Read Southern Kisi Ɛ̍sɔ̍dɔ̍ɔ̄ 18 Bible Online

Ɛ̍sɔ̍dɔ̍ɔ̄ 18 - Southern Kisi bible

Ɛ̍sɔ̍dɔ̍ɔ̄ 18

¹Mūu̍sē, lēfū ndɔ̍ wa̍ Chɛ̍tu̍lō ni̍. Ndu̍yɛ̍ Chɛ̍tu̍lō ko̍ŋ yɛ̍, wānā so̍līāā lāsa̍lāa̍ o̍ wa̍ le̍ wāŋnda̍ Mi̍dīāā ni̍. Mɛ̄ɛ̍ Chɛ̍tu̍lō tu̍e̍ī a̍ nyɛ̄ Mɛ̄lɛ̄ka̍ tōsa̍l Mūu̍sē nda̍ wāŋnda̍ I̍sɔ̄lūɛ̄ī lɔ̄ɔ̍ o̍ so̍li̍ nda̍ I̍chi̍pī wo̍, mbo̍ kūā Mūu̍sē yīlɔ̄ɔ̍.

²Ndu̍yɛ̍ ō wa̍ a̍ te̍le̍ŋ pi᷅lɛ̍, mi̍ Mūu̍sē yɔ̍ŋgū Sīpo̍o̍lūā la̍a̍ ndɔ̄, a̍ po̍ ndɔ̄ɔ̍ le̍ mā wa᷄ Chɛ̍tu̍lō o̍ bɛ̄ŋgu̍ cho̍o̍.

³Mɛ̄ɛ̍ Chɛ̍tu̍lō o̍ wa̍ kɔ̄la̍ŋ nāa̍ Mūu̍sē chu̍a̍, mbo̍ chūā Sīpo̍o̍lūā la̍nɔ̍ɔ̍ Mūu̍sē, nda̍ pūa̍a̍ ndūāā ŋi̍ɔ̍ɔ̍ŋnda̍ mbo̍ kūā a̍ nda̍. Ndu̍yɛ̍ mɛ̄ɛ̍ Mūu̍sē o̍ ve̍lū po̍ ndɔ̄ɔ̍ ō pīlɔ̍ɔ̍, mbo̍ kē ndu̍ dīōla̍ŋ āā, Kɛ̍ɛ̍sīɔ̄ŋ, kāni̍ fo̍ndōle̍, mbo̍ dīmī āā, “I̍ wa̍ mīāllo̍ o̍ lɛ̄ŋndē sūmīālte̍ŋ ni᷄ŋ, mi̍ sɔ̍lā chūāūwa̍.”

⁴Mbo̍ kē vɛ̄lɛ̄ po̍ ndɔ̄ɔ̍ ō pīlɔ̍ɔ̍ dīōla̍ŋ āā, Ɛ̄li̍a̍a̍sā, kāni̍ fo̍ndōle̍, mbo̍ dīmī āā, “Mɛ̄lɛ̄ka̍ fi̍nyā nūu̍ ndu̍ o̍o̍ pi̍ɛ̍ī yo̍, ndu̍ ma̍la̍ ya̍ ni̍, mbo̍ bāŋā ya̍ māsāa̍ I̍chi̍pī o̍ bā I̍ vi̍ le̍.”

⁵Mi̍ Chɛ̍tu̍lō lēfōo̍ Mūu̍sē o̍ chu̍ā Sīpo̍o̍lūā a̍ Mūu̍sē pūa̍a̍ ndūāā ŋīɔ̍ɔ̍ŋnda̍ ha̍ā, ma̍ kūā Mūu̍sē yīlɔ̄ɔ̍ nāa̍ o̍ wa̍ o̍ po̍llo̍ ni᷄ŋ o̍ pēmbīi̍ Mɛ̄lɛ̄kɛ̍i̍ īkɛ̄i̍ ya̍.

⁶Mɛ̄ɛ̍ Chɛ̍tu̍lō wa̍ kɔ̄la̍ŋ, mbo̍ yɔ̄ŋ dīōmnde̍ŋ nāa̍ Mūu̍sē chu̍a̍, mbo̍ dīmūl ndu̍ āā, “Ya̍ Chɛ̍tu̍lō le̍fū nūm ni̍, la̍a̍ nu̍m ni̍, a̍ pūa̍a̍ nu̍m ā ŋīɔ̍ɔ̍ŋnda̍, ŋ̄ chō nu̍m hūnɔ̄ɔ̍ yīlɔ̄ɔ̍.”

⁷O̍ ko̍ŋ, mi̍ Mūu̍sē ku̍ā lēfū ndɔ̍ dēmūllo̍. Mɛ̄ɛ̍ nda̍ bɔ̄ŋa᷅ŋ, mi̍ Mūu̍sē tu̍ndu᷄ŋ lēfū ndɔ̄ o̍ lābɛ̄ŋgu̍ ni᷄ŋ le̍ ndu̍ bɛ̄ɛ̄le̍ŋ kīo̍o̍, mbo̍ dēmūl ndu̍, mbo̍ sɔ̄sā ndu̍ kūu̍wo̍. Mɛ̄ɛ̍ nda̍ yīla᷅ŋ, ma̍ nyūūni̍āŋ tē ā chō kɛ̄ndɛ̄ vēllāa̍ vēllē. Ma̍ kūā o̍ tɛ̍ndīi̍ Mūu̍sē wo̍ ni᷄ŋ.

⁸Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ to̍sa̍ a̍ māsāa̍ I̍chi̍pī nda̍ wānāā ndūa̍a̍, mi̍ Mūu̍sē do̍u̍nu̍ŋ le̍fū ndɔ̄ ko̍na̍ kpo̍u̍. Ndu̍yɛ̍, mbo̍ dōōnu᷄ŋ ndu̍ vɛ̄lɛ̄ ko̍na̍ a̍ sɔ̄ɔ̍ŋ pa̍la̍ŋ ko̍ma̍l nda̍ nɛ̄ī tɛ̍ɛ̄ŋ, ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ so̍lī nda̍ lēni᷄ŋ ndo̍ŋ.

⁹Mɛ̄ɛ̍ Chɛ̍tu̍lō tu̍e̍ī a̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ to̍sa̍ le̍ I̍sɔ̄lūɛ̍i̍ya̍ sōlīo̍o̍ o̍ chɛ̄le̍ŋ ni᷄ŋ I̍chi̍pī, mbo̍ nāŋ kɔ̄l bu̍tē.

¹⁰Mbo̍ dīmī āā, “Sāŋgālāa̍ chō nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, Mɛ̄lɛ̄ka̍ ba̍ŋa̍ nu̍mndo̍. Sāŋgālāa̍ chō nāa̍ Mɛ̄lɛ̄ka̍ chūā, o̍ ba̍ŋa̍ wānāā ndūa̍a̍ māsā bɛ̄ndōo̍ I̍chi̍pī nda̍ wānāā ndūa̍a̍ o̍ bā wo̍.

¹¹I̍ si̍na̍ ni᷅ŋ kpe̍e̍kpe̍i̍ māā Mɛ̄lɛ̄ka̍ Ya̍a̍wɛ̄ɛ̄ hi̍o̍ū kpāāyā a̍ mɛ̄lɛ̄ka̍ā chēle̍ŋnda̍ kpo̍u̍. Ō chɔ᷄m he̍ī kpe̍nde̍ke̍le̍ a̍ nyɛ̄ o̍ to̍sa̍ a̍ wānāa̍ wa̍ ha̍ā I̍sɔ̄lūɛ̍i̍ya̍ bīyɔ̄ɔ̄ kɔ̄l vēsɛ̍i̍ bɛ̍ndōo̍ wa̍ wo̍.”

¹²O̍ ko̍ŋ kɔ̍ɔ̍lī, mi̍ Chɛ̍tu̍lō, lēfōo̍ Mūu̍sē so̍lī sa̍lā lūāmāa̍ a̍ sa̍lālā yɔ̄ŋāālā chēle̍ŋ nda̍ŋ o̍ Mɛ̄lɛ̄ka̍ lo̍. E̍lɔ̄ŋ ni̍, a̍ lāŋgba̍ā kālla̍ I̍sɔ̄lūɛ̄ī kpo̍u̍, ma̍ hūŋ le̍ nyɛ̄ dīāā sa̍lāa̍ ho̍ō dīo̍ lātūlu̍ nda̍ lēfōo̍ Mūu̍sē wa̍ā Mɛ̄lɛ̄ka̍ lāchī.

¹³Dīi̍mā ndɔ̄ɔ̍ mɛ̄ɛ̍ pāa̍le̍ŋ lē sɛ̄, mi̍ Mūu̍sē cha᷅l wāŋnda̍ sɔ̄ɔ̍ŋ dīmīo̍o̍ tɛ̍ɛ̄ŋ māā pāāndū. Mi̍ wāŋndā sīm ma̍ bālū ndu̍ si̍lɔ̍. Kāndɔ᷄ŋndo̍ īdīi̍yo̍ ha̍a̍a̍ a̍ fīti̍līo̍o̍, Mūu̍sē ō cho̍ sɔ̄ɔ̍ŋ dīmīo̍o̍ wāŋnda̍ tɛ̍ɛ̄ŋ.

¹⁴O̍ ko̍ŋ, mɛ̄ɛ̍ Chɛ̍tu̍lō che᷅ wa̍li̍ kpɛ̍ Mūu̍sē nɔ̍ le̍ tōsāa̍ wo̍, mbo̍ dīmūl ndu̍ āā, “Mūu̍sē, īmāā vɛ̄ɛ̍nɛ̍ ŋ̄ chō yɛ̄ he̍ī wāŋnda̍ tōsāllo̍? Vɛ᷅ mɛ̄ɛ̍ nu̍m pīlɛ̍ kpe̍ mā cha̍l wāŋnda̍ sɔ̄ɔ̍ŋ dīmīo̍o̍ tɛ̍ɛ̄ŋ? Nu̍a̍ wɔ̍ fa̍ŋā ka̍āku̍u̍ wa᷅ nu̍m ō bālāā wo̍, chɔ̍ŋ i̍di̍i̍ ha̍a̍a̍ a̍ fīti̍līo̍o̍.”

¹⁵Mi̍ Mūu̍sē mu̍lī ndu̍ dīōm, mbo̍ dīmī āā, “Kpe̍ku̍ ya̍ nɔ̍ le̍ tōsāa̍ wo̍ ndu̍ cho̍ ko̍ŋ ni̍. Tē wāŋnda̍ yēēma̍ pɛ̍ le̍ mā sīna̍ nyɛ᷄ Mɛ̄lɛ̄ka̍ hɛ̄na̍ŋ nda̍ mā tōsa̍ wo̍, nāa̍ ya̍ chu̍a̍ nda̍ hūŋ ni̍, mī hu̍ŋ nyu̍nāl nda̍ Mɛ̄lɛ̄ka̍ dīōm.

¹⁶Tē wāŋndo̍ nɔ̄ īsɔ̄ɔ̍ nda̍ chāa̍ŋ ndɔ̄ pɛ̍, nāa̍ ya̍ chu̍a̍ nda̍ hūŋ ni̍ mī ya̍a̍si̍a̍a̍ nda̍ tɛ̍ɛ̄ŋ, mī di̍mi̍ ndi̍. Ndu̍yɛ̍, ya̍ ko̍ni̍ nɔ̍ vɛ̄lɛ̄ ni̍ mī chɔ᷄m nda̍ nyɛ̄ sāwāla̍ Mɛ̄lɛ̄ka̍ la̍ŋ lā dīmi̍ wo̍.”

¹⁷O̍ ko̍ŋ, mi̍ Chɛ̍tu̍lō le̍fū ndɔ̄ dīmūl ndu̍ āā, “Nyɛ̄, ŋ̄ chō ho̍ō tōsāa̍ wo̍, ō cho̍ nyɛ̍ kɛ̄ndɛ̄ le̍.

¹⁸Tē a̍ la̍mba̍ŋ he̍ī tōsāa̍ pɛ̍, ā chō dɛ̍nɛ̍ kɔ̍ndɔ̄ɔ̄. Ndu̍yɛ̍, wānāā kālāa̍ bɛ̍ɛ̍ ā chō sāŋgā ta̍u̍ ta̍u̍. Kāni̍, wa̍llo̍ ho̍ō, ō cho̍ wa̍li̍ wānā pi᷅lɛ̍ nɔ̄la̍ tōsā le̍, ō hīōū nu̍m po̍lo̍ŋ.

¹⁹Le̍la̍ŋ, sīlā ya̍ I̍ nɔ̍ le̍ nūm ndo̍, ndu̍ cho̍ ho̍ō ni̍. Mbɔ̄ māā Mɛ̄lɛ̄ka̍ ō māla̍ nu̍m fɔ̍. Ō bɛ̄ndā mī nūm wa̍ sōndō sūa̍a̍ le̍ wāŋnda̍ ha̍ā nāa̍ Mɛ̄lɛ̄ka̍ chūā. Ā hīŋ pɛ̍ a̍ sɔ̄ɔ̍ŋ ndāa̍ŋ nāa̍ nūm chu̍a̍, nūm nyu̍na̍ Mɛ̄lɛ̄ka̍ dīōm le̍ nda̍.

²⁰Ndu̍yɛ̍ mā pɛ̍ɛ̍ku̍ nda̍ sāwāla̍ Mɛ̄lɛ̄ka̍ la̍ŋ, a̍ nyɛ̄ lā di̍mi̍ wo̍. Mā chɔ᷄m nda̍ a̍ pɛ̄ɛ̄kūlā ndɔ̄la̍ŋ o̍kɔ̄ɔ̄. Nyɛ̄ o̍ nyɛ̄ nda̍ nɔ̄ le̍ tōsāa̍, mā chɔ᷄m nda̍ kpo̍u̍.

²¹Le̍la̍ŋ, mɛ̍ɛ̍ndi̍a̍ŋ wāŋnda̍ I̍sɔ̄lūɛ̄ī tɛ̍ɛ̄ŋ, mā hɛ̍li̍ wānāā lēbōlla̍ le̍ wa̍llo̍ ho̍ō. Wānāā nɔ̍ sīōōŋīi̍ Mɛ̄lɛ̄kɛ̍i̍, ma̍ wā wānāā wānā dɔ̍ū tīīnda᷄ŋ o̍ nda̍ ni᷄ŋ, ndu̍yɛ̍, ma̍ wā wānāa̍ bi̍ī lu̍ɛ̍i̍yɔ̄ɔ̄ ni᷄ŋ te̍ wa̍, nda̍ ŋ̄ hɛ̄li̍ ni̍. Mā kɛ̍sɛ̍ nda̍ o̍ ku̍ndāla̍ŋ chōo̍ kpɛ̍ kpɛ̍, ku̍ndā wāa̍ pi᷅lɛ̍ ni̍, ku̍ndā kɛ̄mɛ̄ pi᷅lɛ̍ ni̍, ku̍ndā ŋ̄wāŋ be̍le̍-ŋu̍ɛ̍ɛ̍nu̍ ni̍ a̍ ku̍ndā ŋ̄wāŋ tɔ̍ wo̍.

²²Mī nda̍ wa̍ wāŋnda̍ sɔ̄ɔ̍ŋ pɔ̄mpɔ̍mbɔ᷄m dīmīo̍o̍ tɛ̍ɛ̄ŋ. Īsɔ̄ɔ̍ o̍ īsɔ̄ɔ̍ ko̍ma̍l nda̍ pɛ̍, mā nɔ̄la̍ ndi̍ dīmī le̍, ā hīŋ a̍ ke̍ŋ o̍ nūmndo̍. Ko̍ŋ to̍sā ni̍ mī lā pīɔ̄ūvi̍āŋ wo̍lɔ̄ɔ̄lā lūsu̍lɛ̍i̍la̍ŋ nda᷅ŋ nya̍ nda̍ā vēllāa̍ vēllē. Ndu̍yɛ̍, mī nyɛ̄ o̍ nyɛ̄ kūɛ̄ bɛ̍ɛ̄ŋ bɛ̍ɛ̄ŋ a̍ nūm.

²³Nu̍a̍ā Mɛ̄lɛ̄ka̍ yēēma̍ nu̍m ni̍ mā to̍sa̍. Ndu̍yɛ̍, tē ā to̍sa̍ nu̍a̍ā pɛ̍, ā chō lēbōl pɛ̄ŋgī. Ndu̍yɛ̍, wāŋnda̍ bɛ̍ɛ̍, ā wā ni̍ŋ mi̍i̍ŋgōo̍ o̍ lā nda̍lo̍ ā kɔ̄ltā kɛ̄ndɛ̄.”

²⁴Ndu̍yɛ̍, mi̍ Mūu̍sē ya᷅ŋ nīla̍ŋ o̍ sīlā lēfū ndɔ̄ si̍la̍ ndu̍ wo̍, o̍ ko̍ŋ, mbo̍ tōsā mɛ̄ɛ̍ o̍ di̍mu̍l ndu̍ yɛ̍.

²⁵Mbo̍ mɛ̄ɛ̄ndīa̍ŋ wāŋnda̍ I̍sɔ̄lūɛ̄ī tɛ̍ɛ̄ŋ, mbo̍ hɛ̄li̍ pūa̍a̍ nɔ̍lā mā wa̍ ku̍ndālā yɛ̍ yɛ̍la̍ŋ chīla̍ŋ nda̍. A̍ bɛ̍nda̍ le̍ mā wa̍ wāŋnda̍ wāa̍ ō pi᷅lɛ̍ bōlle̍ŋ nda̍, mbo̍ hāndū ka̍ŋ bo᷅lle̍ŋ, mbo̍ hāndū ā ti᷄ŋ wāŋnda̍ kɛ̄mɛ̄ bōlle̍ŋ, ā ti᷄ŋ, mbo̍ hāndū nda̍ ŋ̄wāŋ be̍le̍-ŋu̍ɛ̍ɛ̍nu̍ bo᷅lle̍ŋ, ā ti᷄ŋ yɛ̍, mbo̍ hāndū nda̍ ŋ̄wāŋ tɔ̍ bo̍lle̍ŋ.

²⁶Wāŋnda̍ ha̍ā, nda̍ wa̍ ni᷅ŋ wāŋnda̍ sɔ̄ɔ̍ŋ dīmīo̍o̍ tɛ̍ɛ̄ŋ ni̍, mā tōōsīāā wāŋnda̍ sɔ̄ɔ̍ŋ pɔ᷅mpɔ̍mbɔ᷄ŋ tɛ̍ɛ̄ŋ. Īsɔ̄ɔ̍ o̍ sɔ̄ɔ̍ ko̍ma̍l nda̍ pɛ̍ mā nɔ̄la̍ ke̍ŋ di̍mī le̍, ā kūɛ̄ a̍ ndi̍ nāa̍ Mūu̍sē chu̍a̍.

²⁷O̍ ko̍ŋ kɔ̍ɔ̍lī, mi̍ Chɛ̍tu̍lō cho̍ŋgu̍ŋ Mūu̍sē le̍fū ndɔ̄, mbo̍ mi̍i̍ŋgū o̍ ndu̍lo̍.