Read Southern Kisi Ɛ̍sɔ̍dɔ̍ɔ̄ 11 Bible Online

Ɛ̍sɔ̍dɔ̍ɔ̄ 11 - Southern Kisi bible

Ɛ̍sɔ̍dɔ̍ɔ̄ 11

¹Lɔ̍ɔ̍ pa̍ mi̍ Mūu̍sē o̍ ku̍ā nāa̍ māsā bɛ̍ndōo̍ chu̍a̍, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Kpūndɔ̍ɔ̍ ō pīlɛ̍ kpe̍ ya̍ I̍ cho̍ ni᷅ŋ māsā bɛ̄ndōo̍ a̍ wāŋnda̍ I̍chi̍pī tūsī chōo̍ ni̍. Tē ko̍ŋ hi̍o̍ū ni᷅ŋ pɛ̍, ō chō nya̍ mālɔ̄ɔ̄ mī lā kūɛ̄. Ndu̍yɛ̍, tōūwɔ̄ɔ̍ kpe̍e̍kpe̍i̍ o̍ tu̍a̍ū ni̍ŋ nya̍ ni̍, le̍ mī lā fūla̍ o̍ lɛ̄ŋndē ndɔ̄la̍ŋ ni᷄ŋ.

²Le̍la̍ŋ, di̍mu̍l wāŋnda̍ I̍sɔ̄lūɛ̄ī, wānā pɔ̍nɔ̍ ni̍, wānā la̍nɔ̍ ni̍, mī wānā o̍ wānā o̍ nyu̍na̍ chāa̍ŋndɔ̍ I̍chi̍pīnɔ̄ nda̍ chīɛ̄ɛ̄li̍āŋndo̍, le̍ mbō ke̍ ndu̍ nyɛ̄m ŋ̄ko̍o̍līi̍yo̍ŋ a̍ nyɛ̄m ka̍ni᷄ŋ hu̍mbo᷄ŋ.”

³Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ wāŋnda̍ I̍chi̍pī ā chā I̍sɔ̄lūɛ̍i̍ya̍ nyīnā ta̍u̍ ta̍u̍. Mūu̍sē bɛ̍ɛ̍, mi̍ Māsā bɛ̍ndōo̍ I̍chi̍pī, lāŋgba̍ā ndūāā ka᷅lla̍ ni̍, a̍ wāŋnda̍ I̍chi̍pī kpo̍u̍, ma̍ chūā ndu̍ māā wāna̍ tɔ̍ɔ̍ bɛ̍ndū, ndu̍yɛ̍ ma̍ kē ndu̍ bɛ̄ɛ̄le̍ŋ ta̍u̍ ta̍u̍.

⁴O̍ ko̍ŋ, mi̍ Mūu̍sē dīmūl māsāa̍ I̍chi̍pī āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ ō di̍mi̍ wo̍ ndu̍ cho̍ ho̍ō ni̍. Ō dīmi̍ āā, ‘Chūɛ̄llɛ̄ŋ ā dītɛ̍ɛ̄ŋndo̍ ki̍nɛ̍i̍, I̍ cho̍ bālɔ̄ɔ̄ o̍ lɛ̄ŋndē I̍chi̍pīle̍ŋ ni᷄ŋ si̍lɔ̍.

⁵Te̍ I̍ ba̍lu̍ pɛ̍, po᷄ tāse̍ o̍ po᷄ tāse̍ cho̍ o̍ lɛ̄ŋndē I̍chi̍pīle̍ŋ ni᷄ŋ, ō chō wu̍. Chɔ̍ŋ a̍ nūm māsā bɛ̍ndōo̍ po̍ nu᷄m tāso̍o̍, o̍ nɔ̍ mbō hu᷄ŋ mi̍i̍ŋgū o̍ fōōfō nu̍m ndo̍ wo̍, mbo̍ kūɛ̄ a̍ chɛ̄ wānā la̍nɔ̍ chu̍ī tɔ̍lɔ̄ɔ̄ ku̍llo̍ wo̍, po̍ ndɔ̍ tāso̍o̍, nda̍ kpo̍u̍ ā chō wu̍. Ndu̍yɛ̍, nāūwa̍ bɛ̍ɛ̍, tōōyīa̍a̍ tāsi̍a̍a̍ nda̍ kōm nda̍ ki̍nɛ̍i̍, ā chō wu̍.

⁶Cha᷄ŋnda̍ bɛ̍ndūla̍ŋ lā chō hūnɔ̄ɔ̄ tīū o̍ lɛ̄ŋndē I̍chi̍pīle̍ŋ kpo̍u̍. Cha᷄ŋnda̍ wa̍ ni᷄ŋ I̍chi̍pī la̍ŋ, kāni̍ bɛ̍ɛ̍ cha᷄ŋnda̍ wa̍ā le̍nde̍ lā yɔ̄nu᷄ŋ ndɔ̍ lo̍ŋ te̍. Ndu̍yɛ̍, fɛ̍ɛ̍ŋ a̍ fɛ̍ɛ̍ŋ bɛ̍ɛ̍ cha᷄ŋnda̍ wa̍ā le̍nde̍ lā yɔ̍nūŋ ndɛ̍ ni̍ŋ lo̍ŋ te̍.

⁷Kɛ̍, I̍sɔ̄lūɛ̍i̍ya̍ tɛ̍ɛ̄ŋ ki̍nɛ̍i̍, wāna̍ chi̍e̍e̍ ni̍, vīsī ni̍, kpɛ̍kɛ̍lɛ̍ bɛ̍ɛ̍ wānā tu̍i̍ī ni̍ŋ nyɛ̄ lo̍ŋ te̍, kɛ̄lɛ̄ŋgāā ni᷅ŋ te̍, mī tūŋndo̍ ō bu̍sū lo̍ŋ. O̍ ko̍ŋ, mī lā sīna̍ māā, Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ chɔ̍m yɛ̍ yi̍ɔ̍ɔ̍ wāŋnda̍ I̍chi̍pī tɛ̄ɛ̄ŋ nda̍ I̍sɔ̄lūɛ̍i̍ya̍ ni̍.’

⁸Mī di̍mu̍l nu̍m fāllo̍, a̍ te̍le̍ŋ ko̍ŋ, lāŋgba̍ā nu̍m a̍ kālla̍ I̍chi̍pī kpo̍u̍, ā chō hūnɔ̄ɔ̄ a̍ kīlta̍ŋ mā hu᷄ŋ de᷅l la̍ o̍ lābɛ̄ŋgu̍ ni᷄ŋ mā nyɔ̄ɔ̄lu̍ ya̍ āā, ‘Yāndi̍i̍, lā ke̍le̍ŋa̍ mālɔ̄ɔ̄ mī lā kūɛ̄. Chu̍a̍ wa̍nāā nūmnda̍ kpo̍u̍ mī lā fūla̍ o̍ lɛ̄ŋndē nāāle̍ŋ ni᷄ŋ mī lā kūɛ̄.’ O̍ ko̍ŋ mī chu̍a̍ wānāā nīa̍a̍ kpo̍u̍, mī ŋ̄ kūɛ̄nu̍ŋ.” A̍ kɔ̄l tūū kōŋ, mi̍ Mūu̍sē fa̍ŋa᷄ŋ māsāa̍ I̍chi̍pī o̍ hɔ̄l mbō kūānu᷄ŋ.

⁹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ dīmūl Mūu̍sē āā, “Māsāa̍ I̍chi̍pī ō cho̍ nūm lānī yāŋɔ̄ɔ̄ le̍. Sa̍bū o̍ cho̍ nu̍m lānī yāŋɔ̄ɔ̄ le̍ wo̍ cho̍ ni̍, le̍ mī chɔ̍ɔ̍lu̍ sɔ̄ɔ̍ŋ ka̍a̍ma᷅ŋ ya̍ I̍ kɛ̍ɛ̍si̍a̍a̍ le̍ tōsāa̍ o̍ lɛ̄ŋndē I̍chi̍pīle̍ŋ ni᷄ŋ ndo̍ŋ tōsā.”

¹⁰Ndu̍yɛ̍, a̍ sɔ̄ɔ̍ŋ ka̍a̍ma᷅ŋ Mūu̍sē nda̍ E̍lɔ̄ŋ a̍ to̍sa̍ mu̍ŋ ma̍sā bɛ̍ndōo̍ I̍chi̍pī o̍ hɔ̄l lo̍ŋ kpo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ ki̍ndi̍ ndu̍ bo̍lle̍ŋ. Māsā bɛ̍ndōo̍ ō chɛ᷄l mbō ma᷄l I̍sɔ̄lūɛ̍i̍ya̍ mā kūɛ̄ le̍.