Read Southern Kisi Ɛ̍si̍tā 3 Bible Online

Ɛ̍si̍tā 3 - Southern Kisi bible

Ɛ̍si̍tā 3

¹Po̍ pi᷅lɛ̍ wa̍ dīōla̍ŋ āā Ha̍māŋ, fi̍nyā ndɔ̍ dīōla̍ŋ āā Hāmɛ̄da̍tā, fūlāa̍ o̍ yu̍ŋgu̍ A̍ka̍kī[1] wo̍ chōo̍. Māsāa̍ Sɛ̍sɛ̄ɛ̄ wānāa̍ wa̍ ndu̍ wa̍llo̍ o̍ bā bɛ̄ŋgu̍ wa̍ ō pīlɛ̍ wa̍ pōo̍ ho̍ō ni̍. Mi̍ ī yɔ̄nu᷄ŋ mi̍ Māsāa̍ Sa̍a̍si̍ī o̍ hi̍vī pōo̍ ho̍ō lāchī o̍ wa̍llo̍ ni᷄ŋ, wānāa̍ wa̍ ndu̍ wa̍llo̍ o̍ bā bɛ̄ŋgu̍ wa̍ ki̍nɛ̍i̍, mbo̍ kɛ̄sī pōo̍ ho̍ō nda̍ bōlle̍ŋ kpo̍u̍.

²Ndu̍yɛ̍, mi̍ Māsāa̍ Sɛ̍sɛ̄ɛ̄ o̍ do̍ū wānāā nda̍ a̍a̍ ma̍ndā di̍ō sāāsāa̍ le̍ lūɛ̄īyɔ̄ɔ̍ o̍ fo̍ndā lēmāsāa̍ wa̍ kpo̍u̍ sa̍wāa̍, māā te̍le̍ŋ o̍ te̍le̍ŋ tē ā chē Ha̍māŋ pɛ̍, māā ā nɔ̄ mā tūndu᷄ŋ ndu̍ o̍ lābɛ̄ŋgu̍ ni̍ŋ, le̍ ndu̍ bɛ̄ɛ̄le̍ŋ kīo̍o̍. Ndu̍yɛ̍, nda̍ kpo̍u̍ dīmīo̍o̍ nu̍a̍ā mī nda̍ a̍a̍ che᷅ Ha̍māŋ, mā tūndu᷄ŋ ndu̍ o̍ lābɛ̄ŋgu̍ ni̍ŋ. Kɛ̍ Mɔ̍di̍kāī ndu̍, ndu̍ o̍o̍ che᷅ŋ mī ndu̍ o̍o̍ tu̍ndu᷄ŋ Ha̍māŋ o̍ lābɛ̄ŋgu̍ ni̍ŋ te̍.

³Mi̍ wānāā wa̍lla̍ ā pīli̍a̍a̍ a̍ ma̍ndā di̍ō kpākīo̍o̍ le̍ lūɛ̄īyɔ̄ɔ̍ o̍ māsāa̍ lo̍ chi̍ɛ̍ī ni̍ŋ nda̍ ā nyūnā Mɔ̍di̍kāī le̍ sa̍bū o̍ cho̍ nyɛ̄ Māsā bɛ̍ndōo̍ o̍ dīmi̍ wo̍ kīɔ̍ɔ̍ tōsāa̍ wo̍.

⁴Lēpāa̍ o̍ lēpāa̍ ā wa̍ sūɛ̍i̍ nāa̍ ndu̍ chu̍a̍ a̍ sūɛ̍i̍ he̍ī o̍kɔ̄ɔ̄, kɛ̍ Mɔ̍di̍kāī o̍ chɛ᷄l nda̍ dīōm te̍. Mbo̍ dīmūl nda̍ āā, “Chu̍ūnɔ̄ɔ̍ ya̍ I̍ cho̍ ni̍. I̍ tu̍ndu᷄ŋ Ha̍māŋ o̍ lābɛ̄ŋgu̍ ni̍ŋ te̍.”[2] O̍ ko̍ŋ, mi̍ chāāŋāā ndūa̍a̍ wa̍lla̍ ā mālnu᷄ŋ ma̍ kɔ̍ di̍mūl Ha̍māŋ a̍ sūɛ̍i̍ he̍ī o̍kɔ̄ɔ̄. Nda̍ a̍a̍ ye̍e̍ma̍ mī nda̍ a̍a̍ si̍na̍ tē Ha̍māŋ o̍ hi̍ni̍ kɔ̄l a̍ sūɛ̍i̍ he̍ī, tāāma̍ fa̍ū, mi̍ Mɔ̍di̍kāī di̍mūl nda̍ māā Chu̍ūnɔ̄ɔ̍ o̍ cho̍ ni̍.

⁵Mɛ̄ɛ̍ Ha̍māŋ si̍na̍ māā Mɔ̍di̍kāī o̍ si᷅m mbō tūndu᷄ŋ le̍ ndu̍ lēbɛ̄ɛ̄ ke᷅ le̍, mbo̍ tāmbū kɔ̄l ta̍u̍ ta̍u̍.

⁶Mbo̍ kɛ̄ɛ̄sīāā le̍ mbō tūsi̍ Mɔ̍di̍kāī nyɛ̄ pālāa̍ chōo̍. Kɛ̍ mɛ̄ɛ̍ o̍ tu̍e̍ī māā Chu̍ūnɔ̄ɔ̍ Mɔ̍di̍kāī o̍ cho̍ ni̍, mbo̍ dīmī māā ō cho̍ Mɔ̍di̍kāī ko̍ le̍ o̍ cho̍ nyɛ̄ pālāa̍ tūsī chōo̍ le̍. Mbo̍ kɛ̄ɛ̄sīāā māā Chu̍ūnɔ̄ o̍ Chu̍ūnɔ̄ cho̍ lɛ̄ŋnde̍ŋ ni᷄ŋ, mbo̍ wā o̍ māsāle̍ Sɛ̍sɛ̄ɛ̄ le̍ŋ bɛ̄ŋgu̍, māā nda̍ kpo̍u̍ ā nɔ̄ mā sɔ̄la̍ pīɔ̍mndo̍.

⁷O̍ ko̍ŋ, ma̍ wūū kōo̍ŋ, le̍ mā sīna̍ pāa̍le̍ŋ, a̍ pāŋgi̍i̍ kpe̍e̍kpe̍i̍ nda̍ dīū wa᷅ŋnda̍ ha̍ā o̍ lēpīlɛ̍ ni᷄ŋ kpo̍u̍ ve̍. O̍ ko̍ŋ, ma̍ chɛ̄la᷅ŋ māā pāŋgi̍i̍ tɔ̍ a̍ ī mūu̍ŋnde̍, pāŋgi̍i̍ A̍dā ve̍, mālɔ̄ tɔ̍ a̍ lē yāa̍, māā lēchōo̍ nda̍ nɔ̄ ni̍ mā dīu̍ wāŋnda̍ ha̍ā. Wɔ̄sī Māsāa̍ Sɛ̍sɛ̄ɛ̄ o̍ chi̍ŋa̍ wɔ̄sīla̍ŋ tɔ̍ a̍ lā tīɔ̍ɔ̍ŋ o̍ lēmāsā wo̍, pāŋgi̍i̍ tāse̍i̍ o̍ wɔ̄sī kōŋ ni᷄ŋ, pāŋgi̍i̍ Ni̍sāŋ nde̍, o̍ pāŋgi̍i̍ ke̍ŋ ni᷄ŋ nda̍ wūu̍ kōo̍ŋ mu᷅ŋ ni̍.

⁸Mi̍ Ha̍māŋ lo᷅ o̍ ko̍ŋ mbo̍ kɔ̍ di̍mūl Māsāa̍ Sa̍a̍si̍ī āā, “Wānāā pu᷅m chō o̍ lɛ̄ŋnde̍ŋ nde᷅ŋ ni᷄ŋ ā tīūwāā o̍ būŋgāŋ yɛ̍ yɛ̍ŋ ŋ̄ chō chōo̍ wo̍ŋ ni᷄ŋ kpo̍u̍, wāŋnda̍ ha̍ā nda̍ pɛ̄ɛ̄kūlā ndāla̍ŋ lā chō bɔ̄ɔ̍ yɛ̍, lā vēla᷅ŋ bɛ̍ɛ̍ a̍ pɛ̄ɛ̄kūlā wānāā chēle̍ŋ te̍. Sāwā o̍ sāwā māsāa̍ ō dɔ̄u̍, nda̍ chɛ᷅l mā chūa̍ sāwā ko̍ŋ te̍. Mɛ̄ɛ̍ mī ŋ̄ nūūvi̍a̍a̍ lānɛ̄ī mī ŋ̄ sōli̍ nda̍ wānāā nāa̍ tɛ̄ɛ̄ŋ, ō ve᷅ le̍tu̍u̍ mā ma̍l nda̍ mā wa̍ wānāā nāa̍ tɛ̄ɛ̄ŋ te̍.

⁹Le̍la̍ŋ tē ō bɛ̄ndā pɛ̍, dɔ̍u̍ sa̍wāa̍ māā wāŋnda̍ ha̍ā kpo̍u̍ ā dīu̍ nda̍. I̍ cho̍ nyɛ̄ sɔ̄lāa̍ yɔ̄ŋgū ka̍ni̍ŋ hu̍mbo᷄ŋ wāa̍la̍ŋ o̍ wāa̍la̍ŋ ni᷄ŋ mī ŋ̄ wa̍ ŋ̄ kɛ̄sīāā nāa̍ nda̍ kɛ̄sī nyɛ᷅ sɔ̄lāā lēlɛ̄ŋ ndo̍ wa̍, le̍ bɔ̄nɔ̄la̍ lēlɛ̄ŋ nda̍ŋ.”

¹⁰Mɛ̄ɛ̍ Māsāa̍ Sa̍a̍si̍ī o̍ tu̍e̍ī nyɛ̄ Ha̍māŋ, ya̍a̍mɔ̍ɔ̍ Chu̍ūwa̍ ō kɛ̄ɛ̄si̍a̍a̍ le̍ tōsāa̍ wo̍, mbo̍ chɛ̄la᷅ŋ a̍ nyɛ̄ o̍ di̍mi̍ wo̍. Ndu̍yɛ̍ Ha̍māŋ ko̍ŋ, fi̍nyā ndɔ̍ wa̍ Hāmɛ̄da̍tā ni̍, fūlāa̍ o̍ yu̍ŋgu̍ A̍ka̍kī wo̍ chōo̍. Mi̍ māsāa̍ lō o̍ ko̍ŋ mbo̍ sōli᷄ŋ ke̍lɛ̄i̍ ndūɛ̍i̍ o̍ īsū, i̍ wa̍ ta̍mbūe̍i̍ lēlɛ̄ŋndo̍ ve̍, mbo̍ kē Ha̍māŋ.

¹¹Mi̍ ō dīmūl Ha̍māŋ āā, “I̍ ma̍l nu̍m wānāā kāŋ o̍ bā, nyɛ̄ o̍ nyɛ̄ sɔ̄lāā nda̍ nɔ̄, nu᷄m nɔ̍ ni̍, to̍sa̍ a̍ nda̍ nyɛ̄ o̍ nyɛ̄ ŋ̄ yēēma̍ pɛ̍.”

¹²O̍ pāŋgi̍i̍ tāse̍i̍ ni᷄ŋ o̍ wɔ̄sī kōŋ ni᷄ŋ mālɔ̄ tɔ̍ a̍ lē yāa̍, mi̍ Ha̍māŋ ve̍e̍lū wānāā pōōnyīāā lēlɛ̄ŋnda̍ kpo̍u̍. Mbo̍ dīmūl nda̍ le̍ mā pōōnyi̍a̍a̍ yāu̍la̍ŋ mā yɔ᷄ŋ nda̍ŋ o̍ wāŋ bɛ̄ndūāā lēlɛ̄ŋnda̍ lo̍ kpo̍u̍, nda̍ yɔ̍nūŋ ni̍ māā wānāa̍ wa̍ wāŋnda̍ chīla̍ŋ o̍ fo̍ndāŋndā yɛ̍ yɛ̍la̍ŋ nda̍, a̍ māsāa̍ ŋ̄būŋgāa̍, a̍ wāŋ bɛ̄ndūāā so̍vɛ̄i̍ya̍. Mbo̍ dīmūl nda̍ nyɛ̄ o̍ nyɛ̄ nda̍ nɔ̄ mā dīmu̍l wāŋ bɛ̄ndūāā lēlɛ̄ŋnda̍ ha̍ā o̍ yāu̍la̍ŋ ni᷄ŋ. Ndu̍yɛ̍, mɛ̄ɛ̍ nda̍ wa̍ yāu̍la̍ŋ nda᷅ŋ pōōnyi̍a̍a̍, ma̍ pōōnyīāā la̍ŋ o̍ sɔ̄ɔ̍ŋ ma̍ŋgālāŋ yɛ̍ yɛ̍ŋ wāŋnda̍ ā dīmī wo̍ŋ ni᷄ŋ. Būŋgɛ̄ī nda̍ wā ko̍ po̍o̍nyīāllo̍, ā pōōnyīāā o̍ sūɛ̍i̍ ma̍ŋgālɛ̄ī nda̍ dīmī ve̍ ni᷄ŋ, ndu̍yɛ̍ a̍ mɛ̄ɛ̍ nda̍ pōōnyīāā sūɛ̍i̍ ke̍ŋ yɛ̍. Ndu̍yɛ̍, ma̍ pōōnyīāā yāu̍la̍ŋ nda᷅ŋ ā dīōla̍ Māsā Bɛ̍ndōo̍ Sɛ̍sɛ̄ɛ̄ la̍ŋ, ma̍ hāndū ta̍mbūe̍i̍ ndɔ̍ īkēlāa̍ lēchōo̍.

¹³Mɛ̄ɛ̍ nda̍ chīi̍ yāu̍la̍ŋ ndāŋ pōōnyi̍a̍a̍, ma̍ kē ki̍i̍la̍a̍ ndāa̍ le̍ mā sɛ̄ŋi̍ŋ a̍ la̍ŋ o̍ būŋgāŋ yɛ̍ yɔ̍ŋ ni᷄ŋ o̍ wāŋ bɛ̄ndūāā lēlɛ̄ŋnda̍ lo̍. Ma̍ dīmūl nda̍ o̍ yāu̍la̍ŋ ni᷄ŋ māā o̍ pāŋgi̍i̍ tɔ̍ a̍ mūu̍ŋnde̍ ni᷄ŋ, pāŋgi̍i̍ A̍dā ve̍, mālɔ̄ tɔ̍ a̍ lē yāa̍, māā Chu̍ūnɔ̄ o̍ Chu̍ūnɔ̄ cho̍ o̍ lɛ̄ŋnde̍ŋ ni᷄ŋ, chūāāmbɔ̄ ni̍, bɛ̄ndū ni̍, wānā la̍nɔ̍ ni̍, a̍ chɛ̄lɛ̄kpi̍a̍a̍ le̍ndīa̍a̍ kpo̍u̍, māā ā nɔ̄ mā dīu̍ nda̍ pāa̍le̍ le̍ŋ mā bāsu̍ nda̍ tɛ̍ɛ̍, ō pīlɛ̍ bɛ̍ɛ̍ ā mɛ̍ī le̍. Ndu̍yɛ̍ māā tē ā dīu̍ nda̍ pɛ̍ kpo̍u̍, nyɛ̄ o̍ nyɛ̄ Chu̍ūwāā kāŋ ā nɔ̄, ā chūa̍ nyɛ᷅m mu᷅ŋ kpo̍u̍.

¹⁴Ndu̍yɛ̍ yāu̍la̍ŋ nda᷅ŋ, o̍ ībūŋgā o̍ ībūŋgā ni᷄ŋ, nda̍ a̍a̍ nɔ̍ mī nda̍ a̍a̍ ti̍mbi̍ la̍ŋ wāŋnda̍ kpo̍u̍ o̍ hɔ̄l, mī nda̍ a̍a̍ chɔ̍m nda̍ nyɛ̄ cho̍ lēni᷄ŋ ndo̍, le̍ mā wa̍ ā bɛ̄ɛ̄ndīa̍ŋ le̍ pāa̍le̍ŋ nde᷅ŋ.

¹⁵Mi̍ māsā bɛ̍ndōo̍ dīmūl ki̍i̍la̍a̍ nda̍ ke̍ yāu̍la̍ŋ nda᷅ŋ nda̍, ma̍ sɛ̄ŋi̍ŋ a̍ la̍ŋ chɔ̍ chɔ̍ o̍ būŋgāŋ yɛ̍ yɔ̍ŋ ni᷄ŋ. O̍ ko̍ŋ kɔ̍ɔ̍lī, ma̍ yōndā a̍ sūɛ̍i̍ he̍ī o̍kɔ̄ɔ̄ Su̍sā chi̍e̍e̍ kpo̍u̍, o̍ wa̍ chi̍e̍e̍ le̍bo᷅llo̍ wo̍. O̍ ko̍ŋ, chi̍o̍o̍ kpo̍u̍ mbo̍ hīīlu᷄ŋ. A̍ te̍le̍ŋ ko̍ŋ, Māsāa̍ Sa̍a̍si̍ī ni̍, Ha̍māŋ ni̍, ā wa̍ īchāli̍ ko̍lɔ̄ɔ̄ ndā.