Read Southern Kisi Nɛ̄hīma̍yā 6 Bible Online

Nɛ̄hīma̍yā 6 - Southern Kisi bible

Nɛ̄hīma̍yā 6

¹O̍ ko̍ŋ kɔ̍ɔ̍lī, mi̍ Sāŋba̍lā, a̍ Tōba̍a̍yā, a̍ Kɛ̍ɛ̍sīɛ̄m A̍la̍būi̍nɔ̍, a̍ ya̍a̍mɔ̍ɔ̍wa̍a̍ nāa̍ ā pīli̍a̍a̍ ā tūɛ̄ī māā I̍ chi̍i̍ sāāsāa̍ mīŋgī tāŋgūl, ndu̍yɛ̍ māā fo̍ndāŋnda̍ wa̍ o̍ sāāsāa̍ lā tāmbɛ̍i̍la̍ŋ kpo̍u̍ māā I̍ chi̍i̍ tōōsīāā, mɛ̄ɛ̍ le̍ ko᷅ŋnda̍ŋ mi̍ la̍ a̍a̍ lo᷅ le̍ lɛ̄ɛ̄ndōo̍.

²O̍ ko̍ŋ, mi̍ Sāŋba̍lā nda̍ Kɛ̍ɛ̍sīɛ̄m a̍ yɔ᷅ŋ ya̍ yōōŋgōo̍ ho̍ō āā, “Hu̍ŋ mī ŋ̄ hu᷄ŋ bɔ̍ɔ̄ŋi̍āŋ o̍ chi̍e̍e̍ pi᷅lɛ̍ o̍ dɛ̍ŋgbɔ̍ɔ̍ ni᷄ŋ O̍nō.” Kɛ̍ mi̍ si̍nā māā kɛ̄ɛ̄sīa̍a̍ nda̍ a̍a̍ kɛ̍ɛ̍si̍a̍a̍ ni̍ le̍ ya̍ sūɛ̍i̍ wɔ̍ɔ̍ŋnde̍ tōsāllo̍.

³Le̍ he̍ī, mi̍ I̍ vi̍ām ki̍i̍la̍a̍ a̍ yōōŋgōo̍ nāa̍ nda̍ chu̍a̍ māā ā kɔ̍ di̍mūl nda̍ āā, “Wa̍li̍ kpe̍e̍kpe̍i̍yo̍ ya̍ I̍ cho̍ chōo̍ ni̍, le̍la̍ŋ I̍ hi᷅ŋ ni̍ŋ te̍ pa̍. I̍ cho̍ wa̍li̍ nu̍u̍ mālɔ̄ɔ̄ le̍ kɔ̄la̍ŋ nāa̍ nya̍ chūā le̍.”

⁴Ndu̍yɛ̍ lē hīɔ̍ɔ̍lu̍ kpu̍lu̍ku̍u̍ nda̍ yɔ᷄ŋ ya̍ yōōŋgū pīlɔ̍ɔ̍ ho̍ō ni̍. Kɛ̍ ndu̍yɛ̍ te̍le̍ŋ o̍ te̍le̍ŋ mūlī pīlɔ̍ɔ̍ ho̍ō ko̍ni̍ ya̍ I̍ wa̍ nda̍ kīo̍o̍ ni̍.

⁵O̍ ŋūɛ̍ɛ̍no̍o̍, mi̍ Sāŋba̍lā vi̍ām bu̍ɛ̍ī ndɔ̄ɔ̍ ō pīlɛ̍ nāa̍ ya̍ chu̍a̍ a̍ yāu̍wo̍. Kɛ̍ yāu̍wo̍ ho̍ō ō ve̍ o̍ ki̍ndāā le̍, kāni̍ fo̍ndōle̍, nda̍ a̍a̍ ye̍e̍ma̍ mī wānā o̍ wānā ndu̍ o̍o̍ si̍na̍ nyɛ̍ wa̍ o̍ yāu̍wo̍ ho̍ō ni᷄ŋ ndo̍.

⁶Dīōmnda̍ wa̍ lā pōōnyīāā o̍ yāu̍wo̍ ho̍ō ni᷄ŋ nda̍ŋ, la̍ cho̍ la᷅ŋ ni̍ āā, “Kɛ̍sīɔ̄ŋ di̍mu̍l la̍ māā bā o̍ bā o̍ kɔ̍ o̍ lɛ̄ŋīi̍ ba̍lu̍ na̍a̍ ve̍ ni᷄ŋ ō chō tūēīyɔ̄ɔ̍, mi̍ wāŋnda̍ wā dīmīo̍o̍, māā nya̍ Chu̍ūwa̍ lā chō kɛ̄ɛ̄sīa̍a̍ le̍ hūnɔ̄ɔ̄ māsā bɛ̍ndōo̍ sīmūllo̍, māā le̍ sa̍bū kōŋ nya̍ chō sāāsāa̍ mīŋgī tāŋgūllo̍ ni̍. Ndu̍yɛ̍ māā nūm Nɛ̄hīma̍yā a̍ ye̍e̍ma̍ mā sīmnu᷄ŋ ma̍sā nda̍ bɛ̄ndōo̍.

⁷Ndu̍yɛ̍ ō fūla̍ o̍ ko̍ŋ kɔ̍ɔ̍lī, māā nūm hɛ̍li̍ ni᷅ŋ bɛ̍ɛ̍ wa̍nāa̍ su̍a̍ā le̍ Mɛ̄lɛ̄ka̍ wa̍ le̍ mā yōnda̍ a̍ nūm o̍kɔ̄ɔ̄ Chūlu̍sɛ̄lɛ̄m māā nūm Mɛ̄lɛ̄ka̍ yūlū ni̍ le̍ mā wa̍ māsāa̍ Chu̍dā. Ndu̍yɛ̍ ā sīnā māā ko̍na̍a̍ ho̍ō ō chō māsā bɛ̍ndōo̍ Pa̍a̍sīa̍a̍ kōmāl. Le̍la̍ŋ, hu̍ŋ mī ŋ̄ hu᷄ŋ su̍ūki̍āŋ a̍ sūɛ̍i̍ he̍ī o̍kɔ̄ɔ̄.”

⁸Kɛ̍ mi̍ mi̍ŋgūl ndu̍ dīōmnde̍ŋ a̍a̍, “Nyɛ̄ o̍ nyɛ̄ ŋ̄ chō dīmīo̍o̍ a̍ ya̍ o̍kɔ̄ɔ̄, ō pīlɛ̍ bɛ̍ɛ̍ cho̍ to᷅nya̍ le̍. Nūm pi̍la̍ ko̍ni̍ cha̍l ni̍ mā kɛ̄ɛ̄sīa̍ŋ mu̍ŋ o̍ kɔ̄l ma̍ dīmī mu̍ŋ.”

⁹Ndu̍yɛ̍ sīōōŋnde̍ ko̍ni̍ nda̍ a̍a̍ ye̍e̍ma̍ le̍ na̍a̍ dɔ̄wɔ̄ɔ̍ ni̍, le̍ hāli̍ kpe̍ŋ mī dīāllo̍ŋ mu᷅ŋ vi᷅ na̍a̍ māā na̍a̍ ŋ̄ si̍o̍ū ta̍ŋgūllo̍ le̍, mī tāŋgūllo̍ ndu̍ o̍o̍ ta̍mbu̍. Kɛ̍ mi̍ I̍ pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍, ke̍ ya̍ kpāāyāa̍ mī hi̍o̍ū lāchī a̍ wa̍llo̍.”

¹⁰Pāa̍le̍ pi᷅lɛ̍, mi̍ I̍ ku̍ā o̍ chīɛ̍i̍ Sīɛ̄ma̍yā, po̍ Dɛ̄la̍a̍yā wo̍, ndu̍ yɔ̍nūŋ māā po̍ ma᷅ma̍ Mɛ̄hīta̍bɛ̄l wo̍ ni̍. I̍ ko̍ma̍l ndu̍ chīɛ̄ī ni̍ŋ, dīo̍o̍ wa̍ ndu̍ ō kīnda᷄ŋ kɔ̍ɔ̍lī. Mbo̍ dīmūl la̍ āā, “Ŋ̄ kɔ᷄ o̍ chīɛ̍i̍ Mɛ̄lɛ̄ka̍a̍ mī ŋ̄ kɔ̄ ki̍i̍ndīa̍ŋ di̍ōla̍ŋ kɔ̄ɔ̄lī. Kāni̍, wāŋnda̍ chō hūnɔ̄ɔ̄ chūɛ̄llɛ̄ŋ le̍ nu̍m dīyɔ̄ɔ̍.”

¹¹Kɛ̍ mi̍ mu̍lūl ndu̍ āā, “Mɛ̄ɛ̍ ya̍ I̍ cho̍ nu̍a̍ā yɛ̍, wāna̍ su̍u̍ ya̍ cho̍ wo̍, ya̍ nya̍a̍nūŋ ni̍ mī ve̍ŋnu᷄ŋ? Ya̍ ku̍ā o̍ chīɛ̍i̍ Mɛ̄lɛ̄ka̍a̍ ni᷄ŋ ni̍ mī ve̍ŋnu᷄ŋ le̍ yōōmū nūu̍ bāŋāa̍? I̍ ku̍ē lo̍ŋ te̍.”

¹²Ndu̍yɛ̍, mi̍ I̍ si̍nā ndi̍ pɛ̍ŋgu̍ māā sɔ̄ɔ̍ŋ o̍ wa̍ ya̍ mu᷅ŋ dīmūllo̍ wo̍ŋ māā ō cho̍ Mɛ̄lɛ̄ka̍ le̍ ve᷅m ndu̍ le̍, kɛ̍ māā Tōba̍a̍yā nda̍ Sāŋba̍lā nda̍ hi̍o̍ū ndu̍ kɔ̄ɔ̄lī ni̍ le̍ mbō hu᷄ŋ di̍mūl la̍ mu̍ŋ.

¹³Ā hīōū ndu̍ māhīāūwāā kɔ̄ɔ̄lī le̍ ya̍ sīōōŋnde̍ dɔ̄wɔ̄ɔ̍ le̍ hāli̍kpe̍ŋ mī sīōōŋnde̍ ndi̍ i̍i̍ bi̍ī ya̍, mī ya̍ i̍i̍ to̍sa̍ yɔ̄ŋ wɔ̄ɔ̍ŋndo̍. O̍ ko̍ŋ, mī ya̍ i̍i̍ ke̍la̍ dīōlā wɔ̄ɔ̍ŋnda̍ŋ, mī ya̍ i̍i̍ to̍lnu᷄ŋ la̍si̍ɔ̍mbu̍.

¹⁴O̍ ko̍ŋ, mi̍ pi̍ɛ̍ī Mɛ̄lɛ̄ka̍ a̍a̍, “O̍o̍ Mɛ̄lɛ̄ka̍ nūu̍, I̍ ma̍l nu̍m Tōba̍a̍yā o̍ bā, a̍ Sāŋba̍lā, a̍ Nōwāda̍yāā wānā la̍nɔ̍ di̍mīāā sɔ̄ɔ̍ŋ wa̍ā lāchīo̍o̍, a̍ wānāā dīmīāā sɔ̄ɔ̍ŋ wa̍ā lāchīa̍a̍ ā pīli̍a̍a̍, a̍ ye̍e̍ma̍ mā dɔ̄ū ya̍ sīōōŋnde̍ wa̍. Tu̍si̍ nda̍ nyɛ̄ pālāa̍ chōo̍.”

¹⁵O̍ ko̍ŋ kɔ̍ɔ̍lī, mi̍ sāāsāa̍ Chūlu̍sɛ̄lɛ̄m o̍ chu̍ū mīŋgī tāŋgūl. Ŋ̄ chīi̍ pālɛ̍i̍ be̍le̍-ŋu̍ɛ̍ɛ̍nu̍ a̍ ī ŋīi̍ŋ o̍ sāāsāa̍ ho̍ō tāŋgūllo̍ ni᷄ŋ. O̍ mālɔ̄ bi̍di̍i̍ŋ a̍ lē ŋūɛ̍ɛ̍nu̍a̍ŋ chōo̍ kpe̍e̍kpe̍i̍, o̍ pāŋgi̍i̍ I̍lūve̍[7] ni᷄ŋ sāāsāa̍ ō chūū tāŋgūl ni̍.

¹⁶Mɛ̄ɛ̍ ya̍a̍mɔ̍ɔ̍wa̍a̍ nāa̍ ā tūēī a̍ nyɛ᷄ yɔ̍nu̍ŋndo̍, ndu̍yɛ̍ lɛ̄ŋīi̍ ba̍lu̍ na̍a̍ ve̍ bɛ̍ɛ̍ ma̍ chā nyɛ᷄ yɔ̍nu̍ŋ ndo̍, mi̍ sīōōŋnde̍ ī bīī nda̍ ndu̍yɛ̍ mi̍ yōōmūa̍ŋ mā fūlā nda̍ po̍. Kāni̍, ma̍ sīnā māā Mɛ̄lɛ̄ka̍ wa̍ na̍a̍ kɔ̄ɔ̄lī ni̍ mi̍ ŋ̄ tīū tāŋgūllo̍ ho̍ō bā.

¹⁷Ndu̍yɛ̍ a̍ te̍le̍ŋ na̍a̍ ŋ̄ wa᷄ tāŋgūllo̍ ho̍ō wo̍, yāu̍la̍ ka̍ ka̍ la̍ wa̍ hīŋnɔ᷄ŋndo̍ Tōba̍a̍yā tɛ̍ɛ̄ŋ nda̍ wānāā bɛ̄ndūa̍a̍ Chu̍dā.

¹⁸Chu̍ūwāā ka̍ ka̍ ma̍ chūēl Tōba̍a̍yā būŋgɛ̄i̍ ī kālā ka̍lā, māā ā chō ndu̍ wā kɔ̄ɔ̄lī. Kāni̍, le̍ mɛ̄ɛ̍ o̍ wa̍ lēfōo̍ Sīɛ̄kāna̍yā, po̍ A̍ lu̍a̍ā wo̍ yɛ̍. Ndu̍yɛ̍ vɛ̍lɛ̄, Chōna̍ta᷅ŋ po̍ ndɔ̄, ndu̍ ndu̍ o̍o̍ chu̍a̍ chūa̍ Mɛ̍si̍u̍lām, po̍ Bɛ̄lu̍i̍ka̍yā wo̍ o̍ nɔ̄ɔ̍ ni᷄ŋ ni̍.

¹⁹Ndu̍yɛ̍ te̍le̍ŋ o̍ te̍le̍ŋ, wāŋnda̍ wa̍ ya̍ dīmūllo̍ māā Tōba̍a̍yā o̍ wa̍ sɔ̄ɔ̍ŋ kɛ̍ndɔ᷄ŋ tōsāa̍. Ndu̍yɛ̍, nyɛ̄ o̍ nyɛ̄ ya̍ di̍mi̍ pɛ̍, ā mālnu̍ŋ vɛ̄lɛ̄ ā kɔ̍ di̍mūl Tōba̍a̍yā. Ndu̍yɛ̍ mi̍ Tōba̍a̍yā o̍ po̍o̍nyīāl la̍ yāu̍la̍ ka̍ka̍ le̍ ya̍ sīōōŋnde̍ dɔ̄wɔ̄ɔ̍.