Read Southern Kisi Ɛ̍sɔ̍dɔ̍ɔ̄ 31 Bible Online

Ɛ̍sɔ̍dɔ̍ɔ̄ 31 - Southern Kisi bible

Ɛ̍sɔ̍dɔ̍ɔ̄ 31

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā,

²“I̍ hɛ̍li̍ Bɛ̄sa̍lɛ̄ɛ̄, po̍ Yu̍lūī yo̍, ndu̍ yɔ̍nūŋ māā, po̍ ma̍ma̍ Hɔ̍ɔ̄ wo̍ ni̍, fūlāa̍ o̍ yu̍ŋgu̍ Chu̍dā wo̍ chōo̍.

³I̍ to̍sa̍ mi̍ Nyi̍nā Mɛ̄lɛ̄ka̍a̍ ō tūāl ndu̍ kɔ̄ɔ̄lī. Ndu̍yɛ̍, mi̍ I̍ ke᷅ ndu̍ tāāsi̍o̍o̍, a̍ kɔ̄l kālo̍o̍, a̍ sīnā pɛ̄ŋgo̍o̍ le̍ mbō nɔ̄la̍ mbō tōsa̍ wa̍li̍ o̍ wa̍li̍ cho̍ wa̍li̍ to̍o̍sīāā nyɛ̄ a̍ lābā.

⁴Ō nɔ̄lā mbō tūūli̍a̍a̍ nyɛ̄m kɛ̄ndɛ̄ kɛ̍ndɔ᷄ŋ a̍ ko̍o̍līi̍ye̍, a̍ ka̍ni̍i̍ hu̍mbūe̍i̍, ndu̍yɛ̍ a̍ būlɔ̍ŋsīi̍ye̍.

⁵Ō nɔ̄ tāāsi̍o̍o̍ le̍ pōūtā ba̍ā kālāla̍ŋ bɛ̄ɛ̄ndīa̍a̍ mɛ̄ɛ̍ la̍ nɔ̍ le̍ wāa̍ yɛ̍, ndu̍yɛ̍ mbō yɛ̄ɛ̄mbu̍u̍ la̍ŋ nyɛ̄ kɛ̄ndɛ̄ kpɛ̍ kpɛ̍. O̍ ko̍ŋ kɔ̍ɔ̍lī, mbo̍ nɔ̄ tāāsi̍o̍o̍ le̍ nyɔ̄ɔ̍ŋ tūūlīa̍a̍ a̍ yɔ̄mnde̍. Wa̍li̍ o̍ wa̍li̍ cho̍ wa̍li̍ cha̍ā nyɛ̄ a̍ lābā ō nɔ̄ tāāsi̍o̍o̍ le̍ mbō tōsa̍ ndu̍.

⁶O̍ ko̍ŋ kɔ̍ɔ̍lī, mi̍ hɛ̍lī Ōhōli̍a̍bī, po̍ Āhīsa̍ma̍kī wo̍, fūlāa̍ o̍ yu̍ŋgu̍ Da᷅ŋndo̍ chōo̍, le̍ mbō wa᷄ wānā ma̍lāa̍ Bɛ̄sa̍lɛ̄ɛ̄ wo̍. Ndu̍yɛ̍, wānā o̍ wānā cho̍ wānā cha̍ā nyɛ̄ a̍ lābā, mi̍ kē nda̍ tāāsi̍o̍o̍ ta̍u̍ ta̍u̍ le̍ mā lō o̍ ko̍ŋ mā tōōsi̍a̍a̍ nyɛ̄ o̍ nyɛ̄ ya̍ Mɛ̄lɛ̄ka̍ dīmu̍l nda̍ le̍ tōsāa̍.

⁷Tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ wāŋnda̍ lātūlu̍ wo̍ ni̍, kɔ̍fū kpe̍ma̍a̍ ni̍, kūmbu̍ cho̍ o̍ kɔ̍fū kōŋ chōo̍ mbo̍ wā kpe̍ŋgbe̍i̍ īnyīɛ̍ɛ̍yo̍ wo̍ ni̍, a̍ nyɛ̄ o̍ nyɛ̄ nɔ̍ mbō wa᷄ ō bɛ̄ɛ̄ndīāā o̍ tɛ̍ndīi̍yo̍ ho̍ō ni᷄ŋ,

⁸a̍ ti̍bīi̍yo̍, a̍ wōlɔ̄ɔ̄lā ti̍bīi̍ ko̍ŋ, a̍ nyɛ̄ kɛ̄sīāā lāla̍mbūi̍yo̍, o̍ nɔ̍ mbō wa̍ ō tōōsīāā a̍ ko̍o̍līi̍ kɛ̍ndɛ̄ kɛ̍ndɛ̄i̍yo̍, ndu̍yɛ̍ a̍ wōlɔ̄ɔ̄lā nyɛ̄ kɛ̄sīāālā la̍mbūi̍ ko̍ŋ, a̍ ma̍āŋndo̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēchōo̍,

⁹a̍ ma̍āŋ cho̍ le̍ sa̍lāla̍ŋ lōmɔ̄ɔ̍ le̍chōo̍ wo̍, a̍ ma̍āŋ kōŋ wōlɔ̄ɔ̄lā ndɔ̄la̍ŋ kpo̍u̍, a̍ hɛ̄ŋgɛ̍i̍ nda̍ pūlū ba᷅la̍ŋ a̍ pēlo᷄ŋ ndo̍, ndu̍yɛ̍ a̍ nyɛ̄ hɛ̄ŋgɛ̍i̍ ko̍ŋ ō chāl le̍cho̍ō wo̍,

¹⁰a̍ dōmāla̍ kāsīlā kɛ̍ndɛ̄ kɛ̍ndɛ̄lā sōlīāā lāsa̍lā la̍ŋ le̍ E̍lɔ̄ŋ wa̍nā so̍līāā lāsa̍lāa̍, a̍ dōmāla̍ so̍līāālā sa̍lāla̍ŋ lā pīlɛ̍ la̍ŋ le̍ pūa̍a̍ E̍lɔ̄ŋ nda̍, le̍ ya̍ sāāŋgīāllo̍ māā wānāā sōlīāā lāsa̍lā,

¹¹a̍ chūɛ̄īya̍ŋ le̍ hɛ̄līo̍o̍, ndu̍yɛ̍ a̍ nyɛ̄m chūŋ kɛ̄ndɛ̄ kɛ̍ndɔ᷄ŋ ŋ̍ nɔ̍ le̍ wāa̍ o̍ fo̍ndāŋ kāsīo̍o̍ wo̍ŋ, nyɔ̄ɔ̍ŋ mu᷅ŋ kpo̍u̍ wāŋnda̍ ha̍ā nɔ̍ ni̍ mā bɛ̄ɛ̄ndi̍a̍a̍ mu̍ŋ. Ndu̍yɛ̍, tē ā wa̍ mu̍ŋ bɛ̄ɛ̄ndīa̍a̍ pɛ̍, mɛ̄ɛ̍ ya̍ Mɛ̄lɛ̄ka̍ dīmu̍l nya̍ le̍ mu̍ŋ bɛ̄ɛ̄ndīa̍a̍ yɛ̍, le̍nde̍ nda̍ nɔ̄ ni̍ mā bɛ̄ɛ̄ndīa̍a̍ mu̍ŋ.”

¹²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹³“Di̍mu̍l wa᷅ŋnda̍ I̍sɔ̄lūɛ̄ī māā, nyɛ̄ ya̍ Mɛ̄lɛ̄ka̍ dīmi̍ wo̍ cho̍ ho̍ō ni̍. Lā nɔ̄ mī lā chūa̍ pāa̍le̍ŋ nde᷅ŋ māā pāa̍le̍ pɛ̍ŋgīāā, ndu̍yɛ̍, mī lā kɛ̄si̍ le̍ŋ lēbɛ̄ɛ̄. Ndu̍yɛ̍, chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī kɛ᷅, pāa̍le̍ŋ nde᷅ŋ lē chō māchūāā māā tāāmāsi̍ na̍a̍ tɛ̄ɛ̄ŋ na̍a̍ nya̍ā, le̍ nya̍ chɔ̄mndo̍ māā ya̍ Mɛ̄lɛ̄ka̍ Ya̍a̍wɛ̄ɛ̄ ya̍ si̍i̍ŋgu̍u̍ nya̍ wānāā nīa̍a̍ kāsī ni̍.

¹⁴Le̍la̍ŋ, lā nɔ̄ mī lā chūa̍ pāa̍le̍ŋ nde᷅ŋ māā pāa̍le̍ pɛ̍ŋgīāā, ndu̍yɛ̍, mī lā kɛ̍si̍ le̍ŋ bɛ̄ɛ̄le̍ŋ māā pāa̍le̍ kāsī. Wānā o̍ wānā tɛ̍ɛ̍mbu̍u̍ pāa̍le̍ŋ nde᷅ŋ lābɛ̄ɛ̄ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍. Wāna̍ o̍ wānā to̍sa̍ wa̍llo̍ o̍ pāa̍le̍ŋ nde᷅ŋ chōo̍ pɛ̍, wānā ko̍ŋ ō nɔ̄ mbō wa᷄ ō sōlīāā wānāā ndūa̍a̍ tɛ̄ɛ̄ŋ po̍.

¹⁵Lā nɔ̄ pālɛ̍i̍ ī ŋɔ᷄mpu᷅m o̍ lɔ̍ɔ̍ bɛ̄ŋgu̍ le̍ wa̍lta̍ nyāla̍ŋ tōsāa̍. Kɛ̍, pāa̍le̍ ŋɔ᷄mmɛ̍ūle̍ŋ, pāa̍le̍ pɛ̍ŋgīāāle̍ŋ le̍ cho̍ ni̍, pāa̍le̍ kāsīle̍ Mɛ̄lɛ̄ka̍ Ya̍a̍wɛ̄ɛ̄ le̍ŋ. Wānā o̍ wāna̍ to̍sa̍ wa̍llo̍ pāa̍le̍ le̍ŋ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍.

¹⁶Le̍la̍ŋ wāŋnda̍ I̍sɔ̄lūɛ̄ī a̍ nɔ̄ mā chūa̍ pāa̍le̍ŋ nde᷅ŋ pāa̍le̍ pɛ̍ŋgīāā, ndu̍yɛ̍, mā kɛ̄si̍ le̍ŋ lēbɛ̄ɛ̄. Pāa̍le̍ŋ nde᷅ŋ, lē chō māchūāā kpe̍ma̍a̍ na̍a̍ tɛ̄ɛ̄ŋ nāa̍ nda̍ le̍ fɛ̍ɛ̍ŋ a̍ fɛ̍ɛ̍ŋ.

¹⁷Chɔ̍ŋ a̍ hāū mbō kūɛ̄ a̍ lāchī kɛ᷅, pāa̍le̍ŋ nde᷅ŋ lē chō māchūāā māā nyɛ̄ lōōna᷄ŋ na̍a̍ tɛ̄ɛ̄ŋ na̍a̍ wāŋnda̍ I̍sɔ̄lūɛ̄ī le̍ fɛ̍ɛ̍ŋ a̍ fɛ̍ɛ̍ŋ, le̍ chɔ̄mndo̍ māā bōōndi̍i̍ ya̍ Mɛ̄lɛ̄ka̍ Ya̍a̍wɛ̄ɛ̄ to̍o̍si̍a̍a̍ nyɔ̄ɔ̍ŋ chōo̍ cho̍o̍, a̍ lɛ̄ŋ nde̍, I̍ to̍sa̍ wa̍llo̍ pālɛ̍i̍ ī ŋɔ᷄mpu᷅m, o̍ ŋɔ᷄mmɛ̍ū wo̍ mi̍ pɛ̍ŋgī.”

¹⁸Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ sūɛ̍i̍ nāa̍ Mūu̍sē chu̍a̍ o̍ Pēmbīī Sa̍a̍nāīve̍ chōo̍, mbo̍ chūā pōūtā yɛ̍ndɛ̍la̍ ti̍ɔ̍ɔ̍ŋndā ndu̍ pi̍la̍ o̍ po̍o̍nyi̍a̍a̍ sāwāla̍ŋ lēcho̍ō le̍ wāŋnda̍ I̍sɔ̄lūɛ̄ī la̍ŋ, mbo̍ kē Mūu̍sē.