Read Southern Kisi Nɛ̄hīma̍yā 2 Bible Online

Nɛ̄hīma̍yā 2 - Southern Kisi bible

Nɛ̄hīma̍yā 2

¹Wɔ̄sī māsāa̍ Āŋtāsa̍a̍sī o̍ chi̍ŋa̍ wɔ̄sīla̍ŋ bi̍di̍i̍ŋ o̍ lēmāsā wo̍, pāa̍le̍ pi᷅lɛ̍ o̍ pāŋgi̍i̍ Ne̍sa᷅ŋnde̍[3] ni᷄ŋ, mi̍ wa᷅ māsāa̍ Āŋtāsa̍a̍sī mūɛ̄īya̍ŋ tālāllo̍ māā pāāndū. Hɔ̄lla̍ wa̍ ya̍ ā yīyāā a̍ kɔ̄l ya̍ i̍i̍ ta̍mbu̍ wo̍. Ndu̍yɛ̍, kāni̍ bɛ̍ɛ̍ ya̍ bi̍ī ndu̍ mūɛ̄īya̍ŋ tālāllo̍, ndu̍ o̍o̍ chi̍ wɔ̍ ya̍ hɔ̄lla̍ ā yīyāā le̍nde̍ le̍.

²O̍ ko̍ŋ, mbo̍ nyūnā ya̍ āā, “Vɛ᷅ hāū hɔ᷅lla̍ yīīyo̍ nu̍a̍ā? A̍ cho̍ yɛ̍ a̍ nāā le̍. Īsɔ̄ɔ̍ kɛ̍ɛ̍ nu̍m yɔ̄nɔ᷄ŋ ma̍ tāmbū kɔ̄l te̍.” Mɛ̄ɛ̍ o̍ nyu̍na̍ ya̍ le̍nde̍, mi̍ sīōōŋnde̍ bīī ya̍.

³Kɛ̍ mi̍ di̍mūl ndu̍ a̍a̍, “Vi̍o̍u̍ na̍a̍ chōo̍ kɛ̍ndi̍a̍a̍ fāllo̍. Ō cho̍ fu̍u̍le̍ ya̍ cho̍ kɔ̄l tāmbɛ̍i̍yo̍ le̍, chi̍e̍e̍ nāā bɛ̍ndōo̍, nāa̍ nda̍ chɔ̍ fi̍nyāā nīāā ma̍māa̍ wa̍, ō chō hāū pɔ᷅mndo̍. Sāāsāla̍ wa̍ chi̍e̍e̍ nāā ko̍ŋ lā bālāā la̍ŋ, dīōlā sāāsāla̍ la̍ŋ kpo̍u̍ lā chō hāū la̍ ŋu̍a̍lɛ̍i̍la̍ŋ.”

⁴O̍ ko̍ŋ, mi̍ māsā bɛ̍ndōo̍ nyūnā ya̍ āā, “Mɛ̄ɛ̍ yɛ̄ɛ̍nɛ̍ ŋ̄ yēēma̍ yɛ̄ mī I̍ to̍sa̍l nu̍m?” O̍ ko̍ŋ, mi̍ pi̍ɛ̍ī Mɛ̄lɛ̄ka̍ cho̍ o̍ fo̍ndāŋ ndɔ̄ɔ̍ chōo̍ cho̍o̍ wo̍ a̍ ndi̍ o̍kɔ̄ɔ̄.

⁵Mi̍ mu̍lī māsā bɛ̍ndōo̍ dīōm a̍a̍, “Fāllo̍, tē ō bɛ̄ndā pɛ̍ a̍ nūm, ndu̍yɛ̍ mā hīnī kɔ̄l a̍ ya̍ bu̍ɛ̍ī nūmndo̍, mɛ̄ɛ̍ yāndi̍i̍ ke̍ ya̍ fo̍ndāa̍ mī mi̍i̍ŋgu̍ Chu̍dā, mī kɔ̄ mi̍ŋgī chi̍e̍e̍ nāā bɛ̍ndōo̍ tāŋgūl, nāa̍ nda̍ chɔ̍ fi̍nyāā nīāā ma̍māa̍ wa̍.”

⁶Māsā bɛ̍ndōo̍ wa̍ īchāli̍, mi̍ la̍a̍ ndɔ̄ wa᷅ ndu̍ īchāli̍ i̍kɛ̍i̍. Mi̍ māsā bɛ̍ndōo̍ nyūnā ya̍ āā, “Tē ā kūɛ̄ pɛ̍, vɛ̄ɛ̍nɛ̍ kpɛ̍ ŋ̄ chō yɛ̄ lākɔ̄ vīōūwɔ̄ɔ̄? Ndu̍yɛ̍ lɔ̍ɔ̍ kūɛ̍ɛ̍nɛ̍ ŋ̄ chō yɛ̄ mīīŋgū na̍nu᷄ŋ?” Mi̍ chɔ᷅m ndu̍ te̍le̍ŋ ya̍ cho̍ mīīŋgū wo̍. O̍ ko̍ŋ, mbo̍ chɛ̄l le̍ mī Ī ku̍ɛ̄.

⁷O̍ ko̍ŋ kɔ̍ɔ̍lī, mi̍ di̍mūl ndu̍ vɛ̄lɛ̄ a̍a̍, “Tē ō bɛ̄nda̍ pɛ̍, mɛ̄ɛ̍ yāndi̍i̍ po̍o̍nyi̍a̍a̍ ya̍u̍la̍ŋ nāa̍ māsāa̍ ŋ̄būŋgāa̍ cho̍ o̍ Pīo̍o̍ Yūfi̍lu̍a̍tīī bā pāa̍le̍ŋ lē dēllo̍ wa̍ chūā, mā di̍mu̍l nda̍ māā, ā chɛ᷄l la̍ mī ke̍e̍ku̍ o̍ lɛ̄ŋndē ndāle̍ŋ ni᷄ŋ yɛ̍lɛ̍kɛ̍lɛ̍ɛ̍ mī I̍ ku̍ɛ̄ Chu̍dā. Mā ke̍ ya̍ yāu̍la̍ la̍ŋ mī ku̍ɛ̄ a̍ la̍ŋ o̍ bā.

⁸Ndu̍yɛ̍, mā ke̍ ya̍ vɛ̄lɛ̄ yāu̍wo̍ le̍ A̍sa̍fī, wāna̍ cho̍ būndɛ̍ lēmāsāa̍ Chu̍dā māndāa̍ wo̍, le̍ mbō ke̍ ya̍ yɔ̄mīī tāŋgūlɛ̄i̍ ī ti᷄ŋ. Kāni̍, I̍ nɔ̍ mī I̍ kɔ̍ ta̍ŋgūl dīōlā sāāsa̍ nɔ̍ le̍ wāa̍ o̍ fo̍ndāŋ wāŋnda̍ chāl le̍ chi̍ɛ̍i̍ Mɛ̄lɛ̄ka̍a̍ māndāa̍ wo̍. Ndu̍yɛ̍, mī ta̍ŋgu̍l vɛ̄lɛ̄ sāāsa̍ ba̍lu̍ chi̍o̍o̍ wo̍, o̍ ko̍ŋ kɔ̍ɔ̍lī, a̍ nāa̍ ya̍ pi̍la̍ I̍ wa᷅ ni̍ŋ nda̍.” Ndu̍yɛ̍, Mɛ̄lɛ̄ka̍ nūu̍ wa̍ ya̍ kɔ̄ɔ̄lī. Nyɛ̄ o̍ nyɛ̄ ya̍ nyu̍na̍ māsā bɛ̄ndōo̍ le̍ ndu̍, mi̍ māsāa̍ chɛ̄l la̍ dīōm.

⁹Mɛ̄ɛ̍ ya̍ I̍ si̍i̍lu̍ŋ kɔ᷅la̍ŋ, mi̍ māsā bɛ̄ndo̍o̍ ō kē ya̍ pūa̍a̍ chɔ̄ūwa̍ ā ti᷄ŋ, a̍ pūa̍a̍ chɔ̄ūwāa̍ ku̍ā o̍ su̍a̍a̍ chōo̍ wa̍ ā ti᷄ŋ le̍ ya̍ māndāa̍. Mɛ̄ɛ̍ ya̍ I̍ fu̍u̍lu̍u̍ o̍ Pīo̍o̍ Yūfi̍lu̍a̍tīī bā pāa̍le̍ŋ lē dēllo̍, mi̍ yɔ̍ŋgū māsāa̍ ŋ̄būŋgāa̍ wa̍ o̍ fo̍ndāŋ kōŋ nda̍ yāu̍la̍ māsā bɛ̍ndōo̍ ō ke᷄ ya̍ le̍ nda̍ la̍ŋ, le̍ mā chɛ᷄l la̍ mī I̍ hi̍o̍ū.

¹⁰Kɛ̍ mɛ̄ɛ̍ Sāŋba̍lā, wānā wa̍ā Bɛ̄tī Ho̍lɔ̄ŋ chi̍e̍e̍, a̍ Tōba̍a̍yā wānā bɛ̍ndōo̍ ō pīlɛ̍ o̍ būŋgɛ̄ī A̍mɔ̄ŋnde̍ ni᷄ŋ a̍ tu̍e̍ī māā wāŋndo̍ hīŋ le̍ I̍sɔ̄lūɛ̍i̍ya̍ mālāa̍, ma̍ tāmbū kɔ̄l ta̍u̍ ta̍u̍ a̍ sūɛ̍i̍ he̍ī o̍kɔ̄ɔ̄.

¹¹O̍ ko̍ŋ kɔ̍ɔ̍lī, mi̍ I̍ fu̍u̍lūū Chūlu̍sɛ̄lɛ̄m. Mɛ̄ɛ̍ ya̍ fu̍u̍lu̍u̍, I̍ chi̍i̍ pālɛ̍i̍ ī ŋīi̍ŋ, o̍ ya̍a̍ ndɔ̄ɔ̍,

¹²īchɔ̄llo̍, mi̍ I̍ chu̍ā pūa̍a̍ ā ti᷄ŋ mi̍ ŋ̄ fūlā le̍ mī I̍ ba̍lu̍ Chūlu̍sɛ̄lɛ̄m mī I̍ mɛ̍ɛ̍ndi̍a̍ŋ ndu̍. Ndu̍yɛ̍ a̍ te̍le̍ŋ ko̍ŋ kpo̍u̍ ya̍ i̍i̍ di̍mu̍l lɔ̍ wānā o̍ wānā nyɛ̄ Mɛ̄lɛ̄ka̍ ndu̍ o̍o̍ dɔ̍ū ya̍ o̍ kɔ̄l le̍ tōsāa̍ a̍ Chūlu̍sɛ̄lɛ̄m ndo̍ le̍. Ndu̍yɛ̍ fūlā na̍a̍ ŋ̄ fūla̍ īchɔ̄l ko̍ŋ le̍ Chūlu̍sɛ̄lɛ̄m mɛ̄ɛ̄nda᷄ŋndo̍ wo̍, ŋ̄ ku̍e̍ a̍ chɔ̄lū o̍ chɔ̄lū chēle̍ŋ te̍ mɛ̄ɛ̍ sōfɛ̍lɛ̍ ya̍ wa̍ kɔ̄la̍ŋ lēchōo̍ wo̍.

¹³O̍ ko̍ŋ kɔ̍ɔ̍lī, mi̍ ŋ̄ mālnu᷄ŋ i̍chɔ̍l kōŋ mi̍ ŋ̄ kēēkū a̍ dīō sāāsā kpōlōŋ kpo̍lo̍ŋndo̍ bā pāa̍le̍ŋ lē dēllo̍. Mi̍ ŋ̄ tūūsū bā tōūwo̍, mi̍ ŋ̄ hīāū fo̍ndāŋ māmɛ̄ŋ nda̍ vēēlū āā, mɛ̄ŋmā tāmba̍lāka̍a̍ wo̍. Mi̍ ŋ̄ hūŋ o̍ dīō sāāsā sa᷄llo̍. I̍ wa̍ kɔ̄la̍ŋ, mi̍ I̍ mɛ̍ɛ̍ndīa̍ŋ sa̍āsa̍ wa̍ chi̍o̍o̍ ō bālāā mi̍ ya̍a̍mɔ̍ɔ̍wa̍ pēsī pēsī ndu̍ wo̍, o̍ ko̍ŋ kɔ̍ɔ̍lī, a̍ dīōlā sāāsā ko̍ŋ lā ya̍a̍mɔ̍ɔ̍wa̍ ā lōm nda̍ŋ.

¹⁴O̍ ko̍ŋ kɔ̍ɔ̍lī, mi̍ I̍ hi̍a̍ū lāchī a̍ kɔ̄la̍ŋ, mi̍ I̍ ke̍e̍kū a̍ dīō sāāsa̍ Māmɛ̄ŋndo̍ bā chi̍o̍o̍, ndu̍yɛ̍ a̍ dīō sāāsa̍ So̍o̍ŋ māmɛ᷄ŋ māsā bɛ̍ndōo̍ ndu̍ o̍o̍ pu̍lūŋ ndo̍. Kɛ̍ nɛ̄īyo̍ wa̍ sɔ̍ɔ̍kɛ̍nyɛ̍ɛ̍, sōfɛ̍lɛ̍ ya̍ wa̍ kɔ̄la̍ŋ lēchōo̍ wo̍ ndu̍ o̍o̍ nɔ̍lā ke̍e̍la̍ŋ lo̍ŋ te̍.

¹⁵O̍ ko̍ŋ, mi̍ he̍e̍lū a̍ kpōlo̍ŋ kpo̍lo̍ŋndo̍ Ki̍di̍lɔ̄ŋ. Mi̍ ku̍ā le̍nde̍ a̍ sāāsa̍ ya̍a̍mɔ̍ɔ̍wa̍ pēsi̍ pe̍si̍ ko̍ŋ ndo̍ mɛ̄ɛ̄ndīa̍ŋndo̍ īchɔ̄l kōŋ kɛ᷅. O̍ ko̍ŋ kɔ̍ɔ̍lī, mi̍ mi̍i̍ŋgū a̍ mākɔ̄ɔ̄, mi̍ ke̍e̍kū a̍ dīō sāāsā kpōlōŋ kpo̍lo̍ŋndo̍ mi̍ I̍ he᷅l chi̍e̍e̍.

¹⁶Kɛ̍ wānāā bɛ̄ndūāā chi̍e̍e̍ya̍ ō pīlɛ̍ bɛ̍ɛ̍ si̍na̍ nāa̍ ya̍ I̍ wa̍ wa̍ le̍, ndu̍yɛ̍ ā sīna̍ nyɛ̄ ya̍ I̍ wa̍ tōsāā wo̍ le̍. Ndu̍yɛ̍, chāāŋāā nīāā chu̍ūwa̍ ni̍, wānāā sōlīāā lāsa̍lāa̍ ni̍, lāŋgba̍ā kālāā chi̍e̍e̍ya̍ ni̍, a̍ wānāā bɛ̄ndūa̍a̍, a̍ wāŋnda̍ ā pīli̍a̍a̍ ā nda̍ a̍a̍ nɔ̍ bɛ̍ɛ̍ le̍ wa̍llo̍ ho̍ō tōsāa̍ wa̍, I̍ di̍mu̍l nda̍ a̍ ndi̍ o̍kɔ̄ɔ̄ le̍.

¹⁷O̍ ko̍ŋ kɔ̍ɔ̍lī, mi̍ di̍mūl nda̍ a̍a̍, “Nya̍ pi̍la̍ lā chē ni᷅ŋ kpūndɛ̍ bɛ̄ndu̍ ko̍ma̍l na̍a̍ wo̍. Chūlu̍sɛ̄lɛ̄m, chi̍e̍e̍ nāā bɛ̍ndōo̍, ō chō hāū pɔ᷅m. Sāāsa̍ wa̍ chi̍o̍o̍ ō bālāā wo̍ kpo̍u̍, ō pīɔ̍l, dīōlā ndɔ̄la̍ŋ kpo̍u̍ lā chō hāū la̍ ŋu̍a̍lɛ̍i̍la̍ŋ. Le̍la̍ŋ na̍a̍ kpo̍u̍, ŋ̄ sɔ̄ɔ̄ŋgu᷅ŋ bāla̍ŋ mī ŋ̄ tāŋgu̍lu᷅ŋ sāāsāa̍ Chūlu̍sɛ̄lɛ̄m, mī ŋ̄ fūla̍ o̍ si̍ɔ̍mbu̍la̍ŋ nda᷅ŋ ni᷄ŋ.”

¹⁸Ndu̍yɛ̍, mi̍ chɔ᷅m nda̍ a̍ kɛ̄ndɛ̄ī bɛ̍ndūī Mɛ̄lɛ̄ka̍ nūu̍ ō tōsa̍l la̍ o̍ sūɛ̍i̍ he̍ī ni᷄ŋ nde̍, ndu̍yɛ̍ a̍ dīōmndā māsā bɛ̍ndōo̍ ō dīmu̍l la̍ la̍ŋ. Mɛ̄ɛ̍ ya̍ I̍ chi̍i̍ nda̍ ko̍na̍ do̍u̍nɔ᷄ŋ le̍nde̍ kpe̍nde̍, ma̍ dīmī āā, “Mɛ̄ɛ̍ ŋ̄ kāndu᷅ŋ tāŋgūl kālāa̍ su̍ŋ su̍ŋ.” O̍ ko̍ŋ, ma̍ bɛ̄ɛ̄ndīa̍ŋ ma̍ kāndū tāŋgūllo̍.

¹⁹Kɛ̍ mɛ̄ɛ̍ Sāŋba̍lā, a̍ Tōba̍a̍yā, a̍ Kɛ̍ɛ̍sīɛ̄m lāŋu̍nɔ̄ A̍la̍būi̍nɔ̍ pi᷅lɛ̍ ā tūēī a̍ tūūlā na̍a̍ ŋ̄ tūu̍ la̍ŋ o̍kɔ̄ɔ̄, ma̍ sāā na̍a̍ māmɔ̄ɔ̍ ma̍ pɛ̄ɛ̄sā na̍a̍ āā, “Mbɔ̄, ō yɛ̄ɛ̍nɛ̍ nya̍ chō yɛ̄ ho̍ō tōsāa̍? Bāā lā yēēma̍ māyēēmāā mī lā sīmu̍l māsā bɛ̍ndōo̍?”

²⁰O̍ ko̍ŋ kɔ̍ɔ̍lī, mi̍ mu̍lūl nda̍ a̍a̍, “Mɛ̄lɛ̄ka̍ cho̍ o̍ fo̍ndāŋ ndɔ̄ɔ̍ chōo̍ cho̍o̍ wo̍, ō chō na̍a̍ mālā mī ŋ̄ tīu̍ wa̍llo̍ ho̍ō bā. Bu̍ɛ̍i̍yāā ndūa̍a̍ na̍a̍ ŋ̄ chō ni̍. Ndu̍yɛ̍ ŋ̄ chō Chūlu̍sɛ̄lɛ̄m kāndɔ̄ɔ̄ tāŋgūllo̍. Nya̍ nya̍, lā nɔ̍ di̍ o̍ di̍ o̍ nyɛ̄m wāā Chūlu̍sɛ̄lɛ̄m chōo̍ le̍. Chi̍o̍o̍ ho̍ō ō cho̍ bɛ̍ɛ̍ chi̍e̍e̍ nya̍ le̍. Ndu̍yɛ̍, sɔ̄ɔ̍ŋ māsīndɛ᷄ŋ yɔ̍nu̍ŋ a̍ chi̍o̍o̍ ho̍ō o̍kɔ̄ɔ̄ wo̍ŋ ki̍nɛ̍i̍, dīōlā nyāla̍ cho̍ le̍ni̍ŋ te̍.”