Read Southern Kisi Nɛ̄hīma̍yā 5 Bible Online

Nɛ̄hīma̍yā 5 - Southern Kisi bible

Nɛ̄hīma̍yā 5

¹Mi̍ ī yɔ̄nu᷄ŋ a̍ te̍le̍ŋ ko̍ŋ, pūa̍a̍ ā ti᷄ŋ, lātūlu̍ a̍ lāāndāā ndāa̍, ma̍ ŋɔ̄ɔ̄cha᷄ŋ ta̍u̍ a̍ chāāŋāā ndāā Chu̍ūwa̍ ā pīli̍a̍a̍.

²Mi̍ Chu̍ūwa̍ ā ti᷄ŋ ā wa̍ dīmīo̍o̍ āā, “Na̍a̍ ni̍, a̍ chūāūwāā nāā pi̍a̍a̍ndūa̍a̍, a̍ chūāūwāā nāā wa᷅ŋ lāāndūa̍a̍ ŋ̄ chō bɔ̍ɔ̍ sɛ̍lɛ̍. Tē ō ve̍ mī ŋ̄ nɔ̄ nyɛ̄ dīa̍a̍ hɔ̍lɔ̄bi̍ le̍, mɛ̄ɛ̍ ŋ̄ chō chūū a̍ yīa̍a̍ŋ.”

³Mi̍ ā ti᷄ŋ ā wā dīmīo̍o̍ āā, “Yīmā bɛ̄ndūa̍ŋ mā ko̍ma̍l na̍a̍, mi̍ ŋ̄ lēndu̍l chīɔ̄ɔ̄ŋ nāa̍ŋ, a̍ kpe̍le̍la̍ nāāla̍ mākīle̍pīi̍la̍ŋ, a̍ chīɛ̄īlā nāāla̍ŋ, le̍ nyɛ̄ dīāā na̍a̍ ŋ̄ dīā wo̍.”

⁴Mi̍ ā ti᷄ŋ nda̍ nda̍ wā dīmīo̍o̍ āā, “Na̍a̍ pūm nda̍, mɛ̄ɛ̍ mi̍ ŋ̄ lēndūl chīɔ̄ɔ̄ŋ nāa̍ŋ a̍ kpe̍le̍la̍ nāāla̍ mākīle̍pīi̍la̍ŋ chāānda̍ o̍ lābā, le̍ pāāwā māsā bɛ̍ndōo̍ mālɔ̄ɔ̄.

⁵Ndu̍yɛ̍, na̍a̍ kpo̍u̍ Chu̍ūwāā pīli̍a̍a̍ kpe̍ na̍a̍ ŋ̄ chō ni̍. Chūāūwāā ndāa̍ a̍ chūāūwāā nāa̍ wānāā pi᷄lla̍ nda̍ chō ni̍. Kɛ̍ a̍ ko̍ŋ kpo̍u̍, na̍a̍ na̍a̍ mɛ̄ɛ̍ mi̍ ŋ̄ lēndūl chūāūwāā nāā la̍a̍ndūa̍a̍ a̍ ā pīāāndūa̍a̍ o̍ chɛ̄le̍ŋ ni᷄ŋ. Chūāūwāā nāā la̍a̍ndūa̍a̍ ā ti᷄ŋ ā chō ni᷅ŋ hāū o̍ chɛ̄le̍ŋ ni᷄ŋ, kɛ̍ ō chō māchūāā ŋ̄ nɔ̍ nyɛ᷅ o̍ nyɛ̄ na̍a̍ ŋ̄ tōsa̍ a̍ ndi̍ le̍. Chīɔ̄ɔ̄ŋ nāa̍ŋ bɛ̍ɛ̍ a̍ kpe̍le̍la̍ nāāla̍ mākīle̍pīi̍la̍ŋ ŋ̄ chō ni᷅ŋ mīāl chāāŋnda̍.”

⁶Mɛ̄ɛ̍ ya̍ tu̍e̍ī ŋɔ̄ɔ̄chīa̍ŋnda̍ wāŋnda̍ ha̍ā wa̍ nāa̍ ya̍ chu̍a̍ la̍ŋ, ndu̍yɛ̍ a̍ nyɛ̄ o̍ nyɛ̄ nda̍ dīmi̍ a̍ chāāŋāā ndāā Chu̍ūwa̍ ā pīli̍a̍a̍ o̍kɔ̄ɔ̄, mi̍ I̍ du̍a̍u̍nu᷄ŋ tu̍mbe̍ ta̍u̍ ta̍u̍.

⁷Mɛ̄ɛ̍ ya̍ I̍ yi̍ya̍ŋ a̍ sūɛ̍i̍ he̍ī o̍kɔ̄ɔ̄ ka̍ka̍, mi̍ bi̍ī wāŋ bɛ̄ndūāā lēlɛ̄ŋnda̍, a̍ lāŋgba̍ā kālāā lēlɛ̄ŋnda̍ tɔ̍ɔ̍ya̍ŋ, mi̍ di̍mūl nda̍ a̍a̍, “Lā chō chāāŋāā nyāa̍ kīndīlāa̍, mī lā bīī nda̍ ba̍na̍sīi̍la̍ bɛ̍nda̍ le̍ la̍ŋ o̍ lābā.” O̍ ko̍ŋ, mi̍ ve̍e̍lū bɔ̄ŋa᷅ŋ bɛ̄ndū lēlɛ̄ŋndo̍, le̍ mī so̍ō a̍ sūɛ̍i̍ o̍kɔ̄ɔ̄

⁸Ndu̍yɛ̍, mi̍ I̍ di̍mūl nda̍ a̍a̍, “Na̍a̍ na̍a̍ ŋ̄ chō kīndīo̍o̍ o̍ nɛ̄ī o̍ nɛ̄ī ni̍ŋ le̍ chāāŋāā nāā Chu̍ūwa̍ ā nda̍ pīsi̍ wānāa̍ cho̍ a̍ Chu̍ū le̍ o̍ bā wa̍ bāŋāa̍. Kɛ̍ mi̍ nya̍ nya̍ wā chāāŋāā nyāā Chu̍ūwa̍ pīsīo̍o̍ le̍ mī ŋ̄ hu᷄ŋ mi̍ŋgī nda̍ vɛ̄lɛ̄ bāŋā.” Mɛ̄ɛ̍ ya̍ I̍ di̍mi̍ le̍nde̍, nda̍ kpo̍u̍ ma̍ mēī do̍ŋ do̍ŋ. Kāni̍ nda̍ a̍a̍ nɔ̍ nyɛ̄ o̍ nyɛ̄ nda̍ dīmi̍ le̍.

⁹O̍ ko̍ŋ kɔ̍ɔ̍lī, mi̍ di̍mūl nda̍ a̍a̍, “Nyɛ̄ nya̍ chō ho̍ō tōsāa̍ wo̍, ō ni᷄ŋ te̍. Lā nɔ̄ mī lā tōsa̍ wa̍llo̍ a̍ sīōōŋīi̍ Mɛ̄lɛ̄ka̍ nāa̍, ko̍ŋ to̍sā ni̍, wānāa̍ cho̍ a̍ Chu̍ū le̍ wa̍, nda̍ yɔ̍nūŋ māā ya̍a̍mɔ̍ɔ̍wa̍a̍ nāa̍ ni̍, a̍ su̍ū di̍ōmndā wɔ̄ɔ̍ŋ a̍ na̍a̍ o̍kɔ̄ɔ̄ le̍.

¹⁰Ya̍ ni̍, chāa̍ŋāā nīāā Chu̍ūwa̍ ni̍, bu̍ɛ̍i̍yāa̍ nīa̍a̍ wa̍lla̍ ni̍, ŋ̄ chō wāŋnda̍ ka̍ni̍o̍ŋ kūēēla̍ŋ kīo̍o̍, mī ŋ̄ kē nda̍ nyɛ̄ dīa̍a̍ dɔ̍ndɔ̍la̍ŋ. Le̍la̍ŋ ŋ̄ mālnu᷄ŋ sūɛ̍i̍ ba̍na̍sīi̍la̍ŋ nda᷅ŋ.

¹¹Lā mīŋgi̍ nda̍ chīɔ̄ɔ̄ŋ nda᷄ŋ o̍ lābā pāa̍le̍ hāūle̍ŋ nde᷅ŋ, a̍ kpe̍le̍la̍ ndāla̍ yɔ̄mīī ɔ̄li̍fīi̍la̍ŋ, a̍ kpe̍le̍ ndāla̍ mākīle̍pīi̍la̍ŋ, a̍ chīɛ̄īlā ndāla̍ŋ. Ba̍na̍sīi̍ o̍ ba̍na̍sīi̍ nya̍ bīī nda̍ o̍ lābā o̍ nyɔ̄ɔ̍ŋ mu᷅ŋ ni᷄ŋ, mī lā mīŋgi̍ nda̍ o̍ lābā kpo̍u̍.”

¹²O̍ ko̍ŋ, mi̍ wānāā bɛ̄ndūāā lēlɛ̄ŋnda̍ mūlī āā, “Ŋ̄ chō nda̍ nyɛ̄ o̍ nyɛ̄ mīŋgī o̍ bā, ndu̍yɛ̍ ŋ̄ cho̍ lɛ̍ nda̍ nyūnā le̍ nyɛ̄ o̍ nyɛ̄ chēle̍ŋ te̍. Ŋ̄ chō tōsā mɛ̄ɛ̍ ŋ̄ dīmi̍ yɛ̍.” O̍ ko̍ŋ, mi̍ ve̍e̍lū wānāā sōlīāā lāsa̍lāa̍, le̍ mī wānāā bɛ̄ndūa̍a̍ ā chūa̍ būŋgɛ̄i̍ mā mēna᷄ŋ Mɛ̄lɛ̄ka̍ o̍ hɔ̄l māā ā chō tōsā mɛ̄ɛ̍ nda̍ dīmi̍ yɛ̍.

¹³O̍ ko̍ŋ, mi̍ ku̍āŋ bɔ̄ɔ̄lē dōma̍ wa̍ ya̍ lēkɔ̄ɔ̍ wo̍ mi̍ di̍mī a̍a̍, “Wānā o̍ wānā to̍sa̍ nyɛ᷅ o̍ chu̍a̍ hāū bu̍ŋgɛ̄i̍ māā ō chō tōsā wo̍ le̍, nu̍a̍ā Mɛ̄lɛ̄ka̍ chō chīɛ̄ī ndɔ̄ɔ̍ kōŋɔ̄ɔ̄ ni̍ a̍ nyɛ̄ o̍ nyɛ̄ o̍ nɔ̍ mbō mɛ̄i̍ ndu̍ bālā fo̍ndō.” Mi̍ wānāa̍ wa̍ lo̍ŋ nda̍ kpo̍u̍ a̍ di̍mī āā, “Āmi̍i̍nā.” Ma̍ sāŋgālā Mɛ̄lɛ̄ka̍ Ya̍a̍wɛ̄ɛ̄. Ndu̍yɛ̍, ma̍ tōsā nyɛ̄ o̍ nyɛ̄ nda̍ chu̍a̍ būŋgɛ̄i̍ le̍ tōsāa̍.

¹⁴Bōōndi̍i̍ Māsāa̍ Āŋtāsa̍a̍sī o̍ chi̍ŋa̍ wɔ̄sīla̍ŋ bi̍di̍i̍ŋ o̍ lēmāsā ve̍, wɔ̄sī kōŋ nda̍ yūlū ya̍ Nɛ̍hīma̍yā le̍ mī wa̍ ma̍sa̍ ībūŋgāa̍ le̍ Chu̍dā ni̍. Ndu̍yɛ̍ mi̍ lo᷅ māsāa̍ ha̍a̍a̍, mbo̍ fūūlūū a̍ wɔ̄sī Māsāa̍ Āŋtāsa̍a̍sī o̍ chi̍ŋa̍ wɔ̄sīla̍ŋ be̍le̍-ya̍a̍ a̍ lā tīɔ̍ɔ̍ŋ o̍ lēmāsā wo̍. Ndu̍yɛ̍ o̍ wɔ̄sīlā tɔ̍ a̍ lā tīɔ̍ɔ̍ŋndā ya̍ chi̍i̍ la̍ŋ o̍ lēmāsā la̍ŋ, pāa̍le̍ pi᷅lɛ̍ bɛ̍ɛ̍ ya̍ ni̍, wānāyɛ̍ī nī ni̍, ŋ̄ nyūna̍ wānā o̍ wānā le̍ nyɛ̄ dīāā nda̍ a̍a̍ nɔ̍ le̍ ya̍ kīo̍o̍ māā māsā wo̍ le̍.

¹⁵Māsāā tāsi̍a̍a̍ ke̍e̍ku̍ ya̍ lāchī Chu̍dā wa̍ ki̍nɛ̍i̍, ā wa̍ wāŋnda̍ wōlɔ̄ɔ̄lā lūsu̍lɛ̍i̍la̍ŋ hāndɔ̄ɔ̍ chōo̍. Lēpāa̍ o̍ lēpāa̍, ā wa̍ wāŋnda̍ nyɛ̄ sɔ̄lāa̍ bīyɔ̄ɔ̍ o̍ bā, ka̍ni̍ŋ hu̍mbo᷄ŋ be̍le̍-hi̍ɔ̍ɔ̍lu̍, mā bīī nda̍ vɛ̄lɛ̄ nyɛ̄ dīa̍a̍ o̍ bā a̍ mūɛ̄īya̍ŋ. Māsāā ka̍ŋ bu̍ɛ̍i̍yāā ndāa̍ bɛ̍ɛ̍ ā wa̍ wāŋnda̍ kpāāyāa̍ chɔ̄mndo̍ mā tūsi̍ nda̍ nyɛ̄ pālāa̍ chōo̍. Kɛ̍ ya̍ ya̍ I̍ to̍sa̍ le̍nde̍ le̍, kāni̍ I̍ nɔ̍ sīōōŋīi̍ Mɛ̄lɛ̄kɛ̍i̍.

¹⁶Mi̍ I̍ yɔ̍ŋgu᷄ŋ kpo̍u̍ o̍ sāāsāa̍ mīŋgīo̍o̍ tāŋgūllo̍ ni᷄ŋ. Na̍a̍ pūa̍a̍ nīa̍a̍ wa̍lla̍, le̍ te̍le̍ŋ o̍ te̍le̍ŋ ŋ̄ wa̍ dīōm pīlɛ̍ o̍ wa̍llo̍ ho̍ō ni᷄ŋ, lēlɛ̄ŋ bɛ̍ɛ̍ I̍ pi̍ndu̍ le̍ ya̍ pi̍la̍ le̍.

¹⁷Ndu̍yɛ̍ o̍ ko̍ŋ kɔ̍ɔ̍lī, ō fūla̍ o̍ mīālāā nda̍ a̍a̍ fu̍lā o̍ lɛ̄ŋīī chēle̍ŋnde̍ ni᷄ŋ mā hūŋ ya̍ yīlɔ̄ɔ̍, mī I̍ ke᷅ nda̍ nyɛ̄ dīa̍a̍ wa̍ kɔ̄ɔ̄lī, lēpāa̍ o̍ lēpāa̍ Chu̍ūwa̍, lātūlu̍ a̍ lāŋgba̍ā kālla̍, kɛ̄mɛ̄ a̍ be̍le̍-ŋu̍ɛ̍ɛ̍nu̍, nda̍ nda̍ a̍a̍ di̍ā nyɛ̍ dīa̍a̍ o̍ ti̍bīi̍ nūu̍ chōo̍ ni̍.

¹⁸Nyɛ̄ dīāā na̍a̍ ŋ̄ di̍ā o̍ pāa̍le̍ŋ ni᷄ŋ o̍ ya̍ lo̍ chi̍ɛ̍ī ni̍ŋ ndo̍, ndu̍ wa̍ ho̍ō ni̍, nāū tōōyōo̍ ō pīlɛ̍, a̍ sāā che̍lu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ ā ŋɔ᷄mpu᷅m, o̍ ko̍ŋ kɔ̍ɔ̍lī, a̍ sɔ̄ɔ̍wa̍ hɔ̍lɔ̄bi̍. Ndu̍yɛ̍ tē pālɛ̍i̍ tɔ̍ o̍ pālɛ̍i̍ tɔ̍ ndi̍ i̍i̍ hi̍o̍ū pɛ̍, mūɛ̄īmā mākīle̍pīi̍ya̍ŋ su̍u̍ o̍ su̍u̍ hūnɔ̄ɔ̍ a̍ ma̍ŋ wa̍chāko̍ le̍ kōlɔ̄ɔ̍. Kɛ̍ a̍ ko̍ŋ kpo̍u̍, pāa̍le̍ pi᷅lɛ̍ bɛ̍ɛ̍ I̍ nyu̍na̍ le̍ nyɛ̄ dīāā ya̍ i̍i̍ nɔ̍ le̍ sɔ̄lāa̍ māā māsā wo̍ le̍. Kāni̍ fu̍u̍le̍, wōlɔ̄ɔ̄lā lūsu̍lɛ̍i̍la̍ che᷅le̍ŋ la̍ wa̍ ni᷅ŋ wāŋnda̍ ha̍ā chōo̍ ta̍u̍.

¹⁹O̍ ko̍ŋ, mi̍ I̍ pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ nūu̍, lo̍o̍nu̍ŋ a̍ kɛ̄ndɛ̄i̍ nīi̍ le̍ nyɛ̄ o̍ nyɛ̄ ya̍ to̍sa̍ le̍ wāŋnda̍ ha̍ā.”