Read Southern Kisi Ɛ̍si̍tā 6 Bible Online

Ɛ̍si̍tā 6 - Southern Kisi bible

Ɛ̍si̍tā 6

¹Mɛ̄ɛ̍ Māsāa̍ Sa̍a̍si̍ī o̍ chi̍i̍ nyɛ̄ dīāā ho̍ō di̍o̍, mbo̍ mīīŋgū o̍ chīɛ̄ī ndɔ̄ɔ̍. Īchɔ̄l kōŋ pi̍i̍ ō nɔ̄la̍ mbō lɔ᷅l te̍. O̍ ko̍ŋ, mbo̍ vīām wānā le̍ mā kɔ̍ hu᷅ŋ a̍ yāu̍la̍ lēlɛ̄ŋnda̍ŋ, lā sɔ̄ɔ̍ŋ lēlɛ̄ŋndo̍ŋ ŋ̄ chō ŋ̄ pōōnyīāā lēni᷄ŋ nda̍ŋ.

²Ndu̍yɛ̍, ma̍ hūŋ a̍ yāu̍la̍ŋ nda᷅ŋ ma̍ hu᷄ŋ ka̍ndū tōfāa̍ lēchōo̍. Ma̍ sāālu᷄ŋ māā ō wa̍ a̍ te̍le̍ŋ pu̍m, mi̍ wānāa̍ to̍sā wa̍llo̍ o̍ chīɛ̄ī lēmāsāa̍ ni᷄ŋ nda̍ ā ŋīɔ̍ɔ̍ŋ, Bīkīta̍nā, nda̍ Tɛ̍lu̍ɛ̍sī, ā nda̍ a̍a̍ ma̍ndā di̍ō kpākīo̍o̍ le̍ lūɛ̄īyɔ̄ɔ̍ o̍ fo̍ndā lēmāsāa̍ wa̍ ā kɛ̄ɛ̄sīāā lē māsāa̍ dīyɔ̄ɔ̍. Kɛ̍ mi̍ Mɔ̍di̍kāī chi̍i̍kūū sūɛ̍i̍ he̍ī mbo̍ hu᷄ŋ di̍mūl māsāa̍.

³Mi̍ māsāa̍ lō o̍ ko̍ŋ mbo̍ nyūnā pūa̍a̍ ndūa̍a̍ āā, “Ō yɛ̄ɛ̍nɛ̍ na̍a̍ ŋ̄ ke᷄ yɛ̄ Mɔ̍di̍kāī a̍ te̍le̍ŋ ko̍ŋ o̍ sūɛ̍i̍ ke̍ŋ ni᷄ŋ le̍ ndu̍ bɛ̄ɛ̄le̍ŋ kīo̍o̍?” Mi̍ pūa̍a̍ ndūa̍a̍ dīmūl ndu̍ āā, “Ŋ̄ ke᷄ ndu̍ nyɛ̄ o̍ nyɛ̄ o̍ sūɛ̍i̍ ke̍ŋ ni᷄ŋ tē.”

⁴Mi̍ māsāa̍ nyūnā nda̍ āā, “Ō nɛ̄ɛ̍nɛ̍ cho̍ yɛ̄ o̍ la̍ū ni᷄ŋ ndo̍ŋ?” A̍ te̍le̍ŋ ko̍ŋ Ha̍māŋ lu̍ɛ̍ī ki̍nɛ̍i̍, o̍ la̍u̍ wa̍ ko̍ŋ o̍ dīō wo̍ ni᷄ŋ. Ndu̍ o̍o̍ ku̍ɛ̄ le̍ māsāa̍ dīmūllo̍ le̍ Mɔ̍di̍kāī lāndɔ̄ɔ̍ o̍ bāndi̍i̍ ndu̍ o̍o̍ chi̍i̍ ni᷅ŋ tāŋgūl le̍ chōo̍.

⁵Mi̍ pūa̍a̍ bu̍ɛ̍īya̍ dīmūl māsāa̍ āā, “Ha̍māŋ cho̍ īsīsi̍ o̍ la̍u̍ cho̍ o̍ dīō wo̍ ni᷄ŋ.” Mi̍ māsāa̍ dīmūl nda̍ āā, “Lā vēēlu̍l lɔ̍ ya̍ ndu̍.”

⁶O̍ ko̍ŋ, ma̍ vēēlū Ha̍māŋ, mbo̍ lūɛ̄ī. Mɛ̄ɛ̍ o̍ lu̍ɛ̍ī, mi̍ māsāa̍ lo̍ ō ko̍ŋ mbo̍ dīmūl ndu̍ āā, “I̍ ye̍e̍ma̍ mī ke̍ wāŋndo̍ bɛ̄ɛ̄le̍ŋ, kɛ̍ ō yɛ̄ɛ̍nɛ̍ kpe̍e̍kpe̍i̍ ya̍ I̍ to̍sa̍l lɛ̍ wa̍nā ko̍ŋ?” Mɛ̄ɛ̍ Ha̍māŋ o̍ tu̍e̍ī sūɛ̍i̍ he̍ī, mbo̍ dīmī o̍ kɔ̄l ni᷄ŋ āā, “Ō nɛ̄ɛ̍nɛ̍ che᷅le̍ŋ māsāa̍ yēēma̍ yɛ̄ bɛ̄ɛ̄le̍ŋ kē o̍ ya̍ kɔ̍ɔ̍lī?”

⁷Mi̍ Ha̍māŋ di̍mūl māsāa̍ āā, “Fāllo̍, tē a̍ ye̍e̍ma̍ le̍ wānā kōŋ bɛ̄ɛ̄le̍ŋ kīo̍o̍ pɛ̍, nyɛ̄ ŋ̄ tōsā wo̍ cho̍ ho̍ō ni̍,

⁸di̍mu̍l bu̍ɛ̍i̍yāā nūmnda̍ ma̍ kɔ̍ hu᷅ŋ a̍ dōmā nu̍m lēmāsā ŋ̄ wōōnūŋ ndo̍, o̍ ko̍ŋ kɔ̍ɔ̍lī, mā di̍mu̍l nda̍ mā kɔ̍ hu᷅ŋ a̍ so᷅, ŋ̄ kūā cho̍o̍ wo̍, mā wōu̍ so᷅ kōŋ mɔ̍si̍l nu̍m lēmāsāa̍ mā hīŋ a̍ ndu̍.

⁹Tē ā hīŋ pɛ̍ a̍ dōmāa̍ ho̍ō, a̍ So᷅ kōŋ, a̍ di̍mu̍l wānāā nūm a̍a̍ bɛ̄ndūa̍a̍ ō pīlɛ̍ ō wōu̍ wānā ko̍ŋ dōmā ko̍ŋ, o̍ ko̍ŋ kɔ̍ɔ̍lī, ō hēēlu̍ ndu̍ o̍ so̍o̍ chōo̍. Tē ō hēēlu̍ ndu̍ pɛ̍, ō bālu̍ a̍ ndu̍ o̍ bɛ̍ɛ̄lā bɛ̄ndūla̍ŋ o̍ chi̍o̍o̍ ho̍ō ni᷄ŋ kpo̍u̍, mbō kūā a̍ yōndāa̍ āā, ‘Wāna̍ māsāa̍ yēēma̍ le̍ bɛ̄ɛ̄le̍ŋ kīo̍o̍ wo̍, nyɛ̄ o̍ to̍sāl ndu̍ wo̍ cho̍ ho̍ō ni̍.’ ”

¹⁰O̍ ko̍ŋ, mi̍ māsāa̍ dīmūl Ha̍māŋ āā, “Mɛ̄ɛ̍ kɔ̍ chɔ̍ chɔ̍ mā kɔ̍ hu᷅ŋ a̍ dōma̍ ni̍ lēmāsāa̍, o̍ ko̍ŋ kɔ̍ɔ̍lī mā hīŋ vɛ̄lɛ̄ a̍ so̍o̍ mā hu᷄ŋ to̍sā a̍ Mɔ̍di̍kāī Chu̍ūnɔ̄ mɛ̄ɛ̍ ŋ̄ kɛ̄ɛ̄si̍a̍a̍ nu̍a̍ā yɛ̍. Nyɛ̄ o̍ nyɛ̄ ŋ̄ kɛ̄ɛ̄si̍a̍a̍, le̍nde̍ ŋ̄ tōsa̍ a̍ ndu̍ ni̍. Ā chō ndu̍ kōmāl īchāli̍ o̍ dīō kpākīo̍o̍ le̍ lūɛ̄īyɔ̄ɔ̍ o̍ fo̍ndā ni̍ lēmāsāa̍.”

¹¹O̍ ko̍ŋ, mi̍ Ha̍māŋ ku̍ā mbo̍ kɔ̍ hu᷅ŋ a̍ dōma̍ lēmāsāa̍ mbo̍ wōū Mɔ̍di̍kāī. Mbo̍ hūŋ vɛ̄lɛ̄ a̍ so̍o̍ mbo̍ hēēlū ndu̍ lēchōo̍, mbo̍ bālū a̍ ndu̍ o̍ bɛ̍ɛ̄lā bɛ̄ndūla̍ŋ o̍ chi̍o̍o̍ ni᷄ŋ kpo̍u̍, mbō kūā a̍ yōndāa̍ āā, “Wāna̍ māsāa̍ yēēma̍ le̍ bɛ̄ɛ̄le̍ŋ kīo̍o̍ wo̍, nyɛ̄ o̍ to̍sāl ndu̍ wo̍ cho̍ ho̍ō ni̍.”

¹²O̍ ko̍ŋ, mi̍ Mɔ̍di̍kāī mi̍i̍ŋgū nāa̍ o̍ wa̍ o̍ dīō sāāsāa̍ le̍ lūɛ̄īyɔ̄ɔ̍ o̍ fo̍ndā lēmāsāa̍ wa̍. Ndu̍yɛ̍ Ha̍māŋ bɛ̍ɛ̍, mbo̍ kēlēŋā mīīŋgū chɔ̍ chɔ̍ o̍ chīɛ̄ī ndɔ̄ɔ̍, a̍ bōlle̍ŋ lē tūndāā, kāni̍ fo̍ndōle̍, a̍ si̍ɔ̍mbu̍la̍ bɛ̍ndūla̍ bi̍ī ndu̍ la̍ŋ.

¹³Mɛ̄ɛ̍ o̍ fu̍u̍lu̍u̍, mbo̍ kɔ̍ dōōnu᷄ŋ Sɛ̍lu̍ɛ̍sī la̍a̍ ndɔ̍ ko̍na̍ nda̍ chāāŋāā ndūa̍a̍ a̍ sūɛ̍i̍ he̍ī o̍kɔ̄ɔ̄, mbo̍ chɔ̄m nda̍ nyɛ̄ o̍ nyɛ̍ yɔ̍nu̍ŋ. Ndu̍yɛ̍, Ha̍māŋ chāāŋāā ndūa̍a̍ ha̍ā wānāā kɔ̄l kālu̍a̍a̍ pīla̍ nda̍ wa̍ ni̍. Nda̍ ni̍, la̍a̍ ndɔ̄ Sɛ̍lu̍ɛ̍sī ni̍, ma̍ dīmūl ndu̍ āā, “Kpāāyāa̍ Mɔ̍di̍kāī o̍ ka̍ndu̍ nu̍m pōōndāa̍ o̍ bā nu̍a̍ā ni̍. Ha̍a̍a̍ mi̍ Mɔ̍di̍kāī o̍ wa᷅ Chu̍ūnɔ̄ɔ̍, a̍ cho̍ ndu̍ nɔ̄la̍ le̍, tē a̍ fe̍ŋa̍ŋ ndu̍ kɔ̄ɔ̄lī le̍, ā chō dɛ̍nɛ̍ pa̍lāa̍ sɔ̄lā.”

¹⁴Ha̍māŋ nda̍ chāāŋāā ndūa̍a̍ ha̍ā ā chō sūɛ̍i̍ ke̍ŋ, ki̍nɛ̍i̍, mi̍ bu̍ɛ̍i̍yāā māsāa̍ vēm le̍ mā hu᷄ŋ ve̍e̍lū Ha̍māŋ chɔ̍ chɔ̍ wa̍ ā fūlā, lē kɔ̄la̍ŋ le̍ nyɛ̄ dīāā Ɛ̄si̍tā o̍ bɛ̍ɛ̍ndi̍a̍a̍ le̍ nda̍ wo̍.