Read Southern Kisi Ɛ̍si̍lūā 5 Bible Online

Ɛ̍si̍lūā 5 - Southern Kisi bible

Ɛ̍si̍lūā 5

¹Ndu̍yɛ̍ o̍ bōōndi̍i̍ ke̍ŋ ni᷄ŋ, mi̍ wānāa̍ su̍a̍ā le̍ Mɛ̄lɛ̄ka̍ wa̍ ā ŋīɔ̍ɔ̍ŋ, Ha̍kāī nda̍ Sɛ̄kāla̍yā po̍ I̍dɔ̄ɔ̄ wo̍, ā dīmī sɔ̄ɔ̍ŋ wa̍ā lāchīo̍ŋ nāa̍ Chu̍ūwa̍ chūā, o̍ dīōla̍ Mɛ̄lɛ̄ka̍a̍ ni᷄ŋ, a̍ wa̍ īchāli̍ Chu̍dā a̍ Chūlu̍sɛ̄lɛ̄m nda̍.

²Mɛ̄ɛ̍ Sɛ̄lūba̍bɛ̄l, po̍ Si̍a̍tīɛ̄ɛ̄ wo̍ nda̍ Chɔ̄ɔ̍sūāā, po̍ Chɛ̄hōsa̍da̍kī wo̍ ā tūēī yōōŋgōo̍ ho̍ō, ma̍ kɔ̍ ka̍ndū vɛ̄lɛ̄ chīɛ̍i̍ Mɛ̄lɛ̄ka̍a̍ tāŋgūllo̍ Chūlu̍sɛ̄lɛ̄m. Ndu̍yɛ̍, mi̍ wānāā ŋīɔ̍ɔ̍ŋāa̍ su̍a̍ā ka̍ŋ le̍ Mɛ̄lɛ̄ka̍ wa̍ ā sɔ̄ɔ̄ŋgūū ma̍ mālā nda̍.

³O̍ te̍le̍ŋ pi᷅lɛ̍ kōŋ ni᷄ŋ kpe̍, mi̍ Tātɛ̍nāī, Māsāa̍ le̍ Būŋgɛ̄i̍ bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍, a̍ Sīɛ̄tā Bōsɛ̍nāī, nda̍ wānāā sīlāa̍ ā cha᷄ŋ ma̍ kūā Chūlu̍sɛ̄lɛ̄m. Ma̍ kɔ̍ nyu̍nā wāŋnda̍ le̍ wāna̍ ke̍ nda̍ kpāāyāa̍ le̍ chīɛ̍i̍ Mɛ̄lɛ̄ka̍a̍ mīŋgīo̍o̍ tāŋgūllo̍ wo̍.

⁴Ma̍ dīmūl nda̍ vɛ̄lɛ̄ le̍ mā ke̍ nda̍ dīōlā wānāa̍ wa̍ tāŋgūllo̍ wa̍.

⁵Kɛ̍ Mɛ̄lɛ̄ka̍ wa̍ wāŋ bānāā Chu̍ūwa̍ hɔ̄lte̍ŋ chōo̍, mi̍ chē bɛ̍ɛ̍ mi̍ pūa̍a̍ nda̍ a̍a̍ hu᷅ŋ le̍ wānāa̍ wa̍ wa̍llo̍ wa̍ kūūnāa̍ ni̍, kɛ̍ ā kūūna̍ lɛ̍ nda̍ le̍. Mi̍ wānāa̍ hi᷅ŋ ka̍ŋ le̍ nda̍ kūūnāa̍ wa̍ kɛ̄ɛ̄sīāā māā, mɛ̄ɛ̍ mā kūɛ̄ a̍ ko̍na̍a̍ nāa̍ Māsāa̍ Da̍līɔ̄ɔ̄ chu̍a̍, mbō mu̍li̍ nda̍ dīōm o̍ yāu̍ ni̍ŋ, ma̍lāŋ nda̍ a̍a̍ ku̍u̍nā Chu̍ūwa̍ wa̍llo̍.

⁶Ndu̍yɛ̍, ko̍na̍ nda̍ kūɛ̄ nāa̍ Māsāa̍ Da̍līɔ̄ɔ̄ chu̍a̍ wo̍ ndu̍ cho̍ ho̍ō ni̍ āā,

⁷“Māsāa̍ Da̍līɔ̄ɔ̄, vi̍o̍u̍ na̍a̍ chōo̍ kɛ̍ndi̍a̍a̍.

⁸Ŋ̄ yēēma̍ nu̍m mā si̍na̍ māā, ŋ̄ kūɛ̄ o̍ būŋgɛ̄ī Chu̍dā ve̍ ni᷄ŋ, mi̍ ŋ̄ sāālu᷄ŋ wa᷅ŋnda̍ ā chō chīɛ̍i̍ Mɛ̄lɛ̄ka̍ bɛ̄ndōo̍ mīŋgīo̍o̍ tāŋgūllo̍ a̍ pōūtā bɛ̄ndūla̍ŋ, ndu̍yɛ̍ ma̍ wa̍ kpo᷄ŋnda̍ŋ hāndɔ̄ɔ̍ o̍ chīɛ̄īyo̍ a̍ pɛ̄ŋgɔ̍ŋ bɛ̍ndo᷄ŋ. Wānā o̍ wānā cho̍ wa̍llo̍ ō kālā ka̍lā, mi̍ chīīye̍ wā hēlɔ̄ɔ̍ chɔ̍ chɔ̍.

⁹O̍ ko̍ŋ, mi̍ ŋ̄ nyūnā ka̍a̍so̍ŋa̍a̍ ndāa̍, le̍ wāna̍ ke̍ nda̍ kpāāyāa̍ le̍ chīɛ̍i̍ Mɛ̄lɛ̄ka̍a̍ mīŋgīo̍o̍ tāŋgūllo̍ wo̍.

¹⁰Mi̍ ŋ̄ nyūnā nda̍ vɛ̄lɛ̄ le̍ dīōlā wānāā ndāā ba̍nāa̍ mī na̍a̍ ŋ̍ pōōnyīāl nu̍m nda̍ o̍ yāu̍ ni̍ŋ.

¹¹Ma̍ mūlī na̍a̍ dīōm māā, bu̍ɛ̍i̍yāa̍ Mɛ̄lɛ̄ka̍ nɔ̍ chōo̍ cho̍o̍ a̍ chi̍e̍ēŋndo̍ wa̍ na̍a̍ ŋ̄ cho̍ ni̍. Ŋ̄ chō chīɛ̍i̍ Mɛ̄lɛ̄ka̍a̍ mīŋgīo̍o̍ tāŋgūl, ō Māsā tɔ̍ɔ̍ bɛ̍ndōo̍ I̍sɔ̄lūɛ̄ī ō tāŋgūl mi̍ wɔ̄sīlā fāŋgā fa̍ŋgā lā hīāū ni᷅ŋ ndo̍.

¹²Kɛ̍, fi̍nyāā nāā ma̍māa̍ tɛ̍ɛ̍mbu̍u̍ Mɛ̄lɛ̄ka̍ kɔ̄l ni̍, le̍la̍ŋ mi̍ Mɛ̄lɛ̄ka̍ chɛ̄l mi̍ Māsā Bɛ̍ndōo̍ Nābi̍u̍kānɛ̍ɛ̍sā tɛ̍ɛ̍mbūū chīɛ̍i̍ Mɛ̄lɛ̄ka̍a̍, ndu̍yɛ̍ mbo̍ bīī nda̍ mbo̍ kūā a̍ nda̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ. Ndu̍yɛ̍, mbo̍ tɛ̄ɛ̄mbūū chīɛ̍i̍ Mɛ̄lɛ̄ka̍a̍.

¹³Kɛ̍ o̍ ko̍ŋ ni̍ŋ kpo̍u̍, o̍ wɔ̄sī tāse̍ Sa̍a̍lɔ̄ɔ̄ si̍mnu᷄ŋ ma̍sā bɛ̍ndōo̍ Ba̍bi̍lɔ̄ŋ ndo̍, mi̍ ndu̍ Sa̍a̍lɔ̄ɔ̄ kɛ̍ wāŋnda̍ I̍sɔ̄lūɛ̄ī kpāāyāa̍ le̍ mā mīŋgi̍ chīɛ̍i̍ Mɛ̄lɛ̄ka̍ ho̍ō tāŋgūl.

¹⁴Nyɛ̄m lāāndūŋ nda̍ tōōsi̍a̍a̍ a̍ ko̍o̍līi̍ye̍ wo̍ŋ, a̍ ŋ̄ nda̍ tōōsi̍a̍a̍ a̍ ka̍ni̍i̍ hu̍mbūe̍i̍ yo̍ŋ, ŋ̄ Māsā Bɛ̍ndōo̍ Nābi̍u̍kānɛ̍ɛ̍sā ndu̍ o̍o̍ chu̍a̍ o̍ chīɛ̍i̍ Mɛ̄lɛ̄ka̍a̍ ni᷄ŋ Chūlu̍sɛ̄lɛ̄m mbo̍ kūā a̍ mu̍ŋ o̍ chīɛ̄ī ndɔ̍ Mɛ̄lɛ̄ka̍a̍ ni᷄ŋ Ba̍bi̍lɔ̄ŋ ndo̍ŋ, mi̍ Māsāa̍ Sa̍a̍lɔ̄ɔ̄ kɔ̍ so̍lī mu̍ŋ mbo̍ kē Sīɛ̄sība̍a̍sā, wāna̍ o̍ hɛ̍li̍ le̍ mbō wa̍ māsa̍ ībūŋgāa̍ le̍ būŋgɛ̄ī Chu̍dā ve̍ wo̍.

¹⁵Mbo̍ dīmūl Sīɛ̄sība̍a̍sā le̍ mbō kūɛ̄ a̍ mu̍ŋ o̍ fo̍ndāŋ chīɛ̍i̍ Mɛ̄lɛ̄ka̍a̍ Chūlu̍sɛ̄lɛ̄m, mbō mīŋgi̍ chīɛ̄ī kōŋ tāŋgūl o̍ fōōfo̍ ndɔ̄ pa̍a̍ndōo̍ chōo̍.

¹⁶O̍ ko̍ŋ kɔ̍ɔ̍lī, mi̍ Sīɛ̄sība̍a̍sā hu᷅ŋ mbo̍ hu᷅ŋ ki̍lā chīyīī chīɛ̍i̍ Mɛ̄lɛ̄ka̍a̍ mi̍ wa̍llo̍ ō kāndu᷄ŋ. Ndu̍yɛ̍, chɔ̍ŋ a̍ te̍le̍ŋ ko̍ŋ, mbo̍ bīī a̍ te̍le̍ŋndo̍ ho̍ō, wa̍li̍ ka̍lāa̍ chō hīōūwɔ̄ɔ̍ lāchī a̍ tōsa᷄ŋndo̍. Kɛ̍ chīɛ̄ī kālāa̍ ō chūū wɔ̍ ta̍ŋgūl te̍.

¹⁷Le̍la̍ŋ, yāndi̍i̍ Māsā Bɛ̍ndōo̍, tē ō chō hɛ̄na᷄ŋ nu̍m pɛ̍, mɛ̄ɛ̍ so̍li̍ wānā, mbō kɔ̍ to̍fā o̍ yāu̍la̍ lēlɛ̄ŋndā sɔ̄ɔ̍ŋ pa̍a̍ndo᷄ŋ ŋ̄ chō lēni᷄ŋ Ba̍bi̍lɔ̄ŋ nda̍ŋ. Le̍ sīnāa̍ tē Māsāa̍ Sa̍a̍lɔ̄ɔ̄ ndu̍ o̍o̍ ke̍ wāŋnda̍ I̍sɔ̄lūɛ̄ī kpāāyāa̍ lē kɛ̍ndɛ̍ī le̍ chīɛ̍i̍ Mɛ̄lɛ̄ka̍a̍ mīŋgīo̍o̍ tāŋgūllo̍ Chūlu̍sɛ̄lɛ̄m ni̍. Tē ke̍ŋ i̍ chu̍ū pɛ̍, a̍ chɔ̍m na̍a̍ nyɛ̄ ŋ̄ kɛ̄ɛ̄si̍a̍a̍ kpe̍e̍kpe̍i̍ a̍ sūɛ̍i̍ ka̍lɛ̄i̍ o̍kɔ̄ɔ̄ wo̍.”