Read Southern Kisi Ɛ̍si̍lūā 10 Bible Online

Ɛ̍si̍lūā 10 - Southern Kisi bible

Ɛ̍si̍lūā 10

¹Mɛ̄ɛ̍ Ɛ̍si̍lūā wa̍ Mɛ̄lɛ̄ka̍ pīɛ̄īyo̍ a̍ cha᷄ŋndo̍, a̍ yɔ̄ŋndā wɔ̄ɔ̍ŋnda̍ŋ chɔ̄ɔ̄mūūwo̍, mbō dēlī dēlī lɛ᷅ŋ o̍ chīɛ̍i̍ Mɛ̄lɛ̄ka̍a̍ hɔ̄lndɔ̄, mi̍ Chu̍ūwa̍ hūŋ fāŋgā bɛ̍ndōo̍, ma̍ hu᷄ŋ ba̍lū ndu̍ si̍lɔ̍, wānā pɔ̍nɔ̍ ni̍, wānā la̍nɔ̍ ni̍, chūāāmbɔ̄ ni̍, bɛ̄ndū ni̍, nda̍ kpo̍u̍ ma̍ chāŋ cha᷄ŋndo̍ pi̍la̍ nda̍ nda̍ā.

²O̍ ko̍ŋ kɔ̍ɔ̍lī, mi̍ Sīɛ̄kāni̍yā, po̍ Chɛ̍hɛ̄ɛ̄ wo̍, fūlāa̍ o̍ yu̍ŋgu̍ Ɛ̍lāmndo̍ chōo̍, mbo̍ dīmūl Ɛ̍si̍lūā āā, “Ī chō tōnya̍ māā ŋ̄ cho̍ sa̍kpō nāa̍ Mɛ̄lɛ̄ka̍ chūā le̍. Ŋ̄ bīī mi̍ ŋ̄ chūā wāŋ lāāndūāā ka̍a̍la̍ chēle̍ŋāā cho̍ ha̍ā na̍a̍ tɛ̍ɛ̄ŋ nda̍ o̍ nɔ̄la̍ŋ ni᷄ŋ. Kɛ̍ a̍ ko̍ŋ kpo̍u̍, tīīnda᷄ŋndo̍ ō chō wɔ̄ le̍ I̍sɔ̄lūɛ̄ī.

³Ŋ̄ chō kpe̍ma̍a̍ yīī a̍ Mɛ̄lɛ̄ka̍ nāa̍, māā ŋ̄ chō wāŋ lāāndūāā kāŋ tōūwɔ̄ɔ̄ a̍ chūāūwāā ndāa̍, mā kūɛ̄. Ŋ̄ chō nyɛ̄ ŋ̄ sīla̍ na̍a̍ wo̍ a̍ nyɛ̄ wānāa̍ ke᷅ sāwāla̍ Mɛ̄lɛ̄ka̍ la̍ŋ bɛ̄ɛ̄le̍ŋ nda̍ dīmu̍l na̍a̍ wo̍ tōsā. Nyɛ̄ sāwa̍ Mɛ̄lɛ̄ka̍a̍ di̍mu̍l na̍a̍ wo̍, ndu̍ na̍a̍ ŋ̄ chō tōsā ni̍.

⁴Wa̍li̍ nu̍mndo̍ cho̍ ko̍ŋ ni̍ Ɛ̍si̍lūā, Ŋ̄ chō nu̍m kɔ̄ɔ̄lī, nɔ̍ kɔ᷅l sīmūlāa̍, nu̍m nɔ̍ ni̍ mā di̍mu̍l na̍a̍, le̍ mī ŋ̄ tōsa̍ nyɛ̍ cho̍ sa̍kpō wo̍.”

⁵O̍ ko̍ŋ, mi̍ Ɛ̍si̍lūā cha̍ŋ i̍si̍si̍. Mbo̍ kīndīlā wānāā sōlīāā lāsa̍lāa̍ wānāā ndāā ba̍nāa̍, a̍ Li̍va̍īya̍, a̍ wāŋnda̍ kpo̍u̍, ma̍ mēna᷄ŋ māā ā chō nyɛ̄ Sīɛ̄kāni̍yā di̍mi̍ wo̍ tōsā. O̍ ko̍ŋ, nda̍ kpo̍u̍ ma̍ mēna᷄ŋ le̍ nyɛ̄ nda̍ chūa̍ ko̍ŋ kpe̍ma̍a̍ wo̍ tōsāa̍.

⁶O̍ ko̍ŋ kɔ̍ɔ̍lī, mi̍ Ɛ̍si̍lūā o̍ fa̍ŋa᷄ŋ na̍a̍ o̍ wa̍ o̍ chīɛ̍i̍ Mɛ̄lɛ̄ka̍a̍ hɔ̄lndɔ̄ wa̍, mbo̍ kūā o̍ lu̍mūi̍ Chɛ̄hōha̍nāŋndo̍ ni᷄ŋ, po̍ Īlīa̍a̍si̍bī wo̍. Mbo̍ lɔ̄l lo̍ŋ pi̍i̍ nyu᷅mmā māŋ, ō di̍ nyɛ̍ dīāā le̍, ō ko᷄l ma̍mɛ̍ŋ te̍. Ō wa̍ wɔ̄ mɔ̍nɛ̍i̍ bīyɔ̄ɔ̍ le̍ yɔ̄ŋ wɔ̄ɔ̍ŋ wānāa̍ chɛ̍ŋ o̍ bīyɔ̄ɔ̍ ni᷄ŋ ma̍ mīīŋgū wa̍ ā tōsa̍ wo̍.

⁷O̍ ko̍ŋ kɔ̍ɔ̍lī, ma̍ yɔ̄ŋgū yōōŋgōo̍ bā o̍ bā fe̍e̍ Chu̍dā a̍ Chūlu̍sɛ̄lɛ̄m, māā wāna̍ o̍ wāna̍ fu̍la̍ o̍ bīyɔ̄ɔ̍ ni̍ŋ mbo̍ mīīŋgū, ā nɔ̄ mā chūūŋgi̍āŋ Chūlu̍sɛ̄lɛ̄m.

⁸Wānāa̍ yɔ̍ŋgu̍ yōōŋgōo̍ ho̍ō wa̍ nda̍ yɔ̍nūŋ ni̍ māā, wāŋ bɛ̄ndūa̍a̍ wa̍ wa̍llo̍ māsāa̍ o̍ bā bɛ̄ŋgu̍ wa̍, a̍ lāŋgba̍ā kālāā lēlɛ̄ŋnda̍. Ma̍ dīmī māā tē wānā o̍ wānā kɛ̍ɛ̍ le̍ kɔ̄la̍ŋ o̍ bɔ̄ŋa᷅ŋ kōŋ o̍ pālɛ̍i̍ ya̍a̍ bɛ̍ŋgu̍ pɛ̍, wānā ko̍ŋ ā pūu̍ ndu̍ nyɛ̄m ndɔ᷄ŋ kpo̍u̍ o̍ bā, o̍ ko̍ŋ kɔ̍ɔ̍lī, mā kɛ̍ɛ̍ ndu̍ o̍ ku̍ndā wānāa̍ chɛ̍ŋ o̍ bīyɔ̄ɔ̍ ni᷄ŋ ma̍ mīīŋgū wa̍ chōo̍.

⁹O̍ pālɛ̍i̍ ya̍a̍ ve̍ he̍ī bɛ̄ŋgu̍, mi̍ pūa̍a̍ Chu̍dā a̍ ha̍ā Bɛ̍ŋnja̍mīŋ kpo̍u̍ a̍ chu̍u̍ŋgi̍āŋ Chūlu̍sɛ̄lɛ̄m. O̍ pāa̍le̍ bi̍dīi̍ŋ nde̍ŋ chōo̍, o̍ pāŋgi̍i̍ ŋɔ̍ma̍hīɔ̍ɔ̍lu̍e̍i̍ ni᷄ŋ, wāŋnda̍ kpo̍u̍ ma̍ chūūŋgi̍āŋ o̍ la̍u̍ wa̍ o̍ chīɛ̍i̍ Mɛ̄lɛ̄ka̍a̍ hɔ̄lndɔ̄ wo̍. Nda̍ kpo̍u̍, ā wa̍ nyīīyāa̍ kpa᷅ kpā bɛ̄ndū. Kāni̍ fu̍u̍le̍, sūɛ̍i̍ he̍ī ī ve̍ su̍ɛ̍i̍ lāmāmɔ̄ɔ̄ le̍. Ndu̍yɛ̍ vɛ̍lɛ̄, pīɔ̍ɔ̍ wa̍ nda̍ sīa̍a̍ chōo̍ kpe̍e̍kpe̍i̍.

¹⁰O̍ ko̍ŋ kɔ̍ɔ̍lī, mi̍ Ɛ̍si̍lūā wāna̍ so̍līāā lāsa̍lāa̍ ō cha᷄ŋ i̍si̍si̍, mbo̍ sūāā nāa̍ nda̍ chūā, mbo̍ dīmī āā, “Lā tōsa̍ yɔ̄ŋ wɔ̄ɔ̍ŋndo̍ nāa̍ Mɛ̄lɛ̄ka̍ chūā. Lā bīī mi̍ lā chūā wāŋ lāāndūāā kāa̍la̍ chēle̍ŋnda̍ ha̍ā o̍ nɔ̄la̍ŋ ni᷄ŋ. Ndu̍yɛ̍, nyɛ̄ nya̍ tōsa̍ ho̍ō wo̍, lā tōsa̍ mi̍ yɔ̄ŋ wɔ̄ɔ̍ŋ I̍sɔ̄lūɛ̍i̍ya̍ ō chɔ̄ɔ̄lū kūī.”

¹¹Le̍la̍ŋ, lā chɔ̄ɔ̄mu̍u̍ yɔ᷅ŋndā nyāla̍ wɔ̍ɔ̍ŋnda̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍ā, Mɛ̄lɛ̄ka̍ fi̍nyāā nyāā ma̍māa̍, mī lā lo̍ o̍ ko̍ŋ mī lā tōsa̍ hɛ̄na᷄ŋ ndɔ̄ɔ̍. Lā kɛ̄ɛ̍ la̍a̍ndūāā kāa̍la̍ che᷅le̍ŋāā nya̍ chūa̍ ka̍ŋ nda̍, o̍ ko̍ŋ kɔ̍ɔ̍lī mī lā kēlu᷄ŋ wa̍nāā kāa̍la̍ che᷅le̍ŋāa̍ cho̍ ha̍ā o̍ lɛ̄ŋnde̍ŋ nde᷅ŋ ni᷄ŋ nda̍ kɔ̄ɔ̄lī.

¹²Mɛ̄ɛ̍ wāŋnda̍ ku̍ndā bɛ̄ndōo̍ ho̍ō ā tūēī nyɛ̄ Ɛ̍si̍lūā di̍mi̍ wo̍, nda̍ kpo̍u̍ ma̍ dēŋī chōo̍ cho̍o̍. Ma̍ dīmī āā, “Tōnya̍ ŋ̄ dīmi̍ nī. Ŋ̄ nɔ̄ mī ŋ̄ tōsa̍ nyɛ̄ ŋ̄ dīmi̍ wo̍!

¹³Kɛ̍ ŋ̄ chō bɔ̄ɔ̍ fa̍ŋgā bɛ̍ndōo̍ na̍nu᷄ŋ. Ndu̍yɛ̍, sīālte̍ŋ le̍ cho̍ le᷅ŋ ni̍. Ŋ̄ nɔ̍lā mī ŋ̄ si᷄m o̍ pīɔ̍ɔ̍ bɛ̄ŋgu̍ le̍. Ndu̍yɛ̍, o̍ cho̍ su̍ɛ̍i̍ wānā chi̍i̍ dīmī o̍ pāa̍le̍ pi᷅lɛ̍, ɔ̄ɔ̄ pālɛ̍i̍ ŋi̍i̍ŋ bɛ̄ŋgu̍ le̍. Ndu̍yɛ̍, na̍a̍ wānāā ka̍ ka̍ ŋ̄ bēndu᷄ŋ o̍ sūɛ̍i̍ he̍ī ni᷄ŋ, mi̍ ŋ̄ chūā wāŋ lāāndūāā che̍le̍ŋ nda̍ ha̍ā o̍ nɔ̄la̍ŋ ni᷄ŋ.

¹⁴Le̍ he̍ī, ō bɛ̄ndā mī wānāā nāā ba̍nāa̍ ā lo̍ Chūlu̍sɛ̄lɛ̄m le̍ sɔ̄ɔ̍ŋ mu᷅ŋ tōōsīa̍a̍. Wānāa̍ nɔ̍ wāŋ lāāndūāā chēle̍ŋnda̍ o̍ lābā wa̍ ki̍nɛ̍i̍, mī nda̍ wa̍ hūnɔ̄ɔ̍ a̍ te̍le̍ŋnda̍ŋ le̍ sɔ̄ɔ̍ŋ mu᷅ŋ tōōsīa̍a̍. Wāna̍ wa᷅ ko̍ hu̍nɔ̄ɔ̍, ō hūŋ a̍ wāŋ bɛ̄ndūa̍a̍ kɔ̄ɔ̄lī, lātūlu̍ a̍ chɔ̍ɔ̍chi̍a̍a̍ cho̍ o̍ chi̍e̍e̍ ndɔ̄ɔ̍ ni᷄ŋ nda̍. A̍ chi̍ī ko̍, ā pīli̍a̍a̍ hūŋ vɛ̄lɛ̄. Ko̍ŋ cho̍ tōsā ni̍ mī tu̍mbe̍ ka̍lā ka̍lā Mɛ̄lɛ̄ka̍ dɔ̄ɔ̄nu᷄ŋ ho̍ō a̍ na̍a̍ wo̍ ō pɔ̄lu̍l.

¹⁵Wānāā ŋīɔ̍ɔ̍ŋ ko̍ni̍ a̍ kɛ̍ɛ̍ tūūwo̍ ho̍ō ni̍. Wānāā kāŋ nda̍ yɔ̍nūŋ ni̍ māā Chōna̍ta᷅ŋ, po̍ A̍sa̍hɛ̄l wo̍, nda̍ Chāsɛ̍yāā, po̍ Ti̍ki̍vāā wo̍. Mi̍ Li̍va̍īya̍ ā ŋīɔ̍ɔ̍ŋ ā chɛ̄l nda̍ dīōm. Nda̍ yɔ̍nūŋ nī māā Mɛ̄sīhu̍lām nda̍ Sīābɛ̍tāī.”

¹⁶O̍ ko̍ŋ kɔ̍ɔ̍lī, mi̍ wānāa̍ chɛ̍ŋ o̍ bīyɔ̄ɔ̍ ni᷄ŋ ma̍ mīīŋgu̍ wa̍ ā chɛ̄l tūūwo̍ ho̍ō. O̍ ko̍ŋ, mi̍ Ɛ̍si̍lūā, wāna̍ so̍līāā lāsa̍lāa̍ ō hɛ̄lī pūa̍a̍ wa̍ yu̍ŋgu̍la̍ ndāla̍ŋ bōlle̍ wa̍, mā si᷄m le̍ nda̍. Mbo̍ pōōnyīāā nda̍ dīōla̍ŋ a̍ yu̍ŋgu̍la̍ ndāla̍ŋ kpɛ̍ kpɛ̍. O̍ ko̍ŋ, ma̍ kāndū sɔ̄ɔ̍ŋ yāāsi̍a̍a̍ o̍ pāa̍le̍ tāse̍le̍ŋ chōo̍, o̍ pa̍ŋgi̍i̍ tɔ̍ ve̍ ni̍ŋ.

¹⁷Ndu̍yɛ̍ ma̍ chīī kɔ̍ɔ̍sɔ̍ɔ̍ a̍ pūa̍a̍ chu̍a̍ wāŋ lāāndūāā ka̍a̍la̍ chēle̍ŋnda̍ o̍ nɔ̄la̍ŋ ni᷄ŋ nda̍, o̍ pāa̍le̍ tāse̍le̍ŋ chōo̍, o̍ pāŋgi̍i̍ tāse̍i̍ o̍ wɔ̄sīo̍o̍ pīlɔ̍ɔ̍ ni᷄ŋ. O̍ ko̍ŋ, ma̍ sīnā pūa̍a̍ chu̍a̍ wāŋ lāāndūāā ka̍a̍la̍ chēle̍ŋnda̍ o̍ nɔ̄la̍ŋ ni᷄ŋ nda̍ kpo̍u̍.

¹⁸Ndu̍yɛ̍, pūa̍a̍ chu̍a̍ wāŋ lāāndūāā ka̍a̍la̍ chēle̍ŋnda̍ o̍ nɔ̄la̍ŋ ni̍ŋ nda̍ a̍ cho̍ ha̍ā ni̍. Pūa̍a̍ fu̍la̍ o̍ pūlāle̍ wānāā sōlīāā lāsa̍lāa̍ chōo̍ wa̍ nda̍ cho̍ ha̍ā ni̍. O̍ yu̍ŋgu̍ Chɔ̄ɔ̍sūāā wo̍ chōo̍, po̍ Chɛ̄hōsa̍da̍kī wo̍, nda̍ pɔ̄mbūāā ndūa̍a̍, Māāsɛ̍yā nda̍ Ɛ̄li̍a̍a̍sā, a̍ Cha̍lu̍i̍bī, a̍ Kɛ̄dāla̍yā

¹⁹Nda̍ ki̍nɛ̍i̍ ma̍ chūā būŋgɛ̄i̍ le̍ mā ma᷄l lāāndūāā ndāā che᷅le̍ŋāā kāŋ. O̍ ko̍ŋ kɔ̍ɔ̍lī, mi̍ wānā o̍ wānā yɔ̍ŋgū sāā ko̍ndo̍o̍ le̍ sa̍lā yɔ̄ŋ wɔ̄ɔ̍ŋndo̍ sōlīo̍o̍.

²⁰O̍ yu̍ŋgu̍ I̍māā wo̍ chōo̍, Hāna̍nī nda̍ Sɛ̄bāda̍yā.

²¹O̍ yu̍ŋgu̍ Ha̍lūīmndo̍ chōo̍, Māāsɛ̍yā, nda̍ Īla̍a̍chā, a̍ Sīɛ̄māyi̍yā, a̍ Chɛ̍yɛ̄ɛ̄, a̍ Yūsa̍yā.

²²O̍ yu̍ŋgu̍ Pa̍si̍hɔ̄ɔ̄ wo̍ chōo̍, Ɛ̄li̍o̍nāī, a̍ Māāsɛ̍yā, a̍ I̍si̍mɛ̄ɛ̄l, a̍ Na̍ta̍a̍ni̍ɛ̄l, a̍ Chōsa̍ba̍dī, a̍ Ɛ̄la̍a̍sā.

²³O̍ yu̍ŋgu̍ Li̍va̍īya̍ chōo̍, Chōsa̍ba̍dī, a̍ Si̍mɛ̄ī, a̍ Kēla̍a̍yā (ō nda̍ vēēlū āā Ke̍li̍tā wo̍), a̍ Pɛ̄tāhi̍yāā, a̍ Chu̍dā, a̍ Ɛ̄li̍a̍a̍sā.

²⁴O̍ yu̍ŋgu̍ wānāā sōlīāā ŋ̄chōndu̍a̍a̍ chōo̍, Īlīa̍a̍si̍bī. O̍ ku̍ndā wānāā māndāā chīɛ̍i̍ Mɛ̄lɛ̄ka̍a̍ wa̍ chōo̍, Si̍a̍llūm, a̍ Tɛ̍lɛ̄m, a̍ Yu̍lī.

²⁵O̍ yu̍ŋgu̍la̍ I̍sɔ̄lūɛ̍i̍ya̍ ā pīli̍a̍a̍ chōo̍, pūa̍a̍ fu̍la̍ o̍ yu̍ŋgu̍la̍ŋ nda᷅ŋ chōo̍ wa̍ nda̍ cho̍ ha̍ā ni̍. O̍ yu̍ŋgu̍ Pālo̍sī wo̍ chōo̍, pūa̍a̍ ā ŋɔ᷄mmɛ̍ū. Pūa̍a̍ ka̍ŋ cho̍ ha̍ā ni̍. Lūāmi̍yā, a̍ Īsi̍yāā, a̍ Māchi̍chā, a̍ Mi̍cha̍mīŋ, a̍ Ɛ̄li̍a̍a̍sā, a̍ Māchi̍chā, a̍ Bɛ̄na̍yā.

²⁶O̍ yu̍ŋgu̍ Ɛ̍lāmndo̍ chōo̍, Mātāni̍yāā, a̍ Sɛ̄kāla̍yā, a̍ Chɛ̍yɛ̄ɛ̄, a̍ Ābi̍dī, a̍ Chɛ̄lūīmo̍tī, a̍ Īla̍a̍chā.

²⁷O̍ yu̍ŋgu̍ Sa̍tū wo̍ chōo̍, Ɛ̄li̍o̍nāī, a̍ Īlīa̍a̍si̍bī, a̍ Mātāni̍yāā, a̍ Chɛ̄lūīmo̍tī, a̍ Sa̍ba̍dī, a̍ Āsi̍sā.

²⁸O̍ yu̍ŋgu̍ Be̍bāīyo̍ chōo̍, Chɛ̄hōha̍nāŋ, a̍ Hānāni̍yā, a̍ Sa̍bāī, a̍ Āti̍lāī.

²⁹O̍ yu̍ŋgu̍ Ba̍nī wo̍ chōo̍, Mɛ̄sīhu̍lām, a̍ Mālu̍chī, a̍ Āda̍a̍yā, a̍ Cha̍si̍u̍bī, a̍ Si̍āl, a̍ Chɛ̄lūīmo̍tī.

³⁰O̍ yu̍ŋgu̍ Pa̍ha̍tī Mo̍wa̍bī wo̍ chōo̍, Ādi̍nā, a̍ Chɛ̍lāl, a̍ Bɛ̄na̍yā, a̍ Māāsɛ̍yā, a̍ Mātāni̍yāā, a̍ Bɛ̄sa̍lɛ̄, a̍ Bi̍nu̍ī, a̍ Mānāa̍sē.

³¹O̍ yu̍ŋgu̍ Ha̍lūīmndo̍ chōo̍, Ɛ̄li̍a̍a̍sā, a̍ Īsi̍i̍chāā, a̍ Mālīki̍chā, a̍ Sīɛ̄māyi̍yā, a̍ Sīmīɔ̍ŋ,

³²a̍ Bɛ̍ŋnja̍mīŋ, a̍ Mālu̍chī, a̍ Sīɛ̄mālu̍i̍yā.

³³O̍ yu̍ŋgu̍ Ha̍sīūmdo̍ chōo̍, Mātāni̍yāā, a̍ Māta̍tāā, a̍ Sa̍ba̍dī, a̍ Ɛ̄līfɛ̍lɛ̍tī, a̍ Chɛ̄lu̍i̍māī, a̍ Mānāa̍sē, a̍ Si̍mɛ̄ī.

³⁴O̍ yu̍ŋgu̍ Ba̍nī wo̍ chōo̍, Ma̍a̍dāī, a̍ A̍mi̍lūām, a̍ U̍wɛ̄ɛ̄l,

³⁵a̍ Bɛ̄na̍yā, a̍ Bɛ̄dɛ̍ɛ̍yā, a̍ Chɛ̄lu̍hī,

³⁶a̍ Vāni̍yāā, a̍ Mɛ̄lūɛ̄mo̍tī, a̍ Īlīa̍a̍si̍bī,

³⁷a̍ Mātāni̍yāā, a̍ Mātāni̍yāā, a̍ Cha̍a̍sū.

³⁸O̍ yu̍ŋgu̍ Bi̍nūī chōo̍, Si̍mɛ̄ī,

³⁹a̍ Sɛ̄lɛ̄ma̍yā, a̍ Ne̍tāŋ, a̍ Āda̍a̍yā,

⁴⁰a̍ Māchīna̍dɛ̍bāī, a̍ Sīāsi̍a̍ī, a̍ Si̍a̍lūāī,

⁴¹a̍ Āsa̍lūɛ̄ɛ̄, a̍ Sīɛ̄lɛ̄ma̍yā, a̍ Sīɛ̄mālu̍i̍yā,

⁴²a̍ Si̍a̍lūm, a̍ Āmālu̍i̍yā, a̍ Chōo̍sɛ̍.

⁴³O̍ yu̍ŋgu̍ Ni̍bɔ̄ wo̍ chōo̍, Chɛ̍yɛ̄ɛ̄, a̍ Mātīti̍yāā, a̍ Sa̍ba̍dī, a̍ Sɛ̍bi̍nā, a̍ Cha̍di̍dāī, a̍ Cho̍wɛ̄ɛ̄, a̍ Bɛ̄na̍yā.

⁴⁴Pūa̍a̍ ha̍ā kpo̍u̍, nda̍ nda̍ a̍a̍ chu̍a̍ wāŋ lāāndūāā ka̍a̍la̍ chēle̍ŋnda̍ o̍ nɔ̄la̍ŋ ni᷄ŋ ni̍. Ā pūm ma̍ vīālū bɛ̍ɛ̍ chūāūwa̍ nda̍ wāŋ lāāndūāā ka̍ŋ. Mi̍ pūa̍a̍ ha̍ā ā lō o̍ ko̍ŋ ma̍ kɛ̄ɛ̄ wāŋ lāāndūa̍a̍ ha̍ā, ma̍ tūāū nda̍ a̍ chūāūwāā nda̍a̍ ka̍ŋ kpo̍u̍.