Read Southern Kisi Ɛ̍si̍tā 8 Bible Online

Ɛ̍si̍tā 8 - Southern Kisi bible

Ɛ̍si̍tā 8

¹Mi̍ Māsāa̍ Sɛ̍sɛ̄ɛ̄ to̍sā ma̍ dīī Ha̍māŋ, ō ndu̍ o̍o̍ tu̍l Chu̍ūwa̍ yɛ̄le̍ŋ tūl bɛ̄ndōo̍ wo̍. Ndu̍yɛ̍, nyɛ̄ o̍ nyɛ̄ Ha̍māŋ ndu̍ o̍o̍ nɔ̍, mi̍ Māsāa̍ Sɛ̍sɛ̄ɛ̄ o̍ ke᷅ Ɛ̄si̍tā mu̍ŋ kpo̍u̍ pāa̍le̍ le̍ le̍ŋ. O̍ ko̍ŋ kɔ̍ɔ̍lī, mi̍ Ɛ̄si̍tā o̍ chɔ᷅m māsāa̍ māā wānāyɛ̍i̍ ndūɛ̍i̍ Mɔ̍di̍kāī o̍ cho̍ ni̍. Ndu̍yɛ̍, chɔ̍ŋ ni᷅ŋ a̍ pāa̍le̍ le̍ŋ, mi̍ Mɔ̍di̍kāī o̍ sɔ̍lā di̍o̍o̍ le̍ fūlāa̍ māsāa̍ o̍ hɔ̄l.

²Mi̍ Māsāa̍ Sa̍a̍si̍ī o̍ lo᷅ o̍ ko̍ŋ, mbo̍ sōli᷄ŋ ke̍lɛ̄i̍ ta̍mbūe̍i̍ wa̍ ndu̍ o̍ īsū ve̍, ī o̍ pu̍u̍ Ha̍māŋ o̍ bā ve̍, mbo̍ kē Mɔ̍di̍kāī. Ndu̍yɛ̍ nyɛ̄ o̍ nyɛ̄ Ha̍māŋ ndu̍ o̍o̍ nɔ̍ mi̍ Ɛ̄si̍tā ha̍ndū Mɔ̍di̍kāī mu̍ŋ bōlle̍ŋ kpo̍u̍.

³O̍ ko̍ŋ kɔ̍ɔ̍lī, mi̍ Ɛ̄si̍tā o̍ su̍a̍ā vɛ̄lɛ̄ nāa̍ māsāa̍ chūā, mbo̍ wa᷅ ndu̍ dēlī dēlīo̍o̍ o̍ lābɛ̄ŋgu̍ ni᷄ŋ a̍ cha᷄ŋndo̍, le̍ nyɛ̄ Ha̍māŋ, o̍ fu̍la̍ o̍ pūlāle̍ Āka̍ka̍i̍tīi̍ya̍ chōo̍ wo̍, ō kɛ̄ɛ̄si̍a̍a̍ le̍ tōsāa̍ a̍ Chu̍ūwa̍ wo̍. Mbo̍ wā nyɔ̄ɔ̄lōo̍ le̍ mī māsāa̍ ō tɛ̄ɛ̄mbu̍u̍ kɛ̄sīāā kōŋ.

⁴O̍ ko̍ŋ, mi̍ māsāa̍ yūlūl Ɛ̄si̍tā tīnda̍ ndɔ̍ īko̍o̍līi̍yo̍, mī Ɛ̄si̍tā cha̍ŋ mbō dīmī āā,

⁵“Fāllo̍, tē a̍ hi̍ni̍ kɔ̄l a̍ ya̍ pɛ̍ nyɛ᷅ kɛ̄ndɛ̄ kɛ̍ndɛ̄, ndu̍yɛ̍ ma̍ hɛ̄na᷄ŋ a̍ sūɛ̍i̍ nīi̍, mā hīnī kɔ̄l ā nɔ̄lā mā to̍sa̍l la̍ nyɛ̄ ya̍ I̍ cho̍ nu̍m dīmūllo̍, mɛ̄ɛ̍ sāwa̍ Ha̍māŋ po̍ Hāmɛ̄da̍tā wo̍, o̍ fu̍la̍ o̍ pūlāle̍ A̍ka̍ka̍i̍tīi̍ya̍ chōo̍ wo̍ ō hi̍vi̍ māā Chu̍ūnɔ̄ o̍ Chu̍ūnɔ̄ cho̍ o̍ lɛ̄ŋnde̍ŋ ni᷄ŋ māā ā dīu̍ nda̍ kpo̍u̍, ndu̍yɛ̍ mbo̍ pōōnyīāā yāu̍la̍ŋ a̍ ndi̍ o̍kɔ̄ɔ̄ mbo̍ yɔ̄ŋ nda̍ŋ kpo̍u̍ wo̍, yāndi̍i̍ tɛ̍ɛ̍mbu̍u̍ sa̍wā ko̍ŋ.

⁶Vɛ̄ɛ̍nɛ̍ ya̍ I̍ nɔ̍lā yɛ̍ mī bi̍u̍nu̍ŋ, tē I̍ che᷅ wānāā nīa̍a̍ ō kpūndɔ̍ɔ̍ ni᷄ŋ pɛ̍. I̍ bi̍ī kɔ᷅llo̍ mī to̍fa̍ mā wa̍ wānāā nīa̍a̍ dīūwo̍?”

⁷Mi̍ Māsā Bɛ̄ndōo̍ Sɛ̍sɛ̄ɛ̄ dīmūl Ɛ̄si̍tā nda̍ Mɔ̍di̍kāī Chu̍ūnɔ̄, āā, “I̍ to̍sa̍ ma̍ lāndū Ha̍māŋ, kāni̍ fo̍ndōle̍, le̍ mɛ̄ɛ̍ o̍ tu̍l Chu̍ūwa̍ mbo̍ kɛ̄ɛ̄sīāā le̍ nda̍ dīūwo̍ kpo̍u̍ yɛ̍. Ndu̍yɛ̍ nyɛ̄ o̍ nyɛ̄ Ha̍māŋ ndu̍ o̍o̍ nɔ̍ mī ke᷅ nūm Ɛ̄si̍tā kpo̍u̍.

⁸Kɛ̍ ndu̍yɛ̍, sāwāa̍ chūū ni᷅ŋ hīōūwɔ̄ɔ̄ o̍ dīōlā nīla̍ŋ ni᷄ŋ a̍ ndi̍ o̍kɔ̄ɔ̄, a̍ ta̍mbūe̍i̍ ni̍ lēlɛ̄ŋndo̍ lo̍ŋ kpo̍u̍. Nyɛ̄ o̍ nyɛ̄ tɛ̍ɛ̍mbūū lɛ̍ sāwā ko̍ŋ te̍. Kɛ̍ ndu̍yɛ̍, lā pōōnyi̍a̍l Chu̍ūwa̍ kpo̍u̍, nyɛ̄ o̍ nyɛ̄ nya̍ yēēma̍ pɛ̍ le̍ nda̍ dīmūl a̍ ndi̍ o̍kɔ̄ɔ̄, lā dīmu̍l nda̍. Ndu̍yɛ̍ tē lā wa̍ nda̍ pōōnyīāllo̍ pɛ̍, lā pōōnyi̍a̍l nda̍ o̍ dīōlā nīla̍ŋ ni᷄ŋ mī lā hāndu̍ ta̍mbūe̍i̍ nūu̍ lēbɛ̄ŋgu̍. Ko̍ŋ to̍sā ni̍ mī wānā o̍ wānā si̍na̍ māā ya̍ ma̍sā bɛ̍ndōo̍ nyɛ̄ ya̍ I̍ di̍mi̍ wo̍ cho̍ ho̍ō ni̍, māā wānā o̍ wānā fe̍ŋā ndu̍ lēchōo̍ le̍.”

⁹O̍ ko̍ŋ, mi̍ Mɔ̍di̍kāī ve̍e̍lū wānāa̍ po̍o̍nyīāā le̍ Māsā bɛ̍ndōo̍ wa̍. Pāŋgi̍i̍ Si̍vāŋ nde̍, o̍ pāŋgu̍ŋ Chu̍ūwa̍ tɛ̄ɛ̄ŋ, pāŋgi̍i̍ ya̍a̍ ndɔ̄ ve̍, mālɔ̄ bi̍dīi̍ŋ a̍ lē yāa̍, pāa̍le̍ le̍ŋ Mɔ̍di̍kāī o̍ ve̍e̍lū wānāa̍ po̍o̍nyīa̍a̍ ha̍ā ni̍. Mɛ̄ɛ̍ o̍ ve̍e̍lu̍ nda̍ mbo̍ dīmūl nda̍ le̍ mā pōōnyi̍a̍a̍ yāu̍la̍ŋ le̍ mā sɛ̄ŋi̍ la̍ŋ o̍ būŋgāŋ yɛ̍ yi̍ɔ̍ɔ̍ŋ ni᷄ŋ kpo̍u̍, mu̍ŋ yɔ̍nūŋ ni̍ māā būŋgāŋ kɛ̄mɛ̄ a̍ bi̍di̍i̍ŋ a̍ ŋ̄ ŋɔ᷄mmɛ̍ū (127) Māsāa̍ Sa̍a̍sīī o̍ wa̍ māsāa̍ chōo̍ wo̍ŋ, chɔ̍ŋ I̍ŋndīāā mbo̍ kūā a̍ Īto̍o̍pīāā. Mbo̍ chɔ̄m nda̍ nyɛ̄ o̍ nyɛ̄ nda̍ nɔ̄ mā di̍mu̍l wāŋnda̍ ha̍ā o̍ yāu̍la̍ŋ ni᷄ŋ. Wānāā o̍ po̍o̍nyi̍a̍l yāu̍la̍ŋ nda̍, nda̍ cho̍ ha̍ā ni̍, Chu̍ūwa̍ ni̍, a̍ māsāa̍ wa̍ būŋgāŋ yɛ̍ yi̍ɔ̍ɔ̍ŋ bōlle̍ wa̍, a̍ māsāa̍ pɔ̍mbūa̍a̍ wa̍ nda̍ o̍ bā bɛ̄ŋgu̍ wa̍, a̍ wānāa̍ wa̍ pūa̍a̍ chɔ̄ūwa̍ bōlle̍ kpo̍u̍ wa̍. Būŋgɛ̄ī o̍ wa᷅ ko̍ po̍o̍nyīāllo̍, ō pōōnyīāl wa̍nāā yɛ̍ yi̍a̍a̍ cho̍ lo̍ŋ nda̍ o̍ sɔ̄ɔ̍ŋ ndāāŋ ma̍ŋgālāŋ yɛ̍ yi̍ɔ̍ɔ̍ŋ(...)

¹⁰Ndu̍yɛ̍ mɛ̄ɛ̍ o̍ wa̍ yāu̍la̍ŋ nda᷅ŋ pōōnyīa̍a̍, mbo̍ pōōnyīāā la̍ŋ a̍ dīōlā māsā bɛ̍ndōo̍, ō nda̍ pōōnyīāā ko̍, ā hāndū ta̍mbūe̍i̍ māsāa̍ lēbɛ̄ŋgu̍. Mɛ̄ɛ̍ nda̍ chīi̍ yāu̍la̍ŋ nda᷅ŋ pōōnyīāā kpo̍u̍, ma̍ kē ki̍i̍la̍a̍ le̍ mā sɛ̄ŋi̍ŋ a̍ la̍ŋ o̍ su̍a̍a̍ nya̍a̍nūŋ nya̍a̍nɔ᷄ŋ bɛ̍ndōo̍ wa̍ chōo̍, su̍a̍a̍ wa̍ ā kɛ̄sīāā te̍ŋge̍le̍ŋ le̍ kpe̍ku̍ māsāa̍ wa̍.

¹¹O̍ he̍ī ni᷄ŋ, mi̍ māsāa̍ bɛ̍ndōo̍ kē Chu̍ūwa̍ di̍o̍o̍ o̍ chi̍e̍e̍ o̍ chi̍e̍e̍, māā ā nɔ̄ di̍ mā chūūŋgi̍āŋ mā sɔ̄ŋga̍ le̍ yōōmūlā ndāla̍ŋ chīɔ̄ūwo̍. Mbo̍ kē nda̍ di̍o̍o̍ māā tē ku̍ndā o̍ ku̍ndā chɔ̄ū ɔ̄ɔ̄, ībūŋgā o̍ ībūŋgā ī hu᷄ŋ sa̍ā nda̍ a̍ sɔ̍ŋgɔ̄ɔ̍ pɛ̍, ō wa̍ nda̍ pi̍la̍, ō wa̍ chu̍a̍u̍wāā ndāa̍, ō wa̍ wa᷅ŋ lāāndūāā ndāa̍, māā ā nɔ̄ di̍ mā sīmu̍l wānāa̍ kāŋ mā sɔ̄ŋga̍ a̍ nda̍ le̍ yōōmūlā ndāla̍ŋ chīīndīa̍a̍. Mbo̍ dīmūl nda̍ māā tē ā nɔ̄lā pɛ̍ mā dīu̍ wānāā kāŋ mā tɛ̄ɛ̄mbu̍u̍ nda̍, māā ā pūŋga̍ nyɛ̄m ndāa̍ŋ.

¹²O̍ ko̍ŋ, mi̍ Māsāa̍ Sa̍a̍si̍ī o̍ ke᷅ Chu̍ūwāa̍ wa̍ o̍ lɛ̄ŋndē Pa̍a̍sīāāle̍ŋ ni᷄ŋ nda̍ kpo̍u̍ di̍o̍o̍, māā ā nɔ̄ di̍ mā si᷄m mā sɔ̄ŋga̍ o̍ pāa̍le̍ nda̍ kɛ̄ɛ̄si̍a̍a̍ le̍ nda̍ dīūwo̍ le̍ŋ chōo̍, mā chīīndi̍a̍a̍ yōōmūlā ndāla̍ŋ. Ndu̍yɛ̍, pāŋgi̍i̍ A̍dā ve̍, pāŋgi̍i̍ tɔ̍ a̍ ī mūu̍ŋnde̍ o̍ pāŋgu̍ŋ māChu̍ūwo̍ tɛ̄ɛ̄ŋ mālā tɔ̍ a̍ lē yāa̍, lēcho̍o̍ kpe̍e̍kpe̍i̍ nda̍ a̍a̍ mɛ̍i̍ le̍ Chu̍ūwa̍ dīūwo̍ kpo̍u̍ o̍ lɛ̄ŋndē Pa̍a̍sīāāle̍ŋ ni᷄ŋ ni̍.

¹³Ndu̍yɛ̍ mi̍ māsāa̍ dīmī māā o̍ ībūŋgā o̍ ībūŋgā ni᷄ŋ, ā nɔ̄ mā chɔ᷄m wāŋnda̍ nyɛ̍ cho̍ o̍ yāu̍la̍ŋ nda᷅ŋ ni᷄ŋ ndo̍, ndu̍yɛ̍, ma̍ yōnda̍ ndi̍ māā sāwa̍ māsāa̍ dɔ̄ūwo̍ cho̍ ko̍ŋ ni̍ le̍ mī wānā o̍ wānā tu̍e̍ī. O̍ ko̍ŋ, Chu̍ūwa̍ bɛ̍ɛ̍ mā wa̍ ā bɛ̄ɛ̄ndīa̍ŋ le̍ pāa̍le̍ŋ nde᷅ŋ, le̍ yōōmūlā ndāla̍ŋ chīīndīa̍a̍.

¹⁴Mi̍ māsāa̍ dīmūl ki̍i̍la̍a̍ ndūa̍a̍, ma̍ chūā su̍a̍ā ndūa̍a̍ nya̍a̍nūŋ nya̍a̍nɔ᷄ŋ bɛ̍ndōo̍ wa̍, a̍ wa̍ le̍ kpe̍ku̍ māsāa̍ su̍e̍e̍ wa̍, ma̍ sɛ̄ŋi᷄ŋ a̍ yāu̍la̍ŋ nda᷅ŋ, a̍ kīlta̍ bɛ̄ndūla̍ŋ. Ndu̍yɛ̍, ma̍ yōndā vɛ̄lɛ̄ Su̍sā chi̍e̍e̍ kpo̍u̍ a̍ sūɛ̍i̍ he̍ī o̍kɔ̄ɔ̄, o̍ wa̍ chi̍e̍e̍ le̍bo᷅llo̍ wo̍.

¹⁵O̍ ko̍ŋ, mi̍ Mɔ̍di̍kāī fūlā. Ō wa̍ ō dōvīa̍ŋ o̍ nyɛ̄lā lēmāsāla̍ŋ ni᷄ŋ, dōma̍ lēmāsāa̍ ō wa̍ ndu̍ lēkɔ̄ɔ̍ a̍ būŋgāŋ hūmbo᷄ŋ, a̍ ŋ̄ bɔ̄ɔ̄la̍ŋ, a̍ dōmā si̍a̍ŋā ba̍ā kālā bɛ̄ndōo̍ lēchōo̍. Ndu̍yɛ̍, mɔ̍si̍l īko̍o̍līi̍yo̍ ō wa̍ ndu̍ o̍ lēbōl. Mɛ̄ɛ̍ wāŋnda̍ Su̍sā chi̍e̍e̍ a̍ che᷅ ndu̍, ma̍ dūāūnu᷄ŋ nya̍a̍le̍, mi̍ bɔ̄ɔ̄lūū bɛ̄ndōo̍ tīū chi̍o̍o̍ kpo̍u̍, wāŋnda̍ wa̍ hēēlōo̍ a̍ tūūsōo̍ o̍ bɛ̍ɛ̄la̍ŋ Su̍sā chi̍e̍e̍ kpo̍u̍ a̍ kɔ̄l kɛ̄ndɛ̄ bɛ̄ndōo̍.

¹⁶Chu̍ūwa̍ kpo̍u̍ ma̍ dūāūnu᷄ŋ nya̍a̍le̍, ma̍ tōsā kɔ̄l kɛ̄ndɛ̄ bɛ̄ndōo̍, kāni̍ fo̍ndōle̍, ma̍ yīya᷄ŋ māā ā sɔ̄la̍ kpāāyāa̍ ya̍a̍mɔ̍ɔ̍wa̍a̍ ndāa̍ chōo̍.

¹⁷Ndu̍yɛ̍, bā o̍ bā yāu̍la̍ŋ nda᷅ŋ lā fūūlu̍u̍ o̍ chi̍e̍e̍ŋ bɛ̍ndo̍ŋ ni᷄ŋ o̍ būŋgāŋ yɛ̍ yi̍ɔ̍ɔ̍ŋ ni᷄ŋ, ma̍ yōndā a̍ sāwa̍ māsāa̍ dɔ̄ū ho̍ō wo̍ o̍kɔ̄ɔ̄, Chu̍ūwa̍ a̍ wa̍ o̍ būŋgāŋ mu᷅ŋ ni᷄ŋ nda̍ kpo̍u̍, ma̍ dūāūnu᷄ŋ nya̍a̍le̍ ma̍ nāŋ kɔ̄l ta̍u̍ ta̍u̍. O̍ chi̍e̍e̍ o̍ chi̍e̍e̍ bɛ̍ndū ma̍ tōsā bɔ̄ŋa᷅ŋ dīāā nyɛ̄ dīāā bɛ̄ndōo̍, ndu̍yɛ̍, ma̍ kɛ̄sī pāa̍le̍ sūɛ̍i̍ he̍ī ī yɔ̄nu̍ŋ nde̍ŋ lēbɛ̄ɛ̄. Ndu̍yɛ̍ mɛ̄ɛ̍ wāŋnda̍ Pa̍a̍sīāā a̍ tu̍e̍ī sāwa̍ dɔ̍ɔ̍nu᷄ŋ ho̍ō a̍ Chu̍ūwa̍ o̍kɔ̄ɔ̄ wo̍, ā bɔ̄ɔ̍ bɔ̍ɔ̍ mi̍ sīōōŋīī bɛ̄ndūe̍i̍ bīī nda̍ le̍ Chu̍ūwa̍, ma̍ sīīŋgūū nda̍ pi̍la̍ Chu̍ūwa̍.