Read Southern Kisi Ɛ̍sɔ̍dɔ̍ɔ̄ 21 Bible Online

Ɛ̍sɔ̍dɔ̍ɔ̄ 21 - Southern Kisi bible

Ɛ̍sɔ̍dɔ̍ɔ̄ 21

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmūl Mūu̍sē āā, “Mūu̍sē, di̍mu̍l wāŋnda̍ I̍sɔ̄lūɛ̄ī māā sāwāla̍ ya̍ Mɛ̄lɛ̄ka̍ yɔ̄ŋgu̍ la̍ŋ, la̍ŋ la̍ cho̍ la̍ŋ ni̍.”

²Tē wāŋndo̍ pēndū Hi̍būlūi̍nɔ̍ chi̍ɔ̍ɔ̍ pɛ̍, chɛ̄ kōŋ, ō nɔ̄ mbō tōsa̍l ndu̍ wa̍llo̍ le̍ wɔ̄sīo̍o̍ŋ ŋɔ᷄mpu᷅m, o̍ ŋɔ᷄mmɛ̍ū wo̍, ō nɔ̄ mbō sɔ̄la̍ bāŋa᷄ŋndo̍ mbō kūɛ̄nu᷄ŋ ō pa̍a̍wā nyɛ᷅ o̍ nyɛ̄ le̍.

³Ndu̍yɛ̍, tē ō wa̍ pɛ̍, māā hūnɔ̄ɔ̄ chɛ̄ kōŋ ō wa̍ wo̍ māā ndu̍ pi᷅lɛ̍ kpe̍ hi᷅ŋ ni̍, māā ō hi᷄ŋ a̍ la̍nɔ̍ kɔ̍ɔ̍lī le̍, tē ō wa̍ vɛ̄lɛ̄ mīīŋgōo̍ pɛ̍, ndu̍ pīlɛ̍ kpe̍ nɔ̍ ni̍ mbō mīīŋgu̍. Kɛ̍, tē ō wa̍ pɛ̍ māā a̍ la̍a̍ndɔ̄ kɔ̍ɔ̍lī o̍ hi᷅ŋ ni̍, tē ō wa̍ mīīŋgōo̍ pɛ̍, nda̍ la̍a̍ndɔ̄ ko̍ŋ nɔ̍ ni̍ mā mīīŋgu̍.

⁴Kɛ̍ ndu̍yɛ̍, tē ō wa̍ pɛ̍ mī wāŋndo̍ pēndū chīɔ̍ɔ̍, mī chɛ̄ kōŋ nɔ̍ la̍nɔ̍ le̍, kɛ̍ mī māsānɔ̍ ndɔ̄ɔ̍ ō ke̍ ndu̍ la̍nɔ̍ɔ̍, ndu̍yɛ̍, mī chɛ̄ kōŋ vēlū chūā a̍ la̍nɔ̍ ko̍ŋ, la̍nɔ̍ ko̍ŋ ni̍, chūāūwāā kāŋ ni̍, le̍ māsānɔ̍ chɛ̄ kōŋ nda̍ wā ni̍. Tē chɛ̄ kōŋ ō wa̍ mīīŋgōo̍ pɛ̍, chūā kōŋ ni̍, chūāūwāā kāŋ ni̍, ō nɔ̍ mbō mīīŋgu̍ a̍ nda̍ le̍.

⁵Kɛ̍ ndu̍yɛ̍, tē ō wa̍ pɛ̍, mī chɛ̄ kōŋ ndu̍ pi̍la̍ di̍mi̍ kpe̍nde̍ke̍le̍ māā, māsānɔ̍ ndɔ̄ɔ̍ ni̍, la̍a̍ndɔ̄ ni̍, a̍ chūāūwāā ndūa̍a̍ māā ō ka̍a̍la̍ nda̍ bɔ̄ɔ̍, ndu̍yɛ̍ māā ō yēēma̍ mbō sɔ̄la̍ bāŋa᷄ŋ te̍,

⁶mɛ̄ɛ̍ chɛ̄ kōŋ, ma̍sānɔ̍ ndɔ̄ɔ̍ nɔ̄ mbō kūɛ̄ a̍ ndu̍ o̍ fo̍ndāŋ nda̍ sōōlūū ya̍ Mɛ̄lɛ̄ka̍ wo̍. Tē ō kūɛ̄ a̍ ndu̍ lo̍ŋ pɛ̍, ō kɔ̍ si̍mī ndu̍ o̍ dīō, ɔ̄ɔ̄ o̍ kēe̍dēi̍ bɛ̄ŋgu̍, wāŋnda̍ kpo̍u̍ o̍ hɔ̄l, ō kɔ̍ bu̍li̍ ndu̍ nīle̍ŋ, le̍ chɔ̄mndo̍ māā chɛ̄ kōŋ ō nɔ̄ ni᷅ŋ mbō sāāŋgi̍a̍l wānā ko̍ŋ le̍ fɛ̍ɛ̍ŋ a̍ fɛ̍ɛ̍ŋ.

⁷“Tē wāŋndo̍ pīsi̍ chūā ndɔ̄ɔ̍, ō la̍a̍ndōo̍ māā chɛ̄ pɛ̍, ō nɔ̍ mbō sɔ̄la̍ bāŋa᷄ŋndo̍ mɛ̄ɛ̍ chɛ̄ wānā pɔ̍nɔ̍ɔ̍ ō sɔ̄lā ba̍ŋa᷄ŋndo̍ yɛ̍ le̍.

⁸Tē ō wa̍ pɛ̍ mī wāŋndo̍ pēndū chɛ̄ lāāndōo̍, mbo̍ yēēma̍ le̍ ndu̍ sīīŋgūūwo̍ la̍a̍ ndɔ̄ pɔ̍mbɔ̄, kɛ̍ mī te̍le̍ŋ fu̍u̍lu̍u̍ mī wānā ko̍ŋ ō hīni̍ lɛ̍ kɔ̄l a̍ chɛ̄ lāāndū kōŋ te̍, mɛ̄ɛ̍ wānā ko̍ŋ ō nɔ̄ mbō tōsa̍ mī chūā kōŋ fi̍nyā ndɔ̄ o̍ pa̍a̍wa̍ nyɛ̄ sɔ̄lāā nda̍ pēndū ndu̍ wo̍. Ndu̍yɛ̍, ō nɔ̍ di̍ mbō pīsi̍ ndu̍ wānāā lēkāa̍wa̍ o̍ bā le̍, kāni̍ fo̍ndōle̍, ndu̍ tɛ̍ɛ̍mbu̍u̍ mɛ̄i̍ wa̍ nda̍ tɛ̄ɛ̄ŋ nda̍ chūa̍a̍ wo̍ ni̍.

⁹Kɛ̍ tē wāŋndo̍ pēndū chɛ̄ lāāndōo̍ pɛ̍, mbō kɛ̄ɛ̄si̍a̍a̍ le̍ po̍ ndɔ̄ɔ̍ chɛ̄ lāāndū kōŋ kīo̍o̍ māā la̍nɔ̍ pɛ̍, mɛ̄ɛ̄ wānā ko̍ŋ o̍ nɔ̍ lɛ̍ mbō chu̍a̍ chūā kōŋ māā chɛ̄ le̍. Ō nɔ̄ ni᷅ŋ mbō chu̍a̍ ndu̍ māā chūā ndɔ̄ vi̍a̍lāā.

¹⁰Kɛ̍ ndu̍yɛ̍, tē wāŋndo̍ chu̍a̍ la̍nɔ̍ che᷅le̍ŋ pɛ̍, wānā ko̍ŋ ō nɔ̄ mbō hīōū lāchī a̍ la̍a̍ ndɔ̍ tāso̍o̍ bīyɔ̄ɔ̍ māā pāāndū. Nyɛ̄ chūɛ̄ɛ̄na᷄ŋ ni̍, nyɛ̄ dīāā ni̍, chīɛ̄īni̍ŋndo̍ ni̍, ō nɔ̄ mbō hīōū lāchī a̍ ndu̍ ndu̍ sɔ̄lāa̍ māā pāāndū.

¹¹Kɛ̍ sɔ̄ɔ̍ŋ sa̍lā yāa̍ wo̍ŋ mu᷅ŋ ki̍nɛ̍i̍, tē wānā ko̍ŋ bēŋga̍ le̍ mu̍ŋ tōsāa̍ le̍ chūā kōŋ pɛ̍, chūā kōŋ ō nɔ̄ di̍ mbō kūɛ̄nu̍ŋ o̍ ndu̍lo̍, ndu̍yɛ̍ ō nɔ̍ mbō pāāwa̍ nyɛ̄ o̍ nyɛ̄ le̍.”

¹²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Wānā o̍ wānā lɔ̍ɔ̄ chāa̍ŋndɔ̍ mbō dīī ndu̍ pɛ̍, wānā ko̍ŋ bɛ̍ɛ̍ ō nɔ̄ mbō sɔ̄la̍ pīɔ̍mndo̍.

¹³Kɛ̍ ndu̍yɛ̍, tē ō wa̍ pɛ̍ māā sūlɛ̍i̍ i̍ hɛ̍lu᷄ŋ wa̍nā ko̍ŋ ni̍, mɛ̄ɛ̍ wānā ko̍ŋ ō nɔ̄ mbō nyāānu̍ŋ o̍ fo̍ndāŋ ya̍ Mɛ̄lɛ̄ka̍ cho̍ hɛ̄lī, le̍ mī wānāā wāā le̍nde̍ a̍ wā lo̍ŋ ndo̍. Ko̍ŋ to̍sā ni̍ wānā ko̍ŋ, ā yɔ᷅ŋ ndu̍ nyɛ̄ o̍ nyɛ̄ le̍.

¹⁴Kɛ̍, tē wāŋndo̍ tūūlu̍ kɔ̄l a̍ chāa̍ŋndɔ̍ pɛ̍, mbō dīī ndu̍ a̍ sīɛ̄lɛ̍i̍ fu̍u̍, wānā ko̍ŋ bɛ̍ɛ̍ ō nɔ̄ mbō sɔ̄la̍ pīɔ̍mndo̍, ā yɔ̍ŋ bɛ̍ɛ̍ mbō nyāānu᷄ŋ mbō kūɛ̄ o̍ ma̍āŋ nu̍u̍, lā nɔ̄ mī lā sōli̍ ndu̍ lo̍ŋ mī lā dīī ndu̍.

¹⁵“Wānā o̍ wānā so̍li̍ bāa̍ mbō lɔ̄ɔ̄ fi̍nyā ndɔ̍ kɛ̄lɛ̄ŋgāā ka̍la̍ ndɔ̍ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍.

¹⁶“Wānā o̍ wānā chi̍i̍mbu̍u̍ wāna̍ chi̍o̍o̍ pɛ̍, mbō kūɛ̄nu᷄ŋ a̍ ndu̍, ō wa̍ wɔ̍ ndu̍ o̍ bā, ō pīsi̍ ndu̍ ni᷅ŋ, tē ā bīī ndu̍ pɛ̍ a̍ ndu̍, ō nɔ̄ mbō sɔ̄la̍ pīɔ̍mndo̍.

¹⁷“Ndu̍yɛ̍, wānā o̍ wāna̍ ye̍i̍ fi̍nyā ndɔ̍ kɛ̄lɛ̄ŋgāā kāla̍ ndɔ̍ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍.

¹⁸“Tē o̍ wa̍ pɛ̍ mī wānāā ŋīɔ̍ɔ̍ŋ ā lo̍ o̍ sɔ̍ŋgɔ̄ɔ̍ ni᷄ŋ, mī ō pīlɔ̄ɔ̍ ō vɛ̄ chāa̍ŋ ndɔ̄ a̍ pōūwo̍, ɔ̄ɔ̄ mbō lɔ̄ɔ̄ ndu̍ a̍ bɔ̄ta̍a̍ mbō yɔ̄ŋu̍l ndu̍, kɛ̍ mī wāna̍ nda̍ yɔ̄ŋu̍l ko̍ŋ ndo̍ ō vi̍ le̍, nyɛ̍ yɔ̍nūŋ ndo̍ ndu̍ cho̍ ho̍ō ni̍. Tē ō wa̍ pɛ̍ mā kūɛ̄ a̍ wāna̍ nda̍ yɔ̄ŋu̍l ko̍ŋ ndo̍ le̍ chīɔ̄ūwo̍, ndu̍yɛ̍ mī wānā ko̍ŋ ō wa̍ ni᷅ŋ bālɔ̄ɔ̍ ō pɔ̄mpɔ̍mbɔ̄ a̍ tīnda̍a̍, pālɛ̍i̍ wānā ko̍ŋ ō tɛ̄ɛ̄mbu̍u̍ ke̍ŋ o̍ chīɔ̄ūwo̍ bɛ̄ŋgu̍ ve̍ ki̍nɛ̍i̍, wāna̍ yɔ̍ŋu̍l ndu̍ ko̍ŋ ndo̍ ō nɔ̄ mbō pāāwa̍ ndu̍ le̍ pālɛ̍i̍ ke̍ŋ. Ndu̍yɛ̍, bɔ̄nɔ̄ o̍ bɔ̄nɔ̄ cho̍ le̍ wānā ko̍ŋ chīɔ̄ūwo̍, wāna̍ yɔ̍ŋūl ko̍ŋ chāa̍ŋ ndɔ̄ wo̍, ndu̍ lu̍ɛ̍ī bɔ̍nɔ̄ ko̍ŋ ni̍.

¹⁹

²⁰“Ndu̍yɛ̍, wānā o̍ wānā chu̍a̍ yɔ̄mndo̍ mbō lɔ̄ɔ̄ chɛ̄ ndɔ̄ la̍a̍ndōo̍, kɛ̄lɛ̄ŋgāā chɛ̄ ndɔ̄ pi̍a̍a̍ndōo̍ mbō dīī ndu̍ pɛ̍, wānā ko̍ŋ, ō nɔ̄ mbō sɔ̄la̍ nyɛ̄ pālāa̍.

²¹Kɛ̍, tē chɛ̄ kōŋ ō vi̍ le̍, mbō chīi̍ pāa̍le̍ŋ lē pīlɛ̍, ɔ̄ɔ̄ pālɛ̍i̍ ŋi̍i̍ŋ mbō chɛ᷄ŋ, chɛ̄ kōŋ māsānɔ̍ ndɔ̄ɔ̍, ō nɔ̍ mbō sɔ̄la̍ dɛ̍nɛ̍ pa̍lāā le̍, kāni̍ fo̍ndōle̍, wa̍lta̍ chɛ̄ kōŋ ndu̍ o̍o̍ nɔ̍ mī ndu̍ o̍o̍ to̍sa̍l ndu̍ la̍ŋ, ō tōsa̍ lɛ̍ la̍ŋ te̍.

²²“Kɛ̍ tē pūa̍a̍ lo̍ sɔ̍ŋgɔ̄ɔ̍ pɛ̍ mā kūndū wāna̍ yo̍llo̍, mī wāna̍ yo᷄l ko̍ŋ ō vīīku̍u̍, kɛ̍ mī nyɛ̄ o̍ nyɛ̄ chēle̍ŋ ō yɔ̄nu̍ŋ a̍ ndu̍ pi̍la̍ le̍, wāna̍ ku̍ndū ndu̍ ko̍ŋ ndo̍, ā nɔ̄ mā kēlū ndu̍ nyɛ̄ sɔ̄lāa̍ chōo̍ mbō pāāwa̍. Ndu̍yɛ̍, nyɛ̄ o̍ nyɛ̄ chūā kōŋ pɔ̍nɔ̍ ndɔ̄ ke̍lū pɛ̍, ndu̍yɛ̍ mi̍ māsāa̍ wa̍ā chɛ̄la᷅ŋ a̍ ndu̍, ndu̍ o̍ nɔ̍ ni̍ mbō pāāwa̍.

²³Ō fūla̍ o̍ vīīkūūwo̍ kɔ̄ɔ̄lī, tē nyɛ̄ o̍ nyɛ̄ chēle̍ŋ yɔ̄nu̍ŋ a̍ chūā kōŋ pɛ̍, wānā ko̍ŋ bɛ̍ɛ̍ ā nɔ̄ mā tōsa̍ le̍nde̍ a̍ ndu̍. Tē chūā kōŋ ō sɔ̄la̍ pīɔ̍mndo̍ pɛ̍, ndu̍ bɛ̍ɛ̍ ō nɔ̄ mbō sɔ̄la̍ pīɔ̍mndo̍.

²⁴Tē hɔ̄lte̍ŋ o̍ pɛ̄l ndu̍ ni̍, ndu̍ bɛ̍ɛ̍ lā pīɔ̍l ndu̍ hɔ̄lte̍ŋ. Tē chīŋnde̍ o̍ bɛ̍ŋi̍ ndu̍ ni̍, ndu̍ bɛ̍ɛ̍, lā bɛ̄ŋi̍ ndu̍ chīŋnde̍. Tē bāa̍ kɛ̄lɛ̄ŋgāā pēlēi̍ o̍ ye᷅m ndu̍ ni̍, ndu̍ bɛ̍ɛ̍, lā yo᷄m ndu̍ bāa̍ ɔ̄ɔ̄ pēlēi̍.

²⁵Ndu̍yɛ̍, tē lōmɔ̄ɔ̍ o̍ lo᷄m ndu̍ ni̍, ndu̍ bɛ̍ɛ̍, lā lo᷄m ndu̍. Tē ō yɔ̄ŋu̍l ndu̍ pɛ̍, ndu̍ bɛ̍ɛ̍, lā yɔ̄ŋu̍l ndu̍. Tē ō sōli̍ ndu̍ bu̍lu̍ŋnda̍ŋ pɛ̍, ndu̍ bɛ̍ɛ̍ lā sōli̍ ndu̍ bu̍lu̍ŋnda̍ŋ.

²⁶“Ndu̍yɛ̍, tē wāŋndo̍ lɔ̄ɔ̄ chɛ̄ ndɔ̄ la̍a̍ndōo̍, kɛ̄lɛ̄ŋgāā chɛ̄ ndɔ̄ pi̍a̍a̍ndōo̍ mbō pɛ̄l ndu̍ hɔ̄lte̍ŋ pɛ̍, chɛ̄ kōŋ ō nɔ̄ mbō sɔ̄la̍ mālɔ̄ɔ̍ mbō kūɛ̄nu᷄ŋ, fo̍ndōle̍, le̍ hɔ̄ltē ndɔ̄le̍ nda̍ pɛ̄l te̍ŋ.

²⁷Ndu̍yɛ̍, tē chīŋnde̍ o̍ bɛ̍ŋi̍ chɛ̄ kōŋ ni̍, mɛ̄ɛ̍ wānā ko̍ŋ, ō ma̍l chɛ̍ kōŋ mbō kūɛ̄nu᷄ŋ fo̍ndō, le̍ chīŋīī ndūɛ̍i̍ o̍ bɛ̍ŋi̍ ndu̍ ve̍.”

²⁸Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Tē nāūwo̍ kūndū wāŋndo̍ pɛ̍ mbō dīī ndu̍, nāū kōŋ bɛ̍ɛ̍ lā nɔ̄ mī lā vīī vi̍i̍ ndu̍ a̍ pōūta̍ŋ mbō vī. Ndu̍yɛ̍, tē ō vī pɛ̍, wānā o̍ wānā nɔ̍ mbō dē nāū kōŋ te̍. Ndu̍yɛ̍, lā yɔ᷅ŋ wāna̍ nɔ̍ nāū kōŋ ndo̍ nyɛ̄ o̍ nyɛ̄ le̍.

²⁹Kɛ̍ ndu̍yɛ̍, tē ō wa̍ pɛ̍ māā nāūwo̍ ho̍ō māā ka̍ā ndɔ̄ pa̍a̍ndōo̍ cho̍ ko̍ŋ ni̍, ndu̍yɛ̍, māā ā dīmu̍l ni᷅ŋ wāna̍ nāū kōŋ pāāndū kɛ̍ mbō bēe̍ na̍ū ndɔ̄ɔ̍ le̍, mbō lo̍ o̍ ko̍ŋ mī nāū kōŋ kūndū wānā mbō dīī ndu̍ pɛ̍, nāū ko̍ŋ, ā nɔ̄ mā vi̍i̍ ndu̍ a̍ pōūta̍ŋ mbō vī. Ndu̍yɛ̍, wāna̍ nɔ̍ nāū kōŋ ndo̍ bɛ̍ɛ̍ ō nɔ̄ mbō sɔ̄la̍ pīɔ̍mndo̍.

³⁰Kɛ̍ ndu̍yɛ̍, tē wānāā hɔ̍ɔ̍wa̍ ā yīya̍ŋ ndu̍ chōo̍ pɛ̍, mā kēlū ndu̍ nyɛ̄ chōo̍ le̍ dīyɔ̄ɔ̄ nāū ndɔ̄ɔ̍ ō dīī hɔ̍ɔ̍ ndāa̍ wo̍ pɛ̍, ō nɔ̄ kūēē mbō yɔ̄ŋgu̍ nyɛ̄ kōŋ, le̍ yōōmū ndɔ̄ɔ̍ bāŋāa̍.

³¹Ndu̍yɛ̍, sāwāa̍ ho̍ō ā yɔ᷄ŋ bɛ̍ɛ̍ āā chūāāmbɔ̄ pɔ̄mbɔ̄ɔ̍ nāūwo̍ dīī ni̍, le̍nde̍ ko̍ni̍ i̍ nɔ̍ ni̍ mī ī yɔ̄nu̍ŋ.

³²Ndu̍yɛ̍, tē nāū wāŋndo̍ ō dīī chɛ̄ pi̍la̍a̍ pɛ̍, chɛ̄ wa̍nā la̍nɔ̍ ni̍, chɛ̄ wa̍nā pɔ̍nɔ̍ ni̍, nūm wāna̍ nāū kōŋ ā nɔ̄ mā pāāwa̍ chɛ̄ ko̍ŋ māsānɔ̍ ndɔ̄ɔ̍ ka̍ni̍ŋ hu̍mbo᷄ŋ[10] be̍le̍-ya̍a̍ le̍ dīyɔ̄ɔ̄ nāū nūmndo̍ ō dīī chɛ̄ ndɔ̄ɔ̍ wo̍. O̍ ko̍ŋ, mī lā mūli᷄ŋ mī lā vīī vi̍i̍ nāū kōŋ a̍ pōūta̍ŋ mbō vī.

³³“Tē wāŋndo̍ fāŋa̍ kūmbōo̍ o̍ so̍o̍ŋndo̍ sōndōo̍ pɛ̍, ɔ̄ɔ̄ mbō tōū so̍o̍ŋndo̍ mbō hēndu̍ kūmbōo̍ le̍chōo̍ le̍, mbō lo̍ o̍ ko̍ŋ mī nāū wāŋndo̍, kɛ̄lɛ̄ŋgāā mī sōfɛ̍lɛ̍ wāŋndo̍ ō de᷄l lēni᷄ŋ mbō vī pɛ̍,

³⁴wānā nɔ̍ so̍o̍ŋ ko̍ŋ ndo̍ ō nɔ̄ mbō pāāwa̍ le̍ chɔ̄lū pi̍la̍a̍, mī chɔ̄lū vīlɛ̍i̍ ko̍ŋ lo᷄ mīāl ndɔ̄.

³⁵Tē wāŋndo̍ nāū ndɔ̄ɔ̍ dīī nāū pi̍la̍a̍ pɛ̍, wānāa̍ nɔ̍ nāūwa̍ ha̍ā wa̍, ā nɔ̄ mā pīsi̍ nāu̍ di̍ī ko̍ŋ chāa̍ŋ ndɔ̄ wo̍, nda̍ ŋīɔ̍ɔ̍ŋ mā pīɔ̄ūvi̍āŋ nyɛ̍ sɔ̄lāa̍ kōŋ kpɛ̍nji̍. Ndu̍yɛ̍, nāū vīlɛ̍i̍ ko̍ŋ bɛ̍ɛ̍, ā nɔ̄ mā pīɔ̄ūvi̍āŋ ndu̍ nda̍ ŋīɔ̍ɔ̍ŋ kpe̍ŋ kpe̍ŋ.

³⁶Kɛ̍, tē wāŋndo̍ nɔ̄ nāūwo̍ pɛ̍, mbō sīna̍ māā nāū īyōlāa̍ o̍ cho̍ ni̍, ndu̍yɛ̍, mbō bēe̍ ndu̍ le̍, chɔ̄lū o̍ chɔ̄lū nāū kōŋ ō dīī pɛ̍, wānā nāū kōŋ ō nɔ̄ mbō mīŋgi̍ chɔ̄lū kōŋ sɔ̍ŋgɔ̍, mī ndu̍ lo̍o̍ chɔ̄lū vīlɛ̍i̍yo̍.”