Read Southern Kisi Ɛ̍sɔ̍dɔ̍ɔ̄ 6 Bible Online

Ɛ̍sɔ̍dɔ̍ɔ̄ 6 - Southern Kisi bible

Ɛ̍sɔ̍dɔ̍ɔ̄ 6

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Mūu̍sē, ā chō ni̍ko̍ hu̍nɔ̄ɔ̄ chɔ̄ nyɛ̄ ya̍ I̍ cho̍ tōsā a̍ māsā bɛ̍ndōo̍ I̍chi̍pī wo̍. Nyɛ̄ ya̍ I̍ cho̍ hūnɔ̄ɔ̄ māsāa̍ I̍chi̍pi̍ tōsāl a̍ kpāāya̍ nī bɛ̍ndōo̍ wo̍, ndu̍ cho̍ tōsā ni̍, mbō kēle̍ŋa̍ wānāā nīa̍a̍ mālɔ̄ɔ̄ mā kūɛ̄. Ndu̍ pi̍la̍ kpe̍e̍kpe̍i̍ cho̍ nda̍ tōūwɔ̄ɔ̄ ni̍, mbō sōli̍ nda̍ o̍ lɛ̄ŋndē ndɔ̄le̍ŋ ni᷄ŋ.”

²Mi̍ Mɛ̄lɛ̄ka̍ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍, mbo̍ dīmūl ndu̍ āā, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

³Ya̍ chɔ̍mnu̍ŋ si̍ndɛ̄ fi̍nyāā nyāā ma̍māa̍, E̍bīlāha᷅m, a̍ Āa̍se̍, a̍ Che̍kɔ̍pū ni̍, mi̍ chɔ᷅m māā ya̍ cho̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ni̍. Kɛ̍, I̍ chɔ̍m nda̍ dīōlā nīla̍ di̍a̍ndāā la̍ŋ māā ya̍ le̍ cho̍ Mɛ̄lɛ̄ka̍ Ya̍a̍wɛ̄ɛ̄ le̍.

⁴O̍ ko̍ŋ kɔ̍ɔ̍lī, mi̍ yi̍ī kpe̍ma̍a̍ a̍ nda̍. Mi̍ chu̍e̍l nda̍ būŋgɛ̄i̍, māā I̍ cho̍ nda̍ lɛ̄ŋndē Ke̍nāŋnde̍ŋ ke̍. Le̍ŋ le̍ yɔ̍nūŋ ni̍ māā, lɛ̄ŋndē nda̍ wa̍ īchāli̍ le̍ni̍ŋ māā lāmīāl te̍ŋ.

⁵I̍ tu̍e̍ī cha᷄ŋ wāŋnda̍ I̍sɔ̄lūɛ̄ī a̍ cho̍ nāa̍ ya̍ chu̍a̍, a̍ bīyɔ̄ɔ̄ lēchɛ̄ wāŋnda̍ I̍chi̍pī a̍ cho̍ nda̍ wo̍. Ndu̍yɛ̍, I̍ cho̍ lōōnɔ᷄ŋ a̍ kpe̍ma̍ ya̍ yīi̍ a̍ fi̍nyāā ndāā ma̍māa̍ wo̍.

⁶Le̍la̍ŋ, di̍mu̍l wāŋnda̍ I̍sɔ̄lūɛ̄ī māā ya̍ Mɛ̄lɛ̄ka̍ dīmi̍ a̍a̍, ‘Wāŋnda̍ I̍sɔ̄lūɛ̄ī, ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. I̍ cho̍ hūnɔ̄ɔ̄ nya̍ sōlī o̍ chɛ̄le̍ŋ nde᷅ŋ ni᷄ŋ wāŋnda̍ I̍chi̍pī o̍ bā a̍ kpāāya̍ nī bɛ̍ndōo̍. Mī so̍li̍ nya̍ o̍ dɛ̍nɛ̍ pa̍lāā bɛ̄ndōo̍ ho̍ō ni̍ŋ. I̍ cho̍ hūnɔ̄ɔ̄ wāŋnda̍ I̍chi̍pī nyɛ̄ pālāā bɛ̄ndōo̍ tūsī chōo̍ a̍ kpāāya̍ nī bɛ̍ndōo̍, mī pi̍ŋi̍ yōōmūlā nyāla̍ŋ nda̍ o̍ bā.

⁷I̍ cho̍ tōsā mī lā si̍mnu᷄ŋ wa̍nāā ni̍, ndu̍yɛ̍ mī ya̍ I̍ wa̍ Mɛ̄lɛ̄ka̍ nya̍. Tē I̍ hu̍ŋ so̍lī nya̍ o̍ chɛ̄le̍ŋ nde̍ŋ ni᷄ŋ pɛ̍, o̍ ko̍ŋ nya̍ cho̍ sīnā ni̍ māā ya̍ Mɛ̄lɛ̄ka̍ Ya̍a̍wɛ̄ɛ̍ so̍li̍ nya̍ o̍ sāŋgāa̍ ho̍ō ni᷄ŋ wāŋnda̍ I̍chi̍pī ō bā ni̍.

⁸I̍ cho̍ nya̍ hūnɔ̄ɔ̄ sōlī o̍ chɛ̄le̍ŋ ni᷄ŋ, mī ku̍ɛ̄ a̍ nya̍ o̍ lɛ̄ŋndē nyāle̍ŋ ni᷄ŋ, lɛ̄ŋndē ya̍ I̍ chu̍e̍l sīndɛ̄ fi̍nyāā nyāā ma̍māa̍, E̍bīlāha᷅m, a̍ Āa̍se̍, a̍ Che̍kɔ̍pū būŋgɛ̄i̍ mi̍ me̍nāla᷄ŋ nda̍ ō kālā ka̍lā le̍ nda̍ kīo̍o̍ le̍ŋ, mī lā kɔ̍ wa᷅ lo̍ŋ. I̍ cho̍ tōsā, mī lē sīmnu᷄ŋ lɛ᷅ŋndē nyā. Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ so̍ō ni̍.’ ”

⁹O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ dīmu̍l Mūu̍sē, mi̍ Mūu̍sē kɔ̍ di̍mūl wāŋnda̍ I̍sɔ̄lūɛ̄ī. Kɛ̍, wāŋnda̍ I̍sɔ̄lūɛ̄ī a̍ ye̍ŋ ndu̍ lānī le̍, fo̍ndōle̍, kɔ̄ltā ndāla̍ŋ lā wa̍ lā tāmbɛ̍i̍, a̍ bīyɔ̄ɔ̄ lēchɛ̄ wāŋnda̍ I̍chi̍pī a̍ nda̍ wa̍ wo̍.

¹⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

¹¹“Kɔ̍ nāa̍ māsā bɛ̍ndōo̍ I̍chi̍pī chūa̍, mā dīmūl ndu̍ māā, ō ma᷄l wāŋnda̍ I̍sɔ̄lūɛ̄ī mā fūla̍ o̍ lɛ̄ŋndē ndɔ̄le̍ŋ ni᷄ŋ.”

¹²Kɛ̍, mi̍ Mūu̍sē di̍mūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄, I̍ so̍ō nāa̍ wāŋnda̍ I̍sɔ̄lūɛ̄ī chu̍a̍, a̍ cho̍ wānāā nīāā kɛ̍sɛ̍ kɛ̍si̍a̍a̍ wa̍, ā ye᷅ŋ ya̍ lānī le̍, bāā māsā bɛ̍ndōo̍ I̍chi̍pī ye̍e̍ma̍ ya̍ nīla̍ŋ yāŋɔ̄ɔ̍ ni̍? Ō ye̍ŋ ya̍ lānī le̍. Ndu̍yɛ̍ vɛ̍lɛ̄, I̍ cho̍ wa᷅na̍ cha̍a̍ īsɔ̄ɔ̍ le̍.”

¹³Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmūl Mūu̍sē nda̍ E̍lɔ̄ŋ āā, “Lā kɔ̍ mī lā kɔ̍ di̍mūl wāŋnda̍ I̍sɔ̄lūɛ̄ī a̍ māsā bɛ̍ndōo̍ I̍chi̍pī māā, ya̍ Mɛ̄lɛ̄ka̍ Ya̍a̍wɛ̄ɛ̄, ya̍ kpe̍e̍kpe̍i̍ di̍mu̍l nya̍ ni̍ māā lā si᷄m wāŋnda̍ I̍sɔ̄lūɛ̍i̍ lāchī mī lā sōli̍ nda̍ o̍ lɛ̄ŋndē I̍chi̍pīle̍ŋ ni᷄ŋ.”

¹⁴Ko̍na̍a̍ cho̍ ho̍ō a̍ wānāa̍ wa̍ bōllīī lāyu̍ŋgu̍e̍i̍ o̍ yu̍ŋgu̍la̍ I̍sɔ̄lūɛ̍i̍ya̍ chōo̍ wa̍ o̍kɔ̄ɔ̄ ni̍. Che̍kɔ̍pū, po̍ ndɔ̍ tāso̍o̍ wa̍ Lūbɛ᷅ŋ ni̍. Lūbɛ᷅ŋ ndu̍ o̍o̍ nɔ̍ pūa̍a̍ ā hīɔ̍ɔ̍lu̍, nda̍ cho̍ ha̍ā ni̍. Ha̍nɔ̍chī, a̍ Pa̍lū, a̍ Hɛ̍si̍lɔ̄ŋ, a̍ Ka̍a̍mī. Pūa̍a̍ hi̍ɔ̍ɔ̍lu̍a̍a̍ ha̍ā, nda̍ wa̍ bōllīī lāyu̍ŋgu̍e̍i̍ o̍ yu̍ŋgu̍la̍ fu̍la̍ o̍ pūlāle̍ fi̍nyā ndāle̍ŋ chōo̍ la̍ŋ ni̍.

¹⁵O̍ ko̍ŋ kɔ̍ɔ̍lī, Si̍mīɔ̄ŋ, po̍ Che̍kɔ̍pū wo̍, ō pīlɔ̍ɔ̍, ndu̍ ndu̍ o̍o̍ ve̍lū pūa̍a̍ ā ŋɔ᷄mpu᷅m, pūa̍a̍ ka̍ŋ cho̍ ha̍ā ni̍. Chɛ̍mūɛ̄ɛ̄ a̍ Cha̍mīŋ, a̍ Ōha̍dī, a̍ Cha̍chīŋ, a̍ So̍hāā, a̍ Si̍a̍yūl, ō Si̍mīɔ̄ŋ ve̍lū nda̍ chūā Ke̍na̍na̍i̍tīi̍nɔ̍ɔ̍ wo̍. Pūa̍a̍ ŋɔ᷄mpu᷅m nda̍ ha̍ā nda̍ wa̍ bōllīī lāyu̍ŋgu̍e̍i̍ o̍ yu̍ŋgu̍la̍ fu̍la̍ o̍ pūlāle̍ fi̍nyāā ndāa̍ chōo̍ la̍ŋ ni̍.

¹⁶Li̍va̍ī, po̍ Che̍kɔ̍pū wo̍ ō pīlɔ̍ɔ̍, ndu̍ o̍o̍ vēlū pūa̍a̍ ā yāa̍, pūa̍a̍ ka̍ŋ cho̍ ha̍ā ni̍. Ka̍a̍sīɔ̄ŋ, a̍ Ko̍ha̍tī, a̍ Mɛ̄lu̍a̍lūī. Pūa̍a̍ ya̍a̍ wa̍ ha̍ā nda̍ wa̍ bōlīī lā yu̍ŋgu̍e̍i̍ o̍ yu̍ŋgu̍la̍ fu̍la̍ o̍ pūlāle̍ fi̍nyāā ndāa̍ chōo̍ la̍ŋ ni̍. Li̍va̍ī chi̍i̍ wɔ̄sīla̍ŋ kɛ̄mɛ̄ a̍ be̍le̍-ya̍a̍ a̍ lā ŋɔ᷄mmɛ̍ū (137) mbo̍ wū.

¹⁷Ka̍a̍sīɔ̄ŋ, po̍ tāse̍ Li̍va̍īyo̍ ndu̍ o̍o̍ ve̍lū pūa̍a̍ a̍ ŋīɔ̍ɔ̍ŋ. Pūa̍a̍ ka̍ŋ cho̍ ha̍ā ni̍. Li̍bi̍nī a̍ Si̍mɛ̄ī. Ndu̍yɛ̍, mi̍ pūa̍a̍ ndu̍ āā ŋi̍ɔ̍ɔ̍ŋnda̍ ha̍ā ā kūī ma̍ vīālū chūāūwa̍ ta̍u̍ ta̍u̍.

¹⁸Ko̍ha̍tī, po̍ Li̍va̍īyo̍ ō pīlɔ̍ɔ̍, ndu̍ o̍o̍ ve̍lū pūa̍a̍ ā hīɔ̍ɔ̍lu̍. Pūa̍a̍ ka̍ŋ cho̍ ha̍a̍ ni̍. A̍mi̍lūām, a̍ I̍si̍hāā, a̍ Hi̍būlɔ̄ŋ, a̍ U̍sɛ̄ɛ̄l. Ko̍ha̍tī chi̍i̍ wɔ̍sīla̍ŋ kɛ̄mɛ̄, a̍ be̍le̍ yāa̍ a̍ lā yāa̍ (133) mbo̍ wū.

¹⁹Li̍va̍ī po̍ ndɔ̄ɔ̍ ō pīlɔ̍ɔ̍, ndu̍ yɔ̍nūŋ māā Mɛ̄lu̍a̍lūī ni̍, ndu̍ o̍o̍ ve̍lū pūa̍a̍ ā ŋīɔ̍ɔ̍ŋ, pūa̍a̍ ka̍ŋ cho̍ ha̍ā ni̍. Ma̍a̍lī, a̍ Mu̍u̍sī. Mɛ̄ɛ̍ Li̍va̍ī, yu̍ŋgu̍la̍ fu̍la̍ o̍ pūlālē ndɔ̄le̍ŋ chōo̍ la᷄ŋ, la̍ŋ cho̍ la᷅ŋ ni̍.

²⁰Ko̍ha̍tī, o̍ ve̍lū A̍mi̍lūām ndo̍, yēma̍ ndɔ̍ wa̍ Chōchɛ̄bɛ̍dī ni̍. Kɛ̍ mi̍ A̍mi̍lūām ō chu̍ā yēmāa̍ fi̍nyā ndɔ̄ ko̍ŋ o̍ nɔ̄ɔ̍ ni᷄ŋ, ma̍ chāl nda̍ ndu̍. Mɛ̄ɛ̍ A̍mi̍lūām nda̍ chūa̍a̍ ho̍ō nda̍ ve̍lū E̍lɔ̄ŋ nda̍ Mūu̍sē ni̍. A̍mi̍lūām chi̍i̍ wɔ̄sīla̍ŋ kɛ̄mɛ̄ a̍ be̍le̍-ya̍a̍ a̍ lā ŋɔ᷄mmɛ̍ū (137) mbo̍ wū.

²¹I̍si̍hāā, po̍ Ko̍ha̍tī wo̍ ō pīlɔ̍ɔ̍, ndu̍ ndu̍ o̍o̍ ve̍lū pūa̍a̍ ā ya̍a̍, pūa̍a̍ ka̍ŋ cho̍ ha̍ā ni̍. Ko̍lūā, a̍ Nɛ̍fɛ̍kī a̍ Si̍ki̍lī.

²²Ko̍ha̍tī, po̍ ndɔ̄ɔ̍ ō pīlɔ̄ɔ̍, ndu̍ yɔ̍nūŋ māā U̍sɛ̄ɛ̄l ni̍, ndu̍ ndu̍ o̍o̍ ve̍lū pūa̍a̍ ā ya̍a̍, pūa̍a̍ ka̍ŋ cho̍ ha̍ā ni̍. Mɛ̍si̍a̍kī, a̍ Ɛ̄līsa̍fāŋ, a̍ Si̍ti̍lūī.

²³E̍lɔ̄ŋ, la̍a̍ ndɔ̍ wa̍ Īlīsi̍ɛ̍bā, chūa̍ Āmi̍na̍da̍bī wo̍ ni̍, Na̍a̍sīɔ̄ŋ yēma̍ ndɔ̄. Mɛ̄ɛ̍ E̍lɔ̄ŋ nda̍ chu̍a̍a̍ ho̍ō ā ve̍lū Na̍da̍bī, a̍ Ābi̍hū, a̍ Ɛ̄li̍a̍a̍sā, a̍ I̍ta̍māā ni̍.

²⁴O̍ ko̍ŋ kɔ̍ɔ̍lī, Ko̍lūā, po̍ I̍si̍hāā wo̍ ō pīlɔ̍ɔ̍, ndu̍ ndu̍ o̍o̍ ve̍lū pūa̍a̍ ā yāa̍, pūa̍a̍ ka̍ŋ cho̍ ha̍ā ni̍. A̍sɛ̄ɛ̄ a̍ Ɛ̄li̍ka̍nāā, a̍ Ābīāsa̍fī. Pūa̍a̍ ya̍a̍wa̍ ha̍ā, nda̍ wa̍ bōllīī lāyu̍ŋgu̍e̍i̍ o̍ yu̍ŋgu̍la̍ fu̍la̍ o̍ pūlāle̍ Ko̍lūāāle̍ŋ chōo̍ la̍ŋ ni̍.

²⁵Ɛ̄li̍a̍a̍sā, po̍ E̍lɔ̄ŋ ndo̍ ō pīlɔ̍ɔ̍, la̍a̍ ndɔ̍ wa̍ chūa̍ Pu̍tīɛ̄l wo̍ ni̍. Ndu̍yɛ̍, ma̍ vīālū pōo̍ nda̍ chūa̍a̍ ho̍ō dīōla̍ŋ āā Fi̍ni̍ha̍a̍sī. Mɛ̄ɛ̍ yu̍ŋgu̍la̍ fu̍la̍ o̍ pūlāle̍ Li̍va̍īya̍ chōo̍ la̍ŋ, bōllīī ndɛ̍i̍ lāyu̍ŋgu̍e̍i̍ ndi̍ wa̍ ke̍ŋ ni̍.

²⁶Ndu̍yɛ̍ E̍lɔ̄ŋ ndo̍ ho̍ō, nda̍ Mūu̍sē, nda̍ Mɛ̄lɛ̄ka̍ vēm ni̍, le̍ mā kɔ̍ so̍lī wāŋnda̍ I̍sɔ̄lūɛ̄ī o̍ lɛ̄ŋndē I̍chi̍pī ni᷄ŋ, a̍ yu̍ŋgu̍la̍ ndāla̍ŋ chō kpo̍u̍.

²⁷Nda̍ ku̍ɛ̄ o̍ māsā bɛ̍ndōo̍ I̍chi̍pī lo̍ ni̍, ma̍ kɔ̍ di̍mūl ndu̍ le̍ mbō ma᷄l wāŋnda̍ I̍sɔ̄lūɛ̄ī mā fūla̍ o̍ lɛ̄ŋndē ndɔ̄le̍ŋ ni̍.

²⁸Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu̍ŋ Mūu̍sē o̍ lɛ̄ŋndē I̍chi̍pīle̍ŋ ni᷄ŋ,

²⁹mbō dīmūl ndu̍ a̍a̍, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Nyɛ̄ o̍ nyɛ̄ ya̍ I̍ di̍mu̍l nu̍m, kɔ̍ mā kɔ̍ di̍mūl māsā bɛ̍ndōo̍ I̍chi̍pī.”

³⁰Kɛ̍ mi̍ Mūu̍sē di̍mūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄, I̍ cho̍ wa᷅na̍ cha̍a̍ īsɔ̄ɔ̍ le̍. I̍ kɔ̍ bɛ̍ɛ̍ mī kɔ̍ so̍ō nāa̍ māsā bɛ̍ndōo̍ I̍chi̍pī chu̍a̍, ō ye᷅ŋ ya̍ ni̍ŋ la̍ni̍ le̍.”