Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 30 Bible Online

Ko̍lo̍ni̍kō Di̍i̍ŋ Ndɔ̄ɔ̍ 30 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 30

¹Ndu̍yɛ̍ wāŋnda̍ ā bīi̍ bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ o̍ pāŋgi̍i̍ tāse̍i̍ ni᷄ŋ wɔ̍sī kōŋ māā pāāndū le̍. Kāni̍ fo̍ndōle̍, wānā sōlīāā lāsa̍lāa̍ ā bɔ̄ɔ̍ bɔ̍ɔ̍ ā ve᷄ a̍ di̍a̍ndāā Mɛ̄lɛ̄ka̍ o̍ hɔ̄l, le̍ he̍ī, ā ve̍ a̍ bɛ̄ndāā le̍ wa̍li̍ nda̍ a̍a̍ nɔ̍ le̍ tōsāa̍ wo̍ tōsā le̍. Ndu̍yɛ̍ vɛ̍lɛ̄, ō cho̍ wa᷅ŋnda̍ kpo̍u̍ le̍ nda̍ a̍a̍ chu̍u̍ŋgi̍āŋ Chūlu̍sɛ̄lɛ̄m le̍ bɔ̄ŋa᷅ŋndo̍ ho̍ō le̍. Le̍ he̍ī, mi̍ Māsāa̍ Hɛ̄sɛ̄ki̍yā nda̍ lāŋgba̍ā kālāā lēlɛ̄ŋnda̍, a̍ wāŋnda̍ ā pīli̍a̍a̍, ā chɛ̄la᷅ŋ le̍ bɔ̄ŋa᷅ŋndo̍ ho̍ō bīyɔ̄ɔ̍ o̍ pāŋgi̍i̍ di̍i̍ŋ ndūɛ̍i̍ ni᷄ŋ. O̍ ko̍ŋ, mi̍ Māsā Bɛ̍ndōo̍ Hɛ̄sɛ̄ki̍yā o̍ yɔ᷅ŋ dīōmnde̍ŋ I̍sɔ̄lūɛ̄ī, a̍ Chu̍dā, lātūlu̍ a̍ būŋgɛ̄ī E̍fi̍lūēmnde̍, a̍ būŋgɛ̄ī Mānāa̍sēve̍ bā pāa̍le̍ŋ lē dēl lo̍, le̍ mī nda̍ a̍a̍ chu̍u̍ŋgi̍āŋ Chūlu̍sɛ̄lɛ̄m o̍ chīɛ̍i̍ Mɛ̄lɛ̄ka̍a̍, le̍ mā bīī Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄, le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ bɛ̄ɛ̄le̍ŋ kīo̍(...)

⁴

⁵O̍ ko̍ŋ kɔ̍ɔ̍lī, mi̍ wāŋnda̍ ha̍ā ā kɛ̄ɛ̄sīāā le̍ mā yɔ᷄ŋ yōndāa̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, chɔ̍ŋ Da᷅ŋ, bā lūāŋndo̍, mbō kūɛ̄ Bīɛ̄ɛ̄si̍ɛ̍bā bā tōūwo̍, le̍ mī wāŋnda̍ ā hīŋ mā hu᷄ŋ bi̍ī Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄, Chūlu̍sɛ̄lɛ̄m, le̍ mā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ kīo̍o̍. Kāni̍ fu̍u̍le̍, bɔ̄ŋa᷅ŋndo̍ ho̍ō, ndu̍ o̍o̍ bīīnu᷄ŋ ndɔ̍ mī wāŋnda̍ hīŋ fāŋgā mɛ̄ɛ̍ i̍ cho̍ ī tūwāā o̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ ni᷄ŋ yɛ̍ le̍.

⁶O̍ ko̍ŋ kɔ̍ɔ̍lī, mi̍ māsā bɛ̍ndōo̍ a̍ lāŋgba̍ā kālāā lēlɛ̄ŋnda̍ ā yɔ̄ŋ ki̍i̍la̍a̍ ma̍ kūā a̍ yāu̍la̍ŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, a̍ lɛ̄ŋndē Chu̍dāle̍ŋ kpo̍u̍. Nyɛ̄ nda̍ pōōnyi̍a̍a̍ wo̍ cho̍ ho̍ō ni̍, āā, “Wāŋnda̍ I̍sɔ̍lūɛ̄ī, la̍ mīīŋgu̍ Mɛ̄lɛ̄ka̍ Ya̍a̍wɛ̄ɛ̄ o̍ ībūŋ, Mɛ̄lɛ̄ka̍ E̍bīlāha᷅m, a̍ Āa̍se̍, a̍ Che̍kɔ̍pū wo̍, ndu̍ bɛ̍ɛ̍ mbō mi̍i̍ŋgu̍ nya̍ o̍ ībūŋ, nya̍ wānāa̍ hɛ̍lu᷄ŋ ha̍ā mi̍ lā fūlā Māsā Bɛ̍ndūa̍a̍ Āsi̍i̍līāā o̍ bā bɛ̄ŋgu̍ wa̍.

⁷Lā tu̍āl ka̍ālā fi̍nyāā nyāā ma̍māa̍, a̍ wānāya᷅ŋ nyāa̍ŋ kɔ̄ɔ̄lī le̍, a̍ ve̍ ha̍ā sa̍kpō Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍ o̍ hɔ̄l te̍ wa̍. Ndu̍yɛ̍ mi̍ Mɛ̄lɛ̄ka̍ tūsī nda̍ dɛ̍nɛ̍ pa̍lāā bɛ̄ndōo̍ chōo̍.

⁸Lā wa᷅ wānāā bōlīī kālā māā nda̍ le̍. Lā tūsi̍ŋ Mɛ̄lɛ̄ka̍ Ya̍a̍wɛ̄ɛ̄ o̍ bā bɛ̄ŋgu̍, ndu̍yɛ̍ mī lā hīŋ o̍ chīɛ̄ī ndɔ̄ di̍a̍ndāā o̍ bɛ̍ɛ̍ndi̍a̍a̍ mbo̍ wa̍ le̍ fɛ̍ɛ̍ŋ a̍ fɛ̍ɛ̍ŋ ndo̍, mi̍ lā sōōlu̍u̍ ndu̍, mī lā wa̍ wa̍li̍ ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ tōsāa̍, Mɛ̄lɛ̄ka̍ nyāa̍. O̍ ko̍ŋ, mī tu̍mbe̍ ndɔ̄ ka̍lā ka̍lāa̍ ō fāŋa̍ŋ nya̍ chōo̍.

⁹Tē lā mīīŋgu̍ Mɛ̄lɛ̄ka̍ Ya̍a̍wɛ̄ɛ̄ o̍ ībūŋ pɛ̍, wānāya᷅ŋ nyāa̍ŋ ni̍, a̍ chūāūwāā nyāa̍, nyīɛ̍ɛ̍ye̍ ī chō wānāa̍ bi̍ī nda̍ wa̍ bīyɔ̄ɔ̄, mā ma̍l nda̍, mā mīīŋgu̍ o̍ lɛ̄ŋnde̍ŋ nde᷅ŋ ni᷄ŋ. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ chō wānā kɛ̍ndɛ̄, ndu̍yɛ̍ mbo̍ nɔ̄ nyīɛ̍ɛ̍ye̍. Ndu̍yɛ̍ tē lā mīīŋgu̍ ndu̍ o̍ ībūŋ pɛ̍, ō chō nya̍ mīīŋgū bīyɔ̄ɔ̄ māā pāāndū.”

¹⁰O̍ ko̍ŋ kɔ̍ɔ̍lī, mi̍ ki̍i̍la̍a̍ ha̍ā ā kūā ma̍ bālū o̍ chi̍o̍o̍ŋ o̍ būŋgɛ̄ī E̍fi̍lūēmnde̍ ni᷄ŋ, a̍ būŋgɛ̄ī Mānāa̍sēve̍ kpo̍u̍, ma̍ kūā le̍nde̍ ha̍a̍a̍ o̍ būŋgɛ̄ī Sɛ̍bu̍lɔ̄ŋnde̍ di̍. Kɛ̍ mi̍ wāŋnda̍ mām ki̍i̍la̍a̍ ha̍ā, ma̍ chūā nda̍ chɔ̍dɔ̄.

¹¹Kɛ̍ mi̍ pūa̍a̍ ā ti᷄ŋ, fūlāa̍ o̍ būŋgɛ̄ī A̍sīɛ̄ɛ̄ve̍ ni᷄ŋ, a̍ būŋgɛ̄ī Mānāa̍sēve̍, a̍ būŋgɛ̄ī Sɛ̍bu̍lɔ̄ŋnde̍, ma̍ tūsi᷄ŋ, ma̍ kūā Chūlu̍sɛ̄lɛ̄m o̍ yōōŋgū kōŋ.

¹²Ndu̍yɛ̍, Mɛ̄lɛ̄ka̍ o̍ wa̍ a̍ wāŋnda̍ Chu̍dā lātūlu̍, mbo̍ tōsā ma̍ wā kɔ̄llo̍ ō pīlɛ̍, le̍ mā tōsa̍ nyɛ̄ māsā bɛ̍ndōo̍ nda̍ lāŋgba̍ā ndūāā ka᷅la̍ ā dīmu̍l nda̍ wo̍, ndu̍ yɔ̍nūŋ ni̍ māā, le̍ mā tōl dīōm Mɛ̄lɛ̄ka̍ Ya̍a̍wɛ̄ɛ̄ wo̍ kɔ̄ɔ̄lī.

¹³O̍ pāŋgi̍i̍ dīi̍ŋ ndūɛ̍i̍ ni᷄ŋ, o̍ wɔ̄sī kōŋ ni᷄ŋ, mi̍ wāŋnda̍ kūā ta̍u̍ ta̍u̍ Chūlu̍sɛ̄lɛ̄m chi̍e̍e̍, le̍ mā kɔ̍ bi̍ī bɔ̄ŋa᷅ŋ nda̍ dīā be̍e̍dīi̍ nɔ̍ yi̍i̍sīi̍ le̍ni̍ŋ te̍ wo̍.

¹⁴O̍ ko̍ŋ, ma̍āŋndā chēle̍ŋnda̍ nda̍ tōōsi̍a̍a̍ Chūlu̍sɛ̄lɛ̄m nda̍ŋ ki̍nɛ̍i̍, a̍ ma̍āŋndā nda̍ a̍a̍ lu̍ām nyɛ᷅m chūŋ kɛ̄ndɔ᷄ŋ lēchōo̍ o̍ mɛ̄lɛ̄ka̍a̍ chēle̍ŋ nda̍ lo̍ la̍ŋ, ma̍ fāŋā la̍ŋ kpo̍u̍, ma̍ kɔ̍ vi̍o̍ū la̍ŋ o̍ dɛ̍ŋgbɔ̍ɔ̍ o̍ pēmbo᷄ŋ tɛ̄ɛ̄ŋ Ki̍di̍lɔ̄ŋ.

¹⁵O̍ pāŋgi̍i̍ dīi̍ŋ ndūɛ̍i̍ ni᷄ŋ, mālɔ̄ tɔ̍ a̍ lē hi̍ɔ̍ɔ̍lu̍ wɔ̍sī kōŋ, ma̍ dīī sāā fɔ̍ŋndɔ̍ wa̍ le̍ Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ o̍kɔ̄ɔ̄ wo̍. O̍ ko̍ŋ, wānāā sōlīāā lāsa̍lāa̍ ni̍, a̍ Li̍va̍īya̍, mi̍ si̍ɔ̍mbu̍la̍ŋ lā bīī nda̍, ma̍ dīndī nda̍ pi̍la̍ Mɛ̄lɛ̄ka̍ o̍ hɔ̄l. Ndu̍yɛ̍ nda̍ bɛ̍ɛ̍, ma̍ mīīŋgū ni̍ko̍ sa̍lāla̍ŋ lōmɔ̄ɔ̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ.

¹⁶O̍ ko̍ŋ kɔ̍ɔ̍lī, mi̍ wānāā sōlīāā lāsa̍lāa̍, a̍ Li̍va̍īya̍ ha̍ā, ā chūā fo̍ndāŋndā ndāla̍ wa̍lta̍ŋ o̍ chīɛ̍i̍ Mɛ̄lɛ̄ka̍a̍ ni᷄ŋ māā pāāndū, mɛ̄ɛ̍ i̍ cho̍ ī tūwāā o̍ sāwāla̍ Mūu̍sē, wāna̍ Mɛ̄lɛ̄ka̍a̍ ni᷄ŋ yɛ̍. O̍ ko̍ŋ kɔ̍ɔ̍lī, mi̍ wānāā sōlīāā lāsa̍lāa̍ ā fāsāŋīāā ko̍o̍ma̍ chɔ̄lūāā mā nda̍ sɔ̄la̍ Li̍va̍īya̍ o̍ bā wa̍ŋ, o̍ ma̍āŋndo̍.

¹⁷Wānāa̍ ve̍ a̍ di̍a̍ndāā Mɛ̄lɛ̄ka̍ o̍ hɔ̄l te̍ wa̍, ā wa̍ ta̍u̍ wa̍nāa̍ chu̍u̍ŋgi̍āŋ ka̍ŋ nda̍ tɛ̄ɛ̄ŋ. Nda̍ a̍a̍ nɔ̍ ku̍e̍ē mī nda̍ a̍a̍ di̍ī sāā fɔ̍ŋndu̍a̍a̍ wānā o̍ wānā ndu̍ o̍o̍ nɔ̍ le̍ dīyɔ̄ɔ̍ le̍ Bɔ̄ŋa᷅ŋ Lōōna᷄ŋndo̍ ho̍ō wa̍ le̍. Le̍ he̍ī, mi̍ Li̍va̍īya̍ ā dīī sāā fɔ̍ŋndu̍a̍a̍ le̍ wānā o̍ wānā ō pīlɛ̍, le̍ mā sɔ̄la̍ dīndīo̍o̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.

¹⁸Wāŋnda̍ ha̍ā, ā nda̍ a̍a̍ ve̍ ka̍ŋ a̍ di̍a̍ndāā Mɛ̄lɛ̄ka̍ o̍ hɔ̄l te̍ wa̍, a̍ ka̍ ka̍ o̍ yu̍ŋgu̍ E̍fi̍lūēm chōo̍, a̍ yu̍ŋgu̍ Mānāa̍sē wo̍, a̍ yu̍ŋgu̍ I̍sa̍a̍kā wo̍, a̍ yu̍ŋgu̍ Sɛ̍bu̍lɔ̄ŋ ndo̍ chōo̍ nda̍ a̍a̍ fu̍la̍ ni̍. Mi̍ chē bɛ̍ɛ̍ ī ve̍ i̍ bɛ̍ndāā mɛ̄ɛ̍ sāwāla̍ Mɛ̄lɛ̄ka̍ la̍ŋ lā dīmi̍ yɛ̍ le̍ ni̍, kɛ̍, a̍ ko̍ŋ fa̍ū, wāŋnda̍ ha̍ā ā dīā nyɛ̄ dīāā Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄. Ndu̍yɛ̍, mi̍ Hɛ̄sɛ̄ki̍yā o̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ le̍ nda̍, mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, wānā kɛ̍ndɔ̄ɔ̍, tūīīnu̍ŋ wa᷅ŋnda̍ ha̍ā īnyīɛ̍ɛ̍,

¹⁹a̍ kɛ̍ɛ̍si̍a̍a̍ ha̍ā a̍ kɔ̄ltā ndāla̍ŋ le̍ nu̍m tōlɔ̄ɔ̍ kɔ̄ɔ̄lī wa̍, nūm Mɛ̄kɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍, mi̍ chē bɛ̍ɛ̍ ā cho̍ a̍ di̍a̍ndāā nu̍m o̍ hɔ̄l le̍ mā wa̍ o̍ bɔ̄ŋa᷅ŋndo̍ ho̍ō chōo̍ le̍ ni̍.”

²⁰Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī pīɛ̄īle̍ Māsā Bɛ̍ndōo̍ Hɛ̄sɛ̄ki̍yā le̍ŋ, o̍ ko̍ŋ, mbo̍ māl wāŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ, o̍ tūsi̍ lɛ̍ nda̍ dɛ̍nɛ̍ pa̍lāa̍ chōo̍ le̍.

²¹Ndu̍yɛ̍ le̍ pālɛ̍i̍ ī ŋɔ᷄mmɛ̍ū, wāŋnda̍ I̍sɔ̄lūɛ̄ī kpo̍u̍ ā wa̍ Chūlu̍sɛ̄lɛ̄m o̍ bɔ̄ŋa᷅ŋ nda̍ dīā ko̍ŋ be̍e̍dīi̍ nda̍ do̍ū yi̍i̍sīi̍ le̍ wo̍ chōo̍ a̍ nya̍a̍lo̍o̍. Ndu̍yɛ̍ lēpāa̍ o̍ lēpāa̍ Li̍va̍īya̍, a̍ wānāa̍ sōlīāā lāsa̍lāa̍, ā wa̍ chōndo̍ŋ sōlīo̍o̍ mā sāŋgālā Mɛ̄lɛ̄ka̍ Ya̍a̍wɛ̄ɛ̄, mā lūāā nyɛ̄m chāāŋ yɛ̍ yi̍ɔ̍ɔ̍ŋ o̍ ndu̍ lo̍, a̍ kpāāya̍ ndāa̍ kpo̍u̍.

²²O̍ ko̍ŋ kɔ̍ɔ̍lī, mi̍ Hɛ̄sɛ̄ki̍yā sāŋgālā Li̍va̍īya̍, le̍ tāāsi̍lā kɛ̄ndɛ̄lā nda̍ chɔ᷄m o̍ Mɛ̄lɛ̄ka̍ Ya̍a̍wɛ̄ɛ̄ sōōlūūwo̍ ni᷄ŋ nda̍ŋ. Mi̍ wāŋnda̍ ā dīā nyɛ̄ dīāā Bɔ̄ŋa᷅ŋ Lōōna᷄ŋ kōŋ a̍ Hīōūwɔ̄ɔ̄ chōo̍ wo̍ o̍kɔ̄ɔ̄ le̍ pālɛ̍i̍ ī ŋɔ̍mmɛ̍ū. Ma̍ sōlī sa̍lālā kɔ̄l nyūlūla̍ŋ, ma̍ mēl Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍ ba̍li̍ka̍.

²³O̍ ko̍ŋ kɔ̍ɔ̍lī, wānāa̍ wa̍ o̍ bɔ̄ŋa᷅ŋ kōŋ chōo̍ wa̍ kpo̍u̍, ma̍ chɛ̄la᷅ŋ le̍ mī bɔ̄ŋa᷅ŋ kōŋ hīōū lāchī lē pālɛ̍i̍ ī ŋɔ᷄mmɛ̍ū vɛ̍lɛ̄. Ndu̍yɛ̍ mā hīāū lāchī a̍ bɔ̄ŋa᷅ŋ kōŋ bīyɔ̄ɔ̍ a̍ nya̍a̍lo̍o̍ le̍ pālɛ̍i̍ vɛ̄lɛ̄ ŋɔ᷄mmɛ̍ū.

²⁴O̍ ko̍ŋ kɔ̍ɔ̍lī, mi̍ Hɛ̄sɛ̄ki̍yā, māsāa̍ le̍ Chu̍dā, o̍ ke᷅ wānāā nda̍ a̍a̍ chu̍u̍ŋgi̍āŋ ka̍ŋ le̍ bɔ̄ŋa᷅ŋndo̍ wa̍, nāūwāā tōōyīa̍a̍ wāa̍ ō pīlɛ̍ (1,000), a̍ sāa̍ wāa̍la̍ŋ lā ŋɔ᷄mmɛ̍ū (7,000). O̍ ko̍ŋ kɔ̍ɔ̍lī, lāŋgba̍ā kālāā lēlɛ̄ŋnda̍ bɛ̍ɛ̍ ma̍ kē wāŋnda̍ ha̍ā nāūwāā tōōyīa̍a̍ wāa̍ ō pīlɛ̍ (1,000), a̍ sāa̍ wāa̍la̍ŋ tɔ̍ (10,000). O̍ ko̍ŋ kɔ̍ɔ̍lī, mi̍ wānāā sōlīāā lāsa̍lāa̍ ā bɔ̍ɔ̍ bɔ̍ɔ̍ a̍ di̍ndī nda̍ pi̍la̍ Mɛ̄lɛ̄ka̍ o̍ hɔ̄l.

²⁵Wāŋnda̍ Chu̍dā a̍ chūūŋgi̍āŋ ka̍ŋ na̍a̍ pi᷅lɛ̍ wa̍ ni̍, a̍ wānāā sōlīāā lāsa̍lāa̍, a̍ Li̍va̍īya̍, a̍ wānā o̍ wānā fu̍la̍ I̍sɔ̍lūɛ̄ī, a̍ wānāā lēkāa̍wa̍a̍ wa̍ I̍sɔ̄lūɛ̍i̍ya̍, a̍ wānāā lēkāa̍wa̍a̍ wa̍ Chu̍dā wa̍, nda̍ kpo̍u̍ ma̍ dūāūnu᷄ŋ nya̍a̍le̍ a̍ nyɛ̍ yɔ̍nu̍ŋ ndo̍.

²⁶Ndu̍yɛ̍ nya̍a̍le̍ bɛ̍ndōo̍ ō wa̍ Chūlu̍sɛ̄lɛ̄m ta̍u̍. Kāni̍ bɛ̍ɛ̍, chɔ̍ŋ a̍ te̍le̍ŋ Sɔ̍lɔ̍mɔ̄ŋ, po̍ Dēēve̍ wo̍ ō wa̍ māsā wo̍, nya̍a̍le̍ wa̍ā le̍nde̍ ndu̍ o̍o̍ yɔ̍nu̍ŋ ndɔ̍ Chūlu̍sɛ̄lɛ̄m te̍.

²⁷O̍ ko̍ŋ kɔ̍ɔ̍lī, wānāā sōlīāā lāsa̍lāa̍ ni̍, a̍ Li̍va̍īya̍, ma̍ cha᷄ŋ ma̍ dūāū wāŋnda̍ sa̍lā. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī nda̍ dīōm.