Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 7 Bible Online

Ko̍lo̍ni̍kō Di̍i̍ŋ Ndɔ̄ɔ̍ 7 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 7

¹Mɛ̄ɛ̍ Sɔ̍lɔ̍mɔ̄ŋ o̍ chi̍i̍ pīɛ̄īle̍ŋ, mi̍ yīŋnde̍ŋ lē fūlā o̍ fo̍nda᷄ŋ Mɛ̄lɛ̄ka̍a̍ chōo̍ cho̍o̍, mi̍ lē hu᷄ŋ lo᷅m sa̍lālā lūāmāāla̍ŋ, a̍ sa̍lālā chēle̍ŋndā nda̍ a̍a̍ nɔ̍ le̍ lōmɔ̄ɔ̍ la̍ŋ kpo̍u̍. O̍ ko̍ŋ kɔ̍ɔ̍lī, mi̍ pa̍ŋgēle̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ lātūlu̍ wo̍ ō tīū o̍ chīɛ̍i̍ Mɛ̄lɛ̄ka̍a̍ ni᷄ŋ si̍lɔ̍.

²Wānāā sōlīāā lāsa̍lāa̍ ā nɔ̄la̍ mā lūɛ̄ī o̍ chīɛ̍i̍ Mɛ̄lɛ̄ka̍a̍ ni᷄ŋ te̍, kāni̍ fo̍ndōle̍ pa̍ŋgēle̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ lātūlu̍ wo̍ ō wa̍ ō tīūwāā chīɛ̍i̍ Mɛ̄lɛ̄ka̍a̍ ni᷄ŋ kpo̍u̍.

³Mɛ̄ɛ̍ wāŋnda̍ I̍sɔ̄lūɛ̄ī kpo̍u̍ a̍ che̍ yīŋnde̍ chɛ̍ŋ nde̍ŋ o̍ fo̍nda᷄ŋ Mɛ̄lɛ̄ka̍a̍ le̍ŋ, ndu̍yɛ̍ ma̍ chā pa̍ŋgēle̍ chɔ᷅m māā Mɛ̄lɛ̄ka̍a̍ Ya̍a̍wɛ̄ɛ̄ o̍ cho̍ a̍ nda̍ lātūlu̍ wo̍ mbo̍ tūāl o̍ chīɛ̍i̍ Mɛ̄lɛ̄ka̍a̍ chōo̍, nda̍ kpo̍u̍ ma̍ bāŋ wūla̍ŋ ma̍ fūūlūū hɔ̄lla̍ lɛ̄ŋ mɛ̍ɛ̄, ma̍ sōōlūū Mɛ̄lɛ̄ka̍ Ya̍a̍wɛ̄ɛ̄, mā mēl ndu̍ ba̍li̍ka̍. Ma̍ dīmī āā, “Sāŋgālāa̍ chō le̍ nu̍m Mɛ̄lɛ̄ka̍ Ya̍a̍wɛ̄ɛ̄, kāni̍ fo̍ndōle̍, ā chō wānā kɛ̍ndɛ̄, kāālā nūmndo̍ ō fe̍ŋāŋ le̍chōo̍ le̍, ndu̍yɛ̍ ō chō le̍ fɛ̍ɛ̍ŋ a̍ fɛ̍ɛ̍ŋ.”

⁴O̍ ko̍ŋ kɔ̍ɔ̍lī, mi̍ Māsāa̍ Sɔ̍lɔ̍mɔ̄ŋ nda̍ wāŋnda̍ I̍sɔ̄lūɛ̄ī kpo̍u̍ a̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍.

⁵Chɔ̄lūāā Māsāa̍ Sɔ̍lɔ̍mɔ̄ŋ o̍ di̍ī le̍ sa̍lāla̍ŋ sōlīo̍o̍ wa̍, nda̍ cho̍ ha̍ā ni̍, nāūwa̍ wāa̍la̍ŋ bi̍dīi̍ŋ a̍ lā tīɔ̍ɔ̍ŋ (22,000), a̍ sāa̍ wāa̍la̍ŋ kɛ̄mɛ̄ a̍ bi̍di̍i̍ŋ (120,000). O̍ ko̍ŋ kɔ̍ɔ̍lī, mi̍ Māsāa̍ Sɔ̍lɔ̍mɔ̄ŋ nda̍ wāŋnda̍ I̍sɔ̄lūɛ̄ī a̍ ma᷅l chīɛ̄īyo̍ Mɛ̄lɛ̄ka̍ o̍ bā.

⁶O̍ ko̍ŋ, mi̍ wānāā sōlīāā lāsa̍lāa̍, ā sīm o̍ fo̍ndāŋndā ndāla̍ yɛ̍ yɛ̍la̍ŋ, ndu̍yɛ̍ mi̍ Li̍va̍īya̍ bɛ̍ɛ̍ a̍ si᷅m a̍ nyɛ̄m chāa̍ŋ o̍ lābā le̍ Mɛ̄lɛ̄ka̍ sāŋgālāa̍. Wānāā sōlīāā lāsa̍lāa̍ nda̍ wa̍ īsīsi̍ kpe̍ŋgēi̍ pīlɛ̍i̍ mā hɔ̄l bu̍lu̍la̍ŋ, mī Li̍va̍īya̍ nda̍ lūāā nyɛ᷅m chāa̍ mā sōlī chōnde̍i̍ āā, “Kāāla̍ ndɔ̄ɔ̍ ō chō le̍ fɛ̍ɛ̍ŋ a̍ fɛ̍ɛ̍ŋ.” Ndu̍yɛ̍ māsāa̍ Dēēve̍ ndu̍ ndu̍ o̍o̍ to̍o̍si̍a̍a̍ nyɛ̄m nyāa̍ mu᷅ŋ sīndɛ̄ ni̍ le̍ Mɛ̄lɛ̄ka̍ sāŋgālāa̍. Ndu̍yɛ̍ mɛ̄ɛ̍ wāŋnda̍ tūēī mi̍ wānāā sōlīāā lāsa̍lāa̍ ā hɔ̄l bu̍lu̍la̍ŋ, mi̍ Li̍va̍īya̍ ā sōlī chōnde̍i̍, nda̍ kpo̍u̍ ma̍ cha᷄ŋ i̍si̍si̍.

⁷O̍ ko̍ŋ kɔ̍ɔ̍lī, la̍ū wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ hɔ̄ndɔ̄ wo̍, mi̍ Sɔ̍lɔ̍mɔ̄ŋ ma̍l fo̍nda̍ wa̍ o̍ la̍ū kōŋ tɛ̄ɛ̄ŋ ndo̍ Mɛ̄lɛ̄ka̍ Ya̍a̍wɛ̄ɛ̄ o̍ bā. Mbo̍ sōlī sa̍lālā lūāmāāla̍ŋ, a̍ sa̍lālā kɔ̄l nyūlūlā nda̍ sōlī a̍ chūɛ̄īmā chɔ̄lūa̍a̍ nda̍ŋ, o̍ fo̍ndāŋ kōŋ. Kāni̍ fo̍ndōle̍, ma̍āŋ ībūlɔ̍ŋsīi̍ Sɔ̍lɔ̍mɔ̄ŋ to̍o̍si̍a̍a̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ lāchī wo̍, ō ve̍ o̍ bɔ̍ɔ̍ le̍ sa̍lāla̍ŋ ndāŋ kpo̍u̍ so̍līo̍o̍ le̍chōo̍ le̍.

⁸Mɛ̄ɛ̍ nda̍ chīi̍ Mɛ̄lɛ̄ka̍ pīɛ̄ī le̍ chīɛ̄īyo̍ ho̍ō, mi̍ Sɔ̍lɔ̍mɔ̄ŋ nda̍ wāŋnda̍ I̍sɔ̄lūɛ̄ī a̍ bi̍ī bɔ̄ŋa᷅ŋ bɛ̄ndū dīāā nyɛ̄ dīāā le̍ pālɛ̍i̍ ī ŋɔ᷄mmɛ̍ū. Mi̍ wāŋnda̍ fāŋgā bɛ̍ndōo̍ ā hūŋ le̍ bɔ̄ŋa᷅ŋndo̍ ho̍ō, mɛ̄ɛ̍ ha̍ā fūla̍ Ha̍ma̍tī Pa̍a̍sī pɔ̍ɔ̍li̍ ba᷅ lūāŋndo̍, mi̍ ha̍ā fūlā o̍ pɛ̄ŋgu̍la̍ lɛ̄ŋndē I̍chi̍pīle̍ŋ bā tōūwo̍.

⁹Le̍ pālɛ̍i̍ ī ŋɔ᷄mmɛ̍ū ā wa̍ o̍ bɔ̄ŋa᷅ŋ bɛ̄ndū dīāā nyɛ̄ dīa̍a̍ ho̍ō chōo̍ le̍ ma̍āŋndo̍ mālɔ̄ɔ̍ Mɛ̄lɛ̄ka̍ o̍ bā. O̍ ko̍ŋ kɔ̍ɔ̍lī, ma̍ bīī vɛ̄lɛ̄ bɔ̄ŋa᷅ŋ bɛ̄ndū dīāā nyɛ̄ dīāā le̍ pālɛ̍i̍ ī ŋɔ᷄mmɛ̍ū. O̍ pāa̍le̍ ŋɔ̄ma̍a̍le̍ŋ chōo̍, ma̍ bīī bɔ̄ŋa᷅ŋ bɛ̄ndōo̍ le̍ bɔ̄ŋa᷅ŋndo̍ ho̍ō kīndāa̍.

¹⁰O̍ ko̍ŋ kɔ̍ɔ̍lī, o̍ mālɔ̄ bi̍di̍i̍ŋ a̍ lē yāa̍ wa̍ŋ chōo̍ o̍ pāŋgi̍i̍ ŋɔ̍mmɛ̍ūve̍ ni᷄ŋ o̍ wɔ̄sī kōŋ ni᷄ŋ, mi̍ Sɔ̍lɔ̍mɔ̄ŋ dīmūl wāŋnda̍ le̍ mā mīīŋgu̍ o̍ lā nda̍lo̍. Ndu̍yɛ̍ mi̍ wānā o̍ wānā mīīŋgū o̍ ndu̍lo̍ a̍ nya̍a̍lo̍o̍, ndu̍yɛ̍ a̍ kɔ̄ltā kɛ̄ndɛ̄ bɛ̄ndōo̍, kāni̍ fo̍ndōle̍, le̍ dɛ̍nɛ̍ kɛ̍ndɛ̄ bɛ̄ndū Mɛ̄lɛ̄ka̍ Ya̍a̍wɛ̄ɛ̄ o̍ tōsa̍l bu̍ɛ̍ī ndɔ̄ɔ̍ Dēēve̍, a̍ Sɔ̍lɔ̍mɔ̄ŋ, a̍ wānāā ndūa̍a̍ I̍sɔ̄lūɛ̄ī yo̍.

¹¹Mɛ̄ɛ̍ nu̍a̍ā Sɔ̍lɔ̍mɔ̄ŋ o̍ chi̍i̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ tāŋgūl, a̍ chīɛ̍i̍ ndɔ̍ lēmāsāa̍. Ndu̍yɛ̍, nyɛ̄ o̍ nyɛ̄ Sɔ̍lɔ̍mɔ̄ŋ ndu̍ o̍o̍ tu̍u̍ le̍ tōōsīa̍a̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, a̍ o̍ chīɛ̄ī ndɔ̍ lēmāsāa̍ ni᷄ŋ, mbo̍ tōsā mu̍ŋ kpo̍u̍.

¹²Ō wa̍ nyūmmā pīlɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ Sɔ̍lɔ̍mɔ̄ŋ, mbo̍ dīmūl ndu̍ āā, “Sɔ̍lɔ̍mɔ̄ŋ, I̍ tu̍e̍ī pīɛ̄īlē nūmnde̍ŋ. Ndu̍yɛ̍ I̍ hɛ̍li̍ fo̍ndāa̍ ho̍ō le̍ mbō wa̍ le̍ ya̍, ndu̍yɛ̍ mbō wa᷄ chīɛ̄ī sōlīāā lāsa̍lāa̍.

¹³Te̍le̍ŋ o̍ te̍le̍ŋ ya̍ ku̍u̍na̍ pīɔ̍ɔ̍ le̍ sīa̍a̍ o̍ lɛ̄ŋndē nyāle̍ŋ ni᷄ŋ pɛ̍, ɔ̄ɔ̄ mi̍ yɔ̍ŋ so̍o̍nu̍a̍a̍ le̍ tɔ̄lɔ̄ɔ̄lā nyāla̍ŋ tɛ̄ɛ̄mbūūwo̍, ɔ̄ɔ̄ mī i̍ to̍sa̍ mī nāālā wɔ̍ɔ̍ŋnda̍ŋ lā de᷄l wāŋnda̍ chōo̍ pɛ̍,

¹⁴kɛ̍ tē nya̍ wānāā nīa̍a̍ dīōlā nīla̍ŋ lā chō ha̍ā chōo̍ wa̍ ā tūsi̍ŋ o̍ ya̍ lo̍ pɛ̍, mā pīɛ̍i̍ ya̍, ndu̍yɛ̍ mā kīndi̍ le̍ mā tōsa̍ nyɛ̄ ya̍ I̍ hɛ̍na̍ŋ ndo̍, ndu̍yɛ̍, mā ma᷄l yɔ̄ŋndā ndāla̍ wɔ̍ɔ̍ŋnda̍ŋ, I̍ cho̍ pīɛ̄īlē ndā le̍ŋ tūēīyɔ̄ɔ̄ nāa̍ ya̍ I̍ cho̍ o̍ fo̍ndāŋ nūu̍ chōo̍ cho̍o̍ wa̍, ndu̍yɛ̍ mī I̍ ma̍l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ. O̍ ko̍ŋ kɔ̍ɔ̍lī, mī I̍ to̍sa̍ mī lɛ̄ŋndē ndāle̍ŋ lē mīīŋgu̍ vɛ̄lɛ̄ nāŋɔ̄ɔ̄ māā pāāndū.

¹⁵Hɔ̄ltē nīle̍ŋ lē chō o̍ chīɛ̄īyo̍ ho̍ō chōo̍, ndu̍yɛ̍ lēpīɛ̄ī o̍ lēpīɛ̄ī nya̍ pīɛ̍i̍ o̍ chīɛ̄īyo̍ ho̍ō ni᷄ŋ pɛ̍, I̍ cho̍ ō bɛ̄ɛ̄ndīa̍ŋ mī tu̍e̍ī pīɛ̄īlē lēŋ.

¹⁶Le̍la̍ŋ, I̍ hɛ̍li̍ ni̍ko̍ chi̍ɛ̍īyo̍ ho̍ō, mi̍ si̍i̍ŋgūū ndu̍ fo̍ndāŋ nī di̍a̍ndāa̍, le̍ mā wa̍ ya̍ sōōlūūwo̍ lo̍ŋ le̍ fɛ̍ɛ̍ŋ a̍ fɛ̍ɛ̍ŋ. Hɔ̄ltē nīle̍ŋ lē chō wā o̍ chīɛ̄īyo̍ ho̍ō chōo̍, ndu̍yɛ̍ mī kɔ̄l nūu̍ wa̍ o̍ ndu̍lo̍ lɔ̍ɔ̍ o̍ lɔ̍ɔ̍.

¹⁷Ndu̍yɛ̍ nūm Sɔ̍lɔ̍mɔ̄ŋ, tē a̍ wa̍ sa̍kpō ya̍ o̍ hɔ̄l māā Dēēve̍ fi̍nyā nūm pɛ̍, o̍ ko̍ŋ kɔ̍ɔ̍lī, nyɛ̄ o̍ nyɛ̄ sāwāla̍ nīla̍ŋ lā di̍mi̍ mā to̍sa̍ ndu̍ pɛ̍,

¹⁸mɛ̄ɛ̍ būŋgɛ̄ī ya̍ I̍ chu̍e̍l sīndɛ̄ Dēēve̍ fi̍nyā nūm māā, māsāle̍ŋ I̍sɔ̄lūɛ̄ī le̍ chō wā o̍ yu̍ŋgu̍ ndɔ̄ɔ̍ chōo̍ le̍ fɛ̍ɛ̍ŋ a̍ fɛ̍ɛ̍ŋ nde̍, I̍ cho̍ būŋgɛ̄ī kēŋ pēēlū.

¹⁹Kɛ̍ ndu̍yɛ̍ mi̍ chē bɛ̍ɛ̍ mi̍ chu̍ēl ndu̍ būŋgɛ̄ī kēŋ ni̍, kɛ̍ tē lā sōli̍ ya̍ dīōm pɛ̍, nyɛ̄ sāwāla̍ nīla̍ŋ lā dīmi̍ wo̍, a̍ nyɛ̄ o̍ nyɛ̍ ya̍ cho̍ nya̍ dīmūllo̍ mī lā kɛ̄ɛ̍ ndu̍ tōsāa̍ pɛ̍, ndu̍yɛ̍ mī lā mūli̍ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ nya̍ pɛ̍,

²⁰lɛ̄ŋndē ya̍ I̍ ke̍ le᷅ŋ nya̍ le̍ŋ, sōlīo̍o̍ ya̍ I̍ so̍lī nya̍ lēni᷄ŋ po̍ ni̍. Ndu̍yɛ̍, chīɛ̄ī ŋ̄ tēŋgu̍l la̍ ho̍ō mi̍ si̍i̍ŋgūū ndu̍ fo̍ndāŋ dīāndāā ya̍ o̍ hɔ̄l, le̍ ya̍ sōōlūūwo̍ lēni᷄ŋ ndo̍ bɛ̍ɛ̍, mī kɛ̍ɛ̍ ndu̍. Ndu̍yɛ̍ mī to̍sa̍ mī wāŋnda̍ bā o̍ bā fe̍e̍ mā chu̍a̍ ndu̍ nyɛ̄ fo̍ndō, mā mām ndu̍.

²¹“Mi̍ chē bɛ̍ɛ̍ mi̍ chīɛ̄īyo̍ ho̍ō fūlā tɔ̍ɔ̍ ni̍, kɛ̍ tɛ̄ɛ̄mbūūwo̍ ya̍ tɛ̍ɛ̍mbūū ndu̍ ni̍. Wānā o̍ wānā cho̍ wā hīōūwɔ̄ɔ̍, tē ā chē ndu̍ pɛ̍, kɔ̄ndɔ̄fi̍llo̍ chō nda̍ bīyɔ̄ɔ̄, ndu̍yɛ̍ mā nyūna̍ āā, ‘Vɛ᷅ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā he̍ī a̍ lɛ̄ŋnde̍ŋ nde᷅ŋ, ndu̍yɛ̍ a̍ chīɛ̄īyo̍ ho̍ō?’

²²O̍ ko̍ŋ, mī wāŋnda̍ dīmi̍ āā, ‘Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍, o̍ so̍li̍ nda̍ o̍ chɛ̄le̍ŋ ni᷄ŋ I̍chi̍pī wo̍, ō tōsa̍ mātōsāā he̍ī, le̍ kɛ̄ɛ̄ nda̍ kɛ̄ɛ̍ ndu̍ ma̍ mūli᷄ŋ mɛ̄lɛ̄ka̍ā chēle̍ŋ nda̍ sōōlūūwo̍ māā Mɛ̄lɛ̄ka̍ ndā, ndu̍yɛ̍ mā sāāŋgīāl nda̍ wo̍, le̍la̍ŋ o̍ tu̍si̍ nda̍ nyɛ̄ pālāa̍ ho̍ō chōo̍ ni̍.’ ”