Read Southern Kisi Ɛ̍si̍lūā 4 Bible Online

Ɛ̍si̍lūā 4 - Southern Kisi bible

Ɛ̍si̍lūā 4

¹O̍ ko̍ŋ kɔ̍ɔ̍lī, mi̍ ya̍a̍mɔ̍ɔ̍wa̍ le̍ wāŋnda̍ Chu̍dā a̍ Bɛ̍ŋnja̍mīŋ a̍ tu̍ɛ̍ī māā wānāa̍ fu̍la̍ o̍ bīyɔ̄ɔ̍ ni᷄ŋ ma̍ mīīŋgū I̍sɔ̄lūɛ̄ī ya̍ ā chō chīɛ̄īyo̍ tāŋgūllo̍ le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍.

²Mɛ̄ɛ̍ nda̍ tūēī sūɛ̍i̍ he̍ī, ma̍ cha᷄ŋ ma̍ kūā nāa̍ Sɛ̄lūba̍bɛ̄l chu̍a̍ nda̍ bōlīī lā yu̍ŋgu̍e̍i̍, ma̍ dīmūl nda̍ āā, “Ŋ̄ tāŋgu̍lu᷅ŋ chīɛ̄īyo̍ ho̍ō lātūlu̍ na̍na̍a̍ nya̍ā. Kāni̍ fo̍ndōle̍, Mɛ̄lɛ̄ka̍ pīlɔ̍ɔ̍ na̍a̍ ŋ̄ chō sōōlūūwo̍ na̍na̍a̍ nya̍ā ni̍. Ndu̍yɛ̍ kāni̍ mi̍ māsāa̍ Ɛ̄sāha̍di̍dɔ̄ŋ ho̍ō Āsi̍i̍līāā o̍ hūŋ a̍ na̍a̍ na̍nu᷄ŋ, o̍ Mɛ̄lɛ̄ka̍ nyāa̍ lo̍ na̍a̍ ŋ̄ chō sa̍lāla̍ŋ sōlīo̍o̍ ni̍.”

³Kɛ̍ mi̍ Sɛ̄lūba̍bɛ̄l nda̍ Chɔ̄ɔ̍sūāā, a̍ bōlīī lā yu̍ŋgu̍e̍i̍ ā mūlī nda̍ dīōm āā, “Ɛ̄ɛ̍, ŋ̄ chɛ᷅l mī ŋ̄ tāŋgu̍l chīɛ̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ na̍na̍a̍ nya̍ā le̍. Na̍a̍ pi̍la̍ ŋ̄ chō tāŋgūl mɛ̄ɛ̍ Māsā Bɛ̍ndōo̍ Sa̍a̍lɔ̄ɔ̄ Pa̍a̍sīāā o̍ di̍mi̍ yɛ̍.”

⁴O̍ ko̍ŋ, mi̍ wānāa̍ wa̍ pāāndū o̍ lɛ̄ŋndē lē ni᷄ŋ nda̍ ā kīndī kīndī, le̍ nda̍ sīōōŋnde̍ dɔ̄wɔ̄ɔ̍ le̍ mā ma᷄l tāŋgūl kālāa̍.

⁵O̍ ko̍ŋ, ma̍ lūɛ̄ī wānāā bɛ̄ndūāā lēlɛ̄ŋnda̍ Pa̍a̍sīāā ni᷄ŋ, le̍ mā tōsa̍ a̍ sa̍bū māā tāŋgūllo̍ ho̍ō ō hi̍a̍ū la̍chi̍ le̍. Ā lo̍ he̍ī tōsāa̍ ha̍a̍a̍ mi̍ te̍le̍ŋ Māsā Bɛ̍ndōo̍ Sa̍a̍lɔ̄ɔ̄ wo̍ ō chūū, ma̍ lūɛ̄ī o̍ te̍le̍ŋ Māsā Bɛ̍ndōo̍ Da̍līɔ̄ɔ̄ wo̍ ni᷄ŋ.

⁶O̍ ko̍ŋ kɔ̍ɔ̍lī, mɛ̄ɛ̍ wɔ̄sīlā ti᷄ŋ lā hīōū, a̍ te̍le̍ŋ Sɛ̍sɛ̄ɛ̄ si̍mnu᷄ŋ ma̍sā o̍ lɛ̄ŋndē Pa̍a̍sīāāle̍ŋ ni᷄ŋ ndo̍, mi̍ ya̍a̍mɔ̍ɔ̍wa̍a̍ wāŋnda̍ Chu̍dā a̍ Chūlu̍sɛ̄lɛ̄m a̍ po̍o̍nyīāā yāu̍ bi̍yāā se̍īyo̍ nāa̍ ndu̍ Sɛ̍sɛ̄ɛ̄ chu̍a̍.

⁷O̍ ko̍ŋ kɔ̍ɔ̍lī, te̍le̍ŋ Āŋtāsa̍a̍sī o̍ wa̍ Māsāa̍ Pa̍a̍sīāā wo̍, mi̍ Bīsīhi̍lām, a̍ Mītīlu̍ɛ̍da̍tī, a̍ Ta̍bɛ̄ɛ̄, a̍ wānāā ndāā si̍lāa̍, ma̍ pōōnyīāā yāūwo̍ nāa̍ Māsāa̍ Āŋtāsa̍a̍sī chūā. Ndu̍yɛ̍, o̍ A̍lu̍a̍ma̍i̍kīi̍ye̍ ni᷄ŋ nda̍ pōōnyi̍a̍a̍ yāu̍wo̍ ho̍ō ni̍. Mɛ̄ɛ̍ nda̍ tōfa̍ yāu̍wo̍ ho̍ō, mɛ̄ɛ̍ ma̍ hīvīl māsāa̍ o̍ sūɛ̍i̍ ndūɛ̄ī ma̍ŋgālɛ̄i̍ ni᷄ŋ.

⁸O̍ ko̍ŋ kɔ̍ɔ̍lī, mi̍ wānāa̍ chēle̍ŋ ā pōōnyīāā vɛ̄lɛ̄ yāu̍wo̍ nāa̍ Māsāa̍ Āŋtāsa̍a̍sī chu̍a̍. Wānāā kāŋ nda̍ cho̍ ha̍ā ni̍. Lu̍ɛ̍hū māsa̍ ībūŋgāa̍, a̍ Sīmīsi̍hāī wānā po̍o̍nyīa̍a̍, a̍ wānāā ndāā si̍lāa̍, a̍ chɔ̄ɔ̍chi̍a̍a̍, a̍ māsāa̍ ŋ̄būŋgāa̍, a̍ wānāā bɛ̄ndūāā lēlɛ̄ŋnda̍. Ndu̍yɛ̍, a̍ Chūlu̍sɛ̄lɛ̄m o̍kɔ̄ɔ̄ nda̍ pōōnyi̍a̍a̍ yāu̍wo̍ ho̍ō ni̍. Ō fūla̍ o̍ wāŋnda̍ ha̍ā kɔ̍ɔ̍lī, mi̍ wānāā chēle̍ŋ ā dēl nda̍ chōo̍ le̍ yāu̍wo̍ ho̍ō pōōnyīa̍a̍. Wāŋnda̍ Ɛ̍lu̍ɛ̍chī chi̍e̍e̍, a̍ ha̍ā Ba̍bi̍lɔ̄ŋ, a̍ Ɛ̍lāma̍i̍tīi̍ya̍ a̍ chɛ̍ŋ Su̍sā wa̍, a̍ wānāa̍ fu̍la̍ o̍ ka̍a̍la̍ chēle̍ŋ nda̍ŋ ni᷄ŋ nda̍. A̍ wāna̍ tɔ̍ɔ̍ kpāāyā bɛ̍ndōo̍ Āsīhɔ̄ba̍ni̍pāā ndu̍ o̍o̍ bi̍ī, mbo̍ kɛ̄sī nda̍ a̍ ka̍ka̍ Sāme̍e̍līāā, a̍ fo̍ndāŋndā chēle̍ŋ nda̍ŋ o̍ būŋgɛ̄i̍ bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍ wa̍.

⁹

¹⁰

¹¹Ndu̍yɛ̍, nyɛ᷄ wa̍ o̍ yāu̍wo̍ ho̍ō ni᷄ŋ ndo̍, ndu̍ cho̍ ho̍ō ni̍ āā, “Nūm wāna̍ lēbīɔ̍ɔ̍ Māsāa̍ Āŋtāsa̍a̍sī, yāu̍wo̍ ho̍ō cho̍ chɔ̄nɔ᷄ŋndo̍ nāa̍ bu̍ɛ̍i̍yāā nūmnda̍ chūā, a̍ cho̍ o̍ būŋgɛ̄ī bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍ wa̍.

¹²Ŋ̄ yēēma̍ mī ŋ̄ dīmu̍l nu̍m māā Chu̍ūwa̍ a̍ ma̍l lɛ̄ŋndē nūmnde̍ŋ ma̍ hūŋ Chūlu̍sɛ̄lɛ̄m nda̍, ā hīŋ mā hu᷄ŋ ka̍ndū chi̍e̍e̍ bōllē kālā bɛ̄ndū kōŋ tāŋgūllo̍. Chi̍e̍e̍ kɔ̄l vēsɛ̍i̍ bɛ̄ndū kōŋ. Ndu̍yɛ̍, ā chīi̍ ni᷅ŋ chīyīī kālɛ̄i̍ sīmī, ō lo̍ ni᷅ŋ cho̍be̍ mā chīi̍ chi̍o̍o̍ tāŋgūl.

¹³Ŋ̄ yēēma̍ nu̍m mā si̍na̍ pɛ̄ŋgu̍ māā tē ō wa̍ pɛ̍ mā chīi̍ sāāsa̍ ba̍lu̍ chi̍o̍o̍ wo̍ tāŋgūl, lātu̍lu̍ a̍ chi̍e̍e̍ ka̍lāa̍ pɛ̍, Chu̍ūwa̍ ā cho̍ lɛ̍ nu̍m pāāwā mālɔ̄ɔ̄ o̍ bā le̍. O̍ ko̍ŋ, nyɛ̄ sɔ̄lāā bɔ̄ɔ̍ cho̍ wa᷅ o̍ chīɛ̄ī kɛ̄sīāā ŋ̄ka̍ni̍o̍o̍ ni᷄ŋ te̍.

¹⁴Ŋ̄ chō nu̍m sūɛ̍i̍ he̍ī chɔ̄mndo̍ le̍ mā si̍na̍. Kāni̍ fu̍u̍le̍, ŋ̄ chō wa̍llo̍ o̍ chīɛ̄ī lēmāsāa̍ ni᷄ŋ, ndu̍yɛ̍ ŋ̄ ye̍e̍mā mī bɛ̄ɛ̄le̍ nu̍mnde̍ŋ lē dɔ̄ɔ̄na̍ŋ te̍. Le̍ sa̍bōo̍ ho̍ō na̍a̍ ŋ̄ chō nu̍m sūɛ̍i̍ he̍ī dīmūllo̍ ni̍.

¹⁵Ŋ̄ yēēma̍ nu̍m mā nu̍u̍vi̍a̍a̍ o̍ yāu̍la̍ lēlɛ̄ŋndā fi̍nyāā nūm a̍a̍ ma̍māa̍ ni᷄ŋ. Tē a̍ to̍fa̍ lēni᷄ŋ pɛ̍, ā chō sāālɔ᷄ŋ mɛ̄ɛ̍ chi̍o̍o̍ ho̍ō wa̍ chi̍e̍e̍ bōllē kālā o̍ pāāndōo̍ ni᷄ŋ yɛ̍. Ā chō chɔ̄ māā te̍le̍ŋnda̍ ka̍ka̍ mi̍ wāŋndā ha̍ā sīmūl Māsāā Bɛ̍ndūa̍a̍, lātūlu̍ a̍ māsɛ̄i̍ ndɛ̄i̍ o̍ pāāndōo̍ ni᷄ŋ. Ndu̍yɛ̍, le̍ sa̍bū kōŋ kpe̍e̍kpe̍i̍ chi̍e̍e̍ ka̍lāa̍ ō chō ō tɛ̄ɛ̄mbāā ni̍.

¹⁶Tē ō wa̍ pɛ̍ mī wāŋnda̍ ha̍ā ā mīŋgi̍ Chūlu̍sɛ̄lɛ̄m tāŋgūl, o̍ ko̍ŋ kɔ̍ɔ̍lī mā mīŋgi̍ sāāsa̍ ba̍lu̍ chi̍o̍o̍ wo̍ tōōsīāā, a̍ nɔ̍lā lɛ̍ ni̍ŋ wa̍nāa̍ cho̍ o̍ būŋgɛ̄i̍ cho̍ o̍ Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍ wa̍ nāŋgɔ̄ɔ̄ le̍.”

¹⁷Mɛ̄ɛ̍ māsāa̍ chīi̍ sɔ̄ɔ̍ŋ mu᷅ŋ tūēīyɔ̄ɔ̄ kpo̍u̍, mbo̍ mīŋgūl nda̍ dīōmnde̍ŋ āā, “Yōōŋgōo̍ ho̍ō chō kɔ̄la̍ŋ nāa̍ Lu̍ɛ̍hūm chu̍a̍, Māsa̍ ībūŋgāa̍, nda̍ Sīmīsi̍hāī wānā po̍o̍nyīa̍a̍, a̍ wānāā sīlāa̍ a̍ cho̍ Sāme̍e̍līāā wa̍, a̍ wānāā tūa̍a̍ kpo̍u̍ a̍ cho̍ o̍ būŋgɛ̄ī tūɛ̍i̍ ni᷄ŋ o̍ Pīo̍o̍ Yūfi̍lu̍a̍tīī, bā pāa̍le̍ŋ lē dēl lo̍ wa̍. Lā wo̍sɛ̄.”

¹⁸“Yāu̍ nya̍ pōōnyi̍a̍l la̍ wo̍ ā chīi̍ ndu̍ hīvī o̍ sūɛ̍i̍ nīī ma̍ŋgālɛ̄i̍ ni᷄ŋ ma̍ tōfāl la̍ ndu̍ nyɛ̄ kɛ̄ndɛ̄ kɛ̄ndɛ̍ī. Ndu̍yɛ̍ mi̍ si̍nā ndu̍ pɛ̄ŋgu̍ wa̍la̍ŋ.

¹⁹I̍ chi̍i̍ ni᷄ŋ wāŋnda̍ yɔ̄ŋgū le̍ ma̍ kɔ̍ tōfa̍ o̍ sūɛ̍i̍ ka̍lɛ̄i̍ ni᷄ŋ chi̍kɛ̍ŋ. Mɛ̄ɛ̍ nda̍ kɔ̍ to̍fā le̍ni᷄ŋ, ma̍ sāālu᷄ŋ māā chɔ̍ŋ o̍ sīndɔ̄ɔ̍ ni᷄ŋ pa̍ māā Chūlu̍sɛ̄lɛ̄m ndu̍ o̍o̍ si̍mu̍l wāŋ bɛ̄ndūāā lēlɛ̄ŋnda̍, ndu̍yɛ̍ o̍ ko̍ŋ kɔ̍ɔ̍lī, māā ō wa̍ ō pīāā a̍ wānāā bōlīī kālāa̍, a̍ wānāā mɛ̄līāā ŋ̄sɔ̄ɔ̍ wa̍.

²⁰Ndu̍yɛ̍ Māsāa̍ kpāāyāā bɛ̍ndūa̍a̍, ā bɔ̄ɔ̍ bɔ̍ɔ̍ a̍ wa̍ ni᷅ŋ Chūlu̍sɛ̄lɛ̄m chōo̍ la̍ma̍sā a̍ būŋgɛ̄i̍ bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍ kpo̍u̍. Ndu̍yɛ̍, mi̍ māsāa̍ ha̍ā ā bīī pāāwālā ka̍ka̍, wa᷅ŋnda̍ o̍ lābā.

²¹Le̍la̍ŋ, I̍ cho̍ nu̍m kpāāyāa̍ kīo̍o̍, mā ku̍u̍na̍ wānāā kāŋ ā mi̍ŋgī chi̍e̍e̍ ko̍ŋ tāŋgūl te̍. Ndu̍yɛ̍, ā nɔ̍ le̍ nyɛ̄ o̍ nyɛ̄ tōsā a̍ tāŋgūl kōŋ o̍kɔ̄ɔ̄ le̍, ha̍a̍a̍ mā tūēī ya̍ pi̍la̍ dīōm.

²²Kɛ̍sī sūɛ̍i̍ he̍ī lɛ̄ŋ te̍. Ke̍le̍ŋa̍ ndi̍ tōsā mɛ̄ɛ̍ na̍a̍ ŋ̄ sūāā nu̍a̍ā yɛ̍. Tē a̍ ke̍le̍ŋa̍ ndi̍ tōsā pɛ̍, mɛ̄ɛ̍ nyɛ̄ pālāā ko̍māl ni̍ŋ ya̍ le̍.”

²³Mɛ̄ɛ̍ yāu̍ Māsāa̍ Āŋtāsa̍a̍sī wo̍ ō fūūlu̍u̍ nāa̍ Lu̍i̍hūm chu̍a̍, nda̍ Sīmīsi̍hāī, wānā pōōnyīa̍a̍, a̍ wānāā ndāā si̍lāa̍, ma̍ tōfāl nda̍ yāu̍wo̍ ho̍ō. O̍ ko̍ŋ, ma̍ cha᷄ŋ le̍pi᷅lɛ̍ kpe̍ ma̍ kūā Chūlu̍sɛ̄lɛ̄m, ma̍ kɔ̍ ku̍u̍nā wāŋnda̍ a̍ kpāāyā māā ā hi̍a̍ū lɛ̄ lāchī a̍ tāŋgūllo̍ le̍.

²⁴Wānā o̍ wānā to̍sa̍ lɛ̍ wa̍li̍ o̍ tāŋgūl kōŋ te̍ ha̍a̍a̍, mɛ̄ɛ̍ wɔ̄sī Da̍līɔ̄ɔ̄ chi̍ŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā Pa̍a̍sīāā wo̍ mi̍ tāŋgūllo̍ ō hīāū vɛ̄lɛ̄ lāchī.