Read Southern Kisi Nɛ̄hīma̍yā 10 Bible Online

Nɛ̄hīma̍yā 10 - Southern Kisi bible

Nɛ̄hīma̍yā 10

¹Wānāā yɛ̍ yi̍a̍a̍ ho̍l ta̍mbūe̍i̍la̍ŋ o̍ yāu̍wo̍ chōo̍ wa̍ cho̍ ha̍ā ni̍. Nɛ̄hīma̍yā, po̍ Hākāla̍yā wo̍, o̍ wa̍ māsa̍ ībūŋgāa̍ wo̍, nda̍ Sɛ̄dīka̍yā. O̍ nda̍ kɔ̍ɔ̍lī,

²mi̍ wānāā sōlīāā lāsa̍lāa̍ nda̍ hōl vɛ̄lɛ̄ ta̍mbūe̍i̍la̍ŋ la̍ nda̍la̍ŋ. Wānāā sōlīāā lāsa̍lāā kāŋ nda̍ chō ha̍ā ni̍. Sɛ̄lu̍a̍yā a̍ Āsālu̍i̍yā, a̍ Chɛ̄lūīma̍yā

³a̍ Pa̍si̍hɔ̄ɔ̄, a̍ Āmālu̍i̍yā, a̍ Māli̍ki̍chā

⁴a̍ Hātūsi̍hī, a̍ Sīɛ̄bāna̍yā, a̍ Mālu̍chī,

⁵a̍ Ha̍lūīm, a̍ Mɛ̄lu̍ɛ̍mo̍tī, a̍ Ōbāda̍yā,

⁶a̍ Da̍a̍ni̍ɛ̍ɛ̄, a̍ Ki̍ni̍tɔ̄ŋ, a̍ Ba̍lu̍kī,

⁷a̍ Mɛ̍si̍u̍lām, a̍ Ābi̍chā, a̍ Mīcha̍mīŋ,

⁸a̍ Māāsɛ̍yā, a̍ Bi̍li̍kāī, a̍ Sīɛ̄ma̍yā.

⁹Mɛ̄ɛ̍ ka̍ŋ fa̍ŋa̍ŋ, mi̍ Li̍va̍īya̍ nda̍ nda̍ hōl vɛ̄lɛ̄ ta̍mbūe̍i̍la̍ŋ la̍ nda̍la̍ŋ. Wānāā mālāā kāŋ nda̍ cho̍ ha̍ā ni̍. Chɛ̍sūāā, po̍ Āsa̍nīāā wo̍, a̍ Bi̍nu̍ī fūlāa̍ o̍ yu̍ŋgu̍la̍ Hɛ̄nāda̍dī wo̍ chōo̍, a̍ Ka̍di̍mīɛ̄l, nda̍ wānāya᷅ŋ nda᷄ŋ, nda̍ yɔ̍nūŋ ni̍ māā Sīɛ̄bāna̍yā, a̍ Hōdi̍yā, a̍ Kēli̍tā, a̍ Pēla̍i̍yā, a̍ Ha̍nāŋ, a̍ Mi̍kāā, a̍ Lūɛ̄ho̍bī, a̍ Hāsīābi̍yā, a̍ Sa̍kɔ̄ɔ̄, a̍ Sīɛ̄lu̍ɛ̍bīāā, a̍ Sīɛ̄bāna̍yā, a̍ Hōdi̍yā, a̍ Ba̍nī, a̍ Bɛ̄ni̍nūī.

¹⁴Mɛ̄ɛ̍ nda̍ chīi̍, mi̍ wānāā bɛ̄ndūāā yɛ̍ yi̍a̍a̍ nda̍ hōl vɛ̄lɛ̄ ta̍mbūe̍i̍la̍ŋ la̍ nda̍la̍ŋ. Māsāā yɛ̍ yi̍a̍a̍ ka̍ŋ nda̍ cho̍ ha̍ā ni̍. Pa̍lɔ̍sī, a̍ Pāhāātī Mo̍wa̍bī, a̍ Ɛ̍lām a̍ Sa̍tū a̍ Ba̍nī, a̍ Bu̍nī, a̍ Āsīka̍a̍dī, a̍ Be̍bāī a̍ Ādo̍ni̍chā, a̍ Bīki̍vāī, a̍ A̍dīŋ, a̍ A̍tɛ̄ɛ̄, a̍ Hɛ̄sɛ̄ki̍yā, a̍ A̍sɔ̄ɔ̄, a̍ Hōdi̍yā, a̍ Ha̍sīūm, a̍ Bɛ̍sāī, a̍ Ha̍lu̍i̍fī, a̍ A̍na̍tɔ̍tī, a̍ Ne̍bāī, a̍ Mākīpi̍a̍a̍sī, a̍ Mɛ̍si̍u̍lām, a̍ Hɛ̍sīɛ̄ɛ̄, a̍ Mɛ̄sīɛ̄sa̍bɛ̄l, a̍ Sa̍dɔ̍kī, a̍ Cha̍di̍dūāā, a̍ Pēla̍tīāā, a̍ Ha̍nāŋ, a̍ Āna̍a̍yā, a̍ Hōsi̍a̍yā, a̍ Hānāni̍yā, a̍ Hāāsi̍ɔ̍bī, a̍ Hālōhɛ̍sīī, a̍ Pi̍li̍hāā, a̍ Sīōbɛ̍kī, a̍ Lu̍i̍hūm, a̍ Hāsīābi̍nā, a̍ Māāsɛ̍yā, ā Āhi̍i̍yā, a̍ Ha̍nāŋ, a̍ A̍nāŋ, a̍ Ma̍lu̍kī, a̍ Ha̍lūīm, a̍ Ba̍nā.

²⁸O̍ ko̍ŋ kɔ̍ɔ̍lī, mɛ̄ɛ̍ wānāā bɛ̄ndūāā yɛ̍ yi̍a̍a̍ ha̍ā ā chīi̍ ta̍mbūe̍i̍la̍ ndāla̍ŋ hōlɔ̄ɔ̄, mi̍ wāŋnda̍ ā pīli̍a̍a̍ kpo̍u̍, wānāā sōlīāā lāsa̍lāa̍ ni̍, Li̍va̍īya̍ ni̍, wānāa̍ ma̍ndā di̍o̍la̍ sāāsāla̍ŋ nda̍ ni̍, wānāā ŋ̄chōndu̍a̍a̍ o̍ chīɛ̍i̍ Mɛ̄lɛ̄ka̍a̍ ni̍, a̍ wānāa̍ to̍sā wa̍lta̍ yɔ̍ŋāāla̍ŋ o̍ chīɛ̍i̍ Mɛ̄lɛ̄ka̍a̍ wa̍, a̍ I̍sɔ̄lūɛ̍i̍ya̍a̍ tu̍a̍a̍ ā nda̍ a̍a̍ fu̍la̍ wānāā lēkāa̍wa̍ tɛ̄ɛ̄ŋ, ma̍ dīīnu᷄ŋ ku̍ndāa̍ mɛ̄ɛ̍ sāwā Mɛ̄lɛ̄ka̍a̍ ō dīmi̍ yɛ̍ wa̍, lātūlu̍ a̍ lāāndāā ndāa̍, a̍ chūāūwāā ndāa̍, ā nda̍ a̍a̍ si̍nā ni᷅ŋ īsɔ̄ɔ̍ pɛ̍ŋgu̍ wa̍,

²⁹mi̍ ŋ̄ chɛ̄la᷅ŋ lātūlu̍ na̍a̍ lāŋgba̍ā nāā ka̍lāā lēlɛ̄ŋnda̍, mi̍ ŋ̄ chūā būŋgɛ̄i̍ ī kālā ka̍lā māā nyɛ̄ sāwāla̍ Mɛ̄lɛ̄ka̍ ke̍ bu̍ɛ̍ī ndɔ̄ɔ̍ Mūu̍sē la̍ŋ ndo̍ lā dīmi̍ le̍ tōsāa̍ wo̍ ni̍, a̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ dīmu̍l na̍a̍ le̍ tōsāa̍, māā ŋ̄ chō ndu̍ wā tōsāa̍ kpo̍u̍. Ndu̍yɛ̍ mi̍ ŋ̄ mēna᷄ŋ māā, tē ŋ̄ tōsa̍ nyɛ᷅ na̍a̍ ŋ̄ chu̍a̍ būŋgɛ̄i̍ yo̍ le̍, māā sēndi̍ Mɛ̄lɛ̄ka̍a̍ ō wa̍ na̍a̍ chōo̍.

³⁰Mi̍ ŋ̄ chūā būŋgɛ̄i̍ māā ā ŋ̄ chɛ᷅l mī wa̍nāā lēkāa̍wa̍a̍ cho̍ o̍ lɛ̄ŋndē nāāle̍ŋ ni᷄ŋ nda̍ ā chūa̍ chūāūwāā nāa̍ o̍ lānɔ̄ ni̍ŋ te̍, ndu̍yɛ̍ māā ŋ̄ chɛ᷅l vɛ̍lɛ̄ mī pūa̍a̍ nāa̍ vi̍a̍lāa̍ ā chūa̍ chūāūwāā ndāa̍ o̍ lānɔ̄ ni̍ŋ te̍.

³¹Ndu̍yɛ̍ mi̍ ŋ̄ chūā vɛ̄lɛ̄ būŋgɛ̄i̍ māā ŋ̄ pi̍ndū nyɛ᷅ o̍ nyɛ̄ o̍ pāa̍le̍ nāāle̍ pɛ̍ŋgīāāle̍ŋ chōo̍, ɔ̄ɔ̄ o̍ pāa̍le̍ o̍ pāa̍le̍ di̍a̍ndāāle̍ Mɛ̄lɛ̄ka̍ chōo̍ le̍. Ndu̍yɛ̍ māā ā yɔ᷄ŋ bɛ̍ɛ̍ mī wānāā lēkāa̍wa̍a̍ cho̍ na̍a̍ tɛ̄ɛ̄ŋ nda̍ ā hīŋ a̍ nyɔ̄ɔ̍ŋ, ɔ̄ɔ̄ mā hīŋ a̍ nyɛ̄ dīa̍a̍ le̍ pīsīo̍o̍ o̍ pālɛ̍i̍ he̍ī chōo̍, māā ŋ̄ pi̍ndū wɔ̍ŋgūlālāŋ te̍. Ndu̍yɛ̍ māā te̍le̍ŋ o̍ te̍le̍ŋ wɔ̄sīo̍o̍ŋ hīōū pɛ̍ ŋ̍ ŋɔ̍mpu᷅m, o̍ ŋɔ᷄mmɛ̍ū wo̍, māā ŋ̄ nɔ̄ mī ŋ̄ ma᷄l lɛ̄ŋndē nāāle̍ŋ mī lē pɛ̄ŋgi̍, ŋ̄ to̍sā wa̍li̍ o̍ wa̍li̍ le̍cho̍o̍ wɔ̍sī kōŋ te̍. Ndu̍yɛ̍ wānā o̍ wānā kūēē na̍a̍ wa̍ chōo̍ wɔ̍sī kōŋ pɛ̍, ŋ̄ ma᷄l ndu̍ le̍ kūēē ko̍ŋ.

³²Ndu̍yɛ̍, mi̍ ŋ̄ chɛ̄la᷅ŋ vɛ̍lɛ̄ māā īwɔ̄sī o̍ īwɔ̄sī, mɛ̄ɛ̍ mī wānā o̍ wānā o̍ chu̍u̍ŋgi̍a̍a̍ ka̍ni̍ŋ hu̍mbo᷄ŋ nyɛ̄ pɔ̄mbɔ̄, le̍ bɔ̄nɔ̄la̍ wa᷅ o̍ chīɛ̍i̍ Mɛ̄lɛ̄ka̍ nāa̍ la̍ŋ mālā pāāwāa̍.

³³Ndu̍yɛ̍ māā nyɛ̄ sɔ̄lāā na̍a̍ ŋ̄ chō ho̍ō yɔ̄ŋgū wo̍, māā ō chō wā le̍ bēe̍dīi̍ cho̍ le̍ Mɛ̄lɛ̄ka̍ wo̍ tōōsi̍a̍a̍, a̍ le̍ bɔ̄nɔ̄la̍ sa̍lālā tɔ̄lɔ̄ɔ̄lā ku̍lta̍ŋ, a̍ le̍ bɔ̄nɔ̄la̍ sa̍lālā lūāmāāla̍ŋ, a̍ le̍ bɔ̄nɔ̄la̍ŋ o̍ pālɛ̍i̍ pɛ̍ŋgīɛ̍i̍ chōo̍, a̍ o̍ bɔ̄ŋa᷅ŋndā pāŋgi̍i̍ sɛ̍nɛ̄īla̍ŋ chōo̍, a̍ o̍ bɔ̄ŋa᷅ŋndā chēle̍ŋndā na̍a̍ ŋ̄ nɔ̍ le̍ bīyɔ̄ɔ̍ la̍ŋ, a̍ le̍ bɔ̄nɔ̄la̍ŋ le̍ sa̍lālā na̍a̍ ŋ̄ sōlī le̍ dīndīo̍o̍ sɔ̄lāa̍ Mɛ̄lɛ̄ka̍ o̍ hɔ̄l la̍ŋ, a̍ le̍ bɔ̄nɔ̄la̍ŋ le̍ sa̍lālā na̍a̍ so̍lī le̍ mī Mɛ̄lɛ̄ka̍ ma᷄l na̍a̍ I̍sɔ̄lūɛ̍i̍ya̍ le̍ yɔ̄ŋndā nāāla̍ wɔ̍ɔ̍ŋnda̍ŋ nda̍ŋ, a̍ le̍ bɔ̄nɔ̄la̍ kpe̍ku̍la̍ŋ che᷅le̍ŋnda̍ŋ o̍ chīɛ̍i̍ Mɛ̄lɛ̄ka̍ nāa̍ pāāwāa̍.

³⁴Ndu̍yɛ̍ na̍a̍ wānāā sōlīāā lāsa̍lāa̍ ni̍, Li̍va̍īya̍ ni̍, a̍ wāŋnda̍ ā pīli̍a̍a̍ kpo̍u̍, mi̍ ŋ̄ chɛ̄la᷅ŋ vɛ̍lɛ̄ māā īwɔ̄sī o̍ īwɔ̄sī, mɛ̄ɛ̍ mī ŋ̄ wūu̍ kōo̍ŋ le̍ sīnāa̍ te̍le̍ŋ yu̍ŋgu̍la̍ nāāla̍ŋ ō pīlɛ̍ nɔ̄ le̍ hūnɔ̄ɔ̍ a̍ yɔ̄mnde̍ le̍ sa̍lālā lūāmāāla̍ŋ sōlīo̍o̍ o̍ ma̍āŋ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ wo̍ chōo̍, mɛ̄ɛ̍ i̍ cho̍ ī pōōnyīāā o̍ sāwāla̍ Mɛ̄lɛ̄ka̍la̍ŋ ni᷄ŋ yɛ̍.

³⁵Ndu̍yɛ̍ mi̍ ŋ̄ chɛ̄la᷅ŋ mi̍ ŋ̄ chūā vɛ̄lɛ̄ būŋgɛ̄i̍ māā īwɔ̄sī o̍ īwɔ̄sī, nyɛ̄ o̍ nyɛ̄ na̍a̍ ŋ̄ chō tōlɔ̄ɔ̄, ɔ̄ɔ̄ sāŋɔ̄ɔ̄ o̍ chīɔ̄ɔ̄ŋ nāa̍ŋ ni᷄ŋ, ō tāse̍ na̍a̍ ŋ̄ chō kēndī ɔ̄ɔ̄ kōwɔ̄ɔ̄ wo̍, a̍ kɔ̄mndē tāse̍le̍ yɔ̄mīī nɛ̄ī tu̍a̍lɛ̍i̍ ī kūām nde̍, māā ŋ̄ nɔ̄ mī ŋ̄ kūɛ̄ a̍ la̍ŋ o̍ chīɛ̍i̍ Mɛ̍lɛ̄ka̍ Ya̍a̍wɛ̄ɛ̄ wo̍.

³⁶Ndu̍yɛ̍ o̍ ko̍ŋ kɔ̍ɔ̍lī, mi̍ ŋ̄ chɛ̄la᷅ŋ vɛ̍lɛ̄ māā pūa̍a̍ nāā tāsi̍a̍a̍ ki̍nɛ̍i̍, ŋ̄ nɔ̄ mī ŋ̄ kūɛ̄ a̍ nda̍ o̍ chīɛ̍i̍ Mɛ̄lɛ̄ka̍a̍, nāa̍ wānāā sōlīāā lāsa̍lāa̍ chūā mā ma᷄l nda̍ Mɛ̄lɛ̄ka̍ o̍ bā, mɛ̄ɛ̍ i̍ cho̍ ī pōōnyīāā o̍ sāwāla̍ Mɛ̄lɛ̄ka̍la̍ŋ ni᷄ŋ yɛ̍. Chɔ̄lūāā nāa̍ bɛ̍ɛ̍, le̍nde̍ ko̍ni̍, chɔ̄lūāā pīāāndūāā tāsi̍a̍a̍ chɔ̄lūāā nāa̍ ā kūām nda̍ ki̍nɛ̍i̍, ō wa̍ nāu̍, ō wa̍ sa̍ā, ō wa̍ chu̍īŋ, kpo̍u̍ māā mɛ̄ɛ̍ mī ŋ̄ kūɛ̄ a̍ nda̍ o̍ chīɛ̍i̍ Mɛ̄lɛ̄ka̍a̍ mī ŋ̄ yɔ̄ŋgu̍ nda̍ o̍ Mɛ̄lɛ̄ka̍ lo̍ māā kē.

³⁷Ndu̍yɛ̍ ō fūla̍ o̍ ko̍ŋ kɔ̍ɔ̍lī, mi̍ ŋ̄ chɛ̄la᷅ŋ vɛ̍lɛ̄ māā tē ŋ̄ kōū kōwɔ̄ɔ̄ tāso̍o̍ o̍ chīɔ̄ɔ̄ŋ nāa̍ ni᷄ŋ pɛ̍, ŋ̄ tōōsi̍a̍a̍ kōlō kɛ̍ndɛ̄ kɛ̍ndɛ̄ lūāmāā bēe̍ndīi̍yo̍, ŋ̄ chūa̍ kɔ̄mndē kɛ̄ndɛ̄ kɛ̍ndɛ̄lē tɔ̄lɔ̄ɔ̄lā nāāla̍ŋ, a̍ mūɛ̄īmā kīle̍pīi̍ma̍ sɛ̍nɛ̄īya̍ŋ a̍ chūɛ̄īmā ɔ̄li̍fīi̍ wa̍ŋ, ŋ̄ kūɛ̄ a̍ mu̍ŋ o̍ wānāā sōlīāā lāsa̍lāa̍ lo̍, a̍ wa᷅ wa̍llo̍ o̍ chīɛ̍i̍ Mɛ̄lɛ̄ka̍ na̍a̍ ni᷄ŋ nda̍. Ndu̍yɛ̍ māā nyɛ̄ o̍ nyɛ̄ na̍a̍ ŋ̄ sɔ̄la̍ o̍ chīɔ̄ɔ̄ŋ nāa̍ ni᷄ŋ pɛ̍, ŋ̄ chō wā kēlā lēbōlta̍ŋ sōlīo̍o̍ mī ŋ̄ yɔ̄ŋgū o̍ Li̍va̍īya̍ lo̍. Kāni̍ nda̍ bi̍ū bīū ke̍lā lēbōlta̍ŋ o̍ sɔ̄ndɔ̄kɔ̍ltā nāāla̍ŋ, nāa̍ na̍a̍ ŋ̄ tōsā wa̍lta̍ŋ nda̍ ni̍.

³⁸Ndu̍yɛ̍ tē Li̍va̍īya̍ ā wa̍ kēlā lēbōltā lāŋ wāŋnda̍ bīyɔ̄ɔ̍ o̍ bā pɛ̍, mɛ̄ɛ̍ mī wāna̍ so̍lī sa̍lāa̍ wo̍ ō pīlɛ̍ o̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wo̍ ō wa̍ o̍ hɔ̄lndɔ̄. O̍ ko̍ŋ, nyɛ̄m nda̍ chō mu̍ŋ sɔ̍lā wo̍ŋ ki̍nɛ̍i̍, nda̍ bɛ̍ɛ̍ ā nɔ̄ mā sōli̍ kē lēbōllo̍ lēchōo̍ mā kūɛ̄ a̍ ndu̍ o̍ fo̍ndāŋ nda̍ kɛ̄sī nyɔ̍ɔ̍ŋ o̍ chīɛ̍i̍ Mɛ̄lɛ̄ka̍a̍ wo̍, mā kɔ̍ kɛ̍sī ndu̍ lo̍ŋ.

³⁹Ndu̍yɛ̍ na̍a̍ wāŋnda̍ I̍sɔ̄lūɛ̄ī ni̍, Li̍va̍īya̍ ni̍, ŋ̄ nɔ̄ mī ŋ̄ hīŋ a̍ chūūŋgīāālā nāāla̍ŋ, tɔ̄lɔ̄ɔ̄lā ku̍lta̍ŋ, a̍ mūɛ̄īmā kīle̍pīi̍ma̍ sɛ̍nɛ̄īya̍ŋ, a̍ chūɛ̄īmā ɔ̄li̍fīi̍ya̍ŋ o̍ chīɛ̍i̍ Mɛ̄lɛ̄ka̍a̍, nāa̍ nda̍ kɛ̄sī nyɛ᷅m kpe̍ko̍ŋ le̍ chīɛ̍i̍ Mɛ̄lɛ̄ka̍a̍ wa̍. Mī ŋ̄ kɔ̍ kɛ̍sī mu̍ŋ o̍ chīɛ̍i̍ Mɛ̄lɛ̄ka̍a̍, nāa̍ wānāa̍ cho̍ sa̍lāa̍ sōlīo̍o̍ a̍ te̍le̍ŋ ko̍ŋ nda̍, a̍ wānāa̍ ma̍ndā di̍o̍la̍ sāāsāla̍ŋ nda̍, a̍ wānāā ŋ̄chōndu̍a̍a̍ o̍ chīɛ̍i̍ Mɛ̄lɛ̄ka̍a̍ ā chō wa̍. O̍ ko̍ŋ kɔ̍ɔ̍lī, na̍a̍ kpo̍u̍, mi̍ ŋ̄ chɛ̄la᷅ŋ māā ŋ̄ cho̍ chi̍ɛ̍i̍ Mɛ̄lɛ̄ka̍ nāa̍ mālɔ̄ɔ̄ mbō lo̍ fo̍ndō le̍.