Read Southern Kisi Ɛ̍si̍tā 5 Bible Online

Ɛ̍si̍tā 5 - Southern Kisi bible

Ɛ̍si̍tā 5

¹O̍ pāa̍le̍ ya̍a̍ ndɔ̄le̍ŋ chōo̍, mi̍ Ɛ̄si̍tā wo̍u̍nu᷄ŋ dōma̍ ndɔ̍ lēmāsāa̍, mbo̍ kūā o̍ chīɛ̄ī lēmāsāa̍ mbo̍ kɔ̍ si᷅m o̍ la̍u̍ ba̍lu̍ fo̍ndā lēmāsāa̍ wo̍. Mbo̍ mūlī hɔ̄lla̍ kūmbū māsāa̍ ō wa̍ īchāli̍ wo̍. Ndu̍yɛ̍ Māsāa̍ ō wa̍ īchāli̍ o̍ kpe̍ŋgbe̍i̍ ndɔ̍ lēmāsāa̍ chōo̍, mbo̍ mūlī hɔ̄lla̍ kūmbū dīo̍o̍.

²Mɛ̄ɛ̍ māsāa̍ chē Ɛ̄si̍tā īsīsi̍ o̍ bɛ̍ɛ̄, mbo̍ nāŋ kɔ̄l ta̍u̍ ta̍u̍. O̍ ko̍ŋ, mbo̍ yūlūl Ɛ̄si̍tā tīnda̍ ndɔ̍ lēmāsā īko̍o̍līi̍ wa̍ ndu̍ o̍ bā wo̍. Mi̍ Ɛ̄si̍tā lu̍ɛ̍ī, mbo̍ kɔ̍ pi̍la᷄ŋ ti̍nda̍a̍ bōlle̍ŋ.

³Mi̍ māsāa̍ nyūnā ndu̍ āā, “Vɛ᷅ hūnɔ̄ɔ̍ ho̍ō Ɛ̄si̍tā? Ō yɛ̄ɛ̍nɛ̍ ŋ̄ yēēma̍ yɛ̄? Nyɛ̄ o̍ nyɛ̄ ŋ̄ yēēma̍ pɛ̍ I̍ nɔ̍lā mī ke̍ nu̍m. Ā yɔ᷄ŋ bɛ̍ɛ̍ āā māsāle̍ nīle̍ŋ pīɔ̄ūwo̍ tɛ̄ɛ̄ŋ, kūmbūe̍i̍ pīlɛ̍i̍ ki̍nɛ̍i̍ ŋ̄ yēēma̍ ni̍, I̍ nɔ̍lā mī ke̍ nu̍m.”

⁴Mi̍ Ɛ̄si̍tā di̍mūl ndu̍ āā, “Māsāa̍, I̍ bɛ̍ɛ̍ndi̍a̍a̍ nyɛ̄ dīāā lēbɛ̄ɛ̄ bɛ̄ndōo̍ o̍ chīɛ̄ī nūu̍ le̍ nūm. Le̍la̍ŋ tē ī bɛ̄ndā pɛ̍, I̍ ye̍e̍ma̍ nūm ni̍, Ha̍māŋ ni̍, mī lā kūɛ̄ hāū o̍ chīɛ̄ī nūu̍, mī lā kɔ̍ di̍ō nyɛ̄ dīāā kōŋ.”

⁵O̍ ko̍ŋ, mi̍ māsāa̍ dīmī āā, “Lā kɔ̍ ve̍e̍lūl la̍ Ha̍māŋ mbō hīŋ chɔ̍ chɔ̍. Na̍a̍ ndu̍ ŋ̄ nɔ̄ mī ŋ̄ kūɛ̄ o̍ chīɛ̍i̍ Ɛ̄si̍tā wo̍ mī ŋ̄ kɔ̍ di̍ō nyɛ̄ dīāā o̍ bɛ̍ɛ̍ndi̍a̍a̍ le̍ na̍a̍ wo̍.” O̍ ko̍ŋ, Māsāa̍ Sɛ̍sɛ̄ɛ̄ ni̍, Ha̍māŋ ni̍, ma̍ kūā le̍ nyɛ̄ dīāā Ɛ̄si̍tā o̍ bɛ̍ɛ̍ndi̍a̍a̍ le̍ nda̍ wo̍ dīo̍o̍.

⁶Mɛ̄ɛ̍ nda̍ wo̍ mūɛ̄īya̍ŋ kōlɔ̄ɔ̍, mi̍ māsāa̍ dīmūl Ɛ̄si̍tā āā, “Chɔ̍m ya̍ ni̍ko̍ nyɛ᷅ ŋ̄ yēēma̍ wo̍. Nyɛ̄ o̍ nyɛ̄ ŋ̄ yēēma̍ pɛ̍ mī to̍sa̍l nu̍m, I̍ nɔ̍lā mī to̍sa̍. Ā yɔ᷄ŋ bɛ̍ɛ̍ āā māsāle̍ nīle̍ŋ pīɔ̄ūwo̍ tɛ̄ɛ̄ŋ, kūmbūe̍i̍ ī pīlɛ̍i̍ ki̍nɛ̍i̍, I̍ nɔ̍lā mī ke̍ nu̍m.”

⁷Mi̍ Ɛ̄si̍tā lo᷅ o̍ ko̍ŋ mbo̍ dīmūl ndu̍ āā,

⁸“Fāllo̍, yāndi̍i̍, tē a̍ hi̍ni̍ kɔ̄l a̍ ya̍ pɛ̍ nyɛ᷅ kɛ̄ndɛ̄ kɛ̍ndɛ̄, ndu̍yɛ̍ māā ā tōsāl la̍ ni̍ŋ nyɛ᷅ ya̍ I̍ cho̍ nu̍m dīmūl lo̍, mɛ̄ɛ̍ nūm ni̍, Ha̍māŋ ni̍, I̍ ye̍e̍ma̍ mī lā mīīŋgu̍ vɛ̄lɛ̄ sīɔ̄dīi̍ na̍nu᷄ŋ mī lā hu᷄ŋ di̍ō nyɛ̄ dīāā ya̍ I̍ cho̍ bɛ̄ɛ̄ndīāā le̍ nya̍ wo̍. Tē lā hīŋ sīɔ̄dīi̍ pɛ̍, I̍ hu̍ŋ di̍mūl nu̍m ni̍ko̍ nyɛ᷅ ya̍ I̍ ye̍e̍ma̍ nu̍m mā to̍sa̍l la̍ wo̍.”

⁹Mɛ̄ɛ̍ nda̍ chīi̍ nyɛ̄ dīa̍a̍ dīo̍, mi̍ Ha̍māŋ o̍ ma᷅l mbo̍ wā mīīŋgōo̍ o̍ chīɛ̄ī ndɔ̄ɔ̍, ō wa̍ kɔ̄la̍ŋ a̍ kɔ̄l kɛ̄ndɔ̄ɔ̍ kpe̍e̍kpe̍i̍. Kɛ̍ mɛ̄ɛ̍ Ha̍māŋ che᷅ Mɔ̍di̍kāī īchāli̍ o̍ dīō sāāsāa̍ le̍ lūɛ̄īyɔ̄ɔ̍ o̍ fo̍ndā lēmāsāa̍, ō chi᷄ mī Mɔ̍di̍kāī chɛ̍ŋ i̍si̍si̍ le̍ ndu̍ lēbɛ̄ɛ̄ kē le̍, ndu̍yɛ̍, ō chi᷄ ndu̍ vɛ̄lɛ̄ mbō nɔ̄ hɔ̄lāā īsīōōŋ le̍ ndu̍ le̍, mi̍ Ha̍māŋ ta̍mbū kɔ̄l ta̍u̍ ta̍u̍.

¹⁰Kɛ̍ mbo̍ bīī kɔ̄l ndɔ̄ɔ̍, ō sūu̍ nyɛ᷅ o̍ nyɛ̄ le̍, mbo̍ kūānu᷄ŋ o̍ chīɛ̄ī ndɔ̍ɔ̍. Mɛ̄ɛ̍ o̍ fu̍u̍lu̍u̍, mbo̍ vēēlū chāāŋāā ndūa̍a̍, a̍ Sɛ̍lu̍ɛ̍sī la̍a̍ ndɔ̄.

¹¹Mbo̍ kāndū nda̍ chɔ̄mndo̍ a̍ mɛ̄ɛ̍ kpɛ̍ o̍ su̍l lɛ̍, ndu̍yɛ̍ ā mɛ̄ɛ̍ kpɛ̍ o̍ ve̍lū pūa̍a̍ yɛ̍. Mbo̍ chɔ̄m nda̍ a̍ mɛ̄ɛ̍ māsā bɛ̍ndōo̍ kpo̍u̍ o̍ nɔ̍ bɛ̄ɛ̄le̍ ndɔ̄le̍ŋ yɛ̍, o̍ ko̍ŋ kɔ̍ɔ̍lī, mbo̍ chɔ̄m nda̍ vɛ̄lɛ̄ a̍ mɛ̄ɛ̍ māsāa̍ hīvi̍ ndu̍ lāchī o̍ wa̍llo̍ ni᷄ŋ, mbo̍ kɛ̄sī ndu̍ wānāa̍ nda̍ cho̍ wa̍llo̍ wa̍ kpo̍u̍ bo᷅lle̍ŋ yɛ̍.

¹²Mbo̍ hīāū lāchī a̍ chɔ̄mndo̍ āā, “Ō fūla̍ o̍ ko̍ŋ kɔ̍ɔ̍lī, Wɛ̄ɛ̄ŋndo̍ Ɛ̄si̍tā o̍ cho̍ la̍nɔ̍ɔ̍ māsā bɛ̍ndōo̍ wo̍, nyɛ̄ dīāā lēbɛ̄ɛ̄ bɛ̄ndū o̍ bɛ̍ɛ̍ndi̍a̍a̍ le̍ māsāa̍ wo̍, na̍a̍ māsāa̍ ŋ̍ kɔ̍ di̍ō nyɛ̄ dīāā kōŋ ni̍. Na̍a̍ ŋ̍ cho̍ māsāa̍ wa̍llo̍ o̍ bā bɛ̄ŋgu̍ wa̍ ki̍nɛ̍i̍, mɛ̄ɛ̍ ya̍ pīlɛ̍ kpe̍ mbo̍ vēēlū le̍ nyɛ̄ dīa̍a̍ ho̍ō. Ndu̍yɛ̍ sīɔ̄dīi̍ bɛ̍ɛ̍, ō dīmi̍ māā ya̍ I̍ cho̍ ō vēēlāā o̍ chīɛ̄ī ndɔ̄ɔ̍ na̍a̍ māsāa̍ lātūlū.

¹³Kɛ̍ ndu̍yɛ̍, a̍ mu̍ŋ kpo̍u̍, ha̍a̍a̍ tē I̍ cho̍ Mɔ̍di̍kāī Chu̍ūnɔ̄ɔ̍ ho̍ō chɔ̄ɔ̍ īchāli̍ o̍ dīō kpākīo̍o̍ le̍ lūɛ̄īyɔ̄ɔ̍ o̍ fo̍ndā lēmāsāa̍, kɔ̄l hīnīāā o̍ kɔ̄l hīnīāā I̍ nɔ̍ le̍.”

¹⁴O̍ ko̍ŋ, mi̍ la̍a̍ ndɔ̄ nda̍ chāāŋāā ndūa̍a̍ ā dīmūl ndu̍ āā, “Nyɛ̄ ŋ̄ tōsā wo̍ cho̍ ho̍ō ni̍, ta̍ŋgu̍l bāndi̍i̍ nda̍ dīī wa̍nāā wɔ̄ɔ̍ŋnda̍ lēchōo̍ ve̍, mī ī wa̍ hēlɔ̄ɔ̍ le̍ nɛ̄īyo̍ be̍le̍-ŋɔ̍mmɛ̍ū a̍ lē ŋūɛ̍ɛ̍nu̍. O̍ ko̍ŋ, tē pāa̍le̍ŋ lē sɛ̄ sīɔ̄dīi̍ pɛ̍, a̍ di̍mu̍l māsāa̍ ā lāndu̍ Mɔ̍di̍kāī o̍ bāndi̍i̍ kēŋ chōo̍. O̍ ko̍ŋ, ā nɔ̍la̍ ni᷅ŋ mā kūɛ̄ nāa̍ nda̍ vēēlu̍ nya̍ wa̍ a̍ kɔ̄l kɛ̄ndɛ̄.” Mɛ̄ɛ̍ Ha̍māŋ o̍ tu̍e̍ī kɛ̄ɛ̄si̍a̍a̍ ho̍ō, mbo̍ chā māā kɛ̄ɛ̄sīāā kɛ̄ndɔ̄ɔ̍ pīla̍ nda̍ kɛ̄ɛ̄si̍a̍a̍ ni̍. O̍ ko̍ŋ, mbo̍ tāŋgūl bāndi̍i̍ vi̍lɛ̄ī bɛ̄ndūe̍i̍ le̍ Mɔ̍di̍kāī lāndɔ̄ɔ̍.