Read Southern Kisi Ɛ̍sɔ̍dɔ̍ɔ̄ 17 Bible Online

Ɛ̍sɔ̍dɔ̍ɔ̄ 17 - Southern Kisi bible

Ɛ̍sɔ̍dɔ̍ɔ̄ 17

¹A̍ bōōndi̍i̍ ke̍ŋ, mi̍ wāŋnda̍ I̍sɔ̄lūɛ̄ī ma᷅l nāa̍ nda̍ wa̍ o̍ po̍llo̍ ni᷄ŋ Si᷅ŋ nda̍ ma̍ wā bālɔ̄ɔ̍. Ā chɛ᷄ŋ ba̍ā pɛ̍, ā hīōū ba̍ā. Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ di̍mi̍ ni̍ māā ā fāŋa̍ŋ lo̍ŋ mā hīōū lāchī. Ma̍ kūā ma̍ kɔ̍ ki̍o̍lu̍ dɔ̍ɔ̍ŋgɔ̍ɔ̍ Lu̍ɛ̍fi̍dīm, ma̍ chāl lo̍ŋ. Kɛ̍, mɛ̄ŋmā kōlāā bɛ̍ɛ̍ mā ve̍ o̍ fo̍ndāa̍ ho̍ō le̍.

²O̍ ko̍ŋ, mi̍ wāŋnda̍ a̍ ka̍ndū ŋɔ̄ɔ̄chīa̍ŋnda̍ŋ nāa̍ Mūu̍sē chu̍a̍ le̍ mɛ̄ŋmā kōla᷄ŋ. Ma̍ dīmūl ndu̍ āā, “Mūu̍sē, ke̍ na̍a̍ mɛ̄ŋnda̍ŋ mī ŋ̄ ko᷄l.” Kɛ̍, mi̍ Mūu̍sē di̍mūl nda̍ āā, “Lā vɛ᷅ ŋɔ̄ɔ̄chīa̍ŋnda̍ŋ nu̍a̍ā? Bāā kīīsa᷄ŋndo̍ nya̍ chō vɛ̄lɛ̄ ni̍, māā Mɛ̄lɛ̄ka̍ ō nɔ̍lā mbō tōsa̍ he̍ī le̍?”

³Kɛ̍, ā ye̍ŋ Mūu̍sē lānī le̍, kāni̍ fo̍ndōle̍, kōlɔ̄ɔ̍ wa̍ ni᷅ŋ nda̍ ō bīyāā ta̍u̍. Ma̍ hīāū lāchī a̍ ŋɔ̄ɔ̄chīa̍ŋnda̍ŋ a̍ Mūu̍sē ma̍ dīmī āā, “Ɔ̍ɔ̄ le̍ sa̍bū ŋ̄ kɔ̍ so̍lī na̍a̍ I̍chi̍pī ma̍ hūŋ a̍ na̍a̍ na̍nu᷄ŋ ndo̍? Bāā a̍ ye̍e̍ma̍, na̍a̍ ni̍, chūāūwāā nāa̍ ni̍, a̍ chɔ̄lūāā nāa̍ mī ŋ̄ hu᷄ŋ chu̍ū na̍ŋu᷄ŋ a̍ kōlɔ̄ɔ̄ bīyāa̍?”

⁴O̍ ko̍ŋ, mi̍ Mūu̍sē ko̍ŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chūā mbo̍ dīmī āā, “O̍o̍ Mɛ̄lɛ̄ka̍, ō yɛ̄ɛ̍nɛ̍ kpe̍e̍kpe̍i̍ ya̍ I̍ yɔ᷄ŋ yɛ̍ a̍ wāŋnda̍ ha̍ā? Kāni̍, ā cha᷄l le̍ ya̍ vīī vīī a̍ pōūta̍ŋ mā dīī ya̍.”

⁵Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ, mbo̍ di̍mūl Mūu̍sē āā, “Chu̍a̍ la᷅ŋgba̍ā kālla̍ I̍sɔ̄lūɛ̄ī ā ti᷄ŋ mī lā kūɛ̄ mī lā si᷄m wāŋnda̍ lāchī le̍ kɔ̄la̍ŋ nāa̍ ya̍ cho̍ nya̍ chɔ̄m nda̍. Tē lā wa̍ kɔ̄la̍ŋ pɛ̍, a̍ chu̍a̍ tīnda̍ ŋ̄ lɔ̄ɔ̄ Pēē Bɛ̍ndōo̍ Na̍īl yo̍, ā kūɛ̄ a̍ ndu̍ o̍ bā.

⁶I̍ cho̍ wa̍ īsīsi̍ nya̍ lāchī o̍ pōūwo̍ chōo̍ o̍ Pēmbīī Sa̍a̍nāīve̍ chōo̍. Tē ā kūɛ̄ pɛ̍, a̍ kɔ̍ lɔ̍ɔ̄ pōū kōŋ. Tē ā lɔ̄ɔ̄ pɛ̍, mɛ̄ŋnda̍ŋ mā chō fūla̍ o̍ pōū kōŋ mī wāŋnda̍ ko᷄l.” Ndu̍yɛ̍, nyɛ̄ o̍ nyɛ̄ Mɛ̄lɛ̄ka̍ dīmu̍l Mūu̍sē, le̍ tōsāa̍, mi̍ Mūu̍sē to̍sā ndu̍ lāŋgba̍ā kālla̍ o̍ hɔ̄l lo̍ŋ ma̍ chā. Ndu̍yɛ̍, mi̍ ī yɔ̄nu̍ŋ mɛ̄ɛ̍ Mɛ̄lɛ̄ka̍ dīmi̍ yɛ̍.

⁷Mi̍ Mūu̍sē kɛ̍ fo̍ndāŋ kōŋ dīōla̍ŋ āā, Ma̍sāā, a̍ Mɛ̍lu̍i̍bā. Le̍ mɛ̄ɛ̍ wāŋnda̍ I̍sɔ̄lūɛ̄ī a̍ ŋɔ̄ɔ̄ŋchīa̍ŋ a̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ ma̍ kīīsa᷄ŋ, ma̍ nyūnā āā, “Mɛ̄lɛ̄ka̍ chō hɔ̄lāā tūlu̍ a̍ na̍a̍, ɔ̄ɔ̄ ō chō hɔ̄lāā tūlu̍ a̍ na̍a̍ le̍,” yɛ̍. Le̍la̍ŋ Mūu̍sē ke̍ fo̍ndāŋndo̍ ho̍ō dīōlā tīɔ̍ɔ̍ŋ nda̍ŋ nda᷅ŋ ni̍ āā, Ma̍sāā a̍ Mɛ̍lu̍i̍bā.

⁸Bōōndi̍i̍ wāŋnda̍ I̍sɔ̄lūɛ̄ī a̍ wa̍ Lu̍ɛ̍fi̍dīm nde̍, mi̍ Āma̍la̍kāi̍tīi̍ya̍, hūŋ ma̍ hu᷄ŋ de᷅l nda̍ chōo̍ a̍ sɔ̍ŋgɔ̄ɔ̍.

⁹Mi̍ Mūu̍sē di̍mūl Chɔ̄ɔ̍sūāā āā, “Hɛ̍li̍ so̍vɛ̄i̍ya̍ ā ti᷄ŋ, mā bɛ̄ɛ̄ndīa̍ŋ le̍ kɔ̄la̍ŋ sɔ̍ŋgɔ̄ɔ̍ a̍ Āma̍la̍kāi̍tīi̍ya̍ sīɔ̄ īdīi̍. Ya̍ pi̍la̍ I̍ cho̍ lākɔ̄ mī kɔ̍ si᷅m pēmbēi̍ chōo̍ a̍ tīnda̍ Mɛ̄lɛ̄ka̍ o̍ bā.”

¹⁰O̍ ko̍ŋ mi̍ Chɔ̄ɔ̍sūāā to̍sā mɛ̄ɛ̍ Mūu̍sē di̍mu̍l ndu̍ yɛ̍. Mbo̍ chūā so̍vɛ̄i̍ya̍ ā ti᷄ŋ ma̍ kɔ̍ chīŋa̍la᷅ŋ Āma̍la̍kāi̍tīi̍ya̍ a̍ sɔ̍ŋgɔ̄ɔ̍. Mūu̍sē ni̍, E̍lɔ̄ŋ ni̍, a̍ Hɔ̍ɔ̄, mi̍ nda̍ kūā ma̍ kɔ̍ he̍l o̍ pēmbēi̍ chōo̍ te̍mā.

¹¹Mi̍ Mūu̍sē he̍e̍lu̍ bālāŋ chōo̍ cho̍o̍. Mɛ̄ɛ̍ o̍ he̍e̍lu̍, mi̍ I̍sɔ̄lūɛ̍i̍ya̍ ā hūŋ le̍ Āma̍la̍kāi̍tīi̍ya̍ yōmɔ̄ɔ̄. Kɛ̍ mɛ̄ɛ̍ Mūu̍sē tu̍si̍ bāla̍ŋ, mi̍ Āma̍la̍kāi̍tīi̍ya̍ ā hūŋ le̍ I̍sɔ̄lūɛ̍i̍ya̍ bā tīū.

¹²Mɛ̄ɛ̍ chōŋgu̍la̍ŋ lā sāŋga̍ Mūu̍sē, mi̍ E̍lɔ̄ŋ nda̍ Hɔ̍ɔ̄ a̍ ku̍ā, ma̍ kɔ̍ hu᷅ŋ a̍ pōūwo̍ le̍ mī Mūu̍sē cha᷄l lēchōo̍. Mɛ̄ɛ̍ o̍ cha᷄l lēchōo̍, ma̍ sāā ndu̍ bāla̍ŋ vēllāa̍ vēllē, ma̍ hēēlū. Mɛ̄ɛ̍ ho̍ō sāa̍ bāa̍ ho̍ō, mi̍ ho̍ō sāā bāa̍ o̍ pīlɔ̍ɔ̍. Lā lo̍ le̍nde̍ la̍ he̍e̍lāā ha̍a̍a̍ mi̍ pāa̍le̍ŋ lē dēl.

¹³O̍ ko̍ŋ, mi̍ Chɔ̄ɔ̍sūāā o̍ yām Āma̍la̍kāi̍tīi̍ya̍ nyɛ̄ kɛ̄ndɛ̄ kɛ̍ndɛ̄.

¹⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmūl Mūu̍sē āā, “Po̍o̍nyi̍a̍a̍ nyɛ᷅ yɔ̍nu̍ŋ ho̍ō wo̍ o̍ yāu̍ chōo̍ mbō wa̍ ō kɛ̄sīāā le̍ nya̍ fɛ̍ɛ̍ŋ lo̍o̍nɔ᷄ŋndo̍. Di̍mu̍l Chɔ̄ɔ̍sūāā māā I̍ cho̍ Āma̍la̍kāi̍tīi̍ya̍ yōmɔ̄ɔ̄ mī ba̍su̍ nda̍ tɛ̍ɛ̍, wānā o̍ wānā tu̍i̍ī lɛ̍ ni̍ŋ a̍ nda̍ o̍kɔ̄ɔ̄ le̍.”

¹⁵O̍ ko̍ŋ kɔ̍ɔ̍lī, mi̍ Mūu̍sē ta̍ŋgūl ma̍āŋndo̍. Mbo̍ kē ndu̍ dīōla̍ŋ āā, “Mɛ̄lɛ̄ka̍ Ya̍a̍wɛ̄ɛ̄ cho̍ bēēndi̍ɛ̍ī nūu̍ ni̍.”

¹⁶Mbo̍ dīmī āā, “Lā hēēlu̍ bēēndi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ wo̍ chōo̍ cho̍o̍. Ō chō wā sɔ̍ŋgɔ̄ɔ̍ a̍ Āma̍la̍kāi̍tīi̍ya̍ le̍ fɛ̍ɛ̍ŋ a̍ fɛ̍ɛ̍ŋ.”