Read Southern Kisi Cho̍o̍bū 12 Bible Online

Cho̍o̍bū 12 - Southern Kisi bible

Cho̍o̍bū 12

¹O̍ kɔ̍ŋ kɔ̍ɔ̍lī, mi̍ Cho̍o̍bū di̍mī māā,

²nya̍ su̍a̍ā le̍ chāāŋnda̍ ni̍. Tē lā hu᷄ŋ wu᷅ fɛ̍ɛ̍ŋ pɛ̍, lā vī a̍ kɔ̄l kālo̍o̍ o̍ chi̍e̍ēŋndo̍ ni᷄ŋ kpo̍u̍, wāna̍ kɔ̄l kālu̍ pi᷅lɛ̍ bɛ̍ɛ̍ ve̍ lɛ̍ le̍.

³Lā yi̍ya̍ŋ nu̍a̍ā māā lā kēndū kɔ̄l mi̍ lā hīāū ya̍ le̍. Lā si̍nā nyɛ᷅ o̍ nyɛ̄ mī lā hīōū ya̍ le̍. Sɔ̄ɔ̍ŋ nya̍ chō ya̍ mu᷅ŋ dīmūllo̍ ki̍nɛ̍i̍ yo̍ŋ wānā o̍ wānā cho̍ mbō kɛ̄ɛ̍ mu̍ŋ sīnā le̍.

⁴A̍a̍a̍, ya̍ wa̍ pāāndū tē I̍ nyu̍na̍ Mɛ̄lɛ̄ka̍ le̍ nyɛ̄ o̍ nyɛ̄ pɛ̍ ō mūli̍ ya̍ dīōm ndo̍ ya̍ kɛ̍i̍ chāāŋāā nīa̍a̍ ā sīīŋgu̍u̍ ni᷅ŋ nu̍a̍ā nyɛ̄ māmāā ni̍. Ya̍ wa᷅na̍ tōnya̍a̍, ya̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍, ya̍ si̍mnu᷄ŋ nu̍a̍ā wānā ma̍māā ni̍.

⁵Mbɔ̄ tē nyɛ̄ pālāā ve᷄ wa᷅ŋndo̍ chōo̍ le̍, ō si̍nā nyɛ᷅ kīndīlāa̍ chāa̍ŋ ndɔ̄ɔ̍ le̍ fɔ̍. Cha᷄ŋ ndɔ̄ wa᷅ o̍ sāŋgāa̍ ni᷄ŋ mī ndu̍ chɔ̍ɔ̍lū ndu̍ nyɛ̄ pālāā chēle̍ŋ tūsī chōo̍.

⁶Wānāa̍ cho̍ bɛ̍ɛ̍ kēīyo̍ nyɛ̄m pi̍la̍ŋ chūa̍a̍ wa̍ ā chōŋnu᷄ŋ a̍ kɔ̄ltā nyūlū o̍ lā nda̍lo̍ chi̍ɛ̍īla̍ŋ ni᷄ŋ. Wānāa̍ to̍sā mī Mɛ̄lɛ̄ka̍ dɔ̄ɔ̄nu᷄ŋ tu̍mbe̍ wa̍ nda̍ chōŋnu᷄ŋ o̍ pɛ̄ŋgīo̍o̍ ni᷄ŋ, nyɛ̄ o̍ nyɛ̄ yɔ̍nūŋ a̍ nda̍ le̍. Wāŋnda̍ ha̍ā dīāllūŋ ndāāŋ ka̍la̍ŋ ko̍ni̍ nda̍ tīīnda̍ŋ ni̍ māā mɛ̄lɛ̄ka̍ nda̍.

⁷Lā nyūna̍ wɔ̍ vi̍sīāā Mɛ̄lɛ̄ka̍ tōōsi̍a̍a̍ wa̍, ā chō nya̍ pɛ̄ɛ̄kū a̍ Mɛ̄lɛ̄ka̍ o̍kɔ̄ɔ̄. Tē ko̍ŋ te̍, lā nyūna̍ yōūwāa̍ ba̍lū ha̍ā chōo̍ cho̍ wa̍, ā nɔ̄lā mā dīmu̍l nya̍ a̍ ndu̍ o̍kɔ̄ɔ̄.

⁸Ɔ̄ɔ̄ lā nyūna̍ wɔ̍ tɔ̍lɔ̄ɔ̄la̍ŋ o̍ chi̍e̍ēŋndo̍ ni᷄ŋ, lā nɔ̄lā mī lā pɛ̄ɛ̄ku̍ nya̍ a̍ ndu̍ o̍kɔ̄ɔ̄. Tē lā nyūna̍ Sūūwa̍ o̍ pēēlo̍ pɛ̍, nda̍ chɔ̄m nya̍ vɛ̄lɛ̄ a̍ ndu̍ o̍kɔ̄ɔ̄.

⁹Nyāā ha̍ā kpo̍u̍ ā sīnā māā Mɛ̄lɛ̄ka̍ Ya̍a̍wɛ̄ɛ̍ to̍o̍si̍a̍a̍ ndā a̍ bālā ndɔ̄la̍ŋ ni̍.

¹⁰Nyɛ̄ o̍ nyɛ̍ cho̍ nyɛ̄ yōōmāā, yōōmū ndɔ̄ɔ̍ Mɛ̍lɛ̄ka̍ o̍ bā o̍ cho̍ ni̍. Na̍a̍ wāŋndā chīe̍e̍ya̍ bɛ̍ɛ̍, hūēīyīī na̍a̍ ŋ̄ yōōmū he̍ī ve̍, ndu̍ o̍ bā i̍ cho̍ ni̍.

¹¹Mɛ̄ɛ̍ nīle̍ŋ lē tūɛ̄ī nu̍a̍ā sūɛ̍i̍ mī lē sīna̍ ndi̍ pɛ̄ŋgu̍ yɛ̍, le̍nde̍ sōndōo̍ tōfā nyɛ᷅ dīa̍a̍ ni̍ mbō si̍na̍ ndu̍ pɛ̄ŋgu̍.

¹²Bɛ̄ndūāā māsīndīa̍a̍ kɔ̄l kālo̍o̍ pīla̍ nda̍ nɔ̄ ni̍, kāni̍ fo̍ndōle̍, wāŋndo̍ vīōū āchāl pɛ̍ ō sīna̍ sɔ̄ɔ̍ŋ pɛ̄ŋgu̍.

¹³Kɛ̍ Mɛ̄lɛ̄ka̍ nɔ̄ kɔ̄l kālo̍o̍ kpo̍u̍ o̍ bā ni̍, ndu̍yɛ̍ kpāāyāa̍ kpo̍u̍ ndu̍ o̍ bā o̍ cho̍ ni̍. Ō nɔ̄lā mbō chēnu᷄ŋ la̍chi̍, ndu̍yɛ̍ ō sīnā sɔ̍ɔ̍ŋ kpo̍u̍ pɛ̍ŋgu̍.

¹⁴Nyɛ̄ o̍ nyɛ̄ o̍ tɛ̍ɛ̍mbu̍u̍ pɛ̍, wa̍nā cho̍ mbō mīŋgi̍ ndu̍ tōōsīāā le̍. Tē ō bīī wānā o̍ wānā pɛ̍, wānā cho̍ mbō bāŋa̍ wānā ko̍ŋ te̍.

¹⁵Tē ō sāa̍ dɔ̍ɔ̍ pīɔ̍ɔ̍ pɛ̍ vēsāa̍ nyɛ̄ o̍ nyɛ̄ vēsā ni̍. Yālāā o̍ yɔ᷅ŋ mɛ᷅ŋmā hūna᷄ŋ o̍ chi̍e̍ēŋndo̍ chōo̍ le̍, nyɛ̄ o̍ nyɛ̄ cho̍ lēni᷄ŋ tāmbe̍i̍ o̍ ta̍mbū ni̍.

¹⁶Mɛ̄lɛ̄ka̍ chō wāna̍ kpāāyā bɛ̍ndū, le̍ te̍le̍ŋ o̍ te̍le̍ŋ ya̍a̍mɔ̍ɔ̍wa̍a̍ ndūa̍a̍ yōmɔ̄ɔ̍ o̍ ya᷅m nda̍ ni̍. Wānāā wāŋnda̍ hūī mā fāŋā nda̍ o̍ tōnya̍a̍ chōo̍ wa̍ ni̍, wānāa̍ hu̍ī wa᷅ŋnda̍ wa̍ ni̍, nda̍ kpo̍u̍ Mɛ̄lɛ̄ka̍ o̍ bā bɛ̄ŋgu̍ nda̍ chō ni̍.

¹⁷Mɛ̄lɛ̄ka̍ nɔ̄lā mbō lāāsi̍a̍a̍ wāŋ bɛ̄ndūa̍a̍ cho̍ wāŋnda̍ chīla̍ŋ nda̍ bōlle̍, mbō tōsa̍ mā sīmnu̍ŋ māā lā dīɔ̄m. Ō nɔ̄lā mbō tɛ̄ɛ̄mbu̍u̍ māsāa̍ kɔ̍ɔ̍sā a̍ wāŋnda̍ wa̍ bōlle̍, ā nɔ᷅ lɛ̍ kɔ̄l kālu̍ o̍ kɔ̄l kālu̍ le̍.

¹⁸Māsāā bɛ̍ndūa̍a̍ nɔ̍ kpāāyāla̍ŋ nda̍, Mɛ̄lɛ̄ka̍ nɔ̄lā mbō pūu̍ nda̍ kpāāyāla̍ la̍ŋ o̍ bā, mbō tōsa̍ mā sīmnu᷄ŋ chīa̍a̍.

¹⁹Ō nɔ̄lā mbō pūu̍ wānāā sōlīāā lāsa̍lāa̍ kpāāyāla̍ŋ o̍ bā, ndu̍yɛ̍ māsāā bɛ̍ndūa̍a̍ nɔ̍ kpāāyāla̍ŋ nda̍ mbō chīi̍ kpāāyāla̍ ndāla̍ŋ.

²⁰Wānāā wāŋnda̍ dūāū tīīnda᷄ŋndo̍ o̍ nda̍ ni᷄ŋ nda̍, Mɛ̄lɛ̄ka̍ nɔ̄lā mbō sāa̍ nda̍ sōndōla̍ŋ ā nɔ̍lā mā sōō ba̍kō le̍. Ndu̍yɛ̍ ō nɔ̄lā mbō tōsa̍ wānāa̍ cho̍ wāŋnda̍ chīla̍ŋnda̍ ā nɔ᷅ lɛ̍ tāāsi̍ o̍ tāāsi̍ le̍.

²¹Mɛ̄lɛ̄ka̍ nɔ̄lā mbō tɛ̄ɛ̄mbu̍u̍ wānāa̍ cho̍ wāŋnda̍ bōlle̍ wa̍ lābɛ̄ɛ̄ ndu̍yɛ̍ wānāa̍ nɔ̍ kpāāyāla̍ bɛ̄ndūla̍ŋ nda̍ mbō chīi̍ kpāāyāla̍ ndāla̍ la̍ŋ.

²²Ō nɔ̄lā mbō pīi̍ nyūmnda̍ŋ o̍ wāŋ vīlɛ̍i̍ya̍ lo̍ chi̍e̍e̍ mbō tōsa̍ mī fo̍ndāŋ mānyūm bɛ̄ndū kōŋ ō sīmnu᷄ŋ fo̍ndāŋ nyɛ̄ wa̍wo̍ŋ.

²³Ō nɔ̄lā mbō sīīŋgu̍u̍ lɛ̄ŋnde̍ lɛ̄ŋīī kpāāyɛ̄ī bɛ̍ndū, ndu̍yɛ̍ o̍ nɔ̄lā vɛ̍lɛ̄ mbō tɛ̄ɛ̄mbu̍u̍ ndi̍. Ō nɔ̄lā mbō tōsa̍ mī lɛ̄ŋnde̍ sīmnu᷄ŋ i̍ bɛ̍ndū, ō nɔ̄lā vɛ̍lɛ̄ mbō tōsa̍ mī lɛ̄ŋīī kēŋ ī tāmbu̍.

²⁴Māsāā bɛ̍ndūa̍a̍ cho̍ chi̍e̍ēŋndo̍ ho̍ō chīla̍ŋnda̍, Mɛ̄lɛ̄ka̍ nɔ̄lā mbō tɛ̄ɛ̄mbu̍u̍ nda̍ bōlle̍ ā nɔ᷅ lɛ̍ kɔ̄l kālu̍ o̍ kɔ̄l kālu̍ le̍. Ō nɔ̄lā mbō tōsa̍ mā wa̍ bālɔ̄ɔ̍ ā sēēmɛ̍i̍ya̍ o̍ po̍llo̍ ni᷄ŋ.

²⁵Mā wa̍ bālɔ̄ɔ̍ mɛ̄ɛ̍ wānāā sūmɛ̍i̍ya̍ ā bālū nu̍a̍ā a̍ bāla̍ŋ kēēlīa̍a̍ yɛ̍. Mɛ̄ɛ̍ wānāā kōlāa̍ ā bālū nu̍a̍ā a̍ mūɛ̄īya̍ŋ o̍ lāhɔ̄l ītāmu̍ ta᷅mu̍e̍i̍ yɛ̍, le̍nde̍ ndā wā ba̍lɔ̄ɔ̍ ni̍.