Read Southern Kisi Ɛ̍sɔ̍dɔ̍ɔ̄ 15 Bible Online

Ɛ̍sɔ̍dɔ̍ɔ̄ 15 - Southern Kisi bible

Ɛ̍sɔ̍dɔ̍ɔ̄ 15

¹O̍ ko̍ŋ kɔ̍ɔ̍lī, mi̍ Mūu̍sē nda̍ wāŋnda̍ I̍sɔ̄lūɛ̄ī a̍ so̍lī chōnde̍i̍ he̍ī nāa̍ Mɛ̄lɛ̄ka̍ Ya̍a̍wɛ̄ɛ̄ chūā āā, “I̍ cho̍ chōnde̍i̍ sōlī nāa̍ Mɛ̄lɛ̄ka̍ Ya̍a̍wɛ̄ɛ̄ chūā, kāni̍ fo̍ndōle̍, le̍ mɛ̄ɛ̍ o̍ ye᷅m a̍ kpāāya̍ ndɔ̄ bɛ̍ndōo̍. Wānāa̍ ku̍ā o̍ su̍a̍a̍ chōo̍ wa̍, lātūlu̍ a̍ su̍a̍ā kāŋ kpo̍u̍ mbo̍ mīīsūū nda̍ o̍ pēe̍ mɛ̄ŋmā īhɛ᷄llo̍ ni᷄ŋ.

²Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ yōōmūmā nīa̍a̍ŋ ni̍, ndu̍yɛ̍, a̍ ndu̍ o̍kɔ̄ɔ̄ ya̍ I̍ cho̍ chōnde̍i̍ he̍ī sōlīo̍o̍ ni̍. Ndu̍ ba̍ŋa̍ ya̍ ni̍. Ndu̍ cho̍ Mɛ̄lɛ̄ka̍ nūu̍ ni̍, ndu̍yɛ̍ ndu̍ ya̍ I̍ li̍sā ni̍. Ndu̍ cho̍ Mɛ̄lɛ̄ka̍ fi̍nyāā nīa̍a̍ ma̍māa̍ nda̍ a̍a̍ pi̍ɛ̍īyo̍ ni̍, I̍ cho̍ ndu̍ sāŋgālā.

³Ku̍u̍ba̍nɔ̍ chɔ̄ūwo̍ Mɛ̄lɛ̄ka̍ Ya̍a̍wɛ̄ɛ̄ cho̍ ni̍. Ndu̍yɛ̍, ndu̍ nɔ̍ dīōla̍ŋ ni̍ āā, Mɛ̄lɛ̄ka̍ Ya̍a̍wɛ̄ɛ̄.

⁴“Mbo̍ mīīsūū māsā bɛ̍ndōo̍ I̍chi̍pī so̍vɛ̄i̍ya̍a̍ ndūa̍a̍, lātūlu̍ a̍ nyɛ̄lā ndɔ̄la̍ nya̍a̍na᷄ŋnda̍ su̍a̍ā ā nāŋ nda̍ŋ o̍ Pēē Si̍a̍ŋā Mɛ̄ŋmā Īhɛ᷄llo̍ ni᷄ŋ. So̍vɛ̄i̍ya̍a̍ kpe̍e̍kpe̍i̍ māsāa̍ I̍chi̍pī o̍ ha̍ndu̍ kɔ̄llo̍ chōo̍ wa̍, mbo̍ mīīsūū nda̍ o̍ Pēē Si̍a̍ŋā Mɛ̄ŋmā Īhɛ᷄llo̍ ni᷄ŋ.

⁵Mi̍ mɛ̄ŋmā bɛ̄ndūa̍ŋ mā kūmbū nda̍. Ma̍ tūāl lēbɛ̄ŋgu̍ mɛ̄ɛ̍ pōūta̍ŋ lā dēl nu̍a̍ā o̍ pēēlo̍ mī lā tūāl lɛ̍.

⁶“O̍o̍ Mɛ̄lɛ̄ka̍ Ya̍a̍wɛ̄ɛ̄, ā tōsā bɔ̄ɔ̍ sɔ̄ɔ̍ŋ tɔ̍ɔ̍ma̍ŋ bɛ̄ndo᷄ŋ a̍ bā nūm kɛ̍ndɔ̄ɔ̍. Ma̍ sɛ̄ɛ̄sīāā ya̍a̍mɔ̍ɔ̍wa̍ nu̍a̍ā ve̍e̍ ve̍e̍ a̍ bā nūm kɛ̍ndɔ̄ɔ̍.

⁷A̍ kpāāyā nu̍m bɛ̄ndōo̍ ŋ̄ yēm wānāa̍ si̍mu̍l nu̍m nda̍ ni̍. Ā dɔ̄ɔ̄nu᷄ŋ tu̍mbe̍ pɛ̍, mɛ̄ɛ̍ fu̍e̍ēŋnde̍ ī ŋūā nu̍a̍ā yɛ̍ le̍nde̍ ŋ̄ lūām ya̍a̍mɔ̍ɔ̍wa̍a̍ nu̍mnda̍ ni̍.

⁸Mɛ̄ɛ̍ ŋ̄ yōōmu̍ a̍ mīli̍ŋ fu̍ū o̍ pēe̍ mɛ̄ŋmā īhɛ᷄llo̍ chōo̍, mi̍ mɛ̄ŋnda̍ŋ mā pīɔ̄ūvi̍āŋ, mi̍ mā sīm yi̍ mɛ̄ɛ̍ kpākīla̍ŋ lā sīm nu̍a̍ā yɛ̍. Mi̍ fo̍ndāŋ yīŋgi̍lɛ̍i̍ bɛ̍ndōo̍ o̍ pēe̍ mɛ̄ŋmā īhɛ᷄llo̍ tɛ̍ɛ̄ŋ ō kīāndū pe᷅ŋ.

⁹Mi̍ ya̍a̍mɔ̍ɔ̍wa̍a̍ nāa̍ kīālū yōŋgāa̍ ma̍ dīmī māā, ā chō na̍a̍ tōlɔ̄ɔ̄ kɔ̄ɔ̄lī, mā kɔ̍ bi̍ī na̍a̍, mā pīɔ̄ūvi̍āŋ nyɛ᷅m nāa̍ŋ kɛ̍ndɔ᷄ŋ, mā bīī na̍a̍ mɛ̄ɛ̍ nda̍ ye̍e̍ma̍ yɛ̍, ndu̍yɛ̍ mā dīu̍ na̍a̍ a̍ mɔ̄ɔ̄ŋ fāŋndo̍ŋ.

¹⁰Kɛ̍ nūm Mɛ̄lɛ̄ka̍, mɛ̄ɛ̍ hūēīyīi̍ fu̍la̍ nu̍m o̍ lāmīli̍ŋ nde̍ ī hu᷄l mɛ̄ŋnda̍ŋ, mi̍ mā kūmbū nda̍ ma̍ lō o̍ pēēlo̍, mɛ̄ɛ̍ li̍īye̍ ī dēl nu̍a̍ā o̍ pēēlo̍ mī ī lo̍ yɛ̍.

¹¹“O̍o̍ Mɛ̄lɛ̄ka̍ Ya̍a̍wɛ̄ɛ̄, wānā o̍ wānā cho̍ māā nūm te̍. Mɛ̄lɛ̄ka̍ o̍ mɛ̄lɛ̄ka̍ cho̍, mbō nɔ̄ kpāāyāa̍, mbō wa᷄ wāna̍ kāsī, ndu̍yɛ̍, mbō nɔ̄la̍ mbō tōsa̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ wāā nu̍a̍ā māā nūm te̍ Mɛ̄lɛ̄ka̍.

¹²Bā nūm kɛ̍ndɔ̄ɔ̍ ko̍ni̍ ŋ̄ sīɛ̄ndi̍ ni̍ Mɛ̄lɛ̄ka̍, mi̍ ya̍a̍mɔ̍ɔ̍wa̍a̍ na̍a̍ chūū mu̍ɛ̍ɛ̍ŋ.

¹³Wānāā ŋ̄ bāŋa̍ wa̍, ma̍ kūā a̍ nda̍ a̍ kāālā nu᷄m ŋ̄ nɔ̄ le̍ te̍le̍ŋ o̍ te̍le̍ŋ ndo̍, mā ma̍nda̍ nda̍ a̍ kpāāyā nu̍mndo̍ ha̍a̍a̍, mā fu̍u̍lu̍u̍ a̍ nda̍ o̍ fo̍ndāŋ nu̍m kāsīo̍o̍.

¹⁴Mɛ̄ɛ̍ lɛ̄ŋnde̍ o̍ chi̍e̍ēŋndo̍ chōo̍ ā tūēī a̍ ndi̍ o̍kɔ̄ɔ̄, ma̍ nyīīyā. Mi̍ sīōōŋīī bɛ̄ndūe̍i̍ bīī Fīli̍i̍tīāŋnda̍ ma̍ nyīīyā.

¹⁵Mi̍ Māsāa̍ I̍dɔ̄m, a̍ ha̍ā Mo̍wa̍bī, a̍ nyi̍i̍yā a̍ sīōōŋnde̍. Wāŋnda̍ o̍ lɛ̄ŋndē Ke̍nāŋnde̍ŋ ni᷄ŋ kpo̍u̍, mi̍ kpɛ̍īyo̍ bīī nda̍.

¹⁶Sīōōŋīī bɛ̄ndūe̍i̍ chō nda̍ bīyɔ̄ɔ̄ le̍ kpāāyā nu̍m bɛ̄ndōo̍, ā chō lāsīsi̍ yi̍ māā pōū, mɛ̄ɛ̍ mī wānāā ŋ̄ bāŋa̍ le̍ nūm pi̍la̍ wa̍, ā chūū hīōūwɔ̄ɔ̄.

¹⁷Ndu̍yɛ̍, nūm Mɛ̄lɛ̄ka̍, ā chō lākɔ̄ a̍ wānāā nūmnda̍, o̍ pēmbīī nūm Mɛ̄lɛ̄ka̍ Ya̍a̍wɛ̄ɛ̄ pi̍la̍ hɛ̍li̍ ve̍ chōo̍, fo̍ndāŋ nūm pi̍la̍ hɛ̍li̍ le̍ mbō wa̍ nāa̍ nu̍m ā chālāa̍ wo̍, ndu̍ yɔ̍nūŋ ni̍ māā chīɛ̄ī nūm Mɛ̄lɛ̄ka̍ Ya̍a̍wɛ̄ɛ̄ pi̍la̍ ta̍ŋgu̍l a̍ bālā nūmnda̍ ndo̍, mā kɛ̄si̍ nda̍ lo̍ŋ.

¹⁸Nūm Mɛ̄lɛ̄ka̍ Ya̍a̍wɛ̄ɛ̄, ā chō wā māsāa̍ le̍ fɛ̍ɛ̍ŋ a̍ fɛ̍ɛ̍ŋ.”

¹⁹Māsāa̍ bɛ̍ndōo̍ I̍chi̍pī su̍a̍ā ndūa̍a̍ ni̍, nyɛ̄lā ndɔ̄la̍ nya̍a̍na᷄ŋnda̍ su̍a̍ā ā nāŋ nda̍ŋ ni̍, wānāa̍ ndūa̍a̍ ku̍ā o̍ nyɛ̄lā lāŋ chōo̍ wa̍ ni̍, ma̍ tūāl o̍ pēe̍ mɛ̄ŋmā īhɛ᷄llo̍ bɛ̄ŋgu̍, mi̍ Mɛ̄lɛ̄ka̍ Ya̍a̍wɛ̄ɛ̄ mi̍ŋgī nda̍ mɛ̄ŋnda̍ŋ chōo̍. Kɛ̍, wāŋnda̍ I̍sɔ̄lūɛ̄ī nda̍ nda̍, ma̍ kēēkū o̍ lɛ̄ŋndē vēsɛ̍i̍le̍ŋ chōo̍ o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ ma̍ tāŋ.

²⁰Ndu̍yɛ̍ Me̍e̍līām, yēmāa̍ E̍lɔ̄ŋ, wāna̍ su̍a̍ā le̍ Mɛ̄lɛ̄ka̍ wo̍, o̍ wa̍ ni̍. Mi̍ chūa̍a̍ ho̍ō chūā dūndūla̍ pɔ̍mbɔ̄la̍ŋ o̍ bā, mbo̍ sīm wāŋ lāāndūa̍a̍ lāchī. Nda̍ bɛ̍ɛ̍ ā wa̍ a̍ dūndūla̍ ndāla̍ pɔ̍mbɔ̄la̍ŋ o̍ lābā, ma̍ tūāl Me̍e̍līa̍m kɔ̄ɔ̄lī a̍ yōla̍ŋ.

²¹O̍ ko̍ŋ, mi̍ Me̍e̍līām so̍lūl nda̍ chōnde̍i̍ he̍ī āā, “So̍li̍ cho̍nde̍i̍ nāa̍ Mɛ̄lɛ̄ka̍ Ya̍a̍wɛ̄ɛ̄ chūā, kāni̍ fo̍ndōle̍, ō yēm a̍ kpāāya̍ ndɔ̄ bɛ̍ndōo̍. Wānāa̍ ku̍ā o̍ sūa̍a̍ chōo̍ wa̍ ni̍, a̍ su̍a̍ā ndāa̍, mbo̍ vīāū nda̍ o̍ pe̍e̍ mɛ̄ŋmā īhɛ᷄llo̍ ni᷄ŋ.”

²²O̍ ko̍ŋ kɔ̍ɔ̍lī, mi̍ Mūu̍sē fa̍ŋa᷄ŋ a̍ wāŋnda̍ I̍sɔ̄lūɛ̄ī nāa̍ nda̍ wa̍ o̍ Pēē Si̍a̍ŋā Mɛ̄ŋmā Īhɛ᷄llo̍ īkɛ̄i̍ ya̍. Mbo̍ kūā a̍ nda̍ o̍ po̍llo̍ ni᷄ŋ Si̍ɔ̍ɔ̄. Le̍ pālɛ̍i̍ ī ya̍a̍ kpu̍lu̍ku̍u̍ ā chō kɔ̄la̍ŋ o̍ po̍llo̍ ni᷄ŋ, māmɛ̄ŋ bɛ̍ɛ̍ ā se̍e̍lūŋ le̍ kōlɔ̄ɔ̄ le̍.

²³O̍ ko̍ŋ, ma̍ fūūlūū Ma̍a̍lūāā. Mɛ̄ŋnda̍ŋ mā wa̍ o̍ fo̍ndāŋ kōŋ, kɛ̍, mā wa̍ mā lōlɛ̍i̍. Le̍la̍ŋ ā nɔ̄la̍ mā ko᷄l ma̍ŋ te̍. Le̍ mɛ̄ŋmā lōlɛ̍i̍ma̍ wa̍ o̍ fo̍ndāa̍ ho̍ō wa̍ŋ nda̍ ke̍ fo̍ndā kōŋ dīōla̍ŋ ni̍ āā, Ma̍a̍lūāā.[7]

²⁴O̍ ko̍ŋ kɔ̍ɔ̍lī, mi̍ wāŋnda̍ ŋɔ̄ɔ̄chīa̍ŋ nāa̍ Mūu̍sē chūa̍ ma̍ dīmī āā, “Mūu̍sē, vɛ̄ɛ̍nɛ̍ kpe̍e̍kpe̍i̍ na̍a̍ ŋ̄ chō yɛ̄ lōōkū mɛ̄ŋnda̍ŋ sɔ̄lā mī ŋ̄ ko᷄l?”

²⁵O̍ ko̍ŋ, mi̍ Mūu̍sē nyu̍nā Mɛ̄lɛ̄ka̍ Ya̍a̍wɛ̄ɛ̄ dīōm le̍ mālāa̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ chɔ᷅m ndu̍ yɔ̄m pɔ̄mbɔ̄ pūm. Mi̍ Mūu̍sē chūa̍ yɔ̄m ko̍ŋ mbo̍ wōū o̍ mɛ̄ŋmā māŋ ni᷄ŋ, mī mɛ̄ŋnda̍ŋ mā sīmnu᷄ŋ ma̍ kɛ̍ndɛ̄ le̍ kōlɔ̄ɔ̍. Ndu̍yɛ̍, o̍ fo̍ndāŋ kōŋ ko̍ni̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ wānāā ndūa̍a̍ sāwāla̍ ndɔ̄la̍ŋ, a̍ pɛ̄ɛ̄kūlā ndɔ̄la̍ŋ ni̍. Lo̍ŋ ko̍ni̍ o̍ tɔ̍ɔ̍nda̍ŋ nda̍ vɛ̄lɛ̄ ni̍.

²⁶Mi̍ Mɛ̄lɛ̄ka̍ dīmī āā, “Tē lā ya᷄ŋ nīla̍ŋ o̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dīmu̍l nya̍ wo̍ pɛ̍, ndu̍yɛ̍, mī lā tōsa̍ nyɛ᷄ bɛ̍ndā ya̍ o̍ hɔ̄l le̍ tōsāa̍ wo̍, o̍ ko̍ŋ kɔ̍ɔ̍lī, mī lā to̍sa̍ nyɛ̄ sāwāla̍ nīla̍ŋ lā dīmi̍ wo̍ pɛ̍, nāālā ya̍ I̍ tu̍si̍ wāŋnda̍ I̍chi̍pī chōo̍ la̍ŋ ki̍nɛ̍i̍, ō pi᷅lɛ̍ bɛ̍ɛ̍ I̍ do̍ū nya̍ ndu̍ chōo̍ le̍. Kāni̍ fo̍ndōle̍, ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍, Mɛ̄lɛ̄ka̍ si̍ŋgi̍ nya̍ wo̍.”

²⁷O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ hu᷅ŋ Ɛ̍līm, nāa̍ būūlūla̍ māmɛ̄ŋnda̍ŋ lā wa̍ tɔ̍ a̍ lā tīɔ̍ɔ̍ŋ a̍ wāūwa̍ŋ be̍le̍-ŋɔ̍mmɛ̍ū (70) wa̍. O̍ kōŋ, ma̍ chāl lo̍ŋ o̍ mɛ̄ŋmā māŋ īkɛ̄i̍.