Read Southern Kisi Ɛ̍sɔ̍dɔ̍ɔ̄ 9 Bible Online

Ɛ̍sɔ̍dɔ̍ɔ̄ 9 - Southern Kisi bible

Ɛ̍sɔ̍dɔ̍ɔ̄ 9

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ di̍mūl vɛ̄lɛ̄ Mūu̍sē āā, “Mūu̍sē, kɔ̍ nāa̍ māsā bɛ̍ndōo̍ I̍chi̍pī chūa̍ mā kɔ̍ di̍mūl ndu̍ māā ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Hi̍būlūi̍ya̍ I̍ di̍mi̍ a̍a̍, ‘Ma̍l wa̍nāā nīa̍a̍ mā kūɛ̄ mā kɔ̍ so̍o̍lūū ya̍.

²Tē ā hīōū lāchī a̍ nda̍ kɛ̄sīo̍o̍ o̍ chɛ̄le̍ŋ ni᷄ŋ pɛ̍, mā me̍l nda̍ le̍,

³ya̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ tōsā mī nāā wɔ̄ɔ̍ŋ bɛ̄ndū pūm ō de᷄l chɔ̄lūāā nyāa̍ chōo̍, mbō dīu̍ nda̍. Su̍a̍ā nūmnda̍ ni̍, sōfɛ̍li̍a̍a̍ ni̍, nyɔ̍mi̍a̍a̍ ni̍, a̍ nāūva̍, a̍ sāa̍, a̍ chūīŋnda̍, nāā wɔ̄ɔ̍ŋ ko̍ŋ chō hūnɔ̄ɔ̄ nda̍ di̍ū.

⁴Ndu̍yɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ cho̍ vɛ̄lɛ̄ yɛ̍ yi̍ɔ̍ɔ̍ chɔ̄m chɔ̄lūāā nyāa̍ tɛ̄ɛ̄ŋ, a̍ chɔ̄lūāā wāŋnda̍ I̍sɔ̄lūɛ̄ī. Wāŋnda̍ I̍sɔ̄lūɛ̄ī, chɔ̄lūāā ndāa̍ ki̍nɛ̍i̍ ō pīlɛ̍ bɛ̍ɛ̍ o̍ cho̍ wu̍ le̍.

⁵Ndu̍yɛ̍, pāa̍le̍ sīɔ̄dīi̍le̍ŋ kpe̍e̍kpe̍i̍ ya̍ Mɛ̄lɛ̄ka̍ Ya̍a̍wɛ̄ɛ̄ ya̍ I̍ cho̍ sūɛ̍i̍ he̍ī tōsā ni̍.’ ”

⁶O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mɛ̄ɛ̍ o̍ di̍mi̍ yɛ̍. Dīi̍mā ndɔ̄ɔ̍, mi̍ chɔ̄lūāā wāŋnda̍ I̍chi̍pī a̍ wu᷅ kpo̍u̍. Kɛ̍, wāŋnda̍ I̍sɔ̄lūɛ̄ī ki̍nɛ̍i̍, chɔ̄lūāā ndāa̍ ō pīlɛ̍ bɛ̍ɛ̍, o̍ vī le̍.

⁷O̍ ko̍ŋ, mi̍ māsāa̍ I̍chi̍pī o̍ vi̍ām wāŋnda̍ le̍ mā kɔ̍ to̍fā chɔ̄lūāā wāŋnda̍ I̍sɔ̄lūɛ̄ī, tē nyɛ̄ o̍ nyɛ̄ o̍ yɔ̄nu᷄ŋ nda̍ le̍. Ndu̍yɛ̍ mi̍ wānāā o̍ ve᷅m nda̍ ā mīīŋgū ma̍ dīmūl ndu̍ māā chɔ̄lūāā wāŋnda̍ I̍sɔ̄lūɛ̄ī ki̍nɛ̍i̍, ō pīlɛ̍ bɛ̍ɛ̍ o̍ yɔ̄nu̍ŋ nyɛ̍ le̍. Kɛ̍ a̍ ko̍ŋ kpo̍u̍, mbo̍ hīāū lāchī a̍ bōllē kālāle̍ŋ tōsāa̍. Ō chɛ᷄l mbō ma᷄l wāŋnda̍ I̍sɔ̄lūɛ̄ī mā kūɛ̄ le̍.

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē nda̍ E̍lɔ̄ŋ āā, “Lā kɔ̄ndu̍ pu᷅lta̍ŋ bāla̍ŋ cha̍, mī lā kūɛ̄ a̍ la̍ŋ ma̍sā bɛ̍ndōo̍ o̍ hɔ̄l. Tē lā kūɛ̄ pɛ̍, nūm Mūu̍sē, a̍ si᷄m a̍ wu̍u̍ pūltā lāŋ chōo̍ cho̍o̍ ma̍sā bɛ̍ndōo̍ o̍ hɔ̄l ō chē.

⁹O̍ ko̍ŋ, pūltā lāŋ lā chō sɛ̄ŋi᷄ŋ o̍ hūēīye̍ ni᷄ŋ, mɛ̄ɛ̍ chu̍ndo̍o̍ ō chāŋ nu̍a̍ā mbō sɛ̄ŋi᷄ŋ o̍ hūēīye̍ ni᷄ŋ yɛ̍, mī lā tīu̍ bā o̍ bā fe̍e̍ o̍ lɛ̄ŋndē I̍chi̍pīle̍ŋ ni᷄ŋ kpo̍u̍. Wāŋnda̍ I̍chi̍pī ni̍, chɔ̄lūāā ndāa̍ ni̍, pūltā lāŋ lā chō tōsā mī hīndɔ̄ɔ̄la̍ŋ lā fūla̍ nda̍ lēkɔ̄ɔ̍, mī lā sīmnu᷄ŋ pa̍ūve̍.”

¹⁰O̍ ko̍ŋ, Mūu̍sē ni̍, E̍lɔ̄ŋ ni̍, ma̍ tōsā mɛ̄ɛ̍ Mɛ̄lɛ̄ka̍ ō dīmu̍l nda̍ yɛ̍. Ma̍ kūā ma̍ kūāndū pūlta̍ŋ ma̍ kūā māsā bɛ̍ndōo̍ o̍ hɔ̄l. Mɛ̄ɛ̍ nda̍ kūɛ̄, mi̍ Mūu̍sē si᷅m māsā bɛ̍ndōo̍ o̍ hɔ̄l lo̍ŋ mbo̍ wūū la̍ŋ o̍ hūēīye̍ ni᷄ŋ chōo̍ cho̍o̍. O̍ ko̍ŋ, mi̍ pūltā lāŋ lā tōsā wāŋnda̍ I̍chi̍pī ni̍, chɔ̄lūāā ndāa̍ ni̍, mi̍ hīndɔ̄ɔ̄la̍ŋ lā fūlā nda̍ lēkɔ̄ɔ̍, mi̍ lā sīmnu᷄ŋ pa̍ūve̍.

¹¹Wānāā ma̍ŋgālāa̍ ō pīlɛ̍ bɛ̍ɛ̍ o̍ nɔ̄la̍ mbō fūla̍ Mūu̍sē o̍ hɔ̄l te̍, kāni̍ fo̍ndōle̍, nda̍ kpo̍u̍ mi̍ hīndɔ̄ɔ̄la̍ŋ lā fūlā nda̍ lēkɔ̄ɔ̍ mɛ̄ɛ̍ la̍ wa̍ wāŋnda̍ ā pīli̍a̍a̍ lēkɔ̄ɔ̍ yɛ̍.

¹²Mi̍ Mɛ̄lɛ̄ka̍ Ya̍a̍wɛ̄ɛ̄ ki̍ndī māsā bɛ̍ndōo̍ bōlle̍ŋ, ō ye᷄ŋ Mūu̍sē nda̍ E̍lɔ̄ŋ lānī le̍. Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē yɛ̍, le̍nde̍ ko̍ni̍ i̍ yɔ̄nu᷄ŋ ni̍.

¹³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ dīmūl Mūu̍sē āā, “Tē pāa̍le̍ŋ lē sɛ̄ pɛ̍ si̍ɔ̍dīi̍ pu̍u̍ŋ, ā chɛ᷄ŋ ā kūɛ̄ nāa̍ māsā bɛ̍ndōo̍ I̍chi̍pī chūā. Tē ā kūɛ̄ pɛ̍, a̍ kɔ̍ di̍mūl ndu̍ māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Hi̍būlūi̍ya̍ I̍ di̍mi̍ a̍a̍, ‘Ma̍l wa̍nāā nīa̍a̍ mā kūɛ̄ mā kɔ̍ so̍o̍lūū ya̍.

¹⁴Tē ā me᷄l nda̍ le̍, nūm ni̍, lāŋgba̍ā nūm a̍ ka᷅lla̍ ni̍, a̍ wāŋnda̍ I̍chi̍pī kpo̍u̍, nyɛ̄ pālāā ya̍ I̍ tu̍sī ni̍ŋ nya̍ chōo̍ wo̍, ō wā ni̍ŋ o̍ bɔ̍ɔ̍. O̍ ko̍ŋ, mī lā sīna̍ māā o̍ chi̍e̍ēŋndo̍ chōo̍ kpo̍u̍, māā mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ māā ya̍ le̍.

¹⁵I̍ nɔ̍ kpāāyāa̍, nūm ni̍, wāŋnda̍ I̍chi̍pī ni̍, mī ya̍ i̍i̍ tu̍si̍ nya̍ nāā wɔ̄ɔ̍ŋ bɛ̄ndōo̍ chōo̍, mī ya̍ i̍i̍ ba̍su̍ nya̍ tɛ̍ɛ̍.

¹⁶Kɛ̍, le̍ sa̍bū ya̍ chɛ̍l lɔ̄ nya̍ mi̍ lā wā wɔ̄ yōōmū wo̍ cho̍ ni̍, le̍ mī chɔ̍m nya̍ māā ya̍ Mɛ̄lɛ̄ka̍ wāna̍ kpāāya̍ bɛ̍ndōo̍ ya̍ I̍ cho̍ ni̍. O̍ ko̍ŋ, mī wāŋnda̍ kpo̍u̍ o̍ chi̍e̍ēŋndo̍ chōo̍, mā dīmi̍ a̍ ya̍ o̍kɔ̄ɔ̄.

¹⁷Kɛ̄, ma̍ wa̍ wɔ̄ yōŋgāa̍ kīōlɔ̄ɔ̍, ma̍ kɛ̄ɛ̄ māā a̍ me᷅l nda̍ mā kūɛ̄ mā kɔ̍ so̍o̍lūū ya̍ le̍.

¹⁸Kɛ̍ ndu̍yɛ̍, dɛ̍nɛ̍ pa̍lāā ya̍ I̍ cho̍ nya̍ tūsī chōo̍ o̍ la᷅ŋ ndo̍, ō wā ni̍ŋ o̍ bɔ̍ɔ̍. Sīɔ̄dīi̍ a̍ te̍le̍ŋ wa̍ā nu̍a̍ā, I̍ cho̍ lōōŋ kpu̍ŋgbāŋ bɛ̄ndo᷄ŋ yɔ̄ŋ o̍ lɛ̄ŋndē I̍chi̍pīle̍ŋ ni᷄ŋ kpo̍u̍. Lōo̍ŋ kpūndɛ᷅ŋ bɛ̄ndu᷄ŋ tu̍āl ni̍ŋ o̍ lɛ̄ŋndē I̍chi̍pīle̍ŋ ni᷄ŋ ndo̍ŋ, kāni̍ bɛ̍ɛ̍ mi̍ lɛ̄ŋnde᷅ŋ lē kīla᷄ŋ, lōōŋ wāā le̍nde̍, ŋ̍ tu̍l lɔ̍ le̍.

¹⁹Le̍la̍ŋ, chɔ̄lūāā nūmnda̍ ni̍, a̍ nyɛ̄ o̍ nyɛ̄ ŋ̄ nɔ̄ o̍ bɛ̍ɛ̄, to̍sa̍ mā lūe̍i̍ nda̍ chīɛ̄īla̍ŋ ni᷄ŋ, yɔ̄ŋi̍ nda̍ sɔ̄la̍ pīɔ̍mnda̍ŋ. Kāni̍ fo̍ndōle̍, wa᷅ŋndā chīe̍e̍ya̍ ni̍, vīsīa̍a̍ ni̍, tē ā lūe̍i̍ chi̍ɛ̍īla̍ŋ ni᷄ŋ te̍, mā wa̍ o̍ bɛ̍ɛ̄, lōōŋ kpu̍ŋgbāŋ bɛ̄ndo᷄ŋ chō nda̍ dēlī chōo̍ nda̍ kpo̍u̍ mā vi̍.’ ”

²⁰O̍ ko̍ŋ kɔ̍ɔ̍lī, māsā bɛ̍ndōo̍ I̍chi̍pī, lāŋgba̍ā ndūāā ka᷅lla̍ ā ti᷄ŋ, mɛ̄ɛ̍ nda̍ tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍, mi̍ sīōōŋnde̍ bīī nda̍, ma̍ kūā ma̍ kɔ᷄ hu᷅ŋ a̍ chīāā ndāa̍, a̍ chɔ̄lūāā ndāa̍, ma̍ lūēī nda̍ chīɛ̄īla̍ŋ ni᷄ŋ.

²¹Kɛ̍, wānāa̍ ye̍ŋ si᷅la̍ Mɛ̄lɛ̄ka̍ Ya̍a̍wɛ̄ɛ̄ wo̍ lānī le̍ wa̍, nda̍ ma̍ mɛ̄ī chīāā ndāa̍, a̍ chɔ̄lūāā ndāa̍ o̍ bɛ̍ɛ̄.

²²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “He̍e̍lu̍ ba᷅ nūmndo̍ chōo̍ cho̍o̍ mā tōsā mī lōōŋ kpu̍ŋgbāŋ kpūndɛ̍ŋ bɛ̄ndo᷄ŋ ŋ̄ tōl wāŋndā chi̍e̍e̍ya̍ chōo̍, a̍ vīsīa̍a̍ a̍ cho̍ chi̍ɛ̍i̍la̍ŋ ni᷄ŋ te̍ wa̍, a̍ yɔ̄mnde̍, a̍ tɔ̄lɔ̄ɔ̄la̍ŋ, a̍ bīllo̍ o̍ lɛ̄ŋndē I̍chi̍pīle̍ŋ ni᷄ŋ kpo̍u̍.”

²³O̍ ko̍ŋ, mi̍ Mūu̍sē he̍e̍lū tīnda̍ ndɔ̄ɔ̍ chōo̍ cho̍o̍. Mɛ̄ɛ̍ o̍ he̍e̍lu̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ lōōŋ kpu̍ŋgbāŋ kpūndɛ̍ŋ bɛ̄ndo᷄ŋ, la̍tūlu̍ a̍ ta᷅ŋnda̍ŋ. Nyɛ̄ ŋūāla̍lɛ̍ī, ŋūāla̍lɛ̍īyo̍ ō wa̍ kīōlōo̍, mī ta᷅ŋnda̍ŋ mā dēŋī kpa̍ŋgāŋgā kpāŋgāŋgā bɛ̄ndū. Lɛ̄ŋndē I̍chi̍pīle̍ŋ kpo̍u̍, bā o̍ bā lo̍ mī lōōŋ kpu̍ŋgbāŋ kpūndɛ̍ bɛ̄ndūŋ mu᷅ŋ ŋ̄ kɛ̄ɛ̍ dēlī lo̍ŋ te̍.

²⁴Lōōŋ kpu̍ŋbāŋ bɛ̄ndo᷄ŋ ŋ̍ wa̍ mu᷅ŋ I̍chi̍pī ni̍. Ta᷅ŋnda̍ŋ mā wa̍ dēŋīo̍o̍, mī lōōŋ kpu̍ŋgbāŋ bɛ̄ndo᷄ŋ dēlī. Ndu̍yɛ̍, nyɛ̄ ŋūāla̍lɛ̍ī ŋūāla̍lɛ̍ī bɛ̄ndōo̍ ō wa̍ kīōlōo̍ mi̍a̍ū mi̍a̍ū bɛ̄ndū. Kāni̍ bɛ̍ɛ̍ mi̍ I̍chi̍pī si̍mnu᷄ŋ lɛ̄ŋnde̍ŋ, lōōŋ kpu̍ŋgbāŋ wāā nu̍a̍ā ŋ̄ dēli̍ wɔ̍ lo̍ŋ te̍.

²⁵Nyɛ̄ o̍ nyɛ̄ wa̍ o̍ bɛ̍ɛ̄ o̍ lɛ̄ŋndē I̍chi̍pīle̍ŋ ni᷄ŋ, mi̍ lōōŋ kpu̍ŋgbāŋ bɛ̄ndo᷄ŋ mu᷅ŋ ŋ̄ tɛ̄ɛ̄mbūū mu̍ŋ kpo̍u̍. Wāŋnda̍ chi̍e̍e̍ya̍ ni̍, vīsīa̍a̍ ni̍, a̍ yɔ̄mnde̍, a̍ tɔ̄lɔ̄ɔ̄la̍ŋ, a̍ bīllo̍ kpo̍u̍ mbo̍ tāmbū.

²⁶O̍ lɛ̄ŋndē I̍chi̍pīle̍ŋ ni᷄ŋ ki̍nɛ̍i̍, fo̍nda᷄ŋ lo̍ su̍e̍e̍ lōōŋ kpu̍ŋgbāŋ bɛ̄ndo᷄ŋ mu᷅ŋ ŋ̄ tɛ̄ɛ̄mbu̍u̍ nyɛ̍ le̍ wo̍, mɛ̄ɛ̍ būŋgɛ̄i̍ Ku̍u̍sīɛ̄ŋnde̍, nāa̍ wāŋnda̍ I̍sɔ̄lūɛ̄ī a̍ wa̍ īchāli̍ wa̍.

²⁷Mɛ̄ɛ̍ māsā bɛ̍ndōo̍ chē nyɛ᷄ yɔ̍nu̍ŋ ndo̍, mbo̍ yɔ̄ŋ le̍ Mūu̍sē nda̍ E̍lɔ̄ŋ mā hīŋ. Mɛ̄ɛ̍ nda̍ hīŋ, mbo̍ dīmūl nda̍ āā, “I̍ si̍na̍ ni᷅ŋ kɛ̍sɛ̍ kɛ̍sɛ̍ māā, I̍ to̍sā yɔ̄ŋ wɔ̄ɔ̍ŋndo̍. Mɛ̄lɛ̄ka̍ Ya̍a̍wɛ̄ɛ̄ nɔ̍ di̍ ni̍. Ya̍ ni̍, a̍ wānāā nīa̍a̍, na̍a̍ ŋ̄ tɛ̍ɛ̍mbu̍u̍ ni̍.

²⁸Le̍la̍ŋ, lā yāndi̍i̍, lā nyɔ̄ɔ̄lu̍l na̍a̍ Mɛ̄lɛ̄ka̍ Ya̍a̍wɛ̄ɛ̄, mbō fāŋa̍ na̍a̍ dɛ̍nɛ̍ pa̍lāā bɛ̄ndōo̍ ho̍ō chōo̍, lōōŋ kpu̍ŋgbāŋ kpūndɛ̍ŋ bɛ̄ndo᷄ŋ mu᷅ŋ, a̍ ta᷅ŋnda̍ŋ ma᷅ŋ, mā hīōū ni᷅ŋ na̍a̍ māyōōmū. Le̍la̍ŋ, I̍ cho̍ nya̍ mālɔ̄ɔ̄ mī lā kūɛ̄. I̍ cho̍ lɛ̍ nya̍ kɛ̄sī I̍chi̍pī na̍ŋ te̍.”

²⁹Mi̍ Mūu̍sē di̍mi̍ āā, “Bālā tīɔ̍ɔ̍ŋ, ŋ̄ chɛ̍l. Dīmīo̍o̍ nu̍a̍ā mī ŋ̄ ma᷄l chi̍e̍e̍ na̍nu᷄ŋ, I̍ cho̍ lākɔ̄ bāla̍ŋ hēēlū, mī pi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ le̍ nya̍. Ndu̍yɛ̍, tē I̍ pīɛ̍i̍ Mɛ̄lɛ̄ka̍ pɛ̍, ta᷅ŋnda̍ŋ ma᷅ŋ ni̍, lōōŋ kpu̍ŋgba᷄ŋ cho̍ mu᷅ŋ dēlīo̍o̍ wo̍ŋ ni̍, nyɛ̄ o̍ nyɛ̄ chō pɛ̄ŋgī. Ndu̍yɛ̍, tē he̍ī ī yɔ̄nu᷄ŋ pɛ̍, ā chō sīnā māā chi̍e̍ēŋndo̍ kpo̍u̍, māā Mɛ̄lɛ̄ka̍ Ya̍a̍wɛ̄ɛ̄ nɔ̍ ni̍.

³⁰Kɛ̍, I̍ si̍nā māā nūm ni̍, lāŋgba̍ā nūm a̍ ka᷅lla̍ ni̍, lā nɔ̍ wɔ̍ i̍si̍o̍ōŋ o̍ īsīōōŋ le̍ Mɛ̄lɛ̄ka̍ Ya̍a̍wɛ̄ɛ̄ le̍.”

³¹A̍ te̍le̍ŋ lōo̍ŋ kpūndɛ̍ŋ bɛ̄ndo᷄ŋ mu᷅ŋ ŋ̄ dēli̍ wo̍, Fi̍la̍sīi̍yo̍ŋ, a̍ ba̍a̍līi̍yo̍ŋ, a̍ wi̍tīi̍yo̍ŋ, mu̍ŋ nda̍ a̍a̍ nɔ̍ o̍ chīɔ̍ɔ̍ŋ ni᷄ŋ ni̍. Fi̍la̍sīi̍yo̍ŋ mu̍ŋ chu̍u̍lu̍ wɔ̄ ko̍ sɛ̍nɛ̄ī ki̍nɛ̍i̍ o̍ chīɔ̍ɔ̍ŋ ni᷄ŋ. Ba̍a̍līi̍yo̍ŋ yɛ̄, dīūwɔ̄ɔ̍ ki̍nɛ̍i̍ mu̍ŋ di̍ū wɔ̄ sɛ̄nɛ̄ī o̍ chīɔ̍ɔ̍ŋ ni᷄ŋ ni̍. Fi̍la̍sīi̍yo̍ŋ, a̍ ba̍a̍līi̍yo̍ŋ, mi̍ lōōŋ kpu̍ŋgbāŋ kpūndɛ̍ŋ bɛ̄ndo᷄ŋ mu᷅ŋ ŋ̄ tɛ̄ɛ̄mbūū mu̍ŋ. Kɛ̍, wi̍tīi̍yo̍ŋ ki̍nɛ̍i̍, nyɛ̍ o̍ nyɛ̄ yɔ̄nu̍ŋ a̍ mu̍ŋ te̍. Kāni̍ fo̍ndōle̍, wūlɔ̄ɔ̍ ki̍nɛ̍i̍ mu̍ŋ vi᷅l lɔ̍ o̍ chīɔ̍ɔ̍ŋ ni᷄ŋ ni̍.

³²

³³Mɛ̄ɛ̍ Mūu̍sē nda̍ māsā bɛ̍ndōo̍ ā chīi̍ sūūki̍āŋndo̍, mi̍ Mūu̍sē fu̍lā, mbo̍ bīī kɔ̄la̍ŋ. Mɛ̄ɛ̍ o̍ fa̍ŋa̍ŋ chi̍e̍e̍, mbo̍ he̍e̍lu̍ bāla̍ŋ chōo̍ cho̍o̍ mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄. O̍ ko̍ŋ, pīɔ̍ɔ̍ wa̍ sīa̍a̍ wo̍ ni̍, ta᷅ŋma̍ wa̍ dēŋīo̍o̍ wa̍ŋ ni̍, lōōŋ kpu̍ŋgbāŋ wa̍ dēlīo̍o̍ wo̍ŋ ni̍, mi̍ nyɛ̄ o̍ nyɛ̄ pɛ̄ŋgī.

³⁴Mɛ̄ɛ̍ māsā bɛ̍ndōo̍ I̍chi̍pī o̍ che᷅ māā kpūndɔ̍ɔ̍ ho̍ō ō hīōū ndu̍ chōo̍, ndu̍ ni̍, lāŋgba̍ā ndūāā ka᷅lla̍ ni̍, ma̍ tōsā vɛ̄lɛ̄ yɔ̄ŋ wɔ̄ɔ̍ŋndo̍, ma̍ hīāū lāchī a̍ bōllē kālāle̍ŋ tōsāa̍ māā pāāndū.

³⁵Ndu̍yɛ̍, mi̍ māsāa̍ I̍chi̍pī o̍ hīāū lāchī a̍ bōllē kālāle̍ŋ tōsāa̍. O̍ chɛ᷄l mbō ma᷄l wāŋnda̍ I̍sɔ̄lūɛ̄ī mā kūɛ̄ le̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ sa̍na̍a̍ a̍ Mūu̍sē wo̍, mbo̍ yɔ̄nu᷄ŋ.