Read Southern Kisi Cho̍o̍bū 11 Bible Online

Cho̍o̍bū 11 - Southern Kisi bible

Cho̍o̍bū 11

¹O̍ ko̍ŋ kɔ̍ɔ̍lī mi̍ So̍fāā, Cho̍o̍bū chāa̍ŋ ndɔ̍ fu̍la̍ o̍ lɛ̄ŋndē Na̍a̍māle̍ŋ ni᷄ŋ ndo̍ ō dīmūl Cho̍o̍bū māā,

²Cho̍o̍bū, mɛ̄ɛ̍ mɛ̄ɛ̍ wāŋndo̍ wa̍ wa̍nā su̍a̍ā, mɛ̄ɛ̍ mbō ya᷄ŋ chāa̍ŋ ndɔ̄ wa᷅na̍ chi̍o̍o̍ nīla̍ŋ mbo̍ so̍ō, sūɛ̍i̍ bɛ̍ndū bɛ̍ndūe̍i̍ ī nɔ̍lā mī ī sīīŋgu̍u̍ nu̍m wāna̍ tōnya̍ le̍.

³Ā nɔ̄ o̍ kɔ̄l, le̍ sɔ̄ɔ̍ŋ fo̍ndōŋ ŋ̄ chō mu̍ŋ dīmīo̍o̍ wo̍ŋ, wānā mu̍lī nūm dīōm te̍? Tē a̍ ma̍m wānā pɛ̍ bāā wānā di̍mī a̍ ndi̍ o̍kɔ̄ɔ̄ le̍?

⁴Cho̍o̍bū a̍ chu̍a̍nu̍ŋ māā wāna̍ pɛ̄ɛ̄kūlā ndɔ̄la̍ŋ lā chō lā dīāndāā wa̍la̍ŋ nda̍ ŋ̄ chō ni̍. Ndu̍yɛ̍ māā ā chō Sa̍kpō Mɛ̄lɛ̄ka̍ o̍ hɔ̄l.

⁵Kɛ̍ tē Mɛ̄lɛ̄ka̍ ndu̍ o̍o̍ wa̍ wāna̍ so̍ō nāa̍ wānā chu̍a̍ pɛ̍, ō wa̍ nu̍m dīōm mūlī.

⁶Ō wa̍ nu̍m sɔ̄ɔ̍ŋ vi̍a̍ŋna᷄ŋ cho̍ a̍ kɔ̄l kālu̍ ndɔ̄ɔ̍ o̍kɔ̄ɔ̄ wo̍ŋ chɔ̄m, kɔ̄l kālu̍ Mɛ̄lɛ̄ka̍a̍ chō ō bɔ̄ɔ̍, wāna̍ chi̍e̍e̍ nɔ̍lā mā si̍na̍ a̍ ndu̍ o̍kɔ̄ɔ̄ le̍. Si̍na̍ pɛ̍ŋgu̍, māā Mɛ̄lɛ̄ka̍ ndu̍ o̍o̍ nɔ̍ mī ndu̍ o̍o̍ tu̍si̍ nu̍m dɛ̍nɛ̍ pa̍lāa̍ chōo̍ mī ndu̍ o̍o̍ hi̍o̍ū bɛ̍ɛ̍ ho̍ō.

⁷Sɔ̍ɔ̍ŋ cho̍ a̍ Mɛ̄lɛ̄ka̍ o̍kɔ̄ɔ̄ wo̍ŋ ŋ̄ yīŋgi̍la̍ ŋ̄ chō bɔ̄ɔ̍, a̍ nɔ̍lā mā si̍na̍ mu̍ŋ pɛ̄ŋgu̍ le̍. A̍ nɔ̍lā mā sīna̍ sɔ̄ɔ̍ŋ yi̍ŋgi̍lɛ̍i̍ ŋ̍ bɛ̄ndu᷄ŋ cho̍ a̍ Mɛ̄lɛ̄ka̍ kpu̍lu̍ŋgūma̍ bɛ̄ndōo̍ o̍kɔ̄ɔ̄ wo̍ŋ te̍.

⁸Kɔ̄l kālu̍ Mɛ̄lɛ̄ka̍a̍ chō ō bɔ̄ɔ̍, ō bāndu̍ ō hīōū ha̍la̍a̍ chōo̍ cho̍o̍, ndu̍yɛ̍ ō yīŋgi̍la̍ ō hīōū chi̍e̍e̍ pīɔ̍m, a̍ nɔ̍lā mā si̍na̍ ndu̍ pɛ̄ŋgu̍ le̍.

⁹Kɔ̄l kālu̍ ndɔ̄ɔ̍ chō ō bɛ̄ndū ō hīōū chi̍e̍ēŋndo̍ ho̍ō kpo̍u̍. Ndu̍yɛ̍ ō tōŋgū ō hīōū Pēe̍ Mɛ̄ŋmā Īhɛ᷄llo̍.

¹⁰Ā yɔ᷄ŋ bɛ̍ɛ̍ mī Mɛ̄lɛ̄ka̍ dīmi̍ māā ō chō nu̍m bīyɔ̄ɔ̍ mbō dɔ̄ū nu̍m o̍ chīɛ̄ī mānyūmndo̍ ni᷄ŋ, ɔ̄ɔ̄ mbō dīmi̍ māā ō chō kɔ̍ɔ̍sɔ̍ɔ̍ a̍ nūm, ō nɛ̄ɛ̍nɛ̍ cho̍ yɛ̄ mbō kūūna̍ ndu̍?

¹¹Mɛ̄lɛ̄ka̍ pɔ̍ū wa᷅na̍ dɛ̍nɛ̍ wɔ̍ɔ̍ŋndo̍ le̍. Fo̍ndōle̍ nyɛ̄ o̍ nyɛ̄ wɔ̄ɔ̍ŋ wāna̍ chi̍o̍o̍ ō chō tōsāa̍, Mɛ̄lɛ̄ka̍ chō chɔ̄ɔ̍ kpo̍u̍.

¹²Kɛ̍ dīɔ̄mndo̍ ndu̍ dīɔ̄mndo̍ o̍ cho̍ ni̍. Tē vīsī yōndōo̍ kūām pɛ̍ vi̍sī chi̍e̍e̍ni̍ŋ ndo̍, mɛ̄ɛ̍ dīɔ̄mndo̍ chō kɔ̄l kālo̍o̍ nɔ̄.

¹³Cho̍o̍bū, chɔ̍ɔ̍mu̍u̍ yɔ᷅ŋ nūm wɔ̍ɔ̍ŋndo̍ nāa̍ Mɛ̄lɛ̄ka̍ chūā, mā nyu̍na̍ ndu̍ mbō ma᷄l nūm le̍ yɔ̄ŋ nūm wɔ̍ɔ̍ŋndo̍.

¹⁴So̍li̍ ba᷅la̍ŋ o̍ yɔ̄ŋ wɔ̄ɔ̍ŋndo̍ ni᷄ŋ Cho̍o̍bū, mā to̍sa̍ mī yɔ̄ŋ wɔ̄ɔ̍ŋndo̍ fūla̍ o̍ nūmndo̍ chi̍ɛ̍ī ni̍ŋ.

¹⁵Tē a̍ to̍sa̍ ke̍ŋ pɛ̍ ā chō dīāllūŋ kāla᷄ŋ sɔ̄lā, ndu̍yɛ̍ mī kɔ̄l nūmndo̍ wa̍ o̍ dīāndāā wa̍la̍ŋ. A̍ wānūŋ ni̍ŋ, nyɛ̄ o̍ nyɛ̄ yɔ̍nūŋ a̍ nūm tē. Ndu̍yɛ̍ sīōōŋīī bi̍ī ni̍ŋ nu̍m le̍ nyɛ̄ o̍ nyɛ̄ le̍.

¹⁶Dɛ̍nɛ̍ pa̍lāa̍ cho̍ nu̍m ho̍ō chōo̍ wo̍, ā chō hūnɔ̄ɔ̄ pūɛ̄ɛ̄nu᷄ŋ a̍ ndu̍ mɛ̄ɛ̍ Mɛ̄ŋnda̍ŋ mā hīāūnūŋ nu̍a̍ā wānā yi̍yāŋ ndɛ̍ a̍ ma̍ŋ te̍ yɛ̍.

¹⁷Yōōmū nūmndo̍ chō hūnɔ̄ɔ̄ māŋgāla᷄ŋ, mbō mīīŋgū ō kɛ̄ndɛ̄. Dɛ̍nɛ̍ pa̍lāa̍ cho̍ nu̍m chōo̍ wo̍ ō chō hūnɔ̄ɔ̄ chūwɔ̄ɔ̄, mī dɛ̍nɛ̍ kɛ̍ndɛ̄ bɛ̄ndōo̍ wa̍ le̍ nūm.

¹⁸Ā wānūŋ ni̍ŋ sīōōŋīī bi̍ī nu̍m le̍ nyɛ̄ o̍ nyɛ̄ le̍, kāni̍ fo̍ndōle̍, ā nɔ̄ ni̍ŋ ti̍i̍nda᷄ŋndo̍ o̍ Mɛ̄lɛ̄ka̍ ni᷄ŋ le̍ nu̍m mālāa̍. Mɛ̄lɛ̄ka̍ wā ni̍ŋ nu̍m māndāa̍, ndu̍yɛ̍ mbō ke᷄ nu̍m kɔ̄l nyūlōo̍.

¹⁹Ā wānūŋ ni̍ŋ i̍hi̍ni̍ o̍ nu̍mndo̍ kpēlē wānā o̍ wānā nɔ̍lā ni̍ŋ mbo̍ lūe̍i̍ nu̍m īsīōōŋ te̍. Wānāā bɔ̄ɔ̍ bɔ̍ɔ̍ ā hūŋ ni̍ŋ nāa̍ nūm chu̍a̍ le̍ mālāa̍.

²⁰Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, ā wā ni̍ŋ hɔ᷅lte̍ŋ o̍ nɛ̄ī le̍ mālāa̍ kɛ̍ ā sɔ̍lā ni̍ŋ ndu̍ le̍. Ā nɔ̍lā ni̍ŋ mā hɛ̄lu̍ŋ nyɛ᷅ pālāa̍ bɛ̄ndu̍ tu̍āl ni̍ŋ nda̍ chōo̍ wo̍ le̍. Nyɛ̄ nda̍ wā ni̍ŋ le̍hɔ᷅l o̍ nɛ̄ī su̍e̍e̍ le̍ ndu̍ wo̍ ndu̍ wa᷅ ni̍ŋ pi̍ɔ̍mndo̍ nī.