Read Southern Kisi Ɛ̍sɔ̍dɔ̍ɔ̄ 3 Bible Online

Ɛ̍sɔ̍dɔ̍ɔ̄ 3 - Southern Kisi bible

Ɛ̍sɔ̍dɔ̍ɔ̄ 3

¹O̍ wa̍ a̍ te̍le̍ŋ pu̍m, mi̍ Mūu̍sē wa̍ chɔ̄lūa̍a̍ Chɛ̍tu̍lō le̍fū ndɔ̍ wa̍ māndāa̍. Chɛ̍tu̍lō ko̍ŋ yɛ̄, ndu̍ wa̍ wānā so̍līāā lāsa̍lāa̍ o̍ lɛ̄ŋndē Mi̍dīāŋnde̍ŋ ni᷄ŋ ni̍. A̍ te̍le̍ŋ ko̍ŋ, mi̍ Mūu̍sē o̍ chu̍ā sāa̍ a̍ chūīŋāā o̍ wa̍ ka̍ŋ māndāa̍ wa̍ mbo̍ kēēkū a̍ nda̍ o̍ lɛ̄ŋndē po̍lte̍ŋ ni᷄ŋ, bā pāa̍le̍ŋ lē dēllo̍ o̍ pēmbīī Mɛ̄lɛ̄kɛ̍i̍ īkɛ̄i̍, ndi̍ yɔ̍nūŋ māā Pēmbīī Sa̍a̍nāīve̍ ni̍.

²O̍ ko̍ŋ, mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chɔ̄mnu᷄ŋ ndu̍ o̍ lēyīŋ o̍ yɔ̄m pūīyāa̍ pɔ̄mbɔ̄ɔ̍ chōo̍. Mi̍ Mūu̍sē cha᷅ yīŋnde̍ŋ sānde̍i̍ o̍ yɔ̄mndo̍ ho̍ō tɛ̄ɛ̄ŋ. Yīŋnde̍ŋ lē wa̍ sānde̍i̍, kɛ̍ yɔ̄mndo̍ ve̍ ŋɔ᷅ le̍.

³Mɛ̄ɛ̍ Mūu̍sē che᷅ nyɛ̍ wa̍ yɔ̄nɔ᷄ŋndo̍ wo̍, mi̍ kɔ̄ndɔ̄fi̍llo̍ bīī ndu̍. Mbo̍ dīmī āā, “Īmāā vɛ̄ɛ̍nɛ̍ i̍ cho̍ yɛ̍ he̍ī? Kāni̍ bɛ̍ɛ̍ I̍ chi̍ wɔ̍ i̍ wa̍ā nu̍a̍ā le̍. Vɛ̄ɛ̍nɛ̍ yīŋnde̍ŋ lē wa̍ yɛ̍ sānde̍i̍ o̍ yɔ̄mndo̍ chōo̍, kɛ̍ yɔ̄m kōŋ ō ŋu̍ē le̍? Mɛ̄ɛ̍ mī I̍ fūūlu̍u̍ lo̍ŋ di̍ mī I̍ kɔ̍ chɔ᷅ a̍ lēhɔ̄l pɛ̍ɛ̍ŋ.”

⁴Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ che᷅ māā Mūu̍sē yēēma̍ mbō sɔ̄ɔ̄ŋgu̍u̍ o̍ yɔ̄mndo̍ ho̍ō īkɛ̄i̍, mbo̍ vēēlū ndu̍ o̍ yɔ᷄m wa̍ ko̍ŋ sa̍nde̍i̍yo̍ ni᷄ŋ āā, “Mūu̍sē, Mūu̍sē.” Mi̍ Mūu̍sē chɛ᷅l āā, “Ēe̍, I̍ cho̍ na̍nu᷄ŋ.”

⁵O̍ ko̍ŋ, mi̍ Mɛ̄lɛ̄ka̍ dīmūl ndu̍ āā, “Mɛ̍ɛ̍lu̍ tɛ̍ɛ̄ŋ ndo̍ŋ ki̍nɛ̍i̍. Sɔ̍ɔ̍ŋgūū o̍ yɔ̄m kōŋ īkɛ̄i̍ le̍. So̍li̍ kɔ̄vɛ̄i̍la̍ cho̍ nūm o̍ ŋ̄pēlū la̍ŋ, kāni̍ fo̍ndōle̍, lɛ̄ŋndē ŋ̄ si᷄m nde̍ŋ chōo̍ le̍ŋ, lɛ̄ŋndē kāsīle̍ŋ le̍ cho̍ ni̍.

⁶Ya̍ cho̍ Mɛ̄lɛ̄ka̍ fi̍nyāā nūm a̍ ma̍māa̍ E̍bīlāha᷅m, a̍ Āa̍se̍, a̍ Che̍kɔ̍pū wo̍ ni̍.” O̍ ko̍ŋ, mi̍ Mūu̍sē vi̍āŋ hɔ̄lla̍, kāni̍ fo̍ndōle̍, sīōōŋnde̍ wa̍ ndu̍ le̍ Mɛ̄lɛ̄ka̍ chɔ̄ɔ̍.

⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “Mūu̍sē, I̍ che᷅ dɛ̍nɛ̍ pa̍lāa̍ wāŋnda̍ I̍chi̍pī a̍ cho̍ wānāā nīa̍a̍ tūsīo̍o̍ chōo̍ o̍ lɛ̄ŋndē I̍chi̍pīle̍ŋ ni᷄ŋ ndo̍. Ndu̍yɛ̍, lēpīɛ̄ī o̍ lēpīɛ̄ī nda̍ chō le̍ nda̍ mālāa̍ mī ba̍ŋa̍ nda̍ o̍ chɛ̄lē nda̍ chō ni᷄ŋ nde̍ŋ, I̍ tu̍e̍ī kpo̍u̍. Sāŋgā o̍ sāŋgā nda̍ chō wāŋnda̍ I̍chi̍pī o̍ bā bɛ̄ŋgu̍, sāŋgā kōŋ bɛ̍ɛ̍ I̍ che᷅ ndu̍.

⁸Le̍la̍ŋ, I̍ hi᷅ŋ le̍ mī ba̍ŋa̍ nda̍ wāŋnda̍ I̍chi̍pī o̍ bā. I̍ cho̍ nda̍ sōlī o̍ lɛ̄ŋndē I̍chi̍pīle̍ŋ ni᷄ŋ, mī ku̍ɛ̄ a̍ nda̍ o̍ lɛ̄ŋndē kɛ̄ndɛ̄lē bɛ̄ndūle̍ŋ ni᷄ŋ. Lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ, le̍ŋ le̍ yɔ̍nūŋ ni̍ māā lɛ̄ŋndē Ke̍na̍na̍i̍tīi̍ya̍, a̍ Hi̍ta̍i̍tīi̍ya̍, a̍ A̍mɔ̍lu̍a̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Hi̍va̍i̍tīi̍ya̍, a̍ Chɛ̍bu̍sa̍i̍tīi̍ya̍.

⁹I̍ tu̍e̍ī kōŋu̍lta̍ wānāā nīa̍a̍ cho̍ le̍ mālāa̍ nāa̍ ya̍ chu̍ā la̍ŋ. Ndu̍yɛ̍, mi̍ cha᷅ dɛ̍nɛ̍ pa̍lāā bɛ̄ndū wāŋnda̍ I̍chi̍pī cho̍ nda̍ tūsīo̍o̍ chōo̍ wo̍.

¹⁰Le̍la̍ŋ, I̍ cho̍ nūm vīōmɔ̄ɔ̄ I̍chi̍pī nāa̍ māsā bɛ̍ndōo̍ I̍chi̍pī chūā le̍ mā kɔ̍ so̍lī wānāā nīa̍a̍ o̍ lɛ̄ŋndē I̍chi̍pīle̍ŋ ni᷄ŋ, nda̍ yɔ̍nūŋ māā I̍sɔ̄lūɛ̍i̍ya̍ ni̍.”

¹¹Kɛ̍ mi̍ Mūu̍sē di̍mūl Mɛ̄lɛ̄ka̍ āā, “Mɛ̄lɛ̄ka̍, wāna̍ māāvɛ̄ɛ̍nɛ̍ ya̍ I̍ cho̍ yɛ̄ mī ku̍ɛ̄ nāa̍ māsā bɛ̄ndōo̍ I̍chi̍pī chūā, le̍ mī kɔ̍ so̍lī I̍sɔ̄lūɛ̍i̍ya̍ o̍ chɛ̄le̍ŋ ni᷄ŋ I̍chi̍pī?”

¹²Mi̍ Mɛ̄lɛ̄ka̍ dīmūl ndu̍ āā, “I̍ cho̍ wa̍ lātu̍lu̍ a̍ nūm. I̍ cho̍ nūm tāāmāsi̍o̍o̍ chɔ̄m, o̍ cho̍ nūm chɔ̄m māā ya̍ kpe̍e̍kpe̍i̍ ve᷅m nu̍m ni̍ wo̍. Wāŋnda̍ ha̍ā sōlī ŋ̄ chō nda̍ lākɔ̄ mā hi᷄ŋ a̍ nda̍ wo̍, nūm ni̍, nda̍ ni̍, o̍ pēmbēi̍ he̍ī nya̍ chō ya̍ hūnɔ̄ɔ̄ sōōlūū ni̍.”

¹³Kɛ̍, mi̍ Mūu̍sē di̍mūl Mɛ̄lɛ̄ka̍ āā, “Tē ō wa̍ yɛ̍ mī ku̍ɛ̄ mi̍ kɔ̍ di̍mūl wāŋnda̍ I̍sɔ̄lūɛ̄ī māā Mɛ̄lɛ̄ka̍ fi̍nyāā nyāā ma̍māa̍ nda̍ a̍a̍ pi̍ɛ̍īyo̍ ndu̍ ve᷅m ya̍ nāa̍ nya̍ chu̍ā ni̍, mā lo̍ o̍ ko̍ŋ mā nyūna̍ ya̍ āā, ‘Ɔ̍ɔ̄ dīōlā ndɔ̄la̍ŋ?’ Vɛ̄ɛ̍nɛ̍ ya̍ di̍mu̍l lɛ̍ nda̍?”

¹⁴Mi̍ Mɛ̄lɛ̄ka̍ lō o̍ ko̍ŋ mbo̍ dīmūl ndu̍ āā, “Di̍mu̍l nda̍ māā dīōlā nīla̍ŋ āā, ‘Ya̍ cho̍ ya̍ ni̍.’[5] Tē ā kūɛ̄ nāa̍ wāŋnda̍ I̍sɔ̄lūɛ̄ī chu̍a̍ pɛ̍, di̍mu̍l nda̍ āā, ‘Ya̍ cho̍ ya̍ ni̍, ve᷅m ya̍ nāa̍ nya̍ chūā ni̍.’

¹⁵Di̍mu̍l I̍sɔ̄lūɛ̍i̍ya̍ māā ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍, ō E̍bīlāha᷅m, a̍ Āa̍se̍, a̍ Che̍kɔ̍pū, ya̍ ve᷅m nu̍m nāa̍ nda̍ chūā ni̍. Dīōlā nīla̍ŋ la̍ cho̍ la᷅ŋ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍yɛ̍, chɔ̍ŋ ni᷅ŋ a̍ hāū mbō kūɛ̄ a̍ lāchī kɛ᷅ dīōla̍ŋ nda᷅ŋ wāŋnda̍ wā ya̍ ni̍ŋ ve̍e̍lōo̍ ni̍.

¹⁶Le̍la̍ŋ, tē ā kūɛ̄ pɛ̍, a̍ kɔ̍ ve̍e̍lū lāŋgba̍ā kālla̍ I̍sɔ̄lūɛ̄ī kpo̍u̍ nāa̍ pi᷅lɛ̍, a̍ do̍u̍nu̍ŋ nda̍ ko̍na̍. A̍ di̍mu̍l nda̍ māā, ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍ E̍bīlāha᷅m, a̍ Āa̍se̍, a̍ Che̍kɔ̍pū, māā ya̍ Mɛ̄lɛ̄ka̍ ko̍ŋ chɔ̍mnu̍ŋ nu̍m ni̍. Mi̍ dīmūl nu̍m māā i̍ mɛ̍ɛ̍nda̍ŋ mi̍ cha᷅ nyɛ̄ pālāā wāŋnda̍ I̍chi̍pī a̍ cho̍ nya̍ tūsīo̍o̍ chōo̍ wo̍.

¹⁷Le̍la̍ŋ, I̍ kɛ̍ɛ̍si̍a̍a̍ le̍ mī so̍li̍ nda̍ o̍ nyɛ̄ pālāā kōŋ ni᷄ŋ, mī ku̍ɛ̄ a̍ nda̍ o̍ lɛ̄ŋndē kɛ̄ndɛ̄lē bɛ̄ndūle̍ŋ ni᷄ŋ. Lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ, le̍ŋ le̍ yɔ̍nūŋ ni̍ māā lɛ̄ŋndē Ke̍na̍na̍i̍tīi̍ya̍, a̍ Hi̍ta̍i̍tīi̍ya̍, a̍ A̍mɔ̍lu̍a̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Hi̍va̍i̍tīi̍ya̍, a̍ Chɛ̍bu̍sa̍i̍tīi̍ya̍.

¹⁸“Tē ā kūɛ̄ pɛ̍, mā kɔ̍ do̍o̍nu᷄ŋ wa᷅ŋ bɛ̄ndūāā ha̍ā ko̍na̍ a̍ nyɛ̄ o̍ nyɛ̄ ya̍ I̍ di̍mu̍l nūm, ā chō lāāla̍ŋ a̍ nu̍m. O̍ ko̍ŋ, mī lā chɛ᷄ŋ mī lā kūɛ̄ nya̍ nda̍ā o̍ māsā bɛ̍ndōo̍ I̍chi̍pī lo̍, mī lā kɔ̍ dīmūl ndu̍ āā, ‘Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Hi̍būlūi̍ya̍ ō chɔ̄mnu̍ŋ na̍a̍. Le̍la̍ŋ, ŋ̄ ye̍e̍ma̍ mā ma̍l na̍a̍ mī ŋ̄ kūɛ̄ kɔ̄lā pālɛ̍i̍ ya̍a̍ o̍ po̍llo̍ ni᷄ŋ, mī ŋ̄ kɔ̍ so̍li̍ sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, Mɛ̄lɛ̄ka̍ na̍a̍.’

¹⁹Kɛ̍ lā kɔ̍ bɛ̍ɛ̍ mī lā kɔ̍ do̍o̍nu᷄ŋ ndu̍ sɔ̄ɔ̍ŋ mu᷅ŋ kpo̍u̍ ko̍na̍, ō cho̍ chɛ̍lɔ̄ɔ̄ mbō ma᷄l nya̍ le̍, mɛ̄ɛ̍ mbō wa᷄ a̍ ka̍ka̍.

²⁰Le̍la̍ŋ, I̍ cho̍ lɛ̄ŋndē I̍chi̍pī le̍ŋ nyɛ̄ pālāā bɛ̄ndōo̍ tūsī chōo̍ a̍ sɔ̄ɔ̍ŋ īsīōōŋ bɛ̄ndo᷄ŋ nda̍ tōsāa̍ tɛ̍ɛ̄ŋ. Ko̍ŋ cho̍ tōsā ni̍ mā ma᷄l nya̍ mī lā kūɛ̄.

²¹“Ndu̍yɛ̍, I̍ cho̍ tōsā mī wāŋnda̍ I̍chi̍pī a̍ che᷅ nya̍ nyīnā. Ko̍ŋ to̍sā ni̍, tē lā fūla̍ I̍chi̍pī pɛ̍ mī lā wa̍ kɔ̄la̍ŋ, lā ku̍ē ba̍lā fo̍ndō le̍.

²²Ndu̍yɛ̍, tē lā wa̍ fāŋa᷄ŋndo̍ I̍chi̍pī pɛ̍, wānā la̍nɔ̍ o̍ wānā la̍nɔ̍ I̍sɔ̄lūɛ̍i̍nɔ̍, ō nyūna̍ chāa̍ŋ ndɔ̄ I̍chi̍pīnɔ̄ nda̍ chīɛ̄ɛ̄li̍āŋndo̍, ndu̍yɛ̍ a̍ wānā la̍nɔ̍ I̍chi̍pīnɔ̄ nda̍ chō chīɛ̄ī ni̍ŋ, le̍ mbō ke̍ ndu̍ nyɛ̄lā chūɛ̄ɛ̄na᷄ŋnda̍ŋ lā ti᷄ŋ, a̍ nyɛ̄m chūɛ̄ɛ̄na᷄ŋ nda̍ tōōsi̍a̍a̍ a̍ ko̍o̍līi̍yo̍ŋ, ndu̍yɛ̍ a̍ ka̍ni᷄ŋ hu̍mbo᷄ŋ ndo̍ŋ. Tē lā sɔ̄la̍ nyɔ̄ɔ̍ŋ mu᷅ŋ pɛ̍, lā wōu̍ chūāūwāā nyāa̍ pi̍a̍a̍ndūa̍a̍, a̍ chūāūwāā nyāā la̍a̍ndūa̍a̍. Ko̍ŋ cho̍ tōsā ni̍, mī lā kūɛ̄nu᷄ŋ a̍ nyɛ̄m kɛ̄ndɛ̄ŋ wāŋnda̍ I̍chi̍pī hɔ̍lɔ̄bi̍.”