Read Southern Kisi Nɛ̄hīma̍yā 8 Bible Online

Nɛ̄hīma̍yā 8 - Southern Kisi bible

Nɛ̄hīma̍yā 8

¹O̍ ko̍ŋ kɔ̍ɔ̍lī, mīīŋgū I̍sɔ̄lūɛ̍i̍ya̍ ā mīīŋgu̍ o̍ lānda̍ lo̍ wo̍, ā chīi̍ pāŋgo̍ŋ ŋ̄ ŋɔ᷄mpu᷅m o̍ ŋɔ᷄mmɛ̍ū wo̍, pāa̍le̍ pi᷅lɛ̍ mi̍ wāŋnda̍ I̍sɔ̄lūɛ̄ī kpo̍u̍ a̍ chu̍ūŋgi̍āŋ dīōm pīlɛ̍ Chūlu̍sɛ̄lɛ̄m o̍ lu᷅ŋ, o̍ dīō sāāsa̍ māmɛ̄ŋndo̍ īkɛ̄i̍. O̍ ko̍ŋ, ma̍ dīmūl Ɛ̍si̍lūā o̍ wa̍ wāna̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍, māā ō sōli̍ ya̍u̍ nɔ̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ ke̍ Mūu̍sē le̍ I̍sɔ̄lūɛ̍i̍ya̍ la̍ŋ ndo̍ o̍ lu᷅ŋ, mbō tōfa̍l nda̍ lēchōo̍.

²O̍ ko̍ŋ mi̍ Ɛ̍si̍lūā, wānā so̍līāā lāsa̍lāa̍, ō hūŋ a̍ sāwāla̍ŋ nda᷅ŋ o̍ lu᷅ŋ wāŋnda̍ kpo̍u̍ la̍chi̍, wānā la̍nɔ̍ ni̍, wānā pɔ̍nɔ̍ ni̍, a̍ chūāāmbɔ̄ o̍ chūāāmbɔ̄ ndu̍ o̍o̍ si̍nā ni᷅ŋ īsɔ̄ɔ̍ pɛ̍ŋgu̍. Nda̍ kpo̍u̍ ma̍ hu᷄ŋ si᷅m le̍ nīla̍ŋ yāŋɔ̄ɔ̍. Ndu̍yɛ̍ o̍ pāa̍le̍ tāse̍le̍ŋ chōo̍, o̍ pāŋgi̍i̍ ŋɔ᷄mmɛ̍ūve̍, o̍ wɔ̄sī kōŋ ni᷄ŋ sūɛ̍i̍ he̍ī ī yɔ̄nu᷄ŋ ni̍.

³Mbo̍ sīm mbō mūlī hɔ̄lla̍ kūmbū sāāsa̍ māmɛ̄ŋndo̍, mbo̍ tōfāl wāŋnda̍ sāwāla̍ŋ chōo̍ cho̍o̍ kpo̍lo̍to̍to̍ o̍ yāu̍wo̍ chōo̍. Kāndɔ᷄ŋndo̍ īdīi̍yo̍ ha̍a̍a̍ mi̍ pāa̍le̍ŋ lē kīāndū le̍nde̍, Ɛ̍si̍lūā cho̍ wāŋnda̍ sāwāla̍ŋ tōfāllo̍ o̍ yāu̍wo̍ chōo̍, mī wāŋnda̍ yāŋ ni᷅la̍ŋ ye̍ke̍ŋ bɛ̍ndū. Wānā la̍nɔ̍ ni̍, wānā pɔ̍nɔ̍ ni̍, a̍ chūāāmbɔ̄ o̍ chūāāmbɔ̄ si̍nā i̍sɔ̍ɔ̍ pɛ̍ŋgu̍, nda̍ kpo̍u̍ ā wa̍ nīla̍ŋ yāŋɔ̄ɔ̍.

⁴Ɛ̍si̍lūā wa̍ īsīsi̍ o̍ bāndu̍ īyɔ̄m nda̍ tāŋgu̍l le̍ bɔ̄ŋa᷅ŋndo̍ ho̍ō wo̍ chōo̍, mi̍ Mātīti̍yāā, a̍ Si̍ɛ̍mā, a̍ A̍māsa̍yā, a̍ Yūlu̍a̍yā, a̍ Hɛ̄līka̍yā, a̍ Māāsɛ̍yā, ma̍ kūā ma̍ kɔ̍ si᷅m ndu̍ o̍ bā kɛ̄ndɔ̄ɔ̍ chōo̍. Mi̍ Pɛ̄da̍a̍yā, a̍ Mɛ̍si̍a̍kī, a̍ Māli̍ki̍chā, a̍ Ha̍sīūm, a̍ Hāsīābādīda̍nāā, a̍ Sɛ̄kāla̍yā, a̍ Mɛ̍si̍u̍lām, mi̍ nda̍ kūā ma̍ kɔ̍ si᷅m ndu̍ o̍ bā mīāllo̍ chōo̍.

⁵Ndu̍yɛ̍, Ɛ̍si̍lūā wa̍ īsīsi̍ o̍ bāndo̍o̍ ho̍ō chōo̍ nāa̍ te̍māa̍, nāa̍ wānā o̍ wānā ndu̍ o̍o̍ cha᷅ ndu̍ wa̍, mbō tōfāl wa᷅ŋnda̍ sāwāla̍ŋ nda᷅ŋ, mī wāŋnda̍ kpo̍u̍ a̍ to̍fā ndu̍. Mɛ̄ɛ̍ o̍ ku̍mbi̍ yāu̍wo̍, mi̍ wāŋnda̍ kpo̍u̍ a̍ cha̍ŋ, ma̍ sīm.

⁶O̍ ko̍ŋ kɔ̍ɔ̍lī, mi̍ Ɛ̍si̍lūā sa̍ŋgālā Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ bɛ̄ndōo̍. O̍ ko̍ŋ, mi̍ wāŋnda̍ kpe̍de̍ a̍ he̍e̍lū bāla̍ŋ chōo̍ cho̍o̍ ma̍ dīmī āā, “Āmi̍i̍nā! Āmi̍i̍nā!” O̍ ko̍ŋ kɔ̍ɔ̍lī, nda̍ kpo̍u̍ ma̍ bāŋ wūla̍ŋ, ma̍ tūndū bōlle̍ lɛ̄ŋ ma̍ sōōlūū Mɛ̄lɛ̄ka̍ Ya̍a̍wɛ̄ɛ̄.

⁷O̍ ko̍ŋ kɔ̍ɔ̍lī, mi̍ Li̍va̍īya̍, nda̍ yɔ̍nūŋ māā Chɛ̍sūāā, a̍ Ba̍nī, a̍ Sīɛ̄lu̍ɛ̍bīāā, a̍ Cha̍a̍mīŋ, a̍ Āku̍bī, a̍ Sīābɛ̍tāī, a̍ Hōdi̍yā, a̍ Māāsɛ̍yā, a̍ Ke̍li̍tā, a̍ Āsālu̍i̍yā, a̍ Chōsa̍ba̍dī, a̍ Ha̍nāŋ, a̍ Pɛ̄lāli̍yā ma̍ mālā wāŋnda̍ le̍ mā sīna̍ nyɛ̄ Mɛ̄lɛ̄ka̍ dīmi̍ o̍ sāwāla̍ŋ ndɔ̄la̍ŋ ni᷄ŋ le̍ nda̍ wo̍ pɛ̄ŋgu̍, ndu̍yɛ̍ wāŋnda̍ kpo̍u̍ ā wa̍ īsīsi̍ o̍ fōōfō pi᷅lɛ̍ ko̍ŋ.

⁸Ndu̍yɛ̍, ma̍ tɛ̄ɛ̄sīāl wāŋnda̍ nyɛ̄ o̍ nyɛ̄ Ɛ̍si̍lūā to̍fa̍l nda̍ o̍ sāwāla̍ Mɛ̄lɛ̄ka̍la̍ŋ ni᷄ŋ, le̍ mā sīnā ndu̍ pɛ̄ŋgu̍ wa̍la̍ŋ.

⁹O̍ ko̍ŋ kɔ̍ɔ̍lī, mɛ̄ɛ̍ wāŋnda̍ tūēī nyɛ̄ sāwāla̍ Mɛ̄lɛ̄ka̍la̍ŋ lā dīmi̍ wo̍, ma̍ kōŋūl chōo̍ cho̍o̍ kpe̍le̍ŋ. O̍ ko̍ŋ, mi̍ Nɛ̄hīma̍yā, māsāa̍ le̍ būŋgɛ̄ī Chūlu̍sɛ̄lɛ̄m nde̍, a̍ Ɛ̍si̍lūā, wānā so̍līāā lāsa̍lāa̍, ō ndu̍ o̍o̍ pɛ̍ɛ̍kū vɛ̍lɛ̄ wāŋnda̍ sāwāla̍ Mɛ̄lɛ̄ka̍ la̍ŋ ndo̍, a̍ Li̍va̍īya̍, ā nda̍ a̍a̍ pɛ̍ɛ̍kū vɛ̍lɛ̄ wāŋnda̍ sāwāla̍ Mɛ̄lɛ̄ka̍ la̍ŋ nda̍, ma̍ dīmūl wānā o̍ wāna̍ wa̍ īsīsi̍ lo̍ŋ āā, “Lā pɛ̄ŋgi̍ ye̍e̍la̍ŋ, pāa̍le̍ cho̍ lē yɔ̄ŋga᷄ŋ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍ le̍ŋ pāa̍le̍ŋ nde᷅ŋ le̍ cho̍ ni̍, ō cho̍ pa̍a̍le̍ wānā bi̍ī īmɔ̍nɛ̍ mā cha᷄ŋ te̍.”

¹⁰Mi̍ Nɛ̄hīma̍yā di̍mī āā, “Lā mīīŋgu̍ o̍ chīɛ̄īlā nyāla̍ŋ mī lā dē nyɛ̄ dīāā yēēlɛ̍i̍yo̍, ndu̍yɛ̍ mī lā ko᷄l mūɛ̄īmā nyāma̍ mākīle̍pīi̍ya̍ŋ. Ndu̍yɛ̍ mī lā ke̍ wānāa̍ nɔ̍lā sɔ̍lā le̍ wa̍ nyɛ̄ dīa̍a̍ ō ti᷄ŋ a̍ mūɛ̄īya̍ŋ mā ti᷄ŋ. Kāni̍ pāa̍le̍ŋ nde᷅ŋ hāū, lē chō lē yɔ̄ŋga᷄ŋ o̍ māsānɔ̄ɔ̍ Mɛ̄lɛ̄ka̍ lo̍. Le̍la̍ŋ wānā bi̍ī ha̍ū īmɔ̍nɛ̍ le̍. Kāni̍ fo̍ndōle̍, kɔ̍l nyūlū Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ kē wo̍, ndu̍ cho̍ yōōmūmā nyāa̍ŋ ni̍.”

¹¹O̍ ko̍ŋ kɔ̍ɔ̍lī, mi̍ Li̍va̍īya̍ ā kpāā wāŋnda̍ āā, “Lā mēi̍ cha̍ŋndo̍. Pāa̍le̍ cho̍ lē yɔ̄ŋga᷄ŋ o̍ Mɛ̄lɛ̄ka̍ le̍ŋ le̍ cho̍ hāū ni̍. Le̍la̍ŋ lā pɛ̄ŋgi̍ mɔ̍nɛ̍i̍ bīyɔ̄ɔ̍.”

¹²O̍ ko̍ŋ kɔ̍ɔ̍lī, mi̍ wāŋnda̍ kpo̍u̍ a̍ mi̍i̍ŋgū o̍ chīɛ̄īlā ndāla̍ŋ mā kɔ̍ di̍ō nyɛ̄ dīa̍a̍, ndu̍yɛ̍ ma̍ kōlī kōlī mūɛ̄īmā mākīle̍pīi̍ma̍ nda᷄ŋ a̍ kɔ̄l kɛ̄ndɛ̄, ndu̍yɛ̍ ma̍ pīɔ̄ū pīɔ̄ū wāŋnda̍ nyɛ̄ di̍a̍a̍ a̍ mūɛ̄īmā nda᷄ŋ. Kāni̍ fo̍ndōle̍, le̍ mɛ̄ɛ̍ nda̍ sīna̍ nyɛ̄ nda̍ tōfa̍l nda̍ wo̍ pɛ̄ŋgu̍ yɛ̍.

¹³O̍ ko̍ŋ kɔ̍ɔ̍lī, o̍ pāa̍le̍ di̍i̍ŋ ndɔ̄le̍ŋ chōo̍ o̍ pāŋgi̍i̍ ke̍ŋ ni᷄ŋ, bōlīī lāyu̍ŋgu̍e̍i̍ kpo̍u̍, lātūlu̍ a̍ wānāā sōlīāā lāsa̍lāa̍, a̍ Li̍va̍īya̍, ma̍ kūā nāa̍ Ɛ̍si̍lūā chu̍a̍, wāna̍ pɛ̍ɛ̍ku̍ wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍, le̍ mbō kɔ̍ pɛ̍ɛ̍kū nda̍ nyɛ̄ sāwāla̍ŋ nda᷅ŋ lā dīmi̍ wo̍.

¹⁴O̍ sāwāla̍ŋ nda᷅ŋ pɛ̄ɛ̄kōo̍ ni᷄ŋ, ma̍ sāālu᷄ŋ o̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ Mūu̍sē le̍ wāŋnda̍ I̍sɔ̄lūɛ̄ī la̍ŋ ni᷄ŋ, māā wāŋnda̍ I̍sɔ̄lūɛ̄ī a̍ nɔ̍ mā wa̍ o̍ tɛ̍ndɛ̄i̍la̍ŋ ni᷄ŋ le̍ te̍le̍ŋ bi̍ŋgī, tē bɔ̄ŋa᷅ŋ pāŋgi̍i̍ ŋɔ᷄mmɛ̍ū wo̍ ī fūūlu̍u̍ pɛ̍ o̍ wɔ̄sīo̍o̍ ni᷄ŋ.

¹⁵Ndu̍yɛ̍ ma̍ sāālu᷄ŋ vɛ̍lɛ̄ māā a̍ te̍le̍ŋ pi᷅lɔ̍ɔ̍ ho̍ō, ā nɔ̄ mā tīu̍ yōōŋgūla̍ŋ o̍ chi̍e̍e̍ŋ nda᷄ŋ bā o̍ bā fe̍e̍, ndu̍yɛ̍ a̍ Chūlu̍sɛ̄lɛ̄m chi̍e̍e̍, mā dīmu̍l wāŋnda̍ āā, “Lā kɔ̍ o̍ pēmbo᷄ŋ, mī lā kɔ̍ hu᷅ŋ a̍ lɛ̄ūwūŋ yɔ̄mīī ɔ̄li̍fīi̍ wo̍ŋ, a̍ lɛ̄ūwūŋ yɔ̄mīī pa᷅ŋnde̍, a̍ lɛ̄ūwūŋ yɔ̄mīī ma̍tɔ̄ɔ̄ve̍, a̍ sīɔ̍ɔ̍la̍ wāūla̍ŋ, a̍ lɛ̄ūwūŋ yɔ̄m o̍ yɔ̄m māwūndu̍ che̍le᷅ŋ, mī lā hu᷄ŋ ta̍ŋgūl tɛ̍ndɛ̄i̍la̍ŋ mɛ̄ɛ̍ i̍ cho̍ ī pōōnyīāā o̍ sāwāla̍ Mɛ̄lɛ̄ka̍la̍ŋ ni᷄ŋ yɛ̍.”

¹⁶O̍ ko̍ŋ kɔ̍ɔ̍lī, mi̍ wāŋnda̍ kūā ma̍ kɔ̍ hu᷅ŋ a̍ lɛ̄ūwūŋ mu᷅ŋ, ma̍ kɔ̍ wu̍ū o̍ tɛ̍ndɛ̄i̍la̍ nda̍ tāŋgu̍l la̍ŋ chōo̍ kpo̍u̍, tɛ̍ndɛ̄i̍la̍ nda̍ tāŋgu̍l o̍ chīɛ̄īlā ndāla̍ŋ chōo̍ la̍ŋ ni̍,[9] a̍ la᷅ŋ o̍ bɛ̍ɛ̄la̍ ndāla̍ŋ, a̍ la᷅ŋ o̍ la̍u̍ ba̍lu̍ chīɛ̍i̍ Mɛ̄lɛ̄ka̍a̍ wo̍, a̍ la᷅ŋ o̍ lu᷅ŋndo̍ kūmbū bā dīō sāāsa̍ Māmɛ̄ŋndo̍, a̍ la᷅ŋ o̍ dīō sāāsāa̍ E̍fi̍lūēm īkɛ̄i̍.

¹⁷Wānā o̍ wāna̍ fu̍la̍ Ba̍bi̍lɔ̄ŋ o̍ bīyɔ̄ɔ̍ ni᷄ŋ ma̍ mīīŋgū Chūlu̍sɛ̄lɛ̄m, nda̍ kpo̍u̍ ma̍ tāŋgūl tɛ̍ndɛ̄i̍la̍ŋ ma̍ wā le̍ni᷄ŋ. Chɔ̍ŋ a̍ te̍le̍ŋ Chɔ̄ɔ̍sūāā, po̍ Nu᷅ŋ ndo̍ mbo̍ bīya᷅ŋ a̍ te̍le̍ŋ Ɛ̍si̍lūā to̍fa̍l wāŋnda̍ I̍sɔ̄lūɛ̄ī sāwāla̍ Mɛ̄lɛ̄ka̍la̍ŋ ndo̍, bɔ̄ŋa᷅ŋ wāā le̍nde̍ ndu̍ o̍o̍ bi̍i̍nu̍ŋ ndɔ̍ I̍sɔ̄lūɛ̍i̍ya̍ tɛ̄ɛ̄ŋ te̍. Wāŋnda̍ kpo̍u̍, ma̍ nāŋ kɔ̄l ta̍u̍ ta̍u̍.

¹⁸Le̍ pālɛ̍i̍ ī ŋɔ᷄mmɛ̍ū kpu̍lu̍ku̍u̍ wāŋnda̍ I̍sɔ̄lūɛ̄ī a̍ wa̍ o̍ bɔ̄ŋa᷅ŋndo̍ ho̍ō chōo̍. O̍ pālɛ̍i̍ ŋɔ̍mmɛ̍ūve̍ ni᷄ŋ, lēpāla̍ o̍ lēpāla̍, Ɛ̍si̍lūā wa̍ nda̍ sāwāla̍ Mɛ̄lɛ̄ka̍la̍ŋ tōfāllo̍ o̍ yāu̍wo̍ chōo̍. Ndu̍yɛ̍ o̍ pāa̍le̍ ŋɔ̄ma̍a̍le̍ŋ chōo̍, mi̍ wāŋnda̍ kpo̍u̍ ma̍ chūūŋgi̍āŋ nāa̍ pi᷅lɛ̍ le̍ bɔ̄ŋa᷅ŋndo̍ ho̍ō kīndāa̍ mɛ̄ɛ̍ sāwāla̍ bɔ̄ŋa᷅ŋndo̍ ho̍ō lā dīmi̍ yɛ̍.