Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 27 Bible Online

Ko̍lo̍ni̍kō Di̍i̍ŋ Ndɔ̄ɔ̍ 27 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 27

¹Cho̍tām wa̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍, mbo̍ sīmnu᷄ŋ ma̍sāa̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ tɔ̍ a̍ lā ŋɔ᷄mpu᷅m, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Cho̍tām ko̍ŋ yɛ̄, kāla̍ ndɔ̍ wa̍ Chɛ̄lu̍sīā, chu̍ā Sa̍dɔ̍kī wo̍ ni̍.

²Ndu̍yɛ̍, mbo̍ tōsā nyɛ̍ wa̍ ō kɛ̄ndɛ̄ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l lo̍, mɛ̄ɛ̍ Yūsa̍yā fi̍nyā ndɔ̄, o̍ wa̍ wānā kɛ̍ndɛ̄ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l lɛ̍. Kɛ̍ ndu̍ ndu̍ to̍sa̍ yɔ̍ŋ wɔ̄ɔ̍ŋ māā Yūsa̍yā fi̍nyā ndɔ̄ o̍ lu̍ɛ̍ī o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ wo̍ le̍. Kɛ̍ a̍ ko̍ŋ kpo̍u̍, wāŋnda̍ wa̍ hīōūwɔ̄ɔ̍ lāchī a̍ sɔ̄ɔ̍ŋ wɔ̍ɔ̍ŋndo̍ŋ tōsāa̍.

³O̍ ko̍ŋ kɔ̍ɔ̍lī, mbo̍ tāŋgūl dīo̍ wa̍ bā lūāŋndo̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍. Ndu̍yɛ̍, mbo̍ tāŋgūl vɛ̄lɛ̄ sāāsāa̍ O̍fɛ̄ɛ̄.

⁴O̍ ko̍ŋ kɔ̍ɔ̍lī, mbo̍ tāŋgūl vɛ̄lɛ̄ chi̍o̍o̍ŋ o̍ lɛ̄ŋndē ŋ̄pēmbūle̍ŋ Chu̍dā. Mbo̍ tāŋgūl vɛ̄lɛ̄ chīɛ̄īlā vīlɛ̄īla̍ŋ, a̍ chi̍e̍e̍ŋ o̍ bɛ̍ɛ̍ndi̍a̍a̍ a̍ sāāsāla̍ ka̍lā ka̍lā la̍ŋ ndo̍ŋ, o̍ būndɛ̍la̍ ŋ̄pēmbūla̍ŋ Chu̍dā.

⁵Ō wa̍ a̍ te̍le̍ŋ pi᷅lɛ̍, mi̍ Cho̍tām sɔ̄ŋgā a̍ māsā bɛ̍ndū A̍mɔ̍lu̍a̍i̍tīi̍ya̍, nda̍ pūa̍a̍ ndūa̍a̍ chɔ̄ūwa̍ mbo̍ yām ndu̍. O̍ ko̍ŋ, mbo̍ kīndīlā A̍mɔ᷅na̍i̍tīi̍ya̍ le̍ mā wa̍ ndu̍ pāāwāa̍ mālɔ̄ɔ̍ o̍ bā, le̍ wɔ̄sīo̍o̍ŋ ŋ̄gāa̍. Īwɔ̄sī o̍ īwɔ̄sī, pāāwā nda̍ a̍a̍ nɔ̍ le̍ ndu̍ mālɔ̄ɔ̍ o̍ ba̍ wo̍, ō wa̍ ka̍ni̍ŋ hu̍mbo᷄ŋ pa᷅ŋnda̍ŋ wāa̍la̍ŋ lā ŋɔ᷄mmɛ̍ū a̍ kɛ̄mɔ̄ɔ̍ lē ŋu̍ɛ̍ɛ̍nu̍ (7,500), a̍ wi̍tīi̍yo̍ŋ bu̍sɛ̄la̍ŋ wāa̍la̍ŋ be̍le̍-ŋu̍ɛ̍ɛ̍nu̍ (50,000), a̍ ba̍a̍līi̍yo̍ŋ bu̍sɛ̄la̍ŋ wāa̍la̍ŋ be̍le̍-ŋu̍ɛ̍ɛ̍nu̍ (50,000).

⁶Ndu̍yɛ̍ mi̍ Cho̍tām si̍mnu᷄ŋ wāna̍ kpāāyā bɛ̍ndu̍, kāni̍ fo̍ndōle̍, ō wa̍ sa̍kpō, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ o̍ hɔ̄l.

⁷O̍ ko̍ŋ kɔ̍ɔ̍lī, sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Cho̍tām nde̍ŋ bɛ̄ŋgu̍ wo̍ŋ ki̍nɛ̍i̍, chɔ̄ūlā o̍ to̍sa̍ la̍ŋ ni̍, a̍ ka̍ālā ndɔ̄la̍ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ cho̍ a̍ Māsāā Bɛ̍ndūa̍a̍ I̍sɔ̍lūɛ̄ī, a̍ Chu̍dā o̍kɔ̄ɔ̄ wo̍ ni᷄ŋ.

⁸Cho̍tām wa̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍ mbo̍ sīmnu᷄ŋ ma̍sāa̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ tɔ̍ a̍ lā ŋɔ᷄mpu᷅m chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ.

⁹O̍ ko̍ŋ kɔ̍ɔ̍lī, mi̍ Cho̍tām wu᷅, ma̍ chɔ̄ ndu̍ o̍ Māsāa̍ Dēēve̍ lo̍ chi̍e̍e̍. O̍ ko̍ŋ, mi̍ E̍ha̍a̍sī po̍ ndɔ̄ o̍ mi̍i̍ŋgu̍ māsāa̍ o̍ fōōfo̍ ndɔ̄ɔ̍.