Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 24 Bible Online

Ko̍lo̍ni̍kō Di̍i̍ŋ Ndɔ̄ɔ̍ 24 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 24

¹Cho̍wa̍sī wa̍ wɔ̄sīla̍ŋ lā ŋɔ᷄mmɛ̍ū mbo̍ sīmnu᷄ŋ Māsā Bɛ̍ndōo̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ be̍le̍-hi̍ɔ̍ɔ̍lu̍, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Cho̍wa̍sī ko̍ŋ kāla̍ ndɔ̍ wa̍ Si̍bīāā ni̍, wānā wa̍ā Bīɛ̄ɛ̄si̍ɛ̍bā chi̍e̍e̍.

²Ndu̍yɛ̍ mi̍ Cho̍wa̍sī o̍ to̍sā nyɛ̍ hi̍nī Mɛ̄lɛ̄ka̍ Ya̍a̍wɛ̄ɛ̄ kɔ̄llo̍, chɔ̍ŋ ha̍a̍a̍ a̍ pālɛ̍i̍ Chɛ̄hōwa̍dā wānā so̍līāā lāsa̍lāa̍ ō wa̍ īchāli̍ ve̍.

³Ndu̍yɛ̍, mi̍ Chɛ̄hōwa̍dā o̍ pu̍u̍lūl Māsā Bɛ̍ndōo̍ Cho̍wa̍sī lāāndūa̍a̍ ā ŋīɔ̍ɔ̍ŋ. Mi̍ lāāndūāā kāŋ ā vīlūl Cho̍wa̍sī chūāūwa̍, pūa̍a̍ a̍ wāŋ lāāndūa̍a̍.

⁴Mɛ̄ɛ̍ Cho̍wa̍sī o̍ to̍sa̍ māsāle̍ŋ le̍ te̍le̍ŋ ti᷄ŋ, mbo̍ kɛ̄ɛ̄sīāā le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ mīŋgīo̍o̍ bɛ̄ɛ̄ndi̍a̍a̍.

⁵O̍ ko̍ŋ, mbo̍ vēēlū wānāā sōlīāā lāsa̍lāa̍, a̍ Li̍va̍īya̍ nāa̍ pi᷅lɛ̍, mbo̍ dīmūl nda̍ āā, “Lā bālu̍ o̍ chi̍o̍o̍ŋ Chu̍dā, mī lā kɔ̍ bi̍ī I̍sɔ̄lūɛ̍i̍ya̍ kpo̍u̍ pa̍a̍wāa̍ o̍ bā, le̍ mī ŋ̄ hu᷄ŋ mi̍ŋgī chīɛ̍i̍ Mɛ̄lɛ̄ka̍a̍ nyāa̍ bɛ̄ɛ̄ndīāā. Īwɔ̄sī o̍ īwɔ̄sī, nyɛ̄ sɔ̄lāā kōŋ ō nɔ̄ mbō bīīnu᷄ŋ. Ndu̍yɛ̍, lā kɛ̍sī ndi̍ lɛ̄ŋ te̍. Lā wa̍ yo̍ōna̍ a̍ ndi̍.” Kɛ̍ mi̍ Li̍va̍īya̍ ā tōsā ta̍ma̍la̍a̍ a̍ sūɛ̍i̍ he̍ī.

⁶O̍ ko̍ŋ, mi̍ Cho̍wa̍sī vēēlū Chɛ̄hōwa̍dā, māsa̍ wānāā sōlīāā lāsa̍lāa̍ mbo̍ nyūnā ndu̍ āā, “Vɛ᷅ a̍ di̍mu̍l lɔ̍ Li̍va̍īya̍ mā hīŋ a̍ pāāwāla̍ nɔ̍ le̍ fūlāa̍ Chu̍dā a̍ Chūlu̍sɛ̄lɛ̄m nda̍ŋ te̍, pāāwālā Mūu̍sē, bu̍ɛ̍ī Mɛ̄lɛ̄ka̍ Ya̍a̍wɛ̄ɛ̄ wo̍ ō dīmi̍ sīndɛ̄ māā wāŋnda̍ I̍sɔ̄lūɛ̄ī a̍ nɔ̍ mā yɔ̄ŋgu̍, le̍ kpe̍ku̍la̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ chō a̍ nya̍ la̍tu̍lu̍ wo̍ la̍ŋ?”

⁷(Ndu̍yɛ̍ Ātāla̍yā, Wānā La̍nɔ̍ ma̍sā dɛ̍nɛ̍ wɔ̍ɔ̍ŋ wa̍ Chu̍dā wo̍, mi̍ wānāa̍ wa̍ ndu̍ kɔ̄ɔ̄lī wa̍ ā pīāl chīɛ̍i̍ Mɛ̄lɛ̄ka̍a̍, ma̍ lūɛ̄ī, ma̍ chɔ̄ɔ̄vīāā nyɛ̍m wa̍ ŋ̄ yɔ̄ŋga᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ŋ, ma̍ kūānu᷄ŋ a̍ mu̍ŋ le̍ Bāāl, mɛ̄lɛ̄ka̍ ndāa̍ sōōlūūwo̍.)

⁸Mi̍ Māsā Bɛ̍ndōo̍ Cho̍wa̍sī o̍ di̍mu̍l Li̍va̍īya̍ le̍ mā tōōsi̍a̍a̍ kɔ̍fōo̍, mā kɛ̄si̍ ndu̍ o̍ bɛ̍ɛ̄, o̍ dīō sāāsāa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍.

⁹O̍ ko̍ŋ kɔ̍ɔ̍lī, ma̍ yɔ̄ŋgū yōōŋgōo̍ Chu̍dā a̍ Chūlu̍sɛ̄lɛ̄m, le̍ mī wānā o̍ wānā o̍ hi᷅ŋ a̍ pāāwā ndɔ̍ɔ̍, ō Mūu̍sē, bu̍ɛ̍ī Mɛ̄lɛ̄ka̍ Ya̍a̍wɛ̄ɛ̄ wo̍ ō kīlu̍l sīndɛ̄ I̍sɔ̄lūɛ̍i̍ya̍ le̍ yɔ̄ŋgōo̍, te̍le̍ŋ nda̍ wa̍ o̍ po̍llo̍ ni᷄ŋ ndo̍.

¹⁰O̍ ko̍ŋ, mi̍ wānāā bɛ̄ndūa̍a̍, a̍ wāŋnda̍ kpo̍u̍ a̍ du̍a̍u̍nu᷄ŋ nya̍a̍le̍, a̍ yōōŋgū nda̍ tūēī ko̍ŋ ndo̍, ma̍ hūŋ a̍ pāāwālā ndāla̍ŋ, ma̍ wo̍ū o̍ kɔ̍fū Cho̍wa̍sī to̍o̍si̍a̍a̍ ko̍ŋ ndo̍ ni᷄ŋ, ha̍a̍a̍ ma̍ chīī pāāwālā ndāla̍ŋ yɔ̄ŋgū.

¹¹Ndu̍yɛ̍ lēpāa̍ o̍ lēpāa̍, tē wāŋnda̍ nda̍ a̍a̍ chi̍i̍ pāāwāla̍ŋ yɔ̄ŋgū pɛ̍ mī kɔ̍fōo̍ pɛ̍, Li̍va̍īya̍ ā chūa̍ kɔ̍fū kōŋ ā kūɛ̄ a̍ ndu̍ o̍ wānāā bɛ̄ndūa̍a̍ cho̍ wa̍llo̍ māsa̍ bɛ̍ndōo̍ o̍ bā bɛ̄ŋgu̍ wa̍ lo̍. O̍ ko̍ŋ, mī wānā po̍o̍nyīa̍a̍, a̍ hɔ̄ltē māsa̍ wānāā sōlīāā lāsa̍lāa̍, mā pɛ̄i̍ kɔ̍fōo̍, mā mīŋgi̍ vɛ̄lɛ̄ ndu̍ kɛ̄sī o̍ fōōfo̍ o̍ wa̍ wo̍. Ā lo̍ tōsāa̍ le̍nde̍ lēpāa̍ o̍ lēpāa̍, ma̍ sɔ̄lā nyɛ̄ sɔ̄lāa̍ cha̍la̍ŋ.

¹²O̍ ko̍ŋ kɔ̍ɔ̍lī, mi̍ māsā bɛ̍ndōo̍ nda̍ Chɛ̄hōwa̍dā, a̍ chu̍ā nyɛ̄ sɔ̄lāā kōŋ, mā yɔ̄ŋgu̍ wānāa̍ cho̍ wa̍li̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ bōlle̍ŋ nda̍. Ndu̍yɛ̍, mi̍ wānāa̍ kāŋ ā chūā wānāā wa̍lla̍, nda̍ yɔ̍nūŋ ni̍ māā, me̍si̍nɛ̄i̍ya̍, a̍ ka̍a̍pi̍ndɛ̄i̍ya̍, a̍ wānāa̍ to̍sā wa̍llo̍ a̍ chīli̍ŋndo̍ŋ, ndu̍yɛ̍ a̍ chīli̍ŋu̍ŋ būlɔ᷄ŋsīi̍yo̍ŋ nda̍, le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ mīŋgīo̍o̍ bɛ̄ɛ̄ndīa̍a̍.

¹³Ndu̍yɛ̍ wānāā wa̍li̍a̍a̍ nda̍ chu̍a̍ ka̍ŋ le̍ chīɛ̍i̍ Mɛ̄lɛ̄ka̍a̍ mīŋgīo̍o̍ bɛ̄ɛ̄ndīa̍a̍ wa̍, ma̍ tōsā wa̍llo̍ ō kālā ka̍lā, ma̍ mi̍ŋgī chīɛ̄īyo̍ bɛ̄ɛ̄ndīāā ō kālā ka̍lā māā pāāndū.

¹⁴Mɛ̄ɛ̍ chīɛ̄īyo̍ ō chūū bɛ̍ɛ̍ndīāā, mi̍ wānāā nda̍ yɔ̄ŋgu̍ nyɛ̄ sɔ̄lāa̍ le̍ wa̍llo̍ tōsāa̍ a̍ ndu̍ wa̍, ā chūā nyɛ̄ sɔ̄lāā tɔ̍ lo̍ wo̍, ma̍ yɔ̄ŋgū māsā bɛ̍ndōo̍ nda̍ Chɛ̄hōwa̍dā. Nyɛ̄ sɔ̄lāā kōŋ nda̍ sōli̍ŋ kpe̍ku̍ ni̍ ma̍ tōōsīāā nyɛ̄m lāāndo᷄ŋ le̍ kpe̍ku̍la̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, a̍ sa̍lālā lūāmāāla̍ŋ sōlīo̍o̍, ndu̍yɛ̍ ma̍ tōōsīāā vɛ̄lɛ̄ hɛ̄ŋgɛ̍i̍la̍ŋ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēni᷄ŋ, o̍ ko̍ŋ kɔ̍ɔ̍lī, ma̍ tōōsīāā vɛ̄lɛ̄ nyɛ̄ lāāndūŋ chēle̍ŋ a̍ ko̍o̍līi̍yo̍ŋ ndu̍yɛ̍ a̍ ka̍ni̍ŋ hu̍mbo᷄ŋ. O̍ ko̍ŋ kɔ̍ɔ̍lī, ma̍ hīāū lāchī a̍ sa̍lālā lūāmāāla̍ŋ sōlīo̍o̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ha̍a̍a̍, ha̍a̍a̍ a̍ te̍le̍ŋ Chɛ̄hōwa̍dā o̍ wa̍ yōōmū wo̍.

¹⁵Mi̍ Chɛ̄hōwa̍dā o̍ yu̍wā ku̍ndɛ̄ɛ̄ bɛ̄ndū, mbo̍ fūūlūū wɔ̄sīla̍ŋ kɛ̄mɛ̄ a̍ be̍le̍-ya̍a̍ (130), mālāŋ o̍ wu᷅.

¹⁶Mɛ̄ɛ̍ o̍ vi᷅, ma̍ chɔ̄ ndu̍ o̍ sɛ̄i̍ nda̍ yu̍ŋgu̍ lēmāsāa̍ ni᷄ŋ, o̍ Māsāa̍ Dēēve̍ lo̍ chi̍e̍e̍. Kāni̍ fo̍ndōle̍, le̍ wa̍lta̍ kɛ̍ndɛ̄lā o̍ to̍sa̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, ndu̍yɛ̍ a̍ le̍ wa̍li̍ kɛ̍ndɛ̄ o̍ to̍sa̍ le̍ Mɛ̄lɛ̄ka̍, a̍ le̍ chīɛ̄ī Mɛ̄lɛ̄ka̍a̍ wo̍.

¹⁷Kɛ̍, mɛ̄ɛ̍ Chɛ̄hōwa̍dā o̍ vi᷅, mi̍ wāŋ bɛ̄ndūa̍a̍ Chu̍dā a̍ hu᷅ŋ, ma̍ hu᷄ŋ si̍lā Māsā Bɛ̍ndōo̍ Cho̍wa̍sī, ndu̍yɛ̍ mbō ya᷄ŋ nīla̍ŋ o̍ nyɛ̄ nda̍ dīmu̍l ndu̍ wo̍.

¹⁸O̍ ko̍ŋ, ma̍ māl kɔ̄la̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, Mɛ̄lɛ̄ka̍ fi̍nyāā ndāa̍, ma̍ mūli᷄ŋ A̍si̍ɛ̍lūā, a̍ mɛ̄lɛ̄ka̍a̍ chēle̍ŋnda̍ sōōlūūwo̍. Le̍ yɔ̄ŋ wɔ̄ɔ̍ŋ nda̍ tōsa̍ ko̍ŋ ndo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ta̍mbū kɔ̄l a̍ Chu̍dā, ndu̍yɛ̍ a̍ Chūlu̍sɛ̄lɛ̄m, mbo̍ tūsī nda̍ nyɛ̄ pālāa̍ chōo̍.

¹⁹Kɛ̍ a̍ ko̍ŋ fa̍ū, mi̍ Mɛ̄lɛ̄ka̍ Ya̍a̍wɛ̄ɛ̄ o̍ vi̍ām wānāa̍ su̍a̍ā le̍ Mɛ̄lɛ̄ka̍ wa̍, le̍ mā kɔ̍ si̍lā wāŋnda̍ ha̍ā, le̍ mā mīīŋgu̍ ndu̍ Mɛ̄lɛ̄ka̍ o̍ ībūŋ. Mi̍ wāŋnda̍ ha̍ā ā kɔ̍ si̍lā nda̍, kɛ̍ ā ye᷄ŋ wa̍nāa̍ su̍a̍ā le̍ Mɛ̄lɛ̄ka̍ wa̍ lānī le̍.

²⁰O̍ ko̍ŋ, mi̍ Nyi̍na̍ Mɛ̄lɛ̄ka̍a̍ tūāl Sɛ̄kāla̍yā kɔ̄ɔ̄lī, po̍ Chɛ̄hōwa̍dā wo̍, wānā so̍līāā lāsa̍lāa̍. Mbo̍ sīm wāŋnda̍ lāchī, mbo̍ dīmūl nda̍ āā, “Mɛ̄lɛ̄ka̍ Ya̍a̍wɛ̄ɛ̄, o̍ di̍mi̍ āā, ‘Vɛ᷅ mi̍ lā kɛ̄ɛ̄ sāwāla̍ nīla̍ŋ tōlɔ̄ɔ̍ kɔ̄ɔ̄lī? Nya̍ pi̍la̍ vēēlu̍ŋ nyɛ᷅ pālāa̍ chōo̍ ni̍, mi̍ lā tōsā lā sɔ̍lā dɛ̍nɛ̍ kɛ̍ndɛ̄ o̍ dɛ̍nɛ̍ kɛ̍ndɛ̄ o̍ yōōmūlā nyāla̍ŋ ni᷄ŋ te̍. Lā lo̍ o̍ ko̍ŋ mi̍ lā kɛ̄ɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ le̍ mɛ̄lɛ̄ka̍ā chēle̍ŋnda̍ sōōlūūwo̍. Le̍ he̍ī, ya̍ bɛ̍ɛ̍ I̍ kɛ̍ɛ̍ nya̍.’ ”

²¹Kɛ̍ wāŋ bɛ̄ndūa̍a̍ Chu̍dā ni̍, Māsā Bɛ̍ndōo̍ Cho̍wa̍sī ni̍, ma̍ bīī ma̍ yīī Sɛ̄kāla̍yā de̍fo̍o̍. Mi̍ Māsā Bɛ̍ndōo̍ Cho̍wa̍sī o̍ di̍mūl wāŋnda̍ ma̍ vīī vīī Sɛ̄kāla̍yā a̍ pōūta̍ŋ o̍ la̍u̍ ba̍lu̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, ma̍ dīī ndu̍.

²²Māsāa̍ Cho̍wa̍sī o̍ lo̍o̍nu̍ŋ kɛ̍ndɛ̄i̍ Chɛ̄hōwa̍dā, fi̍nyāa̍ Sɛ̄kāla̍yā o̍ to̍sa̍l ndu̍ ve̍ le̍. Mbo̍ tōsā ma̍ dīī Sɛ̄kāla̍yā. Lɔ̍ɔ̍ pa̍ mi̍ Sɛ̄kāla̍yā o̍ ma̍lnu᷄ŋ kɔ᷅l, mbo̍ dīmī āā, “Nyɛ̄ nya̍ chō ya̍ ho̍ō tōsāllo̍ wo̍, nu̍a̍ā Mɛ̄lɛ̄ka̍ Ya̍a̍wɛ̄ɛ̄ o̍ mi̍ŋgūl nya̍ māa̍ ko̍ŋ fɔ̍.”

²³O̍ wɔ̄sī kōŋ mɛ̄ɛ̄lu̍la̍ŋ, mi̍ pūa̍a̍ chɔ̄ūwa̍ Si̍i̍līāā a̍ hu̍ŋ de᷅l lɛ̄ŋndē Chu̍dāle̍ŋ chōo̍, ma̍ fūūlūū Chūlu̍sɛ̄lɛ̄m chi̍e̍e̍. Wāŋ bɛ̄ndūa̍a̍ wa̍ lo̍ŋ nda̍ kpo̍u̍, ma̍ dīū nda̍. Ma̍ mūli᷄ŋ ma̍ pūŋgā nyɛ̄m nda᷄ŋ, ma̍ kūānu᷄ŋ a̍ mu̍ŋ kpo̍u̍ o̍ māsā bɛ̍ndu̍ wa̍ Dāma̍si̍kɔ̍ɔ̄ wo̍ lo̍.

²⁴Mi̍ chē bɛ̍ɛ̍, pūa̍a̍ chɔ̄ūwāa̍ fu̍la̍ ka̍ŋ Si̍i̍līāā wa̍ ā ve̍ a̍ bɔ̍ɔ̍ le̍ ni̍, kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā ma̍ yām pūa̍a̍ chɔ̄ūwa̍ Chu̍dā, a̍ wa̍ sɛ̍lɛ̍ bɛ̍ndōo̍ wa̍. Kāni̍ fo̍ndōle̍, le̍ mɛ̄ɛ̍ nda̍ ma᷄l Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāa̍ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ mā mɛ̄lɛ̄ka̍a̍ ndā yɛ̍. O̍ ko̍ŋ, mi̍ nyɛ̄ pālāā bɛ̄ndōo̍ ō tūāl Māsā Bɛ̍ndōo̍ Cho̍wa̍sī chōo̍.

²⁵Ndu̍yɛ̍ mi̍ pūa̍a̍ chɔ̄ūwa̍ Si̍i̍līāā a̍ yɔ̍ŋūl Māsāa̍ Cho̍wa̍sī yɔ̄ŋūllo̍ pīla̍, ma̍ mɛ̄ī ndu̍ ō yɔ̄ŋūlāā le̍nde̍ ma̍ mīīŋgu᷄ŋ. Mɛ̄ɛ̍ nda̍ mīīŋgu᷄ŋ, mi̍ wānāa̍ wa̍ ndu̍ wa̍llo̍ o̍ bā bɛ̄ŋgu̍ wa̍, ā yīī ndu̍ de̍fo̍o̍, ma̍ dīī ndu̍ o̍ ndu̍ lo̍ kpēlē, fo̍ndōle̍, le̍ mɛ̄ɛ̍ o̍ di̍ī po̍ Chɛ̄hōwa̍dā, wānā so̍līāā lāsa̍lāa̍ yɛ̍. Mɛ̄ɛ̍ o̍ vi᷅, ma̍ chɔ̄ ndu̍ o̍ Māsāa̍ Dēēve̍ lo̍ chi̍e̍e̍. Kɛ̍ ā chɔ̍ ndu̍ o̍ sɛ̄i̍ nda̍ būūlū lēmāsāa̍ ni᷄ŋ te̍.

²⁶(Wānā a̍a̍ yi̍i̍ ndu̍ ka̍ŋ de̍fo̍o̍ wa̍, nda̍ cho̍ ha̍ā ni̍. Sa̍ba̍dī, a̍ Chɛ̄hōsa̍ba̍dī. Sa̍ba̍dī yɛ̍, kāla̍ ndɔ̍ wa̍ Si̍mi̍a̍a̍tī ni̍, chūā wāā lɛ̄ŋndē A̍mɔ᷅nde̍ŋ. Chɛ̄hōsa̍ba̍dī yɛ̍, ndu̍ kāla̍ ndɔ̍ wa̍ Sīmi̍lu̍i̍tī ni̍, chūā wāā lɛ̄ŋndē Mo̍wa̍bīle̍ŋ.)

²⁷Nyɛ̄ o̍ nyɛ̍ yɔ̍nu̍ŋ a̍ Cho̍wa̍sī pūa̍a̍ ndūāā, ndu̍yɛ̍ a̍ yōōŋgūla̍ Mɛ̄lɛ̄ka̍la̍ di̍mi̍ŋ a̍ ndu̍ o̍kɔ̄ɔ̄ la̍ŋ, o̍ ko̍ŋ kɔ̍ɔ̍lī, a̍ mɛ̄ɛ̍ o̍ mi̍ŋgi̍ chīɛ̍i̍ Mɛ̄lɛ̄ka̍a̍ bɛ̄ɛ̄ndīāā yɛ̍, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ o̍kɔ̄ɔ̄ wo̍ ni᷄ŋ. Ndu̍yɛ̍ mɛ̄ɛ̍ Cho̍wa̍sī o̍ vi᷅, mi̍ Āmāsi̍yā po̍ ndɔ̄, o̍ mīīŋgū māsāa̍ o̍ fōōfo̍ ndɔ̄ɔ̍.