Read Southern Kisi Ɛ̍si̍lūā 7 Bible Online

Ɛ̍si̍lūā 7 - Southern Kisi bible

Ɛ̍si̍lūā 7

¹O̍ ko̍ŋ kɔ̍ɔ̍lī, mɛ̄ɛ̍ wɔ̄sīlā fāŋgā lā hīōū, a̍ te̍le̍ŋ Āŋtāsa̍a̍sī ho̍ō Pa̍a̍sīāā o̍ wa̍ māsāa̍ wo̍, mi̍ Ɛ̍si̍lūā o̍ cha̍ŋ Ba̍bi̍lɔ̄ŋ mbo̍ kūā Chūlu̍sɛ̄lɛ̄m. Ɛ̍si̍lūā ka̍lāa̍ yɛ̄ pūlāle̍ o̍ fu̍la̍ chōo̍ le̍ŋ le̍ cho̍ le᷅ŋ ni̍, Ɛ̍si̍lūā fi̍nyā ndɔ̍ wa̍ Sɛ̄lu̍a̍i̍yā ni̍. Sɛ̄lu̍a̍i̍yā yɛ̍ fi̍nyā ndɔ̍ wa̍ Āsālu̍i̍yā ni̍. Āsālu̍i̍yā fi̍nyā ndɔ̍ wa̍ Hɛ̄līka̍yā ni̍.

²Hɛ̄līka̍yā fi̍nyā ndɔ̍ wa̍ Si̍a̍lūm ni̍. Si̍a̍lūm fi̍nyā ndɔ̍ wa̍ Sa̍dɔ̍kī ni̍. Sa̍dɔ̍kī fi̍nyā ndɔ̍ wa̍ Āhi̍tu̍bī ni̍.

³Āhi̍tu̍bī fi̍nyā ndɔ̍ wa̍ Āmālu̍i̍yā ni̍. Āmālu̍i̍yā fi̍nyā ndɔ̍ wa̍ Āsālu̍i̍yā ni̍. Āsālu̍i̍yā fi̍nyā ndɔ̍ wa̍ Mɛ̄lūāīyo̍tī ni̍.

⁴Mɛ̄lūāīyo̍tī fi̍nyā ndɔ̍ wa̍ Sɛ̄lūāhi̍yā ni̍. Sɛ̄lūāhi̍yā fi̍nyā ndɔ̍ wa̍ Yu̍sī ni̍. Yu̍sī fi̍nyā ndɔ̍ wa̍ Bu̍kī ni̍.

⁵Bu̍kī fi̍nyā ndɔ̍ wa̍ A̍bi̍sūā ni̍. Ābi̍sūā fi̍nyā wa̍ Fi̍ni̍ha̍a̍sī ni̍. Fi̍ni̍ha̍a̍sī fi̍nyā ndɔ̍ wa̍ Ɛ̄li̍a̍a̍sā ni̍. Ɛ̄li̍a̍a̍sā, fi̍nyā ndɔ̍ wa̍ E̍lɔ̄ŋ ni̍, o̍ wa̍ māsa̍ wānāa̍ sōlīāā lāsa̍lāa̍ wo̍.

⁶Ndu̍yɛ̍, mi̍ Ɛ̍si̍lūā wo̍ ho̍ō cha᷄ŋ Ba̍bi̍lɔ̄ŋ mbo̍ hūŋ Chūlu̍sɛ̄lɛ̄m, a̍ te̍le̍ŋ Āŋtāsa̍a̍sī wa̍ māsā Pa̍a̍sīāā wo̍. Ɛ̍si̍lūā, wāna̍ ndu̍ o̍o̍ si̍nā a̍ sāwāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō ke̍ Mūu̍sē la̍ŋ o̍kɔ̄ɔ̄ wo̍ o̍ wa̍ ni̍. Ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍, ō wa̍ ndu̍ kɔ̄ɔ̄lī. O̍ ko̍ŋ, mi̍ māsāa̍ kē Ɛ̍si̍lūā nyɛ̄ o̍ nyɛ̄ ndu̍ o̍o̍ ha̍u̍ bā le̍ ndu̍.

⁷Mɛ̄ɛ̍ o̍ wa̍ kɔ̄la̍ŋ Chūlu̍sɛ̄lɛ̄m, mbo̍ hūŋ a̍ wānāā ka̍ ka̍ kɔ̍ɔ̍lī, wānāā sōlīāā lāsa̍lāa̍, a̍ Li̍va̍īya̍, a̍ wānāā sōlīāā ŋ̄chōndu̍a̍a̍ chīɛ̍i̍ Mɛ̄lɛ̄ka̍a̍, a̍ wānāa̍ māndā di̍ō chīɛ̍i̍ Mɛ̄lɛ̄ka̍a̍ wa̍, a̍ wānāa̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ wa̍. Ndu̍yɛ̍ wɔ̄sī Māsā Bɛ̍ndōo̍ Āŋtāsa̍a̍sī o̍ chi̍ŋa̍ wɔ̄sīla̍ŋ lā ŋɔ᷄mmɛ̍ū o̍ lēmāsā Pa̍a̍sīāā wo̍ sūɛ̍i̍ he̍ī ī yɔ̄nu̍ŋ ni̍.

⁸Ma̍ māl Ba̍bi̍lɔ̄ŋ o̍ pāa̍le̍ tāse̍le̍ŋ chōo̍ o̍ pāŋgi̍i̍ tāse̍i̍ ni᷄ŋ. Mi̍ Mɛ̄lɛ̄ka̍ yōōlā nda̍, ma̍ fūūlūū Chūlu̍sɛ̄lɛ̄m o̍ pāa̍le̍ tāse̍le̍ŋ chōo̍ o̍ pāŋgi̍i̍ ŋūɛ̍ɛ̍nu̍e̍i̍ ni᷄ŋ.

¹⁰Ndu̍yɛ̍, Ɛ̍si̍lūā ho̍ō ō wa᷄ ō yɔ̍ŋga᷄ŋ o̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ pɛ̄ɛ̄kōo̍ ni᷄ŋ, ndu̍yɛ̍ a̍ nyɛ̄ la̍ di̍mi̍ wo̍ tōsāa̍. Mbo̍ pɛ̄ɛ̄ku̍ wāŋnda̍ I̍sɔ̄lūɛ̄ī sāwāla̍ Mɛ̄lɛ̄ka̍la̍ŋ, a̍ sāwāla̍ yɔ̍ŋāāla̍ŋ.

¹¹Wānā so̍līāā lāsa̍lāa̍ Ɛ̍si̍lūā wa̍ ni̍. Mbo̍ wa̍ vɛ̄lɛ̄ wāna̍ si̍nā sa̍wāla̍ Mɛ̄lɛ̄ka̍la̍ŋ, a̍ sɔ̄ɔ̍ŋ Mɛ̄lɛ̄ka̍ Ya̍a̍wɛ̄ɛ̄ di̍mūl wa᷅ŋnda̍ I̍sɔ̄lūɛ̄ī le̍ tōsāa̍ wo̍ŋ ndo̍. Mɛ̄ɛ̍ Ɛ̍si̍lūā chɛ̍ŋ le̍ kɔ̄la̍ŋ Chūlu̍sɛ̄lɛ̄m, mi̍ Māsāa̍ Āŋtāsa̍a̍sī po̍o̍nyīāā yāu̍wo̍ ho̍ō āā,

¹²“Ya̍ Māsāa̍ Āŋtāsa̍a̍sī ho̍ō Pa̍a̍sīāā, Māsa̍ hi̍o̍ū Māsāa̍ kpo̍u̍ wo̍, ya̍ cho̍ yāu̍wo̍ ho̍ō pōōnyīa̍a̍ nāa̍ nūm Ɛ̍si̍lūā chu̍a̍ ni̍, wāna̍ so̍līāā lāsa̍lāa̍, mbo̍ wā vɛ̄lɛ̄ wāna̍ si̍nā sa̍wāla̍ Mɛ̄lɛ̄ka̍ ho̍ō chōo̍ cho̍o̍ wo̍ wo̍.

¹³Māā wānā o̍ wāna̍ cho̍ I̍sɔ̄lūɛ̍i̍nɔ̍ mbo̍ wā īchāli̍ ba᷅ o̍ bā fe̍e̍ o̍ lɛ̄ŋndē nīle̍ŋ ni᷄ŋ, wānāa̍ sōlīāā lāsa̍lāa̍ ni̍, Li̍va̍īya̍ ni̍, wānā o̍ wāna̍ ye̍e̍ma̍ le̍ mī lā kūɛ̄ nya̍ ndu̍ Chūlu̍sɛ̄lɛ̄m pɛ̍, wānā ko̍ŋ nɔ̍ di̍o̍o̍ mī lā kūɛ̄ la̍tu̍lu̍.

¹⁴Ya̍ ni̍, wānāā nīāā si̍lāā ŋɔ᷄mmɛ̍ūwa̍ ni̍, ŋ̄ chɛ᷄l le̍ mī lā kūɛ̄ Chūlu̍sɛ̄lɛ̄m a̍ Chu̍dā, mī lā kɔ̍ ya̍a̍sīāā fɛ̍sɛ̄ fɛ̍sɛ̄, tē wāŋnda̍ chō sāwāla̍ Mɛ̄lɛ̄ka̍la̍ŋ chūa̍a̍, la̍ cho̍ nu̍m lā kēna᷄ŋ ma̍ wā la̍ŋ hɔ̄lte̍ŋ nda̍ŋ.

¹⁵Tē a̍ wa̍ kɔ̄la̍ŋ pɛ̍, ā kūɛ̄ a̍ ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ, ŋ̄ ya̍ ma̍sā bɛ̍ndōo̍, a̍ wānāā nīāā si̍lāa̍ ke̍ Mɛ̄lɛ̄ka̍ I̍sɔ̄lūɛ̍i̍ya̍ a̍ kɔ̄ltā nāāla̍ŋ kpo̍u̍ wo̍ŋ, Mɛ̄lɛ̄ka̍ chīɛ̄ī ndɔ̄ɔ̍ chō ho̍ō Chūlu̍sɛ̄lɛ̄m ndo̍.

¹⁶O̍ ko̍ŋ kɔ̍ɔ̍lī, ā nɔ̄ mā kūā a̍ ka̍ni̍ŋ hu̍mbūŋ, a̍ ko̍o̍līi̍ŋ ŋ̄ chō sɔ̄lā bā o̍ bā fe̍e̍ Ba̍bi̍lɔ̄ŋ ndo̍ŋ, mā kūɛ̄ a̍ mu̍ŋ. Mā chu̍a̍ vɛ̄lɛ̄ kēlā wāŋnda̍ I̍sɔ̄lūɛ̄ī, a̍ kēlā wānāā sōlīāā lāsa̍lāa̍ a̍ yɔ̍ŋgu̍ a̍ kɔ̄ltā chɛ̄lāā la̍ŋ, le̍ chīɛ̍i̍ Mɛ̄lɛ̄ka̍ ndāa̍, o̍ cho̍ Chūlu̍sɛ̄lɛ̄m ndo̍.

¹⁷So̍li̍ŋ kpe̍ku̍ a̍ nyɛ̄ sɔ̄lāā kōŋ nyɛ̄ kɛ̄ndɛ̄ kɛ̄ndɛ̍ī. Mā pēndū nāūwāā tōōyīa̍a̍, a̍ sāā ko̍ndu̍a̍a̍, a̍ sāā fɔ̍ŋndu̍a̍a̍, a̍ kōlo̍ tɔ̄lɔ̄ɔ̄ ku̍llo̍, a̍ mūɛ̄īmā kīle̍pīi̍ya̍ŋ, o̍ ko̍ŋ kɔ̍ɔ̍lī, mā so̍li̍ mu̍ŋ sa̍lāa̍ o̍ ma̍āŋ cho̍ o̍ chīɛ̍i̍ Mɛ̄lɛ̄ka̍a̍ Chūlu̍sɛ̄lɛ̄m ndo̍ chōo̍.

¹⁸Ndu̍yɛ̍ ka̍ni̍ŋ hu̍mbo᷄ŋ, a̍ ko̍o̍līi̍ŋ cho̍ lō wo̍ŋ, nūm ni̍, wānāā nūmnda̍ ni̍, nyɛ̄ o̍ nyɛ̄ nya̍ hɛ̄nāŋ pɛ̍ le̍ tōsāa̍ a̍ mu̍ŋ, lā tōsa̍, mɛ̄ɛ̍ Mɛ̄lɛ̄ka̍ nyāa̍ ō hɛ̄na̍ŋ yɛ̍.

¹⁹Nyɛ̄m lāāndu᷄ŋ cho̍ nu̍m ŋ̄ yɔ̄ŋga᷄ŋ le̍ kpe̍ku̍la̍ŋ o̍ chīɛ̍i̍ Mɛ̄lɛ̄ka̍ nyāa̍ ni᷄ŋ ndo̍ŋ, ā nɔ̄ mā kɔ̍ yɔ̍ŋgū mu̍ŋ nāa̍ Mɛ̄lɛ̄ka̍ chūā Chūlu̍sɛ̄lɛ̄m.

²⁰Ndu̍yɛ̍ tē a̍ ye̍e̍ma̍ nyɛ̄ o̍ nyɛ̄ chēle̍ŋ le̍ chīɛ̍i̍ Mɛ̄lɛ̄ka̍a̍ pɛ̍, ā nɔ̄lā mā sɔ̍la̍ ndu̍ o̍ ka̍ni̍ŋ lēmāsa᷄ŋ ni᷄ŋ.

²¹Ndu̍yɛ̍ nya̍ cho̍ wānāa̍ cho̍ chīɛ̄īlā ŋ̄ka̍ni̍la̍ŋ bōlle̍ o̍ būŋgɛ̄i̍ bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍ wa̍, I̍ cho̍ nyɛ̍ dīmūllo̍ māā nyɛ̄ o̍ nyɛ̄ Ɛ̍si̍lūā o̍ cho̍ wānā so̍līāā lāsa̍lāa̍, mbo̍ si̍nā vɛ̄lɛ̄ a̍ sāwāla̍ Mɛ̄lɛ̄ka̍ o̍ cho̍ chōo̍ cho̍o̍ wo̍ wo̍, ō nyu̍na̍ nya̍ le̍ ndu̍ pɛ̍, lā ke̍ ndu̍. Ndu̍yɛ̍ lā ke̍ ndu̍ a̍ dīāllūŋ fūlāā.

²²Ndu̍yɛ̍, lā wa̍ ndu̍ kīo̍o̍ pɛ̍, mɛ̄ɛ̍ le̍ ka̍ni̍ŋ hu̍mbo᷄ŋ pa᷅ŋnda̍ŋ wāa̍la̍ŋ lā ŋɔ᷄mmɛ̍ū, a̍ kɛ̄mɔ̄ɔ̍ lē ŋūɛ̍ɛ̍nu̍ (7,500), a̍ wi̍tīi̍yo̍ŋ bu̍sɛ̄la̍ŋ kɛ̄mɔ̄ɔ̍ lē ŋūɛ̍ɛ̍nu̍ (500), a̍ mūɛ̄īmā kīle̍pīi̍ya̍ŋ ka̍lɔ̄ŋnda̍ŋ kɛ̄mɔ̄ɔ̍ lē ŋūɛ̍ɛ̍nu̍, a̍ be̍le̍-ŋu̍ɛ̍ɛ̍nu̍ (550) a̍ chūɛ̄īmā ɔ̄li̍fīi̍ya̍ŋ ka̍lɔ̄ŋnda̍ŋ kɛ̄mɔ̄ɔ̍ lē ŋūɛ̍ɛ̍nu̍, a̍ be̍le̍-ŋu̍ɛ̍ɛ̍nu̍ (550), a̍ hɛ᷄lle̍ mɛ̄ɛ̍ kpɛ̍ o̍ yēēmā yɛ̍.

²³Ndu̍yɛ̍, lā nɔ̄ mī lā ma̍nda̍ŋ ā nyɛ̄ o̍ nyɛ̄ Mɛ̄lɛ̄ka̍ ho̍ō chōo̍ cho̍o̍ o̍ ye̍e̍ma̍ le̍ wa̍li̍ chīɛ̄ī ndɔ̄ɔ̍, yɔ̄ŋi̍ o̍ tu̍u̍lu̍ kɔ̍l a̍ ya̍, vɛ̄lɛ̄ a̍ māsāa̍ cho̍ hūnɔ̄ɔ̄ ya̍ kɔ̄ɔ̄lī wa̍.

²⁴Wānāā sōlīāā lāsa̍lāa̍ ni̍, a̍ Li̍va̍īya̍, a̍ wānāā ŋ̄chōndu̍a̍a̍, a̍ wānāa̍ ma̍ndā di̍ōlā chīɛ̍i̍ Mɛ̄lɛ̄ka̍a̍ wa̍, a̍ wānāa̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ wa̍, ndu̍yɛ̍, a̍ wānā o̍ wānā che̍le̍ŋ to̍sa̍ wa̍llo̍ o̍ chīɛ̍i̍ Mɛ̄lɛ̄ka̍a̍, wānā o̍ wānā o̍ nɔ̍ mbō bīī nda̍ pāāwā o̍ pāāwā o̍ bā le̍.

²⁵Ɛ̍si̍lūā, so̍li̍ kpe̍ko̍o̍ a̍ tāāsi̍ Mɛ̄lɛ̄ka̍ ke᷄ nu̍m ndo̍, mā hɛ̍li̍ wānāā bɛ̄ndūa̍a̍, a̍ chɔ̍ɔ̍chi̍a̍a̍, mā wa̍ wāŋnda̍ chīla̍ŋ o̍ būŋgɛ̄i̍ bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍. Ndu̍yɛ̍, wānāā bɛ̄ndūa̍a̍ a̍ chɔ̍ɔ̍chi̍a̍a̍ ŋ̄ chō ha̍ā hɛ̄lī wa̍, ā nɔ̄ mā sīna̍ sāwāla̍ Mɛ̄lɛ̄ka̍ nu̍m ndo̍. Ndu̍yɛ̍ nūm Ɛ̍si̍lūā, ā nɔ̄ māā pɛ̄ɛ̄ku̍ wānāa̍ si̍nā sa̍wāla̍ Mɛ̄lɛ̄ka̍ la̍ŋ te̍ wa̍.

²⁶Tē wānā o̍ wānā kɛ̍ɛ̍ le̍ sāwa̍ Mɛ̄lɛ̄ka̍ nyāa̍, a̍ sāwa̍ Māsā Bɛ̍ndōo̍ chūa̍a̍ pɛ̍, wānā ko̍ŋ ā nɔ̄ le̍ ndu̍ nyɛ̄ pālāa̍ tūsīo̍o̍ chōo̍ chɔ̍ chɔ̍. Wānā wa̍ā le̍nde̍ tē ō sɔ̄la̍ pi̍ɔ̍mndo̍ le̍, ā wōu̍ ndu̍ o̍ chīɛ̄ī mānyūmndo̍ ni᷄ŋ. Tē ō cho̍ ko̍ŋ te̍, ā to̍ū ndu̍ mbō ma᷄l lɛ̄ŋnde̍ŋ, ɔ̄ɔ̄ ā pōōnda̍ ndu̍ nyɛ̄ o̍ nyɛ̄ o̍ nɔ̍ o̍ bā.”

²⁷O̍ ko̍ŋ kɔ̍ɔ̍lī, mi̍ Ɛ̍si̍lūā sa̍ŋgālā Mɛ̄lɛ̄ka̍ Ya̍a̍wɛ̄ɛ̄ āā, “Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nāā ma̍māa̍. Ō tōsa̍ mi̍ māsāa̍ Ātāsɛ̍sɛ̄ ke᷅ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ o̍ cho̍ ho̍ō Chūlu̍sɛ̄lɛ̄m ndo̍ bɛ̄ɛ̄le̍ŋ.

²⁸Kɛ̄ndɛ̄i̍ Mɛ̄lɛ̄kɛ̍i̍ ī tōsa̍ mi̍ Māsāa̍, a̍ wānāā ndūāā si̍lāa̍, a̍ wānāā ndūāā wa̍li̍a̍a̍ kpāāyā bɛ̍ndūa̍a̍ ā chā ya̍ nyīnā. Mɛ̄lɛ̄ka̍ Ya̍a̍wɛ̄ɛ̄ ma̍la̍ ya̍, mi̍ lo᷅ o̍ ko̍ŋ mi̍ sɔ̍lā kɔ̄l sīmūlāa̍, mi̍ dɛ̍ɛ̍nīāā wāŋ bɛ̄ndūāā Chu̍ūwa̍ ā ka̍ ka̍, mi̍ ŋ̄ mīīŋgū na̍a̍ nda̍ā Chūlu̍sɛ̄lɛ̄m.”