Read Southern Kisi Nɛ̄hīma̍yā 12 Bible Online

Nɛ̄hīma̍yā 12 - Southern Kisi bible

Nɛ̄hīma̍yā 12

¹Wānāā sōlīāā lāsa̍lāa̍, a̍ Li̍va̍īya̍, a̍ fu̍la̍ Ba̍bi̍lɔ̄ŋ, lātūlu̍ a̍ Sɛ̄lūba̍bɛ̄l, po̍ Si̍ɛ̍ɛ̍tīɛ̄l wo̍, a̍ Chɛ̍sūāā, Māsa̍ wānāā sōlīāā lāsa̍lāa̍, ma̍ mīīŋgū Chūlu̍sɛ̄lɛ̄m nda̍, nda̍ cho̍ ha̍ā ni̍.

²A̍ wa̍ wānāā sōlīāā lāsa̍lāa̍ bōlle̍ŋ nda̍ ki̍nɛ̍i̍ nda̍ cho̍ ha̍ā ni̍. Sɛ̄lu̍a̍yā, a̍ Chɛ̄lūīma̍yā, a̍ Ɛ̍si̍lūā, a̍ Āmālu̍i̍yā, a̍ Ma̍lu̍kī, a̍ Hātūsi̍hī,

³a̍ Sīɛ̄kāna̍yā, a̍ Lu̍e̍hūm, a̍ Mɛ̄lūɛ̄mo̍tī,

⁴a̍ I̍dɔ̄ɔ̄, a̍ Chīnɛ̍tɔ̍yī, a̍ Ābi̍chā,

⁵a̍ Mi̍cha̍mīŋ, a̍ Māāda̍yā, a̍ Bi̍li̍kāā

⁶a̍ Sīɛ̄ma̍yā, a̍ Chōwa̍lu̍i̍bī, a̍ Chɛ̄da̍yāā,

⁷a̍ Sa̍lū, a̍ Āmo̍o̍kī, a̍ Hīlīka̍yā, a̍ Chɛ̄da̍yāā, ō pīlɔ̄ɔ̍. Ndu̍yɛ̍, pūa̍a̍ ha̍ā, nda̍ wa̍ chāāŋāā ndāā wa̍nāā sōlīāā lāsa̍lāa̍ bōlle̍ŋ ni̍.

⁸Ndu̍yɛ̍ Li̍va̍īya̍ ki̍nɛ̍i̍, dīōlā ndāla̍ŋ la̍ cho̍ la᷅ŋ ni̍. Chɛ̍sūāā, a̍ Bi̍nu̍ī, a̍ Ka̍di̍mīɛ̄l, a̍ Sīɛ̄lu̍ɛ̍bīāā, a̍ Chu̍dā, a̍ Mātāni̍yāā. Ndu̍yɛ̍ Mātāni̍yāā ko̍ŋ nda̍ chāāŋāā ndūa̍a̍ ha̍ā, nda̍ wa̍ chīla̍ŋ le̍ chōndo̍ŋ sōlīo̍o̍ le̍ Mɛ̄lɛ̄ka̍ ba̍li̍ka̍a̍ mēllo̍ ni̍.

⁹Ndu̍yɛ̍ tē nda̍ a̍a̍ wa̍ chōndo̍ŋ pɛ̍, Ba̍kībūka̍a̍yā ni̍, U̍nō ni̍, a̍ chāāŋāā ndāa̍, mi̍ nda̍ si᷄m kpēŋgēi̍ ī pīlɛ̍i̍ le̍ chōnde̍i̍ chɛ̄lɔ̄ɔ̍ lēbɛ̄ŋgu̍.

¹⁰Wānāa̍ fu̍la̍ o̍ yu̍ŋgu̍ Chɔ̄ɔ̍sūāā, māsa̍ wānāā sōlīāā lāsa̍lāa̍ chōo̍ wa̍, nda̍ cho̍ ha̍ā ni̍. Chɔ̄ɔ̍sūāā ve̍lū Chōwa̍a̍kīm ni̍, Chōwa̍a̍kīm ve̍lū Īlīa̍a̍si̍bī ni̍.

¹¹Īlīa̍a̍si̍bī ve̍lū Chōha̍a̍dā ni̍, Chōha̍a̍dā ve̍lū Chōna̍ta᷅ŋ ni̍. Chōna̍ta᷅ŋ ve̍lū Cha̍di̍dūāā ni̍.

¹²Bōōndi̍i̍ Chōwa̍a̍kīm wa̍ māsa̍ wānāā sōlīāā lāsa̍lāa̍ ve̍, wānāā sōlīāā lāsa̍lāa̍ a̍ wa̍ bōlīī lāyu̍ŋgu̍e̍i̍ o̍ yu̍ŋgu̍la̍ ndāla̍ŋ chōo̍ wa̍, nda̍ cho̍ ha̍ā ni̍. Mɛ̄lu̍a̍yāā, ndu̍ wa̍ yu̍ŋgu̍ Sīlu̍a̍yā wo̍ bōlle̍ŋ ni̍. Hānāni̍yā, ndu̍ wa̍ yu̍ŋgu̍ Chɛ̄lūīma̍yā wo̍ bōlle̍ŋ ni̍.

¹³Mɛ̍si̍u̍lām, ndu̍ wa̍ yu̍ŋgu̍ Ɛ̍si̍lūā wo̍ bōlle̍ŋ ni̍. Chɛ̄hōha̍nāŋ ndu̍ wa̍ yu̍ŋgu̍ Āmālu̍i̍yā wo̍ bōlle̍ŋ ni̍.

¹⁴Chōna̍ta᷅ŋ ndu̍ wa̍ yu̍ŋgu̍ Ma̍lu̍kī wo̍ bōlle̍ŋ ni̍. Chōo̍sɛ̍, ndu̍ wa̍ yu̍ŋgu̍ Sīɛ̄bāna̍yā wo̍ bōlle̍ŋ ni̍,

¹⁵A̍di̍nā nda̍ wa̍ yu̍ŋgu̍ Ha̍lūīm ndo̍ bōlle̍ŋ ni̍, Hɛ̄līka̍yā ndu̍ wa̍ yu̍ŋgu̍ Mɛ̄lūāīyo̍tī wo̍ bōlle̍ŋ ni̍ŋ,

¹⁶Sɛ̄kāla̍yā, ndu̍ wa̍ yu̍ŋgu̍ I̍dɔ̄ɔ̄ wo̍ bōlle̍ŋ ni̍, Mɛ̍si̍u̍lām ndu̍ wa̍ yu̍ŋgu̍ Chīnɛ̍tɔ̍yī ndo̍ bōlle̍ŋ ni̍,

¹⁷Si̍ki̍lī, ndu̍ wa̍ yu̍ŋgu̍ Ābi̍chā wo̍ bōlle̍ŋ ni̍. Wāŋndo̍ wa̍ vɛ̄lɛ̄, o̍ wa̍ yu̍ŋgu̍ Mi̍ni̍a̍mīŋ ndo̍ bōlle̍ŋ ndo̍.[10] Pi̍li̍tāī, ndu̍ wa̍ yu̍ŋgu̍ Mo̍wa̍dīāā wo̍ bōlle̍ŋ ni̍.

¹⁸Si̍a̍mūāā ndu̍ wa̍ yu̍ŋgu̍ Bi̍li̍ka̍ā wo̍ bōlle̍ŋ ni̍. Chɛ̄hōna̍tāŋ ndu̍ wa̍ yu̍ŋgu̍ Sīɛ̄ma̍yā wo̍ bōlle̍ŋ ni̍,

¹⁹Mātɛ̍nāī, ndu̍ wa̍ yu̍ŋgu̍ Chōwa̍lu̍i̍bī wo̍ bōlle̍ŋ ni̍. Yu̍sī ndu̍ wa̍ yu̍ŋgu̍ Chɛ̄da̍yāā wo̍ bōlle̍ŋ ni̍.

²⁰Ka̍lāī, ndu̍ wa̍ yu̍ŋgu̍ Sa̍lāī wo̍ bōlle̍ŋ ni̍, Ɛ̍bā ndu̍ wa̍ yu̍ŋgu̍ A̍mɔ̍kī wo̍ bōlle̍ŋ ni̍.

²¹Hāsīābi̍yā ndu̍ wa̍ yu̍ŋgu̍ Hɛ̄līka̍yā wo̍ bōlle̍ŋ ni̍. Nɛ̄ta̍a̍nīɛ̄ɛ̄l, ndu̍ wa̍ yu̍ŋgu̍ Chɛ̄da̍yāā wo̍ bōlle̍ŋ ni̍.

²²Bōōndi̍i̍ Īlīa̍a̍si̍bī, a̍ Chōwa̍a̍dā, a̍ Chōha̍nāŋ, a̍ Cha̍di̍dūāā, a̍ wa̍ māsāa̍ wānāa̍ sōlīāā lāsa̍lāa̍ ve̍, a̍ bōōndi̍i̍ ke̍ŋ nda̍ pōōnyi̍a̍a̍ dīōlā wānāa̍ wa̍ bōlīī lāyu̍ŋgu̍e̍i̍ le̍ yu̍ŋgu̍la̍ Li̍va̍īya̍ la̍ŋ ni̍, a̍ dīōlā wānāa̍ wa̍ bōlīī lāyu̍ŋgu̍e̍i̍ le̍ yu̍ŋgu̍la̍ wānāā sōlīāā lāsa̍lāa̍ wa̍. Ndu̍yɛ̍ a̍ te̍le̍ŋ Da̍līɔ̄ɔ̄ o̍ wa̍ māsāa̍ o̍ lɛ̄ŋndē Pa̍a̍sīāāle̍ŋ ni᷄ŋ ndo̍, nda̍ chīi̍ dīōlā wāŋnda̍ ha̍ā pōōnyīāā ni̍.

²³O̍ ko̍ŋ kɔ̍ɔ̍lī, dīōlā bōlīī lāyu̍ŋgu̍e̍i̍ le̍ yu̍ŋgu̍la̍ Li̍va̍īya̍ ki̍nɛ̍i̍, lā wa̍ lā pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ, ha̍a̍a̍ a̍ te̍le̍ŋ Chōna̍ta᷅ŋ, po̍ ma᷅ma̍ Īlīa̍a̍si̍bī wo̍ ō wa̍ īchāli̍ wo̍.

²⁴O̍ ko̍ŋ kɔ̍ɔ̍lī, mi̍ māsāa̍ Li̍va̍īya̍, Hāsīābi̍yā a̍ Sīɛ̄lu̍ɛ̍bīāā, a̍ Chɛ̍sūāā, po̍ Ka̍di̍mīɛ̄l wo̍, lātūlu̍ a̍ wānāya᷅ŋ ndāa̍ŋ, ma̍ kīlā ku̍ndālā ŋ̄chōndu̍la̍ Li̍va̍īya̍ lā tīɔ̍ɔ̍ŋ, le̍ Mɛ̄lɛ̄ka̍ sāŋgālāa̍ a̍ ndu̍ ba̍li̍ka̍a̍ mēllo̍ o̍ chōndo̍ŋ ni᷄ŋ, ha̍ā chu̍a̍ chōnde̍i̍ pɛ̍, ha̍ā chɛ᷄l lēbɛ̄ŋgu̍. Ndu̍yɛ̍ māsāa̍ Dēēve̍, wāna̍ Mɛ̄lɛ̄ka̍a̍ ndu̍ ndu̍ o̍o̍ di̍mi̍ ni̍ māā ā kīla̍ ku̍ndāla̍ŋ nda᷅ŋ.

²⁵Ndu̍yɛ̍, Mātāni̍yāā ni̍, Ba̍kībūka̍a̍yā ni̍, Ōbāda̍yā ni̍, Mɛ̍si̍u̍lām ni̍, Ta̍li̍mɔ̄ŋ ni̍, Āki̍kɔ̍bī ni̍, nda̍ nda̍ a̍a̍ ma̍ndā di̍o̍la̍ sāāsāa̍ ni̍, a̍ lu̍mūi̍ nda̍ a̍a̍ kɛ̍sī nyɔ̄ɔ̍ŋ o̍ dīōlā sāāsāla̍ŋ īkɛ̄i̍ yo̍.

²⁶Ndu̍yɛ̍, wāŋnda̍ ha̍ā ki̍nɛ̍i̍, Chōwa̍a̍kīm, po̍ Chɔ̄ɔ̍sūāā wo̍, ndu̍ yɔ̍nūŋ māā po̍ ma̍ma̍ Chɛ̄hōsa̍da̍kī wo̍ ni̍, a̍ Nɛ̄hīma̍yā māsa̍ ībūŋgāa̍, a̍ Ɛ̍si̍lūā, wānā so̍līāā lāsa̍lāa̍, o̍ wa̍ vɛ̄lɛ̄ wāna̍ ndu̍ o̍o̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍, a̍ bōōndi̍i̍ ndɛ̄i̍ wāŋnda̍ ha̍ā wa̍ wa̍llo̍ tōsāa̍ o̍ chīɛ̍i̍ Mɛ̄lɛ̄ka̍a̍ ni̍.

²⁷O̍ ko̍ŋ kɔ̍ɔ̍lī, mi̍ te̍le̍ŋndo̍ fūūlūū le̍ sāāsa̍ ba̍lu̍ Chūlu̍sɛ̄lɛ̄m ndo̍ mālɔ̄ɔ̍ Mɛ̄lɛ̄ka̍ o̍ bā. Mɛ̄ɛ̍ nda̍ wa̍ ndu̍ mālɔ̄ɔ̍ Mɛ̄lɛ̄ka̍ o̍ bā, Li̍va̍īyāa̍ wa̍ o̍ lɛ̄ŋndē Chu̍dāle̍ŋ ni᷄ŋ nda̍ kpo̍u̍ ma̍ yōōŋgū nda̍ Chūlu̍sɛ̄lɛ̄m chi̍e̍e̍, le̍ mā hu᷄ŋ to̍sā bɔ̄ŋa᷅ŋ kɔ̄l kɛ̄ndɛ̄ bɛ̄ndōo̍, le̍ Mɛ̄lɛ̄ka̍ ba̍li̍ka̍a̍ mēllo̍ a̍ chōndo̍ŋ a̍ tōwāla̍ŋ a̍ chɛ̍ŋchɛ̍ŋndo̍ŋ, ndu̍yɛ̍ a̍ nyɛ̄m chāāŋ īyōō yɛ̍ yi̍ɔ̍ɔ̍ŋ le̍ sāāsāa̍ Chūlu̍sɛ̄lɛ̄m mālɔ̄ɔ̍ Mɛ̄lɛ̄ka̍ o̍ bā.

²⁸Ndu̍yɛ̍ Li̍va̍īya̍, ā nda̍ a̍a̍ so̍li̍ cho̍ndo̍ŋ nda̍, ma̍ tāŋgūl sɔ̄ndɔ̄kɔ̍lta̍ŋ Chūlu̍sɛ̄lɛ̄m i̍kɛ̄i̍ ma̍ chāl lo̍ŋ. Mi̍ Li̍va̍īya̍ ha̍ā, ā fūlā o̍ tānda̍ ba̍lu̍ Chūlu̍sɛ̄lɛ̄m ndo̍ ni᷄ŋ, a̍ sɔ̄ndɔ̄kɔ̍lta̍ ba̍lu̍ Nɛ̄to̍fāā chi̍e̍e̍ la̍ŋ, mi̍ ā ti᷄ŋ fūlā Bɛ̄tīki̍kāl, a̍ Kɛ̍bā, a̍ A̍si̍ma̍vɛ̄ɛ̄, nda̍ kpo̍u̍ ma̍ chūūŋgi̍āŋ Chūlu̍sɛ̄lɛ̄m chi̍e̍e̍.

²⁹

³⁰O̍ ko̍ŋ kɔ̍ɔ̍lī, mi̍ wānāā sōlīāā lāsa̍lāa̍, a̍ Li̍va̍īya̍, ā pūlū ndā pi̍la̍ le̍ dīndīo̍o̍ sɔ̄lāa̍ Mɛ̄lɛ̄ka̍ o̍ hɔ̄l. Ndu̍yɛ̍, ma̍ pūlū vɛ̄lɛ̄ wāŋnda̍ ā pīli̍a̍a̍, a̍ sāāsāa̍, a̍ dīōla̍ wa̍ o̍ sāāsāa̍ ho̍ō la̍ŋ.

³¹O̍ ko̍ŋ kɔ̍ɔ̍lī, mi̍ ya̍ Nɛ̍hīma̍yā chu̍u̍ŋgīāā lāŋgba̍ā kālla̍ Chu̍dā kpo̍u̍ nāa̍ pi᷅lɛ̍, mi̍ di̍mūl nda̍ le̍ mā he᷄l o̍ sāāsa̍ ba̍lu̍ chi̍o̍o̍ wo̍ chōo̍ ma̍ bālū ndu̍ si̍lɔ̍. O̍ ko̍ŋ, mi̍ hɛ̍lī wānāā ŋ̄chōndu̍a̍a̍, mi̍ pi̍ɔ̍ū nda̍ ku̍ndālā bɛ̄ndūla̍ŋ lā tīɔ̍ɔ̍ŋ le̍ Mɛ̄lɛ̄ka̍ ba̍li̍ka̍a̍ mēllo̍ o̍ chōndo̍ŋ ni᷄ŋ. Mi̍ ku̍ndā ŋ̄chōndo̍o̍ ō pīlɔ̍ɔ̍ ō kūā o̍ bā kɛ̄ndɔ̄ɔ̍ chōo̍ kūmbū Dīō Sāāsā Bīllo̍.

³²Ndu̍yɛ̍ mi̍ Hōōsi̍a̍ā a̍ ku̍ndā lāŋgba̍ā kālla̍ pīɔ̄ūwo̍ tɛ̍ɛ̄ŋ ki̍nɛ̍i̍ mi̍ nda̍ tūāl wānāā ŋ̄chōndu̍a̍a̍ kɔ̄ɔ̄lī.

³³Ndu̍yɛ̍, wānāā sōlīāā lāsa̍lāa̍ ha̍ā, Āsālu̍i̍yā ni̍, Ɛ̍si̍lūā ni̍, Mɛ̍si̍u̍lām ni̍, Chu̍dā ni̍, Bɛ̍ŋnja̍mīŋ ni̍, Sīɛ̄ma̍yā ni̍, Chɛ̄lūīma̍yā ni̍, lātūlu̍ a̍ wānāā sōlīāā lāsa̍lāa̍ ā ti᷄ŋ a̍ pūtɛ̍nɛ̍i̍la̍ŋ nda̍ o̍ lābā, a̍ Sɛ̄kāla̍yā, po̍ Chōna̍ta᷅ŋ ndo̍, nda̍ kpo̍u̍, ma̍ tūāl ku̍ndāa̍ ho̍ō kɔ̄ɔ̄lī. Chōna̍ta᷅ŋ yɛ̍, fi̍nyā ndɔ̍ wa̍ sīɛ̄ma̍yā, po̍ Mātāni̍yāā wo̍ ni̍. Mātāni̍yāā yɛ̍, fi̍nyā ndɔ̍ wa̍ Māka̍yā, po̍ Sa̍kɔ̄ɔ̄ wo̍ ni̍. Sa̍kɔ̄ɔ̄ yɛ̍, fi̍nyā ndɔ̍ wa̍ A̍sa̍fī ni̍.

³⁴

³⁵

³⁶Ndu̍yɛ̍ Sɛ̄kāla̍yā, wānāya᷅ŋ ndɔ᷄ŋ bɛ̍ɛ̍ nda̍ yɔ̍nūŋ ni̍ māā, Sīɛ̄ma̍yā, a̍ Āsa̍a̍lūī, a̍ Mi̍la̍lāī, a̍ Ki̍la̍lāī, a̍ Ma̍a̍ī, a̍ Nɛ̄ta̍a̍nɛ̄ɛ̄l, a̍ Chu̍dā, a̍ Ha̍na̍nī, ma̍ chūā nyɛ̄m chāāŋ su̍u̍ Dēēve̍, wāna̍ Mɛ̄lɛ̄ka̍a̍ ndu̍ o̍o̍ lu̍a̍ā wo̍ŋ ma̍ tūāl nda̍ kɔ̄ɔ̄lī. O̍ ko̍ŋ, mi̍ Ɛ̍si̍lūā wāna̍ ndu̍ o̍o̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍ la̍ŋ ndo̍ ō sīm lāchī mā kūā a̍ mu̍ŋ lɔ̄ɔ̍ a̍ chōndo̍ŋ.

³⁷Ma̍ cha᷄ŋ le̍nde̍ a̍ chōndo̍ŋ ha̍a̍a̍, ma̍ kɔ̍ fu̍u̍lūū o̍ Dīō Sāāsa̍ Māmɛ̄ŋndo̍ŋ. Ma̍ kūā le̍nde̍ kɛ᷅, ma̍ kɔ̍ he᷅l bi᷅ŋnda̍ he̍l mi̍ lā fūūlūū o̍ sāāsa̍ ba̍lu̍ chi̍o̍o̍ la̍ŋ, le̍ hēlɔ̄ɔ̍ o̍ Māsāa̍ Dēēve̍ lo̍ chi̍e̍e̍, ma̍ kɔ̍ hi̍o̍ū chīɛ̍i̍ Māsāa̍ Dēēvi̍o̍o̍, ma̍ kɔ̍ si᷅m o̍ Dīō Sāāsā Māmɛ̄ŋndo̍, bā pāa̍le̍ŋ lē chāŋndo̍.

³⁸O̍ ko̍ŋ kɔ̍ɔ̍lī, mi̍ ku̍ndā ŋ̄chōndo̍o̍ ō pīlɔ̍ɔ̍ ndu̍ he᷅l o̍ sāāsa̍ ba̍lu̍ chi̍o̍o̍ wo̍ chōo̍ kūmbū bā mīāllo̍. Ndu̍yɛ̍, mi̍ ya̍ Nɛ̍hīma̍yā pi̍la̍ tu̍āl nda̍ kɔ̄ɔ̄lī, lātūlu̍ a̍ ku̍ndā lāŋgba̍ā kālla̍ Chu̍dā pīɔ̄ūwo̍ tɛ̄ɛ̄ŋ ki̍nɛ̍i̍, mi̍ ŋ̄ kūā na̍a̍ nda̍ā, mi̍ ŋ̍ kɔ̍ hi̍o̍ū Chīɛ̄ī Vīlɛ̄ī nda̍ dūāū yi᷅ŋnde̍ŋ ndo̍, mi̍ ŋ̄ fūūlūū o̍ Sāāsā Tu̍a̍ŋgāa̍.

³⁹Chɔ̄nɔ᷄ŋndo̍ lo̍ŋ, mi̍ ŋ̄ kūā le̍nde̍ bā Dīō Sāāsāa̍ E̍fi̍lūēm, mi̍ hīāū Dīō Sāāsāa̍ Chɛ̄si̍a̍nāā, mi̍ ŋ̄ hīāū Dīō Sāāsā Sūūwo̍, mi̍ ŋ̄ hīāū Chīɛ̄ī Vīlɛ̄īyo̍ Ha̍na̍nɛ̄l, mi̍ ŋ̄ hīāū Dīō Sāāsā Kɛ̄mɔ̄ɔ̍. Mi̍ ŋ̄ kūā le̍nde̍ kɛ᷅ a̍ Dīō Sāāsā Sāa̍, mi̍ ŋ̄ kɔ̍ si᷅m o̍ dīō sāāsāa̍ nāa̍ pūa̍a̍ ma̍ndā chi̍ɛ̍i̍ Mɛ̄lɛ̄ka̍a̍ wa̍ ā chāl la̍.

⁴⁰O̍ ko̍ŋ kɔ̍ɔ̍lī, ku̍ndālā ŋ̄chōndu̍la̍ ti̍ɔ̍ɔ̍ŋnda̍ŋ wa̍ chōndo̍ŋ sōlīo̍o̍ le̍ Mɛ̄lɛ̄ka̍ ba̍li̍ka̍a̍ mēllo̍ la̍ŋ, mi̍ lā kɔ̍ si᷅m o̍ chīɛ̍i̍ Mɛ̄lɛ̄ka̍a̍. Ndu̍yɛ̍ ya̍ ni̍, a̍ ku̍ndā lāŋgba̍ā kālla̍ pīɔ̄ūwo̍ tɛ̍ɛ̄ŋ ki̍nɛ̍i̍, na̍a̍ bɛ̍ɛ̍ mi̍ ŋ̍ kɔ̍ si᷅m lo̍ŋ.

⁴¹O̍ ko̍ŋ kɔ̍ɔ̍lī, wānāā sōlīāā lāsa̍lāa̍ ha̍ā bɛ̍ɛ̍, nda̍ yɔ̍nūŋ ni̍ māā Īlīa̍a̍kīm, a̍ Māāsɛ̍yā, a̍ Mīni̍a̍a̍mīŋ, a̍ Mīka̍yāā, a̍ Ɛ̄li̍o̍nāī, a̍ Sɛ̄kāla̍yā, a̍ Hānāni̍yā, nda̍ bɛ̍ɛ̍ ā wa̍ o̍ ku̍ndā ya̍ wa̍ chōo̍ wo̍ tɛ̄ɛ̄ŋ. Nda̍ wa̍ pūtɛ̍nɛ̍i̍la̍ŋ hɔ̄ŋndo̍ ni̍.

⁴²Ndu̍yɛ̍ Māāsɛ̍yā ni̍, Sīɛ̄ma̍yā ni̍, Ɛ̄li̍a̍a̍sā ni̍, Yu̍u̍sī ni̍, Chɛ̄hōha̍nāŋ ni̍, Mālīki̍chā ni̍, Ɛ̍lām ni̍, a̍ E̍sɔ̄, nda̍ bɛ̍ɛ̄ ā wa̍ lo̍ŋ. Ndu̍yɛ̍, Chɛ̄sīlu̍a̍hīāā yɛ̍, ndu̍ wa̍ ku̍ndā ŋ̄chōndōo̍ ho̍ō lāchī o̍ chōndo̍ŋ sōlīo̍o̍ ni᷄ŋ a̍ nyɛ̄m chāa̍ŋ lɔ̄ɔ̍ ni̍.

⁴³Ndu̍yɛ̍ pāa̍le̍ le̍ŋ, mi̍ wāŋnda̍ dūāūnu᷄ŋ nya̍a̍le̍ ta̍u̍ ta̍u̍, ma̍ sōlī sa̍lāla̍ŋ ta̍u̍ ta̍u̍ a̍ kɔ̄l kɛ̄ndɛ̄ bɛ̄ndū Mɛ̄lɛ̄ka̍ dɔ̄ū nda̍ ni᷄ŋ ndo̍. Pāa̍le̍ le̍ŋ, wānā a̍a̍ lo᷅ la̍nda̍ŋ mī nūm o̍o̍ tu̍e̍ī kpo̍ōla̍ŋ Chūlu̍sɛ̄lɛ̄m a̍ kɔ̄l kɛ̄ndɛ̄ bɛ̄ndōo̍. Kāni̍, wāŋ lāāndūa̍a̍ bɛ̍ɛ̍ a̍ chūāāmbūāā pɔ̄mbūa̍a̍ ā wa̍ a̍ kɔ̄l kɛ̄ndɛ̄ bɛ̄ndōo̍.

⁴⁴Ndu̍yɛ̍ a̍ te̍le̍ŋ ko̍ŋ, wāŋnda̍ wa̍ ā yūlāā le̍ fo̍ndāŋndā nda̍ a̍a̍ kɛ̍sī nyɔ̄ɔ̍ŋ o̍ chīɛ̍i̍ Mɛ̄lɛ̄ka̍a̍ la̍ŋ māndāa̍. Ndu̍yɛ̍, wāŋnda̍ ha̍ā, nda̍ ko̍ni̍ nda̍ a̍a̍ bi̍ī ko̍wɔ̄ɔ̄lā tāse̍la̍ wāŋnda̍ nda̍ a̍a̍ ku̍a̍ū o̍ chīɔ̄ɔ̄ŋnda᷄ŋ ni᷄ŋ nda̍ŋ ni̍, a̍ kēlā lēbōlta̍ŋ. Ndu̍yɛ̍ nyɛ̄m sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmī māā wāŋnda̍ ā yɔ̄ŋgu̍ fūlāa̍ o̍ chīɔ̍ɔ̍ŋ ba̍lu̍ chi̍e̍e̍ŋ ndāa̍ŋ ndo̍ŋ ni᷄ŋ, le̍ wānāā sōlīāā lāsa̍lāa̍ a̍ Li̍va̍īya̍ kīo̍o̍ wo̍ŋ bɛ̍ɛ̍, ma̍ bīī mu̍ŋ wāŋnda̍ o̍ lābā. Ndu̍yɛ̍ wāŋnda̍ Chu̍dā kpo̍u̍ ma̍ hīnī kɔ̄l a̍ wa̍li̍ wānāā sōlīāā lāsa̍lāa̍ ā Li̍va̍īya̍ ā wa̍ tōsāa̍ wo̍.

⁴⁵Kāni̍ fo̍ndōle̍, nyɛ̄ o̍ nyɛ̄ Dēēve̍ nda̍ Sɔ̍lɔ̍mɔ̄ŋ po̍ ndɔ̄ a̍ di̍mi̍ māā ā nɔ̄ le̍ tōsāa̍, ā wa᷄ ndu̍ tōsāa̍. Ā wa᷄ wa̍lta̍ Mɛ̄lɛ̄ka̍ ndāa̍ tōsāa̍, ndu̍yɛ̍ a̍ wa᷄ wāŋnda̍ dīndīo̍o̍ Mɛ̄lɛ̄ka̍ o̍ hɔ̄l. Ndu̍yɛ̍ wānāā ŋ̄chōndu̍a̍a̍ bɛ̍ɛ̍, a̍ wānāa̍ ma̍ndā chi̍ɛ̍ī Mɛ̄lɛ̄ka̍a̍ wa̍, nda̍ bɛ̍ɛ̍ ā wa̍ wa̍lta̍ ndāla̍ŋ tōsāa̍ mɛ̄ɛ̍ Dēēve̍ nda̍ Sɔ̍lɔ̍mɔ̄ŋ po̍ ndɔ̄ a̍ di̍mi̍ yɛ̍.

⁴⁶Ndu̍yɛ̍ pāāndū pa̍, chɔ̍ŋ a̍ pālɛ̍i̍ Dēēve̍i̍, a̍ wāna̍ nyɛ̄ chāa̍ A̍sa̍fī, wānāa̍ si᷅m wa̍nāā ŋ̄chōndūa̍a̍ lāchī wa̍, ā wa̍, nda̍ nda̍ a̍a̍ si᷅m wāŋnda̍ lāchī le̍ chōndo̍ŋ sōlīo̍o̍ le̍ Mɛ̄lɛ̄ka̍ sāŋgālāa̍ a̍ le̍ ndu̍ ba̍li̍ka̍a̍ mēllo̍ yɛ̍ ni̍.

⁴⁷Ndu̍yɛ̍ a̍ te̍le̍ŋ Sɛ̄lūba̍bɛ̄l a̍ Nɛ̄hīma̍yā wo̍, wāŋnda̍ I̍sɔ̄lūɛ̄ī kpo̍u̍ mī nda̍ a̍a̍ chu̍u̍ŋgi̍a̍a̍ lēpāa̍ o̍ lēpāa̍ le̍ wānāā ŋ̄chōndu̍a̍a̍ a̍ wānāā nda̍ a̍a̍ ma̍ndā chīɛ̍i̍ Mɛ̄lɛ̄ka̍a̍ wa̍. Ndu̍yɛ̍ vɛ̍lɛ̄ mī nda̍ a̍a̍ yɔ̍ŋgū chūūŋgi̍a̍a̍ le̍ Li̍va̍īya̍. Ndu̍yɛ̍ Li̍va̍īya̍ bɛ̍ɛ̍ mī nda̍ a̍a̍ yɔ̍ŋgu̍ chūūŋgi̍a̍a̍ o̍ ndāa̍, le̍ wānāā sōlīāā lāsa̍lāa̍ a̍ fu̍la̍ o̍ yu̍ŋgu̍ E̍lɔ̄ŋ ndo̍ chōo̍ wa̍.