Read Southern Kisi Ɛ̍sɔ̍dɔ̍ɔ̄ 38 Bible Online

Ɛ̍sɔ̍dɔ̍ɔ̄ 38 - Southern Kisi bible

Ɛ̍sɔ̍dɔ̍ɔ̄ 38

¹O̍ ko̍ŋ kɔ̍ɔ̍lī, mi̍ Bāsa̍lɛ̄ɛ̄, ta̍ŋgūl ma̍āŋndo̍ a̍ yɔ̄m āke̍e̍sīāā wo̍ le̍ sa̍lāla̍ŋ lōmɔ̄ɔ̍ lēchōo̍. Ma̍āŋndo̍ ho̍ō, ō wa᷄ bāndēi̍ nɛ̄īyo̍ lē ŋɔ᷄mmɛ̍ū a̍ i̍ŋchi̍sīi̍la̍ŋ lā ŋɔ᷄mpu᷅m, bu̍o̍o̍ nɛ̄īyo̍ lē ŋɔ᷄mmɛ̍ū a̍ i̍ŋchi̍sīi̍la̍ŋ lā ŋɔ᷄mpu᷅m, hēlɔ̄ɔ̍ nɛ̄īyo̍ lē hi̍ɔ̍ɔ̍lu̍, a̍ i̍ŋchi̍sīi̍la̍ŋ lā ŋɔ᷄mpu᷅m.

²Ma̍āŋndo̍ ho̍ō, sɔ̍ŋgi̍la̍ ndɔ̄la̍ hi̍ɔ̍ɔ̍lu̍la̍ŋ le̍chōo̍, o̍ sɔ̍ŋgi̍ o̍ sɔ̍ŋgi̍, mbo̍ sōlī nyɔ̄ɔ̍ lēchōo̍ māā lēē. Ndu̍yɛ̍ nyɛ̄lā o̍ so̍li̍ la̍ŋ māā lālēē la̍ŋ ni̍, ma̍āŋndo̍ ni̍, lā wa᷄ lā bīīla᷅ŋ, nyɛ̄ pīlɛ̍ kpe̍. Ndu̍yɛ̍, mbo̍ kūmbū ndu̍ kpo̍u̍ a̍ būlɔ̍ŋsīi̍ye̍.

³O̍ ko̍ŋ kɔ̍ɔ̍lī, mbo̍ tōōsīāā wōlɔ̄ɔ̄lā nda̍ a̍a̍ nɔ̍ le̍ wa̍llo̍ tōsāa̍ o̍ ma̍āŋndo̍ ho̍ō la̍ŋ a̍ būlɔ̍ŋsīi̍ye̍, kpɛ̍ɛ̍nɔ̍ŋ le̍ pūlta̍ŋ kɔ̄ndɔ̄ɔ̍ lēni᷄ŋ, a̍ si̍ɔ̍būi̍la̍ŋ, a̍ hɛ̄ŋgɛ̍i̍la̍ŋ le̍ kōo̍wa̍ŋ bīyɔ̄ɔ̍ lēni᷄ŋ, le̍ fāsāŋīa̍a̍ o̍ ma̍āŋndo̍, a̍ chūlā sa̍ŋgi̍la̍ŋ le̍ vīsīŋ lāsa̍la᷄ŋ, a̍ hɛ̄ŋgɛ̍i̍la̍ŋ le̍ yīŋnde̍ŋ chūa̍a̍ lēni᷄ŋ

⁴O̍ ko̍ŋ kɔ̍ɔ̍lī, mbo̍ tōōsīāā būlɔ̍ŋsīi̍ye̍ kpāsāa̍ mbo̍ kɛ̄sī ndu̍ o̍ ma̍āŋndo̍ ho̍ō chōo̍, mi̍ kpāsāa̍ ho̍ō tūm ndɔ̄ɔ̍ ō tūāl ti᷄ŋ o̍ ma̍āŋndo̍ ni᷄ŋ.

⁵Kpāsāa̍ ho̍ō mbo̍ wōū kēla᷄ŋ būlɔ̍ŋsīi̍yo̍ŋ ŋ̄ hīɔ̍ɔ̍lu̍ o̍ sɔ̍ŋgi̍la̍ŋ ndɔ̄la̍ŋ vēllāa̍ vēllē.

⁶Ndu̍yɛ̍, mbo̍ tōōsīāā yɔ̄mīī vīlɛ̄īye̍ a̍ yɔ̄m āke̍e̍sīāā wo̍ le̍ ma̍āŋndo̍ ho̍ō chūa̍a̍, mbo̍ kūmbū ndi̍ kpo̍u̍ a̍ būlɔ̍ŋsīi̍ye̍.

⁷Mbo̍ wōū yɔ̄mīī vīlɛ̄ī kēŋ o̍ kēla᷄ŋ o̍ to̍o̍si̍a̍a̍ o̍ ma̍āŋndo̍ vēllāa̍ vēllē wo̍ŋ, mi̍ yɔ̄mīī kēŋ ī wa᷄ lo̍ŋ le̍ kɔ̄la̍ŋ a̍ ma̍āŋndo̍ ho̍ō. Ndu̍yɛ̍ ma̍āŋndo̍ ho̍ō, a̍ pɛ̄ŋgɔ̍ŋ o̍ wa̍ ō tōōsīāā ni̍, ō kūmbīa̍ŋ lēni᷄ŋ.

⁸O̍ ko̍ŋ kɔ̍ɔ̍lī, mi̍ Bāsa̍lɛ̄ɛ̄ o̍ to̍o̍sīāā vɛ̄lɛ̄ hɛ̄ŋgɛ̍i̍ īchīli̍ŋ bɛ̍ndōo̍ a̍ nyɛ̄ hɛ̄ŋgɛ̍i̍ ko̍ŋ ō chāl cho̍o̍ wo̍. Hɛ̄ŋgɛ̍i̍yo̍ ho̍ō, a̍ nyɛ̄ o̍ cha᷅l cho̍o̍ wo̍, a̍ būlɔ᷄ŋsīi̍ o̍ wa̍ ō tōōsīāā ni̍. Wāŋ lāāndūāā nda̍ a̍a̍ to̍sā wa̍llo̍ o̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ dīo̍ wa̍, nda̍ yɔ̍ŋgu̍ tōfa᷅ŋndā ndāla̍ wa̍ lā tōōsīāā a̍ būlɔ̍ŋsīi̍ye̍ la̍ŋ ni̍, le̍ hɛ̄ŋgɛ̍i̍yo̍ ho̍ō tōōsīa̍a̍.

⁹O̍ ko̍ŋ kɔ̍ɔ̍lī, mi̍ Bāsa̍lɛ̄ɛ̄ o̍ to̍o̍sīāā la̍ū ba̍lu̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍. La̍ūwo̍ ho̍ō, ō wa᷄ ō bɔ̄ŋāā kpɔ̍kɔ̍su̍ a̍ kōlāla̍ nda̍ tōōsi̍a̍a̍ a̍ fūŋi̍i̍ kɛ̍ndɛ̄ kɛ̍ndɛ̄ī kpēēndɛ̄i̍ la̍ŋ. Kōla̍ wa̍ bā tōūwo̍ wo̍, ō wa᷄ bāndēi̍ nɛ̄īyo̍ kɛ̄mɛ̄ a̍ be̍le̍-ŋu̍ɛ̍ɛ̍nu̍.

¹⁰Ndu̍yɛ̍ mbo̍ tōōsīāā sūŋgbu̍a̍ŋ bi̍dīi̍ŋ a̍ būlɔ̍ŋsīi̍ye̍, mbo̍ sīmī ma̍ŋ bā tōūwo̍ le̍ kōlāa̍ ho̍ō lāndɔ̄ɔ̍. Mbo̍ tōōsīāā vɛ̄lɛ̄ nyɛ̄la̍ŋ bi̍dīi̍ŋ a̍ būlɔ̍ŋsīi̍ye̍, le̍ ma̍ŋ sīmīo̍o̍ lēni᷄ŋ. O̍ ko̍ŋ kɔ̍ɔ̍lī, mbo̍ tōōsīāā ka̍ni̍i̍ hu̍mbūe̍i̍ do̍li̍ŋndo̍ŋ, a̍ chīli̍ŋu̍ŋ vi̍lɛ̄īyo̍ŋ le̍ kōlāa̍ ho̍ō bāa̍.

¹¹La̍ūwo̍ ho̍ō bā lūāŋndo̍ bɛ̍ɛ̍, kōla̍ wa̍ ō lāndāā lo̍ŋ ndo̍ ō wa᷄ bānde̍i̍ nɛ̄īyo̍ kɛ̄mɛ̄ a̍ be̍le̍-ŋu̍ɛ̍ɛ̍nu̍, sūŋgbu̍a̍ŋ bɛ̍ɛ̍ bi̍dīi̍ŋ, a̍ nyɛ̄lā ma̍ si᷅m le̍ni̍ŋ nda̍ŋ bi̍dīi̍ŋ, ndu̍yɛ̍ la̍ŋ kpo̍u̍ lā wa᷄ lā tōōsīāā a̍ būlɔ̍ŋsīi̍ye̍. Ndu̍yɛ̍ do̍lu̍ŋu̍ŋ wa̍ lo̍ŋ ndo̍ŋ ni̍, a̍ chīli̍ŋu̍ŋ vi̍lɛ̄īyo̍ŋ, ŋ̄ wa᷄ ŋ̄ tōōsīāā a̍ ka̍ni̍i̍ hu̍mbūe̍i̍.

¹²La̍ūwo̍ ho̍ō bā pāa̍le̍ŋ lē dēllo̍, kōla̍ wa̍ ō bāā lo̍ŋ ndo̍, ō wa᷄ bāndēi̍ nɛ̄īyo̍ be̍le̍-ŋɔ̍mmɛ̍ū a̍ lē ŋu̍ɛ̍ɛ̍nu̍. Ndu̍yɛ̍, sūŋgbu̍a̍ŋ mā wa᷄ lo̍ŋ tɔ̍, a̍ nyɛ̄lā ma̍ si᷅m le̍ni̍ŋ nda̍ŋ vɛ̄lɛ̄ tɔ̍. Mbo̍ tōōsīāā vɛ̄lɛ̄ ka̍ni̍i̍ hu̍mbūe̍i̍ do̍li̍ŋndo̍ŋ, a̍ chīli̍ŋu̍ŋ vi̍lɛ̄īyo̍ŋ le̍ kōlāa̍ lāndɔ̄ɔ̍.

¹³La̍ūwo̍ ho̍ō nāa̍ lu̍ɛ̍i̍yāa̍, bā pāa̍le̍ŋ lē chāŋndo̍, kōla̍ wa̍ ō bāā lo̍ŋ ndo̍, ō wa᷄ bānde̍i̍ nɛ̄īyo̍ be̍le̍-ŋɔ̍mmɛ̍ū a̍ lē ŋu̍ɛ̍ɛ̍nu̍.

¹⁴Nāa̍ lu̍ɛ̍i̍yāa̍ ha̍ā, o̍ īkpēŋgū o̍ īkpēŋgū, mbo̍ sīmi̍ sūŋgbu̍a̍ŋ mā yāa̍, a̍ nyɛ̄lā ma̍ si᷅m le̍ni̍ŋ nda̍ŋ lā yāa̍. Ndu̍yɛ̍ kōlāla̍ wa̍ lā lāndāā o̍ kpēŋgo᷄ŋ mu᷅ŋ vēllāa̍ vēllē la̍ŋ, ō kɛ᷅ kɛ᷅, ō wa᷄ bāndēi̍ nɛ̄īyo̍ bi̍dīi̍ŋ a̍ lē dīi̍ŋ a̍ i̍ŋchi̍sīi̍la̍ŋ lā ŋɔ᷄mpu᷅m.

¹⁵

¹⁶La̍ūwo̍ ho̍ō kpo̍u̍, a̍ kōlāla̍ wa̍ lā tōōsīāā a̍ fūŋi̍i̍ kpe̍e̍ndɛ̄i̍ la̍ŋ nda̍ bɔ̄ŋa̍ ndu̍ kpɔ̍kɔ̍su̍ ni̍.

¹⁷Sūŋgbu̍ma̍ ba̍lu̍ la̍ūwo̍ ho̍ō wa̍ŋ kpo̍u̍, chīli̍ŋi̍i̍ vi̍lɛ̄īye̍ ī wa᷄ ī hōlāā o̍ ma̍ŋ chɛ̍ chɛ̍, ī tōōsīāā a̍ ka̍ni̍i̍ hu̍mbūe̍i̍. Do̍lu̍ŋu̍ŋ wa̍ o̍ sūŋgbu̍a̍ŋ ndo̍ŋ, ŋ̄ wa᷄ ŋ̄ tōōsīāā a̍ ka̍ni̍i̍ hu̍mbūe̍i̍. Ndu̍yɛ̍ nyɛ̄lā ma̍ si̍m lēni᷄ŋ nda̍ŋ bɛ̍ɛ̍, a̍ būlɔ̍ŋsīi̍ye̍ la̍ wa̍ lā tōōsīāā ni̍. O̍ ko̍ŋ kɔ̍ɔ̍lī, mbo̍ kūmbū sūŋgbu̍a̍ŋ ma᷅ŋ bōlle̍ kpo̍u̍ a̍ ka̍ni̍i̍ hu̍mbūe̍i̍.

¹⁸Ndu̍yɛ̍ kōla̍ wa̍ ō lāndāā o̍ la̍ūwo̍ ho̍ō dīō wo̍, a̍ fūŋi̍i̍ kpe̍e̍ndɛ̄ī kɛ̄ndɛ̄ kɛ̍ndɛ̄i̍ o̍ wa̍ ō tōōsīāā ni̍, ma̍ kēēkū fūŋi̍i̍ yɛ̍ yɛ̍i̍ lēni᷄ŋ, fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍i̍, a̍ fūŋi̍i̍ si̍a̍ŋɛ̄i̍. Ndu̍yɛ̍ ma̍ tūūlīāā nyɛ̄m kɛ̄ndɛ̄ kɛ̄ndɔ᷄ŋ lēchōo̍ a̍ fūŋi̍i̍ yɛ̍ yɛ̍i̍. Kōlāa̍ ho̍ō, ō wa̍ bāndēi̍ nɛ̄īyo̍ be̍le̍-ya̍a̍, hēlɔ̄ɔ̍ nɛ̄īyo̍ lē ŋɔ᷄mmɛ̍ū a̍ i̍ŋchi̍sīi̍la̍ŋ lā ŋɔ᷄mpu᷅m, a̍ kōla̍ wa̍ la̍ūwo̍ ō bālāā wo̍ kpe̍ŋ.

¹⁹Ndu̍yɛ̍, sūŋgbu̍ma̍ nda̍ sīmi̍ le̍ kōla̍ wa̍ o̍ la̍ūwo̍ ho̍ō sōndōo̍ wo̍ bāa̍ wa̍ŋ, mā wa᷄ mā hīɔ̍ɔ̍lu̍. Sūŋgbu̍a̍ŋ ma᷅ŋ lē ō kɛ᷅ kɛ᷅, le̍e̍ nɔ̍ nyɛ̄ le̍ si᷅m lēni᷄ŋ ndo̍, ō tōōsīāā a̍ būlɔ̍ŋsīi̍ye̍. Sūŋgbu̍a̍ŋ ma᷅ŋ mbo̍ kūmbū ma̍ŋ bōlle̍ kpo̍u̍ a̍ ka̍ni̍i̍ hu̍mbūe̍i̍. Ndu̍yɛ̍, do̍lu̍ŋu̍ŋ nda̍ tōōsi̍a̍a̍ le̍ kōlāa̍ ho̍ō lāndɔ̄ɔ̍ wo̍ŋ ni̍, a̍ chīli̍ŋi̍i̍ wa̍ ī hōlāā o̍ sūŋgbu̍ma̍ ma̍ŋ chɛ̍ chɛ̍ le̍ kōlāa̍ lāndɔ̄ɔ̍ ve̍, mu̍ŋ kpo̍u̍ a̍ ka̍ni̍i̍ hu̍mbūe̍i̍ ŋ̄ wa̍ ŋ̄ tōōsīāā ni̍.

²⁰Pɛ̍ɛ̍kīi̍ŋ[13] nda̍ kīndū tɛ̍ndīi̍yo̍ ho̍ō wo̍ŋ ni̍, a̍ ī nda̍ kīndū kōla̍ ba̍lu̍ tɛ̍ndīi̍yo̍ ho̍ō ve̍, a̍ būlɔ̍ŋsīi̍ye̍ nda̍ tōōsi̍a̍a̍ mu̍ŋ ni̍.

²¹Mɛ̄ɛ̍ nda̍ wa̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ tāŋgūllo̍, mi̍ Mūu̍sē di̍mūl Li̍va̍īya̍, māā ā pōōnyi̍a̍a̍ nyɛ̄ o̍ nyɛ̄ ndā wa̍ tɛ̍ndīi̍yo̍ ho̍ō tāŋgūllo̍ a̍ ndu̍ o̍ yāu̍ chōo̍. Ndu̍yɛ̍, I̍ta̍māā, po̍ E̍lɔ̄ŋ wa̍nā so̍līāā lāsa̍lāa̍, ndu̍ wa̍ bōlle̍ŋ le̍ nyɔ̄ɔ̍ŋ mu᷅ŋ pōōnyi̍a̍a̍ o̍ yāu̍wo̍ chōo̍ ni̍.

²²Ndu̍yɛ̍, nyɛ̄ o̍ nyɛ̄ Mɛ̄lɛ̄ka̍ dīmu̍l Mūu̍sē le̍ tōsāa̍ o̍ tɛ̍ndīi̍yo̍ ho̍ō, mi̍ Bāsa̍lɛ̄ɛ̄, po̍ Yu̍lūī wo̍, ndu̍ yɔ̍nūŋ māā po̍ ma̍ma̍ Hɔ̍ɔ̄ wo̍ ni̍, fūlāa̍ o̍ yu̍ŋgu̍ Chu̍dā wo̍ chōo̍, mbo̍ tōōsīāā mu̍ŋ kpo̍u̍.

²³Ndu̍yɛ̍, Bāsa̍lɛ̄ɛ̄ ko̍ŋ wāna̍ ndɔ̄ ma̍lāa̍ wa̍ Ōhōli̍a̍bī, po̍ Āhīsa̍ma̍kī wo̍ ni̍, fūlāa̍ o̍ yu̍ŋgu̍ Da᷅ŋndo̍ chōo̍. Ōhōli̍a̍bī ko̍ŋ yɛ̍, ō wa᷄ wānā cha̍ā nyɛ̍ a̍ lābā. Ndu̍ o̍o̍ cha̍ā nyɛ᷅m kɛ̄ndɛ̄ kɛ̍ndɔ᷄ŋ tūūli̍a̍a̍, ndu̍yɛ̍, ō wa᷄ vɛ̄lɛ̄ wa᷅na̍ cha̍ā nyɔ̄ɔ̍ŋ hɔ̄ūwɔ̄ɔ̍ a̍ fūŋi̍i̍ yɛ̍ yɛ̍i̍ yo̍, fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍i̍, a̍ fūŋi̍i̍ si̍a̍ŋɛ̄i̍, ndu̍yɛ̍ a̍ kōlāla̍ nda̍ tōōsīāā a̍ fūŋi̍i̍ kpe̍e̍ndɛ̄i̍ la̍ŋ.

²⁴Ko̍o̍līi̍ŋ wāŋnda̍ yɔ̄ŋgu̍ kīo̍o̍ ki̍nɛ̍i̍ le̍ tɛ̍ndīi̍ kāsi̍ Mɛ̄lɛ̄ka̍ Ya̍a̍wɛ̄ɛ̄ wo̍ tāŋgūllo̍ wo̍ŋ, ŋ̄ wa̍ le̍ pa᷅ŋnda̍ŋ wāa̍la̍ŋ lā tīɔ̍ɔ̍ŋ a̍ kɛ̄mɔ̄ɔ̍ lē dīi̍ŋ (2,200). Ndu̍yɛ̍ sēke̍lēi̍ wānāā bɛ̄ndūa̍a̍ ā chɛ̄la᷅ŋ chōo̍ le̍ nyɔ̄ɔ̍ŋ tūūwo̍ wo̍, o̍ sēke̍lēi̍ ko̍ŋ chōo̍ nda̍ tūu̍ ko̍o̍līi̍yo̍ŋ mu᷅ŋ ni̍.

²⁵Ka̍ni̍ŋ hu̍mbūŋ wāŋnda̍ ā chūūŋgi̍a̍a̍ le̍ tāŋgūllo̍ ho̍ō wo̍ŋ, ŋ̄ wa᷄ pa᷅ŋnda̍ŋ wāa̍la̍ŋ lā ŋɔ᷄mmɛ̍ū a̍ kɛ̄mɔ̄ɔ̍ lē ŋu̍ɛ̍ɛ̍nu̍, a̍ be̍le̍-ŋu̍ɛ̍ɛ̍nu̍ (7,550). Ndu̍yɛ̍ ka̍ni̍ŋ hu̍mbo᷄ŋ mu᷅ŋ bɛ̍ɛ̍, sēke̍lēi̍ wānāā bɛ̄ndūa̍a̍ ā chɛ̄la᷅ŋ cho̍o̍ le̍ nyɔ̄ɔ̍ŋ tūūwo̍ wo̍, lēchōo̍ nda̍ tūu̍ mu᷅ŋ ni̍.

²⁶Wānā pɔ̍nɔ̍ o̍ wānā pɔ̍nɔ̍ wa̍ wɔ̄sīla̍ŋ bi̍dīi̍ŋ, kɛ̄lɛ̄ŋgāā hīōūwɔ̄ɔ̍ ko̍ŋ chōo̍, mbo̍ wā ō chɔ̄māā, mi̍ wānā o̍ wānā yɔ̍ŋgū chūūŋgīa̍a̍ kpɛ̍ŋnji̍. Ndu̍yɛ̍ pūa̍a̍ wa̍ ā chɔ̄māā bōllē pīlɛ̍ wa̍, ā wa᷄ wāa̍la̍ŋ kɛ̄mɔ̄ɔ̍ le̍ ŋɔ᷄mpu᷅m a̍ lā yāa̍, a̍ kɛ̄mɔ̄ɔ̍ lē ŋūɛ̍ɛ̍nu̍ a̍ be̍le̍-ŋu̍ɛ̍ɛ̍nu̍ (603,550).

²⁷Nyɛ̄lā kɛ̄mɛ̄ lā nda̍ tōōsi̍a̍a̍ le̍ sūŋgbu̍ma̍ tɛ̍ndīi̍yo̍ ho̍ō, a̍ sūŋgbu̍ma̍ la̍ūwo̍ sīmīo̍o̍ lēni᷄ŋ nda̍ŋ, a̍ ka̍ni̍ŋ hu̍mbo᷄ŋ mu᷅ŋ nda̍ tōōsi̍a̍a̍ la̍ŋ ni̍, ō kɛ᷅ kɛ᷅, ka̍ni̍ŋ hu̍mbo᷄ŋ pa᷅ŋnda̍ŋ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍. Mɛ̄ɛ̍ fa̍ū fa̍ū, ka̍ni̍ŋ hu̍mbūŋ nda̍ tōōsi̍a̍a̍ nyɛ̄la̍ŋ nda᷅ŋ ndo̍ŋ, ŋ̄ wa᷄ pa᷅ŋnda̍ŋ wāa̍la̍ŋ lā ŋɔ᷄mmɛ̍ū a̍ kɛ̄mɔ̄ɔ̍ lē ŋūɛ̍ɛ̍nu̍ (7,500).

²⁸O̍ ko̍ŋ kɔ̍ɔ̍lī, ka̍ni᷄ŋ hu̍mbūŋ tɔ᷄ŋ lo̍ wo̍ŋ, ŋ̄ a̍ wa̍ pa᷅ŋnda̍ŋ be̍le̍-ŋu̍ɛ̍ɛ̍nu̍, a̍ mu̍ŋ Bāsa̍lɛ̄ɛ̄ o̍ to̍o̍si̍a̍a̍ chīli̍ŋu̍ŋ wa̍ le̍ kōlāa̍ bāa̍ wo̍ŋ ni̍, a̍ do̍li̍ŋndo̍ŋ le̍ wāa̍ o̍ sūŋgbu̍a̍ŋ. Ndu̍yɛ̍, a̍ ka̍ni̍ŋ hu̍mbūŋ mu᷅ŋ o̍ ku̍mbū sūŋgbu̍ma̍ la̍ūwo̍ bōlle̍ ni̍.

²⁹Būlɔ᷄ŋsīi̍ŋ wāŋnda̍ yɔ̄ŋgu̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍ tɛ̍ndīi̍yo̍ ho̍ō tāŋgūllo̍ wo̍ŋ, ŋ̄ wa᷄ pa᷅ŋnda̍ŋ wāa̍la̍ŋ lā ŋu̍ɛ̍ɛ̍nu̍ a̍ kɛ̄mɔ̄ɔ̍ lē ya̍a̍ a̍ tɔ̍ (5,310).

³⁰Būlɔ̍ŋsīi̍yo̍ŋ mu᷅ŋ, a̍ mu̍ŋ Bāsa̍lɛ̄ɛ̄ o̍ to̍o̍si̍a̍a̍ nyɔ̄ɔ̍ŋ mu᷅ŋ ki̍nɛ̍i̍ ni̍, sūŋgbu̍ma̍ wa̍ nāa̍ lu̍ɛ̍i̍yāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ lātūlu̍ wo̍ wa̍ŋ ni̍, a̍ nyɛ̄lā ma̍ si̍m lēni᷄ŋ nda̍ŋ, a̍ ma̍āŋ ībūlɔ̍ŋsīi̍yo̍, ndu̍yɛ̍ a̍ kpāsa̍ wa̍ ō hāndāā lēchōo̍ wo̍, lātūlu̍ a̍ wōlɔ̄ɔ̄lā ma̍āŋ kōŋ,

³¹a̍ nyɛ̄lā sūŋgbu̍ma̍ ba̍lu̍ la̍ūwo̍ wa̍ŋ mā si᷄m le̍ni̍ŋ nda̍ŋ, a̍ nyɛ̄lā sūŋgbu̍ma̍ wa̍ o̍ la̍ūwo̍ sōndōo̍ wa̍ŋ mā si᷄m lēni᷄ŋ nda̍ŋ, a̍ pɛ̍ɛ̍kīi̍ŋ tɛ̍ndīi̍yo̍, ndu̍yɛ̍ a̍ pɛ̍ɛ̍kīi̍ŋ wa̍ o̍ kōlāla̍ la̍ūwo̍ wo̍ŋ.