Read Southern Kisi Nɛ̄hīma̍yā 3 Bible Online

Nɛ̄hīma̍yā 3 - Southern Kisi bible

Nɛ̄hīma̍yā 3

¹Wānāā yɛ̍ yi̍a̍a̍ mi̍ŋgi̍ sāāsāa̍ Chūlu̍sɛ̄lɛ̄m a̍ dīōlā ndɔ̄la̍ŋ tāŋgūl la̍, nda̍ cho̍ ha̍ā ni̍. Īlīa̍a̍si̍bī, māsa̍ wānāā sōlīāā lāsa̍lāa̍, nda̍ chāa̍ŋāā ndūāā wa̍nāā sōlīāā lāsa̍lāa̍, nda̍ mi̍ŋgi̍ dīō sāāsa̍ nɔ̍ dīōla̍ŋ āā dīō sāa̍ wo̍ tāŋgūl ni̍, ma̍ lɛ̄ɛ̄ndūū ko᷅ŋndā ndɔ̄la̍ŋ, ndu̍yɛ̍ ma̍ māl ndu̍ Mɛ̄lɛ̄ka̍ o̍ bā. Chɔ̍ŋ o̍ dīō sāāsā ko̍ŋ, mbo̍ kɔ̍ bi̍ī a̍ chīɛ̄ī vīlɛ̄ī nda̍ vēēlū āā, Kɛ̄mɔ̄ɔ̍ wo̍, ndu̍yɛ̍ a̍ chīɛ̄ī vīlɛ̄īyo̍ Ha̍na̍nī, kpo̍u̍ nda̍ mi̍ŋgi̍ sāāsā ko̍ŋ tāŋgūl ni̍, ndu̍yɛ̍ ndu̍ bɛ̍ɛ̍, ma̍ māl ndu̍ Mɛ̄lɛ̄ka̍ o̍ bā.

²O̍ ko̍ŋ kɔ̍ɔ̍lī, mi̍ wāŋnda̍ Chɛ̄lu̍i̍kō chi̍e̍e̍ nda̍ tāŋgūl būŋgɛ̄i̍ chɛ̍ɛ̍li̍āŋ a̍ būŋgɛ̄ī wāŋnda̍ ha̍ā ve̍. Mi̍ Sa̍kɔ̄ɔ̄, po̍ I̍mi̍lī wo̍ ndu̍ ta̍ŋgūl būŋgɛ̄i̍ chɛ̍ɛ̍li̍āŋ a̍ būŋgɛ̄i̍ wāŋnda̍ Chɛ̄lu̍i̍kō ve̍.

³Pūa̍a̍ Hāsɛ̍nāā wa̍ nda̍ mi̍ŋgi̍ dīō sāāsa̍ nɔ̍ dīōla̍ŋ āā dīō Sūūwa̍ wo̍ tāŋgūl ni̍. Dīō sāāsāa̍ ho̍ō, mɛ̄ɛ̍ nda̍ tōōsi̍a̍a̍ ko̍ŋnjīi̍yo̍ŋ ma̍ lɛ̄ɛ̄ndūū ko᷅ŋndā ndɔ̄la̍ŋ, o̍ ko̍ŋ kɔ̍ɔ̍lī, ma̍ tōōsīāā nyɛ̄la̍ŋ a̍ chīli̍ŋndo̍ŋ le̍ su̍lu̍ku̍la̍ŋ wōūwo̍, ndu̍yɛ̍ ma̍ tōōsīāā yɔ̄mīī vīlɛ̄īye̍ le̍ la̍ŋ kīndāa̍.

⁴Mɛ̄lu̍ɛ̍mo̍tī, po̍ Yūla̍yā wo̍, ndu̍ yɔ̍nūŋ māā po̍ ma̍ma̍ Ha̍kɔ̍sī wo̍ ni̍, ndu̍ mi̍ŋgi̍ būŋgɛ̄i̍ wa̍ o̍ būŋgɛ̄ī wāŋnda̍ ha̍ā īkɛ̄i̍ ye̍ tāŋgūl ni̍. O̍ ko̍ŋ kɔ̍ɔ̍lī, Mɛ̍si̍u̍lām, po̍ Bɛ̄lu̍i̍chīāā wo̍, ndu̍ yɔ̍nūŋ māā po̍ ma̍ma̍ Mɛ̄sīɛ̄sa̍bɛ̄l wo̍ ni̍, mi̍ ndu̍ mi̍ŋgī būŋgɛ̄i̍ wa̍ o̍ būŋgɛ̄i̍ Mɛ̍lu̍i̍mɔ̄ɔ̄ ve̍ īkɛ̄i̍ ye̍ tāŋgūl. Sa̍dɔ̍kī, po̍ Ba̍nā wo̍ ndu̍ mi̍ŋgi̍ būŋgɛ̄i̍ wa̍ o̍ būŋgɛ̄i̍ Mɛ̍si̍u̍lām nde̍ īkɛ̄i̍ ye̍ tāŋgūl ni̍.

⁵O̍ ko̍ŋ kɔ̍ɔ̍lī, pūa̍a̍ Tɛ̍ko̍wā chi̍e̍e̍ nda̍ mi̍ŋgi̍ būŋgɛ̄i̍ wa̍ o̍ būŋgɛ̄i̍ Sa̍dɔ̍kī ve̍ īkɛ̄i̍ ye̍ tāŋgūl ni̍. Kɛ̍ wāŋnda̍ ha̍ā, wānāā ndāā bɛ̍ndūa̍a̍ ā wōu̍ lābā o̍ tāŋgūllo̍ ho̍ō ni᷄ŋ te̍.

⁶O̍ ko̍ŋ kɔ̍ɔ̍lī, Chōwa̍a̍dā, po̍ Pa̍a̍sīāā wo̍, a̍ Mɛ̍si̍u̍lām, po̍ Bɛ̄sōdɛ̍yā wo̍, nda̍ mīŋgī dīō sāāsa̍ nɔ̍ dīōla̍ŋ āā, Chɛ̄si̍a̍nāā wo̍ tāŋgūl ni̍. Dīō sāāsāa̍ ho̍ō, mɛ̄ɛ̍ nda̍ mīŋgi̍ ndu̍ tāŋgu̍l, ma̍ tōōsīāā ko̍ŋnjīi̍yo̍ŋ, ma̍ lɛ̄ɛ̄ndūū ko᷅ŋndā ndɔ̄la̍ŋ, o̍ ko̍ŋ kɔ̍ɔ̍lī, ma̍ tōōsīāā nyɛ̄la̍ŋ a̍ chīli̍ŋndo̍ŋ le̍ su̍lu̍ku̍la̍ŋ wōūwo̍, ndu̍yɛ̍ ma̍ tōōsīāā yɔ̄mīī vīlɛ̄īye̍ le̍ ndu̍ kīndāa̍.

⁷Mɛ̄la̍tīāā, wānā wa̍ā Ki̍bīɔ̄ŋ chi̍e̍e̍, a̍ Cha̍a̍dɔ̄ŋ, wānā wa̍ā Mɛ̄lo̍nɔ̍tī chi̍e̍e̍, a̍ pūa̍a̍ Ki̍bīɔ̄ŋ, a̍ ha̍ā Mi̍si̍pā chi̍e̍e̍, nda̍ mi̍ŋgi̍ būŋgɛ̄i̍ wa̍ o̍ būŋgɛ̄ī wāŋnda̍ ha̍ā īkɛ̄i̍ ye̍ tāŋgūl ni̍. Fo̍ndāŋndā pūa̍a̍ ha̍ā ā fūla̍ la̍ŋ ki̍nɛ̍i̍, māsa̍ ībūŋga̍ wa̍ o̍ Pēē Bɛ̍ndōo̍ Yūfi̍lu̍a̍tīī bā pāa̍le̍ŋ lē dēl lo̍ wo̍, ndu̍ o̍ bā bɛ̄ŋgu̍ la̍ wa̍ ni̍.

⁸O̍ ko̍ŋ kɔ̍ɔ̍lī, Yu̍si̍ɛ̍ɛ̄, po̍ Hāāha̍yā wo̍, sūmnɔ̍ to̍sā wa̍llo̍ a̍ ko̍o̍līi̍yo̍ŋ ndo̍, mi̍ ndu̍ mi̍ŋgī būŋgɛ̄i̍ wa̍ o̍ būŋgɛ̄ī pūa̍a̍ ha̍ā īkɛ̄i̍ ye̍ tāŋgūl. Mi̍ Hānāni̍yā, wāna̍ to̍o̍sīāā nyɛ᷅m chūŋ kɛ̄ndɔ᷄ŋ ndo̍, ndu̍ mi̍ŋgī būŋgɛ̄i̍ wa̍ o̍ būŋgɛ̄i̍ Yu̍si̍ɛ̍ɛ̄ ve̍ īkɛ̄i̍ ye̍ tāŋgūl, mbo̍ kɔ̍ mɛ̍ɛ̍lū o̍ sāāsa̍ nda̍ vēēlū āā, sāāsā kpe̍nde̍ke̍lo̍o̍ wo̍ di̍.

⁹O̍ ko̍ŋ kɔ̍ɔ̍lī, Lūɛ̄fa̍i̍yāā, po̍ Hɔ̍ɔ̄ wo̍ ndu̍ mi̍ŋgi̍ būŋgɛ̄i̍ wa̍ o̍ būŋgɛ̄i̍ Hānāni̍yā ve̍ īkɛ̄i̍ ye̍ tāŋgūl ni̍. Ndu̍yɛ̍ būŋgɛ̄ī Chūlu̍sɛ̄lɛ̄m nde̍ tɛ̄ndāa̍ tɛ̍ɛ̄ŋ ki̍nɛ̍i̍, Lūɛ̄fa̍i̍yāā ko̍ŋ, ndu̍ wa̍ kūmbūe̍i̍ ī pīlɛ̍i̍ chīla̍ŋ ni̍.

¹⁰Mi̍ Chɛ̄da̍yāā, po̍ Hālūma̍fī wo̍ ndu̍ mi̍ŋgī būŋgɛ̄i̍ wa̍ o̍ būŋgɛ̄i̍ Lūɛ̄fa̍i̍yāā ve̍ īkɛ̄i̍ ye̍ tāŋgūl. Ndu̍yɛ̍ būŋgɛ̄ī o̍ ta̍ŋgu̍l he̍ī ve̍, īkɛ̄i̍ lo̍ŋ chīɛ̄ī ndɔ̄ɔ̍ wa̍ ni̍. Ha̍tɔ̄ɔ̄, po̍ Hāsīābi̍nɛ̍yā wo̍, ndu̍ mi̍ŋgi̍ būŋgɛ̄i̍ wa̍ o̍ būŋgɛ̄i̍ Chɛ̄da̍yāā ve̍ īkɛ̄i̍ ye̍ tāŋgūl ni̍.

¹¹O̍ ko̍ŋ kɔ̍ɔ̍lī, mi̍ Māli̍ki̍chā, po̍ Ha̍lūīm ndo̍ nda̍ Hāsi̍u̍bī, po̍ Pāhāā Mo̍wa̍bī wo̍, nda̍ mīŋgī būŋgɛ̄i̍ wa̍ o̍ būŋgɛ̄i̍ Ha̍tɔ̄ɔ̄ ve̍ īkɛ̄i̍ ye̍ tāŋgūl. Ndu̍yɛ̍ nda̍ mi̍ŋgi̍ vɛ̄lɛ̄ chīɛ̄ī vīlɛ̄ī vi̍lɛ̄ī nda̍ lūām bēe̍dīi̍yo̍ lo̍ŋ ndo̍ tāŋgūl ni̍.

¹²O̍ ko̍ŋ kɔ̍ɔ̍lī, Si̍a̍lūm, po̍ Hālōhɛ̍sīī wo̍, nda̍ chūāūwāā ndūāā la̍a̍ndūa̍a̍ nda̍ mi̍ŋgi̍ būŋgɛ̄i̍ wa̍ o̍ būŋgɛ̄i̍ wāŋnda̍ ha̍ā īkɛ̄i̍ ye̍ tāŋgūl ni̍. Ndu̍yɛ̍ Si̍a̍lūm ko̍ŋ, būŋgɛ̄ī Chūlu̍sɛ̄lɛ̄mnde̍ kūmbūe̍i̍ ī pīlɛ̍i̍ ki̍nɛ̍i̍, ndu̍ wa̍ ndi̍ chīla̍ŋ ni̍.

¹³O̍ ko̍ŋ kɔ̍ɔ̍lī, mi̍ Ha̍nūŋ nda̍ wānāā wāā Sa̍no̍wāā chi̍e̍e̍ nda̍ mīŋgī dīō sāāsa̍ kpōlōŋ kpo̍lo̍ŋndo̍ tāŋgūl. Dīō sāāsāa̍ ho̍ō, mɛ̄ɛ̍ nda̍ mīŋgi̍ ndu̍ tāŋgu̍l, ma̍ tōōsīāā ko̍ŋnjīi̍yo̍ŋ, ma̍ lɛ̄ɛ̄ndūū ko᷅ŋndā ndɔ̄la̍ŋ, o̍ ko̍ŋ kɔ̍ɔ̍lī, ma̍ tōōsīāā nyɛ̄la̍ŋ a̍ chīli̍ŋndo̍ŋ le̍ su̍lu̍ku̍la̍ŋ wōūwo̍, ndu̍yɛ̍ ma̍ tōōsīāā yɔ̄mīī vīlɛ̄īye̍ le̍ ndu̍ kīndāa̍. O̍ ko̍ŋ kɔ̍ɔ̍lī, nda̍ mi̍ŋgi̍ būŋgɛ̄i̍ chi̍ɛ̍ɛ̍li̍āŋ a̍ būŋgɛ̄ī Hālōhɛ̍sīī nda̍ chūāūwāā ndūāā la̍a̍ndūa̍a̍ ā mīŋgi̍ tāŋgūlle̍ tāŋgu̍l ni̍, ma̍ kɔ̍ mɛ̍ɛ̍lū o̍ dīō sāāsa̍ sa᷄llo̍ di̍. Sāāsa̍ pūa̍a̍ ha̍ā tāŋgu̍l ho̍ō wo̍, chɔ̍ŋ a̍ nāa̍ nda̍ kāndu̍ wa̍ mbo̍ kūā a̍ nāa̍ nda̍ mɛ̄ɛ̄lu̍ wa̍, ō wā le̍ nɛ̄īyo̍ wāa̍ ō pīlɛ̍ a̍ kɛ̄mɔ̄ɔ̍ lē ŋu̍ɛ̍ɛ̍nu̍ (1,500).

¹⁴O̍ ko̍ŋ kɔ̍ɔ̍lī, mi̍ Māli̍ki̍chā po̍ Lu̍e̍cha̍bī wo̍ ndu̍ mi̍ŋgī dīō sāāsa̍ sa᷄llo̍ tāŋgūl. Dīo̍o̍ ho̍ō, mɛ̄ɛ̍ o̍ mi̍ŋgi̍ ndu̍ tāŋgūl mbo̍ tōōsīāā ko̍ŋnjīi̍yo̍ŋ, mbo̍ lɛ̄ɛ̄ndūū ko᷅ŋndā ndɔ̄la̍ŋ, o̍ ko̍ŋ kɔ̍ɔ̍lī, mbo̍ tōōsīāā nyɛ̄la̍ŋ a̍ chīli̍ŋndo̍ŋ le̍ su̍lu̍ku̍la̍ŋ wōūwo̍, ndu̍yɛ̍ mbo̍ tōōsīāā yɔ̄mīī vīlɛ̄īye̍ le̍ ndu̍ kīndāa̍. Pōo̍ ho̍ō yɛ̍, ndu̍ wa̍ būŋgɛ̄ī Bɛ̄tī Hāki̍lūīmnde̍ chīla̍ŋ ni̍.

¹⁵O̍ ko̍ŋ kɔ̍ɔ̍lī, mi̍ Si̍a̍lūm, po̍ Kōho̍o̍sɛ̄ wo̍ ndu̍ mi̍ŋgī dīō sāāsa̍ māmɛ̄ŋndo̍ tāŋgūl. Mbo̍ chūā yīndɔ̄ɔ̍ o̍ dīō sāāsāa̍ ho̍ō chōo̍ mbo̍ wūū ndu̍. O̍ ko̍ŋ kɔ̍ɔ̍lī, mbo̍ lɛ̄ɛ̄ndūū dīōlā ndɔ̄la̍ŋ. Mbo̍ tōōsīāā nyɛ̄la̍ŋ a̍ chīli̍ŋndo̍ŋ le̍ su̍lu̍ku̍la̍ŋ wōūwo̍, ndu̍yɛ̍ mbo̍ tōōsīāā yɔ̄mīī vīlɛ̄īye̍ le̍ ndu̍ kīndāa̍. Ndu̍yɛ̍ ndu̍ mi̍ŋgi̍ vɛ̄lɛ̄ sāāsa̍ wa̍ o̍ so̍o̍ŋ māmɛ̄ŋndo̍ Si̍ɛ̍lāā tāŋgūl ni̍, o̍ kpe̍le̍ māsā bɛ̍ndōo̍ īkɛ̄i̍. Bi᷅ŋnda̍ chɛ̍ŋ o̍ chi̍e̍e̍ māsāa̍ Dēēve̍ wo̍[4] mi̍ lā tūāl la̍ŋ, o̍ bi᷅ŋndā lāŋ di̍ o̍ mɛ̍ɛ̍lu̍ a̍ ndu̍ tāŋgūllo̍ ni̍. Ndu̍yɛ̍ Si̍a̍lāā wo̍ ho̍ō, ndu̍ wa̍ būŋgɛ̄ī Mi̍si̍pā ve̍ chīla̍ŋ ni̍.

¹⁶O̍ ko̍ŋ kɔ̍ɔ̍lī, Nɛ̄hīma̍yā[5] po̍ A̍si̍bu̍kū wo̍, ndu̍ mi̍ŋgi̍ būŋgɛ̄i̍ chi̍ɛ̍ɛ̍li̍āŋ a̍ būŋgɛ̄ī Si̍a̍lūm o̍ mi̍ŋgi̍ tāŋgūlle̍ tāŋgūl ni̍, mbo̍ kɔ̍ fu̍u̍lūū o̍ sɛ̄i̍ māsāa̍ Dēēve̍ wo̍, a̍ o̍ fo̍ndāŋ māmɛ̄ŋ nda̍ tōōsi̍a̍a̍ wo̍, o̍ ko̍ŋ kɔ̍ɔ̍lī, a̍ o̍ fo̍ndāŋ pūa̍a̍ chɔ̄ūwa̍ ā wa̍ wo̍. Nɛ̄hīma̍yā ko̍ŋ yɛ̍, būŋgɛ̄ī Bɛ̄tīsɔ̍ɔ̄ve̍ kūmbōo̍ ō pīlɔ̄ɔ̍ ki̍nɛ̍i̍, ndu̍ wa̍ chīla̍ŋ ni̍.

¹⁷Wānāa̍ fu̍la̍ o̍ pūlāle̍ Li̍va̍īya̍ chōo̍ ma̍ sɔ̄ɔ̄ŋgūū le̍ sāāsāa̍ Chūlu̍sɛ̄lɛ̄m mīŋgīo̍o̍ tāŋgūllo̍ wa̍, dīōlā ndāla̍ŋ la̍ cho̍ la᷅ŋ ni̍. Lu̍e̍hūm, po̍ Ba̍nī wo̍ ndu̍ mi̍ŋgi̍ būŋgɛ̄i̍ chi̍ɛ̍ɛ̍li̍āŋ a̍ būŋgɛ̄i̍ Nɛ̄hīma̍yā ve̍ tāŋgu̍l le̍ ni̍. Hāsīābi̍yā wāna̍ wa̍ būŋgɛ̄ī Ke̍i̍lāāve̍ kūmbūe̍i̍ ī pīlɛ̍i̍ ki̍nɛ̍i̍ bo᷅lle̍ŋ ndo̍, ndu̍ mi̍ŋgi̍ būŋgɛ̄i̍ chi̍ɛ̍ɛ̍li̍āŋ a̍ būŋgɛ̄i̍ Lu̍e̍hɔ̄m nde̍ ve̍ tāŋgu̍l ni̍, le̍ būŋgɛ̄ī ndūɛ̍i̍ o̍ wa̍ bōlle̍ŋ nde̍.

¹⁸O̍ ko̍ŋ kɔ̍ɔ̍lī, Ba̍vāī, po̍ Hɛ̄na̍da̍dī wo̍, o̍ wa̍ būŋgɛ̄ī Ke̍i̍lāāve̍ kūmbūe̍i̍ ī pīlɛ̍i̍ bōlle̍ŋ ndo̍, mi̍ ndu̍ mi̍ŋgī būŋgɛ̄i̍ chi̍ɛ̍ɛ̍li̍āŋ a̍ būŋgɛ̄i̍ Hāsīābi̍yā ve̍ ve̍ tāŋgūl.

¹⁹O̍ ko̍ŋ kɔ̍ɔ̍lī, E̍sɔ̄, po̍ Chɛ̍sūāā wo̍, o̍ wa̍ māsāa̍ Mi̍si̍pā chi̍e̍e̍ wo̍, mi̍ ndu̍ mi̍ŋgī būŋgɛ̄i̍ chi̍ɛ̍ɛ̍li̍āŋ a̍ būŋgɛ̄ī kēŋ nde̍ tāŋgūl, o̍ fo̍ndāŋ nda̍ kɛ̄sī nyɛ᷅m chɔ̄ūwo̍ŋ ndo̍ lāchī mbo̍ fūūlūū o̍ sāāsāa̍ tūndɔ᷄ŋndo̍.

²⁰O̍ ko̍ŋ kɔ̍ɔ̍lī, Ba̍lu̍kī, po̍ Sa̍bāī wo̍, ndu̍ mi̍ŋgī būŋgɛ̄i̍ ka̍ndu̍ŋ nāa̍ sāāsāa̍ ō tūndu᷄ŋ nda̍ tāŋgūl ni̍, mbo̍ kɔ̍ mɛ̍ɛ̍lū o̍ chīɛ̍i̍ Īlīa̍a̍si̍bī wo̍ dīō di̍, māsa̍ wānāā sōlīāā lāsa̍lāa̍.

²¹O̍ ko̍ŋ kɔ̍ɔ̍lī, Me̍le̍mɔ̄ɔ̄, po̍ Yūla̍yā wo̍, mi̍ ndu̍ mi̍ŋgī būŋgɛ̄i̍ ka̍ndu̍ŋ o̍ dīō kōŋ nde̍ tāŋgūl, mbo̍ kɔ̍ mɛ̍ɛ̍lū nāa̍ chīɛ̄ī Īlīa̍a̍si̍bī wo̍ ō mɛ̄ɛ̄lū wa̍ di̍. Me̍le̍mɔ̄ɔ̄ ko̍ŋ yɛ̍, fi̍nyā ndɔ̄ ma̍mā wa̍ Ha̍kɔ̍sī ni̍.

²²Wānāā sōlīāā lāsa̍lāa̍ a̍ mi̍ŋgi̍ sāāsāa̍ Chūlu̍sɛ̄lɛ̄m tāŋgūl la̍ dīōlā ndāla̍ŋ la̍ cho̍ la᷅ŋ ni̍.

²³Bɛ̍ŋnja̍mīŋ nda̍ Hāāsi̍ɔ̍bī mi̍ nda̍ mīŋgī būŋgɛ̄i̍ ka̍ndu̍ŋ nāa̍ chīɛ̍i̍ Īlīa̍a̍si̍bī wo̍ ō mɛ̄ɛ̄lu̍ wa̍ tāŋgūl, o̍ chīɛ̍i̍ ndāa̍ lāchī. Mi̍ Āsālu̍i̍yā, po̍ Māāsɛ̍yā wo̍, ndu̍ mi̍ŋgī būŋgɛ̄i̍ chi̍ɛ̍ɛ̍li̍āŋ a̍ būŋgɛ̄ī kēŋ nde̍ tāŋgūl, o̍ chīɛ̄ī ndɔ̄ɔ̍ lāchī. Ndu̍yɛ̍ Āsālu̍i̍yā yɛ̍, fi̍nyā ndɔ̄ ma̍mā wa̍ Ānāna̍yā ni̍.

²⁴O̍ ko̍ŋ kɔ̍ɔ̍lī, Bi̍nu̍ī, po̍ Hɛ̄na̍da̍dī wo̍, ndu̍ mi̍ŋgi̍ būŋgɛ̄i̍ kāndu̍ŋ o̍ chīɛ̍i̍ Āsālu̍i̍yā wo̍ ve̍ tāŋgūl ni̍, mbo̍ kɔ̍ mɛ̍ɛ̍lū o̍ sāāsāa̍ tūndɔ᷄ŋndo̍.

²⁵Mi̍ Pa̍lāl, po̍ Yu̍sāī wo̍ ndu̍ mi̍ŋgī būŋgɛ̄i̍ ka̍ndu̍ŋ o̍ sāāsāa̍ tūndɔ᷄ŋndo̍ ve̍ tāŋgūl o̍ chīɛ̄ī lēmāsā chōo̍ cho̍o̍ wo̍ īkɛ̄i̍, o̍ tōŋgo̍ wānāā mɛ̄ŋgɛ̄lāa̍ nda̍ a̍a̍ cha᷅l lo̍. O̍ ko̍ŋ kɔ̍ɔ̍lī, mi̍ Pɛ̄da̍a̍yā, po̍ Pa̍lɔ̍ɔ̍sī wo̍, nda̍ wānāa̍ wa̍ chīɛ̍i̍ Mɛ̄lɛ̄ka̍a̍ māndāa̍ o̍ Pēmbīī O̍fɛ̄ɛ̄ ve̍ chōo̍ wa̍, nda̍ mīŋgī būŋgɛ̄i̍ wa̍ o̍ būŋgɛ̄ī kēŋ īkɛ̄i̍ ye̍ tāŋgūl, ma̍ kɔ̍ mɛ̍ɛ̍lū o̍ dīō sāāsa̍ māmɛ̄ŋndo̍ īkɛ̄i̍, bā pāa̍le̍ŋ lē chāŋndo̍, o̍ chīɛ̄ī vīlɛ̄ī wānāā mɛ̄ŋgɛ̄lāa̍ ā chāl le̍ chīɛ̍i̍ Mɛ̄lɛ̄ka̍a̍ māndāa̍ wo̍ īkɛ̄i̍.

²⁶

²⁷O̍ ko̍ŋ kɔ̍ɔ̍lī, pūa̍a̍ Tɛ̍ko̍wā, nda̍ bɛ̍ɛ̍ ma̍ tāŋgūl būŋgɛ̄i̍ ī pīlɛ̍i̍, kāndɔ᷄ŋndo̍ o̍ chīɛ̄ī vīlɛ̄ī bɛ̄ndū wāŋnda̍ nda̍ a̍a̍ cha᷅l le̍ chīɛ̍i̍ Mɛ̄lɛ̄ka̍a̍ māndāa̍ wo̍, ma̍ kɔ̍ mɛ̍ɛ̍lū o̍ pēmbēi̍ O̍fɛ̄ɛ̄ i̍kɛ̍i̍. Pūa̍a̍ ha̍ā yɛ̍, būŋgɛ̄ī ndɛ̄i̍ di̍i̍ŋ ndūɛ̍i̍ tāŋgūllo̍ wa̍ ke̍ŋ ni̍.

²⁸O̍ ko̍ŋ kɔ̍ɔ̍lī, mi̍ wānāā sōlīāā lāsa̍lāa̍ ā ti᷄ŋ, nda̍ mīŋgī būŋgɛ̄i̍ wa̍ o̍ dīō sāāsā su̍a̍a̍ bā lūāŋndo̍ ve̍ tāŋgu̍l. Wānā o̍ wānā būŋgɛ̄i̍ wa̍ o̍ chīɛ̄ī ndɔ̄ɔ̍ dīō ve̍, mbo̍ mīŋgī ndi̍ tāŋgūl.

²⁹O̍ ko̍ŋ kɔ̍ɔ̍lī, Sa̍dɔ̍kī, po̍ I̍māā wo̍, mi̍ ndu̍ mi̍ŋgi̍ būŋgɛ̄i̍ wa̍ būŋgɛ̄ī kēŋ īkɛ̄i̍ ye̍ tāŋgūl o̍ chīɛ̄ī ndɔ̄ɔ̍ sōndōo̍. Sīɛ̄ma̍yā, po̍ Sīɛ̄kāni̍yā wo̍, wāna̍ ndu̍ o̍o̍ ma̍ndā dīō sāāsāa̍ bā pāa̍le̍ŋ le̍ chāŋndo̍ wo̍, mi̍ ndu̍ mi̍ŋgī būŋgɛ̄i̍ wa̍ būŋgɛ̄ī kēŋ īkɛ̄i̍ ye̍ tāŋgūl.

³⁰O̍ ko̍ŋ kɔ̍ɔ̍lī, Hānāni̍yā, po̍ Sīɛ̄lɛ̄ma̍yā wo̍, a̍ Ha̍nɔ̄ŋ, o̍ wa̍ po̍ ŋɔ̍mpu᷅mndo̍ o̍ pūa̍a̍ Sa̍la̍fī wa̍ tɛ̄ɛ̄ŋ ndo̍, nda̍ mi̍ŋgi̍ būŋgɛ̄i̍ wa̍ būŋgɛ̄ī kēŋ īkɛ̄i̍ ye̍ tāŋgūl ni̍. Ndu̍yɛ̍ pūa̍a̍ ha̍ā bɛ̍ɛ̍, būngɛ̄ī ndɛ̄i̍ di̍i̍ŋ ndūɛ̍i̍ mīŋgīo̍o̍ tāŋgūllo̍ o̍ sāāsāa̍ ho̍ō ndi̍ wa̍ he̍ī ni̍. O̍ ko̍ŋ kɔ̍ɔ̍lī, Mɛ̍si̍u̍lām, po̍ Bɛ̄lu̍a̍kā wo̍, mi̍ ndu̍ mi̍ŋgī būŋgɛ̄i̍ wa̍ o̍ chīɛ̄ī ndɔ̄ɔ̍ lāchī ve̍ tāŋgūl.

³¹O̍ ko̍ŋ kɔ̍ɔ̍lī, Māli̍ki̍chā, sūmnɔ̍ ndu̍ o̍o̍ to̍sā wa̍llo̍ a̍ ko̍o̍līi̍yo̍ŋ ndo̍, mi̍ ndu̍ mi̍ŋgī būŋgɛ̄i̍ wa̍ būŋgɛ̄ī kēŋ īkɛ̄i̍ ye̍ tāŋgūl, mbo̍ fūūlūū a̍ ndi̍ tāŋgūllo̍ o̍ chīɛ̍i̍ wānāā nda̍ a̍a̍ to̍sā wa̍llo̍ o̍ chīɛ̄ī Mɛ̄lɛ̄ka̍a̍ wa̍, a̍ nāa̍ wānāā lēyākūa̍a̍ ā wa᷄ wa̍, a̍ o̍ dīō sāāsā nda̍ a̍a̍ mɛ̍ɛ̍ndīāŋ wa᷅ŋnda̍ wo̍ īkɛ̄i̍. Mbo̍ fūūlūū a̍ ndu̍ tāŋgūllo̍ o̍ lu̍mūi̍ wa̍ bā lūāŋndo̍ o̍ sɔ̍ŋgi̍le̍ sāāsāa̍ ho̍ō wo̍.

³²O̍ ko̍ŋ kɔ̍ɔ̍lī, sūmāa̍ to̍sā wa̍llo̍ a̍ ko̍o̍līi̍yo̍ŋ nda̍, a̍ wānāā lēyākūa̍a̍, mi̍ nda̍ mīŋgī būŋgɛ̄ī mɛ̄ɛ̄lɛ̄i̍ tāŋgūl, kāndɔ᷄ŋndo̍ o̍ lu̍mūi̍ wa̍ bā lūāŋndo̍ o̍ sɔ̍ŋgi̍le̍ sāāsāa̍ ho̍ō wo̍, mbo̍ kūā ha̍a̍a̍ a̍ dīō sāāsa̍ nɔ̍ dīōla̍ŋ āā, Dīō Sāa̍ wo̍.