Read Southern Kisi Ɛ̍sɔ̍dɔ̍ɔ̄ 5 Bible Online

Ɛ̍sɔ̍dɔ̍ɔ̄ 5 - Southern Kisi bible

Ɛ̍sɔ̍dɔ̍ɔ̄ 5

¹O̍ ko̍ŋ kɔ̍ɔ̍lī, mi̍ Mūu̍sē nda̍ E̍lɔ̄ŋ a̍ ku̍ā nāa̍ Māsā bɛ̍ndōo̍ I̍chi̍pī chu̍a̍. Ma̍ kɔ̍ di̍mūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, ndu̍ ve᷅m na̍a̍ nāa̍ nūm chu̍a̍ ni̍. O̍ dīmi̍ māā nūm ma̍l wa̍nāā ndūa̍a̍ I̍sɔ̄lūɛ̍i̍ya̍, mā kūɛ̄ o̍ lɛ̄ŋndē po̍lte̍ŋ ni᷄ŋ, mā kɔ̄ bi̍ī bɔ̄ŋa᷅ŋ bɛ̄ndōo̍ le̍ ndu̍ bɛ̄ɛ̄le̍ŋ kīo̍o̍.”

²Mi̍ māsā bɛ̍ndōo̍ I̍chi̍pī o̍ nyu̍nā nda̍ āā, “Ō nɛ̄ɛ̍nɛ̍ cho̍ yɛ̄ Mɛ̄lɛ̄ka̍ Ya̍a̍wɛ̄ɛ̄? Mɛ̄lɛ̄ka̍ Ya̍a̍wɛ̄ɛ̄ kūɛ̍ɛ̍nɛ̍ cho̍ yɛ̍ Mɛ̄lɛ̄ka̍ ko̍ŋ, mbō dīmu̍l la̍ māā ya̍ I̍ ma̍l wāŋnda̍ I̍sɔ̄lūɛ̍i̍ mī ya᷄ŋ ndu̍ nīla̍ŋ? I̍ si̍nā wa᷅na̍ cho̍ Mɛ̄lɛ̄ka̍ Ya̍a̍wɛ̄ɛ̄ ko̍ŋ ndo̍ le̍. Ndu̍yɛ̍, I̍ me̍l I̍sɔ̄lūɛ̍i̍ya̍ mā kūɛ̄ le̍.”

³Mi̍ Mūu̍sē nda̍ E̍lɔ̄ŋ a̍ di̍mūl ndu̍ āā, “Mɛ̄lɛ̄ka̍ Hi̍būlūi̍ya̍ ā pīɛ̄īyo̍, ndu̍ chɔ̍mnu̍ŋ na̍a̍ ni̍. Le̍la̍ŋ, yāndi̍i̍, ma̍l na̍a̍ mī ŋ̄ kūɛ̄ kɔ̄lā pālɛ̍i̍ ya̍a̍ o̍ po̍llo̍ ni᷄ŋ, mī ŋ̄ kɔ̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ cho̍ Mɛ̄lɛ̄ka̍ nāa̍ wo̍. Tē ō cho̍ ko̍ŋ te̍, ō cho̍ na̍a̍ nāā wɔ̄ɔ̍ŋndo̍ tūsī chōo̍ mbō dīu̍ na̍a̍. Tē ko̍ŋ te̍ ō tōsa̍ ā dīu̍ na̍a̍ o̍ chɔ̄ūwo̍.”

⁴Mi̍ māsā bɛ̍ndōo̍ I̍chi̍pī o̍ di̍mūl nda̍ āā, “Nūm Mūu̍sē, nya̍ E̍lɔ̄ŋ, lā yēēma̍ mā yēēmāā le̍ mī lā fāŋa̍ wāŋnda̍ ha̍ā wa̍li̍ nda̍ cho̍ wo̍. Lā ma᷄l nda̍ ā mīīŋgu̍ wa̍llo̍.

⁵Nya̍ pi̍la̍ lā tōfa̍ wɔ̍ mɛ̄ɛ̍ nya̍ kūi̍ ni᷅ŋ o̍ lɛ̄ŋnde̍ŋ nde᷅ŋ ni᷄ŋ yɛ̍, lā chō ni᷅ŋ fāŋgā ha̍a̍a̍, lā hīōū ni᷅ŋ pi̍la̍ chi̍e̍e̍ya̍a̍ nya̍ kōma̍l lɛ̄ŋnde̍ŋ nde᷅ŋ nda̍. Ndu̍ nya̍ hūŋ wāŋnda̍ fāŋāa̍ wa̍llo̍ ni̍?”

⁶O̍ pāa̍le̍ pi᷅lɛ̍ lē le̍ŋ chōo̍ kpe̍, mi̍ māsā bɛ̍ndōo̍ o̍ ve̍e̍lū wāŋnda̍ I̍chi̍pī a̍ wa̍ bōlle̍ŋ le̍ wa̍llo̍ a̍ chīa̍a̍ wa̍, a̍ I̍sɔ̄lūɛ̍i̍ya̍a̍ nda̍ hāndu̍ chāāŋāā ndāā chi̍a̍a̍ bōlle̍ le̍ wa̍llo̍ wa̍, mbo̍ dīmūl nda̍ āā,

⁷“Chɔ̍ŋ a̍ hāū, lā wa᷅ lɛ̄ chīa̍a̍ ha̍ā īfu̍e̍ēŋ o̍ īfu̍e̍ēŋ kē le̍ kpi̍līki̍o̍ŋ lɔ̄ɔ̍ le̍. Nda̍ pīla̍ ā wa̍ ni᷅ŋ kɔ̄la̍ŋ fu̍e̍ēŋnde̍ nūūvīa̍a̍ mā lūāā kpi̍līki̍o̍ŋ.

⁸Ndu̍yɛ̍ kpi̍līki᷅ŋ cho̍ nda̍ kūēē le̍ lɔ̄ɔ̍ lēpāa̍ o̍ lēpāa̍ wo̍ŋ, ī pīlɛ̍ bɛ̍ɛ̍ ī lo᷅ le̍ lɔ̄ɔ̍ le̍. Ā nɔ̄ mā chīŋa̍ mu̍ŋ sɔ̍dɔ̍. Le̍ mɛ̄ɛ̍ nda̍ chō wānāā sīɛ̄lɛ̍i̍ yɛ̍, nyɛ̄ kōŋ nda̍ chō ya̍ nyūnāa̍ ni̍, māā ya̍ I̍ ma̍l nda̍ mā kɔ̍ so̍lī sa̍lāla̍ŋ o̍ Mɛ̄lɛ̄ka̍ ndāa̍ lo̍.

⁹Le̍la̍ŋ, lā wa̍ ni᷅ŋ nda̍ kīndīlāa̍ a̍ wa̍llo̍ mbō hīōū māā pāāndū. Tē lā wa̍ ni᷅ŋ nda̍ kīndɔ̄ɔ̍ pɛ̍, mā nɔ̍ lɛ̍ fo̍ndā o̍ fo̍ndā nda̍ pɛ̄ŋgī le̍, ā nɔ̍lā lɛ̍ mā ya᷄ŋ nīla̍ŋ o̍ chōōlā fo̍ndōlā nda̍ chō nda̍ la̍ŋ di̍mūllo̍ la̍ŋ te̍.”

¹⁰O̍ ko̍ŋ, mi̍ wāŋnda̍ I̍chi̍pī a̍ wa̍ bōlle̍ŋ le̍ wa̍llo̍ a̍ chīa̍a̍ wa̍, a̍ I̍sɔ̄lūɛ̍i̍ya̍a̍ nda̍ hāndu̍ chāāŋāā ndāā chi̍a̍a̍ bōlle̍ wa̍ ā kūā, ma̍ kɔ̍ di̍mūl wāŋnda̍ I̍sɔ̄lūɛ̄ī āā, “Nyɛ̄ māsā bɛ̍ndōo̍ I̍chi̍pī o̍ dīmi̍ wo̍ ndu̍ cho̍ ho̍ō ni̍. Ō dīmi̍ māā, chɔ̍ŋ a̍ hāū ō cho̍ lɛ̄ wā nya̍ īfu̍e̍ēŋ o̍ īfu̍e̍ēŋ kē le̍ kpi̍līki̍o̍ŋ lɔ̄ɔ̍ le̍.

¹¹O̍ dīmi̍ māā, nya̍ pi̍la̍ lā wa̍ ni᷅ŋ fu̍e̍ēŋnde̍ nūūvīa̍a̍ bā o̍ bā nya̍ nɔ̄lā ndi̍ sɔ̄lā pɛ̍. Kɛ̍ ndu̍yɛ̍, māā kpi̍līki᷅ŋ cho̍ nya̍ kūēē le̍ lɔ̄ɔ̍ lēpāa̍ o̍ lēpāa̍ wo̍ŋ, māā ī pīlɛ̍ bɛ̍ɛ̍ ī lo᷅ le̍ lɔ̄ɔ̍ le̍. Mɛ̄ɛ̍ mī lā chīŋa̍ mu̍ŋ sɔ̍dɔ̍.”

¹²Chɔ̍ŋ ni᷅ŋ a̍ te̍le̍ŋ ko̍ŋ, wāŋnda̍ I̍sɔ̄lūɛ̄ī nda̍ pi̍la̍ nda̍ a̍a̍ nu̍u̍wā ni᷅ŋ fu̍e̍ēŋnde̍ le̍ kpi̍līki̍o̍ŋ lɔ̄ɔ̍ ni̍. Mālnɔ᷄ŋndo̍ mā tīu̍ o̍ lɛ̄ŋndē I̍chi̍pīle̍ŋ ni᷄ŋ kpo̍u̍ fu̍e̍ēŋnde̍ nūūvīa̍a̍.

¹³Mi̍ wāŋnda̍ I̍chi̍pī, a̍ nda̍ kɛ̄si̍ chīa̍a̍ bōlle̍ wa̍ ā wā ni̍ko̍ chīa̍a̍ ha̍ā kīndīlāa̍ mbo̍ hīāū māā pāāndū. Fo̍ndā o̍ fo̍ndā bɛ̍ɛ̍ nda̍ a̍a̍ ke᷅ lɛ̍ nda̍ le̍. Mā dīmūl nda̍ māā lēpāa̍ o̍ lēpāa̍ mɛ̄ɛ̍ mā chīŋa̍ kpi̍līki̍o̍ŋ lɔ̄ɔ̍ māā pa̍a̍ndū.

¹⁴Lēpāa̍ o̍ lēpāa̍ wāŋnda̍ I̍chi̍pī a̍ wa̍ bōlle̍ŋ le̍ wa̍llo̍ a̍ chīa̍a̍ wa̍, a̍ wa̍ I̍sɔ̄lūɛ̍i̍ya̍a̍ nda̍ hāndu̍ chāāŋāā ndāā chi̍a̍a̍ bōlle̍ wa̍ lɔ̄ɔ̍. Mā dīmūl nda̍ āā, “Vɛ᷅ lā chīŋa̍ ha̍ū kpi̍līki̍o̍ŋ lɔ̄ɔ̍ māā pāāndū le̍?”

¹⁵O̍ ko̍ŋ, mi̍ I̍sɔ̄lūɛ̍i̍ya̍a̍ nda̍ hāndu̍ chāāŋāā ndāā chi̍a̍a̍ bōlle̍ wa̍ ā kūā nāa̍ māsā bɛ̍ndōo̍ I̍chi̍pī chu̍a̍. Ma̍ kɔ̍ ŋɔ̍ɔ̍cha᷄ŋ nāa̍ ndu̍ chu̍ā, ma̍ dīmūl ndu̍ āā, “Bu̍ɛ̍i̍yāā nūmnda̍ na̍a̍ ŋ̄ chō ni̍ fāllo̍. Le̍la̍ŋ yāndi̍i̍, bi̍ī na̍a̍ nu̍a̍ā le̍.

¹⁶A̍ di̍mi̍ māā ā wa᷅ lɛ̄ na̍a̍ īfu̍e̍ēŋ kē le̍, ndu̍yɛ̍, māā mɛ̄ɛ̍ na̍a̍ ŋ̄ chīŋa̍ kpi̍līki̍o̍ŋ lɔ̄ɔ̍ māā pāāndū. Lēpāa̍ o̍ lēpāa̍ wānāā ŋ̄ kɛ̄si̍ na̍a̍ bōlle̍ wa̍ ā chō na̍a̍ lɔ̍ɔ̍, mā tūsī na̍a̍ nyɛ̄ pālāa̍ chōo̍. Ndu̍yɛ̍ ō cho̍ si̍ɛ̍lɛ̍i̍ nāā le̍ fāllo̍. Wānāā nūmnda̍ to̍sa̍ ni̍ ŋ̄ cho̍ lɛ̍ mu̍ŋ chīŋā lɔ̄ɔ̍ māā pāāndū le̍. Le̍la̍ŋ, yāndi̍i̍ fāllo̍, mɛ̄ɛ̍ mā to̍sa̍ īsɔ̄ɔ̍ o̍ sūɛ̍i̍ he̍ī ni᷅ŋ.”

¹⁷Mi̍ māsā bɛ̍ndōo̍ I̍chi̍pī di̍mūl nda̍ āā, “Lā chō wānāā sīɛ̄lɛ̍i̍ya̍a̍ bɛ̍ndū. Lā yēēma̍ mī lā tōsa̍ kpe̍ku̍ o̍ kpe̍ku̍ le̍. Nyɛ̄ ko̍ŋ nya̍ hīŋ nāa̍ ya̍ chu̍a̍ ni̍, māā ya̍ I̍ ma̍l nya̍ mī lā kɔ̍ sōlī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍.

¹⁸Lā mīīŋgu̍ lā kɔ̍ to̍sā wa̍llo̍. Lā sɔ̍lā lɛ̍ īfu̍e̍ēŋ o̍ īfu̍e̍ēŋ te̍, mɛ̄ɛ̍ mī nya̍ pi̍la̍ nūūwa̍ ni᷅ŋ ndi̍. Ndu̍yɛ̍ kpi̍līki᷅ŋ nya̍ nɔ̄ le̍ lɔ̄ɔ̍ lēpāa̍ o̍ lēpāa̍ wo̍ŋ mɛ̄ɛ̍ mī lā chīŋa̍ mu̍ŋ sɔ̍dɔ̍.”

¹⁹Mɛ̄ɛ̍ I̍sɔ̄lūɛ̍i̍ya̍a̍ nda̍ hāndu̍ chāāŋāā ndāā chi̍a̍a̍ bōlle̍ wa̍ ā tūēī, mi̍ māsā bɛ̍ndōo̍ I̍chi̍pī o̍ dīmī māā kpi̍līki᷅ŋ nda̍ nɔ̄ kūēē le̍ lɔ̄ɔ̍ o̍ pāa̍le̍ŋ ni᷄ŋ ndo̍ŋ māā ī pīlɛ̍ bɛ̍ɛ̍ ī lo᷅ le̍ lɔ̄ɔ̍ le̍, ma̍ sīnā māā dɛ̍nɛ̍ pa̍lāa̍ tōl nda̍ chōo̍.

²⁰Mɛ̄ɛ̍ nda̍ chīi̍ sūūki̍āŋndo̍ a̍ māsā bɛ̍ndōo̍, ma̍ māl ma̍ mīīŋgū. Mɛ̄ɛ̍ nda̍ wa̍ mīīŋgōo̍, ma̍ kōmāl Mūu̍sē nda̍ E̍lɔ̄ŋ, ā wa̍ nda̍ chūmndo̍.

²¹Ma̍ dīmūl nda̍ āā, “Nūm Mūu̍sē, nya̍ E̍lɔ̄ŋ, nya̍ to̍sa̍ ni̍, mi̍ dɛ̍nɛ̍ pa̍lāa̍ bɛ̄ndōo̍ ho̍ō ō kōmāl na̍a̍. Nya̍ to̍sa̍ ni̍ mi̍ māsā bɛ̍ndōo̍ I̍chi̍pī nda̍ wānāā ndūa̍a̍ ā tūl na̍a̍ lēyɛ̄. Ndu̍yɛ̍, ma̍ wā ni̍ŋ hāū na̍a̍ nyɛ̄ pālāa̍ ho̍ō tūsīo̍o̍ chōo̍. Le̍la̍ŋ, le̍ nyɛ̄ nya̍ tōsa̍ ko̍ŋ ndo̍, nu̍a̍ā Mɛ̄lɛ̄ka̍ Ya̍a̍wɛ̄ɛ̄ o̍ tu̍sī nya̍ nyɛ̄ pālāa̍ chōo̍ fɔ̍. Tē ō wa̍ māā yɔ̄ŋɔ̄ɔ̄ pɛ̍, nya̍ kpe̍e̍kpe̍i̍ sɔ̍ɔ̄ wāŋnda̍ ha̍ā mūɛ̄ī fāŋnde̍ o̍ bā ni̍ māā ā dīu̍ na̍a̍.”

²²Mɛ̄ɛ̍ Mūu̍sē tu̍e̍ī mɔ̍nɔ̍ŋ wāŋnda̍ I̍sɔ̄lūɛ̄ī a̍ wa̍ sūɛ̍i̍ yo̍ŋ, mbo̍ kūā mbo̍ kɔ̍ pi̍ɛ̍ī Mɛ̄lɛ̄ka̍. Mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, vɛ᷅ ma̍ chɛ̄l, ma̍ wā wānāā nūmnda̍ dɛ̍nɛ̍ pa̍lāā wāā nu̍a̍ā tūsīo̍o̍ chōo̍? Bāā, le̍ mī wānāā nūmnda̍ ā hu᷄ŋ sɔ̍lā nyɛ̄ pālāa̍ ŋ̄ vēm ya̍ vīōmɔ̄ɔ̍ ho̍ō ni̍?

²³Kāni̍ ni᷅ŋ mi̍ hu̍ŋ do̍u̍nu̍ŋ ma̍sā bɛ̍ndōo̍ I̍chi̍pī ko̍na̍ a̍ sūɛ̍i̍ he̍ī o̍kɔ̄ɔ̄, dɛ̍nɛ̍ pa̍lāa̍ tu̍ŋ nda̍ chō ni᷅ŋ wānāā nūmnda̍ tūsīo̍o̍ chōo̍ ni̍. Ndu̍yɛ̍, nyɛ̄ o̍ nyɛ̄ a̍ to̍sa̍ wɔ̍ o̍ sūɛ̍i̍ he̍ī ni᷅ŋ le̍ nda̍ bāŋā le̍.”