Read Southern Kisi Ɛ̍si̍lūā 6 Bible Online

Ɛ̍si̍lūā 6 - Southern Kisi bible

Ɛ̍si̍lūā 6

¹O̍ ko̍ŋ, mɛ̄ɛ̍ Māsā Bɛ̍ndōo̍ Da̍līɔ̄ɔ̄ sɔ̍la̍ ko̍na̍a̍ a̍ di̍ ke̍ŋnu̍ŋ I̍sɔ̄lūɛ̍i̍ya̍ le̍ chīɛ̍i̍ Mɛ̄lɛ̄ka̍a̍ mīŋgīo̍o̍ tāŋgūllo̍ wo̍ o̍kɔ̄ɔ̄, ō kɛ̄si̍ lɛ᷅ŋ te̍. Mbo̍ kē wāŋnda̍ di̍o̍o̍ le̍ mā kɔ̍ ya̍a̍sīāā o̍ yāu̍la̍ lēlɛ̄ŋndā sɔ̄ɔ̍ŋ pa̍a̍ndo᷄ŋ ŋ̄ chō ŋ̄ kɛ̄sīāā lēni᷄ŋ Ba̍bi̍lɔ̄ŋ nda̍ŋ. Mi̍ wāŋnda̍ cha᷄ŋ ma̍ kɔ̍ nu̍u̍vīāā nūūvīa̍a̍ pīla̍.

²Kɛ̍ o̍ mɛ̄ɛ̄lu̍la̍ŋ kpɔ̍ŋ, ma̍ sāālu᷄ŋ ya̍u̍ si̍mbūlāa̍ o̍ chi̍e̍e̍ bɛ̍ndōo̍ ni᷄ŋ Ɛ̄kībāta̍nā, o̍ būŋgɛ̄ī Mi̍dīāāve̍ ni᷄ŋ. O̍ wa̍ chi̍e̍e̍ le̍bo̍llo̍ le̍ būŋgɛ̄ī Mi̍dīāāve̍ wo̍. Mɛ̄ɛ̍ nda̍ kūmbi̍ yāu̍ si̍mbūlāa̍ ho̍ō, nyɛ̄ nda̍ sāālu̍ŋ le̍ni̍ŋ ndo̍ cho̍ ho̍ō ni̍ āā,

³“Wɔ̄sī Sa̍a̍lɔ̄ɔ̄ si̍mnu᷄ŋ ma̍sāa̍ wo̍, mbo̍ kē I̍sɔ̄lūɛ̍i̍ya̍ kpāāyāa̍ le̍ mā mīŋgi̍ chīɛ̍i̍ Mɛ̄lɛ̄ka̍a̍ tāŋgūl Chūlu̍sɛ̄lɛ̄m. Ndu̍yɛ̍, ā nɔ̄ mā mi̍ŋgi̍ ndu̍ tāŋgūl o̍ be̍mbe̍ ndɔ̄ pa̍a̍ndōo̍ chōo̍, nāa̍ nda̍ a̍a̍ so̍lī sa̍lāla̍ŋ, ndu̍yɛ̍ mā lūām sa̍lāla̍ŋ o̍ Mɛ̄lɛ̄ka̍ lo̍ wa̍. Ā nɔ̄ le̍ ndu̍ tāŋgūllo̍ hēlɔ̄ɔ̍ nɛ̄īyo̍ be̍le̍ ŋɔ̍ma̍hīɔ̍ɔ̍lu̍, a̍ tōŋgɔ̄ɔ̍ nɛ̄īyo̍ be̍le̍ ŋɔ̍ma̍hīɔ̍ɔ̍lu̍.

⁴Ā nɔ̄ le̍ chīīye̍ sīmīo̍o̍ a̍ pōūtā bɛ̄ndūla̍ŋ, o̍ ko̍ŋ kɔ̍ɔ̍lī a̍ yɔ̄mnde̍. Tē ā yāmbu̍ pɛ̍ po̍ūtā bɛ̄ndūla̍ŋ pūla᷄ŋ mā yāa̍, ā yāmbu̍ pɛ̄ŋgɛ̍i̍ yɔ̄mnde̍ ī kālā kālɛ̄i̍ ī pīlɛ̍. Ndu̍yɛ̍, bɔ̄nɔ̄ o̍ bɔ̄nɔ̍ cho̍ le̍ chīɛ̄īyo̍ ho̍ō tāŋgūllo̍, o̍ ka̍ni̍ŋ lēlɛ̄ŋndo̍ŋ ni᷄ŋ o̍ nɔ̍ le̍ fūlāa̍ ni̍.

⁵O̍ ko̍ŋ kɔ̍ɔ̍lī, nyɛ̄m lāāndūŋ ŋ̄ko̍o̍līi̍yo̍ŋ, a̍ ŋ̄ ka̍ni̍ŋ hu̍mbūŋ Māsā Bɛ̍ndōo̍ Nābi̍u̍kānɛ̍ɛ̍sā ndu̍ o̍o̍ chu̍a̍ o̍ chīɛ̍i̍ Mɛ̄lɛ̄ka̍a̍ ni᷄ŋ Chūlu̍sɛ̄lɛ̄m, mbo̍ kūānu᷄ŋ a̍ mu̍ŋ Ba̍bi̍lɔ̄ŋ ndo̍ŋ, ā nɔ̄ le̍ mu̍ŋ mīŋgīo̍o̍ o̍ fo̍ndāŋndā ŋ̄ wa̍ pāāndū ŋ̄ kɛ̄sīāā Chūlu̍sɛ̄lɛ̄m o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ŋ.”

⁶Mɛ̄ɛ̍ Māsā Bɛ̍ndōo̍ Da̍līɔ̄ɔ̄ sa̍a̍lu̍ŋ ya̍u̍ māsāa̍ Sa̍a̍lɔ̄ɔ̄ yɔ̍ŋgu̍ sīndɛ̄ le̍ wāŋnda̍ I̍sɔ̄lūɛ̄ī kpāāyāa̍ kīo̍o̍, le̍ chīɛ̍i̍ Mɛ̄lɛ̄ka̍a̍ mīŋgīo̍o̍ tāŋgūllo̍ Chūlu̍sɛ̄lɛ̄m ndo̍, mbo̍ yɔ̄ŋgū yōōŋgōo̍ ho̍ō nāa̍ wāŋnda̍ ha̍ā chūā, nda̍ yɔ̍ŋūl ni̍ māā Tātɛ̍nāī, māsāa̍ le̍ būŋgɛ̄i̍ bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍, a̍ Si̍ɛ̍tāā Bōsɛ̍nāī, a̍ wānāā ndūāā si̍lāa̍. Mbo̍ dīmūl nda̍ āā, “Lā fāŋa̍ŋ o̍ chīɛ̍i̍ Mɛ̄lɛ̄ka̍a̍ kōŋ ba̍ū.

⁷Ndu̍yɛ̍ lā wo̍ū sōndō nyā o̍ sūɛ̍i̍ tāŋgūl kōŋ ni᷄ŋ te̍. Lā tōsa̍ mī māsa̍ Chu̍ūwa̍, a̍ wāŋ bɛ̄ndūāā Chu̍ūwa̍, mā mīŋgi̍ chīɛ̍i̍ Mɛ̄lɛ̄ka̍a̍ ho̍ō tāŋgūl o̍ fōōfo̍ ndɔ̄ pāāndōo̍ chōo̍.

⁸O̍ ko̍ŋ kɔ̍ɔ̍lī, chɔ̍ŋ a̍ hāū, I̍ ye̍e̍ma̍ mī lā māla̍ Chu̍ūwa̍ wānāā ndāā ba̍nāa̍ chīɛ̄ī kōŋ tāŋgūl. Ndu̍yɛ̍, bɔ̄nɔ̄ o̍ bɔ̄nɔ̍ cho̍ nda̍ kūēē, lā nɔ̄ mī lā pāāwa̍ ndu̍ chɔ̍ chɔ̍, a̍ ka̍ni̍ŋ wāŋnda̍ māl pa̍a̍wāa̍ o̍ būŋgɛ̄ī nyɛ̄i̍ ni᷄ŋ ndo̍ŋ.

⁹Ndu̍yɛ̍, lā pu̍ɛ̍ɛ̍nu᷄ŋ le̍ nyɛ̄ wānāā sōlīāā lāsa̍lāa̍ Chūlu̍sɛ̄lɛ̄m a̍ ye̍e̍mā le̍pa̍a̍ o̍ lēpāa̍ le̍ sa̍lāla̍ŋ sōlīo̍o̍ nāa̍ Mɛ̄lɛ̄ka̍ ho̍ō chōo̍ cho̍o̍ chu̍a̍ wo̍ yɔ̄ŋgōo̍ le̍. Lā ke̍ nda̍ nāūwāā tōōyīāā fɔ̍ŋndu̍a̍a̍, a̍ sāā ko̍ndu̍a̍a̍ fɔ̍ŋndu̍a̍a̍, o̍ ko̍ŋ kɔ̍ɔ̍lī, a̍ sāā fɔ̍ŋndu̍a̍a̍ le̍ sa̍lālā lūāmāā la̍ŋ. Lā ke̍ nda̍ wi̍tīi̍yo̍ŋ, a̍ hɛ᷄lle̍, a̍ mūɛ̄īmā kīle̍pīi̍ya̍ŋ, a̍ chūɛ̄īmā ɔ̄li̍fīi̍ya̍ŋ.

¹⁰Le̍ hāli̍ kpe̍ŋ, mā yɔ̄ŋgu̍ sa̍lālā Mɛ̄lɛ̄ka̍ chōo̍ cho̍o̍ hīnī kɔ̍l ta̍ŋ, mā pīɛ̍i̍ Mɛ̄lɛ̄ka̍ le̍ ya̍ a̍ pūa̍a̍ nīa̍a̍.

¹¹O̍ ko̍ŋ kɔ̍ɔ̍lī, nya̍ ki̍nɛ̍i̍, wānā o̍ wānā kɛ̍ɛ̍ le̍ su̍ɛ̍i̍ ya̍ I̍ di̍mi̍ he̍ī ye̍ tōsāa̍ pɛ̍, ā chō pɛ̄ŋgɛ̍i̍ bɛ̍ndūe̍i̍ sōlī o̍ chīɛ̄ī ndɔ̄ɔ̍ mā sɛ̄ɛ̄mbi̍a̍a̍ ndi̍ kpēŋgēi̍ pīlɛ̍i̍, mā būlī ndu̍ a̍ ndi̍, mā pɛ̄l chīɛ̄ī ndɔ̄ɔ̍ wɔ̍ wɔ̍ mā sīīŋgu̍u̍ ndu̍ sa᷄l.

¹²Māā Mɛ̍lɛ̄ka̍ o̍ to̍sa̍ mi̍ dīōlā ndɔ̄la̍ŋ lā wā o̍ chīɛ̄ī ko̍ŋ ndo̍, māsā o̍ māsā, ɔ̄ɔ̄ wānā o̍ wāna̍, o̍ ki̍ndi̍ pɛ̍ le̍ sāwa̍ ya̍ I̍ dɔ̍ū ho̍ō wo̍ sīŋgāfīlāa̍, kɛ̄lɛ̄ŋgāā ni᷅ŋ te̍ mbō pɛ̄l chīɛ̍i̍ Mɛ̄lɛ̄ka̍ ho̍ō Chūlu̍sɛ̄lɛ̄m pɛ̍, māā Mɛ̄lɛ̄ka̍ ō tūsi̍ nda̍ tōōlō fɔ̍. Ya̍ Da̍līɔ̄ɔ̄ dɔ̍ū sāwāa̍ ho̍ō ni̍, ndu̍yɛ̍, wānā o̍ wānā nɔ̍ mā chu̍a̍ ndu̍.”

¹³O̍ ko̍ŋ kɔ̍ɔ̍lī, mɛ̄ɛ̍ nda̍ tūēī nyɛ̄ Māsā Bɛ̍ndōo̍ Da̍līɔ̄ɔ̄ di̍mi̍ wo̍, Tātɛ̍nāī māsā ībūŋgāa̍ ni̍, a̍ Sīɛ̄tā Bōsɛ̍nāī, a̍ wānāā ndāā si̍lāa̍, ma̍ tōsā nyɛ̄ o̍ nyɛ̄ a̍ dīāllūŋ fūlāā, mɛ̄ɛ̍ mɛ̄ɛ̍ Māsāa̍ Da̍līɔ̄ɔ̄ o̍ di̍mu̍l nda̍.

¹⁴O̍ ko̍ŋ, mi̍ Chu̍ūwa̍ wānāā ndāā ba̍nāa̍ hīāū lāchī a̍ chīɛ̍i̍ Mɛ̄lɛ̄ka̍a̍ tāŋgūllo̍ a̍ kɔ̄l kɛ̄ndɛ̄. Ndu̍yɛ̍ wānāa̍ su̍a̍ā le̍ Mɛ̄lɛ̄ka̍ wa̍, Ha̍kāī nda̍ Sɛ̄kāla̍yā po̍ I̍dɔ̄ɔ̄ wo̍, ā wa̍ nda̍ dɛ̄ɛ̄ni̍a̍a̍ a̍ dīo̍m Mɛ̄lɛ̄ka̍a̍ nda̍ dīmūllo̍. Ndu̍yɛ̍, ma̍ chīī tāŋgūllo̍ a̍ mɛ̄ɛ̍ Mɛ̄lɛ̄ka̍ I̍sɔ̄lūɛ̍i̍ya̍ ō dīmu̍l nda̍ yɛ̍, lātūlu̍ a̍ mɛ̄ɛ̍ Māsāa̍ Da̍līɔ̄ɔ̄, a̍ Sa̍a̍lɔ̄ɔ̄, a̍ Māsāa̍ Āŋtāsa̍a̍sī a̍ di̍mu̍l nda̍ yɛ̍.

¹⁵Mi̍ tāŋgūllo̍ ō chūū o̍ pāa̍le̍ ya̍a̍ndɔ̄le̍ŋ chōo̍, o̍ pāŋgi̍i̍ A̍dāve̍ ni᷄ŋ, wɔ̄sī Māsāa̍ Da̍līɔ̄ɔ̄ o̍ chi̍ŋa̍ wɔ̄sīla̍ŋ lā ŋɔ᷄mpu᷅m o̍ lēmāsā wo̍.

¹⁶O̍ ko̍ŋ mi̍ wāŋnda̍ I̍sɔ̄lūɛ̄ī, wānāā sōlīāā lāsa̍lāa̍ ni̍, a̍ Li̍va̍īya̍, a̍ wānā o̍ wāna̍ fu̍la̍ o̍ bīyɔ̄ɔ̍ ni᷄ŋ, nda̍ kpo̍u̍ ma̍ māl chīɛ̍i̍ Mɛ̄lɛ̄ka̍a̍ ho̍ō Mɛ̄lɛ̄ka̍ o̍ bā a̍ kɔ̄l kɛ̄ndɛ̄ bɛ̄ndōo̍.

¹⁷Le̍ chīɛ̍i̍ Mɛ̄lɛ̄ka̍a̍ mālɔ̄ɔ̍ Mɛ̄lɛ̄ka̍ o̍ bā, mi̍ wāŋnda̍ yɔ̄ŋgū nāūwāā tōōyīa̍a̍ kɛ̄mɛ̄ (100), a̍ sāā ko̍ndu̍a̍a̍ kɛ̄mɔ̄ɔ̍ lē dīi̍ŋ (200), a̍ sāā fɔ̍ŋndu̍a̍a̍ kɛ̄mɔ̄ɔ̍ lē hīɔ̍ɔ̍lu̍ (400) le̍ sa̍lāla̍ŋ sōlīo̍o̍. O̍ ko̍ŋ kɔ̍ɔ̍lī, ma̍ yɔ̄ŋgū chūīŋnda̍ tɔ̍ a̍ ā ŋīɔ̍ɔ̍ŋ 12, le̍ sa̍lā yɔ̄ŋ wɔ̄ɔ̍ŋndo̍ sōlīo̍o̍ le̍ yu̍ŋgu̍la̍ tɔ̍ a̍ lā tīɔ̍ɔ̍ŋ nda̍ŋ I̍sɔ̄lūɛ̄ī, yu̍ŋgu̍ o̍ yu̍ŋgu̍ chūīŋndo̍ ō pīlɛ̍.

¹⁸O̍ ko̍ŋ kɔ̍ɔ̍lī, wānāā sōlīāā lāsa̍lāa̍ ni̍, a̍ Li̍va̍īya̍, ma̍ kɛ̄sī nda̍ kpɛ̍ kpɛ̍ o̍ fo̍ndāŋnda̍ŋ le̍ wa̍lta̍ ndāla̍ŋ tōsāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ Chūlu̍sɛ̄lɛ̄m, mɛ̄ɛ̍ i̍ cho̍ ī pōōnyīāā o̍ yāu̍ Mūu̍sē wo̍ ni᷄ŋ yɛ̍.

¹⁹O̍ ko̍ŋ kɔ̍ɔ̍lī, mi̍ wānāa̍ fu̍la̍ o̍ bīyɔ̄ɔ̍ ni᷄ŋ nda̍ ā tōsā bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̄ chōo̍ wo̍ o̍kɔ̄ɔ̄ o̍ pāa̍le̍ tɔ̍ a̍ lē hīɔ̍ɔ̍lu̍le̍ŋ chōo̍, o̍ pāŋgi̍i̍ tāse̍i̍ ni᷄ŋ.

²⁰Te̍le̍ŋ pa̍ bɛ̍ɛ̍ mī pāa̍le̍ŋ nde᷅ŋ lē fūūlūū, mi̍ wānāā sōlīāā lāsa̍lāa̍, a̍ Li̍va̍īya̍ kpo̍u̍ a̍ di̍ndī nda̍ Mɛ̄lɛ̄ka̍ o̍ hɔ̄l. Ma̍ lō o̍ ko̍ŋ ma̍ dīī chɔ̄lūa̍a̍ le̍ bɔ̄ŋa᷄ŋ lōōna᷄ŋndo̍ a̍ hīōūwɔ̄ɔ̄ chōo̍ wo̍ o̍kɔ̄ɔ̄, le̍ wānā o̍ wāna̍ chɛ̍ŋ o̍ bīyɔ̄ɔ̍ ni᷄ŋ, a̍ le̍ wānāa̍ sōlīāā lāsa̍lāa̍, a̍ le̍ nda̍ pi̍la̍ vɛ̄lɛ̄.

²¹Wānāa̍ de᷅ sa̍lāla̍ŋ nda᷄ŋ nda̍ wa̍ I̍sɔ̄lūɛ̍i̍ya̍ ni̍, a̍ fu̍la̍ o̍ bīyɔ̄ɔ̍ ni᷄ŋ nda̍, a̍ wāŋnda̍ ā pīli̍a̍a̍ kpo̍u̍, a̍ ma̍l ka̍ālā wānāa̍ si̍nā Mɛ̍lɛ̄ka̍ le̍ wa̍, hāli̍kpe̍ŋ mā sōōlu̍u̍ Mɛ̍lɛ̄ka̍ Ya̍a̍wɛ̄ɛ̄ wa̍, Mɛ̄lɛ̄ka̍ I̍sɔ̄lūɛ̍i̍ya̍.

²²Le̍ pālɛ̍i̍ ī ŋɔ᷄mmɛ̍ū, ā wa̍ o̍ bɔ̄ŋa᷅ŋ nda̍ dīā bēe̍dīi̍ nɔ̍ yi̍i̍sīi̍ le̍ni᷄ŋ te̍ wo̍ a̍ kɔ̄l kɛ̄ndɛ̄. Kāni̍ fu̍u̍le̍, māā Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ to̍sa̍ a̍ sa̍bū ni̍ mi̍ Māsāa̍ Āsi̍i̍līāā o̍ wa᷅ wāna̍ īkɛ̄ndɛ̄ nāa̍ nda̍ chūā, ndu̍yɛ̍ mbo̍ mālā nda̍ a̍ wa̍li̍ ta̍ŋgūlāā chīɛ̍i̍ Mɛ̄lɛ̄ka̍a̍, Mɛ̄lɛ̄ka̍ I̍sɔ̄lūɛ̍i̍ya̍.