Read Southern Kisi Ɛ̍sɔ̍dɔ̍ɔ̄ 4 Bible Online

Ɛ̍sɔ̍dɔ̍ɔ̄ 4 - Southern Kisi bible

Ɛ̍sɔ̍dɔ̍ɔ̄ 4

¹Mi̍ Mūu̍sē lō o̍ ko̍ŋ mbo̍ nyūnā Mɛ̄lɛ̄ka̍ Ya̍a̍wɛ̄ɛ̄ āā, “Kɛ̍ tē ō wa̍ yɛ̄ mī wāŋnda̍ I̍sɔ̄lūɛ̄ī a̍ kɛ̍ɛ̍ le̍ lāāla᷄ŋndo̍ a̍ nyɛ̄ ya̍ Ī di̍mu̍l nda̍ wo̍, ndu̍yɛ̍, mā ye᷄ŋ ya̍ lānī le̍, mā dīmi̍ māā o̍ cho̍ nūm Mɛ̄lɛ̄ka̍ Ya̍a̍wɛ̄ɛ̄ le̍ chɔ̍mnu̍ŋ ya̍ le̍? Vɛ̄ɛ̍nɛ̍ ya̍ to̍sa̍ yɛ̍?”

²Mi̍ Mɛ̄lɛ̄ka̍ Ya̍a̍wɛ̄ɛ̄ nyūnā ndu̍ āā, “Ō yɛ̄ɛ̍nɛ̍ cho̍ yɛ̄ kōŋ nu̍m o̍ bā?” Mi̍ Mūu̍sē mu̍lūl ndu̍ āā, “Tīnda̍a̍ cho̍ ya̍ o̍ bā ni̍.”

³Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “Ma̍l lɔ̍ tīnda̍ ko̍ŋ lɛ̄ŋ.” Mi̍ Mūu̍sē ma᷅l tīnda̍a̍ lɛ̄ŋ. Mi̍ tīnda̍a̍ ho̍ō sīmnu᷄ŋ kɛ̍ūwo̍. O̍ ko̍ŋ mi̍ Mūu̍sē nya̍a̍nu᷄ŋ.

⁴Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “Kɔ̍ mā kɔ̍ sa̍ā ndu̍ lōmnde̍ŋ mā chūa̍.” Mi̍ Mūu̍sē si̍ɛ̍ndī bāa̍ mbo̍ sāā kɛ̄ūwo̍ ho̍ō lōmnde̍ŋ. O̍ ko̍ŋ, mi̍ kɛ̄ūwo̍ sīmnu᷄ŋ vɛ̍lɛ̄ tīnda̍a̍ Mūu̍sē o̍ ba̍.

⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “Tē ā kūɛ̄ pɛ̍ mā kɔ̍ do̍u̍nu̍ŋ nda̍ ko̍na̍, ndu̍yɛ̍ mā lāāla̍ŋ a̍ nūm te̍, mɛ̄ɛ̍ a̍ to̍sa̍ ni᷅ŋ ka̍a̍ma̍a̍ ho̍ō nda̍ o̍ hɔ̄l kpe̍nde̍ke̍le̍. Ko̍ŋ cho̍ tōsā ni̍, mā lāāla̍ŋ māā, ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍, ō E̍bīlāha᷅m, a̍ Āa̍se̍, a̍ Che̍kɔ̍pū nda̍ a̍a̍ pi̍ɛ̍īyo̍, māā ya̍ Mɛ̄lɛ̄ka̍ ko̍ŋ chɔ̍mnu᷄ŋ nu̍m ni̍.”

⁶Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ vɛ̄lɛ̄ o̍ ko̍ŋ mbo̍ dīmūl Mūu̍sē āā, “Wo̍u̍nu̍ŋ ndɔ̍ bāa̍ o̍ dōmāa̍ ni᷄ŋ.” Mi̍ Mūu̍sē wo̍u̍nu᷄ŋ bāa̍ o̍ dōmāa̍ ni᷄ŋ. Mɛ̄ɛ̍ o̍ so̍li̍ bāa̍ o̍ dōmāa̍ ni᷄ŋ, mbo̍ chā mi̍ bāa̍ yɔ̄nu᷄ŋ ndu̍ ō hūmbū fo̍ a̍ nāā wɔ̄ɔ̍ŋ pūm.

⁷Mi̍ Mɛ̄lɛ̄ka̍ di̍mūl vɛ̄lɛ̄ Mūu̍sē āā, “Mi̍ŋgi̍ŋ ndɔ̍ vɛ̄lɛ̄ ba̍ā o̍ dōmāa̍ ni᷄ŋ.” Mi̍ Mūu̍sē mi̍ŋgi̍ŋ vɛ̍lɛ̄ bāa̍ o̍ dōmāa̍ ni᷄ŋ. Mɛ̄ɛ̍ o̍ so̍li̍ŋ bāa̍ o̍ dōmāa̍ ni᷄ŋ, mi̍ bā kōŋ sīāŋgū kpɛ̍lɛ̄kɛ̍, mbo̍ mīīŋgū māā pāāndū.

⁸Mi̍ Mɛ̄lɛ̄ka̍ Ya̍a̍wɛ̄ɛ̄ dīmūl ndu̍ āā, “Tē ā chɔ᷄m nda̍ tāāmāsi̍ tāso̍o̍ ho̍ō pɛ̍, mā lāāla̍ŋ a̍ nūm te̍, a̍ to̍sa̍ vɛ̄lɛ̄ ō dīi̍ŋ ndɔ̄ɔ̍ ho̍ō. Te̍ a̍ chɔ᷄m nda̍ ni᷅ŋ ko̍ŋ pɛ̍, nāa̍ pu᷅m ā chō lāāla̍ŋ.

⁹Ndu̍yɛ̍ tē ō wa̍ pɛ̍ mā chɔ᷄m nda̍ tāāmāsi̍la̍ ti̍ɔ̍ɔ̍ŋ nda̍ŋ nda᷅ŋ, mā lāāla̍ŋ a̍ nūm te̍, ndu̍yɛ̍ mā ye᷄ŋ nu̍m lānī le̍, ā kɔ̄ndū mɛ̄ŋnda̍ŋ Na̍īl o̍ pēēlo̍ a̍ ta̍la̍ ma̍ŋ lɛ̄ŋ nda̍ o̍ hɔ̄l. Tē ā ta̍la̍ pɛ̍, mɛ̄ŋmā māŋ mā chō sīmnɔ᷄ŋ ko̍o̍wa̍ŋ kpo̍so̍ŋ.”

¹⁰Kɛ̍ mi̍ Mūu̍sē di̍mūl Mɛ̄lɛ̄ka̍ Ya̍a̍wɛ̄ɛ̄ āā, “O̍o̍ Māsānɔ̄ɔ̍ Mɛ̄lɛ̄ka̍, yāndi̍i̍ vi̍ām ya̍ le̍, kāni̍ bɛ̍ɛ̍ I̍ cho̍ wa̍nā cha̍a̍ īsɔ̄ɔ̍ le̍. Ndu̍yɛ̍, su̍ŋ su̍ŋ bɛ̍ɛ̍, I̍ cho̍ wa᷅na̍ cha̍a̍ īsɔ̄ɔ̍ le̍. I̍ cho̍ wa᷅na̍ nɔ̍la̍ īsɔ̄ɔ̍ yo̍ōna̍ yo̍ōna̍ le̍, ndu̍yɛ̍ I̍ cho̍ wa᷅na̍ yi̍ya̍ŋ chɔ̍ chɔ̍ le̍ īsɔ̄ɔ̍ di̍mī le̍.”

¹¹Mi̍ Mɛ̄lɛ̄ka̍ dīmūl ndu̍ āā, “Ō nɛ̄ɛ̍nɛ̍ to̍o̍si̍a̍a̍ yɛ̄ sōndō wāna̍ chi̍o̍o̍? Ō nɛ̄ɛ̍nɛ̍ to̍sā yɛ̄ mī wāŋndo̍ sīmnu᷄ŋ bo̍bo̍nɔ̍ ɔ̄ɔ̄ wāna̍ nīlā bāŋu̍lɛ̍i̍? Ō nɛ̄ɛ̍nɛ̍ to̍sā yɛ̍ mī wāŋndo̍ chē, ɔ̄ɔ̄ mbō sūma̍? Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ to̍sā sɔ̄ɔ̍ŋ mu̍ŋ ni̍.

¹²Le̍la̍ŋ kɔ̍, I̍ cho̍ nu̍m mālā mā sōō. Ndu̍yɛ̍ nyɛ̄ o̍ nyɛ̄ ŋ̄ nɔ̄ le̍ dīmīo̍o̍ I̍ cho̍ nu̍m chɔ̄m.”

¹³Kɛ̍, mi̍ Mūu̍sē mu̍lī āā, “Yāndi̍i̍ Māsānɔ̄ɔ̍, vi̍o̍m wa̍nā che̍le̍ŋ.”

¹⁴O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ Mūu̍sē. Mbo̍ dīmūl Mūu̍sē āā, “Bɛ̄ nūm te̍ cho̍ E̍lɔ̄ŋ Li̍va̍īnɔ̍ le̍? I̍ si̍nā māā ndu̍ cha̍ā su̍ɛ̍i̍ wa̍la̍ŋ. Ō chō ni᷅ŋ bɛ̍ɛ̍ hūnɔ̄ɔ̍ le̍ nu̍m chɔ̄ɔ̍. Ndu̍yɛ̍, tē ō chē nu᷄m pɛ̍, ō chō kɔ̄l nāŋɔ̄ɔ̄ ta̍u̍ ta̍u̍.

¹⁵Le̍la̍ŋ, tē lā kūɛ̄ pɛ̍, a̍ kɔ̍ so̍ō nāa̍ ndu̍ chu̍a̍, a̍ chɔ̍m ndu̍ nyɛ̄ o̍ nɔ̍ le̍ dīmīo̍o̍ wo̍. I̍ cho̍ nya̍ mālā, mī chɔ̄m nya̍ mɛ̄ɛ̍ nya̍ sūāā yɛ̍. Ndu̍yɛ̍ mī chɔ̍m nya̍ nyɛ̄ nya̍ nɔ̄ le̍ tōsāa̍ wo̍.

¹⁶E̍lɔ̄ŋ cho̍ wā sōndō nūmndo̍ le̍ sūɛ̍i̍ nāa̍ wāŋnda̍ chūā ni̍. Ndu̍yɛ̍ mī nūm wa̍ sōndō nūu̍.

¹⁷Kɛ̍ ndu̍yɛ̍, kɔ̍ a̍ tīnda̍ ko̍ŋ nūm o̍ bā. A̍ tīnda̍ ko̍ŋ ŋ̄ chō wā sɔ̄ɔ̍ŋ ka̍a̍ma̍ŋ tōsāa̍ ni̍.”

¹⁸O̍ ko̍ŋ kɔ̍ɔ̍lī, mi̍ Mūu̍sē mi̍i̍ŋgu̍ nāa̍ Chɛ̍tu̍lō le̍fū ndɔ̄ chūa̍. Mbo̍ kɔ̍ di̍mu̍l ndu̍ āā, “Yāndi̍i̍ fāllo̍, chɛ̍l la̍ mī mi̍i̍ŋgu̍ I̍chi̍pī, mī kɔ̍ to̍fā wānāā nīa̍a̍ tē ā chō wɔ̄ yōōmū pɛ̍.” Mi̍ Chɛ̍tu̍lō chɛ᷅l. Ndu̍yɛ̍, mbo̍ chōŋgu᷄ŋ ndu̍ āā, “Mɛ̄ɛ̍ fu̍u̍lu̍u̍ kɛ̍ndɛ̄.”

¹⁹Kɛ̍, lɔ̍ɔ̍pa̍ mi̍ Mūu̍sē ma᷅l Mi̍dīāŋ le̍ kɔ̄la̍ŋ I̍chi̍pī, mi̍ Mɛ̄lɛ̄ka̍ Ya̍a̍wɛ̄ɛ̄ dīmūl ndu̍ āā, “Mūu̍sē, yɔ᷅ŋ īsīōōŋ le̍ kɔ̄la̍ŋ I̍chi̍pī le̍, kāni̍ fu̍u̍le̍, wānāā nda̍ a̍a̍ ye̍e̍ma̍ le̍ nu̍m dīyɔ̄ɔ̍ wa̍ kpo̍u̍, ā chūu̍ pa̍ku̍.”

²⁰O̍ ko̍ŋ, mi̍ Mūu̍sē chu̍ā la̍a̍ndɔ̄ a̍ pūa̍a̍ ndūa̍a̍ mbo̍ hēēlū nda̍ o̍ sōfɛ̍lɔ̍ɔ̍ chōo̍, ma̍ bīī kɔ̄la̍ŋ I̍chi̍pī. Tīnda̍ Mɛ̄lɛ̄ka̍ dīmu̍l ndu̍ māā ō chūa̍ wo̍ bɛ̍ɛ̍ ō wa̍ ndu̍ o̍ bā.

²¹O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Tē ā fu̍u̍lu̍u̍ I̍chi̍pī pɛ̍, ā kūɛ̄ nāa̍ māsā bɛ̍ndōo̍ I̍chi̍pī chūā, a̍ to̍sa̍ ka̍a̍ma̍ālā ya̍ kē nūm kpāāyāa̍ le̍ tōsāa̍ ndu̍ o̍ hɔ̄l la̍ŋ ki̍nɛ̍i̍. Kɛ̍ ō cho̍ chɛ̍lɔ̄ɔ̄ mbō ma᷄l I̍sɔ̄lūɛ̍i̍ya̍ mā kūɛ̄ le̍, kāni̍ fo̍ndōle̍, I̍ cho̍ ndu̍ bōlle̍ŋ kīndī.

²²O̍ ko̍ŋ, mā di̍mu̍l ndu̍ māā ya̍ Mɛ̄lɛ̄ka̍ Ya̍a̍wɛ̄ɛ̄ I̍ di̍mi̍ a̍a̍, ‘I̍sɔ̄lūɛ̍i̍ cho̍ po᷄ ni̍ tāso̍o̍ ni̍.

²³I̍ di̍mu̍l nu̍m le̍ mā ma̍l po᷄ nūu̍ mbō kūɛ̄ mbō kɔ̍ so̍o̍lūū ya̍, kɛ̍ ma̍ kɛ̄ɛ̄ māā a̍ me᷅l ndu̍ le̍. Le̍ he̍ī, I̍ cho̍ po᷄ nu̍m tāso̍o̍ dīyɔ̄ɔ̄.’ ”

²⁴O̍ ko̍ŋ kɔ̍ɔ̍lī, mi̍ Mūu̍sē bi̍ī nɛ̄īyo̍ le̍ kɔ̄la̍ŋ I̍chi̍pī. O̍ kɔ̄lā ndāla̍ŋ ni᷄ŋ, mi̍ nyūmnda̍ŋ mā bīīlūl nda̍ o̍ fo̍ndāŋ pūm. O̍ ko̍ŋ, ma̍ chāl o̍ fo̍ndāŋ kōŋ le̍ mā lɔ᷄l lo̍ŋ. Mi̍ ī yɔ̄nu̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ kɛ̍ɛ̍sīāā le̍ mbō dīī Mūu̍sē o̍ fo̍ndāŋ ko̍ŋ.

²⁵O̍ ko̍ŋ, mi̍ la̍nɔ̍ɔ̍ Mūu̍sē ndu̍ yɔ̍nūŋ māā Sīpo̍o̍lūā ni̍, ō hīvī po̍ ndɔ̄ɔ̍ o̍ chīɛ̄ī kɔ̄ɔ̄lī a̍ pōū lūɛ̄īyāā pūm. Mbo̍ chūā kɔ̄lū kōŋ mbo̍ pīlā Mūu̍sē o̍ pēlo᷄ŋ. Mbo̍ dīmī āā, “Le̍ nūm ya̍ I̍ so̍li̍ kōo̍wa̍ŋ ma᷅ŋ ni̍.”

²⁶O̍ ko̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ yɔ̍ŋ ndɛ̍ Mūu̍sē nyɛ̄ le̍. Mɛ̄ɛ̍ nyɛ̄ kōŋ Sīpo̍o̍lūā o̍ di̍mi̍ ni̍ āā, “Le̍ nūm a̍ I̍ so̍li̍ kōo̍wa̍ŋ ma᷅ŋ ni̍.”

²⁷A̍ bōōndi̍i̍ ke̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl E̍lɔ̄ŋ āā, “Chɔ̍ŋ mā kūɛ̄ o̍ po̍llo̍ ni᷄ŋ mā ko̍ma̍l Mūu̍sē.” O̍ ko̍ŋ, mi̍ E̍lɔ̄ŋ ma᷅l mbo̍ kūā, mbo̍ kōmāl Mūu̍sē o̍ pēmbīi̍ Mɛ̄lɛ̄kɛ̍i̍ īkɛ̄i̍, Pēmbīī Sa̍a̍nāīve̍. Mɛ̄ɛ̍ o̍ chē Mūu̍sē, mbo̍ kɔ̄ma᷄ŋ Mūu̍sē, mbo̍ sɔ̄sā ndu̍ kūu̍wo̍.

²⁸O̍ ko̍ŋ kɔ̍ɔ̍lī, mi̍ Mūu̍sē di̍mūl ndu̍ a̍ vīōmɔ̄ɔ̄ Mɛ̄lɛ̄ka̍ Ya̍a̍wɛ̄ɛ̄ o̍ ve᷅m ndu̍ wo̍ o̍kɔ̄ɔ̄. Ndu̍yɛ̍, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l ndu̍ mbo̍ chɔ̄m E̍lɔ̄ŋ kpo̍u̍. Mbo̍ chɔ̄m ndu̍ vɛ̄lɛ̄ a̍ ka̍a̍ma̍ālā Mɛ̄lɛ̄ka̍ Ya̍a̍wɛ̄ɛ̄ di̍mu̍l ndu̍ le̍ kɔ̄la̍ŋ tōsāa̍ la̍ŋ o̍kɔ̄ɔ̄.

²⁹O̍ ko̍ŋ, Mūu̍sē ni̍, E̍lɔ̄ŋ ni̍, ma̍ cha᷄ŋ ma̍ kūā I̍chi̍pī. Mɛ̄ɛ̍ nda̍ fūūlu̍u̍, ma̍ ve̍e̍lū lāŋgba̍ā kālāā I̍sɔ̄lūɛ̍i̍ya̍ kpo̍u̍ na̍a̍ pi᷅lɛ̍.

³⁰Mɛ̄ɛ̍ nda̍ hīŋ, mi̍ E̍lɔ̄ŋ do̍u̍nu᷄ŋ nda̍ ko̍na̍ kpo̍u̍ a̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ ō dīmu̍l Mūu̍sē. Ndu̍yɛ̍, ka̍a̍ma̍ā o̍ ka̍a̍ma̍ā Mɛ̄lɛ̄ka̍ dīmu̍l Mūu̍sē māā ō tōsa̍, mbo̍ tōsā la̍ŋ nda̍ o̍ hɔ̄l kpo̍u̍.

³¹Mɛ̄ɛ̍ wāŋnda̍ tūēī ko̍na̍a̍ ho̍ō, ndu̍yɛ̍ ma̍ chā nyɛ̍ yɔ̍nu̍ŋndo̍, ma̍ lāāla̍ŋ. Ndu̍yɛ̍, mɛ̄ɛ̍ nda̍ tūēī māā Mɛ̄lɛ̄ka̍ Ya̍a̍wɛ̄ɛ̄ o̍ che᷅ dɛ̍nɛ̍ pa̍lāā nda̍ cho̍ nda̍ tūsīo̍o̍ chōo̍ wo̍, ndu̍yɛ̍ māā ō būūla̍ŋ le̍ nda̍, ma̍ bāŋ wūla̍ŋ ma̍ sōōlūū ndu̍ Mɛ̄lɛ̄ka̍.