Read Southern Kisi Cho̍o̍bū 1 Bible Online

Cho̍o̍bū 1 - Southern Kisi bible

Cho̍o̍bū 1

¹Po̍ pi᷅lɛ̍ wa̍ o̍ lɛ̄ŋndē U̍sīle̍ŋ ni᷄ŋ dīōla̍ŋ āā Cho̍o̍bū. Wānā pi̍ɛ̍i̍yāā Mɛ̄lɛ̄ka̍a̍ pōo̍ ho̍ō ō wa̍ ni̍. Ō wa᷄ wānā kɛ̍ndɛ̄, ndu̍yɛ̍ ō wa᷄ sa̍kpō Mɛ̄lɛ̄ka̍ o̍ hɔ̄l. Ndu̍ o̍o̍ nɔ̍ bɛ̄ɛ̄le̍ŋ ta̍u̍ le̍ Mɛ̄lɛ̄ka̍, ndu̍yɛ̍ ndu̍ o̍o̍ to̍sā yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ te̍.

²Cho̍o̍bū ndu̍ o̍o̍ nɔ̍ chūāūwa̍ tɔ̍, pūa̍a̍ ā ŋɔ᷄mmɛ̍ū, wāŋ lāāndūa̍a̍ ā yāa̍.

³Ndu̍yɛ̍ wānā su̍lāa̍ pīla̍ Cho̍o̍bū o̍ wa̍ ni̍, ndu̍ o̍o̍ nɔ̍ sāa̍ wāa̍la̍ŋ lā ŋɔ᷄mmɛ̍ū (7,000), a̍ nyɔ̍mi̍a̍a̍ wāa̍la̍ŋ lā yāa̍ (3,000), a̍ nāūwāa̍ wāa̍, wāa̍ ō pīlɛ̍ (1,000), ndu̍yɛ̍ a̍ sōfɛ̍li̍a̍a̍ kɛ̄mɔ̄ɔ̍ lē ŋūɛ̍ɛ̍nu̍ (500). O̍ ko̍ŋ kɔ̍ɔ̍lī, ndu̍ o̍o̍ nɔ̍ vɛ̄lɛ̄ bu̍ɛ̍īya̍ ta̍u̍ ta̍u̍. Bā pāa̍le̍ŋ lē chāŋndo̍ ki̍nɛ̍i̍ ndu̍ ndu̍ o̍o̍ hi̍o̍ū sūl kpo̍u̍.

⁴Le̍ te̍le̍ŋ o̍ te̍le̍ŋ, pūa̍a̍ Cho̍o̍bū wa̍ nda̍ a̍a̍ nɔ̍ bɔ̄ŋa᷅ŋndā dīāā nyɛ̄ dīāāla̍ŋ tōsāa̍ nda̍ pi̍la̍ tɛ̄ɛ̄ŋ a̍ pālɛ̍i̍, o̍ lā nda̍ lo̍ chi̍ɛ̍ī ni̍ŋ. Ndu̍yɛ̍ nda̍ kpo̍u̍ tē pāa̍le̍ ō kɛ᷅ o̍ kɛ᷅ le̍e̍ fu̍u̍lu̍u̍ pɛ̍ le̍ bɔ̄ŋa᷅ŋ dīāā nyɛ̄ dīa̍a̍ ho̍ō tōsāa̍, ō vēēlu̍ yēmāa̍ ndāā ya̍a̍ wa̍.

⁵Tē ā bālu̍ bɔ̄ŋa᷅ŋndā dīāā nyɛ̄ dīāā la̍ŋ nda᷅ŋ bīyɔ̄ɔ̍ pɛ̍ kpo̍u̍, Cho̍o̍bū fi̍nyā ndā o̍ ve̍e̍lu̍ nda̍ nāa̍ pi᷅lɛ̍ le̍ mbō sōli̍ sa̍lāa̍ le̍ nda̍. Tē ō vēēlu̍ nda̍ nāa̍ pi᷅lɛ̍ pɛ̍, ō pēna̍ chɔ̄nɔ᷄ŋ ō sōli̍ sa̍lāla̍ŋ le̍ nda̍ ā pīlɛ̍ŋ pi̍lɛ̍ŋ nda̍ kpɛ̍ kpɛ̍. Lē te̍le̍ŋ o̍ te̍le̍ŋ, mɛ̄ɛ̍ mī Cho̍o̍bū ndu̍ o̍o̍ so̍li̍ sa̍lāla̍ŋ nda᷅ŋ le̍ chūāūwāā ndūa̍a̍. Le̍ sa̍bū ndu̍ o̍o̍ so̍lī sa̍lāla̍ŋ nda᷅ŋ le̍ nda̍ wo̍ cho̍ ni̍ māā mī ī yɔ̄nu̍ŋ dɔ̍ɔ̍ mī chūāūwāā ndūa̍a̍ ō pīlɛ̍ ō lo̍ sūɛ̍i̍ mbō bēndu᷄ŋ, mbō dīmi̍ dīōmndē wɔ̄ɔ̍ŋ a̍ Mɛ̄lɛ̄ka̍.

⁶Pāa̍le̍ pi᷅lɛ̍, mi̍ ki̍i̍la̍a̍ Mɛ̄lɛ̄ka̍a̍ ā kūā Mɛ̄lɛ̄ka̍ Ya̍a̍wɛ̄ɛ̍ lāchī le̍ mā kɔ̍ chɔ̍mnu᷄ŋ ndu̍. O̍ ko̍ŋ, Sēta̍nā[1] ndu̍ bɛ̍ɛ̍ mbo̍ hūŋ nda̍ tɛ̄ɛ̄ŋ.

⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ nyūnā ndu̍ āā, “Kūɛ̍ɛ̍nɛ̍ ŋ̄ wa᷄ yɛ̍?” Mi̍ Sēta̍nā mu̍lī āā, “I̍ wa̍ bālɔ̄ɔ̍ o̍ chi̍e̍ēŋndo̍ ni᷄ŋ, hēēlōo̍ mī tu̍u̍sū.”

⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ nyu̍nā ndu̍ āā, “Ma̍ chā bu̍ɛ̍ī nūu̍ Cho̍o̍bū? O̍ chi̍e̍ēŋndo̍ ni᷄ŋ ki̍nɛ̍i̍, wānā o̍ wāna̍ cho̍ māā ndu̍ le̍. Cho̍o̍bū cho̍ wāna̍ tōnya̍, ndu̍yɛ̍ ō chō sa̍kpō ya̍ Mɛ̍lɛ̄ka̍ o̍ hɔ̄l. Ō nɔ̄ bɛ̄ɛ̄le̍ŋ le̍ ya̍ ta̍u̍ ta̍u̍, ndu̍yɛ̍ ō to̍sā yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ te̍.”

⁹Mi̍ Sēta̍nā mu̍lī āā, “Ō cho̍ fu̍u̍le̍ Cho̍o̍bū o̍ nɔ̍ bɛ̄ɛ̄le̍ le̍ nūm te̍, nyɛ̄ ŋ̄ chō ndu̍ tōsāllo̍ wo̍.

¹⁰Le̍ te̍le̍ŋ o̍ te̍le̍ŋ ā chō Cho̍o̍bū māndāa̍ a̍ chīɛ̄ī ndɔ̄ɔ̍, ndu̍yɛ̍ a̍ nyɛ̄ o̍ nyɛ̄ o̍ nɔ̍. Ndūyɛ̍ ma̍ lō o̍ ko̍ŋ ma̍ dūāū ndu̍ sa̍lā o̍ nyɛ̄ o̍ nyɛ̍ ni᷄ŋ o̍ to̍sa̍, ma̍ tōsā mbo̍ sūl sūllo̍ pīla̍ a̍ chɔ̄lūa̍a̍. Chɔ̄lūāā ndūa̍a̍ ā chō ā tīūwāā lɛ̄ŋnde̍ŋ kpo̍u̍.

¹¹Kɛ̍ tē a̍ po̍o̍ndi̍a̍a̍ Cho̍o̍bū nyɛ̄m mu᷅ŋ o̍ bā pɛ̍ kpo̍u̍, Cho̍o̍bū cho̍ lāsīsi̍ nu̍m o̍ hɔ̄l mbō yīe̍i̍ nu̍m.”

¹²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl Sēta̍nā āā, “Bālā tīɔ̍ɔ̍ŋ, mɛ̄ɛ̍ nyɛ̄ o̍ nyɛ̄ Cho̍o̍bū o̍ nɔ̍ I̍ ma̍l nu̍m o̍ bā, to̍sa̍ nyɛ᷅ o̍ nyɛ̄ ŋ̄ yēēma̍ a̍ mu̍ŋ. Kɛ̍ ndu̍yɛ̍ yɔ᷅ŋ ndu̍ pi̍la̍ nyɛ̄ le̍.”

¹³Pāa̍le̍ pi᷅lɛ̍, chūāūwāa̍ Cho̍o̍bū wa̍ ā wa̍ o̍ bɔ̄ŋa᷅ŋ dīāā nyɛ̄ dīa̍a̍ chōo̍ o̍ bɛ̄ndā bɛ̍ndōo̍ lo̍ chi̍ɛ̍ī ni̍ŋ,

¹⁴mi̍ ki̍i̍la̍nɔ̍ɔ̍ hūŋ a̍ kīlta̍ŋ mbo̍ hu᷄ŋ di̍mūl Cho̍o̍bū āā, “Ŋ̄ wa᷄ wāa̍ o̍ chīɛ̍i̍ ni᷄ŋ a̍ nāūwa̍, mi̍ sōfɛ̍li̍a̍a̍ nda̍ wa̍ dīo̍la̍ŋ na̍a̍ īkɛ̄i̍.

¹⁵Mi̍ Sa̍a̍bīāŋnda̍ ā hu᷄ŋ de᷅l na̍a̍ chōo̍, chɔ̄lūāā kāŋ kpo̍u̍ ma̍ kūānu᷄ŋ a̍ nda̍. Bu̍ɛ̍i̍yāā nūmnda̍ ā pīli̍a̍a̍ kpo̍u̍ ma̍ dīū nda̍, mɛ̄ɛ̍ ya̍ pīlɛ̍ kpe̍ mi̍ hi̍a̍lu᷄ŋ mi̍ nya̍a̍nu᷄ŋ le̍ mī hu̍ŋ di̍mūl nu̍m.”

¹⁶Ō chō yōōŋgū kōŋ dīmīo̍o̍, mi̍ ō chēle̍ŋ ō hūŋ vɛ̄lɛ̄ a̍ yōōŋgōo̍. Mbo̍ hu᷄ŋ di̍mūl Cho̍o̍bū āā, “Ta᷅ŋnde̍ŋ lē de᷄l mi̍ lē dīū sāā nu̍mnda̍ kpo̍u̍, a̍ wānāā nūm a̍ ma̍ndāā lāsāa̍ lātūlu̍. Mɛ̄ɛ̍ ya̍ pīlɛ̍ kpe̍ mi̍ hi̍a̍lu᷄ŋ le̍ mī hu̍ŋ di̍mūl nu̍m.”

¹⁷Ndu̍ cho̍ yōōŋgū kōŋ dīmīo̍o̍, mi̍ ki̍i̍la̍nɔ̍ che᷅le̍ŋ ndu̍ hu᷅ŋ vɛ̄lɛ̄ a̍ yōōŋgōo̍. Mbo̍ hu᷄ŋ di̍mu̍l Cho̍o̍bū āā, “Cha̍a̍dīāŋnda̍ ā hīŋ ku̍ndāla̍ŋ lā yāa̍, ma̍ hu᷄ŋ de᷅l na̍a̍ chōo̍ ma̍ bīū nyɔ̍mi̍a̍a̍ kpo̍u̍ ma̍ kūānu᷄ŋ a̍ nda̍. Bu̍ɛ̍i̍yāā nūm a̍ wa̍ lo̍ŋ nda̍ kpo̍u̍ ā chīi̍ nda̍ dīū, mɛ̄ɛ̍ ya̍ pīlɛ̍ kpe̍ mi̍ hi̍a̍lu᷄ŋ le̍ mī hu̍ŋ di̍mūl nu̍m.”

¹⁸Ndu̍ cho̍ vɛ̄lɛ̄ yōōŋgū kōŋ dīmīo̍o̍, mi̍ ki̍i̍la̍nɔ̍ che᷅le̍ŋ hūŋ vɛ̄lɛ̄ a̍ yōōŋgōo̍. Mbo̍ hu᷄ŋ di̍mu̍l Cho̍o̍bū āā, “Chūāā nūmnda̍ ā lo᷄ o̍ bɔ̄ŋa᷅ŋ dīāā nyɛ̄ dīa̍a̍ chōo̍ o̍ bɛ̄ndā bɛ̍ndōo̍ lo̍ chi̍ɛ̍ī ni᷅ŋ,

¹⁹mi̍ hūēīyīī tɔ̍ɔ̍mɛ̍i̍ bɛ̄ndūe̍i̍ ī cha᷄ŋ ba᷅ po̍llo̍, mi̍ ī hu᷄ŋ lɔ̍ɔ̄ chīɛ̄īyo̍, mbo̍ kōmbā nda̍ chōo̍, nda̍ kpo̍u̍ ma̍ wū. Mɛ̄ɛ̍ ya̍ pīlɛ̍ kpe̍ mi̍ hi̍a̍lu᷄ŋ le̍ mī hu̍ŋ di̍mūl nu̍m.”

²⁰Mɛ̄ɛ̍ Cho̍o̍bū o̍ chi̍i̍ yōōŋgūla̍ŋ nda᷅ŋ tūēīyɔ̄ɔ̄ kpo̍u̍, mbo̍ cha᷄ŋ i̍si̍si̍, mbo̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍, mbo̍ sēndī yu̍ŋgu̍llo̍, le̍ kɔ̄l ndɔ̄ ta̍mbɛ̍i̍yo̍ chɔ̄mndo̍. Mbo̍ kɔ᷄ hi̍nī lɛ̄ŋ sa̍kpō, mbo̍ pīɛ̄ī Mɛ̄lɛ̄ka̍.

²¹Mbo̍ dīmī āā, “Fo̍ndō ya̍ I̍ fu̍la̍ kāla̍ nūu̍ o̍ dēmbē ni̍, ndu̍yɛ̍ fo̍ndō ya̍ I̍ cho̍ vɛ̄lɛ̄ mīīŋgū ni̍. Nyɛ̄ o̍ nyɛ̄ ya̍ i̍i̍ nɔ̍, Mɛ̄lɛ̄ka̍ Ya̍a̍wɛ̄ɛ̍ ke̍ ya̍ ni̍, ndu̍yɛ̍ ndu̍ ko̍ni̍ chu̍a̍ vɛ̄lɛ̄ ni̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄.”

²²A̍ sɔ̄ɔ̍ŋ pa̍la᷄ŋ ko̍ma̍l mu̍ŋ Cho̍o̍bū wo̍ŋ kpo̍u̍, Cho̍o̍bū to̍sa̍ yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ te̍, ndu̍yɛ̍ ō bi̍ī vɛ̍lɛ̄ Mɛ̄lɛ̄ka̍ tɔ̍ɔ̍ya̍ŋ le̍ nyɛ᷄ yɔ̍nu̍ŋ ndu̍ wo̍ le̍.