Read Southern Kisi Nɛ̄hīma̍yā 13 Bible Online

Nɛ̄hīma̍yā 13 - Southern Kisi bible

Nɛ̄hīma̍yā 13

¹O̍ ko̍ŋ kɔ̍ɔ̍lī, ma̍ tōfāl wāŋnda̍ dīōmnda̍ wa̍ lā pōōnyīāā o̍ yāu̍ Mūu̍sē wo̍ ni᷄ŋ nda̍ŋ chōo̍ cho̍o̍ kpe̍le̍ŋ. Ndu̍yɛ̍, ma̍ sāālu᷄ŋ pa̍a̍le̍ le̍ŋ kpe̍nde̍ke̍le̍ māā, A̍mɔ̄na̍i̍tīi̍nɔ̍ ni̍, Mo̍wa̍bi̍tīi̍ya̍ ni̍, māā ā nɔ̍ mā wa̍ ku̍ndā wānāa̍ Mɛ̄lɛ̄ka̍a̍ tɛ̄ɛ̄ŋ te̍.

²Kāni̍ fo̍ndōle̍, māā bōōndi̍i̍ wāŋnda̍ I̍sɔ̄lūɛ̄ī a̍ ma̍l I̍chi̍pī ma̍ wā hūnɔ̄ɔ̍ ve̍, māā wāŋnda̍ ha̍ā ā ke̍ I̍sɔ̄lūɛ̍i̍ya̍ nyɛ̄ dīāā le̍, kɛ̄lɛ̄ŋgāāle̍ mā ke᷄ nda̍ māmɛ̄ŋ. Ndu̍yɛ̍ ma̍ pāāwā wānā pi᷅lɛ̍ dīōla̍ŋ āā, Be̍la᷅m le̍ mbō mēna̍ I̍sɔ̄lūɛ̍i̍ya̍. Kɛ̍ mi̍ Mɛ̄lɛ̄ka̍, Mɛ̄lɛ̄ka̍ I̍sɔ̄lūɛ̍i̍ya̍ ō mūlī sēndi̍ kōŋ sa̍lāa̍.

³Ndu̍yɛ̍ mɛ̄ɛ̍ I̍sɔ̄lūɛ̍i̍ya̍ tūēī nyɛ̄ sāwāla̍ Mɛ̄lɛ̄ka̍ ke̍ Mūu̍sēla̍ŋ lā dīmi̍ wo̍, ma̍ sōlī wānāā lēkāa̍wa̍ nda̍ tɛ̄ɛ̄ŋ kpo̍u̍.

⁴Te̍le̍ŋ pa̍ mi̍ I̍sɔ̄lūɛ̍i̍ya̍ ā sōlī wāŋnda̍ ha̍ā, Īlīa̍a̍si̍bī, wānā so̍līāā lāsa̍lāa̍, ndu̍ wa̍ fo̍ndāŋ nda̍ a̍a̍ kɛ̍sī nyɔ̍ɔ̍ŋ o̍ chīɛ̍i̍ Mɛ̄lɛ̄ka̍a̍ wo̍ bōlle̍ŋ ni̍. Īlīa̍a̍si̍bī ko̍ŋ yɛ̍, chānjɛ̍ī kɛ̍ndɛ̄ kɛ̍ndɛ̄i̍ wa̍ nda̍ tɛ̄ɛ̄ŋ nda̍ Tōba̍a̍yā.

⁵Mi̍ Īlīa̍a̍si̍bī bi̍ī, mbo̍ kē Tōba̍a̍yā lu̍mūi̍la̍ wa̍ o̍ chīɛ̍i̍ Mɛ̄lɛ̄ka̍a̍ ho̍ō la̍ŋ ō bɛ̄ndōo̍ ō pīlɛ̍, ō nda̍ a̍a̍ kɛ̍sī nyɔ̍ɔ̍ŋ lēni᷄ŋ ndo̍. Nyɛ̄m nda̍ a̍a̍ kɛ̍sī o̍ lu̍mūi̍yo̍ ho̍ō ni᷄ŋ pa̍a̍ndū wo̍ŋ, mu̍ŋ cho̍ mu᷅ŋ ni̍. Sa̍lālā lātɔ̄lɔ̄ɔ̄la̍ŋ, a̍ nyɛ̄m chūŋ kɛ̄ndɔ᷄ŋ, a̍ nyɛ̄m kpe̍ko̍ŋ le̍ chīɛ̍i̍ Mɛ̄lɛ̄ka̍a̍, a̍ kēlā lēbōltā ku̍lta̍ŋ, a̍ mūɛ̄īmā kīle̍pīi̍ma̍ sɛ̍nɛ̄īya̍ŋ, a̍ chūɛ̄īmā ɔ̍li̍fīi̍ya̍ŋ, mā nda̍ a̍a̍ yɔ̍ŋgū le̍ Li̍va̍īya̍ wa̍ŋ, a̍ le̍ wānāā ŋ̄chōndūa̍a̍ o̍ chīɛ̍i̍ Mɛ̄lɛ̄ka̍ā ni᷄ŋ, a̍ le̍ wānāā nda̍ a̍a̍ ma̍ndā di̍o̍la̍ sāāsāa̍ la̍ŋ nda̍, ndu̍yɛ̍ a̍ le̍ chūūŋgīāā nda̍ a̍a̍ hu᷅ŋ le̍ wānāā sōlīāā lāsa̍lāa̍ wo̍.

⁶Ndu̍yɛ̍ a̍ te̍le̍ŋ nda̍ ke̍ Tōba̍a̍yā lu̍mūi̍yo̍ ho̍ō wo̍, ya̍ Nɛ̍hīma̍yā, I̍ ve̍ Chūlu̍sɛ̄lɛ̄m te̍. Ya̍ i̍i̍ mi̍i̍ŋgu̍ nāa̍ Māsā Bɛ̍ndōo̍ Āŋtāsa̍a̍sī chūa̍, māsāa̍ Ba̍bi̍lɔ̄ŋ. Ndu̍yɛ̍, wɔ̄sī māsā bɛ̄ndōo̍ Āŋtāsa̍a̍sī o̍ chi̍ŋa̍ wɔ̄sīla̍ŋ be̍le̍-ya̍a̍ a̍ lā tīɔ̍ɔ̍ŋ o̍ lēmāsā wo̍, wɔ̄sī kōŋ ya̍ I̍ mi̍i̍ŋgu̍ lo̍ŋ ni̍. Ndu̍yɛ̍, mɛ̄ɛ̍ te̍le̍ŋ ti̍ŋ ō hīōū, mi̍ I̍ nyu̍nā Māsā bɛ̍ndōo̍ dīōm le̍ mī I̍ mi̍i̍ŋgū ni̍ko̍ Chūlu̍sɛ̄lɛ̄m.

⁷Hūnɔ̄ɔ̄ ya̍ I̍ hi᷅ŋ ndo̍, ya̍ I̍ hu̍ŋ si̍nā ni᷅ŋ a̍ sūɛ̍i̍ wɔ̍ɔ̍ŋīī bɛ̄ndūīī Īlīa̍a̍si̍bī to̍sa̍ he̍ī, mbo̍ kē Tōba̍a̍yā lu̍mūi̍yo̍ o̍ chīɛ̍i̍ Mɛ̄lɛ̄ka̍a̍ ve̍ o̍kɔ̄ɔ̄ ni̍.

⁸Le̍ he̍ī, mi̍ ta̍mbū kɔ̄l ta̍u̍ ta̍u̍, nyɛ̄ o̍ nyɛ̄ ndu̍ Tōba̍a̍yā ndu̍ o̍o̍ lu̍e̍i̍ o̍ lu̍mūi̍yo̍ ho̍ō ni᷄ŋ kpo̍u̍, mi̍ vi̍i̍ vīī mu̍ŋ o̍ bɛ̍ɛ̄.

⁹O̍ ko̍ŋ kɔ̍ɔ̍lī, mi̍ I̍ to̍sā ma̍ dīndī lu̍mūi̍la̍ wa̍ o̍ chīɛ̍i̍ Mɛ̄lɛ̄ka̍a̍ ho̍ō la̍ŋ Mɛ̄lɛ̄ka̍ o̍ hɔ̄l. O̍ ko̍ŋ, nyɛ̄m kpe̍ku̍ŋ wa̍ le̍ chīɛ̍i̍ Mɛ̄lɛ̄ka̍a̍ mi̍ ŋ̄ wā o̍ lu̍mūi̍la̍ŋ nda᷅ŋ ni᷄ŋ ndo̍ŋ, sa̍lālā ku̍lta̍ŋ ni̍, nyɛ̄m chūŋ kɛ̄ndɔ᷄ŋ ni̍, kpo̍u̍ mi̍ I̍ mi̍ŋgī mu̍ŋ o̍ lu̍mūi̍la̍ŋ nda᷅ŋ ni᷄ŋ.

¹⁰O̍ ko̍ŋ kɔ̍ɔ̍lī, mi̍ I̍ sāālu᷄ŋ vɛ̍lɛ̄ māā nyɛ̄m nda̍ a̍a̍ nɔ̍ le̍ Li̍va̍īya̍ kīo̍o̍ wo̍ŋ, māā ā ve̍ nda̍ mu̍ŋ kē le̍. Le̍ he̍ī, Li̍va̍īya̍ ni̍, wānāā ŋ̄chōndu̍a̍a̍ ni̍, ā nda̍ a̍a̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ wa̍, nda̍ kpo̍u̍ ma̍ māl chīɛ̍i̍ Mɛ̄lɛ̄ka̍a̍ ma̍ mīīŋgu᷄ŋ o̍ kpe̍le̍la̍ ndāla̍ŋ ni᷄ŋ a̍ o̍ chīɔ̄ɔ̄ŋ nda᷄ŋ ni᷄ŋ.

¹¹Mi̍ ta̍mbū kɔ̄l, ndu̍yɛ̍ mi̍ pɛ̍ɛ̍sā lāŋgba̍ā kālla̍. O̍ ko̍ŋ kɔ̍ɔ̍lī, mi̍ ve̍e̍lū nda̍ nāa̍ pi᷅lɛ̍ mi̍ nyu̍nā nda̍ le̍ sa̍bū chīɛ̍i̍ Mɛ̄lɛ̄ka̍a̍ lo̍ fo̍ndō wānā o̍ wānā cho̍ lo̍ŋ te̍ wo̍. O̍ ko̍ŋ kɔ̍ɔ̍lī, mi̍ ve̍e̍lū wānā o̍ wāna̍ wa̍ wa̍llo̍ o̍ chīɛ̍i̍ Mɛ̄lɛ̄ka̍a̍ ma̍ māl ma̍ mīīŋgu̍ wa̍lta̍ ndāla̍ŋ.

¹²O̍ ko̍ŋ kɔ̍ɔ̍lī, mi̍ wāŋnda̍ Chu̍dā a̍ ka̍ndū vɛ̄lɛ̄ hūnɔ̄ɔ̍ a̍ kēlā lēbōltā ku̍lta̍ŋ, a̍ kēlā mūɛ̄īmā mākīle̍pīi̍ma̍ sɛ̍nɛ̄īya̍ŋ, a̍ chūɛ̄īmā ɔ̄li̍fīi̍ya̍ŋ o̍ fo̍ndāŋndā nda̍ a̍a̍ kɛ̍sī nyɔ̄ɔ̍ŋ o̍ chīɛ̍i̍ Mɛ̄lɛ̄ka̍a̍ la̍ŋ.

¹³O̍ ko̍ŋ kɔ̍ɔ̍lī, mi̍ I̍ hɛ̍lī pūa̍a̍ a̍ wa̍ sa̍kpō wa̍, mi̍ I̍ kɛ̍sī nda̍ o̍ fo̍ndāŋ nda̍ kɛ̄sī nyɔ̍ɔ̍ŋ ndo̍ chīla̍ŋ, le̍ mī nda̍ a̍a̍ wa̍ vɛ̄lɛ̄ chāāŋāā ndāā wa̍nāā sōlīāā lāsa̍lāa̍ nyɛ̄m nda̍ a̍a̍ nɔ̍ le̍ sɔ̄lāa̍ wo̍ŋ pīɔ̄ūwo̍. Pūa̍a̍ ya̍ I̍ hɛ̍li̍ ka̍ŋ nda̍, dīōlā ndāla̍ŋ la̍ cho̍ la᷅ŋ ni̍, Sīɛ̄ma̍yā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, a̍ Sa̍dɔ̍kī, wāna̍ ndu̍ o̍o̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍, a̍ Pɛ̄da̍a̍yā, Li̍va̍īnɔ̄. O̍ ko̍ŋ kɔ̍ɔ̍lī, mi̍ hɛ̍lī vɛ̄lɛ̄ Ha̍nāŋ, po̍ Sa̍kɔ̄ɔ̄ wo̍, ndu̍ yɔ̍nūŋ māā po̍ ma̍ma̍ Mātāni̍yāā wo̍ ni̍, le̍ mbō wa̍ wāna̍ ndā ma̍lāa̍.

¹⁴O̍ ko̍ŋ kɔ̍ɔ̍lī, mi̍ i̍ pi̍ɛ̍ī Mɛ̄lɛ̄ka̍ a̍a̍, “Mɛ̄lɛ̄ka̍ nūu̍, yāndi̍i̍ lo̍o̍nu̍ŋ a̍ ya̍ le̍ sɔ̄ɔ̍ŋ kɛ̍ndɛ̄ŋ ya̍ to̍sa̍ mu᷅ŋ le̍ chīɛ̄ī nūmndo̍ wo̍ŋ. Nyɛ̄ o̍ nyɛ̄ kɛ̄ndɛ̄ ya̍ to̍sa̍ le̍ chīɛ̄ī nūmndo̍ Mɛ̄lɛ̄ka̍ nūu̍, a̍ nyɛ̄ o̍ nyɛ̄ ya̍ to̍sa̍ le̍ nu̍m sōōlūūwo̍, yāndi̍i̍ pu̍ɛ̍ɛ̍nu᷄ŋ a̍ mu̍ŋ te̍.”

¹⁵Ndu̍yɛ̍ a̍ te̍le̍ŋ ko̍ŋ, mi̍ sa̍a̍lu᷄ŋ vɛ̍lɛ̄ māā wāŋnda̍ Chu̍dā ā wa̍ kɔ̄la̍ŋ mūɛ̄īmā ndāma̍ mākīle̍pīi̍ya̍ŋ tōōsīa̍a̍ o̍ pāa̍le̍ nāāle̍ pɛ̍ŋgīāāle̍ŋ chōo̍. Ndu̍yɛ̍ ō fūla̍ o̍ ko̍ŋ kɔ̍ɔ̍lī, ā wa̍ vɛ̄lɛ̄ hūnɔ̄ɔ̍ a̍ nyɛ̄ dīāā ndāa̍, ō ku̍llo̍ su̍u̍la̍ŋ yɛ̍ yɛ̍, kīle̍pīi̍ma̍ ndāa̍ŋ, a̍ fi̍kīi̍ma̍ ndāa̍ŋ, a̍ wōlɔ̄ɔ̄lā chēle̍ŋ nda̍ŋ sōfɛ̍li̍a̍a̍ ndāa̍ o̍ lākɔ̄ɔ̄ le̍ pīsīo̍o̍ Chūlu̍sɛ̄lɛ̄m, o̍ pāa̍le̍ nāāle̍ pɛ̍ŋgīāā le̍ŋ chōo̍. Kɛ̍ mi̍ si̍lā nda̍ māā ā nɔ̍ mā pīsi̍ nyɛ̄ dīa̍a̍ o̍ pāa̍le̍ nāāle̍ pɛ̍ŋgīāāle̍ŋ chōo̍ le̍.

¹⁶A̍ te̍le̍ŋ ko̍ŋ, wānāā pūm a̍ fu̍la̍ Ta̍a̍yā chi̍e̍e̍ ma̍ wā īchāli̍ Chūlu̍sɛ̄lɛ̄m nda̍, ā wa̍ hūnɔ̄ɔ̍ a̍ sūūwa̍, ndu̍yɛ̍ a̍ wɔ̄ŋgūlā chēle̍ŋ nda̍ŋ le̍ pīsīo̍o̍ Chūlu̍sɛ̄lɛ̄m o̍ pāa̍le̍ nāāle̍ pɛ̍ŋgīāāle̍ŋ chōo̍ wāŋnda̍ Chu̍dā o̍ bā.

¹⁷O̍ ko̍ŋ, mi̍ I̍ ta̍mbū a̍ lāŋgba̍ā kālāā tɔ̍ɔ̍wa̍ Chu̍dā, mi̍ pɛ̍ɛ̍sā nda̍, mi̍ I̍ di̍mūl nda̍ a̍a̍, “Yɔ̄ŋ wɔ̄ɔ̍ŋndo̍ nya̍ chō ho̍ō tōsāa̍ ni̍. Lā si̍nā nu̍a̍ā māā pāa̍le̍ nāāle̍ pɛ̍ŋgīāāle̍ŋ te̍ nya̍ chō bɛ̄ɛ̄la̍ŋ tɛ̄ɛ̄mbūūwo̍ le̍?

¹⁸Le̍nde̍ ko̍ni̍ fi̍nyāā nyāā ma̍māa̍ ā tōsa̍ ni̍ mi̍ Mɛ̄lɛ̄ka̍ nāa̍ tūsī na̍a̍ nyɛ̄ pālāā bɛ̄ndōo̍ chōo̍ a̍ chi̍o̍o̍ ho̍ō. Ndu̍ nya̍ hūŋ ko̍ŋ vɛ̍lɛ̄ Mɛ̄lɛ̄ka̍ tīŋɔ̄ɔ̍ŋ ni̍ mī lā tɛ̄ɛ̄mbūū pa̍a̍le̍ nāāle̍ pɛ̍ŋgīāāle̍ŋ bɛ̄ɛ̄la̍ŋ le̍ hāli̍ kpe̍ŋ mī tu̍mbe̍ ndɔ̄ɔ̍ ō tōl na̍a̍ chōo̍?”

¹⁹O̍ ko̍ŋ kɔ̍ɔ̍lī, mi̍ du̍a̍ū sāwāa̍ māā te̍le̍ŋ o̍ te̍le̍ŋ, tē pāa̍le̍ nāāle̍ŋ pɛ̍ŋgīāāle̍ŋ lē wa᷄ ni᷅ŋ pɛ̍ māā sīɔ̄dīi̍, māā ā nɔ̄ mā kīīndi̍a̍a̍ dīōlā sāāsāa̍ Chūlu̍sɛ̄lɛ̄m īchɔ̄l kōŋ, ha̍a̍a̍ mbō lo̍ o̍ ko̍ŋ mī pāa̍le̍ pɛ̍ŋgīāāle̍ŋ lē hīōū. O̍ ko̍ŋ, mi̍ kɛ̍sī bu̍ɛ̍i̍yāā nīa̍a̍ ā ti᷄ŋ o̍ dīōlā sāāsāa̍ sōndōla̍ŋ, le̍ la̍ŋ wāa̍ hɔ̄lte̍ŋ māā lāwōlɔ̄ɔ̄ o̍ lāwōlɔ̄ɔ̄ lā hu᷅ŋ Chūlu̍sɛ̄lɛ̄m chi̍e̍e̍ o̍ pāa̍le̍ nāāle̍ pɛ̍ŋgīāāle̍ŋ chōo̍ le̍.

²⁰O̍ ko̍ŋ, tē wānāā lēyākūa̍a̍ nda̍ a̍a̍ hi᷅ŋ ni᷅ŋ a̍ nyɔ̄ɔ̍ŋ le̍ pīsīo̍o̍ Chūlu̍sɛ̄lɛ̄m, mā kōma̍l dīōla̍ŋ lā kīīndīāā pɛ̍, ā lɔ᷄l o̍ sāāsāa̍ kɔ̄ɔ̄lī.

²¹Mi̍ do̍u̍nu᷄ŋ wa̍nāā lēyākūa̍a̍ ha̍ā tu̍mbe̍, mi̍ nyu̍nā nda̍ a̍a̍ “Vɛ᷅ mī lā hūŋ lūa̍a̍ŋ o̍ sāāsa̍ chi̍o̍o̍ īkɛ̄i̍ na̍nu᷄ŋ? Tē lā tōsa̍ ni᷅ŋ le̍nde̍ pɛ̍, I̍ cho̍ nya̍ bīyɔ̄ɔ̄.” Mɛ̄ɛ̍ chɔ̍ŋ ni᷅ŋ a̍ pāa̍le̍ le̍ŋ, nda̍ bɛ̍ɛ̍ nda̍ a̍a̍ hi᷅ŋ ndɛ̍ o̍ pāa̍le̍ pɛ̍ŋgīāāle̍ŋ chōo̍ le̍.

²²Ndu̍yɛ̍, Li̍va̍īya̍ māā ā dīndi̍ nda̍ pi̍la̍ Mɛ̄lɛ̄ka̍ o̍ hɔ̄l, mā kɔ̍ ma̍ndā dīōlā sāāsa̍ chi̍o̍o̍, le̍ mī wāŋnda̍ ke̍ pāa̍le̍ pɛ̍ŋgīāāle̍ŋ bɛ̄ɛ̄le̍ŋ. O̍ ko̍ŋ, mi̍ I̍ pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ nūu̍, yāndi̍i̍ lo̍o̍nu̍ŋ a̍ ya̍ mā tūīīnu̍ŋ ya̍ īnyīɛ̍ɛ̍, mā chɔ̍m ya̍ kāālā nūm bɛ̍ndōo̍.”

²³O̍ ko̍ŋ kɔ̍ɔ̍lī, mi̍ sa̍a̍lu᷄ŋ vɛ̍lɛ̄ a̍ te̍le̍ŋ ko̍ŋ māā pūa̍a̍ Chu̍ūwa̍ ā pūm, ā wa̍ wāŋ lāāndūa̍a̍ chūa̍a̍ o̍ lɛ̄ŋndē A̍si̍dɔ̍dīle̍ŋ ni᷄ŋ, a̍ lɛ̄ŋndē A̍mɔ̄ŋnde̍ŋ, a̍ o̍ lɛ̄ŋndē Mo̍wa̍bīle̍ŋ ni᷄ŋ, ma̍ chāl nda̍ nda̍ā o̍ nɔ̄la̍ŋ ni᷄ŋ.

²⁴Ndu̍yɛ̍ pūa̍a̍ ha̍ā chūāūwāā ndāa̍ pīɔ̄ūwo̍ tɛ̍ɛ̄ŋ ki̍nɛ̍i̍, nda̍ a̍a̍ tu̍i̍ī su̍ɛ̍i̍ ma̍ŋgālɛ̄i̍ Chu̍dā le̍, mɛ̄ɛ̍ sūɛ̍i̍ ma̍ŋgālɛ̄i̍ A̍si̍dɔ̍dī ɔ̄ɔ̄ sūɛ̍i̍ ma̍ŋgālɛ̄ī īsūmīālle̍.

²⁵O̍ ko̍ŋ, mi̍ ta̍mbū kɔ̄l a̍ pūa̍a̍ Chu̍ūwa̍ ha̍ā, mi̍ pɛ̍ɛ̍sā nda̍, ndu̍yɛ̍ me̍nā nda̍. Mi̍ lu̍a̍ā ā ti᷄ŋ mi̍ su̍ŋgī nda̍ yīīŋnde̍ o̍ lēbōl. Ndu̍yɛ̍ mi̍ I̍ to̍sā ma̍ mēna̍ŋ, ma̍ dīmī āā, “Ŋ̄ me̍na̍ŋ o̍ dīōla̍ Mɛ̄lɛ̄ka̍la̍ŋ po̍, māā fɛ̍ɛ̍ŋ a̍ fɛ̍ɛ̍ŋ, ŋ̄ chɛ᷅l mī chūāūwāā nāa̍ a̍ chūāūwāā wānāā lēkāa̍wa̍ mā cha᷄l o̍ lānɔ̄ ni᷄ŋ te̍.

²⁶Mi̍ I̍ di̍mūl nda̍ māā, sūɛ̍i̍ wāŋ lāāndūāā lēkāa̍wa̍a̍ pi᷅li̍a̍a̍ ha̍ā kpe̍ to̍sa̍ ni̍, mi̍ Sɔ̍lɔ̍mɔ̄ŋ, māsā bɛ̍ndū I̍sɔ̄lūɛ̍i̍ya̍ ō tōsā yɔ̄ŋ wɔ̄ɔ̍ŋndo̍. Mɛ̄lɛ̄ka̍ ndɔ̄ɔ̍ ndu̍ o̍o̍ ka̍a̍la̍ ndu̍ ta̍u̍, mbo̍ sīīŋgūū ndu̍ māsāa̍ le̍ I̍sɔ̄lūɛ̍i̍ya̍ kpo̍u̍. Mi̍ Mɛ̄lɛ̄ka̍ tōsā māā lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍, māsā o̍ māsā ve̍ māā ndu̍ le̍. Kɛ̍ mi̍ wāŋ lāāndūāā lēkāa̍wa̍ ha̍ā tōsā mbo̍ tōsā yɔ̄ŋ wɔ̄ɔ̍ŋndo̍.

²⁷Ndu̍ na̍a̍ ŋ̄ tūɛ̄ī vɛ̄lɛ̄ nu̍a̍ā ni̍ māā, nya̍ bɛ̍ɛ̍ lā chō yɔ̄ŋ wɔ̄ɔ̍ŋ pīlɛ̍ kōŋ tōsāa̍, mi̍ lā wā wāŋ lāāndūāā lēkāa̍wa̍ chūa̍a̍ o̍ nɔ̄la̍ŋ ni᷄ŋ, mī lā tōsā yɔ᷅ŋ wɔ̄ɔ̍ŋndo̍ a̍ Mɛ̄lɛ̄ka̍ nāa̍?”

²⁸O̍ ko̍ŋ kɔ̍ɔ̍lī, mi̍ pūa̍a̍ Chōha̍a̍dā wa̍ ō pīlɛ̍ ō chūā chūa̍ Sa̍ŋba̍lāā wo̍, wānā wa̍ā Bɛ̄tī Ho̍lɔ̄ŋ chi̍e̍e̍ o̍ nɔ̄ɔ̍ ni᷄ŋ. Chōha̍a̍dā ko̍ŋ yɛ̄, fi̍nyā ndɔ̍ wa̍ Īlīa̍a̍si̍bī, māsa̍ wānāā sōlīāā lāsa̍lāa̍ ni̍. Le̍ nyɛ̄ po̍ Chōha̍a̍dā wo̍ ō tōsa̍ ho̍ō wo̍, mi̍ I̍ tu̍a̍ū po̍ ndɔ̄ ko̍ŋ mbo̍ māl Chūlu̍sɛ̄lɛ̄m.

²⁹O̍ ko̍ŋ kɔ̍ɔ̍lī, mi̍ pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ nūu̍, wāŋnda̍ ha̍ā ā bīī ma̍ tɛ̄ɛ̄mbūū wa̍li̍ wānāā sōlīāā lāsa̍lāa̍ lābɛ̄ɛ̄, ndu̍yɛ̍ ma̍ tɛ̄ɛ̄mbūū kpe̍ma̍ ŋ̄ yīi̍ a̍ wānāā sōlīāā lāsa̍lāa̍, ndu̍yɛ̍ a̍ Li̍va̍īya̍ wo̍. Le̍la̍ŋ ma᷅l nda̍ le̍.”

³⁰O̍ ko̍ŋ kɔ̍ɔ̍lī, nyɛ̄ o̍ nyɛ̄ īsūmīa̍l to̍sa̍ mi̍ wāŋnda̍ ha̍ā sīmnu᷄ŋ a̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l, mi̍ ku̍u̍nā kpo̍u̍. Ndu̍yɛ̍ mi̍ ke᷅ wānāā sōlīāā lāsa̍lāa̍ a̍ Li̍va̍īya̍ kpe̍ku̍la̍ nda̍ a̍a̍ nɔ̍ le̍ tōsāa̍ la̍ŋ. Mi̍ chɔ᷅m wānā o̍ wānā nyɛ̄ ndu̍ o̍o̍ nɔ̍ le̍ tōsāa̍ wo̍.

³¹Ndu̍yɛ̍, mi̍ to̍sā mi̍ wāŋnda̍ wā hūnɔ̄ɔ̍ a̍ yɔ̄mnde̍ ō ma̍āŋndo̍ a̍ te̍le̍ŋnda̍ ndāla̍ŋ, le̍ sa̍lāla̍ŋ sōlīo̍o̍. Ndu̍yɛ̍ mi̍ to̍sā vɛ̄lɛ̄ mi̍ wāŋnda̍ wā hūnɔ̄ɔ̍ a̍ kɔ̄mndē tāse̍le̍ nda̍ a̍a̍ ke̍ndī ɔ̄ɔ̄ kōwɔ̄ɔ̍ o̍ chīɔ̄ɔ̄ŋ ndāa̍ŋ ni᷄ŋ nde̍ŋ, māā kē o̍ chīɛ̍i̍ Mɛ̄lɛ̄ka̍a̍ ni᷄ŋ. O̍ ko̍ŋ, mi̍ pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ nu̍u̍, lo̍o̍nu̍ŋ a̍ ya̍ le̍ mā chē ya̍ nyīnā.”