Read Southern Kisi Cho̍o̍bū 15 Bible Online

Cho̍o̍bū 15 - Southern Kisi bible

Cho̍o̍bū 15

¹O̍ ko̍ŋ kɔ̍ɔ̍lī, mi̍ Ɛ̄līfa̍a̍sī, Cho̍o̍bū, chāa̍ŋ ndɔ̍ fu̍la̍ Tɛ̍māŋ chi̍e̍e̍ wo̍, ō dīmūl Cho̍o̍bū, māā,

²Cho̍o̍bū, wāna̍ kɔ̄l kālo̍o̍ a̍ su̍ū māā dīɔ̄m te̍. A̍ di̍mī sɔ̍ɔ̍ŋ fo̍ndōŋ ŋ̄ chō mu᷅ŋ dīmīo̍o̍ wo̍ŋ te̍.

³Kɔ̍ɔ̍sɔ̍ kɔ̄l kālu̍ cho̍ le̍ ni̍ŋ te̍ wo̍ a̍ kɔ̍ɔ̍sā ndu̍ le̍. A̍ di̍mī di̍o̍mndā īdīɔ̄mndā wāā nu̍a̍ā le̍.

⁴Cho̍o̍bū, ā chō wāŋnda̍ Sīōōŋīi̍ Mɛ̄lɛ̄kɛ̍i̍ sōlī o̍ lākɔ̄l. Ā chō tōsā wāŋnda̍ pi̍ɛ̍ī lɛ̍ Mɛ̄lɛ̄ka̍ le̍.

⁵Nyɛ̄ nūm pi̍la̍ cho̍ sōli᷄ŋndo̍ o̍ so̍ndō wo̍, ndu̍ chɔ᷅m ni̍ māā wānā wɔ̍ɔ̍ŋndo̍ ŋ̄ chō ni̍. A̍ ye̍e̍ma̍ māyēēmāā mā kūmbū wɔ̄ūlē nūmnde̍ŋ a̍ sɔ̄ɔ̍ŋ sōndō yēēlɛ̍i̍yo̍ŋ dīmīo̍o̍.

⁶Cho̍o̍bū, mī ki̍lu̍l lɛ̍ nu̍m bɛ̍ɛ̍ i̍ya᷅ma̍ le̍, dīōmndā ŋ̄ chō sōli᷄ŋndo̍ o̍ sōndō la̍ŋ lā nɔ̄lā mī lā kīlu̍l nu̍m yāmɛ̍i̍. Nyɛ̍ cho̍ nu̍m fūlāa̍ o̍ sōndō wo̍ ndu̍ tɛ̍ndāl nu̍m se̍īle̍ŋ ni̍.

⁷Cho̍o̍bū, ā yi̍ya̍ŋ māā nu̍m cho̍ wāna̍ tāse̍ ve̍lu᷄ŋ o̍ chi̍e̍ēŋ ndo̍ chōo̍ wo̍ ni̍? A̍ ye̍e̍ma̍ mā di̍mi̍ māā lɔ̍ɔ̍pa̍ mi̍ Mɛ̄lɛ̄ka̍ tōōsīāā pēmbūŋ bɛ̄ndo᷄ŋ, nūm o̍o̍ ve̍lu᷄ŋ ni᷅ŋ?

⁸Bōōndi̍i̍ Mɛ̄lɛ̄ka̍ nda̍ ku̍ndā ndɔ̄ɔ̍ ā bīī bɔ̄ŋa᷅ŋndo̍ chōo̍ cho̍o̍ ve̍, nu̍m o̍o̍ wa̍ lo̍ŋ ma̍ tūɛ̄ī tūūlā Mɛ̄lɛ̄ka̍ ndu̍ o̍o̍ tu̍u̍ la̍ŋ? A̍ ye̍e̍ma̍ mā dīmi̍ māā nu᷄m pīlɛ̍ kpe̍ cho̍ wāna̍ kɔ̄l kālo̍o̍ o̍ chi̍e̍ēŋndo̍ chōo̍ ni̍?

⁹Ō yɛ̄ɛ̍nɛ̍ ŋ sīnā yɛ̄ na̍a̍ ŋ̄ si̍nā ndu̍ le̍? Yɛ̄ɛ̍nɛ̍ nūm sīnā yɛ̍ pɛ̄ŋgu̍ na̍a̍ ŋ̄ si̍nā ndu̍ pɛ̄ŋgu̍ le̍?

¹⁰Wānāā kɔ̄l kālu̍a̍a̍ bɛ̍ndūa̍a̍, a̍ wāŋ bɛ̄ndūāā māsīndīa̍a̍, ā nda̍ vēlū fi̍nyā nu̍m tāse̍ wa̍ nda̍ o̍ bākɔ̄ɔ̄ na̍a̍ ŋ̄ pɛ̄ɛ̄ku̍ ni̍.

¹¹Cho̍o̍bū, dīōm o̍ dīōm na̍a̍ ŋ̄ chō sūɛ̍i̍ nāa̍ nūm chu̍a̍, dīo̍m nyɔ̍ɔ̍lū nu̍m kɔ̄llo̍ wo̍ o̍ cho̍ ni̍. Ndu̍yɛ̍ Mɛ̄lɛ̄ka̍ ve᷅m na̍a̍ ni̍. Bāā dīōmndā kɔ̄l nyɔ̄ɔ̄lāālā Mɛ̄lɛ̄ka̍ chō nu̍m la᷅ŋ dīmūllo̍ kpo̍u̍ la̍ŋ, lā nɔ̍lā mī lā nyɔ̄ɔ̄lu̍ nu̍m kɔ̄llo̍ le̍?

¹²Vɛ᷅ ma̍ chɛ̄l mi̍ kɔ̄l nūmndo̍ fāŋā nu̍m o̍ nɛ̄i̍ Mɛ̄lɛ̄ka̍a̍ chōo̍? Vɛ᷅ mi̍ hɔ̄lta̍ŋ lā dīū nu̍m nu̍a̍ā a̍ tu̍mbo̍o̍?

¹³Ō yɛ̄ɛ̍nɛ̍ Mɛ̍lɛ̄ka̍ yɔ᷄ŋ yɛ̄ nu̍m Cho̍o̍bū ma̍ dūāūnu᷄ŋ tu̍mbe̍ wa̍ā nu̍a̍ā a̍ ndu̍, mā dīmī di̍ōmndā wāā nu̍a̍ā? Vɛ᷅ mi̍ dīōmndā wāā nu̍a̍ā lā wā nu̍m fūlāa̍ o̍ sōndō a̍ ndu̍?

¹⁴Vɛ̄ɛ̍nɛ̍ wa᷅na̍ chi̍o̍o̍ ō chō yɛ̄, mbō wa̍ ō dīāndāā Mɛ̄lɛ̄ka̍ o̍ hɔ̄l? Ɔ̍ɔ̄ wāna̍ chi̍e̍e̍ cho̍ mbo̍ wa̍ sa̍kpō Mɛ̄lɛ̄ka̍ o̍ hɔ̄l lo̍ Cho̍o̍bū?

¹⁵Ki̍i̍la̍a̍ Mɛ̄lɛ̄ka̍a̍ cho̍ chōo̍ cho̍o̍ wa̍ bɛ̍ɛ̍, Mɛ̄lɛ̄ka̍ lāāla̍ŋ a̍ nda̍ le̍. Nyɛ᷄m cho̍ bɛ̍ɛ̍ o̍ ha̍la̍a̍ ni᷄ŋ cho̍o̍ cho̍o̍ wo̍ŋ, ŋ̄ cho̍ ŋ̍ di̍a̍ndāā ndu̍ o̍ hɔ̄l te̍.

¹⁶Bāā wāna̍ chi̍e̍e̍ fo̍ndō fu̍u̍ cho̍ŋnu̍ŋ ho̍ō o̍ yɔ̄ŋ wɔ̄ɔ̍ŋndo̍ ni᷄ŋ lɔ̍ɔ̍ o̍ lɔ̍ɔ̍ wo̍, ndu̍ ye̍e̍ma̍ wā ō dīāndāā Mɛ̄lɛ̄ka̍ o̍ hɔ̄l ni̍? Mɛ̄ɛ̍ wāna̍ chi̍o̍o̍ kāāla̍ nu̍a̍ā mɛ̄ŋmā kōla᷄ŋ yɛ̍, le̍nde̍ ko̍ni̍ o̍ ka̍a̍la̍ yɔ̄ŋ wɔ̄ɔ̍ŋndo̍ tōsāa̍ ni̍.

¹⁷Cho̍o̍bū, ya̍ŋ ndɔ̍ ni᷅la̍ŋ I̍ di̍mūl nu̍m īsɔ̄ɔ̍. I̍ chɔ᷅m ndɔ̍ nu̍m nyɛ̄ ya̍ I̍ si̍nā wo̍ Cho̍o̍bū

¹⁸Wānāā kɔ̄l kālu̍a̍a̍ bɛ̍ndūa̍a̍, nda̍ chɔ̍m ya̍ sɔ̄ɔ̍ŋ kɔ̄l kālo̍ŋ ŋ̍ mu᷅ŋ ni̍. Ndu̍yɛ̍ nda̍ bɛ̍ɛ̍ fi̍nyāā ndāā ma̍māa̍ o̍ bā nda̍ sɔ̄la̍ pɛ̄ɛ̄kōo̍ ni̍. Nyɛ̄ o̍ nyɛ̄ nda̍ pɛ̄ɛ̄ku̍ fi̍nyāā ndāā ma̍māa̍ o̍ bā bɛ̄ŋgu̍, ō pīlɛ̍ bɛ̍ɛ̍ ā vi᷄ŋ na̍a̍ ndu̍ le̍.

¹⁹Wānāā kɔ̄l kālu̍a̍a̍ ha̍ā lɛ̄ŋndē Mɛ̄lɛ̄ka̍ ke̍ le᷅ŋ, fi̍nyāā ndāā ka̍ŋ nde̍ŋ lēkāa̍ o̍ lēkāa̍ che᷅le̍ŋ lē ve̍ nda̍ tɛ̄ɛ̄ŋ te̍. Lēkāa̍ o̍ lēkāa̍ le̍ ve̍ nda̍ tɛ̄ɛ̄ŋ le̍ fa̍ŋā nda̍ kɔ̄llo̍ o̍ Mɛ̄lɛ̄ka̍ lo̍ le̍.

²⁰Cho̍o̍bū, wānāā dɛ̍nɛ̍ wɔ̍ɔ̍ŋāa̍ tu̍sī ha̍ā wāŋnda̍ dɛ̍nɛ̍ pa̍lāa̍ chōo̍ wa̍ nda̍ nyɛ̄ pālāā bɛ̄ndōo̍ Mɛ̄lɛ̄ka̍ hāndū nda̍ chōo̍ ni̍, Ndu̍yɛ̍ nyɛ̄ pālāa̍ Mɛ̄lɛ̄ka̍ hāndū nda̍ chōo̍ wo̍, a̍ lo̍ le̍ni̍ŋ ha̍a̍a̍ a̍ mɛ̄ɛ̄lu̍la̍ yōōmūlā ndāla̍ŋ.

²¹Le̍ te̍le̍ŋ o̍ te̍le̍ŋ bɔ̄ɔ̄lūu̍ lu̍e̍ī nda̍ sīōōŋīī bɛ̄ndūe̍i̍ yo̍, ndu̍ ko̍ni̍ nda̍ wā tūēīnɔ᷄ŋndo̍ o̍ la̍ni̍ ni̍. Bōōndi̍i̍ nda̍ wā yi̍ya᷄ŋndo̍ māā nyɛ̄ ō nyɛ̄ chō ō kɛ̄ndɛ̄ a̍ nda̍ ve̍ vīīya̍ hu᷄ŋ de̍l nda̍ chōo̍ ā kūɛ̄nu᷄ŋ a̍ nyɛ̄m nda̍ŋ.

²²Yīya᷄ŋ o̍ yīya᷄ŋ ve᷅ lɛ̍ nda̍ māā ā chō fūlā o̍ nyɛ̄ pālāa̍ ni᷄ŋ te̍, kāni̍ fo̍ndōle̍, ā sīnā māā ā nɔ̄ le̍ nda̍ hūnɔ̄ɔ̍ dīūwo̍ a̍ mɔ̄ɔ̄ŋ fāŋndo̍ŋ.

²³Ā lō bālɔ̄ɔ̍ le̍ nyɛ̄ nda̍ dīā wo̍ ha̍a̍a̍ mā sɔ̄la̍ pīɔ̍mndo̍, mī yi̍bɛ̍i̍ya̍ dē dīāllūŋ ndāāŋ vi̍lɛ̍i̍yo̍ŋ. Wāŋnda̍ ha̍ā ā sīnā ni᷅ŋ māā nyɛ̄ pālāā bɛ̄ndōo̍ chō nda̍ lāchī.

²⁴Sīōōŋīī bɛ̄ndūe̍i̍ chō ndā hūnɔ̄ɔ̄ bīyɔ̄ɔ̄ a̍ nyɛ̄ pālāā bɛ̄ndu̍ kpu̍wā ni̍ŋ nda̍, ndu̍yɛ̍ mī sāŋgāa̍ tōl nda̍ chōo̍ wo̍. Mɛ̄ɛ̍ māsā bɛ̍ndōo̍ chūā nu̍a̍ā So̍vɛ̄i̍ya̍a̍ ndūa̍a̍ mbō kɔ̍ chi᷅ŋa̍la᷅ŋ ya̍a̍mɔ̍ɔ̍wa̍a̍ ndūa̍a̍ yɛ̍, le̍nde̍ sɔ̄ɔ̍ŋ sa̍lā tīɔ̍ɔ̍ŋndo̍ŋ mu̍ŋ ŋ chīŋa̍la᷅ŋ ni̍ŋ nda̍ ni̍.

²⁵Kāni̍ fo̍ndōle̍, le̍ mɛ̄ɛ̍ o̍ Si̍mu̍l Mɛ̄lɛ̄ka̍ Kpu̍lu̍ŋgūma̍ Bɛ̄ndōo̍ a̍ sɔ̍ŋgɔ̄ɔ̍ mbo̍ wā ku̍u̍ba̍le̍ ndāle̍ŋ chɔ̄mndo̍ a̍ ndu̍ yɛ̍.

²⁶Wāŋnda̍ ha̍ā ā chō wānāā yōŋgāā bɛ̍ndū. Ā kēndū bōlle̍ fāŋā. Ā bīī ma̍ chūā nyɛ̄lā kālā ka̍lālā pūa̍a̍ chɔ̄ūwa̍ bīī o̍ lābā le̍ nda̍ māndāa̍ la̍ŋ, ma̍ wā Mɛ̄kɛ̄ka̍ kūēllo̍ a̍ la̍ŋ o̍ lābā le̍ sɔ̍ŋgɔ̄ɔ̍.

²⁸Kɛ̍ ndu̍yɛ̍ chi̍e̍e̍ŋ nda̍ chō mu᷅ŋ ni̍ŋ ndo̍ŋ, ŋ̄ chō hūnɔ̄ɔ̄ sīmnɔ᷄ŋ la̍pɔ᷅m. Chīɛ̄īlā nda̍ chō la̍ŋ le̍ni̍ŋ nda̍ŋ kpo̍u̍, lā chō hūnɔ̄ɔ̄ sīmnɔ᷄ŋ la̍fo̍ndō fōndo̍. Ya̍a̍mɔ̍ɔ̍wa̍a̍ chō la̍ŋ hūnɔ̄ɔ̄ pēsī pēsī.

²⁹Sūltā ndāla̍ŋ lā chō hūnɔ̄ɔ̄ mɛ̄ɛ̄lū. Nyɛ̄ o̍ nyɛ̄ nda̍ nɔ̄ ō pīlɛ̍ bɛ̍ɛ̍ lɔ̍ ni̍ŋ nda̍ o̍ bā lē. Nyɛ̄m ndāa̍ŋ ve᷅ lɛ̍ ni̍ŋ ba̍lɔ̄ɔ̍ o̍ lɛ̄ŋnde̍ ni᷄ŋ te̍.

³⁰Dɛ̍nɛ̍ pa̍lāa̍ wā ni̍ŋ nda̍ chōo̍ le̍ te̍le̍ŋ o̍ te̍le̍ŋ. Mɛ̄ɛ̍ lɛ̄wūŋ yɔ̄mndo̍ ŋ̄ ŋūā nu̍a̍ā kpo̍u̍, mī chīyīī ŋūālɛ̍i̍ ke̍ŋ ī lo᷄ ni᷅ŋ īsīsi̍ yɛ̍, le̍nde̍ i̍ yɔ̍nūŋ ni̍ŋ a̍ nda̍ ni̍.

³¹Kāni̍ fo̍ndōle̍, nyɛ̍m cho̍ nyɛ̄m fo̍ndo᷄ŋ ndo̍ŋ, mu̍ŋ nda̍ tīīnda̍ŋ ni̍ māā ŋ̄ nɔ̄lā mī ŋ̄ māla̍ nda̍, kɛ̍ ndu̍yɛ̍ ā hūi̍ nda̍ pi̍la̍. Nyɛ̄m nda̍ tīīnda̍ŋ mu̍ŋ ndo̍ŋ, ŋ̄ nɔ̍lā ni̍ŋ mī ŋ̄ māla̍ nda̍ le̍.

³²Wānāā dɛ̍nɛ̍ wɔ̍ɔ̍ŋnda̍ ha̍ā, ī yɔ̄nūŋ ni̍ŋ ko̍ a̍ nda̍ mɛ̄ɛ̍ yɔ̄mndo̍ kāndū nu̍a̍ā pūīyo̍ sɛ̄nɛ̄ī mbō vēsa̍ŋ o̍ lēpīlɛ̍ ni᷄ŋ yɛ̍.

³³Mɛ̄ɛ̍ yɔ̄m mākīle̍pīi̍yo̍ kūām nu̍a̍ā mā di̍ū le̍ mī mā chūū chīɛ̄ɛ̄lɔ᷄ŋ yɛ̍, le̍nde̍ i̍ yɔ̍nūŋ ni̍ŋ a̍ nda̍ ni̍. Ā wā ni̍ŋ ko̍ mɛ̄ɛ̍ yɔ̄m ɔ̄li̍fīi̍yo̍ ō yāndū nu̍a̍ā Sɛ̄nɛ̄ī mbō chūū chīɛ̄ɛ̄lɔ᷄ŋ kpo̍u̍ yɛ̄.

³⁴Wānāa̍ kɛ̍ɛ̍ Mɛ̄lɛ̄ka̍ wa̍ ki̍nɛ̍i̍, a̍ chō hūnɔ̄ɔ̄ wu᷄, ndu̍yɛ̍ ā mɛ̍ī ni̍ŋ chu̍ā o̍ chūā le̍. Wānāa̍ ke̍ī wa᷅ŋnda̍ lūɛ̄īyɔ̄ɔ̄lā ni᷄ŋ nda̍ŋ bi̍yɔ̄ɔ̍ o̍ lābā wa̍, chīɛ̄īlā nda̍ chō tāŋgūllo̍ ā nyɛ̄m mu᷅ŋ nda̍ŋ, lā chō hūnɔ̄ɔ̄ sāā o̍ yīŋ mī lā ŋūɛ̄ kpo̍u̍.

³⁵Wāŋnda̍ ha̍ā le̍ te̍le̍ŋ o̍ te̍le̍ŋ, sɔ̄ɔ̍ŋ wɔ̍ɔ̍ŋndo̍ŋ ko̍ni̍ nda̍ tūūnūŋ o̍ lākɔ̄l le̍ wāŋnda̍ nyɛ̄ pālāa̍ tūsīo̍o̍ chōo̍ ni̍. Le̍ te̍le̍ŋ o̍ te̍le̍ŋ, ā chō nɛ̄īla̍ŋ nūūwāa̍ le̍ mɛ̄ɛ̍ nda̍ lōōkū wa᷅ŋnda̍ hūī yɛ̍.