Read Southern Kisi Ɛ̍si̍lūā 9 Bible Online

Ɛ̍si̍lūā 9 - Southern Kisi bible

Ɛ̍si̍lūā 9

¹O̍ ko̍ŋ kɔ̍ɔ̍lī mɛ̄ɛ̍ te̍le̍ŋ ti᷅ŋ hīōū, mi̍ Chu̍ūwa̍ wānāā ndāā ba̍nāa̍ ā hūŋ nāa̍ ya̍ chu̍a̍. Mɛ̄ɛ̍ nda̍ hi᷄ŋ, Ma̍ dīmūl la̍ āā, “Wāŋnda̍ I̍sɔ̄lūɛ̄ī, ā ka̍ ka̍, a̍ wānāā sōlīāā lāsa̍lāa̍, a̍ Li̍va̍īya̍, ā cho̍ yɛ̍ yɛ̍ chɔ᷅m nda̍ pi̍la̍ tɛ̄ɛ̄ŋ, a̍ wānāā ka̍a̍la̍ che᷅le̍ŋāa̍ cho̍ na̍a̍ tɛ̄ɛ̄ŋ nda̍ le̍. Ā chō sɔ̄ɔ̍ŋ wɔ̍ɔ̍ŋ bɛ̄ndo᷄ŋ tōsāa̍ mɛ̄ɛ̍ wāŋnda̍ ha̍ā chō tōsāa̍ yɛ̍ ko̍ni̍. Nda̍ yɔ̍nūŋ ni̍ māā Ke̍nāna̍i̍tīi̍ya̍, a̍ Hi̍ta̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Chɛ̄bu̍sa̍i̍tīi̍ya̍, a̍ A̍mɔ̍lu̍a̍i̍tīi̍ya̍, a̍ Mo̍wa̍bi̍tīi̍ya̍, a̍ I̍chi̍pīāŋnda̍, a̍ A̍mɔ̍lu̍a̍i̍tīi̍ya̍.

²I̍sɔ̄lūɛ̍i̍ya̍ ha̍ā ā bīī ma̍ chūā wāŋ lāāndūāā ka̍a̍la̍ chēle̍ŋnda̍ ha̍a̍ o̍ nɔ̄la̍ŋ ni᷄ŋ, ndu̍yɛ̍ ma̍ chɛ̄l ma̍ wā pūa̍a̍ ndāa̍ wāŋ lāāndūāā ka̍a̍la̍ che᷅le̍ŋnda̍ ha̍ā pūūlūllo̍. Wānāā wa̍lla̍, a̍ wāŋ bānāa̍, nda̍ fɛ̍lɛ̍ŋ a̍ wo̍u̍ bāla̍ŋ o̍ sɔ̄ɔ̍ŋ mu᷅ŋ tōsāa̍ ni᷄ŋ. Ā tōsa̍ ni᷅ŋ mi̍ wānāā dīāndāa̍ ā mūūli̍āŋ a̍ wānāa̍ cho̍ a̍ di̍a̍ndāā le̍ wa̍. O̍ ko̍ŋ mi̍ wānāā dīāndāa̍ ā sīmnu᷄ŋ wa̍nāā nɔ̄ɔ̄lɛ̍i̍.

³O̍ ko̍ŋ kɔ̍ɔ̍lī mɛ̄ɛ̍ sūɛ̍i̍ he̍ī ī de᷄l la̍ o̍ lānī, mi̍ I̍ sɛ̍ɛ̍sīa̍ŋ nyɛ᷅la̍ŋ lēkɔ̄ɔ̍. O̍ ko̍ŋ, mi̍ I̍ pu̍u̍sīāā yīīŋnde̍ ya̍ o̍ lēbōl a̍ sīɛ̍i̍ye̍. Mi̍ I̍ cha᷅l lɛ̄ŋ wɔ̍yɔ̄ŋ a̍ kɔ̄l tāmbɛ̍i̍ wa̍ ya̍ wo̍.

⁴I̍ lo̍ īchāli̍ lɛ᷅ŋ a̍ kɔ̄l tāmbɛ̍i̍yo̍ ha̍a̍a̍ mi̍ te̍le̍ŋ so̍līāā sa̍lā fīti̍līo̍o̍ ō fūūlūū. O̍ ko̍ŋ, mi̍ wāŋnda̍ hūŋ ma̍ hu᷄ŋ ba̍lū ya̍ si̍lɔ̍, mi̍ sīōōŋnde̍ bīī nda̍ a̍ dīōmndā Mɛ̄lɛ̄ka̍ I̍sɔ̄lūɛ̍i̍ya̍, ō di̍mi̍ a̍ yɔ̄ŋndā wɔ̄ɔ̍ŋ wānāa̍ fu̍la̍ o̍ bīyɔ̄ɔ̍ ni᷄ŋ ma̍ mīīŋgū wa̍, ā wa̍ tōsāa̍ la̍ŋ o̍ kɔ̄ɔ̄ la̍ŋ.”

⁵A̍ te̍le̍ŋ ko̍ŋ, mi̍ cha̍ŋ i̍si̍si̍ a̍ mɔ̍nɛ̍i̍ bɛ̍ndūi̍ wa̍ ya̍ ve̍. Nyɛ̄lā nīla̍ sɛ̍ɛ̍si̍ɛ̍i̍la̍ŋ lā wa̍ wɔ̄ ya̍ lēkɔ̄ɔ̍, mi̍ I̍ ba᷅ŋ wūla̍ŋ le̍ Mɛ̄lɛ̄ka̍ pīɛ̄īyo̍. Mi̍ he̍e̍lu̍ bāla̍ŋ chōo̍ cho̍o̍ nāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍ chūā.

⁶Mi̍ I̍ pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ nūu̍, si̍ɔ̍mbu̍la̍ŋ lā chō ya̍ bɔ̄ɔ̍ le̍ mī he̍e̍lu̍ hɔ̄lāā nīa̍a̍ nāa̍ nūm chu̍a̍. Kāni̍ fu̍u̍le̍, yɔ̄ŋndā nāāla̍ wɔ̍ɔ̍ŋnda̍ŋ lā he᷄l, mi̍ lā hīāū na̍a̍ bōlle̍, mi̍ lā fūūlūū o̍ ha̍la̍ di̍.

⁷Chɔ̍ŋ a̍ te̍le̍ŋ fi̍nyāā nāā ma̍māa̍, mbo̍ fūūlūū a̍ pāa̍le̍ hāūle̍ŋ nde᷅ŋ, ŋ̄ chō o̍ yāālā le̍ yɔ̄ŋndā nāāla̍ wɔ̍ɔ̍ŋnda̍ŋ. Le̍ yɔ̄ŋndā nāāla̍ wɔ̍ɔ̍ŋnda̍ŋ, na̍a̍, a̍ māsāa̍ nāa̍, a̍ wānāā nāā so̍līāā lāsa̍lāa̍, na̍a̍ ŋ̄ chō o̍ mūɛ̍i̍ bɛ̄ŋgu̍ ni̍, mi̍ ŋ̄ wā o̍ bīyɔ̄ɔ̍ ni᷄ŋ. O̍ ko̍ŋ kɔ̍ɔ̍lī, ō cho̍ ko̍ nyɛ᷅m nāa̍ŋ nda̍ pōōndīa̍a̍ ma̍ kūānu᷄ŋ a̍ mu̍ŋ ndo̍ŋ te̍, kɛ̍ mi̍ ŋ̄ sɔ̄lā bɛ̄ɛ̄la̍ ta̍mbɛ̍i̍la̍ŋ, nu̍a̍ wɔ̍ ko̍ mɛ̄ɛ̍ i̍ cho̍ hāū nu̍a̍ā yɛ̍.

⁸Kɛ̍ a̍ mɛ̄ɛ̍ na̍a̍ ŋ̄ sūāā nu̍a̍ā yɛ̍ bɛ̍ɛ̍, a̍ chɔ̍m na̍a̍ ni᷅ŋ kɛ̄ndɛ̄ī nu̍m ī bɛ̄ndūe̍i̍. A̍ to̍sa̍ mi̍ na̍a̍ pūmnda̍ ŋ̄ lō yōōmū, mi̍ ŋ̄ hu᷄ŋ cha᷅l o̍ fo̍nda᷄ŋ nūm dīāndāā ho̍ō, mi̍ ŋ̄ wā yɛ̍lɛ̍kɛ̍lɛ̍ɛ̍ nyɛ̄ o̍ nyɛ̄ yɔ̍nu̍ŋ na̍a̍ le̍. O̍o̍, a̍ nɛ̍ŋi̍ na̍a̍ kɔ̄l bɔ̄ɔ̍, a̍ to̍sa̍ mi̍ ŋ̄ sɔ̄lā yɔ̄njɔ̄lāa̍ te̍le̍ŋ na̍a̍ chō o̍ chɛ̄le̍ŋ ni᷄ŋ ndo̍.

⁹Mi̍ chē bɛ̍ɛ̍ mi̍ ŋ̄ wā chīa̍a̍ ni̍, kɛ̍ a̍ kɛ̍ɛ̍ na̍a̍ o̍ chɛ̄le̍ŋ nde᷅ŋ ni᷄ŋ te̍. Ma̍ kāālā na̍a̍, ndu̍yɛ̍ ma̍ to̍sa̍ mi̍ māsāā bɛ̍ndūa̍a̍ Pa̍a̍sīāā a̍ chā na̍a̍ nyīnā ta̍u̍. Ndu̍yɛ̍ mi̍ māsāa̍ ha̍ā ā kē na̍a̍ yōōmūa̍ŋ mi̍ ŋ̄ mīŋgī chīɛ̍i̍ Mɛ̄lɛ̄ka̍ wa̍ ō tāmbɛ̍i̍yo̍ wo̍ tāŋgūl. Ndu̍yɛ̍ mi̍ māsāa̍ ha̍ā māndā na̍a̍, mi̍ ŋ̄ wā nyɛ̄ kɛ̄ndɛ̄ yɛ̍lɛ̍kɛ̍lɛ̍ɛ̍ Chu̍dā a̍ Chūlu̍sɛ̄lɛ̄m na̍nu᷄ŋ.”

¹⁰“Kɛ̄ ndu̍yɛ̍ o̍ mu᷅ŋ ni᷄ŋ kpo̍u̍, Mɛ̄lɛ̄ka̍ nāa̍, mī yɛ̄ɛ̍nɛ̍ na̍a̍ ŋ̄ dīmi̍ yɛ̄ lɛ̄? To̍fa̍ wɔ̍, ŋ̄ bīī mi̍ ŋ̄ kɛ̄ɛ̄ nu̍m vɛ̄lɛ̄ dīōm, mi̍ ŋ̄ tɛ̄ɛ̄mbūū sāwāla̍ nu̍mnda̍ŋ,

¹¹sāwāla̍ŋ ŋ̄ ke̍ wānāa̍ su̍a̍ā le̍ Mɛ̄lɛ̄ka̍ wa̍, bu̍ɛ̍i̍yāā nūmnda̍ la̍ŋ. Ma̍ dīmūl na̍a̍ māā lɛ̄ŋndē nya̍ chō le᷅ŋ kɔ̄la̍ŋ chūa̍a̍ mī lē wa̍ nyɛ̄ nyā le̍ŋ, lē chō lē nɔ̄ɔ̄lɛ̍i̍ a̍ sɔ̄ɔ̍ŋ wɔ̍ɔ̍ŋ bɛ̄ndū wānāa̍ cho̍ o̍ lɛ̄ŋndē lēŋ ni᷄ŋ nda̍ ā chō tōsāa̍ wo̍. Ndu̍yɛ̍ vɛ̍lɛ̄ māā wāŋnda̍ ha̍ā, ā chō hīōūwɔ̄ɔ̍ lāchī a̍ sɔ̄ɔ̍ŋ wɔ̍ɔ̍ŋ bɛ̄ndo᷄ŋ tōsāa̍ kɛ᷅.

¹²Ma̍ lo̍ o̍ ko̍ŋ ma̍ sīlā na̍a̍ o̍ kālā ka̍lā, māā na̍a̍ ŋ̄ chɛ᷅l mī chūāūwāā nāā la̍a̍ndūa̍a̍ ā cha᷄l chu̍a̍u̍wāā ndāā pi̍a̍a̍ndūa̍a̍ o̍ bā o̍ nɔ̄ ni̍ŋ te̍, kɛ̄lɛ̄ŋgāā ni᷅ŋ te̍ mī chūāūwāā nāā pi̍a̍a̍ndūa̍a̍ ā chu̍a̍ chūāūwāā ndāā la̍a̍ndūa̍a̍ o̍ nɔ̄ɔ̍ ni᷄ŋ. Ma̍ dīmūl na̍a̍ māā kāa̍la̍ la̍ŋ ki̍nɛ̍i̍, ŋ̄ ma̍lā nda̍ o̍ nɛ̄ī o̍ nɛ̄ī ni̍ŋ mā sɔ̄la̍ nyɛ̄, kɛ̄lɛ̄ŋgāā mā kūi̍i̍ le̍. Le̍ hāli̍ kpe̍ŋ mī ŋ̄ wa̍ a̍ dīāllūŋ kālā, mī ŋ̄ tūēī lɛ̄ŋndē nāāle̍ŋ yēēlā, mī ŋ̄ me᷄l chūāūwāā nāa̍ le̍ fɛ̍ɛ̍ŋ a̍ fɛ̍ɛ̍ŋ.

¹³Mi̍ chē bɛ̍ɛ̍ ma̍ tūsī na̍a̍ nyɛ̄ pālāa̍ chōo̍ le̍ yɔ̄ŋndā nāāla̍ wɔ̍ɔ̍ŋnda̍ŋ, a̍ bīōndɔ᷄ŋnda̍ nāāla̍ŋ ni̍, kɛ̍ ŋ̄ sīnā māā dɛ̍nɛ̍ pa̍lāā nūm Mɛ̄lɛ̄ka̍ tūsi̍ na̍a̍ chōo̍ wo̍, ō fūūlu̍u̍ a̍ yɔ̄ŋ wɔ̍ɔ̍ŋ na̍a̍ ŋ̄ tōsa̍ wo̍ le̍. Kɛ̍ a̍ ko̍ŋ fa̍ū, ma̍ tōsā mi̍ na̍a̍ pūmnda̍ lō yōōmū.

¹⁴Vɛ̄ɛ̍nɛ̍ na̍a̍ ŋ̄ pɛ̄ɛ̄sā yɛ̄ sāwāla̍ nu̍mnda̍ŋ, mī ŋ̄ lo̍ o̍ ko̍ŋ mī ŋ̄ kēna᷅ŋ la̍a̍ndūa̍a̍ na̍na̍a̍ wānāā kɔ̄l vēsɛ̍i̍ya̍ ha̍ā? Tē ŋ̄ tōsa̍ ke̍ŋ pɛ̍, ā chō kɔ̄l tūūlu̍ a̍ na̍a̍, mā tɛ̍ɛ̍mbu̍u̍ na̍a̍ kpo̍u̍, wānā pi᷅lɛ̍ bɛ̍ɛ̍ ō lo᷅ yo̍o̍mū le̍.

¹⁵Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, mi̍ chē bɛ̍ɛ̍ ma̍ wā wānā sa̍kpō o̍ sɔ̄ɔ̍ŋ tōsāa̍ ni᷄ŋ ni̍, kɛ̍ a̍ ko̍ŋ kpo̍u̍, ma̍ chɛ̄l mi̍ na̍a̍ pūmnda̍ mi̍ ŋ̄ lō yōōmū. Kɛ̍ ndu̍yɛ̍, yɔ̄ŋndā nāāla̍ wɔ̍ɔ̍ŋnda̍ŋ lā chīi̍ tōsā mi̍ si̍ɔ̍mbu̍la̍ŋ lā bīī na̍a̍ le̍ nu̍m sīsi̍la̍ŋ o̍ hɔ̄l.”