Read Southern Kisi Nɛ̄hīma̍yā 4 Bible Online

Nɛ̄hīma̍yā 4 - Southern Kisi bible

Nɛ̄hīma̍yā 4

¹Mɛ̄ɛ̍ Sāŋba̍lā tu̍e̍ī māā ŋ̄ chō sāāsāa̍ Chūlu̍sɛ̄lɛ̄m mīŋgīo̍o̍ tāŋgūllo̍, mbo̍ tāmbū kɔ̄l, mi̍ hɔ̄lla̍ tāmbū ndu̍ pɛ̍, o̍ ko̍ŋ kɔ̍ɔ̍lī, mbo̍ kāndū na̍a̍ Chu̍ūwa̍ māmɔ̄ɔ̍.

²Mbo̍ sīm chāāŋāā ndūa̍a̍ a̍ pūa̍a̍ chɔ̄ūwa̍ Sāme̍e̍līāā o̍ hɔ̄l kpe̍nde̍ke̍le̍, mbo̍ dīmī āā, “Ō yɛ̄ɛ̍nɛ̍ Chu̍ūwāā ītāa̍nīya̍a̍ ha̍ā ā yīya̍ŋ yɛ̍ māā ā chō tōsāa̍? Ā yīya᷄ŋ māā ā nɔ̄lā mā mīŋgi̍ sāāsāa̍ ho̍ō tāŋgūl o̍ pāa̍le̍ŋ lē pīlɛ̍ bɛ̄ŋgu̍, mā hu᷄ŋ so̍lī vɛ̄lɛ̄ sa̍lāla̍ŋ na̍nu᷄ŋ? Ā nɔ̄lā mā sōōlu̍u̍ pōūta̍ŋ o̍ pūūlū ŋu̍a̍lɛ̍i̍yo̍ ho̍ō bɛ̄ŋgu̍, mā sīmi̍ vɛ̄lɛ̄ sāāsāa̍ a̍ la̍ŋ?”

³Tōba̍a̍yā A̍mɔ̄na̍i̍tīi̍nɔ̍, ō wa̍ īsīsi̍ Sāŋba̍lā īkɛ̄i̍, mbo̍ dīmī āā, “To̍fa̍ wɔ̍ sa̍āsā ka̍lā nda̍ dīmi̍ māā ā chō tāŋgūllo̍ wo̍, ā yɔ᷄ŋ bɛ̍ɛ̍ āā tūŋndo̍[6] tē ō he᷄l lēchōo̍ pɛ̍, yōmndo̍ o̍ yo᷅m ni̍.”

⁴O̍ ko̍ŋ kɔ̍ɔ̍lī, mi̍ ya̍ Nɛ̍hīma̍yā pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ na̍a̍, wāŋnda̍ ha̍ā ā chō na̍a̍ dāātīa̍a̍ ndu̍yɛ̍, ma̍ wā yēēmɛ̍i̍ māā kpūndɔ̍ɔ̍ kōma̍l na̍a̍. Le̍la̍ŋ yāndi̍i̍, ya̍ŋ ni᷅la̍ŋ o̍ pīɛ̄īlē nāāle̍ŋ mā mu̍li̍ na̍a̍ dīōm. To̍sa̍ kpūndɛ̍ o̍ kpūndɛ̍ nda̍ yēēma̍ māā ō kōma̍l na̍a̍ mbo̍ mīīŋgu̍ nda̍ pi̍la̍ chōo̍. To̍sa̍ mī ya̍a̍mɔ̍ɔ̍wa̍ hu᷄ŋ de᷅l nda̍ chōo̍ mā kūɛ̄ a̍ nda̍ o̍ bīyɔ̄ɔ̍ ni᷄ŋ.

⁵Ma᷅l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ te̍. Yɔ̄ŋ wɔ̄ɔ̍ŋ nda̍ tōsa̍ wo̍ pu̍ɛ̍ɛ̍nu᷄ŋ a̍ ndu̍ le̍. Kāni̍ fo̍ndōle̍, le̍ mɛ̄ɛ̍ nda̍ tōsa̍ ma̍ dūāūnu᷄ŋ tu̍mbe̍ na̍a̍ ŋ̍ cho̍ tāŋgūllo̍ wa̍ o̍ hɔ̄l lɛ̍.”

⁶Mi̍ ŋ̄ hīāū lāchī a̍ sāāsāa̍ tāŋgūllo̍ ha̍a̍a̍ mbo̍ fūūlūū tɛ̄ɛ̄ŋ kpe̍ŋ. Kāni̍, wāŋnda̍ kpo̍u̍ ā wa̍ ā chɛ̄lāā a̍ kɔ̄ltā ndāla̍ŋ le̍ wa̍llo̍.

⁷Kɛ̍ mɛ̄ɛ̍ Tōba̍a̍yā, a̍ Sāŋba̍lā, a̍ Āla̍būi̍ya̍, a̍ A̍mɔ̄na̍i̍tīi̍nɔ̍, a̍ pūa̍a̍ A̍si̍dɔ̍dī a̍ tu̍e̍ī māā sāāsāa̍ Chūlu̍sɛ̄lɛ̄m o̍ cho̍ hīōūwɔ̄ɔ̍ lāchī a̍ tāŋgūlɔ᷄ŋndo̍, ndu̍yɛ̍ māā fo̍ndāŋndā la̍a̍ pe̍si̍ o̍ sāāsāa̍ la̍ŋ bɛ̍ɛ̍ māā lā kīīndi̍a̍ŋ, ma̍ tāmbū lākɔ̄l ta̍u̍ ta̍u̍.

⁸Le̍ he̍ī, nda̍ kpo̍u̍ ma̍ kɛ̄ɛ̄sīāā dīōm pīlɛ̍ le̍ mā hu᷄ŋ de᷅l Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍, mā tōsa̍ mī nyɛ̄ o̍ nyɛ̄ lāāsi̍a̍ŋ o̍ tāŋgūllo̍ ho̍ō ni᷄ŋ.

⁹Kɛ̍ mi̍ ŋ̄ pīɛ̄ī Mɛ̄lɛ̄ka̍ nāa̍, ndu̍yɛ̍ mi̍ ŋ̄ kɛ̄sī wānāā mɛ̄ŋgɛ̄lāa̍ le̍ wāa̍ mɛ̄ŋgɛ̄lāa̍ īdīi̍ a̍ īchɔ̄l.

¹⁰Mi̍ wāŋnda̍ Chu̍dā a̍ so̍lī chōndi̍i̍ īmɔ̍nɛ̍i̍ pu̍m āā, “Kpāāya̍ wānāā wa̍lla̍ ō chō chūwɔ̄ɔ̍. Pūūlū pa̍a̍ndū sāāsa̍ de̍l lo̍ ō chō bɔ̍ɔ̍, ō hīōū na̍a̍ o̍ vīlī ni᷄ŋ. Ŋ̄ hi̍ū lɛ̍ ni̍ŋ la̍chi̍ a̍ sāāsāa̍ tāŋgūllo̍ le̍.”

¹¹Mi̍ ya̍ Nɛ̄hīma̍yā hi̍a̍ū lāchī a̍ sūɛ̍i̍ a̍a̍, “Ya̍a̍mɔ̍ɔ̍wa̍a̍ nāa̍ di̍mi̍ māā ā chō hūnɔ̄ɔ̄ sɔ̍ɔ̍sɔ̍ɔ̍ mā hu᷄ŋ de᷅l na̍a̍ chōo̍, māā pɛ̄ŋgu̍ pa̍ na̍a̍ ŋ̄ dūāū ndi̍ tāāsi̍, ā wā ni᷅ŋ na̍a̍ tɛ̄ɛ̄ŋ. O̍ ko̍ŋ, mā dīu̍ na̍a̍, mī wa̍li̍ nāa̍ ō tāmbu̍.”

¹²Kɛ̍ Chu̍ūwa̍ a̍ chi̍ɛ̍ɛ̍li̍āŋ a̍ ya̍a̍mɔ̍ɔ̍wa̍a̍ nāā ka̍ŋ nda̍, ā wa̍ na̍a̍ dīmūllo̍ te̍le̍ŋ o̍ te̍le̍ŋ māā ya̍a̍mɔ̍ɔ̍wa̍ kɛ̄ɛ̄si̍a̍a̍ le̍ wāa̍ fūlāa̍ bā o̍ bā fe̍e̍, le̍ mā hu᷄ŋ de᷅l na̍a̍ chōo̍ a̍ sɔ̍ŋgɔ̄ɔ̍.

¹³Le̍ he̍ī, mi̍ si̍mī pūa̍a̍ kɔ̄ɔ̄lī kɔ̍ɔ̍lī nāa̍ sāāsāa̍ ndu̍ o̍o̍ chu̍u̍ wɔ̍ he̍lɔ̄ɔ̄ le̍ wa̍, a̍ mɔ̄ɔ̄ŋ nda᷄ŋ fāŋndo̍ŋ o̍ lābā, ndu̍yɛ̍ a̍ ba̍lta̍ ndāla̍ŋ vɛ̄lɛ̄ a̍ chīɔ̄ūlā ndāla̍ŋ. Pūa̍a̍ ya̍ I̍ wa᷅ ko̍ si̍mīo̍o̍, I̍ si̍mī nda̍ a̍ yu̍ŋgu̍la̍ ndāla̍ŋ le̍nde̍ kpɛ̍ kpɛ̍.

¹⁴O̍ ko̍ŋ kɔ̍ɔ̍lī, mɛ̄ɛ̍ ya̍ I̍ che᷅ nyɛ̍ wa̍ yɔ̄nɔ᷄ŋndo̍ wo̍, mi̍ di̍mūl wānāa̍ cho̍ wāŋnda̍ chīla̍ŋnda̍, a̍ lāŋgba̍ā kālāā lēlɛ̄ŋnda̍, a̍ wāŋnda̍ ā pīli̍a̍a̍ kpo̍u̍ a̍a̍, “Lā yɔ᷅ŋ īsīōōŋ le̍ ya̍a̍mɔ̍ɔ̍wa̍ ha̍ā le̍. Lā lōōnu̍ŋ mɛ̄ɛ̍ māsānɔ̄ɔ̍ Mɛ̄lɛ̄ka̍ chō wāna̍ kpāāyā bɛ̍ndū, ō wānā nɔ̍lā mā wo̍ wo̍ yɛ̍, mī lā chi̍e̍i̍ le̍ wānāya᷅ŋ nya̍ŋ, a̍ chūāūwāā nyāa̍, a̍ lāāndāā nyāa̍, ndu̍yɛ̍ a̍ chīɛ̄īlā nyāla̍ŋ.”

¹⁵Mi̍ ya̍a̍mɔ̍ɔ̍wa̍a̍ nāa̍ tūɛ̄ī māā nyɛ̄ o̍ nyɛ̄ nda̍ kɛ̄ɛ̄si̍a̍a̍ a̍ na̍a̍ o̍kɔ̄ɔ̄ māā ŋ̄ tūēī, ndu̍yɛ̍ māā Mɛ̄lɛ̄ka̍ pūūsi̍a̍a̍ tūūlā ndāla̍ŋ. O̍ ko̍ŋ, na̍a̍ kpo̍u̍ mi̍ wānā o̍ wānā mi̍i̍ŋgū o̍ sāāsāa̍ le̍ wa̍li̍ ndɔ̍ o̍ wa̍ tōsāa̍ wo̍ tōsāa̍.

¹⁶Chɔ̍ŋ ni᷅ŋ a̍ pāa̍le̍ le̍ŋ, pūa̍a̍ nīa̍a̍ wa̍lla̍ ki̍nɛ̍i̍, mi̍ pi̍ɔ̍ū nda̍ ku̍ndāla̍ŋ lā tīɔ̍ɔ̍ŋ, tē ku̍ndāa̍ ō pīlɔ̍ɔ̍ tūndu᷄ŋ wa̍llo̍ pɛ̍, ku̍ndāa̍ ō pīlɔ̍ɔ̍ si᷄m a̍ ba̍lta̍ŋ, ndu̍yɛ̍ a̍ nyɛ̄lā pūa̍a̍ chɔ̄ūwa̍ bīī o̍ lābā le̍ nda̍ māndāa̍ o̍ chɔ̄ūwo̍ la̍ŋ, a̍ chīɔ̄ūla̍ŋ, a̍ chīŋu̍a̍ŋ. Lāŋgba̍ā kālāā lēlɛ̄ŋnda̍ kpo̍u̍, ā wa̍ wāŋnda̍ Chu̍dā kɔ̍ɔ̍lī,

¹⁷a̍ wa᷅ sāāsāa̍ tāŋgūllo̍ wa̍. Wānāa̍ wa̍ wōlɔ̄ɔ̄lā tāŋgūlāāla̍ŋ vīlīo̍o̍ wa̍ bɛ̍ɛ̍, wōlɔ̄ɔ̄la̍ŋ lā wā nda̍ o̍ bāa̍ o̍ pīlɔ̍ɔ̍, mā bīī nyɛ᷅ īchɔ̄ūve̍ o̍ bāa̍ ō pīlɔ̍ɔ̍.

¹⁸Ndu̍yɛ̍ wānā o̍ wānā wa̍ wa̍llo̍ mu̍ɛ̍ī ndūɛ̍i̍ fāŋnde̍ ī wa̍ ndu̍ ī yīīna᷄ŋ o̍ chāŋ, mbō tōsā wa̍li̍ ndɔ̄ɔ̍. Kɛ̍ wānā hu̍a̍ŋāā bu̍lo̍o̍ ndu̍ wa̍ ya̍ īsīsi̍ i̍kɛ̍i̍.

¹⁹O̍ ko̍ŋ, mi̍ I̍ di̍mūl wāŋ bɛ̄ndūāā lēlɛ̄ŋnda̍, a̍ lāŋgba̍ā kālāā lēlɛ̄ŋnda̍, a̍ wāŋnda̍ ā pīli̍a̍a̍ kpo̍u̍ a̍a̍, “Wa̍llo̍ ho̍ō, ō kūmbi̍ŋ ni᷅ŋ bɔ̄ɔ̍ ta̍u̍, ndu̍yɛ̍ ti᷅ŋndo̍ chō bɔ̄ɔ̍ na̍a̍ tɛ̄ɛ̄ŋ la̍nda̍ŋ la̍nda̍ŋ.

²⁰Le̍la̍ŋ bā o̍ bā nya̍ tūēī bu̍lu̍ bɛ̍ndōo̍ dīōm pɛ̍, lā sɔ̄ɔ̄ŋgu̍u̍ na̍a̍ īkɛ̄i̍ lo̍ŋ chɔ̍ chɔ̍. Mɛ̄lɛ̄ka̍ na̍a̍ chō sɔ̄ŋgā le̍ na̍a̍.”

²¹Lēpāa̍ o̍ lēpāa̍, chɔ̍ŋ i̍di̍i̍yo̍ ha̍a̍a̍ mī nyūmnda̍ŋ mā tōl, mī lo̍o̍ŋ fūla̍ o̍ ha̍la̍, ŋ̄ wa̍ hīōūwɔ̄ɔ̍ lāchī a̍ wa̍llo̍ a̍ ku̍ndāla̍ŋ. Ku̍ndāa̍ ho̍ō wā wa̍llo̍, mī ku̍ndāa̍ ō pīlɔ̍ɔ̍ ndu̍ si᷅m a̍ ba̍lta̍ŋ o̍ lābā.

²²A̍ te̍le̍ŋ ko̍ŋ, mi̍ di̍mūl wānā o̍ wāna̍ wa̍ wa̍llo̍, māā ā wa̍ lūa̍a̍ŋ Chūlu̍sɛ̄lɛ̄m a̍ bu̍ɛ̍i̍yāā ndāa̍, le̍ mā wa̍ mɛ̄ŋgɛ̄lāa̍ īchɔ̄l ndu̍yɛ̍ mā tōsā wa̍llo̍ īpāla̍.

²³Ndu̍yɛ̍ ya̍ ni̍, pɔ̄mbūāā nīa̍a̍ ni̍, bɛ̄ndāā nīa̍a̍ ni̍, bu̍ɛ̍i̍yāā nīa̍a̍ ni̍, a̍ pūa̍a̍ wa̍ mɛ̄ŋgɛ̄lāa̍ le̍ ya̍a̍mɔ̍ɔ̍wa̍ ha̍ā wa̍, na̍a̍ ki̍nɛ̍i̍ lēpāa̍ lēpāa̍ wānā o̍ wānā ndu̍ o̍o̍ so̍li̍ŋ nyɛ̍lā ndɔ̄la̍ wa̍lta̍ŋ lēkɔ̄ɔ̍ le̍. Ndu̍yɛ̍, wānā o̍ wānā wōlɔ̄ɔ̄ ndɔ̍ chɔ̄ūwo̍ wa̍ ndu̍ o̍ bā.