Read Southern Kisi Ɛ̍sɔ̍dɔ̍ɔ̄ 26 Bible Online

Ɛ̍sɔ̍dɔ̍ɔ̄ 26 - Southern Kisi bible

Ɛ̍sɔ̍dɔ̍ɔ̄ 26

¹Mi̍ Mɛ̄lɛ̄ka̍ hīāū lāchī a̍ sūɛ̍i̍ nāa̍ Mūu̍sē chu̍a̍ mbo̍ dīmī āā, “Lā nɔ̄ mī lā tēŋgu̍l la̍ tɛ̍ndīi̍yo̍[11] a̍ kōlā kɛ̍ndɛ̄ kɛ̍ndɔ̄ɔ̍ pɛ̄ŋgɔ̍ŋ tɔ̍. Kōlāa̍ ho̍ō ō nɔ̄ mbō wa᷄ ō tōōsīāā a̍ fūŋi̍i̍ kpe̍e̍ndɛ̄i̍, mī lā kēēku̍ fūŋi̍i̍ yɛ̍ yɛ̍i̍ o̍ ko̍lāa̍ ho̍ō ni᷄ŋ, fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍i̍, a̍ fūŋi̍i̍ si̍a̍ŋɛ̄i̍. Ndu̍yɛ̍, mī lā hɔ̄ū nyāā lākūmba᷅ŋnda̍ o̍ kōlāla̍ŋ nda᷅ŋ chōo̍ kpo̍u̍.

²Pɛ̄ŋgɛ̍ŋ tɔ̍ wo̍ŋ mu᷅ŋ, ŋ̄ nɔ̄ mī ŋ̄ wa᷄ kpɛ̍ŋnji̍, ī kɛ᷅ o̍ kɛ᷅, ī nɔ̄ mī ī wa᷄ bāndēi̍ le̍ nɛ̄īyo̍ be̍le̍-hi̍ɔ̍ɔ̍lu̍ a̍ lē dīi̍ŋ, bu̍o̍o̍, nɛ̄īyo̍ lē ŋɔ᷄mpu᷅m.

³Ndu̍yɛ̍, kōlāa̍ ho̍ō, lā nɔ̄ mī lā sɔ̄ndū ndu̍ kōlāla̍ŋ lā tīɔ̍ɔ̍ŋ, ho̍ō pɛ̄ŋgɔ̍ŋ ŋ̄ ŋūɛ̍ɛ̍nu̍, ho̍ō pɛ̄ŋgɔ̍ŋ ŋ̄ ŋūɛ̍ɛ̍nu̍.

⁴Kōlāla̍ ti̍ɔ̍ɔ̍ŋnda̍ŋ nda᷅ŋ, ō kɛ᷅ o̍ kɛ᷅, ō nɔ̄ mbō nɔ̄ kpɛ̍ɛ̍la̍ŋ lā yīyāā be̍le̍-ŋu̍ɛ̍ɛ̍nu̍ o̍ kpēŋgo᷄ŋ, le̍ la̍ŋ bɔ̄ŋāa̍ nāa̍ pi᷅lɛ̍. Ndu̍yɛ̍, kpɛ̍ɛ̍la̍ŋ nda᷅ŋ, lā nɔ̄ mī lā wa̍ lā tōōsīāā ā kōlā bu᷅li̍īyo̍.

⁶Ndu̍yɛ̍, mī lā tōōsi̍a̍a̍ do̍lu̍ŋu̍ŋ ŋ̄ko̍o̍līi̍yo̍ŋ, be̍le̍-ŋu̍ɛ̍ɛ̍nu̍, le̍ wōūwo̍ o̍ kpɛ̍ɛ̍la̍ŋ nda᷅ŋ ni᷄ŋ le̍ kōlāla̍ ti̍ɔ̍ɔ̍ŋnda̍ŋ nda᷅ŋ bɔ̄ŋāa̍ vēllāa̍ vēllē, le̍ mbō sīmnu᷄ŋ nyɛ᷅ pīlɛ̍.

⁷“O̍ ko̍ŋ kɔ̍ɔ̍lī, lā nɔ̄ vɛ̄lɛ̄ mī lā tōōsi̍a̍a̍ kōlā che᷅le̍ŋ pɛ̄ŋgɔ̍ŋ tɔ̍ a̍ ī pīlɛ̍ a̍ yīīŋīī chūīŋnda̍ le̍ kūmbɔ̄ɔ̍ o̍ tɛ̍ndīi̍yo̍ ho̍ō chōo̍.

⁸Ndu̍yɛ̍ pɛ̄ŋgɛ̍ŋ tɔ̍ a̍ ī pīlɛ̍ wo̍ŋ mu᷅ŋ, ŋ̄ nɔ̄ mī ŋ̄ wa᷄ kpɛ̍ŋji̍, ī kɛ᷅ kɛ᷅, ī nɔ̄ mī ī wa᷄ bāndēi̍ nɛ̄īyo̍ be̍le̍-hi̍ɔ̍ɔ̍lu̍ a̍ lē ŋu̍ɛ̍ɛ̍nu̍, bu̍o̍o̍, nɛ̄īyo̍ lē ŋɔ᷄mpu᷅m.

⁹Ndu̍yɛ̍, kōlāa̍ ho̍ō, lā nɔ̄ mī lā sɔ̄ndū ndu̍ kōlāla̍ŋ lā tīɔ̍ɔ̍ŋ, ho̍ō pɛ̄ŋgɔ̍ŋ ŋ̄ ŋūɛ̍ɛ̍nu̍, ho̍ō pɛ̄ŋgɔ̍ŋ ŋ̄ ŋɔ᷄mpu᷅m. Ndu̍yɛ̍ kōla̍ nɔ̍ pɛ̄ŋgɛ̍ŋ ŋɔ̍mpu᷅mndo̍ŋ ndo̍, ō chō hīōūwɔ̄ɔ̄ mbō tōl o̍ tɛ̍ndīi̍yo̍ sōndōo̍, lā nɔ̄ mī lā kpūlu̍ŋa̍ ndu̍ mī lā mīŋgi̍ ndu̍ pɛ̄ŋgɛ̄lā o̍ tɛ̍ndīi̍yo̍ chōo̍.

¹⁰Kōlāla̍ ti̍ɔ̍ɔ̍ŋnda̍ŋ nda᷅ŋ, ō kɛ᷅ o̍ kɛ̄ ō nɔ̄ mbō nɔ̄ kpɛ̍ɛ̍la̍ŋ lā yīyāā be̍le̍-ŋu̍ɛ̍ɛ̍nu̍ o̍ kpēŋgo᷄ŋ, le̍ la̍ŋ bɔ̄ŋāa̍ nāa̍ pi᷅lɛ̍.

¹¹Ndu̍yɛ̍, mī lā tōōsi̍a̍a̍ do̍lu̍ŋu̍ŋ ŋ̄būlɔ̍ŋsīi̍yo̍ŋ be̍le̍-ŋu̍ɛ̍ɛ̍nu̍, le̍ wōūwo̍ o̍ kpɛ̍ɛ̍la̍ŋ nda᷅ŋ ni᷄ŋ le̍ kōlāla̍ ti̍ɔ̍ɔ̍ŋnda̍ŋ nda᷅ŋ bɔ̄ŋāa̍ vēllāa̍ vēllē, le̍ mbō sīmnu᷄ŋ ko̍lāa̍ ō pīlɛ̍.

¹²Tē lā kūmbū tɛ̍ndīi̍yo̍ ho̍ō pɛ̍, kōlāla̍ nya̍ chō ndu̍ la̍ŋ ku̍mbɔ̄ɔ̄ la̍ŋ, ō ti᷄ŋ nɔ̄ mbō tōl tɛ̍ndīi̍yo̍ a̍ mākɔ̄ɔ̄ mbō wa᷄ ō lānda᷄ŋ,

¹³mī ō ti᷄ŋ de᷄l o̍ tɛ̍ndīi̍yo̍ kpēŋgo᷄ŋ vēllāa̍ vēllē. O̍ cho̍ ko̍ŋ de̍lɔ̄ɔ̄ o̍ tɛ̍ndīi̍yo̍ kpēŋgo̍ŋ vēllāa̍ vēllē wo̍, ō kɛ᷅ kɛ᷅, ō nɔ̄ mbō wa᷄ bānde̍i̍ le̍ nɛ̄īyo̍ lē pīlɛ̍ a̍ tɛ̄ndāa̍ tɛ̍ɛ̄ŋ.

¹⁴“Ndu̍yɛ̍ lā nɔ̄ vɛ̄lɛ̄ mī lā bɛ̄ɛ̄ndi̍a̍a̍ yāu̍la̍ chɔ̄lūa̍a̍ lā tīɔ̍ɔ̍ŋ, yāu̍la̍ sāā nda̍ bɛ̄ɛ̄ndīāā nɛ̍ŋgbɛ̄lɛ̍ la̍ŋ, a̍ yāu̍la̍ chūīŋnda̍, le̍ tɛ̍ndīi̍yo̍ ho̍ō chɔ̄ɔ̄lōo̍ kūmbɔ̄ɔ̍.

¹⁵“O̍ ko̍ŋ kɔ̍ɔ̍lī, lā nɔ̄ vɛ̄lɛ̄ mī lā tōōsi̍a̍a̍ da̍kpe̍ŋnda̍ŋ a̍ yɔ̄m āke̍e̍sīāā wo̍ le̍ tɛ̍ndīi̍yo̍ ho̍ō.

¹⁶Da̍kpe̍ŋnda̍ŋ nda᷅ŋ, ō kɛ᷅ o̍ kɛ̄ ō nɔ̄ mbō wa̍ hēlɔ̄ɔ̍ le̍ nɛ̄īyo̍ tɔ̍ a̍ le̍ ŋu̍ɛ̍ɛ̍nu̍, bu̍o̍o̍, nɛ̄īyo̍ lē dīi̍ŋ a̍ i̍ŋchi̍sīi̍la̍ŋ lā yāa̍.

¹⁷Ndu̍yɛ̍, da̍kpe̍ŋnda̍ŋ nda᷅ŋ, ō kɛ᷅ o̍ kɛ̄ ō nɔ̄ mbō nɔ̄ yɔ̄mnde̍ ī ŋīi̍ŋ le̍ ndu̍ bɔ̄ŋāa̍ a̍ chāa̍ŋ ndɔ̄. Da̍kpe̍ŋnda̍ŋ nda᷅ŋ kpo̍u̍, nu̍a̍ā la̍ nɔ̍ ni̍ mī lā wa̍ lā tōōsīāā.

¹⁸Da̍kpe̍ŋnda̍ŋ nda᷅ŋ, lā nɔ̄ mī lā wōu̍ la̍ŋ o̍ tɛ̍ndīi̍yo̍ bā tōūwo̍ bi̍dīi̍ŋ.

¹⁹Ndu̍yɛ̍ mī lā bɛ̄ɛ̄ndi̍a̍a̍ nyɛ̄la̍ŋ be̍le̍-hi̍ɔ̍ɔ̍lu̍ a̍ ka̍ni̍i̍ hu̍mbūe̍i̍, le̍ da̍kpe̍ŋnda̍ bi̍dīi̍ŋ nda̍ŋ nda᷅ŋ sīmīo̍o̍ lēni᷄ŋ, da̍kpe̍ŋ o̍ da̍kpe̍ŋ lā tīɔ̍ɔ̍ŋ, ba̍ā ō pīlɛ̍, ba̍ā ō pīlɛ̍.

²⁰Ndu̍yɛ̍ da̍kpe̍ŋnda̍ŋ nda᷅ŋ lā nɔ̄ vɛ̄lɛ̄ mī lā wōu̍ bi̍dīi̍ŋ o̍ tɛ̍ndīi̍yo̍ bā lūāŋndo̍.

²¹Ndu̍yɛ̍ la̍ŋ bɛ̍ɛ̍, lā nɔ̄ mī lā bɛ̄ɛ̄ndi̍a̍a̍ nyɛ̄la̍ŋ be̍le̍-hi̍ɔ̍ɔ̍lu̍ a̍ ka̍ni̍i̍ hu̍mbūe̍i̍, le̍ la̍ŋ sīmīo̍o̍ lēni᷄ŋ. Ō kɛ᷅ o̍ kɛ̄, ō nɔ̄ mbō nɔ̄ nyɛ̄lā sīmīāā lēni᷄ŋ nda̍ŋ nda᷅ŋ lā tīɔ̍ɔ̍ŋ, ba̍ā ō pīlɛ̍, ba̍ā ō pīlɛ̍.

²²O̍ ko̍ŋ kɔ̍ɔ̍lī, ō tɛ̍ndīi̍yo̍ ho̍ō a̍ mākɔ̄ɔ̄ bā pāa̍le̍ŋ lē dēllo̍, da̍kpe̍ŋnda̍ŋ lā nɔ̄ mī lā wa᷄ lā wōūwāā lo̍ŋ lā ŋɔ̍mpu᷅m.

²³Ndu̍yɛ̍, tɛ̍ndīi̍yo̍ ho̍ō o̍ sɔ̍ŋgi̍la̍ ndɔ̄la̍ŋ a̍ mākɔ̄ɔ̄, lā nɔ̄ mī lā tōōsi̍a̍a̍ da̍kpe̍ŋnda̍ŋ lā tīɔ̍ɔ̍ŋ.

²⁴Ndu̍yɛ̍ da̍kpe̍ŋnda̍ŋ nda᷅ŋ, lā nɔ̄ mī lā wa᷄ lā bɔ̄ŋāā lēbɛ̄ŋgu̍ na̍a̍ pi᷅lɛ̍. Lēchōo̍ bɛ̍ɛ̍ le̍nde̍ ko̍ni̍, la̍ nɔ̍ ni̍ mī lā wa᷄ lā bɔ̄ŋāā nāa̍ kēlɛ̄i̍ tāse̍i̍ ī chō wa̍. Nu̍a̍ā nya̍ nɔ̄ ni̍ mī lā tōōsi̍a̍a̍ da̍kpe̍ŋnda̍ŋ nda᷅ŋ.

²⁵Mɛ̄ɛ̍ fa̍ū fa̍ū, da̍kpe̍ŋnda̍ŋ nda᷅ŋ lā nɔ̄ mī lā wa᷄ lā wōūwāā o̍ tɛ̍ndīi̍yo̍ ho̍ō a̍ mākɔ̄ɔ̄ lā ŋɔ̄ma̍a̍. Ndu̍yɛ̍ da̍kpe̍ŋnda̍ŋ nda᷅ŋ lā nɔ̄ mī lā nɔ̄ nyɛ̄lā la̍ si᷅m le̍ni᷄ŋ nda̍ŋ tɔ̍ a̍ lā ŋɔ᷄mpu᷅m, ō kɛ᷅ o̍ kɛ̄ nyɛ̄lā sīmāā lēni᷄ŋ nda̍ŋ lā tīɔ̍ɔ̍ŋ, lā tōōsīāā a̍ ka̍ni̍i̍ hu̍mbūe̍i̍.

²⁶“Ndu̍yɛ̍ lā nɔ̄ mī lā tōōsi̍a̍a̍ yɔ̄mīī vīlɛ̄īye̍ a̍ yɔ̄m āke̍e̍sīāā wo̍, ī ŋūɛ̍ɛ̍nu̍ le̍ wōūwo̍ o̍ da̍kpe̍ŋnda̍ cho̍ o̍ tɛ̍ndīi̍yo̍ kpēŋgēi̍ pīlɛ̍i̍ la̍ŋ,

²⁷ī ŋūɛ̍ɛ̍nu̍ vɛ̍lɛ̄ le̍ wōūwo̍ o̍ da̍kpe̍ŋnda̍ cho̍ kpēŋgēi̍ pīlɛ̍i̍ la̍ŋ, ī ŋūɛ̍ɛ̍nu̍ vɛ̍lɛ̄, le̍ wōūwo̍ o̍ da̍kpe̍ŋnda̍ŋ o̍ tɛ̍ndīi̍yo̍ a̍ mākɔ̄ɔ̄, bā pāa̍le̍ŋ lē dēl lo̍.

²⁸Yɔ̄mīī ŋūɛ̍ɛ̍nu̍i̍i̍ nya̍ chō he̍ī wōū le̍ da̍kpe̍ŋnda̍ la̍ŋ sāa̍ ve̍, yɔ̄mndo̍ ō pīlɔ̍ɔ̍ nɔ̄ mbō wa᷄ ō hōlāā o̍ da̍kpe̍ŋnda̍ la̍ŋ chɔ̍ŋ kpe̍ŋge̍i̍ ī pīlɛ̍i̍ o̍ tɛ̍ndīi̍yo̍ mbō fūūlu̍u̍ kpēŋgēi̍ ī pīlɛ̍i̍ di̍.

²⁹Da̍kpe̍ŋnda̍ŋ nda᷅ŋ, lā nɔ̄ mī lā kūmbū la̍ŋ kpo̍u̍ a̍ ko̍o̍līi̍ye̍. Ndu̍yɛ̍ yɔ̄mīī vīlɛ̄i̍ nɔ̍ ke̍ŋ mī ī wa᷄ māā lākpɔ̄lɔ̄ŋnde̍ bɛ̍ɛ̍, lā nɔ̄ mī lā kūmbū ndi̍ a̍ ko̍o̍līi̍ye̍. O̍ ko̍ŋ kɔ̍ɔ̍lī, mī lā wōu̍ kēla᷄ŋ ŋ̄ko̍o̍līi̍yo̍ŋ o̍ da̍kpe̍ŋnda̍ la̍ŋ, le̍ yɔ̄mīī vīlɛ̄ī kēŋ wōūwo̍ lēni᷄ŋ.

³⁰Tɛ̍ndīi̍yo̍ ho̍ō, mɛ̄ɛ̍ ya̍ I̍ chɔ̍m nu̍m ndu̍ ō tūūlāā o̍ pēmbēi̍ he̍ī chōo̍ le̍ ndu̍ tāŋgūllo̍ yɛ̍, le̍nde̍ nya̍ nɔ̍ ni̍ mī lā tāŋgu̍l ndu̍.

³¹“O̍ ko̍ŋ kɔ̍ɔ̍lī, mī lā tōōsi̍a̍a̍ kōlā kɛ̍ndɛ̄ kɛ̍ndɔ̄ɔ̍ a̍ fūŋi̍i̍ kpe̍e̍ndɛ̄i̍, ndu̍yɛ̍ mī lā kēēku̍ fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍i̍, a̍ fūŋi̍i̍ si̍a̍ŋɛ̄i̍ lēni᷄ŋ. Ndu̍yɛ̍, mī lā hɔ̄ū nyāā lākūmba᷅ŋnda̍ lēchōo̍ kpo̍u̍.

³²Ndu̍yɛ̍, mī tōōsi̍a̍a̍ sūŋgbu̍a̍ŋ mā hīɔ̍ɔ̍lu̍ a̍ yɔ̄m āke̍e̍sīāā wo̍, mī lā kūmbū ma̍ŋ kpo̍u̍ a̍ ko̍o̍līi̍ye̍, le̍ kōlāa̍ ho̍ō bāa̍. O̍ ko̍ŋ kɔ̍ɔ̍lī, mī lā tōōsi̍a̍a̍ nyɛ̄la̍ŋ lā hi̍ɔ̍ɔ̍lu̍ a̍ ka̍ni̍i̍ hu̍mbūe̍i̍, le̍ sūŋgbu̍ma̍ ma̍ŋ sīmīo̍o̍ lēni᷄ŋ. O̍ ko̍ŋ kɔ̍ɔ̍lī, mī lā tōōsi̍a̍a̍ do̍lu̍ŋu̍ŋ ŋ̄ko̍o̍līi̍yo̍ŋ le̍ kōlāa̍ ho̍ō bāa̍.

³³“Ndu̍yɛ̍, mī lā bāa̍ kōlāa̍ ho̍ō o̍ do̍lu̍ŋu̍ŋ ŋ̄ko̍o̍līi̍ŋ mu̍ŋ o̍ tɛ̍ndīi̍yo̍ ho̍ō ni᷄ŋ, mbō kēlū tɛ̍ndīi̍yo̍ tɛ̄ɛ̄ŋ. Kōlāa̍ ho̍ō, ndu̍ cho̍ fo̍ndāŋ kāsi̍ hi̍o̍ū kpo̍u̍ wo̍ pīɔ̄ū tɛ̄ɛ̄ŋ a̍ fo̍ndāŋ kāsīo̍o̍ ō pīlɔ̍ɔ̍ ni̍. O̍ ko̍ŋ, mī lā chu̍a̍ kɔ̍fū kpe̍ma̍a̍, mī lā kɔ̍ kɛ̍sī ndu̍ o̍ kōlā ko̍ŋ kɔ̄ɔ̄lī, o̍ fo̍ndāŋ kāsi̍ hi̍o̍ū kpo̍u̍.

³⁴O̍ ko̍ŋ kɔ̍ɔ̍lī, mī lā chu̍a̍ kūmbū kɔ̍fōo̍ ho̍ō, o̍ cho̍ kpe̍ŋgbe̍i̍ īnyīɛ̍ɛ̍yo̍ wo̍, mī lā kɔ̍ kɛ̍sī ndu̍ o̍ kɔ̍fū ko̍ŋ chōo̍ o̍ fo̍ndāŋ kāsi̍ hi̍o̍ū kpo̍u̍ wo̍.

³⁵Ndu̍yɛ̍, mī lā chūa̍ ti̍bīi̍yo̍ a̍ nyɛ̄ kɛ̄sīāā lāla̍mbūi̍yo̍, mī lā kɛ̄si̍ la̍ŋ vēllāa̍ vēllē o̍ fo̍ndāŋ kāsīo̍o̍ pīlɔ̍ɔ̍. Tē lā kɛ̄si̍ pɛ̍ ti̍bīi̍yo̍ bā lūāŋndo̍, lā kɛ̄si̍ nyɛ̄ kɛ̄sīāā lāla̍mbūi̍yo̍ bā tōūwo̍.

³⁶“O̍ ko̍ŋ kɔ̍ɔ̍lī, mī lā tōōsi̍a̍a̍ kōlā kɛ̍ndɛ̄ kɛ̍ndɛ̄ che᷅le̍ŋ a̍ fūŋi̍i̍ kpe̍e̍ndɛ̄i̍, mī lā kēēku̍ fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍i̍, a̍ fūŋi̍i̍ si̍a̍ŋɛ̄i̍ lēni᷄ŋ. Ndu̍yɛ̍, mī lā hɔ̄ū nyāā lākūmba᷅ŋnda̍ lēchōo̍ kpo̍u̍.

³⁷Ndu̍yɛ̍, mī lā tōōsi̍a̍a̍ yɔ̄mīī vīlɛ̄īye̍ ī ŋu̍ɛ̍ɛ̍nu̍ a̍ yɔ̄m āke̍e̍sīāā wo̍, mī lā kūmbū ndi̍ kpo̍u̍ a̍ ko̍o̍līi̍ye̍. O̍ ko̍ŋ kɔ̍ɔ̍lī, mī lā tōōsi̍a̍a̍ vɛ̄lɛ̄ nyɛ̄la̍ŋ lā ŋu̍ɛ̍ɛ̍nu̍ a̍ chīli̍ŋi̍i̍ būlɔ᷄ŋsīi̍ye̍ le̍ yɔ̄mnde̍ he̍ī sīmīo̍o̍ lēni᷄ŋ. Ndu̍yɛ̍, mī lā tōōsi̍a̍a̍ do̍lu̍ŋu̍ŋ ŋ̄ko̍o̍līi̍yo̍ŋ le̍ kōlāa̍ ho̍ō bāa̍ o̍ yɔ̄mīī kēŋ.”