Read Southern Kisi Ɛ̍si̍lūā 3 Bible Online

Ɛ̍si̍lūā 3 - Southern Kisi bible

Ɛ̍si̍lūā 3

¹O̍ ko̍ŋ kɔ̍ɔ̍lī, te̍le̍ŋ pa̍ mi̍ pāŋgi̍i̍ ŋɔ̍mmɛ̍ū ve̍ ī fūūlūū, wāŋnda̍ I̍sɔ̄lūɛ̄ī kpo̍u̍ nda̍ a̍a̍ chi̍i̍ ni᷅ŋ īchāli̍ o̍ chi̍e̍e̍ŋ nda̍ŋ yɛ̍ yi̍ɔ̍ɔ̍ŋ ni᷄ŋ. O̍ ko̍ŋ, ma̍ chūūŋgi̍āŋ na̍a̍ pi᷅lɛ̍ Chūlu̍sɛ̄lɛ̄m.

²O̍ ko̍ŋ kɔ̍ɔ̍lī, Chɔ̄ɔ̍sūāā po̍ Chɛ̄hōsa̍da̍kī wo̍, a̍ chāāŋāā ndūāā wa̍nāā sōlīāā lāsa̍lāa̍, a̍ Sɛ̄lūba̍bɛ̄l po̍ Si̍ɛ̍ɛ̍tīɛ̄l wo̍, a̍ wānāā ndūa̍a̍, ma̍ tāŋgūl ma̍āŋ Mɛ̄lɛ̄ka̍ I̍sɔ̄lūɛ̍i̍ya̍ le̍ sa̍lālā lūāmāāla̍ŋ lōmɔ̄ɔ̍ lēchōo̍, mɛ̄ɛ̍ i̍ cho̍ īpōōnyīāā o̍ sāwa̍ Mūu̍sē wāna̍ Mɛ̄lɛ̄ka̍a̍ ni᷄ŋ yɛ̍.

³Mi̍ chē bɛ̍ɛ̍ mī sīōōŋīī wānāa̍ wa̍ o̍ lɛ̄ŋndē lēŋ ni᷄ŋ nda̍ ī wā nda̍ ni̍, kɛ̍ ma̍ nɔ̄lā ma̍ tāŋgūl ma̍āŋndo̍ nāa̍ ma̍āŋ pāāndōo̍ o̍ wa̍ īsīsi̍ wa̍. O̍ ko̍ŋ, ma̍ kāndū vɛ̄lɛ̄ sa̍lāla̍ŋ lōmɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ ma̍āŋ kōŋ chōo̍ īdīi̍ a̍ īchɔ̄l.

⁴Ma̍ lō o̍ ko̍ŋ ma̍ kē pāa̍le̍ bɔ̄ŋa᷅ŋ lā Tɛ̍ndīi̍ di̍a̍ā nyɛ̄ dīāā bɛ̄ndūla̍ŋ bɛ̄ɛ̄le̍ŋ mɛ̄ɛ̍ sāwāa̍ dīmi̍ yɛ̍. Mā sōlī sa̍lālā lūāmāā la̍ŋ mɛ̄ɛ̍ nda̍ a̍a̍ nɔ̄ le̍ la̍ŋ sōlīo̍o̍ o̍ lēpāa̍ o̍ lēpāa̍ cho̍o̍ yɛ̍.

⁵O̍ ko̍ŋ kɔ̍ɔ̍lī, ma̍ sōlī vɛ̄lɛ̄ sa̍lālā lūāmāālā nda̍ sōlī lɔ̍ɔ̍ o̍ lɔ̍ɔ̍ la̍ŋ. A̍ sa̍lālā pāŋgi̍i̍ sɛ̍nɛ̄ī la̍ŋ, a̍ sa̍lālā pālɛ̍i̍ bɛ̍ndūi̍ Mɛ̄lɛ̄ka̍ Ya̍a̍wɛ̄ɛ̄ la̍ŋ. Ō fūla̍ o̍ la̍ŋ kɔ̄ɔ̄lī, ma̍ yɔ̄ŋgū kēlā kɔ̄ltā chɛ̄lāā la̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍.

⁶Ndu̍yɛ̍, ma̍ kāndū sa̍lāla̍ŋ lōmɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ o̍ pāa̍le̍ tāse̍le̍ŋ chōo̍ o̍ pāŋgi̍i̍ ŋɔ̍mmɛ̍ū ve̍ ni᷄ŋ. Kɛ̍ wāŋnda̍ nda̍ a̍a̍ ke̍ndu̍ wɔ̍ chi̍yīī chīɛ̍i̍ Mɛ̄lɛ̄ka̍a̍ sīmīo̍o̍ le̍.

⁷O̍ ko̍ŋ kɔ̍ɔ̍lī, ma̍ kē Me̍si̍nɛ̄i̍ya̍ nyɛ̄ sɔ̄lāa̍ a̍ Ka̍a̍pi̍ndɛ̄i̍ya̍ le̍ mā tōsa̍ wa̍llo̍ o̍ chīɛ̍i̍ Mɛ̄lɛ̄ka̍a̍. Wāŋnda̍ Sa̍i̍dɔ̄ŋ a̍ Ta̍a̍yā, nda̍ ma̍ kē nda̍ nyɛ̄ dīa̍a̍, a̍ mūɛ̄īya̍ŋ, a̍ chūɛ̄īya̍ŋ, le̍ mā yɔ̍ŋgu̍ yɔ̄mīī si̍dāā ve̍ Le̍ba̍nɔ̄ŋ mā hīŋ a̍ ndi̍ o̍ mɛ̄ŋnda̍ŋ chōo̍ Cho̍pā chi̍e̍e̍. Ndu̍yɛ̍ Māsāa̍ Sa̍a̍lɔ̄ɔ̄ ho̍ō Pa̍a̍sīāā ndu̍ o̍o̍ chɛ̍l ni̍ māā sɔ̄ɔ̍ŋ mu᷅ŋ ŋ̄ yɔ̄nu̍ŋ.

⁸Mɛ̄ɛ̍ wāŋnda̍ I̍sɔ̄lūɛ̄ī a̍ mi̍i̍ŋgu̍ Chūlu̍sɛ̄lɛ̄m, ā tōsa̍ wɔ̄sīo̍o̍ ō pīlɛ̍. O̍ pāŋgi̍i̍ dīi̍ŋ ndūɛ̍i̍ o̍ wɔ̄sī dīi̍ŋ ndɔ̄ɔ̍ ni᷄ŋ, ma̍ kāndū chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ tāŋgūllo̍. Ndu̍yɛ̍, wānāa̍ ka̍ndū wa̍llo̍ ho̍ō wa̍, nda̍ yɔ̍nūŋ ni̍ māā Sɛ̄lūba̍bɛ̄l, po̍ Si̍ɛ̍ɛ̍tīɛ̄l wo̍, a̍ Chɔ̄ɔ̍sūāā, po̍ Chōsa̍da̍kī wo̍, a̍ chāāŋāā ndāā wa̍nāa̍ sōlīāā sa̍lāa̍, a̍ Li̍va̍īya̍ kpo̍u̍. O̍ nda̍ kɔ̍ɔ̍lī, wānā o̍ wāna̍ fu̍la̍ o̍ bīyɔ̄ɔ̍ ni᷄ŋ mbo̍ mīīŋgū Chūlu̍sɛ̄lɛ̄m, nda̍ kpo̍u̍ ma̍ sɔ̍ɔ̍ŋgūū le̍ wa̍llo̍ tōsāa̍. Li̍va̍īya̍ ki̍nɛ̍i̍, chɔ̍ŋ o̍ wɔ̄sīla̍ŋ bi̍dīi̍ŋ mbo̍ hīāū lāchī, ma̍ hɛ̄lī nda̍ le̍ mā wa̍ wa̍li̍ ta̍ŋgūlāā chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ho̍ō lāchī.

⁹Wānāa̍ wa̍ wānāā wa̍lla̍ chīla̍ŋ o̍ chīɛ̍i̍ Mɛ̄lɛ̄ka̍a̍ ho̍ō tāŋgūllo̍ wa̍ nda̍ yɔ̍nūŋ ni̍ māā, Chɛ̍sūāā nda̍ pūa̍a̍ ndūa̍a̍ a̍ wānāā ndūa̍a̍, a̍ Kādi̍mīɛ̄l nda̍ pūa̍a̍ ndūa̍a̍ a̍ fu̍la̍, o̍ pūlāle̍ Hōda̍a̍vīāāle̍ŋ chōo̍ wa̍. O̍ ko̍ŋ kɔ̍ɔ̍lī, mi̍ Li̍va̍īya̍, a̍ fu̍la̍ o̍ yu̍ŋgu̍ Hɛ̄nāda̍dī wo̍ chōo̍ wa̍ ā mālā nda̍ o̍ tāŋgūllo̍ ho̍ō ni᷄ŋ.

¹⁰Mɛ̄ɛ̍ wānāā tāŋgūlāa̍ ā kāndu̍ chīyīī chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ ve̍ kīlāa̍, mi̍ wānāa̍ sōlīāā lāsa̍lāa̍ ā wōōnu᷄ŋ do᷅māla̍ nda̍la̍ŋ ma̍ chūā pūtɛ̍nɛ̍i̍la̍ŋ le̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍, a̍ le̍ ndu̍ sāŋgālāa̍. O̍ ko̍ŋ kɔ̍ɔ̍lī, mi̍ Li̍va̍īya̍ a̍ fu̍la̍ o̍ yu̍ŋgu̍ A̍sa̍fī wo̍ chōo̍ wa̍ a̍ sa̍ŋgālā Mɛ̄lɛ̄ka̍ a̍ chɛ̍ŋchɛ̍ŋndo̍ŋ lɔ̄ɔ̍. Nda̍ kpo̍u̍ ma̍ kɔ̍ si᷅m o̍ fo̍ndāŋndā ndāla̍ yɛ̍ yɛ̍ la̍ŋ o̍ chīɛ̍i̍ Mɛ̄lɛ̄ka̍a̍, mɛ̄ɛ̍ Māsāa̍ Dēēve̍ mɛ̍i̍ ō tūwāā yɛ̍.

¹¹Ma̍ lō o̍ ko̍ŋ ma̍ sāŋgālā Mɛ̄lɛ̄ka̍ Ya̍a̍wɛ̄ɛ̄ o̍ chōndo̍ŋ ni᷄ŋ, a̍ ndu̍ ba̍li̍ka̍a̍ mēllo̍, mā dīmī āā, “Ō chō wānā kɛ̍ndɛ̄, kāālā ndɔ̄ɔ̍ le̍ I̍sɔ̄lūɛ̄ī ō chō le̍ fɛ̍ɛ̍ŋ a̍ fɛ̍ɛ̍ŋ.” O̍ ko̍ŋ kɔ̍ɔ̍lī, mi̍ wāŋnda̍ kpo̍u̍ a̍ de̍ŋī chōo̍ cho̍o̍ a̍ Mɛ̍lɛ̄ka̍ Ya̍a̍wɛ̄ɛ̄ sāŋgālāa̍, le̍ mɛ̄ɛ̍ nda̍ kāndu̍ a̍ chīyīī chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ ve̍ kīlāa̍ yɛ̍.

¹²Kɛ̍ ka̍a̍so̍ŋnda̍ le̍ wānāā sōlīāā lāsa̍lāa̍, a̍ Li̍va̍īya̍, a̍ bōlīī lā yu̍ŋgu̍e̍i̍, a̍ che᷅ chīɛ̄ī tāso̍o̍ wa̍, mi̍ a̍ ka̍ ka̍ a̍ de̍ŋī a̍ chāŋndo̍ chōo̍ cho̍o̍ kpe̍le̍ŋ. Kɛ̍ mī wāŋnda̍ ā tūa̍a̍ ā dēŋī a̍ kɔ̄l kɛ̄ndɔ̄ɔ̍.

¹³O̍ kōŋ, cha᷄ŋ wāŋnda̍ wa̍ wo̍ ni̍, dēŋī kɔ̄l kɛ̄ndɔ̄ɔ̍ ni̍, wānā ndu̍ o̍o̍ si̍nā ndu̍ pɛ̄ŋgu̍ le̍. Kāni̍ fu̍u̍le̍, bɔ̄ɔ̄lūū bɛ̄ndōo̍ ko̍ni̍ wānā ndu̍ o̍o̍ tu̍ɛ̍ī kɔ̍ɔ̍lī kɔ̍ɔ̍lī ni̍.