Read Southern Kisi Ɛ̍si̍tā 4 Bible Online

Ɛ̍si̍tā 4 - Southern Kisi bible

Ɛ̍si̍tā 4

¹Mɛ̄ɛ̍ Mɔ̍di̍kāī chi̍i̍ tūēīyɔ̄ɔ̄ a̍ nyɛ̍ yɔ̍nu̍ŋndo̍, mbo̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍ a̍ kɔ̄l tāmbɛ̍i̍ bɛ̍ndōo̍, mbo̍ chūā nyɛ̄lā lābɛ̍kīla̍ŋ mbo̍ wōōnu᷄ŋ, o̍ ko̍ŋ kɔ̍ɔ̍lī, mbo̍ kūāndū pūlta̍ŋ mbo̍ dūāūnu᷄ŋ o̍ lēbōl. Mbo̍ mālnu᷄ŋ a̍ ye̍e̍la̍ŋ chōo̍ cho̍o̍ kpe̍le̍ŋ mbo̍ hēl chi̍e̍e̍, ō wa̍ kɔ̄la̍ŋ a̍ cha᷄ŋ īmɔ̍nɛ̍ bɛ̍ndōo̍ kpe̍e̍kpe̍i̍.

²Mɛ̄ɛ̍ o̍ fu̍u̍lu̍u̍ o̍ dīō sāāsāa̍ le̍ lūɛ̄īyɔ̄ɔ̍ o̍ fo̍ndā lēmāsāa̍, mbo̍ sīm o̍ dīō, kāni̍ fo̍ndōle̍, nda̍ a̍a̍ chɛ᷅l mī wānā o̍ wānā ndu̍ o̍o̍ lu̍ɛ̍ī o̍ fo̍ndā lēmāsāa̍ a̍ nyɛ̄lā lābɛ̍kīla̍ŋ lēkɔ̄ɔ̍ le̍.

³Mɛ̄ɛ̍ yāu̍la̍ŋ nda᷅ŋ lā fūūlu̍u̍ o̍ būŋgāŋ yɛ̍ yɔ̍ŋ ni᷄ŋ, ndūyɛ̍, ma̍ dōōnu᷄ŋ wa᷅ŋnda̍ ko̍na̍ a̍ sāwa̍ māsā bɛ̍ndōo̍ ō dɔ̄ū wo̍ o̍kɔ̄ɔ̄, Chu̍ūwāa̍ wa̍ o̍ būŋga᷄ŋ mu᷅ŋ ni᷄ŋ nda̍ kpo̍u̍, mi̍ kɔ̄lta̍ŋ lā tāmbū nda̍ ma̍ chāŋ. O̍ ko̍ŋ kɔ̍ɔ̍lī, nda̍ kpo̍u̍ ma̍ bīī su᷅mndo̍, mi̍ wānā o̍ wānā ko̍ŋūl chōo̍ cho̍o̍ kpe̍le̍ŋ a̍ kɔ̄l tāmbɛ̍i̍ bɛ̍ndōo̍. Mi̍ ā bɔ̄ɔ̍ bɔ̍ɔ̍ wo̍u̍nu᷄ŋ nyɛ᷅lā lābɛ̍kīla̍ŋ, ma̍ kɔ̍ cha᷅l lɛ̄ŋ o̍ pūlta̍ŋ ni᷄ŋ le̍ kɔ̄ltā ndāla̍ ta̍mbɛ̍i̍la̍ŋ chɔ̄mndo̍.

⁴O̍ ko̍ŋ kɔ̍ɔ̍lī, mi̍ Ɛ̄si̍tā bu̍ɛ̍i̍yāā ndūāā la̍a̍ndūāā, a̍ ā pīāāndūa̍a̍ ā kɔ̍ di̍mūl ndu̍ a̍ nyɛ̄ Mɔ̍di̍kāī o̍ to̍sa̍ wo̍ o̍kɔ̄ɔ̄. Mɛ̄ɛ̍ Ɛ̄si̍tā tu̍e̍ī sūɛ̍i̍ he̍ī, mbō tāmbū kɔ̄l ta̍u̍ ta̍u̍. Mbo̍ lō o̍ ko̍ŋ, mbo̍ yɔ̄ŋ nyɛ̄la̍ŋ le̍ mī Mɔ̍di̍kāī wo̍u̍nu̍ŋ, mbō so̍li̍ nyɛ̄lā lābɛ̍kīla̍ wa̍ ndu̍ lēkɔ̄ɔ̍ la̍ŋ, kɛ̍ mi̍ Mɔ̍di̍kāī kɛ̍ɛ̄.

⁵O̍ ko̍ŋ, mi̍ Ɛ̄si̍tā ve̍e̍lū Ha̍ta̍kī, bu̍ɛ̍i̍yāā ndūa̍a̍ ō pīlɛ̍, wānāā nda̍ a̍a̍ to̍sā wa̍llo̍ o̍ chīɛ̄ī lēmāsāa̍ ni᷄ŋ nda̍ ō pīlɔ̍ɔ̍, bu̍ɛ̍ī Māsā Bɛ̍ndōo̍ Sa̍a̍si̍ī o̍ ke̍ ndu̍ le̍ mbō wa̍ wa̍llo̍ le̍ ndu̍ wo̍. Mi̍ Ɛ̄si̍tā vi̍ām ndu̍ le̍ mbō kɔ̍ nyu̍nā Mɔ̍di̍kāī le̍ nyɛ̄ kpe̍e̍kpe̍i̍ yɔ̍nu̍ŋ ndo̍.

⁶Mi̍ Ha̍ta̍kī ku̍ā nāa̍ Mɔ̍di̍kāī chu̍a̍, o̍ la̍u̍ wa̍ o̍ dīō sāāsāa̍ sōndōo̍ le̍ lūɛ̄īyɔ̄ɔ̍ o̍ fo̍ndā lēmāsāa̍ wo̍.

⁷Mi̍ Mɔ̍di̍kāī lo᷅ o̍ ko̍ŋ mbo̍ chɔ̄m ndu̍ nyɛ̄ o̍ nyɛ̍ nda̍ kɛ̄ɛ̄si̍a̍a̍ le̍ tōsāa̍ a̍ Chu̍ūwa̍. O̍ ko̍ŋ kɔ̍ɔ̍lī, mbo̍ chɔ̄m ndu̍ nyɛ̄ sɔ̄lāā Ha̍māŋ o̍ chu̍a̍ būŋgɛ̄i̍ le̍ yɔ̄ŋgōo̍ le̍ chu̍ūwa̍ dīūwo̍ wo̍.

⁸O̍ ko̍ŋ kɔ̍ɔ̍lī, yāu̍la̍ nda̍ pōōnyi̍a̍a̍ ma̍ dūāū sāwāa̍ māā Chu̍ūwa̍ kpo̍u̍ ā nɔ̄ mā sɔ̄la̍ pīɔ̍mndo̍, ndu̍yɛ̍ ma̍ yōndā a̍ ndi̍ o̍kɔ̄ɔ̄ Su̍sā chi̍e̍e̍ kpo̍u̍ la̍ŋ, mbo̍ kē Ha̍ta̍kī ō pīlɛ̍. Mbo̍ dīmūl ndu̍ māā ō kɔ̍ mbō kɔ̍ chɔ᷅m Ɛ̄si̍tā yāu̍ ko̍ŋ, ndu̍yɛ̍, mbō chɔ᷄m ndu̍ ndi̍ lēni᷄ŋ nyɛ᷅ kɛ̄ndɛ̄ kɛ̍ndɛ̄, o̍ ko̍ŋ, mī Ɛ̄si̍tā ku̍ɛ̄ nāa̍ māsā bɛ̍ndōo̍ chūa̍, mbō kɔ̍ nyɔ̍ɔ̍lū ndu̍ le̍ mbō tūīīnu̍ŋ wa̍nāa̍ ndu̍ Ɛ̄si̍tā wa̍ īnyīɛ̍ɛ̍.

⁹O̍ ko̍ŋ, mi̍ Ha̍ta̍kī mi̍i̍ŋgū mbo̍ kɔ̍ di̍mūl Ɛ̄si̍tā nyɛ̄ Mɔ̍di̍kāī di̍mu̍l ndu̍ wo̍.

¹⁰Mi̍ Ɛ̄si̍tā di̍mūl Ha̍ta̍kī āā, “Kɔ̍ mā kɔ̍ di̍mūl Mɔ̍di̍kāī māā Ɛ̄si̍tā di̍mi̍ āā,

¹¹‘Le̍ mī wānā o̍ wānā lu̍ɛ̍ī nāa̍ māsāa̍ ō chō wa̍, ō wa̍ wa̍nā pɔ̍nɔ̍, ō wa̍ wa̍nā la̍nɔ̍, mɛ̄ɛ̍ mī māsāa̍ vēēlu̍ nu̍m. Kɛ̍ tē ō vēēlu̍ nu̍m te̍ mā kūɛ̄ lo̍ŋ, pīɔ̍mndo̍ ŋ̄ sɔ̄lā ni̍, mɛ̄ɛ̍ dɔ̍ɔ̍ mī māsāa̍ chē nu̍m nyīnā mbō yūlu̍l nu̍m tīnda̍ ndɔ̍ lēmāsāa̍, o̍ cho̍ ō tōōsīāā a̍ ko̍o̍līi̍ye̍ wo̍, le̍ mā lūɛ̄ī. Ko̍ŋ to̍sā ni̍ mā wa̍ yōōmū. Wāŋ bɛ̄ndūa̍a̍ cho̍ ndu̍ wa̍llo̍ o̍ bā bɛ̄ŋgu̍ wa̍ kpo̍u̍, a̍ wānāā ndūa̍a̍ cho̍ būŋgāŋ yɛ̍ yɔ̍ŋ chīla̍ŋ nda̍, ā sīnā a̍ he̍ī o̍kɔ̄ɔ̄. Ndu̍yɛ̍, ō chō ni᷅ŋ pāŋge̍i̍ īpīlɛ̍ māsāa̍ vēēlu̍ wɔ̍ ya̍ o̍ ndu̍ lo̍ chi̍ɛ̍ī ni̍ŋ te̍.’ ”

¹²O̍ ko̍ŋ, ma̍ kɔ̍ di̍mūl Mɔ̍di̍kāī nyɛ̄ Ɛ̄si̍tā di̍mi̍ wo̍.

¹³Mɛ̄ɛ̍ Mɔ̍di̍kāī tu̍e̍ī nyɛ̄ Ɛ̄si̍tā so̍ō wo̍, mbo̍ yɔ̄ŋ Ɛ̄si̍tā dīōmnde̍ŋ, mbo̍ dīmūl ndu̍ āā, “Yi̍ya᷄ŋ nu̍a̍ā māā le̍ mɛ̄ɛ̍ ŋ̄ chō o̍ chīɛ̄ī lēmāsāa̍ ni᷄ŋ yɛ̍, māā tē ā wa̍ Chu̍ūwa̍ nyɛ̄ pālāa̍ tūsīo̍o̍ chōo̍ pɛ̍, māā dɛ̍nɛ̍ pa̍lāā kōŋ ō chō nu̍m bīōndɔ̄ɔ̄ le̍.

¹⁴Tē a̍ to̍sa̍ i̍sɔ̍ɔ̍ o̍ sūɛ̍i̍ he̍ī ni᷄ŋ te̍, mā me̍e̍nu̍ŋ, ā yɔ̍ŋ bɛ̍ɛ̍ āā nāa̍ che᷅le̍ŋ nu̍a̍ā Chu̍ūwa̍ ā sɔ̄lā ma̍lāa̍ mī yōōmūlā ndāla̍ŋ lā chīndā. Kɛ̍ ndu̍yɛ̍, nu̍m ni̍, a̍ wānā o̍ wāna̍ fu̍la̍ o̍ yu̍ŋgu̍ fi̍nyā nūmndo̍ chōo̍, lā chō chūū pa̍ku̍. Kɛ̄lɛ̄ŋgāā, mbō wa̍ dɔ̍ɔ̍ māā le̍ he̍ī ŋ̄ sīmnu᷄ŋ la̍nɔ̍ɔ̍ māsā bɛ̍ndōo̍ a̍ te̍le̍ŋndo̍ ho̍ō ni̍.”

¹⁵Mɛ̄ɛ̍ Ɛ̄si̍tā tu̍e̍ī nyɛ̄ Mɔ̍di̍kāī o̍ di̍mu̍l ndu̍ wo̍, mbo̍ mīŋgūl ndu̍ dīōmnde̍ŋ āā,

¹⁶“Mɛ̄ɛ̍ kɔ̍ mā kɔ̍ chu̍u̍ŋgīāā Chu̍ūwa̍ a̍ cho̍ Su̍sā chi̍e̍e̍ wa̍ kpo̍u̍ na̍a̍ pi᷅lɛ̍, mī lā bīī su᷅mndo̍ le̍ ya̍ le̍ pālɛ̍i̍ ī yāa̍, a̍ nyūmnda̍ŋ mā yāa̍, wānā o̍ wānā di᷅ nyɛ᷅ dīāā le̍, a̍ ko᷅l te̍. Ya̍ bɛ̍ɛ̍ a̍ bu̍ɛ̍i̍yāā nīāā la̍a̍ndūa̍a̍, ŋ̄ chō su᷅mndo̍ ho̍ō bīyɔ̄ɔ̄. Mi̍ chē bɛ̍ɛ̍ mi̍ ī wā sāwāa̍ māā wānā o̍ wānā ku̍ē māsāa̍ lāchī le̍ mɛ̄ɛ̍ mbō vēēlu̍ nu᷄m, kɛ̍ I̍ bɛ̍ɛ̍ndi̍a̍ŋ mī ku̍ɛ̄. Tē ō wa̍ sūɛ̍i̍ yōōmū nī lo̍ lēni᷄ŋ pɛ̍, ō lo̍.”

¹⁷O̍ ko̍ŋ, mī Mɔ̍di̍kāī ku̍ā mbo̍ kɔ̍ to̍sā nyɛ̄ o̍ nyɛ̄ Ɛ̄si̍tā di̍mu̍l ndu̍.