Read Southern Kisi Ɛ̍si̍lūā 8 Bible Online

Ɛ̍si̍lūā 8 - Southern Kisi bible

Ɛ̍si̍lūā 8

¹Wānāa̍ fu̍la̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ ma̍ wā bōlīī lāyu̍ŋgu̍e̍i̍, mi̍ ŋ̄ mīīŋgū Chūlu̍sɛ̄lɛ̄m lātūlu̍ na̍a̍ nda̍ā, bōōndi̍i̍ Āŋtāsa̍a̍sī wa̍ māsā bɛ̍ndōo̍ ve̍ wa̍, nda̍ cho̍ ha̍ā ni̍.

²Kɛ̍sīɔ̄m, fūlāa̍ o̍ yu̍ŋgu̍ Fi̍ni̍ha̍a̍sī wo̍ chōo̍, a̍ Da̍a̍ni̍ɛ̍ɛ̄, fūlāa̍ o̍ yu̍ŋgu̍ I̍ta̍māā wo̍ chōo̍, a̍ Hātūsi̍hī, po̍ Sīɛ̄kāni̍yā wo̍, fūlāa̍ o̍ yu̍ŋgu̍ Dēēvi̍o̍o̍ chōo̍, a̍ Sɛ̄kāla̍yā nda̍ pūa̍a̍ che᷅le̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150), fūlāa̍ o̍ yu̍ŋgu̍ Pālo̍sī wo̍ chōo̍, nda̍ a̍a̍ nɔ̍ yāu̍ nda̍ yu̍ŋgo̍o̍ ō dīōlā ndāla̍ŋ lā wa̍ lā pōōnyīāā lēni᷄ŋ ndo̍, a̍ Ɛ̄līho̍nāī, po̍ Sɛ̄kāla̍yā wo̍, nda̍ pūa̍a̍ kɛ̄mɔ̄ɔ̍ lē dīi̍ŋ (200), fūlāa̍ o̍ yu̍ŋgu̍ Pāhāā Mo̍wa̍bī wo̍ chōo̍, a̍ Sīɛ̄kāna̍yā, po̍ Cha̍ha̍sīɛ̄ɛ̄ wo̍, nda̍ pūa̍a̍ kɛ̄mɔ̄ɔ̍ lē yāa̍ (300), fūlāa̍ o̍ yu̍ŋgu̍ Sa̍tū wo̍ chōo̍, a̍ Ɛ̍bɛ̍dī, po̍ Chōna̍ta᷅ŋndo̍, nda̍ pūa̍a̍ be̍le̍-ŋu̍ɛ̍ɛ̍nu̍ 50, fūlāa̍ o̍ yu̍ŋgu̍ Ādīŋndo̍ chōo̍, a̍ Chɛ̄si̍a̍yā, po̍ Ātāla̍yā wo̍, nda̍ pūa̍a̍ be̍le̍-ŋɔ̍mmɛ̍ū 70, fūlāa̍ o̍ yu̍ŋgu̍ Ɛ̍lāmndo̍ chōo̍, a̍ Sɛ̄bāda̍yā, po̍ Ma̍i̍kɛ̄l wo̍, nda̍ pūa̍a̍ be̍le̍-ŋɔ̍ma̍a̍ 80, fūlāa̍ o̍ yu̍ŋ(...)

¹⁵O̍ ko̍ŋ kɔ̍ɔ̍lī, mi̍ I̍ hu᷅ŋ a̍ wānā o̍ wānā na̍a̍ pi᷅lɛ̍, nāa̍ pīo̍o̍ chō hīōūwɔ̄ɔ̍ Āha̍wā chi̍e̍e̍ wa̍, mi̍ ŋ̄ kīla̍ dɔ̍ɔ̍ŋgɔ̍ɔ̍ lo̍ŋ le̍ pālɛ̍i̍ ī yāa̍. Mi̍ I̍ lō o̍ ko̍ŋ mi̍ tōfā o̍ fāŋgāa̍ ho̍ō tɛ̄ɛ̄ŋ, kɛ̍ Li̍va̍īnɔ̄ bɛ̍ɛ̍ I̍ sēēlu̍ŋ te̍, mɛ̄ɛ̍ wānāā yɔ̄ŋāa̍, a̍ wānāā sōlīāā lāsa̍lāa̍.

¹⁶O̍ ko̍ŋ, mi̍ I̍ yo̍o̍ŋgū wāŋ bɛ̄ndūa̍a̍ ha̍ā. Nda̍ yɔ̍nūŋ ni̍ māā, Ɛ̄li̍a̍a̍sā, a̍ A̍lu̍i̍yā, a̍ Sīɛ̄ma̍yā, a̍ Ɛ̄līna̍tāŋ, a̍ Cha̍lu̍i̍bī, a̍ Ɛ̄līna̍tāŋ, a̍ Na̍tāŋ, a̍ Sɛ̄kāla̍yā, a̍ Mɛ̄sīhu̍lām. Mɛ̄ɛ̍ ke̍ŋ i̍ hi̍o̍u̍, mi̍ yo̍o̍ŋgū vɛ̄lɛ̄ pūa̍a̍ tāāsi̍a̍a̍ bɛ̄ndūāā ŋīɔ̍ɔ̍ŋnda̍ ha̍ā. Nda̍ yɔ̍nūŋ ni̍ māā Chōwa̍lu̍i̍bī nda̍ Ɛ̄līna̍tāŋ.

¹⁷O̍ ko̍ŋ kɔ̍ɔ̍lī, mi̍ vi̍ām nda̍ nāa̍ I̍dɔ̄ɔ̄ chu̍a̍, wāna̍ wa̍ Kāsi̍fīāā chi̍e̍e̍ bōlle̍ŋ ndo̍. Mi̍ I̍ di̍mūl nda̍ le̍ mā dīmu̍l ndu̍ nda̍ wānāā ndūa̍a̍ to̍sā wa̍llo̍ o̍ chīɛ̄ī Mɛ̄lɛ̄ka̍a̍ ni᷄ŋ nda̍, mā yɔ̄ŋgu̍ na̍a̍ pūa̍a̍ le̍ wa̍llo̍ tōsāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ.

¹⁸O̍ ko̍ŋ, mi̍ Mɛ̄lɛ̄ka̍ yōōlā na̍a̍, ma̍ yɔ̄ŋgū na̍a̍ wāna̍ sīna̍ wa̍llo̍ sīnā bɛ̄ndōo̍ wo̍ dīōla̍ŋ āā Sīɛ̄lūɛ̄bi̍yā. Li̍va̍īnɔ̍ɔ̍ lāŋu̍nɔ̄ɔ̍ ho̍ō ō wa̍ ni̍, fūlāa̍ o̍ yu̍ŋgu̍ Māhi̍lī wo̍ chōo̍. Mɛ̄ɛ̍ o̍ wa̍ hūnɔ̄ɔ̍, mbo̍ hūŋ a̍ pūa̍a̍ ndūāā vi̍a̍lāa̍ kɔ̄ɔ̄lī, lātu̍lu̍ a̍ wānāya᷅ŋ ndɔ̄ɔ̍ŋ, ā wa̍ tɔ̍ a̍ ā ŋɔ̄ma̍a̍ 18.

¹⁹Ō fūla̍ o̍ ha̍ā kɔ̍ɔ̍lī, ma̍ yɔ̄ŋgu̍ na̍a̍ vɛ̄lɛ̄ Hāsīābi̍yīā nda̍ Chɛ̄si̍a̍yā, fūlāa̍ o̍ yu̍ŋgu̍ Mɛ̄lu̍a̍lī wo̍ chōo̍. Nda̍ bɛ̍ɛ̍ mɛ̄ɛ̍ nda̍ wa̍ hūnɔ̄ɔ̍, ma̍ hūŋ a̍ pūa̍a̍ ndāā vi̍a̍lāa̍, a̍ wānāya᷅ŋ nda᷄ŋ kɔ̄ɔ̄lī ŋ̄wāŋ bi̍dīi̍ŋ 20.

²⁰O̍ ko̍ŋ kɔ̍ɔ̍lī, mi̍ wānāa̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ ā hūŋ vɛ̄lɛ̄ kɛ̄mɔ̄ɔ̍ lē dīi̍ŋ a̍ bi̍dīi̍ŋ (220). Pūa̍a̍ ha̍ā yɛ̍ fi̍nyāā ndāā ma̍māa̍, Māsāa̍ Dēēve̍ nda̍ wānāā ndūa̍a̍ wa̍lla̍ hɛ̄li̍ nda̍ lɔ̍ɔ̍ ko̍ŋ ni̍, le̍ Li̍va̍īya̍ mālāa̍. Mɛ̄ɛ̍ nda̍ hɛ̄li̍ nda̍, ma̍ chūā nda̍ dīōla̍ŋ a̍ pīlɛ̍ŋ pi̍lɛ̍ŋnda̍ kpo̍u̍.

²¹O̍ ko̍ŋ kɔ̍ɔ̍lī, mɛ̄ɛ̍ na̍a̍ ŋ̄ wa̍ o̍ Pīo̍o̍ Āha̍wā kɔ̍ŋgɔ̍, mi̍ I̍ di̍mūl wāŋnda̍ I̍sɔ̄lūɛ̄ī le̍ Mɛ̄lɛ̄ka̍ pīɛ̄īyo̍ a̍ su᷅mndo̍ bīyɔ̄ɔ̍. O̍ ko̍ŋ, mī ŋ̄ tūsi̍ŋ ndu̍ Mɛ̍lɛ̄ka̍ o̍ lābɛ̄ŋgu̍ ni̍ŋ le̍ hāli̍kpe̍ŋ mbō hīŋ a̍ na̍a̍ Chūlu̍sɛ̄lɛ̄m yɛ̍lɛ̍kɛ̍lɛ̍ɛ̍, a̍ chūāūwāā nāa̍, ndu̍yɛ̍ a̍ nyɛ̄m nāa̍ŋ kpo̍u̍.

²²Si̍ɔ̍mbu̍la̍ŋ lā wa̍ ya̍ le̍ ma̍sāa̍ nyūnāa̍ le̍ mbō ke̍ na̍a̍ su̍a̍a̍, a̍ pūa̍a̍ sɔ̍ŋgā o̍ su̍a̍a̍ chōo̍ wa̍, le̍ na̍a̍ māndāa̍ ya̍a̍mɔ̍ɔ̍wa̍a̍ nāa̍ o̍ bā o̍ hūnɔ̄ɔ̍ ni᷄ŋ. Kāni̍ fu̍u̍le̍, ŋ̄ dīmu̍l ndu̍ ni᷅ŋ pāāndū māā Mɛ̄lɛ̄ka̍ nāa̍ ō nɔ̄lā mbō mānda̍ wānā o̍ wāna̍ dɔ̍ū tīīnda᷄ŋndo̍ o̍ ndu̍ ni̍ŋ. Kɛ̍ ndu̍yɛ̍ vɛ̍lɛ̄, ō tūūlū kɔ̍l a̍ wānā o̍ wāna̍ kɛ̍ɛ̍ ndu̍ dīōm pɛ̍.

²³O̍ ko̍ŋ kɔ̍ɔ̍lī, mi̍ ŋ̄ bīī su᷅mndo̍, mi̍ ŋ̄ pīɛ̄ī Mɛ̄lɛ̄ka̍ le̍ na̍a̍ māndāa̍ o̍ hūnɔ̄ɔ̄ nāa̍ ni᷄ŋ. Ndu̍yɛ̍, mbō mūlī pīɛ̄īlē nāāle̍ŋ.

²⁴O̍ ko̍ŋ kɔ̍ɔ̍lī, mi̍ hɛ̍lī bōlīī wānāā sōlīāā lāsa̍lāa̍ ŋ̄wāŋ tɔ̍ a̍ wānāā ŋīɔ̍ɔ̍ŋ, Sīɛ̄lu̍ɛ̍bīāā nda̍ Hāsīābi̍yā. Lātūlu̍ a̍ wānāya᷅ŋ ndāa̍ŋ, pūa̍a̍ ŋ̄wāŋ tɔ̍.

²⁵Ndu̍yɛ̍ kēlā māsā bɛ̍ndōo̍, a̍ wānāā ndūāā si̍lāa̍, a̍ wānāā ndūa̍a̍ wa̍lla̍, ndu̍yɛ̍ a̍ wāŋnda̍ I̍sɔ̄lūɛ̄ī a̍ yɔ̍ŋgu̍ le̍ kpe̍ku̍ chīɛ̍i̍ Mɛ̄lɛ̄ka̍a̍ la̍ŋ, mi̍ ha̍ndū la̍ŋ o̍ sēke̍lēi̍yo̍ chōo̍ le̍ lūsu̍l ndɔ̄ɔ̍ sīnāa̍. O̍ ko̍ŋ, mi̍ chu̍ā la̍ŋ mi̍ I̍ ke᷅ wānāā sōlīāā lāsa̍lāa̍.

²⁶Ndu̍yɛ̍ nyɛ̄m ya̍ I̍ ke᷅nda̍ mu᷅ŋ ndo̍ŋ, mu̍ŋ cho̍ mu᷅ŋ ni̍. Ka̍ni̍ŋ hu̍mbo᷄ŋ pa᷅ŋnda̍ŋ wāa̍la̍ŋ be̍le̍-ŋu̍ɛ̍ɛ̍nu̍, a̍ lā ŋɔ᷄mpu᷅m (56,000), nyɛ̄m nda̍ tōōsi̍a̍a̍ a̍ ka̍ni̍i̍ hu̍mbūe̍i̍ yo̍ŋ, ŋ̄ wā kɛ̄mɛ̄, lūsu̍l ndɔ̄ɔ̍ pa᷅ŋnda̍ŋ wāa̍la̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150), a̍ ko̍o̍līi̍yo̍ŋ, ŋ̄ wa̍ lūsu̍llo̍ pa᷅ŋnda̍ŋ wāa̍la̍ŋ lā ŋɔ᷄mmɛ̍ū, a̍ kɛ̄mɔ̄ɔ̍ lē ŋūɛ̍ɛ̍nu̍ (7,500), a̍ hɛ̄ŋgɛ̍i̍la̍ nda̍ tōōsi̍a̍a̍ a̍ ko̍o̍līi̍ye̍ la̍ŋ, bi̍dīi̍ŋ 20, lūsu̍l ndɔ̄ɔ̍, pa᷅ŋnda̍ŋ tɔ̍ a̍ lā ŋɔ᷄mmɛ̍ū 17 a̍ hɛ̄ŋgɛ̍i̍la̍ nda̍ tōōsi̍a̍a̍ a̍ Būlɔ᷄ŋsīi̍ kɛ̍ndɛ̄ kɛ̍ndɛ̄i̍ la̍ŋ lā tīɔ̍ɔ̍ŋ. Hɛ̄ŋgɛ̍i̍la̍ŋ nda᷅ŋ, ba̍ā ndɔ̄ɔ̍ a̍ ba̍ā īko̍o̍līi̍yo̍ nyɛ̄ pīlɛ̍ kpe̍ o̍ cho̍ ni̍.

²⁸O̍ ko̍ŋ kɔ̍ɔ̍lī, mi̍ ya̍ Ɛ̍si̍lūā su̍a̍ā nāa̍ wāŋnda̍ chūā, mi̍ di̍mūl nda̍ a̍a̍, “Mɛ̄ɛ̍ nya̍ chō ā yɔ̄ŋga᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, Mɛ̄lɛ̄ka̍ fi̍nyāā nyāā ma̍māa̍ yɛ̍, le̍nde̍ ko̍ni̍ nyɛ̄m lāāndo᷄ŋ mu᷅ŋ ŋ̄ chō ŋ̄ yɔ̄ŋga᷄ŋ o̍ ndu̍ lo̍ ni̍. Ndu̍yɛ̍, a̍ ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ mu᷅ŋ, a̍ kɔ̄ltā chɛ̄lāāla̍ŋ wāŋnda̍ yɔ̄ŋgu̍ mu̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ ni̍.

²⁹Le̍la̍ŋ, lā chāa̍ mu̍ŋ bīyɔ̄ɔ̄ nyɛ̄ kɛ̄ndɛ̄ kɛ̍ndɛ̄, ŋ̄ yɔ̍nūŋ nyɛ̍ o̍ nyɛ̄ le̍ ha̍a̍a̍, mī fūūlu̍u̍ o̍ chīɛ̄ī Mɛ̄lɛ̄ka̍a̍ ni᷄ŋ Chūlu̍sɛ̄lɛ̄m. Tē lā fūūlu̍u̍ pɛ̍, lā hāndu̍ mu̍ŋ o̍ sēke̍lēi̍yo̍ chōo̍, o̍ lu̍mūi̍ wānāa̍ sōlīāā lāsa̍lāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Ndu̍yɛ̍ māsāa̍ wānāā sōlīāā lāsa̍lāa̍ ni̍, a̍ Li̍va̍īya̍, a̍ bōlīī lāyu̍ŋgu̍e̍i̍ I̍sɔ̄lūɛ̍i̍, nda̍ o̍ hɔ̄l nya̍ tūu̍ mu̍ŋ ni̍.

³⁰O̍ ko̍ŋ kɔ̍ɔ̍lī, mɛ̄ɛ̍ nda̍ chīi̍ nyɔ̄ɔ̍ŋ mu᷅ŋ tūū kpo̍u̍, mi̍ wānāā sōlīāā lāsa̍lāa̍ a̍ Li̍va̍īya̍ ā bīī mu̍ŋ kpo̍u̍, ka̍ni̍ŋ hu̍mbo᷄ŋ ni̍, ko̍o̍līi̍yo̍ŋ ni̍, a̍ nyɛ̄m lāāndo᷄ŋ, le̍ kɔ̄la̍ŋ a̍ mu̍ŋ Chūlu̍sɛ̄lɛ̄m o̍ chīɛ̍i̍ Mɛ̄lɛ̄ka̍ nāa̍ ni᷄ŋ.”

³¹O̍ ko̍ŋ kɔ̍ɔ̍lī, o̍ pāa̍le̍ tɔ̍ a̍ lēdīi̍ŋ ndɔ̄ le̍ŋ chōo̍, o̍ pāŋgi̍i̍ tāse̍i̍ ni᷄ŋ nāa̍ ŋ̄ ma᷄l o̍ Pīo̍o̍ Āha̍wā le̍ kɔ̄la̍ŋ Chūlu̍sɛ̄lɛ̄m ni̍. Ndu̍yɛ̍, ba̍ Mɛ̄lɛ̄ka̍ ō wa̍ na̍a̍ chōo̍, mbo̍ māndā na̍a̍ ya̍a̍mɔ̍ɔ̍wa̍ o̍ bā o̍ kɔ̄lā nāāla̍ŋ ni᷄ŋ. Wānā vi̍ŋnu̍ŋ yo̍ndō ni᷄ŋ na̍a̍ lāchī le̍ na̍a̍ dēlɔ̄ɔ̄ chōo̍ le̍.

³²Mbo̍ lō o̍ ko̍ŋ mi̍ ŋ̄ fūūlūū Chūlu̍sɛ̄lɛ̄m. Mɛ̄ɛ̍ na̍a̍ ŋ̄ fūūlu̍u̍, mi̍ ŋ̄ pɛ̄ŋgī le̍ pālɛ̍i̍ ī yāa̍.

³³O̍ ko̍ŋ kɔ̍ɔ̍lī, o̍ pāa̍le̍ hi̍ɔ̍ɔ̍lu̍le̍ŋ chōo̍, mi̍ ŋ̄ kūā o̍ chīɛ̍i̍ Mɛ̄lɛ̄ka̍a̍ ni᷄ŋ, mi̍ ŋ̄ kōmāl Mɛ̍lɛ̍mō wānā so̍līāā lāsa̍lāa̍, po̍ Yūla̍yā wo̍ nda̍ Ɛ̄li̍a̍a̍sā po̍ Fi̍ni̍ha̍a̍sī wo̍, lātūlu̍ a̍ Li̍va̍īya̍ ā ŋīɔ̍ɔ̍ŋ, nda̍ yɔ̍nūŋ ni̍ māā, Chōsa̍ba̍dī, po̍ Chɛ̍sūāā wo̍, nda̍ Nōwāda̍yāā, po̍ Bi̍nūī yo̍. Ndu̍yɛ̍ mɛ̄ɛ̍ na̍a̍ ŋ̄ kōma̍l nda̍, mi̍ ŋ̄ tūū ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ, a̍ nyɛ̄m lāāndo᷄ŋ ŋ̄ pīlɔ̍ŋ nda̍ o̍ hɔ̄l lo̍ŋ, mi̍ ŋ̄ kē nda̍.

³⁴Mɛ̄ɛ̍ na̍a̍ ŋ̄ chɔ᷄m nyɔ̄ɔ̍ŋ mu᷅ŋ, mi̍ ŋ̄ tūū mu̍ŋ o̍ sēke̍lēi̍yo̍ chōo̍, mi̍ ŋ̄ pōōnyīāā mu̍ŋ o̍ yāu̍ ni̍ŋ.

³⁵O̍ ko̍ŋ kɔ̍ɔ̍lī, wānāa̍ fu̍la̍ o̍ bīyɔ̄ɔ̍ ni᷄ŋ nda̍ ki̍nɛ̍i̍, ma̍ so̍lī sa̍lālā lūāmāā la̍ŋ nāa̍ Mɛ̄lɛ̄ka̍ I̍sɔ̄lūɛ̍i̍ya̍ chūā. Ma̍ lō o̍ ko̍ŋ ma̍ dīī nāūwāā tōōyīa̍a̍ tɔ̍ a̍ ā ŋīɔ̍ɔ̍ŋ, le̍ I̍sɔ̄lūɛ̍i̍ya̍, a̍ sāā ko̍ndu̍a̍a̍ be̍le̍-ŋɔ̍ma̍hīɔ̍ɔ̍lu̍ a̍ ā ŋɔ᷄mpu᷅m, a̍ sāā fɔ̍ŋndu̍a̍a̍ be̍le̍-ŋɔ̍mmɛ̍ū a̍ ā ŋɔ᷄mmɛ̍ū. Ndu̍yɛ̍, ma̍ yɔ̄ŋgū vɛ̄lɛ̄ chūīŋnda̍ tɔ̍ a̍ ā ŋīɔ̍ɔ̍ŋ, le̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍.

³⁶O̍ ko̍ŋ kɔ̍ɔ̍lī, ma̍ chūā yāu̍la̍ nda̍ chɛ᷄ŋ o̍ māsā bɛ̍ndōo̍ lo̍ la̍ŋ, ma̍ kē māsāa̍ ŋ̄būŋgāa̍, a̍ wānāā ndāa̍ wa̍lla̍ le̍ Būŋgɛ̄ī bā Pīo̍o̍ Yūfi̍lu̍a̍tīī bā pāa̍le̍ŋ lē dēl lo̍. O̍ ko̍ŋ, mi̍ wānāā wa̍lla̍ ha̍ā ā mālā I̍sɔ̄lūɛ̍i̍ya̍, ma̍ mālā vɛ̄lɛ̄ chīɛ̍i̍ Mɛ̄lɛ̄ka̍a̍.