa̍ Chɛ̄ho̍lūām nda̍ bōlīī pūa̍a̍ ndūa̍a̍ chɔ̄ūwa̍ ā nūūvīāā nɛ̄īla̍ŋ ma̍ nyāānu᷄ŋ.

¹⁰O̍ ko̍ŋ, mi̍ wāŋnda̍ I̍dɔ̄m a̍ fu̍lā lɛ̄ŋndē Chu̍dāle̍ŋ o̍ bā bɛ̄ŋgu̍. Chɔ̍ŋ ni᷅ŋ a̍ te̍le̍ŋ ko̍ŋ mbo̍ kɔ̍ bi̍ī a̍ pāa̍le̍ hāūle̍ŋ nde̍ŋ, wāŋnda̍ I̍dɔ̄m a̍ mi̍i̍ŋgu̍ lɛ̍ lɛ̄ŋndē Chu̍dāle̍ŋ o̍ bā bɛ̄ŋgu̍ le̍. Ndu̍yɛ̍ a̍ te̍le̍ŋ pi᷅lɛ̍ ko̍ŋ, wāŋnda̍ Li̍bi̍nāā bɛ̍ɛ̍, ma̍ fūlā wāŋnda̍ Chu̍dā o̍ bā bɛ̄ŋgu̍, ma̍ wānu᷄ŋ a̍ bā nda̍. Kāni̍ fo̍ndōle̍, le̍ kɛ̄ɛ̄ Chɛ̄ho̍lūām o̍ kɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndūāā ma̍māa̍ wo̍.

¹¹Ndu̍yɛ̍ mbo̍ tāŋgūl vɛ̄lɛ̄ fo̍ndāŋnda̍ŋ le̍ mɛ̄lɛ̄ka̍a̍ chēle̍ŋnda̍ sōōlūūwo̍ o̍ pēmbo᷄ŋ chōo̍ o̍ lɛ̄ŋndē Chu̍dāle̍ŋ ni᷄ŋ. O̍ ko̍ŋ, mbo̍ tōsā mi̍ wāŋnda̍ Chūlu̍sɛ̄lɛ̄m a̍ wāŋnda̍ Chu̍dā, a̍ to̍sā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍, ma̍ fāŋa̍ŋ o̍ nɛ̄i̍ Mɛ̄lɛ̄ka̍ chōo̍.

¹²O̍ ko̍ŋ, mi̍ wāna̍ su̍a̍ā le̍ Mɛ̄lɛ̄ka̍ wo̍, Īla̍a̍chā o̍ po̍o̍nyīāl Chɛ̄ho̍lūām yāu̍wo̍. Mbo̍ dīmūl ndu̍ o̍ yāu̍wo̍ ni᷄ŋ āā, “Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Dēēve̍ fi̍nyā nūmndo̍ dīmi̍ āā, ‘A̍ lo̍ o̍ ko̍ŋ, ma̍ kɛ̄ɛ̄ le̍ ka̍a̍ Chɛ̄hōsi̍a̍fa̍tī fi̍nyā nūmndo̍ tōlɔ̄ɔ̍ kɔ̄ɔ̄lī, ndu̍yɛ̍ ma̍ kɛ̄ɛ̄ vɛ̄lɛ̄ le̍ ka̍a̍ A̍sā fi̍nyā nūm ma̍mā wo̍ tōlɔ̄ɔ̍ kɔ̄ɔ̄lī, o̍ wa̍ māsāa̍ Chu̍dā wo̍.

¹³Ma̍ lō o̍ ko̍ŋ, ma̍ tūāl ka̍ālā wɔ̄ɔ̍ŋndā Māsāā Bɛ̍ndūa̍a̍ I̍sɔ̄lūɛ̄ī kɔ̄ɔ̄lī. Ndu̍yɛ̍ ma̍ tōsā mi̍ wāŋnda̍ Chūlu̍sɛ̄lɛ̄m, a̍ wāŋnda̍ Chu̍dā a̍ mu̍li᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ nda̍, mɛ̄ɛ̍ yu̍ŋgu̍ E̍ha̍bī wo̍ ā tōsa̍ mi̍ wāŋnda̍ I̍sɔ̄lūɛ̄ī a̍ mu̍li᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ ndā yɛ̍. O̍ ko̍ŋ kɔ̍ɔ̍lī, pɔ̄mbūāā nūmnda̍ kpo̍u̍, ā nda̍ a̍a̍ nɔ̍ ka̍ā kɛ̄ndɔ̄ɔ̍ ma̍ hīāū nu̍m nda̍, ma̍ dīū nda̍.

¹⁴Le̍ he̍ī, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m kpūndɛ̍ bɛ̄ndōo̍ mālɔ̄ɔ̄ chōo̍, nya̍ chīɛ̄ī nūmndo̍ kpo̍u̍, chūāā nūmnda̍ ni̍, a̍ lāāndāā nūmnda̍, ndu̍yɛ̍ a̍ nyɛ̄ o̍ nyɛ̄ ŋ̄ nɔ̄.

¹⁵Ndu̍yɛ̍ nūm pi̍la̍, nāā pūli̍i̍ wɔ̍ɔ̍ŋndo̍ ō chō nu̍m bīyɔ̄ɔ̄. Ā chō lō sōlɔ̄ɔ̍ lēpāa̍ o̍ lēpāa̍ ha̍a̍a̍, mī pūlo̍ŋ fūla̍ nu̍m.’ ”

¹⁶O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ Fīli̍i̍tīāŋnda̍, a̍ A̍lu̍a̍būi̍ya̍, a̍ wa̍ Īto̍o̍pīāā īkɛ̄i̍ ya̍, ā yūsā kɔ̄lta̍ŋ le̍ mā kɔ̍ de᷅l Chɛ̄ho̍lūām chōo̍ a̍ sɔ̍ŋgɔ̄ɔ̍.

¹⁷Ndu̍yɛ̍ ma̍ kɔ̍ de᷅l lɛ̄ŋndē Chu̍dāle̍ŋ chōo̍ a̍ sɔ̍ŋgɔ̄ɔ̍. Nyɛ̄ o̍ nyɛ̄ nda̍ sa̍a̍lu̍ŋ o̍ chīɛ̄ī lēmāsāa̍ ni᷄ŋ, ma̍ pūŋgā mu̍ŋ kpo̍u̍, ma̍ kūānu᷄ŋ a̍ mu̍ŋ. O̍ ko̍ŋ kɔ̍ɔ̍lī, ma̍ bīī vɛ̄lɛ̄ pūa̍a̍ ndūa̍a̍, a̍ lāāndāā ndūa̍a̍, ma̍ kūānu᷄ŋ a̍ nda̍. Pūa̍a̍ ndūa̍a̍ kpo̍u̍, ma̍ kūānu᷄ŋ a̍ nda̍, mɛ̄ɛ̍ po̍ ndɔ̄ lu᷅mndo̍, Āhāsa̍yā, ma̍ mɛ̄ī.

¹⁸Ndu̍yɛ̍ mɛ̄ɛ̍ sɔ̄ɔ̍ŋ mu᷅ŋ ŋ̍ hi̍o̍ū ndu̍ chōo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ lu̍e̍ī ndu̍ nāā pūli̍i̍ wɔ̍ɔ̍ŋndo̍, ō ndu̍ o̍o̍ si̍ŋgū le̍ wo̍.

¹⁹Le̍ wɔ̄sīla̍ŋ lā tīɔ̍ɔ̍ŋ, nāā pūli̍i̍ wɔ̍ɔ̍ŋndo̍ ho̍ō ō wa̍ ndu̍ kīndīlāa̍. Mɛ̄ɛ̍ o̍ so᷅l te̍i̍, mi̍ pūlo̍ŋ fūlā ndu̍. O̍ ko̍ŋ, mbo̍ wū o̍ nyɛ̄ nɛ̄īyāā bɛ̄ndū bɛ̍ndōo̍ ni᷄ŋ. Kɛ̍ wānāā ndūa̍a̍ ā tōsa̍ yi᷅ŋnde̍ŋ mɛ̄ɛ̍ nda̍ tōsa̍ le̍ fi̍nyāā ndūāā ma̍māa̍ bɛ̄ɛ̄le̍ŋ kīo̍o̍ yɛ̍ le̍.

²⁰Chɛ̄ho̍lūām wa̍ wɔ̄sīla̍ŋ be̍le̍-ya̍a̍ a̍ lā tīɔ̍ɔ̍ŋ, mbo̍ sīmnu᷄ŋ māsā. Ndu̍yɛ̍, mbo̍ tōsā māsāle̍ŋ Chūlu̍sɛ̄lɛ̄m chi̍e̍e̍ le̍ lɛ̄ŋndē Chu̍dāle̍ŋ le̍ wɔ̄sīla̍ŋ lā ŋɔ̄ma̍a̍. Kɛ̍ mɛ̄ɛ̍ o̍ vi᷅ mɔ̍nɛ̍i̍ bi̍i̍ wānā o̍ wānā a̍ pīɔ̍m ndɔ̄ɔ̍ o̍kɔ̄ɔ̄ le̍. Mɛ̄ɛ̍ o̍ vi᷅, ma̍ chɔ̄ ndu̍ o̍ chi̍e̍e̍ bɛ̍ndu̍ Dēēvi̍o̍o̍, kɛ̍ ā chɔ̍ ndu̍ o̍ sɛ̄i̍ nda̍ yu̍ŋgu̍ lēmāsāa̍ ni᷄ŋ te̍.