Read Southern Kisi Nɛ̄hīma̍yā 9 Bible Online

Nɛ̄hīma̍yā 9 - Southern Kisi bible

Nɛ̄hīma̍yā 9

¹18O̍ ko̍ŋ kɔ̍ɔ̍lī, o̍ mālɔ̄ bi̍di̍i̍ŋ a̍ lē hīɔ̍ɔ̍lu̍a̍ŋ o̍ pāŋgi̍i̍ pi᷅lɛ̍i̍ kēŋ ni᷄ŋ, mi̍ I̍sɔ̄lūɛ̍i̍ya̍ kpo̍u̍, a̍ chu̍ūŋgi̍āŋ na̍a̍ pi᷅lɛ̍ ma̍ wōōnu᷄ŋ nyɛ̍lā lābɛ̍kīla̍ŋ, ma̍ dūāūnu᷄ŋ chu̍ndo̍o̍ o̍ lēbōl, ma̍ bīī su᷅mndo̍, le̍ kɔ̄l ndā ta̍mbɛ̍i̍yo̍ chɔ̄mndo̍.

²I̍sɔ̄lūɛ̍i̍ya̍ ki̍nɛ̍i̍, ma̍ fūlā wānāā lēkāa̍wa̍ tɛ̄ɛ̄ŋ, ma̍ kɔ̍ di̍i̍ŋnu᷄ŋ ku̍ndā yɛ̍. O̍ ko̍ŋ, ma̍ chɔ̄ɔ̄mūū yɔ̄ŋndā ndāla̍ wɔ̍ɔ̍ŋnda̍ŋ nāa̍ Mɛ̄lɛ̄ka̍ chūā, a̍ yɔ̄ŋndā wɔ̄ɔ̍ŋnda̍ fi̍nyāā ndāā ma̍māa̍ ā tōsa̍ la̍ŋ.

³Le̍ ha̍vɛ̄i̍la̍ŋ lā yāa̍, ā wa̍ īsīsi̍ o̍ fo̍ndāŋ pīlɔ̍ɔ̍, mā tōfāl nda̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ o̍ yāu̍wo̍ chōo̍, Mɛ̄lɛ̄ka̍ ndāa̍, ndu̍yɛ̍ le̍ ha̍vɛ̄i̍la̍ŋ vɛ̄lɛ̄ lā yāa̍ ā wa̍ yɔ̄ŋndā ndāla̍ wɔ̍ɔ̍ŋnda̍ŋ chɔ̄ɔ̄mūūwo̍ mā sōōlūū Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍.

⁴O̍ ko̍ŋ kɔ̍ɔ̍lī, Li̍va̍īya̍, nda̍ yɔ̍nūŋ ni̍ māā Chɔ̄ɔ̍sūāā, a̍ Ba̍nī, a̍ Ka̍di̍mīɛ̄l, a̍ Sīɛ̄bāna̍yā, a̍ Bu̍nī, a̍ Sīɛ̄lu̍ɛ̍bīāā, a̍ Ba̍nī o̍ pi᷅lɔ̍ɔ̍, a̍ Chɛ̍na̍nī, ma̍ kūā, ma̍ kɔ̍ he᷅l o̍ bāndu̍ nda̍ tēŋgu̍l le̍ si᷄mnda̍ŋ lēchōo̍ le̍ bɔ̍ŋa᷅ŋndo̍ ho̍ō wo̍ chōo̍, ma̍ sīm ma̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ chōo̍ cho̍o̍ kpe̍le̍ŋ.

⁵O̍ ko̍ŋ kɔ̍ɔ̍lī, Li̍va̍īya̍ ha̍ā, Chɛ̍sūāā, a̍ Ka̍di̍mīɛ̄l, a̍ Ba̍nī, a̍ Hāsīābi̍nɛ̍yā, a̍ Sīɛ̄lu̍ɛ̍bīāā, a̍ Hōdi̍yā, a̍ Sīɛ̄bāna̍yā, a̍ Pɛ̄tāhi̍yā, ma̍ dīmūl wāŋnda̍ āā, “Lā chɔ᷄ŋ mī lā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, lā sāŋga̍la̍ ndu̍ le̍ fɛ̍ɛ̍ŋ a̍ fɛ̍ɛ̍ŋ. Sāŋgālāa̍ chō le̍ dīōlā nūmnda̍ lēbɛ̄ɛ̄ la̍ŋ Mɛ̄lɛ̄ka̍, dīōla̍ cho̍ lā bɛ̄ndū, wānā nɔ̍lā la̍ŋ bɛ̍ɛ̍ sa̍ŋgālā le̍ la̍ŋ.”

⁶O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ pi̍ɛ̍ī, pīɛ̄īle̍ŋ nde᷅ŋ āā, “Nūm Mɛ̄lɛ̄ka̍ Ya̍a̍wɛ̄ɛ̄, nu᷄m pīlɛ̍ kpe̍ cho̍ Mɛ̄lɛ̄ka̍ ni̍. Nu᷄m to̍o̍si̍a̍a̍ ha̍la̍a̍ chōo̍ cho̍o̍, a̍ fo̍ndāŋ nu᷄m ŋ̄ chō īchāli̍ wo̍ ni̍, a̍ nyɛ̄ o̍ nyɛ̄ cho̍ lo̍ŋ. Chi̍e̍ēŋndo̍ bɛ̍ɛ̍ a̍ nyɛ̄ o̍ nyɛ̄ cho̍ lēni᷄ŋ, o̍ ko̍ŋ kɔ̍ɔ̍lī, a̍ pēe̍ mɛ̄ŋmā īhɛ᷄llo̍, lātūlu̍ a̍ nyɛ̄ o̍ nyɛ̄ cho̍ lēni᷄ŋ nu᷄m to̍o̍si̍a̍a̍ ni̍. Nu᷄m to̍sa̍ ni̍, mi̍ nyɛ̄ o̍ nyɛ̄ cho̍ yōōmū, mbo̍ wā yōōmū. Nyɛ̄ o̍ nyɛ̍ cho̍ o̍ fo̍nda᷄ŋ Mɛ̄lɛ̄ka̍a̍ chōo̍ cho̍o̍, nūm nda̍ sōōlūū ni̍.”

⁷Nūm Mɛ̄lɛ̄ka̍ Ya̍a̍wɛ̄ɛ̄, nu̍m hɛ̍li̍ sīndɛ̄ E̍bīlām ni̍, ma̍ sōlī ndu̍ o̍ chi̍e̍e̍ bɛ̍ndōo̍ Ɔ̍ɔ̄ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ, ma̍ kē ndu̍ dīōlā chēle̍ŋ āā, E̍bīlāha᷅m ni̍.

⁸Mɛ̄ɛ̍ ŋ̄ chē māā ō chō wānā sa̍kpō nu̍m o̍ hɔ̄l, ma̍ yīī kpe̍ma̍a̍ a̍ ndu̍, mā chūēl ndu̍ būŋgɛ̄ī māā ā chō hūnɔ̄ɔ̄ chūāūwāā ndūāā ma̍māa̍ lɛ̄ŋndē Ke̍na̍na̍i̍tīi̍ya̍ kē, a̍ lɛ̄ŋndē Hīta̍i̍tīi̍ya̍, a̍ lē A̍mɔ̍lu̍a̍i̍tīi̍ya̍, a̍ lē Pɛ̍lu̍i̍sa̍i̍tīi̍ya̍, a̍ lē Chɛ̄bu̍sa̍i̍tīi̍ya̍, a̍ lɛ̄ŋndē Ka̍ka̍sa̍i̍tīi̍ya̍. Ndu̍yɛ̍, ma̍ tōsā mɛ̄ɛ̍ ŋ̄ chūa̍ būŋgɛ̄i̍ yɛ̍. Kāni̍ fo̍ndōle̍, nūm Mɛ̄lɛ̄ka̍, wānā sa̍kpōo̍ ŋ̄ chō ni̍.

⁹Ndu̍yɛ̍ bōōndi̍i̍ fi̍nyāā nāā ma̍māa̍ ā wa̍ I̍chi̍pī o̍ nyɛ̄ pālāa̍ ni᷄ŋ nde̍, ma̍ chā nyɛ̄ ndā pa̍lāa̍. Ndu̍yɛ̍ mɛ̄ɛ̍ nda̍ kōŋu̍l nāa̍ nūm chūa̍ o̍ Pēe̍ Si̍a̍ŋā Mɛ̄ŋmā Īhɛ᷄llo̍ da̍ŋga̍la̍, ma̍ tūɛ̄ī cha᷄ŋ ndāa̍.

¹⁰Ma̍ lō o̍ ko̍ŋ ma̍ tōsā sɔ̄ɔ̍ŋ ka̍a̍ma᷅ŋ bɛ̄ndo᷄ŋ a̍ sɔ̄ɔ̍ŋ kɔ̄ndɔ̄fi̍llo̍ŋ a̍ māsā bɛ̍ndōo̍ I̍chi̍pī, nda̍ lāŋgba̍ā ndūāā ka᷅lla̍, a̍ wāŋnda̍ I̍chi̍pī kpo̍u̍. Kāni̍ fo̍ndōle̍, ma̍ chā sɔ̄ɔ̍ŋ wɔ̍ɔ̍ŋ wāŋnda̍ ha̍ā ā wa̍ fi̍nyāā nāā ma̍māa̍ tōsāllo̍ wo̍ŋ. Ma̍ tōsā mi̍ dīōlā nūmnda̍ŋ lā sɔ̄lā tɔ̍ɔ̍ bɛ̍ndōo̍, ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍ tɔ̍ɔ̍ ko̍ŋ chō wɔ̄ nu̍m chōo̍.

¹¹Ma̍ tōsā mi̍ Pēe̍ Mɛ̄ŋmā Īhɛ᷄llo̍ ō pīɔ̄ūvi̍āŋ tɛ̍ɛ̄ŋ wānāā nūmnda̍ o̍ hɔ̄l, mi̍ wānāā nūmnda̍ kēēkū o̍ lɛ̄ŋndē vēsɛ̍i̍ le̍ŋ chōo̍ ma̍ tāŋ. Kɛ̍ ma̍ tōsā mi̍ wānāa̍ wa̍ nda̍ tōūwɔ̄ɔ̍ wa̍ ā mɔ̄ɔ̄wā o̍ pēē yi̍ŋgi̍lɛ̍i̍ ko̍ŋ ni᷄ŋ, mɛ̄ɛ̍ nda̍ māl nu̍a̍ā pōūwo̍ o̍ pēē yi̍ŋgi̍lɛ̍i̍ bɛ̍ndōo̍ ni᷄ŋ mbō mɔ̄ɔ̄wa̍ chɔ̍ŋgɔ̍mu̍ yɛ̍.

¹²Ndu̍yɛ̍ nu᷄m wa̍ kɔ̄la̍ŋ a̍ wānāā nūmnda̍ ni̍. Īpāla̍ ki̍nɛ̍i̍, a̍ yu̍mbu̍ yu̍mbu̍ i̍kpu̍ŋgbāa̍ ŋ̄ wa᷄ wānāā nūmnda̍ nɛ̄īyo̍ chɔ̄mndo̍ ni̍, mā chɔ̄m nda̍ nɛ̄īyo̍ īchɔ̄l a̍ pa̍ŋgēle̍ lēyīŋndo̍.

¹³O̍ ko̍ŋ kɔ̍ɔ̍lī, a̍ lo̍ chōo̍ cho̍o̍ o̍ fo̍ndā nūmndo̍ mā sūāā nāa̍ wānāā nūmnda̍ chūā. Ndu̍yɛ̍ ma̍ tūāl o̍ Pēmbīī Sa̍a̍nāīve̍ chōo̍. Ma̍ chɔ̄m nda̍ pɛ̄ɛ̄kūlā nūmnda̍ sa̍kpō la̍ŋ, ndu̍yɛ̍ ma̍ kē nda̍ sāwāla̍ nu̍mndā tōnya̍la̍ŋ.

¹⁴Ma̍ chɔ̄m nda̍ le̍ mā kɛ̄si̍ pāa̍le̍ nu̍mndē pɛ̍ŋgīāāle̍ŋ lēbɛ̄ɛ̄. Ma̍ kē nda̍ pɛ̄ɛ̄kūlā nūmnda̍ŋ a̍ nyɛ̄ o̍ nyɛ̄ ŋ̄ hɛ̄na̍ŋ nda̍ mā tōsa̍, ndu̍yɛ̍ a̍ sāwāla̍ nu̍mnnda̍ŋ, sa̍na̍a̍ a̍ bu̍ɛ̍ī nūmndo̍ Mūu̍sē.

¹⁵Mɛ̄ɛ̍ yīa̍a̍ŋ mā nɛ̄i̍ nda̍, ma̍ kē nda̍ bēe̍dīi̍yo̍ fūlāa̍ o̍ fo̍nda᷄ŋ Mɛ̄lɛ̄ka̍a̍ chōo̍ cho̍o̍. Ndu̍yɛ̍ mɛ̄ɛ̍ kōlɔ̄ɔ̍ bīī nda̍, ma̍ tōsā mi̍ mɛ̄ŋnda̍ŋ mā fūlā o̍ pōūwo̍ le̍ mā ko᷄l. Ndu̍yɛ̍, ma̍ dīmūl nda̍ le̍ mā kɔ̍ chu̍ā lɛ̄ŋndē ŋ̄ chūe̍l nda̍ būŋgɛ̄i̍ ī kālā ka̍lā māā ā chō nda̍ kē le̍ŋ.

¹⁶Kɛ̍ mi̍ fi̍nyāā nāā ma̍māa̍ tōsā yōŋgāa̍ a̍ nīlā kālu̍la̍ŋ, ā chɛ᷄l mā tōsa̍ nyɛ̄ ŋ̄ dīmu̍l nda̍ le̍ tōsāa̍ wo̍ le̍.

¹⁷Ma̍ kɛ̄ɛ̄ le̍ nu̍m nīla̍ŋ yāŋɔ̄ɔ̍, ma̍ pūɛ̄ɛ̄nu᷄ŋ le̍ lōōnɔ᷄ŋndo̍ a̍ ka̍a̍ma̍ālā ŋ̄ tōsa̍ nda̍ tɛ̍ɛ̄ŋ nda̍ŋ. Ma̍ tōsā nīlā kālu̍la̍ŋ ma̍ kɛ̄ɛ̄ le̍ nyɛ̄ ŋ̄ dīmu̍l nda̍ wo̍ tōsāa̍. Ma̍ hɛ̄lī wāŋndo̍ le̍ mbō si᷄m nda̍ lāchī le̍ mā mīīŋgu᷄ŋ I̍chi̍pī o̍ chɛ̄le̍ŋ ni᷄ŋ. Kɛ̍ nūm Mɛ̄lɛ̄ka̍, wāna̍ ma᷅l wa᷅ŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ ndo̍ ŋ̄ chō ni̍. Wāna̍ tu̍i̍i̍nūŋ wa᷅ŋnda̍ īnyīɛ̍ɛ̍ ndu̍yɛ̍ ma̍ nɔ̄ kāālāa̍ ta̍u̍ le̍ wāŋnda̍ wo̍ ŋ̄ cho̍ ni̍. A̍ do̍u̍nūŋ tu̍mbe̍ chɔ̍ chɔ̍ le̍. Le̍ he̍ī, a̍ nyɛ̄ nda̍ tōsa̍ ko̍ŋ ndo̍ kpo̍u̍, a̍ kɛ̍ɛ̍ nda̍ mā ma̍l nda̍ le̍.

¹⁸Mi̍ fi̍nyāā nāa̍ ha̍ā ā lō o̍ ko̍ŋ ma̍ tōōsīāā nyɔ̄ɔ̍ a̍ chīli̍ŋi̍i̍ te̍e̍ŋgīɛ̍i̍ māā nāū, ma̍ dīmī dīōmndā wɔ̄ɔ̍ŋnda̍ŋ a̍ nūm, māā mɛ̄lɛ̄ka̍ nda̍ so̍li̍ nda̍ I̍chi̍pī o̍ chɛ̄le̍ŋ ni᷄ŋ ndo̍ wa̍ ko̍ŋ ni̍.

¹⁹Kɛ̍ le̍ mɛ̄ɛ̍ ŋ̄ chō Mɛ̄lɛ̄ka̍ īnyīɛ̍ɛ̍ bɛ̄ndū yɛ̍, a̍ kɛ̍ɛ̍ nda̍ mā ma̍l nda̍ o̍ po̍li̍ ko̍ŋ ni᷄ŋ te̍. Yu̍mbu̍ yu̍mbu̍ i̍kpu̍ŋgba̍ wa̍ nda̍ lāchī īpāla̍ le̍ nda̍ nɛ̄īyo̍ chɔ̄mndo̍ wo̍, a̍ fe̍ŋa̍ ndu̍ nda̍ lāchī le̍. Ndu̍yɛ̍ pa̍ŋgēle̍ lēyīŋ ndu̍ o̍o̍ yɔ̍ŋgū nda̍ nyɛ̄ wa̍wo̍ŋndo̍ īchɔ̄l o̍ kɔ̄lā ndāla̍ŋ ni᷄ŋ ndo̍ bɛ̍ɛ̍, ō wa̍ wɔ̄ nda̍ lāchī kɛ᷅.

²⁰Ndu̍yɛ̍, ma̍ kē nda̍ nyi̍nā nūm kɛ̍ndɔ̄ɔ̍ le̍ mbō wa̍ nda̍ sīlāa̍. Ndu̍yɛ̍ ma̍nɛ̄i̍ nūm o̍o̍ ke᷅ nda̍ le̍ dīo̍o̍ wo̍ bɛ̍ɛ̍, a̍ so̍li̍ nda̍ ndu̍ o̍ sōndō le̍. O̍ ko̍ŋ kɔ̍ɔ̍lī, tē kōlɔ̄ɔ̍ ndu̍ o̍o̍ bi̍ī nda̍ pɛ̍, a̍ ke̍ nda̍ mɛ̄ŋnda̍ŋ.

²¹Le̍ wɔ̄sīla̍ŋ be̍le̍-hi̍ɔ̍ɔ̍lu̍ ā wa̍ nda̍ māndāa̍ o̍ po̍llo̍ ni᷄ŋ, nyɛ̄ o̍ nyɛ̄ ve̍ nda̍ lēpɛ̄ŋ te̍. Ndu̍yɛ̍, nyɛ̄lā sīɔ̍ŋ nda̍ lēkɔ̄ɔ̍ le̍, kɛ̄lɛ̄ŋgāā mī pēlūŋ ŋ̄ hīīndu̍u̍ nda̍.

²²Ma̍ bīī ma̍ kē nda̍ lɛ̄ŋnde̍ a̍ sɔ̍ŋgi̍la̍ lɛ̄ŋīī kēŋ, ndu̍yɛ̍ a̍ māsɛ̄i̍ o̍ lɛ̄ŋīī kēŋ ni᷄ŋ kpo̍u̍. Ma̍ kē nda̍ lɛ̄ŋnde̍ ta̍u̍. Māsāa̍ Si̍hɔ̄ŋ o̍ wa̍ Hɛ̍si̍bɔ̄ŋndo̍, a̍ Māsāa̍ Ɔ̍kū, o̍ wa̍ Ba̍sīāŋndo̍, lɛ̄ŋīī ndɛ̄i̍ bɛ̍ɛ̍ kpo̍u̍ ma̍ kē nda̍.

²³Ndu̍yɛ̍, ma̍ tōsā mi̍ chūāūwāā ndāa̍ kūī ta̍u̍ ta̍u̍, to̍fa̍ wɔ̍ ko̍ mɛ̄ɛ̍ lōo̍ŋ ŋ̄ chō nu̍a̍ā o̍ ha̍la̍a̍ ni᷄ŋ cho̍o̍ cho̍o̍ ŋ̄ chu̍ū chɔ᷅m te̍ yɛ̍. Ma̍ hūŋ a̍ nda̍ o̍ lɛ̄ŋndē ŋ̄ chūe̍l fi̍nyāā ndāā ma̍māa̍ būŋgɛ̄i̍ māā ā chō nda̍ kē le̍ŋ ni᷄ŋ.

²⁴O̍ ko̍ŋ, mi̍ chūāūwāā ndāa̍ bīī lɛ̄ŋndē lēŋ kpo̍u̍, mi̍ lē sīmnu᷄ŋ nyɛ̄ ndā. Ke̍na̍na̍i̍tīi̍ya̍a̍ wa̍ o̍ lɛ̄ŋndē lēŋ ni᷄ŋ nda̍ lāchī wa̍, ma̍ tōsā ma̍ yām Ke̍na̍na̍i̍tīi̍ya̍a̍ ka̍ŋ. Ma̍ māl Ke̍na̍na̍i̍tīi̍ya̍a̍ ka̍ŋ nda̍ o̍ bā, a̍ māsāa̍ ndāā bɛ̍ndūa̍a̍ lātūlu̍, le̍ mā tōsa̍ nyɛ̄ nda̍ a̍a̍ hɛ̍na̍ŋ le̍ tōsāa̍ a̍ nda̍ wo̍.

²⁵Chi̍e̍e̍ŋ bɛ̍ndūŋ wāŋnda̍ ha̍ā nda̍ a̍a̍ to̍sa̍ ŋ̄ kālā ka̍lā yɔ̄ŋi̍ ya̍a̍mɔ̍ɔ̍wa̍ ā bīi̍ mu̍ŋ ndo̍ŋ, mi̍ wānāā nūmnda̍ ā bīī chi̍e̍e̍ŋ mu̍ŋ, lātūlu̍ a̍ lɛ̄ŋīī kɛ̄ndɛ̄ī tɔ̄lɔ̄ɔ̄la̍ŋ lā nāŋ nde̍. Chīɛ̄īla̍ wa̍ lo̍ŋ a̍ nyɛ̄m kɛ̄ndɛ̄ kɛ̍ndɔ᷄ŋ ŋ̄ pīāā lēni᷄ŋ nda̍ŋ, ma̍ chūā la̍ŋ kpo̍u̍ mi̍ lā sīmnu᷄ŋ nyɛ᷅ ndā. Ndu̍yɛ̍ so̍o̍ŋnda̍ māmɛ̄ŋnda̍ wa̍ ni᷅ŋ lo̍ŋ la̍ tu̍a̍u̍wāā, le̍ mɛ̄ŋnda̍ŋ bīyɔ̄ɔ̍ lēni᷄ŋ nda̍ŋ ni̍, a̍ kpe̍le̍la̍ mākīle̍pīi̍la̍ŋ, a̍ kpe̍le̍la̍ ɔ̄li̍fīi̍la̍ŋ, a̍ kpe̍le̍la̍ yɔ̄mīī kūāmɛ̄ī chēle̍ŋ nda̍ŋ, la̍ŋ kpo̍u̍ mi̍ lā sīmnu᷄ŋ nyɛ᷅m ndā. Ā wa̍ dīo̍o̍ mā pūm, ma̍ chēlūl. Ndu̍yɛ̍, ma̍ wānu᷄ŋ a̍ kɔ̄l hīnīāā, mā tūɛ̄ī nyɛ᷅m kɛ̄ndɛ̄ŋ ŋ̄ ke̍ nda̍ wo̍ŋ yēēlā.

²⁶Kɛ̍ a̍ ko̍ŋ kpo̍u̍, ma̍ tōsā bōllē kālāle̍ŋ, ma̍ sōlī nu̍m dīōm. Ma̍ mūlūl sāwāla̍ nu̍mnda̍ŋ kɔ̄ɔ̍, ma̍ dīū dīū wānāā nūm a̍a̍ su̍a̍ā le̍ nūmnda̍, ā nda̍ a̍a̍ si̍lā nda̍ le̍ mī nda̍ a̍a̍ mi̍i̍ŋgu̍ nu̍m o̍ ībūŋ nda̍, ma̍ sūāā dīōmndā wɔ̄ɔ̍ŋnda̍ŋ a̍ nūm ta̍u̍.

²⁷Le̍ he̍ī, ma̍ māl nda̍ ya̍a̍mɔ̍ɔ̍wa̍a̍ ndāa̍ o̍ bā, mi̍ ya̍a̍mɔ̍ɔ̍wa̍a̍ ndāā ka̍ŋ ā tūsī nda̍ nyɛ̄ pālāa̍ chōo̍ ta̍u̍. Kɛ̍ mɛ̄ɛ̍ nda̍ kōŋu̍l nāa̍ nūm chu̍a̍, nāa̍ ŋ̄ chō o̍ fo̍ndāŋ nūmndo̍ chōo̍ cho̍o̍ wa̍ ma̍ tūɛ̄ī pīɛ̄īlē ndāle̍ŋ, mā tūīīnu᷄ŋ nda̍ īnyīɛ̍ɛ̍ ma̍ yɔ̄ŋgū nda̍ wānāā mālāa̍. Mi̍ wānāā mālāā kāŋ ā bāŋā nda̍ ya̍a̍mɔ̍ɔ̍wa̍a̍ ndāā ka̍ŋ o̍ bā.

²⁸Kɛ̍ dīmīo̍o̍ nu̍a̍ā mī nda̍ a̍a̍ sɔ̍la̍ kɔ̄l nyūlōo̍, mī nda̍ a̍a̍ mu̍li᷄ŋ bɛ̍ɛ̍ vɛ̍lɛ̄ sɔ̄ɔ̍ŋ wɔ̍ɔ̍ŋndo̍ŋ tōsāa̍. O̍ ko̍ŋ, mā ma̍l nda̍ vɛ̄lɛ̄ ya̍a̍mɔ̍ɔ̍wa̍a̍ ndāa̍ o̍ bā, mā wa̍ ya̍a̍mɔ̍ɔ̍wa̍a̍ ndāa̍ o̍ bā bɛ̄ŋgu̍. Ndu̍yɛ̍ tē ā kōŋu̍l vɛ̄lɛ̄ nāa̍ nūm chu̍a̍ pɛ̍, ā tūēī pīɛ̄īlē ndāle̍ŋ nāa̍ ŋ̄ chō o̍ fo̍ndāŋ nūmndo̍ chōo̍ cho̍o̍ wa̍. Ndu̍yɛ̍ le̍ te̍le̍ŋ o̍ te̍le̍ŋ nyīɛ̍ɛ̍ye̍ nūm o̍o̍ tu̍i̍i̍nūŋ nda̍ ni̍ mā ba̍ŋa̍ nda̍.

²⁹Ma̍ sīlā nda̍ le̍ mī nda̍ a̍a̍ mu̍li̍ hɔ̄lla̍ o̍ sāwāla̍ nu̍mnda̍ŋ, mī nda̍ a̍a̍ to̍sa̍ nyɛ̄ la̍ di̍mi̍ wo̍. Kāni̍ sāwāla̍ nu̍mnda̍ŋ chūa̍a̍, ndu̍ to̍sā ni̍ mī wāna̍ chi̍o̍o̍ wa̍ yōōmū. Kɛ̍ mi̍ wānāā nūmnda̍ tōsā yōŋgāa̍, ma̍ mūlūl sāwāla̍ nu̍mnda̍ŋ kɔ̄ɔ̍, ma̍ tōsā nīlā kālu̍la̍ŋ, ā ye᷄ŋ ni᷅la̍ŋ o̍ nyɛ̄ sāwāla̍ nu̍mnda̍ŋ lā dīmi̍ wo̍ le̍.

³⁰Le̍ wɔ̄sīlā fāŋgā fa̍ŋga̍ a̍ wa̍ nda̍ bīūwɔ᷄ŋndo̍. Ma̍ tōsā sa̍na̍a̍ a̍ nyi̍nā nūmndo̍ mi̍ wānāa̍ su̍a̍ā le̍ Mɛ̄lɛ̄ka̍ wa̍ ā sīlā nda̍. Kɛ̍ a̍ ko̍ŋ kpo̍u̍, ā ye᷄ŋ la̍ni̍ le̍. Le̍ he̍ī, ma̍ māl nda̍ lɛ̄ŋīī nda̍ chīɛ̄ɛ̄li̍āŋnde̍ o̍ bā.

³¹Kɛ̍ le̍ mɛ̄ɛ̍ ŋ̄ chō wāna̍ īnyīɛ̍ɛ̍ bɛ̄ndū yɛ̍, a̍ sɔ̄ɔ̍ŋ nda̍ tōsa̍ mu̍ŋ ndo̍ŋ kpo̍u̍, a̍ fe̍ŋa̍ nda̍ bāla̍ŋ kɔ̄ɔ̄lī, mā chi̍i̍ nda̍ fa̍ū le̍, ma̍ tūīīnu᷄ŋ nda̍ īnyīɛ̍ɛ̍. Ā chō Mɛ̄lɛ̄ka̍ īkɛ̄ndɛ̄, ndu̍yɛ̍ ma̍ wā Mɛ̄lɛ̄ka̍ īnyīɛ̍ɛ̍ bɛ̄ndū.

³²Le̍la̍ŋ o̍o̍ Mɛ̄lɛ̄ka̍ nāa̍, Mɛ̄lɛ̄ka̍ bɛ̄ndōo̍, Mɛ̄lɛ̄ka̍ to̍sā sɔ̍ɔ̍ŋ ŋ̄sīōōŋ bɛ̄ndo᷄ŋ ndo̍, Mɛ̄lɛ̄ka̍ kpāāyā bɛ̍ndōo̍, o̍ fe̍ŋāŋ o̍ kpe̍ma̍ ndɔ̄ɔ̍ chōo̍ le̍ wo̍, Mɛ̄lɛ̄ka̍ ka̍a̍la̍ na̍a̍ le̍ fɛ̍ɛ̍ŋ a̍ fɛ̍ɛ̍ŋndo̍, yāndi̍i̍ Mɛ̄lɛ̄ka̍, nyɛ̄ pālāa̍ to᷅l na̍a̍ ho̍ō chōo̍ wo̍, pɛ̍ɛ̍sā ndu̍ māā ō cho̍ nyɛ̄ o̍ nyɛ̄ nu̍m o̍ hɔ̄l te̍ le̍. Chɔ̍ŋ a̍ bōōndi̍i̍ māsāā yɛ̍ yi̍a̍a̍ Āsi̍i̍līāā a̍ ka̍ndu̍ na̍a̍ nyɛ̄ pālāa̍ tūsīo̍o̍ chōo̍ ve̍, mbo̍ bīī a̍ pāa̍le̍ hāūle̍ŋ nde᷅ŋ, na̍a̍ ni̍, māsāa̍ nāā bɛ̍ndūa̍a̍ ni̍, lāŋgba̍ā nāā ka᷅lla̍ ni̍, wānāā nāā so̍līāā lāsa̍lāa̍ ni̍, wānāā nāa̍ su̍a̍ā le̍ Mɛ̄lɛ̄ka̍ wa̍ ni̍, fi̍nyāā nāā ma̍māa̍ ni̍, a̍ wānāā nāa̍ kpo̍u̍, nyɛ̄ pālāa̍ ho̍ō ō chō na̍a̍ chōo̍.

³³Kɛ̍ ndu̍yɛ̍, nyɛ̄ pālāā ŋ̄ tūsi̍ na̍a̍ ho̍ō chōo̍ wo̍, o̍ nɛ̄ī kpe̍e̍kpe̍i̍ ŋ̄ tūsi̍ na̍a̍ ndu̍ chōo̍ ni̍, ndu̍yɛ̍ o̍ nɛ̄ī sa̍kpōo̍ chōo̍ ŋ̄ tōsa̍ ndi̍ ni̍. Na̍a̍ ŋ̍ to̍sa̍ yɔ̄ŋ wɔ̄ɔ̍ŋndo̍ ni̍.

³⁴Māsāa̍ nāā bɛ̍ndūa̍a̍ ni̍, lāŋgba̍ā nāā ka̍lāā lēlɛ̄ŋnda̍ŋ ni̍, wānāā nāā so̍līāā lāsa̍lāa̍ ni̍, fi̍nyāā nāā ma̍māa̍ ni̍, ā chūe̍ sa̍wāla̍ nu̍mnda̍ŋ te̍. Sīlālā ŋ̄ ke̍ nda̍ la̍ŋ a̍ pɛ̄ɛ̄kūlā nūmnda̍ŋ, ā ye᷄ŋ nda̍ŋ lānī le̍.

³⁵Ndu̍yɛ̍ bōōndi̍i̍ nda̍ wānu̍ŋ bɛ̍ɛ̍ o̍ māsāle̍ ndāle̍ŋ chōo̍, ma̍ wā nyɛ̄m kɛ̄ndɛ̄ŋ bɛ̄ndūŋ ŋ̄ ke̍ nda̍ wo̍ŋ tɔ̄nɔ̄ɔ̍ dīo̍o̍ o̍ lɛ̄ŋndē kɛ̄ndɛ̄lē ŋ̄ ke᷄ nda̍ le̍ŋ ni᷄ŋ nde̍ bɛ̍ɛ̍, ā chɛ᷄l mā sōōlu̍u̍ nu̍m, mā mūlūl yɔ̄ŋndā ndāla̍ wɔ̍ɔ̍ŋnda̍ŋ kɔ̄ɔ̍ le̍.

³⁶Kɛ̍ to̍fa̍ wɔ̍, ŋ̄ sīmnu᷄ŋ ni᷅ŋ hāū chi̍a̍ā o̍ lɛ̄ŋnde̍ŋ nde᷅ŋ ni᷄ŋ, lɛ̄ŋnde̍ ŋ̄ ke̍ le᷅ŋ fi̍nyāā nāā ma̍māa̍, le̍ mī nda̍ a̍a̍ wa̍ kōmɔ̄ɔ̄lā kɛ̄ndɛ̄ kɛ̍ndɛ̄la̍ cho̍ o̍ lēni᷄ŋ nda̍ŋ dīo̍o̍, ndu̍yɛ̍ mī nda̍ a̍a̍ wa̍ nyɛ̄m kɛ̄ndɛ̄ kɛ̍ndɛ᷄ŋ cho̍ o̍ lɛ̄ŋnde̍ŋ nde᷅ŋ ni᷄ŋ ndo̍ŋ tɔ̄nɔ̄ɔ̍ dīo̍o̍ le̍ŋ.

³⁷Le̍ yɔ̄ŋndā nāāla̍ wɔ̍ɔ̍ŋnda̍ŋ, nyɛ̄ o̍ nyɛ̄ kɛ̄ndɛ̍ fu̍lā o̍ lɛ̄ŋndē nāā le̍ŋ ni᷄ŋ kpe̍de̍, māsāā bɛ̍ndūāā ŋ̄ kɛ̄si̍ na̍a̍ chōo̍ wa̍, nda̍ na̍a̍ ŋ̄ yōū nyɛ᷅m mu᷅ŋ ni̍. Nda̍ nɔ̍ ni᷅ŋ hāū kpa̍a̍yāa̍ na̍a̍ chōo̍ a̍ chɔ̄lūāā nāa̍ kpo̍u̍ ni̍. Mɛ̄ɛ̍ nda̍ hɛ̄nāŋ le̍ na̍a̍ bīyɔ̄ɔ̍ yɛ̍, le̍nde̍ ko̍ni̍ nda̍ bīī na̍a̍ ni̍. Nyɛ̄ pālāa̍ cho̍ na̍a̍ chōo̍ wo̍, ō chō ō bɔ̍ɔ̍ bɔ̍ɔ̍.

³⁸O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ di̍mī āā, “Le̍la̍ŋ a̍ nyɛ̄ o̍ nyɛ̍ yɔ̍nu̍ŋ kpo̍u̍ na̍a̍ wāŋnda̍ I̍sɔ̄lūɛ̄ī kpo̍u̍, ŋ̄ chō hāū chɛ᷅la᷅ŋ kpe̍e̍kpe̍i̍yo̍ tōsā, mī ŋ̄ pōōnyi̍a̍a̍ ndu̍ o̍ yāu̍ cho̍o̍, mī lāŋgba̍ā nāā ka̍lāā lēlɛ̄ŋnda̍, a̍ Li̍va̍īyāā nāa̍, a̍ wānāā nāā so̍līāā lāsa̍lāa̍, mā hōl ta̍mbūe̍i̍la̍ ndāla̍ŋ lēchōo̍ le̍ chɔ̄mndo̍ māā ā chɛ᷄l.”