Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 8 Bible Online

Ko̍lo̍ni̍kō Di̍i̍ŋ Ndɔ̄ɔ̍ 8 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 8

¹Sɔ̍lɔ̍mɔ̄ŋ chi̍i̍ wɔ̄sīla̍ŋ bi̍dīi̍ŋ le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, a̍ chīɛ̄ī ndɔ̍ lēmāsāa̍ tāŋgūllo̍.

²O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ mi̍ŋgī vɛ̄lɛ̄ chi̍e̍e̍ŋ bɛ̍ndūŋ Māsā Bɛ̍ndōo̍ Hi̍lūām, o̍ ke̍ ndu̍ wo̍ŋ tāŋgūl. Ndu̍yɛ̍ mbo̍ tōsā mi̍ wāŋnda̍ I̍sɔ̄lūɛ̄ī a̍ kɔ̍ cha᷅l o̍ chi̍o̍o̍ŋ mu̍ŋ ni̍ŋ.

³O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ ku̍ā o̍ būŋgɛ̄ī Ha̍ma̍tīve̍ ni᷄ŋ, a̍ būŋgɛ̄ī So̍bāāve̍, mbo̍ kɔ̍ de᷅l mu̍ŋ chōo̍ a̍ sɔ̍ŋgɔ̄ɔ̍ mbo̍ bīī mu̍ŋ.

⁴O̍ ko̍ŋ kɔ̍ɔ̍lī, mbo̍ tāŋgūl Ta̍di̍mɔ̄ɔ̄ chi̍e̍e̍ o̍ lɛ̄ŋndē po̍lte̍ŋ ni᷄ŋ, mbo̍ tāŋgūl vɛ̄lɛ̄ chi̍e̍e̍ŋ bɛ̍ndo᷄ŋ o̍ būŋgɛ̄ī Ha̍ma̍tīve̍ ni᷄ŋ le̍ nyɛ̄m ndɔ᷄ŋ kɛ̄sīo̍o̍ lo̍ŋ.

⁵Ndu̍yɛ̍, mbo̍ mīŋgī vɛ̄lɛ̄ Bɛ̄tī Ho̍lɔ̄ŋ ta̍ŋgu̍l, ho̍ō bā lūāŋndo̍, a̍ ho̍ō bā tōūwo̍. Mbo̍ bālū sāāsāla̍ ka̍lā ka̍lā la̍ŋ o̍ chi̍o̍o̍ŋ mu᷅ŋ kpɔ̍kɔ̍su̍, mbo̍ lɛ̄ɛ̄ndūū ko᷅ŋnda̍ŋ o̍ dīōlā sāāsā la̍ŋ ndu̍yɛ̍, mbo̍ wōū su̍lu̍ku̍la̍ŋ.

⁶Mbo̍ tāŋgūl vɛ̄lɛ̄ Ba̍la̍tī, a̍ chi̍e̍e̍ŋ bɛ̍ndūŋ ndu̍ Sɔ̍lɔ̍mɔ̄ŋ ndu̍ o̍o̍ kɛ̍sī nyɛ᷅m ndɔ᷄ŋ ndo̍ŋ. O̍ ko̍ŋ kɔ̍ɔ̍lī, mbo̍ tāŋgūl vɛ̄lɛ̄ chi̍e̍e̍ŋ bɛ̍ndūŋ ndu̍ o̍o̍ kɛ̍sī nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ, a̍ chi̍e̍e̍ŋ bɛ̍ndo᷄ŋ ŋ̄ pīlɔ̍ŋ le̍ pūa̍a̍ sɔ̍ŋgɔ̄ o̍ su̍a̍a̍ chōo̍ wa̍. O̍ ko̍ŋ kɔ̍ɔ̍lī, nyɛ̄ o̍ nyɛ̄ Sɔ̍lɔ̍mɔ̄ŋ ndu̍ o̍o̍ kɛ̍ɛ̍si̍a̍a̍ le̍ tāŋgūllo̍ Chūlu̍sɛ̄lɛ̄m, a̍ Le̍ba̍nɔ̄ŋ, a̍ o̍ lɛ̄ŋīī chēle̍ŋnde̍ ni᷄ŋ, i̍ wa̍ ndu̍ o̍ bā bɛ̄ŋgu̍ ve̍, mbo̍ chīī tāŋgūl kpo̍u̍.

⁷Te̍le̍ŋ I̍sɔ̄lūɛ̍i̍ya̍ ā bīī lɛ̄ŋndē Ke̍nāŋ nde̍ŋ ndo̍, kāa̍la̍ yɛ̍ yɛ̍la̍ wa̍ o̍ lɛ̄ŋndē lēŋ ni᷄ŋ, ā chīi̍ nda̍ dīū le̍ wa̍, nda̍ Sɔ̍lɔ̍mɔ̄ŋ o̍ si̍i̍ŋgu̍u̍ chīa̍a̍ ndūa̍a̍ wa̍lla̍ ni̍. Kāa̍la̍ la̍ŋ la̍ cho̍ la᷅ŋ ni̍, Hi̍ta̍i̍tīi̍ya̍ ni̍, A̍mɔ̍lu̍a̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Hi̍va̍i̍tīi̍ya̍, a̍ Chɛ̄bu̍sa̍i̍tīi̍ya̍. Ndu̍yɛ̍ pāa̍le̍ hāūle̍ŋ nde̍ŋ bɛ̍ɛ̍, wānāa̍ fu̍la̍ o̍ kāa̍la̍ŋ nda᷅ŋ chōo̍ wa̍ ki̍nɛ̍i̍, nda̍ cho̍ chīa̍a̍ wa̍lla̍ le̍ I̍sɔ̄lūɛ̄ī ni̍.

⁹Kɛ̍ I̍sɔ̄lūɛ̍i̍ya̍ ki̍nɛ̍i̍, ō pīlɛ̍ bɛ̍ɛ̍ Sɔ̍lɔ̍mɔ̄ŋ o̍ si̍i̍ŋgu̍u̍ chɛ᷅ ndɔ̍ wa̍li̍ le̍. Nda̍ nda̍, mbo̍ si̍i̍ŋgu̍u̍ ā ti᷄ŋ so̍vɛ̄i̍ya̍a̍ ndūa̍a̍, mbo̍ sīīŋgūū ā ti᷄ŋ wānāā bɛ̄ndūa̍a̍, mbo̍ hāndū a̍ ti᷄ŋ nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ bōlle̍, mbo̍ kɛ̄sī ā ti᷄ŋ bōlīī pūa̍a̍ chɔ̄ūwāā sɔ̍ŋgā o̍ su̍a̍a̍ chōo̍ wa̍.

¹⁰O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ hɛ̍lī vɛ̄lɛ̄ wāŋnda̍ kɛ̄mɔ̄ɔ̍ lēdīi̍ŋ a̍ be̍le̍ ŋūɛ̍ɛ̍nu̍ (250) mbo̍ kɛ̄sī nda̍ wānāā wa̍lla̍ chīla̍ŋ.

¹¹Ndu̍yɛ̍ Māsā Bɛ̍ndōo̍ I̍chi̍pī, chūā ndɔ̍ wa̍ Sɔ̍lɔ̍mɔ̄ŋ o̍ bā wo̍, ō wa᷄ īchāli̍ o̍ Chi̍e̍e̍ Dēēvi̍o̍o̍. Kɛ̍ mi̍ Sɔ̍lɔ̍mɔ̄ŋ fa̍ŋā ndu̍ lo̍ŋ, mbo̍ hīvī ndu̍ o̍ chīɛ̄ī o̍ te̍ŋgūl ndu̍ wo̍. Mi̍ Sɔ̍lɔ̍mɔ̄ŋ dīmī āā, “Bā o̍ bā kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ ō wa̍ pɛ̍, fo̍ndāŋ dīāndāa̍ fo̍ndāŋ kōŋ ō sīmnūŋ ni̍. Le̍la̍ŋ la̍a̍ nūu̍ ō nɔ̍ mbō wa̍ o̍ chīɛ̄ī lēmāsa̍ Dēēve̍, Māsā Bɛ̍ndōo̍ I̍sɔ̄lūɛ̄ī wo̍ ni᷄ŋ te̍.”

¹²O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ so̍lī sa̍lā lūāmāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ ma̍āŋ o̍ ta̍ŋgu̍l o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ lāchī le̍ wāa̍ sa̍lāla̍ŋ sōlīo̍o̍ lēchōo̍ wo̍.

¹³Te̍le̍ŋ o̍ te̍le̍ŋ, Sɔ̍lɔ̍mɔ̄ŋ ndu̍ o̍o̍ so̍lī sa̍lālā lūāmāā la̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, mɛ̄ɛ̍ i̍ cho̍ ī tūwāā o̍ sāwāla̍ Mūu̍sē la̍ŋ ni᷄ŋ, a̍ bɔ̄ŋa᷅ŋnda̍ yɛ̍ yɛ̍la̍ŋ o̍kɔ̄ɔ̄ yɛ̍. Bɔ̄ŋa᷅ŋndā la̍ŋ la̍ cho̍ la᷅ŋ ni̍, bɔ̄ŋa᷅ŋndo̍ le̍ pāa̍le̍ pɛ̍ŋgīāāle̍ Mɛ̄lɛ̄ka̍ le̍ŋ, a̍ bɔ̄ŋa᷅ŋ pāŋgi̍i̍ sɛ̍nɛ̄īyo̍, a̍ bɔ̄ŋa᷅ŋndā yāa̍ la̍ nda̍ a̍a̍ bi̍ī o̍ wɔ̄sīo̍o̍ ni᷄ŋ nda̍ŋ. La̍ŋ la̍ yɔ̍nūŋ ni̍ māā, bɔ̄ŋa᷅ŋ nda̍ dīā be̍e̍dīi̍ nda̍ do̍ū yi̍i̍sīi̍ le̍ wo̍, a̍ bɔ̄ŋa᷅ŋ chīɔ̄ɔ̄ŋ kūāūwāa̍, a̍ bɔ̄ŋa᷅ŋ lā tɛ̍ndɛ̄i̍yo̍.

¹⁴Ndu̍yɛ̍ nyɛ̄ o̍ nyɛ̄ Dēēve̍ fi̍nyā ndɔ̄ ndu̍ o̍o̍ tu̍u̍ le̍ tōsāa̍, mbo̍ tūāl tūūlā lāŋ kɔ̄ɔ̄lī kpo̍u̍. O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ chɔ᷅m wānāā sōlīāā lāsa̍lāa̍ te̍le̍ŋnda̍ yɛ̍ yɛ̍la̍ nda̍ a̍a̍ nɔ̍ le̍ wa̍lta̍ ndāla̍ŋ tōsāa̍ la̍ŋ. O̍ ko̍ŋ kɔ̍ɔ̍lī, mbo̍ hɛ̄lī Li̍va̍īya̍ ā ti᷄ŋ le̍ mā wa̍ chōndo̍ŋ chīla̍ŋ o̍ chīɛ̍i̍ Mɛ̄lɛ̄ka̍a̍, a̍ le̍ wānāā sōlīāā lāsa̍lāa̍ mālāa̍ a̍ wa̍lta̍ nda̍ a̍a̍ nɔ̍ le̍ tōsāa̍ lēpāa̍ o̍ lēpāa̍ la̍ŋ. Mbo̍ yūlū vɛ̄lɛ̄ wāŋnda̍ ā pīli̍a̍a̍ le̍ dīōlā sāāsa̍ wa̍ le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍a̍ la̍ŋ māndāa̍, mɛ̄ɛ̍ Dēēve̍ wāna̍ Mɛ̄lɛ̄ka̍a̍ o̍ tūū yɛ̍.

¹⁵Ndu̍yɛ̍, nyɛ̄ o̍ nyɛ̄ Māsā Bɛ̍ndōo̍ Dēēve̍ ō dīmu̍l sīndɛ̄ wānāā sōlīāā lāsa̍lāa̍, a̍ Li̍va̍īya̍, a̍ chīɛ̄ī nda̍ māndā nyɔ̍ɔ̍ŋ ndo̍ o̍kɔ̄ɔ̄, ndu̍yɛ̍ a̍ sɔ̄ɔ̍ŋ che̍le̍ŋ ndo̍ŋ tōsāa̍ o̍kɔ̄ɔ̄, ma̍ tōsā kpo̍u̍.

¹⁶Nyɛ̄ o̍ nyɛ̄ Sɔ̍lɔ̍mɔ̄ŋ ndu̍ o̍o̍ nɔ̍ le̍ tōsāa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ho̍ō tāŋgūllo̍, mbo̍ tōsā. Chɔ̍ŋ a̍ pāa̍le̍ nda̍ kīla̍ chīyīī chīɛ̄īyo̍ ho̍ō le̍ŋ, ha̍a̍a̍ mbo̍ fūūlūū a̍ pāa̍le̍ nda̍ chi̍i̍ ndu̍ tāŋgūl te̍, mi̍ Sɔ̍lɔ̍mɔ̄ŋ o̍ to̍sā mī nyɛ̄ o̍ nyɛ̄ kūā ō kɛ̄ndɛ̄.

¹⁷O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ ku̍ā Ɛ̄sāyɔ̄ŋkɛ̍bɛ̄, a̍ Ɛ̍la̍tī chi̍e̍e̍, o̍ pēe̍ mɛ̄ŋmā īhɛ᷄llo̍ kɔ̄ŋgɔ̍, o̍ lɛ̄ŋnde̍ I̍dɔ̄m nde̍ŋ ni᷄ŋ.

¹⁸O̍ ko̍ŋ, mi̍ Māsā Bɛ̍ndōo̍ Hi̍lūām o̍ hɛ̍lī bu̍ɛ̍i̍yāa̍ ndūa̍a̍ si̍nā a̍ mɛ̄ŋnda̍ŋ o̍kɔ̄ɔ̄ ta̍u̍ wa̍, lātūlu̍ a̍ dɛ̄ndɛ̄la̍ ndɔ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ, mbo̍ yɔ̄ŋ nda̍ nāa̍ Sɔ̍lɔ̍mɔ̄ŋ chu̍a̍, le̍ mā kɔ̍ wa᷅ wa̍llo̍ nda̍ bu̍ɛ̍i̍yāa̍ Sɔ̍lɔ̍mɔ̄ŋ nda̍ lātūlu̍. Mi̍ bu̍ɛ̍i̍yāā Māsāa̍ Hi̍lūām o̍ ve᷅m ha̍ā wa̍, nda̍ bu̍ɛ̍i̍yāa̍ Sɔ̍lɔ̍mɔ̄ŋ nda̍, mā ku̍ā a̍ dɛ̄ndɛ̄la̍ŋ nda᷅ŋ o̍ lɛ̄ŋndē O̍fɛ̄ɛ̄le̍ŋ ni᷄ŋ. O̍ ko̍ŋ, ma̍ kɔ̍ chu̍ū Sɔ̍lɔ̍mɔ̄ŋ ko̍o̍līi̍yo̍ŋ ta̍u̍ ta̍u̍, ŋ̄ wa̍ pa᷅ŋnda̍ŋ wāa̍la̍ŋ be̍le̍-ya̍a̍ a̍ lā hīɔ̍ɔ̍lu̍ (34,000).