Read Southern Kisi Ɛ̍si̍tā 9 Bible Online

Ɛ̍si̍tā 9 - Southern Kisi bible

Ɛ̍si̍tā 9

¹O̍ ko̍ŋ kɔ̍ɔ̍lī, mi̍ pāa̍le̍ nda̍ kɛ̄ɛ̄si̍a̍a̍ le̍ Chu̍ūwa̍ kpo̍u̍ o̍ lɛ̄ŋndē Pa̍a̍sīāāle̍ŋ ni̍ŋ di̍ūwo̍ le̍ŋ lē fūūlūū. Pāŋgi̍i̍ tɔ̍ a̍ ī ŋīi̍ŋnde̍ o̍ pāŋgu̍ŋ māChu̍ūwo̍ŋ tɛ̄ɛ̄ŋ, pāŋgi̍i̍ A̍dā ve̍, mālɔ̄ tɔ̍ a̍ lē yāa̍ o̍ pāŋgi̍i̍ ke̍ŋ ni᷄ŋ, pāa̍le̍ le̍ŋ kpe̍e̍kpe̍i̍ nda̍ a̍a̍ kɛ̍ɛ̍si̍a̍a̍ le̍ Chu̍ūwa̍ dīūwo̍ ni̍. Pāa̍le̍ŋ nde᷅ŋ ya̍a̍mɔ̍ɔ̍wa̍a̍ Chu̍ūwa̍ nda̍ a̍a̍ kɛ̍ɛ̍si̍a̍a̍ ni̍, le̍ mā dīu̍ Chu̍ūwa̍ kpo̍u̍. Kɛ̍ mi̍ nyɛ̄ nda̍ kɛ̄ɛ̄si̍a̍a̍ wo̍ ō tāmbū, mi̍ Chu̍ūwa̍ hu᷄ŋ yo᷅m nda̍.

²Mɛ̄ɛ̍ pāa̍le̍ŋ nde᷅ŋ lē fūūlu̍u̍, Chu̍ūwāa̍ wa̍ o̍ lɛ̄ŋndē Pa̍a̍sīāā le̍ŋ ni᷄ŋ o̍ būŋgāŋ yɛ̍ yi̍ɔ̍ɔ̍ŋ ni᷄ŋ nda̍ kpo̍u̍, ma̍ chūūŋgi̍āŋ o̍ chi̍e̍e̍ŋ ndāāŋ bɛ̍ndo᷄ŋ ni᷄ŋ, le̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍, ā nda̍ a̍a̍ ye̍e̍ma̍ le̍ nda̍ dīūwo̍ wa̍. Mɛ̄ɛ̍ ya̍a̍mɔ̍ɔ̍wa̍a̍ Chu̍ūwa̍ a̍ chē mɛ̄ɛ̍ Chu̍ūwa̍ ā chūūŋgi̍āŋ yɛ̍, mi̍ sīōōŋīī bɛ̄ndūe̍i̍ bīī nda̍ lē Chu̍ūwa̍, ā nɔ̄la̍ mā sīmu̍l nda̍ le̍.

³Ndu̍yɛ̍, wānāa̍ wa̍ būŋgāŋ yɛ̍ yi̍ɔ̍ɔ̍ŋ bōlle̍ wa̍, a̍ māsāa̍ wa̍ o̍ fo̍ndāŋndā yɛ̍ yɛ̍la̍ŋ nda̍, a̍ wānāa̍ wa̍ pūa̍a̍ Chɔ̄ūwa̍ bōlle̍ wa̍, nda̍ kpo̍u̍ ā wa̍ Chu̍ūwa̍ kɔ̄ɔ̄lī o̍ sūɛ̍i̍ he̍ī ni᷄ŋ, kāni̍ fo̍ndōle̍, sīōōŋnde̍ wa̍ nda̍ ta̍u̍ ta̍u̍ a̍ Mɔ̍di̍kāī.

⁴Wānā o̍ wāna̍ wa̍ o̍ lɛ̄ŋndē le̍ŋ ni᷄ŋ, ma̍ sīnā māā wānā bɛ̍ndōo̍ pīla̍ Mɔ̍di̍kāī o̍ wa̍ o̍ chīɛ̄ī lēmāsāa̍ ni᷄ŋ ni̍, ndu̍yɛ̍ māā kpāāya̍ ndɔ̄ɔ̍ ō wa̍ hīōūwɔ̄ɔ̍ lāchī ta̍u̍ ta̍u̍.

⁵Le̍ he̍ī, Chu̍ūwa̍ nda̍ a̍a̍ nɔ̍ kpāāyāa̍ mī nda̍ a̍a̍ to̍sa̍ nyɛ̄ o̍ nyɛ̄ nda̍ hɛ̄na̍ŋ a̍ ya̍a̍mɔ̍ɔ̍wa̍a̍ ndāa̍. Mi̍ Chu̍ūwa̍ chīŋa̍la᷅ŋ ya̍a̍mɔ̍ɔ̍wa̍a̍ ndāa̍ a̍ mɔ̄ɔ̄ŋ fāŋndo̍ŋ, ma̍ dīū nda̍ dīūwo̍ pīla̍.

⁶Su̍sā o̍ wa̍ chi̍e̍e̍ le̍bo᷅llo̍ wo̍, wānāā Chu̍ūwa̍ ā dīu̍ pāa̍le̍ le̍ŋ lo̍ŋ nda̍, ā wa̍ kɛ̄mɔ̄ɔ̍ lē ŋūɛ̍ɛ̍nu̍ (500).

⁷Ndūyɛ̍ wānāā Chu̍ūwa̍ ā dīu̍ ha̍ā Su̍sā chi̍e̍e̍ wa̍, Ha̍māŋ po᷄ Hāmɛ̄da̍tā wo̍, ō ndu̍ o̍o̍ tu̍l Chu̍ūwa̍ yɛ̄le̍ŋ tūl bɛ̄ndōo̍ wo̍, pūa̍a̍ ndūāā ŋ̍wa᷅ŋ tɔ̍ wa̍ ā wa̍ nda̍ tɛ̄ɛ̄ŋ. Pūa̍a̍ ndūāā kāŋ ha̍ā ni̍. Pāāsīāŋda̍tā, a̍ Dāli̍fɔ̄ŋ, a̍ Āsīpa̍tā, a̍ Pōlu̍a̍tā, a̍ A̍da̍līā, a̍ Ālūīda̍tā, a̍ Pāmāsi̍tā, a̍ A̍lu̍i̍sāī, a̍ A̍lu̍i̍dāī a̍ Vāīsa̍tā. Kɛ̍ wānāā Chu̍ūwa̍ dīu̍ ha̍ā wa̍ ki̍nɛ̍i̍, Chu̍ūwa̍ chūe̍ nyɛ᷅ o̍ nyɛ̄ ndā le̍.

⁸

⁹

¹⁰

¹¹Pāa̍le̍ nda̍ dīu̍ wāŋnda̍ dīū ko̍ŋ Su̍sā chi̍e̍e̍ le̍ŋ, mi̍ ko̍na̍a̍ fūūlūū o̍ māsāa̍ bɛ̍ndōo̍ lo̍, mɛ̄ɛ̍ kpɛ̍ nda̍ dīu̍ wāŋnda̍ yɛ̍.

¹²O̍ ko̍ŋ, mbo̍ di̍mūl Ɛ̄si̍tā, āā, “Su̍sā chi̍e̍e̍ na̍nu᷄ŋ su̍e̍e̍, Chu̍ūwa̍ dīī wāŋnda̍ kɛ̄mɔ̄ɔ̍ lē ŋūɛ̍ɛ̍nu̍, lātūlu̍ a̍ pūa̍a̍ tɔ̍ wa̍ Ha̍māŋ nda̍. Nāa̍ nda̍ tōsa̍ wɔ̄ nu̍a̍ā chi̍e̍e̍ na̍nu᷄ŋ su̍e̍e̍, ɔ̍ɔ̄ ni᷅ŋ o̍ būŋgāŋ yɛ̍ yi̍ɔ̍ɔ̍ŋ ni᷄ŋ?” Mi̍ Māsāa̍ Sɛ̍sɛ̄ɛ̄ o̍ nyu̍nā Ɛ̄si̍tā āā, “Ō yɛ̄ɛ̍nɛ̍ ŋ̄ yēēma̍ yɛ̍ vɛ̄lɛ̄ mī to̍sa̍l nu̍m? Di̍mu̍l la̍, I̍ nɔ̍lā mī to̍sa̍l nu̍m. Nyɛ̄ o̍ nyɛ̄ ŋ̄ yēēma̍ pɛ̍ mī to̍sa̍l nu̍m, I̍ nɔ̍lā mī to̍sāl nu̍m.”

¹³Mi̍ Ɛ̄si̍tā di̍mūl ndu̍ āā, “yāndi̍i̍ fāllo̍, tē ō bɛ̄ndā pɛ̍, mɛ̄ɛ̄ ke̍ vɛ̍lɛ̄ Chu̍ūwa̍ a̍ cho̍ Su̍sā na̍nu᷄ŋ nda̍ kpāāyāa̍, mā tōsa̍ vɛ̄lɛ̄ sīɔ̄dīi̍ mɛ̄ɛ̍ nda̍ tōsa̍ nu̍a̍ā hāū yɛ̍. O̍ ko̍ŋ kɔ̍ɔ̍lī, mā chɛ̍l ma̍ kɔ̍ chu̍ā pūa̍a̍ tɔ̍ wa̍ Ha̍māŋ nda̍ ā vīlɛ̍i̍ya̍, ma̍ kɔ̍ la̍ndū nda̍ o̍ bāndu̍ŋ nda̍ lāndū wa᷅ŋnda̍ wo̍ŋ.”

¹⁴O̍ ko̍ŋ, mi̍ Māsā bɛ̍ndōo̍ to̍sā mɛ̄ɛ̍ Ɛ̄si̍tā o̍ di̍mu̍l ndu̍ yɛ̍. Mbo̍ hīvī sāwāa̍ ma̍ kɔ̍ chu̍ā pūa̍a̍ Ha̍māŋ nda̍ ā vīlɛ̍i̍ya̍, ma̍ kɔ̍ la̍ndū nda̍ o̍ bāndu̍ŋ nda̍ lāndū wa᷅ŋnda̍ wo̍ŋ.

¹⁵O̍ ko̍ŋ kɔ̍ɔ̍lī, mi̍ Chu̍ūwāa̍ wa̍ Su̍sā chi̍e̍e̍ wa̍ ā chūūŋgi̍āŋ vɛ̍lɛ̄ dīi̍mā ndɔ̄ɔ̍, o̍ mālɔ̄ tɔ̍ a̍ lē hīɔ̍ɔ̍lu̍a̍ŋ o̍ pāŋgi̍i̍ A̍dā ve̍ ni̍ŋ. Ndu̍yɛ̍, ma̍ dīī vɛ̄lɛ̄ wāŋnda̍ Su̍sā chi̍e̍e̍ kɛ̄mɔ̄ɔ̍ lē yāa̍ pa̍a̍le̍ le̍ŋ. Kɛ̍ nda̍ bɛ̍ɛ̍, ā chūe̍ nyɛ᷅ o̍ nyɛ̄ ndā le̍.

¹⁶O̍ pāa̍le̍ tɔ̍ a̍ lē yāa̍le̍ le̍ŋ chōo̍, o̍ pāŋgi̍i̍ A̍dā ve̍ ni̍ŋ, Chu̍ūwāa̍ wa̍ o̍ būŋgāŋ yɛ̍ yi̍ɔ̍ɔ̍ŋ ni᷄ŋ nda̍ kpo̍u̍ ma̍ chūūŋgi̍āŋ le̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍, le̍ mā chīɔ̍u̍ yōōmūlā ndāla̍ŋ. Ndu̍yɛ̍ ma̍ dīū ya̍a̍mɔ̍ɔ̍wa̍a̍ ndāa̍ wāa̍la̍ŋ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍ (75,000), wānāa̍ tu̍l nda̍ yɛ̄le̍ŋ nda̍. Kɛ̍ nda̍ bɛ̍ɛ̍ ā chūe̍ nyɛ᷅ o̍ nyɛ̄ ndā le̍. Dīi̍mā ndɔ̄ɔ̍, o̍ mālɔ̄ tɔ̍ a̍ lē hīɔ̍ɔ̍lu̍a̍ŋ mā pɛ̄ŋgī, ā dīi̍ wa̍nā o̍ wānā pāa̍le̍ le̍ŋ te̍. Ma̍ sīīŋgūū pāa̍le̍ le̍ŋ pāa̍le̍ kɔ̄l kɛ̄ndɛ̄, a̍ pāa̍le̍ bɔ̄ŋa᷅ŋ dīāā nyɛ̄ dīāā bɛ̄ndōo̍.

¹⁷

¹⁸Kɛ̍ Chu̍ūwa̍ a̍ wa̍ Su̍sā chi̍e̍e̍ wa̍ nda̍, o̍ mālɔ̄ tɔ̍ a̍ lē ŋūɛ̍ɛ̍nu̍a̍ŋ chōo̍, o̍ pāŋgi̍i̍ ke̍ŋ ni᷄ŋ nda̍ pɛ̄ŋgi̍ a̍ ya̍a̍mɔ̍ɔ̍wa̍a̍ ndāa̍ dīūwo̍ ni̍. Mɛ̄ɛ̍ nda̍ dīu̍ ya̍a̍mɔ̍ɔ̍wa̍a̍ ndāa̍ o̍ mālɔ̄ tɔ̍ a̍ lē yāa̍wa̍ŋ chōo̍, ma̍ dīū nda̍ vɛ̄lɛ̄ o̍ mālɔ̄ tɔ̍ a̍ lē hīɔ̍ɔ̍lu̍a̍ŋ chōo̍. O̍ ko̍ŋ, ma̍ sīīŋgūū pāa̍le̍ le̍ŋ pāa̍le̍ kɔ̄l kɛ̄ndɛ̄, a̍ pāa̍le̍ bɔ̄ŋa᷅ŋ dīāā nyɛ̄ dīāā bɛ̄ndōo̍.

¹⁹Kɛ̍ Chu̍ūwa̍ a̍ wa̍ o̍ chi̍e̍e̍ŋ pɔ̍mbɔ᷄ŋ ŋ̍ nɔ̍ la̍sa̍a̍sā le̍ wo̍ŋ nda̍ ki̍nɛ̍i̍, o̍ mālɔ̄ tɔ̍ a̍ lē hīɔ̍ɔ̍lu̍a̍ŋ chōo̍, o̍ pāŋgi̍i̍ A̍dā ve̍ ni᷄ŋ nda̍ tōsā kɔ᷅ kɛ̄ndɛ̄ bɛ̄ndōo̍ ni̍. Pāa̍le̍ le̍ŋ nda̍ sīīŋgu̍u̍ pāa̍le̍ bɛ̍ndūle̍ŋ, a̍ pāa̍le̍ bɔ̄ŋa᷅ŋ dīāā nyɛ̄ dīāā bɛ̄ndōo̍ ni̍, o̍ ko̍ŋ kɔ̍ɔ̍lī, mā kēna᷅ŋ nyɛ̍ dīa̍a̍ vēllāa̍ vēllē.

²⁰O̍ ko̍ŋ kɔ̍ɔ̍lī, nyɛ̍ yɔ̍nu̍ŋ ho̍ō wo̍, mi̍ Mɔ̍di̍kāī po̍o̍nyīāā ndu̍ o̍ yāu̍ chōo̍. Ndu̍yɛ̍, mbo̍ yɔ̄ŋ yāu̍la̍ŋ nda᷅ŋ o̍ Chu̍ūwa̍ lo̍ kpo̍u̍ o̍ būŋgāŋ yɛ̍ yɛ̍ŋ Māsā Bɛ̍ndōo̍ Sa̍a̍si̍ī o̍ wa̍ chōo̍ wo̍ŋ ni᷄ŋ, būŋga᷄ŋ wa̍ māchɛ̄lū wo̍ŋ ni̍, a̍ ŋ̍ wa̍ la̍nda̍ŋ ndo̍ŋ.

²¹Mbo̍ dīmūl nda̍ o̍ yāu̍la̍ŋ ni᷄ŋ māā wɔ̄sī o̍ wɔ̍sī, māā o̍ pāŋgi̍i̍ A̍dā ve̍ ni᷄ŋ, mālɔ̄ tɔ̍ a̍ lē hīɔ̍ɔ̍lu̍a̍ŋ a̍ mālɔ̄ tɔ̍ a̍ le̍ ŋūɛ̍ɛ̍nu̍a̍ŋ, māā ā nɔ̄ mā kɛ̄si̍ pālɛ̍i̍ ŋi̍i̍ŋnde̍ he̍ī lēbɛ̄ɛ̄,

²²Kāni̍ fo̍ndōle̍, māā pālɛ̍i̍ he̍ī Chu̍ūwa̍ sɔ̄la̍ bāŋa᷄ŋndo̍ ya̍a̍mɔ̍ɔ̍wa̍a̍ ndāa̍ o̍ bā ni̍. Māā o̍ pāŋgi̍i̍ ke̍ŋ ni᷄ŋ te̍le̍ŋ nda̍ dɛ̍nɛ̍ pa̍lāa̍, a̍ kɔ̄l tāmbɛ̍i̍ bɛ̍ndōo̍, ō sīmnu᷄ŋ te̍le̍ŋ nya̍a̍lo̍o̍, a̍ te̍le̍ŋ kɔ̄l kɛ̄ndɔ̄ɔ̍ ni̍. Le̍ he̍ī, mbo̍ dīmūl nda̍ māā tē pālɛ̍i̍ he̍ī ī fūūlu̍u̍ pɛ̍, māā ā nɔ̄ mā dɔ̄ɔ̄nu᷄ŋ nya̍a̍le̍, mā bīī bɔ̄ŋa᷅ŋ dīāā nyɛ̄ dīāā bɛ̄ndōo̍, ndu̍yɛ̍, mā kēna᷅ŋ nyɛ᷅ dīa̍a̍ vēllāa̍ vēllē, o̍ ko̍ŋ kɔ̍ɔ̍lī, mā pīɔ̍u̍ vɛ̄lɛ̄ wānāā tāmbɛ̍i̍ya̍ nyɛ̄ dīa̍a̍.

²³Ndu̍yɛ̍ Chu̍ūwa̍ kpo̍u̍ ma̍ chɛ̄la᷅ŋ a̍ nyɛ̄ Mɔ̍di̍kāī o̍ di̍mu̍l nda̍ wo̍, ma̍ chūā pālɛ̍i̍ ŋi̍i̍ŋnde̍ he̍ī o̍ wɔ̄sī o̍ wɔ̄sī ni᷄ŋ māā pālɛ̍i̍ ndɛ̄i̍ bɛ̍ndū.

²⁴Ha̍māŋ po᷄ Hāmɛ̄da̍tā wo̍, fūlāa̍ o̍ pūlāle̍ A̍ka̍ka̍i̍tīi̍ya̍ chōo̍, ya̍a̍mɔ̍ɔ̍nɔ̍ Chu̍ūwa̍, ndu̍ o̍o̍ chi̍i̍ ni᷅ŋ kɛ̄ɛ̄sīāā le̍ Chu̍ūwa̍ nyɛ̄ pālāā bɛ̄ndōo̍ tūsīo̍o̍ chōo̍ mbō tɛ̄ɛ̄mbu̍u̍ nda̍ kpo̍u̍. Mbo̍ wūū nyɔ̄ɔ̍, mɛ̄ɛ̍ nda̍ wūū nu̍a̍ā kōo̍ŋ le̍ sūɛ̍i̍ sīnāa̍ yɛ̍, le̍ pāa̍le̍ kpe̍e̍kpe̍i̍ le̍ nda̍ dīū wa᷅ŋnda̍ ha̍ā mā bāsu̍ nda̍ tɛ̍ɛ̍ le̍ŋ. Nyɛ̄ nda̍ wūu̍ ho̍ō wo̍ ā vēēlū ndu̍ āā Pu̍lūīm.

²⁵Kɛ̍ mɛ̄ɛ̍ Ɛ̄si̍tā tu̍e̍ī sūɛ̍i̍ he̍ī, mbo̍ kɔ̍ di̍mūl māsāa̍ a̍ ndi̍ o̍kɔ̄ɔ̄. Mi̍ māsāa̍ pōōnyīāā yāu̍la̍ŋ mbo̍ hi̍vī sāwāa̍ māā kpūndɛ̍ Ha̍māŋ o̍ kɛ̍ɛ̍si̍a̍a̍ le̍ Chu̍ūwa̍ tūsīo̍o̍ chōo̍ wo̍, māā kpūndɛ̍ kōŋ, ō mīīŋgu̍ ndu̍ pi̍la̍ chōo̍. O̍ ko̍ŋ, Ha̍māŋ ni̍, pūa̍a̍ ndūāā ni̍, ma̍ sɔ̄lā lāndɔ̄ɔ̍ o̍ bāndu̍ŋ nda̍ lāndū wa᷅ŋnda̍ wo̍ŋ.

²⁶O̍ ko̍ŋ, mi̍ Chu̍ūwa̍ kē pālɛ̍i̍ ŋi̍i̍ŋnde̍ he̍ī dīōla̍ŋ āā Pu̍lūīm, le̍ lōōnɔ᷄ŋndo̍ a̍ pāa̍le̍ nda̍ wūu̍ kōo̍ŋ le̍ kɛ̄ɛ̄sīa̍a̍ a̍ pīɔ̍m ndāa̍ o̍kɔ̄ɔ̄ le̍ŋ. Ndu̍yɛ̍ nyɛ̄ nda̍ wūu̍ ho̍ō māā ŋ̄kōō wo̍, ndu̍ nɔ̍ dīōlā ni̍ āā Pu̍lūīm. Mɛ̄ɛ̍ Chu̍ūwa̍ tūēī nyɛ̄ Mɔ̍di̍kāī o̍ di̍mu̍l nda̍ o̍ yāu̍la̍ŋ ni᷄ŋ ndo̍, ma̍ chīī yīya᷄ŋ a̍ nyɛ̄ o̍ nyɛ̍ yɔ̍nu̍ŋ a̍ nda̍, ndu̍yɛ̍ a̍ nyɛ̄ o̍ nyɛ̄ yɔ̍nu̍ŋ ma̍ chā,

²⁷nda̍ kpo̍u̍ ma̍ chɛ̄la᷅ŋ le̍ pālɛ̍i̍ ŋi̍i̍ŋnde̍ he̍ī bɛ̄ɛ̄le̍ŋ kīo̍o̍ ma̍ chūa̍ ndi̍ māā pālɛ̍i̍ ndɛ̄i̍ bɛ̍ndū. Ndu̍yɛ̍ mi̍ sūɛ̍i̍ he̍ī sīmnu᷄ŋ ni᷅ŋ māā sāwā le̍ Chu̍ūwa̍ a̍ chūāūwāā ndāa̍ kpo̍u̍, lātūlu̍ a̍ wānāa̍ ve̍ bɛ̍ɛ̍ a̍ Chu̍ū le̍, kɛ̍ ma̍ sīmnu᷄ŋ ni᷅ŋ Chu̍ūwa̍ wa̍. Wɔ̄sī o̍ wɔ̄sī tē pālɛ̍i̍ ŋi̍i̍ŋnde̍ he̍ī ī fūūlu̍u̍ pɛ̍, mɛ̄ɛ̍ mī Chu̍ūwa̍ nda̍ a̍a̍ ke̍ ndi̍ bɛ̄ɛ̄le̍ŋ. O̍ ībūŋgā o̍ ībūŋgā, a̍ chi̍e̍e̍ o̍ chi̍e̍e̍ bɛ̍ndū Chu̍ūwa̍ ā wa̍, tē pālɛ̍i̍ ŋi̍i̍ŋnde̍ he̍ī ndi̍ i̍i̍ fu̍u̍lu̍u̍ pɛ̍, yu̍ŋgu̍ o̍ yu̍ŋgu̍ mɛ̄ɛ̍ mī nda̍ a̍a̍ cha̍l nāa̍ pi᷅lɛ̍, mī nda̍ a̍a̍ ke̍ pālɛ̍i̍ he̍ī bɛ̄ɛ̄le̍ŋ, mɛ̄ɛ̍ Mɔ̍di̍kāī o̍ di̍mu̍l nda̍ yɛ̍. Wɔ̄sī o̍ wɔ̄sī Chu̍ūwa̍ nda̍ a̍a̍ be̍ŋgā le̍ pālɛ̍i̍ ŋi̍i̍ŋnde̍ he̍ī bɛ̄ɛ̄le̍ŋ kīo̍o̍ le̍. O̍ wɔ̄sī o̍ wɔ̄sī ni᷄ŋ, mɛ̄ɛ̍ mī nda̍ a̍a̍ ke̍ pālɛ̍i̍ he̍ī bɛ̄ɛ̄le̍ŋ, le̍ lōōnɔ᷄ŋndo̍ a̍ nyɛ̍ yɔ̍nu̍ŋ a̍ nda̍ wo̍ o̍kɔ̄ɔ̄. Ndu̍yɛ̍ mi̍ sūɛ̍i̍ he̍ī ī wā ni᷅ŋ māā sāwā le̍ Chu̍ūwa̍ a̍ chūāūwāā ndāa̍ kpo̍u̍.

²⁸

²⁹O̍ ko̍ŋ kɔ̍ɔ̍lī, mi̍ Ɛ̄si̍tā, chu̍a̍ A̍bi̍hēē wo̍, ō pōōnyīāā nda̍ Mɔ̍di̍kāī Chu̍ūnɔ̄, mbo̍ kīndīlā a̍ yāu̍ di̍i̍ŋ ndɔ̄ nda̍ pōōnyi̍a̍a̍ a̍ pālɛ̍i̍ ŋi̍i̍ŋnde̍ o̍kɔ̄ɔ̄ le̍ ndi̍ bɛ̄ɛ̄le̍ŋ kīo̍o̍ ve̍. Le̍ mī wāŋnda̍ chu̍a̍ sūɛ̍i̍ ke̍ŋ māā sūɛ̍i̍ kpe̍e̍kpe̍i̍, ndi̍ yɔ̍nūŋ ni̍ māā pālɛ̍i̍ Pu̍lūīm nde̍.

³⁰Mbo̍ yɔ̄ŋ yāu̍la̍ŋ nda᷅ŋ nāa̍ Chu̍ūwa̍ chūā kpo̍u̍, o̍ būŋgāŋ Pa̍a̍sīāŋ ndo̍ŋ ni᷄ŋ kpo̍u̍, būŋgāŋ kɛ̄mɛ̄ a̍ bi̍di̍i̍ŋ a̍ ŋ̄ ŋɔ᷄mmɛ̍ū (127) Māsāa̍ Sa̍a̍si̍ī o̍ wa̍ māsāa̍ chōo̍ wo̍ŋ. Mbo̍ dīmūl Chu̍ūwa̍ kpo̍u̍ o̍ yāu̍la̍ŋ ni᷄ŋ māā ā yɔ᷅ŋ īsīōōŋ tē, māā nda̍ kpo̍u̍ ā chō wā a̍ kɔ̄ltā nyūlū, ndu̍yɛ̍ mā wa̍ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ a̍ nda̍ le̍.

³¹Mbo̍ kīndīlā nda̍ dīmūllo̍ o̍ yāu̍la̍ŋ ni᷄ŋ a̍ bɔ̄ŋa᷅ŋ Pu̍lūīm ndo̍ o̍kɔ̄ɔ̄ māā Chu̍ūnɔ̄ o̍ Chu̍ūnɔ̄ ā nɔ̄ mā bīī bɔ̄ŋa᷅ŋndo̍ ho̍ō o̍ wɔ̄sī o̍ wɔ̄sī ni᷄ŋ. Ndu̍yɛ̍, Mɔ̍di̍kāī ni̍, Ɛ̄si̍tā ni̍, ma̍ sīīŋgūū ni̍ko̍ su̍ɛ̍i̍ he̍ī māā sāwā le̍ Chu̍ūwa̍, a̍ chūāūwāā ndāa̍ kpo̍u̍. Ma̍ dīmūl nda̍ ō kālā ka̍lā, māā ā nɔ̄ mā chūa̍ sāwāa̍ ho̍ō māā sāwā kpe̍e̍kpe̍i̍. Pālɛ̍i̍ nda̍ dīmu̍l māā wānā o̍ wānā o̍ nɔ̄ mbō bīī su᷅mndo̍ mbō cha᷄ŋ nde̍, mɛ̄ɛ̍ nda̍ chu̍a̍ pālɛ̍i̍ ke̍ŋ pālɛ̍i̍ bɛ̍ndū yɛ̍, māā le̍nde̍ nda̍ chu̍a̍ pālɛ̍i̍ he̍ī ni̍. Ma̍ dīmūl Chu̍ūwa̍ kpo̍u̍ māā wɔ̄sī o̍ wɔ̄sī tē bōōndi̍i̍ ke̍ŋ ī fūūlu̍u̍ pɛ̍, māā ā nɔ̄ mā chūūŋgi̍āŋ a̍ yu̍ŋgu̍la̍ŋ mā ke̍ pālɛ̍i̍ he̍ī bɛ̄ɛ̄le̍ŋ.

³²Ndu̍yɛ̍ sāwa̍ Māsāa̍ Ɛ̄si̍tā o̍ dɔ̍ū ho̍ō a̍ pālɛ̍i̍ ŋi̍i̍ŋnde̍ he̍ī o̍kɔ̄ɔ̄ wo̍, mi̍ Chu̍ūwa̍ chūā ndu̍ māā sāwā kpe̍e̍kpe̍i̍. O̍ ko̍ŋ, ma̍ pōōnyīāā ndu̍ o̍ yāu̍ cho̍o̍ mbo̍ wā ō kɛ̄sīāā.