Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 28 Bible Online

Ko̍lo̍ni̍kō Di̍i̍ŋ Ndɔ̄ɔ̍ 28 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 28

¹E̍ha̍a̍sī wa̍ wɔ̄sīla̍ŋ bi̍dīi̍ŋ mbo̍ sīmnu᷄ŋ ma̍sāa̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ tɔ̍ a̍ lā ŋɔ᷄mpu᷅m, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Kɛ̍ ndu̍ ndu̍ to̍sa̍ nyɛ̍ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄llo̍, māā Dēēve̍ fi̍nyā ndɔ̄ ma̍mā le̍.

²Sɔ̄ɔ̍ŋ wɔ̍ɔ̍ŋ māsāā bɛ̍ndūa̍a̍ ke̍e̍ku̍ I̍sɔ̄lūɛ̄ī ya̍ ā wa̍ to̍sāa̍ wo̍ŋ, ndu̍ bɛ̍ɛ̍ mu̍ŋ ko̍ni̍ o̍ to᷅l kɔ̄ɔ̄lī ni̍. Mbo̍ tōōsīāā nyɔ̄ɔ̍ a̍ chīli̍ŋnde̍ le̍ Mɛ̄lɛ̄ka̍ Bāāl sōōlūūwo̍.

³Ndu̍yɛ̍ vɛ̄lɛ̄, mbo̍ lūām nyɛ̄m chūŋ kɛ̄ndɔ᷄ŋ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Hi̍nɔ̄m. Wānāa̍ wa̍ o̍ lɛ̄ŋndē lēŋ ni᷄ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍a̍ū nda̍ I̍sɔ̄lūɛ̍i̍ya̍ lāchī wa̍, mbo̍ tūāl ka̍ālā wānāā kāŋ ā wa᷄ chōo̍ mi̍ Mɛ̄lɛ̄ka̍ tūl la̍ŋ yɛ̄le̍ŋ tūl bɛ̄ndōo̍ la̍ŋ kɔ̄ɔ̄lī. Ndu̍ bɛ̍ɛ̍ mbo̍ sōlī pūa̍a̍ ndūa̍a̍ o̍ ve̍lū wa̍ sa̍lā lūāmāa̍ o̍ nyɛ̄m nda̍ sōōlūū māā mɛ̄lɛ̄ka̍ā ndā wo̍ŋ ndo̍.

⁴Ndu̍yɛ̍ bā o̍ bā sōōlu̍u̍la̍ŋ lā wa̍, o̍ pēmbo᷄ŋ chōo̍ ni̍, a̍ o̍ yɔ̄mnde̍ bɛ̄ŋgu̍, ō wa̍ kēīyo̍ sa̍lāla̍ŋ sōlīo̍o̍ lo̍ŋ, mbo̍ lūām nyɛ᷅m chūŋ kɛ̄ndɔ᷄ŋ lo̍ŋ, o̍ mɛ̄lɛ̄ka̍a̍ ndāa̍ lo̍.

⁵Le̍ mɛ̄ɛ̍ Māsā Bɛ̍ndōo̍ E̍ha̍a̍sī o̍ to̍sa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ yɛ̍, mi̍ Mɛ̄lɛ̄ka̍ chɛ̄l mi̍ māsāa̍ le̍ Si̍i̍līāā nda̍ so̍vɛ̄i̍ya̍a̍ ndūa̍a̍ ā kɔ̍ de᷅l ndu̍ chōo̍ a̍ sɔ̍ŋgɔ̄ɔ̍. Ndu̍yɛ̍ ma̍ yām ndu̍. Ma̍ bīī wānāā ndūa̍a̍ ta̍u̍ ta̍u̍ ma̍ kūā a̍ nda̍ Dāma̍si̍kɔ̍ɔ̄ o̍ bīyɔ̄ɔ̍ ni᷄ŋ. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma᷅l ndu̍ māsāa̍ I̍sɔ̍lūɛ̄ī o̍ bā, ndu̍yɛ̍ mi̍ māsāa̍ I̍sɔ̄lūɛ̄ī o̍ di̍ū wānāā ndūa̍a̍ dīūwo̍ pīla̍.

⁶O̍ pāa̍le̍ŋ lē pīlɛ̍ ni᷄ŋ kpe̍, mi̍ Pɛ̍kā, o̍ wa̍ māsāa̍ le̍ I̍sɔ̄lūɛ̄ī yo̍, po̍ Lūēma̍līāā wo̍, ō dīī so̍vɛ̄i̍ya̍a̍ E̍ha̍a̍sī wa̍ wāa̍la̍ŋ kɛ̄mɛ̄ a̍ bi̍dīi̍ŋ (120,000), o̍ lɛ̄ŋndē Chu̍dā le̍ŋ ni᷄ŋ. Nda̍ kpo̍u̍ wānāā nda̍ a̍a̍ nɔ̍ kɔ̄l sīmūlāa̍ le̍ chɔ̄ūwo̍ wa̍ nda̍ wa̍ ni̍. Kɛ̍ le̍ mɛ̄ɛ̍ nda̍ kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍ yɛ̍, le̍la̍ŋ Mɛ̄lɛ̄ka̍ Ya̍a̍wɛ̄ɛ̄ o̍ chɛ̍l ni̍, mi̍ he̍ī yɔ̄nu᷄ŋ a̍ nda̍.

⁷Po̍ pi᷅lɛ̍ dīōla̍ŋ āā, Si̍ki̍lī, so̍vɛ̄i̍nɔ̍ māI̍sɔ̄lūɛ̍i̍nɔ̍ɔ̍, mbo̍ dīī Māāsɛ̍yā, Māsā Bɛ̍ndōo̍ E̍ha̍a̍sī po̍ ndɔ̄ɔ̍, a̍ Āsi̍li̍kām, wāna̍ wa̍ bōlle̍ wānāā wa̍lla̍ o̍ fo̍ndāŋ lēmāsāa̍ wo̍. O̍ ko̍ŋ kɔ̍ɔ̍lī, mbo̍ dīī vɛ̄lɛ̄ Ɛ̄li̍ka̍nāā, wāna̍ wa̍ Māsā Bɛ̍ndōo̍ īkɛ̄i̍ yo̍.

⁸O̍ ko̍ŋ, mi̍ so̍vɛ̄i̍ya̍ I̍sɔ̄lūɛ̄ī a̍ bi̍ī wāŋnda̍ Chu̍dā, wānāya᷅ŋ nda᷄ŋ, wāŋ lāāndūa̍a̍, a̍ chūāūwāā ndāa̍, ā lāāndūa̍a̍ a̍ ā pīāāndūa̍a̍, wāa̍la̍ŋ kɛ̄mɔ̄ɔ̍ lēdīi̍ŋ (200,000), ndu̍yɛ̍ ma̍ pūŋgā vɛ̄lɛ̄ nyɔ̄ɔ̍ŋ Chu̍dā ta̍u̍ ta̍u̍, ma̍ mīīŋgū a̍ mu̍ŋ Sāme̍e̍līāā lātūlu̍ a̍ wānāā nda̍ bīī ka̍ŋ nda̍.

⁹Po̍ pi᷅lɛ̍ wa̍ dīōla̍ŋ āā O̍dɛ̄ɛ̄, wāna̍ su̍a̍ā le̍ Mɛ̄lɛ̄ka̍ Ya̍a̍wɛ̄ɛ̄ wo̍ o̍ wa̍ ni̍. Mɛ̄ɛ̍ pūa̍a̍ chɔ̄ūwa̍ I̍sɔ̄lūɛ̄ī a̍ wa̍ hēlɔ̄ɔ̍ Sāme̍e̍līāā chi̍e̍e̍, mi̍ O̍dɛ̄ɛ̄ kɔ̍ bɔ̍ŋā nda̍ o̍ nɛ̄ī, mbo̍ dīmūl nda̍ āā, “Le̍ tu̍mbe̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nyāā māmāa̍ ndu̍ o̍o̍ dɔ̍ɔ̍nu᷄ŋ a̍ wāŋnda̍ Chu̍dā wo̍, le̍ sa̍bū kōŋ o̍ ma̍l nda̍ nya̍ o̍ bā ni̍, mi̍ lā yām nda̍. Kɛ̍ mi̍ lā lō o̍ ko̍ŋ, mi̍ lā dīū nda̍ dīūwo̍ pīla̍, īnyīɛ̍ɛ̍ bɛ̍ɛ̍ lā tūīīnu̍ŋ nda̍ le̍. Ndu̍yɛ̍ mi̍ tɔ̍ɔ̍ ko̍ŋ ō fūūlūū o̍ fo̍nda᷄ŋ Mɛ̄lɛ̄ka̍a̍ di̍.

¹⁰Ndu̍yɛ̍ vɛ̍lɛ̄, mi̍ lā kɛ̄ɛ̄sīāā le̍ mī lā sīīŋgu̍u̍ wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m, wānā pɔ̍nɔ̍ ni̍, wānā la̍nɔ̍ ni̍, chīa̍a̍ nyā. Lā si̍nā nu̍a̍ā māā nya̍ bɛ̍ɛ̍ lā tōsa̍ yɔ̄ŋndā wɔ̄ɔ̍ŋnda̍ŋ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ le̍?

¹¹Le̍la̍ŋ lā ya̍ŋ ya̍ nīla̍ŋ, wānāā nya̍ bīu̍ ka̍ŋ ma̍ wā nya̍ o̍ bā o̍ bīyɔ̄ɔ̍ ni᷄ŋ nda̍, nya̍ nda̍ā wānāyɛ̍i̍ nya̍ chō ni̍. Lā ma᷄l nda̍ mā kūɛ̄nu᷄ŋ, kāni̍ fu̍u̍le̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ɔ̍nu᷄ŋ tu̍mbe̍ a̍ nya̍ ō chō nya̍ nyɛ̄ pālāa̍ tūsī chōo̍.”

¹²O̍ ko̍ŋ kɔ̍ɔ̍lī, māsāā pu̍m ā wa̍, fūlāa̍ o̍ yu̍ŋgu̍ E̍fi̍lūēmndo̍ chōo̍, nda̍ yɔ̍nūŋ ni̍ māā, Āsālu̍i̍yā, po̍ Chɛ̄hōha̍nāŋ ndo̍, a̍ Bɛ̍lu̍i̍chīāā, po̍ Mɛ̄sīlɛ̍mo̍tī wo̍, a̍ Chɛ̄hīsi̍ka̍yā, po̍ Si̍a̍lūm ndo̍, a̍ A̍ma̍sā, po̍ Ha̍di̍lāī yo̍, nda̍ bɛ̍ɛ̍ ma̍ chɛ̄la᷅ŋ a̍ nyɛ̄ wāna̍ su̍a̍ā le̍ Mɛ̄lɛ̄ka̍ wo̍, ō dīmi̍ wo̍, ndu̍yɛ̍ ma̍ dōōnu᷄ŋ so̍vɛ̄i̍ya̍a̍ wa̍ ka̍ŋ fūlāa̍ o̍ chɔ̄ūwo̍ wa̍ tu̍mbe̍ le̍ nyɛ̄ nda̍ tōsa̍ wo̍.

¹³O̍ ko̍ŋ, nda̍ bɛ̍ɛ̍ ma̍ dīmūl so̍vɛ̄i̍ya̍a̍ kāŋ āā, “Lā hu᷅ŋ a̍ wānāā nya̍ bīū ka̍ŋ o̍ chɔ̄ūwo̍ wa̍, mī lā he᷄l a̍ nda̍ chi̍e̍e̍ na̍ŋnu᷄ŋ te̍. Yɔ̄ŋndā wɔ̍ɔ̍ŋndā na̍a̍ ŋ̄ tōsa̍ a̍ Mɛ̄lɛ̄ka̍ la̍ŋ, lā chō ni᷅ŋ lā bɔ̄ɔ̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ na̍a̍ I̍sɔ̄lūɛ̍i̍ya̍ ō kālā ka̍lā, mbo̍ yēēmā le̍ na̍a̍ nyɛ̄ pālāa̍ tūsīo̍o̍ chōo̍. Le̍la̍ŋ lā ha̍ndū lɛ̄ yɔ̄ŋ wɔ̄ɔ̍ŋ chēle̍ŋ o̍ ko̍ŋ cho̍o̍, mī ŋ̄ sɔ̄la̍ lɛ̄ dɛ̍nɛ̍ pa̍lāā chēle̍ŋ te̍.”

¹⁴O̍ ko̍ŋ, mi̍ so̍vɛ̄i̍ya̍ ā māl wānāā nda̍ bīī ka̍ŋ o̍ chɔ̄ūwo̍ wa̍, lātūlu̍ a̍ nyɛ̄m nda̍ pūŋga̍ o̍ chɔ̄ūwo̍ wo̍ŋ, wāŋ bɛ̄ndūa̍a̍, a̍ wānāa̍ wa̍ ā chūūŋgi̍āŋ lo̍ŋ nda̍ o̍ hɔ̄l.

¹⁵O̍ ko̍ŋ kɔ̍ɔ̍lī, mi̍ māsāā hi̍ɔ̍ɔ̍lu̍a̍a̍ ka̍ŋ, ā bīī wānāā so̍vɛ̄i̍ya̍ ā bīī ka̍ŋ o̍ chɔ̄ūwo̍ wa̍, a̍ nyɛ̄m nda̍ pūŋga̍ wo̍ŋ. Wānāa̍ wa̍ nda̍ tɛ̄ɛ̄ŋ nda̍ a̍a̍ nɔ̍ la̍nyɛ̍ lēkɔ̄ɔ̍ le̍ wa̍, mi̍ māsāa̍ ha̍ā ā chūā nyɛ̄lā chūɛ̄īya̍ŋ nda̍ŋ o̍ nyɛ̄m mu᷅ŋ tɛ̄ɛ̄ŋ, ma̍ kē nda̍ le̍ mā wōūnu̍ŋ. O̍ ko̍ŋ kɔ̍ɔ̍lī, ma̍ pīɔ̄ū nda̍ vɛ̄lɛ̄ kɔ̄vɛ̄i̍la̍ŋ, a̍ nyɛ̄ dīa̍a̍, a̍ mūɛ̄īmā kīle̍pīi̍ya̍ŋ. Ndu̍yɛ̍, a̍ wa̍ a̍ pāūve̍ wa̍, ma̍ dūāū nda̍ kōo̍wa̍ŋ o̍ pāūvīī kēŋ. O̍ ko̍ŋ kɔ̍ɔ̍lī, a̍ nda̍ a̍a̍ nɔ̍lā kɔ᷅la̍ŋ te̍ wa̍, ma̍ hēēlū nda̍ o̍ sōfɛ̍li̍a̍a̍ chōo̍, ndu̍yɛ̍ nda̍ kpo̍u̍, ma̍ mīīŋgū a̍ nda̍ Chɛ̄lu̍i̍kō, chi̍e̍e̍ māwāūwo̍, o̍ wānāā ndāa̍ lo̍. O̍ ko̍ŋ kɔ̍ɔ̍lī, mi̍ māsāā hi̍ɔ̍ɔ̍lu̍a̍a̍ ha̍ā a̍ mīīŋgū o̍ nda̍lo̍ Sāme̍e̍līāā.

¹⁶Mi̍ ī yɔ̄nu᷄ŋ vɛ̍lɛ̄ a̍ te̍le̍ŋ ko̍ŋ, mi̍ I̍dɔ̄ma̍i̍tīi̍ya̍ ā kūā ma̍ kɔ̍ de᷅l lɛ̄ŋndē Chu̍dāle̍ŋ chōo̍ a̍ sɔ̍ŋgɔ̄ɔ̍, ma̍ bīī wāŋnda̍ Chu̍dā ta̍u̍ ma̍ kūā a̍ nda̍ o̍ bīyɔ̄ɔ̍ ni᷄ŋ. O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ E̍ha̍a̍sī o̍ dīmūl Tīkīlātī Pi̍lɛ̍sā, Māsāa̍ le̍ Āsi̍i̍līāā le̍ mbō māla̍ ndu̍ chɔ̄ūwo̍.

¹⁷

¹⁸O̍ te̍le̍ŋ pi᷅lɛ̍ ko̍ŋ bɛ̄ŋgu̍ kpe̍, Fīli̍i̍tīāŋnda̍ bɛ̍ɛ̍ ā wa᷄ kēīyo̍ chi̍e̍e̍ŋ wa̍ o̍ pēmbo᷄ŋ bɛ̄ŋgu̍ bā pāa̍le̍ŋ lē dēllo̍, a̍ mu᷅ŋ Chu̍dā bā tōūwo̍ dēlɔ̄ɔ̍ chōo̍ a̍ sɔ̍ŋgɔ̄ɔ̍. Chi̍e̍e̍ŋ bɛ̍ndūŋ nda̍ de᷄l chōo̍ ma̍ bīū wo̍ŋ, mu̍ŋ cho̍ mu᷅ŋ ni̍, Bɛ̄tī Si̍a̍mɛ̍sī, a̍ A̍i̍cha̍lɔ̄ŋ, a̍ Kɛ̍dɛ̍lɔ̄ɔ̄, o̍ ko̍ŋ kɔ̍ɔ̍lī, a̍ So̍kō, a̍ Ti̍mi̍nā, a̍ Ki̍mi̍sɔ̄, lātūlu̍ a̍ sɔ̄ndɔ̄kɔ̍ltā ndāla̍ŋ, ma̍ chālnu᷄ŋ o̍ chi̍o̍o̍ŋ mu᷅ŋ.

¹⁹Le̍ mɛ̄ɛ̍ E̍ha̍a̍sī, māsāa̍ le̍ Chu̍dā o̍ to̍sa̍ mi̍ wāŋnda̍ Chu̍dā a̍ to̍sā yɔ̄ŋ wɔ̄ɔ̍ŋndo̍ ā Mɛ̄lɛ̄ka̍, ndu̍yɛ̍ vɛ̄lɛ̄, ndu̍ pi̍la̍ bɛ̍ɛ̍ mbo̍ sōlī Mɛ̄lɛ̄ka̍ dīōm yɛ̍, nyɛ̄ ko᷄ŋ to̍sa̍ ni̍ mi̍ Mɛ̄lɛ̄ka̍ tūsī lɛ̄ŋndē Chu̍dāle̍ŋ kpūndɔ̍ɔ̍ chōo̍.

²⁰Ndu̍yɛ̍ mɛ̄ɛ̍ Māsāa̍ A̍ha̍a̍sī o̍ yo̍o̍ŋgu̍ Tīkīlātī Pi̍lɛ̍sā, māsāa̍ le̍ Āsi̍i̍līāā le̍ ndu̍ sɔ̍ŋgɔ̄ɔ̍ hūnɔ̄ɔ̍ mālāa̍, mbo̍ hūŋ. Kɛ̍ yɔ̍ŋi̍ ndu̍ o̍o̍ ma̍la̍ wāŋnda̍ Chu̍dā yɛ̍, mbo̍ mīīŋgū nda̍ nyɛ̄ pālāa̍ tūsīo̍o̍ chōo̍.

²¹Ndu̍yɛ̍, nyɛ̄m ba̍ā kāla᷄ŋ wa̍ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ŋ ni̍, a̍ ŋ̍ wa̍ o̍ chīɛ̍i̍ lēmāsāa̍ wo̍ŋ, ndu̍yɛ̍ a̍ ŋ̍ wa̍ o̍ chīɛ̄ī wānāā bɛ̄ndūa̍a̍ wo̍ŋ, mi̍ Māsāa̍ E̍ha̍a̍sī o̍ chu̍ā mu̍ŋ kpo̍u̍, mbo̍ yōō Māsā Bɛ̍ndōo̍ Āsi̍i̍līāā māā kē. Kɛ̍ a̍ ko̍ŋ kpo̍u̍, ō māla̍ ndu̍ le̍.

²²A̍ sɔ̄ɔ̍ŋ pa̍lāŋ bɛ̄ndu᷄ŋ ko̍ma̍l mu̍ŋ ndu̍ wo̍ŋ kpo̍u̍, Māsāa̍ E̍ha̍a̍sī, o̍ me̍l yɔ̍ŋndā wɔ̄ɔ̍ŋ nda̍ŋ tōsāa̍ le̍, ō wa̍ wɔ̄ hīōūwɔ̄ɔ̍ lāchī a̍ la̍ŋ tōsāa̍, mbo̍ hīāū bɛ̍ɛ̍ māā pāāndū.

²³Mbo̍ mūli᷄ŋ, mbo̍ wā sa̍lāla̍ŋ sōlīo̍o̍ o̍ mɛ̄lɛ̄ka̍a̍ wāŋnda̍ nda̍ a̍a̍ so̍o̍lūū Dāma̍si̍kɔ̍ɔ̄ wa̍, wānāā nda̍ a̍a̍ ye᷅m ndu̍ pāāndū a̍ sɔ̍ŋgɔ̄ɔ̍ wa̍. Mbo̍ dīmī āā, “mɛ̄lɛ̄ka̍a̍ Māsā Bɛ̍ndōo̍ Si̍i̍līāā wa̍ ha̍ā, nda̍ ma̍la̍ nda̍ ni̍ ma̍ yām, le̍la̍ŋ ya̍ I̍ cho̍ sa̍lāla̍ŋ sōlīo̍o̍ o̍ nda̍ lo̍ ni̍, le̍ mā māla̍ ya̍.” Kɛ̍ ke̍ŋ bɛ̍ɛ̍ to̍sa̍ ni᷅ŋ ni̍, mbo̍ chɔ̄ɔ̄lū dɛ̍nɛ̍ pa̍lāa̍ sɔ̄lā, ndu̍yɛ̍ lɛ̄ŋnde̍ŋ bɛ̍ɛ̍ kpo̍u̍, mi̍ lē sɔ̄lā dɛ̍nɛ̍ pālāa̍.

²⁴O̍ ko̍ŋ, nyɛ̄m lāāndu᷄ŋ wa̍ o̍ chīɛ̍i̍ Mɛ̄lɛ̄ka̍a̍ wo̍ŋ, mi̍ Māsāa̍ E̍ha̍a̍sī o̍ du̍a̍ū mu̍ŋ nāa̍ pi᷅lɛ̍, mbo̍ pēsī mu̍ŋ vɛ̍ vɛ̍, ndu̍yɛ̍ mbo̍ kīīndīāā dīōla̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍. O̍ ko̍ŋ kɔ̍ɔ̍lī, mbo̍ tīū ma̍āŋnda̍ŋ tāŋgūllo̍ Chūlu̍sɛ̄lɛ̄m chi̍e̍e̍ kpo̍u̍, le̍ mbō wa̍ sa̍lāla̍ŋ sōlīo̍o̍ o̍ mɛ̄lɛ̄ka̍a̍ chēle̍ŋnda̍ lo̍.

²⁵O̍ ko̍ŋ kɔ̍ɔ̍lī, o̍ chi̍o̍o̍ŋ Chu̍dā ki̍nɛ̍i̍, mbo̍ tāŋgūl fo̍ndāŋndā lāsōōlu̍u̍la̍ŋ ndo̍ŋ kpo̍u̍, le̍ mbō wa̍ nyɛ̄m chūŋ kɛ̄ndɔ᷄ŋ lōmɔ̄ɔ̍ o̍ mɛ̄lɛ̄ka̍ā chēle̍ŋ nda̍ lo̍. Le̍ nyɛ̄ o̍ to̍sa̍ ko̍ŋ ndo̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndūāā ma̍māa̍, ō chɔ̄ɔ̄lū tu̍mbe̍ dɔ̍u̍nɔ᷄ŋ a̍ ndu̍, o̍ ka̍lā ka̍lā.

²⁶Sɔ̄ɔ̍ŋ tɔ᷅ŋ yɔ̍nu̍ŋ o̍ māsāle̍ E̍ha̍a̍sīle̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ chēle̍ŋ o̍ to̍sa̍ o̍ māsāle̍ ndɔ̄le̍ŋ ni᷄ŋ, chɔ̍ŋ o̍ kāndɔ᷄ŋndo̍ ha̍a̍a̍ a̍ o̍ mɛ̄ɛ̄lu̍la̍ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ Yāu̍ sɔ̄ɔ̍ŋ pa̍a̍ndū cho̍ a̍ Māsāā Bɛ̍ndūa̍a̍ Chu̍dā a̍ ha̍ā I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

²⁷O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ E̍ha̍a̍sī wu᷅, ma̍ chɔ̄ ndu̍ o̍ chi̍e̍e̍ bɛ̍ndōo̍ ni᷄ŋ, Chūlu̍sɛ̄lɛ̄m. Kɛ̍ ā chɔ᷅ ndu̍ o̍ sɛ̄i̍ nda̍ yu̍ŋgu̍ lēmāsāa̍ ni᷄ŋ te̍. O̍ ko̍ŋ kɔ̍ɔ̍lī, mi̍ Hɛ̄sɛ̄ki̍yā po̍ ndɔ̄, o̍ mi̍i̍ŋgū māsāa̍ o̍ fōōfo̍ ndɔ̄ɔ̍.